Setembru

Jesus hatudu katak nia hanoin Marta no Maria. Bainhira nia haree sira triste tanba sira-nia alin Lázaro mate, “Jesus nia matan-been suli”. (João 11:32-35) Maski Jesus hatene katak nia atu fó moris-hiʼas ba Lázaro, maibé nia tanis. Neʼe laʼós deʼit tanba nia lakon ninia belun diʼak maibé tanba nia komprende no hatene katak ninia belun sira sente triste loos tanba Lázaro mate. Ita kontente duni tanba hatene katak Jesus hanoin ema. Ita hadomi nia tanba nia hanoin ema seluk. Ita hetan anima tanba hatene katak agora nia ukun daudaun nuʼudar Liurai iha Maromak nia Ukun. Lakleur tan nia sei halakon susar hotu. Tanba Jesus uluk moris nuʼudar ema, nia mak bele hadiʼa situasaun susar no terus neʼebé mosu tanba Satanás nia ukun. Tuir loloos, diʼak duni ba ita tanba ita iha Ukun-Naʼin neʼebé “komprende ita-nia fraku sira”.​—Ebr 2:17, 18; 4:15, 16. w19.03 p. 17 par. 12-13

Ita ajuda ema seluk aprende kona-ba Jeová, maibé ita la mesak atu halo serbisu neʼe. (1 Kor 3:6, 7) Jeová mak dada ema ba nia. Ikusmai, ema ida-idak bele deside atu simu ka la simu liafuan diʼak, no neʼe depende ba sira-nia laran. (Mt 13:4-8) Hanoin-hetan katak ema barak la simu Jesus nia mensajen, maski nia mak Mestre diʼak liu! Entaun, ita labele sai laran-kraik se ema barak neʼebé ita koko atu ajuda la rona ba ita-nia mensajen. Ita sei hetan rezultadu diʼak bainhira ita hanoin ema iha serbisu haklaken. Ita sei gosta liután atu haklaken. Ita sei sente kontente tebes tanba ita fó ba ema seluk. No ita sei halo fasil ba ema neʼebé “prontu atu simu lia-loos neʼebé lori ba moris rohan-laek” hodi rona liafuan diʼak. (Após 13:48) Tan neʼe, “kuandu sei iha oportunidade, mai ita halo buat neʼebé diʼak ba ema hotu”. (Gal 6:10) Ita sei sente kontente tanba ita fó glória ba ita-nia Aman iha lalehan.​—Mt 5:16. w19.03 p. 25 par. 18-19

Liurai David hakerek: “Jeová mak boot liu no merese duni atu simu hahiʼi.” (Sal 145:3) David hadomi Jeová, no neʼe book nia atu fó hahiʼi ba Maromak “iha kongregasaun nia leet”. (1 Krón 29:10-13; Sal 40:5) Ohin loron, dalan ida atu hahiʼi Maromak mak liuhusi fó komentáriu durante reuniaun. Ita hotu kontente hodi rona komentáriu oioin iha reuniaun. Ita sente kontente bainhira rona labarik ida fó komentáriu neʼebé simples. Bainhira ema ruma fó komentáriu ho laran-manas hodi fó sai pontu ruma neʼebé nia foin mak aprende, neʼe mós book ita-nia laran. No ita mós admira tebes sira neʼebé “sai aten-brani” atu fó komentáriu, maski sira mak moedór ka foin mak aprende ita-nia língua. (1 Tes 2:2) Oinsá mak ita bele hatudu agradese ba sira-nia hakaʼas an? Kuandu reuniaun remata, ita bele fó obrigadu ba sira tanba fó komentáriu neʼebé anima Ita. Dalan seluk mak ita rasik fó komentáriu. Hodi halo nuneʼe, laʼós deʼit ita hetan anima, maibé ita mós anima ema seluk.​—Rom 1:11, 12. w19.01 p. 8 par. 1-2; p. 9 par. 6

Mane naʼin-sanulu iha susar laran. Sira moras-lepra, no sira-nia situasaun sei sai aat liután. Maibé loron ida, sira haree Mestre Boot Jesus husi dook. Sira rona ona katak Jesus kura moras oioin. Tan neʼe, sira bolu ho lian makaʼas dehan: “Mestre Jesus, hatudu laran-sadiʼa mai ami!” Mane naʼin-sanulu neʼe sai isin-diʼak duni. Ita la duvida katak sira hotu agradese ba Jesus nia laran-diʼak. Maibé, ema ida husi sira la sente deʼit agradese, nia halo buat seluk tan, nia hatudu sai ninia agradese ba Jesus. Mane neʼe mak ema Samaria ida, no ninia laran book nia atu “fó hahiʼi ba Maromak ho lian makaʼas”. (Lc 17:12-19) Hanesan ema Samaria neʼe, ita hakarak hatudu agradese ba ema neʼebé laran-diʼak ba ita. Jeová hatudu ezemplu diʼak ba ita kona-ba hatudu agradese. Dalan ida neʼebé nia hatudu agradese mak liuhusi fó kolen ba ema sira neʼebé halo nia kontente. (2 Sam 22:21; Sal 13:6; Mt 10:40, 41) Eskritura sira anima ita atu “halo tuir Maromak nia ezemplu nuʼudar ninia oan doben sira”. (Éf 5:1) Tan neʼe, razaun importante atu hatudu agradese mak tanba ita hakarak halo tuir Jeová nia ezemplu. w19.02 p. 14 par. 1-2, 4

Feto joven ida iha eskola ho respeitu nia hatete katak nia lakohi hola parte iha loron-boot ida neʼebé Maromak la gosta. Mane joven ida neʼebé moedór haklaken husi uma ba uma iha kolega eskola ida nia uma, neʼebé uluk kolega neʼe goza Testemuña ba Jeová. Mane ida neʼebé serbisu makaʼas atu tau matan ba ninia família, ninia patraun husu nia atu halo buat neʼebé ilegál ka la hatudu laran-moos. Maski mane neʼe karik sei lakon ninia serbisu, maibé nia esplika katak nia tenke hatudu laran-moos no halo tuir lei tanba Maromak hakarak ninia atan sira atu halo nuneʼe. (Rom 13:1-4; Ebr 13:18) Hahalok saida mak Ita bele nota iha ema naʼin-tolu neʼe? Karik Ita nota hahalok oioin, hanesan aten-brani no laran-moos. Maibé iha hahalok folin-boot ida neʼebé sira hatudu, neʼe mak integridade ka laran-metin. Sira ida-idak hatudu laran-metin ba Jeová no lakohi kontra ninia prinsípiu sira. Integridade book sira atu halo nuneʼe. Jeová sente orgullu tebes ho sira ida-idak tanba sira hatudu hahalok neʼe. Ita mós hakarak halo ita-nia Aman iha lalehan sente orgullu. w19.02 p. 2 par. 1-2

Moisés nia Ukun-Fuan proteje liu ema neʼebé labele proteje sira-nia an hanesan oan-kiak, feto-faluk, no ema estranjeiru. Maromak hatete ba juís sira iha Izraél: “Imi labele bobar lia-loos bainhira tesi-lia ba ema estranjeiru ka oan-kiak, no imi labele hadau feto-faluk nia roupa hodi sai nuʼudar garantia ba buat neʼebé nia debe.” (Deut 24:17) Jeová hatudu interese ba ema neʼebé labele defende an. No nia fó kastigu ba ema neʼebé trata aat sira. (Éx 22:22-24) Jeová hakarak ema sira neʼebé nia fó podér atu hatudu interese ho domin ba ema neʼebé sira tau matan. Nia odi krime seksuál no hakarak atu ema hotu, liuliu sira neʼebé labele defende an, atu simu protesaun no justisa. (Lev 18:6-30) Bainhira ita fiar katak Jeová hatudu justisa ba ita, ita-nia domin ba nia mós sai boot liután. Bainhira ita hadomi Maromak no ninia prinsípiu sira, neʼe sei book ita atu hadomi ema seluk no hatudu justisa ba sira. w19.02 p. 24-25 par. 22-26

Hanoin toʼok ezemplu ida oinsá ita bele proteje ita-nia an hodi la hetan influénsia husi Satanás nia hanoin. Jeová hanorin ita katak “iha [ita-nia] leet keta temi hahalok sala seksuál, hahalok oioin neʼebé la moos”. (Éf 5:3) Maibé se ita-nia kolega iha serbisu-fatin ka eskola koʼalia buat neʼebé la morál, ita sei halo saida? Karik ita-nia konxiénsia sei fó avizu ba ita. (Rom 2:15) Ita sei rona ba ita-nia konxiénsia ka lae? Karik ita hetan tentasaun makaʼas atu rona ba ita-nia kolega sira ka haree foto neʼebé sira hatudu. Maibé tempu neʼe mak ita presiza taka ita-nia portaun sira, katak hasees an husi perigu neʼe hodi koko koʼalia kona-ba buat seluk ka laʼo sees. Ita presiza aten-brani atu la halo tuir kolega sira neʼebé tenta ita atu hanoin ka halo buat neʼebé sala. Maibé ita bele fiar katak Jeová haree ita-nia hakaʼas an no sei fó ba ita kbiit no matenek neʼebé ita presiza atu bele tahan hodi la simu Satanás nia hanoin.​—2 Krón 16:9; Isa 40:29; Tgo 1:5. w19.01 p. 18 par. 12-13

Bainhira Salomão sai riku tebetebes no hetan naran-boot, nia hanoin: “Haʼu sei koko atu buka ksolok no haree toʼok neʼe sei lori buat diʼak saida.” (Ecle 2:1-10) Nia harii uma furak oioin no halo jardín boot, no nia mós halo buat naran deʼit neʼebé nia hakarak. Ida-neʼe halo Salomão nia moris kontente no haksolok ka lae? Salomão rasik hatete hanesan temi iha eskritura ba ohin. Lisaun neʼe importante tebes. Ita aprende husi Salomão nia esperiénsia neʼe ka lae? Ema balu halo desizaun sala no hetan susar tiha mak foin aprende husi sala neʼe, maibé Jeová lakohi Ita sai hanesan neʼe. Ita presiza iha fiar neʼebé metin atu halo tuir Jeová no tau uluk ninia hakarak iha Ita-nia moris, maibé Ita sei nunka arrepende an. No Jeová mós nunka haluha ‘domin neʼebé Ita hatudu ona ba ninia naran’. (Ebr 6:10) Tan neʼe, hakaʼas an bá atu hametin Ita-nia fiar. Se nuneʼe, Ita sei hatene ho klaru katak ita-nia Aman iha lalehan hakarak buat neʼebé diʼak liu ba Ita.​—Sal 32:8. w18.12 p. 22 par. 14-15

Ema neʼebé espirituál iha fiar ba Maromak no hanoin hanesan ho Maromak nian. Nia buka Maromak nia matadalan no hakaʼas an atu halo tuir. (1 Kor 2:12, 13) David mak ezemplu diʼak. Nia kanta: “Jeová mak haʼu-nia parte, no nia halo haʼu-nia kopu nakonu.” (Sal 16:5) David nia “parte” inklui ninia relasaun diʼak ho Maromak, neʼebé sai nuʼudar fatin protesaun ba nia. (Sal 16:1) Neʼe lori rezultadu saida? David dehan: “Haʼu haksolok tebes.” La iha buat ida neʼebé halo nia haksolok liu fali ninia relasaun diʼak ho Jeová. (Sal 16:9, 11) Ema neʼebé tau fokus ba osan no buka haksolok nunka bele sente kontente hanesan David. (1 Tim 6:9, 10) Se ita hametin ita-nia fiar ba Jeová no serbí nia, ita-nia moris sei iha folin boot no hetan haksolok neʼebé loos. Entaun, ita bele halo saida atu hametin ita-nia fiar? Ita presiza uza ita-nia tempu hamutuk ho nia hodi lee ninia Liafuan, haree ninia kriasaun, no hanoin kona-ba ninia hahalok furak sira, inklui mós domin neʼebé nia hatudu mai ita.​—Rom 1:20. w18.12 p. 25 par. 7-8

Paulo la fó sai deʼit ninia hanoin, maibé nia husu makaʼas ema Kristaun atu respeitu moris kaben nian nuʼudar buat neʼebé folin-boot. Oinsá ho Ita? Liuliu se Ita mak kaben-naʼin, Ita hafolin duni Ita-nia moris kaben nian ka lae? Se Ita hafolin moris kaben nian, Ita iha hanoin hanesan ho Jesus. Jesus hatudu respeitu ba arranju kaben nian. Bainhira ema Farizeu sira husu pergunta ba Jesus kona-ba soe-malu, nia temi fali Maromak nia arranju kaben nian ba ema primeiru, hodi dehan: “Mane ida sei husik ninia inan-aman, no sira naʼin-rua sei sai isin ida deʼit.” Tuirmai, nia hatutan tan: “Buat neʼebé Maromak tau hamutuk, ema keta haketak.” (Mc 10:2-12; Gén 2:24) Jesus rekoñese katak Maromak mak hahú arranju kaben nian no arranju neʼe tenkesér ba nafatin. Maromak la dehan ba Adão ho Eva katak sira bele halo divórsiu hodi hakotu moris kaben nian. Maromak hakarak “sira naʼin-rua” atu moris hamutuk nuʼudar kaben-naʼin ba nafatin. w18.12 p. 10-11 par. 2-4

Bainhira ita foin aprende kona-ba lia-loos, ita aprende katak importante atu halo tuir Jeová nia mandamentu sira. Maibé kuandu ita laʼo ba oin iha lia-loos, ita mós aprende kona-ba Jeová nia hanoin, saida mak nia simu no la simu, no ninia haree kona-ba buat oioin no hanoin neʼe book ita-nia desizaun no hahalok sira. Maski ita gosta aprende atu hanoin hanesan Jeová nian, maibé tanba ita la perfeitu, dala ruma la fasil atu halo nuneʼe. Porezemplu, karik la fasil ba ita atu komprende Jeová nia haree kona-ba morál, rikusoin, serbisu haklaken, uza sala raan, no buat seluk tan. Ita bele halo saida? Oinsá mak ita bele halo Maromak nia hanoin sai ita-nian? Ita presiza hafoun ita-nia hanoin hodi estuda Maromak nia Liafuan, komprende Maromak nia hanoin, medita kona-ba neʼe, no hakaʼas an atu halo Jeová nia hanoin sai ita-nian. w18.11 p. 23-24 par. 2-4

Habakuk moris iha tempu neʼebé susar tebes. Ema barak iha tempu neʼebá hatudu hahalok aat no violénsia, tan neʼe nia sente triste tebes. Nia haree ema Izraél sira trata malu iha dalan neʼebé aat no la iha justisa. Habakuk hanoin: ‘Hahalok aat sira-neʼe toʼo bainhira? Tanbasá mak Jeová demora no la halo buat ruma?’ Habakuk sente lakon ona esperansa. Tan neʼe nia husu makaʼas ba Jeová atu hadiʼa situasaun neʼe. Karik Habakuk komesa hanoin katak Jeová la iha ona interese ba ninia povu ka Jeová demora liu. Dala ruma, Ita mós sente ona hanesan neʼe ka lae? Habakuk husu pergunta sira-neʼe tanba nia la tau fiar ona ba Jeová no Jeová nia promesa sira ka lae? Lae. Tuir loloos nia husu Jeová atu ajuda nia kona-ba ninia dúvida no problema sira. Ida-neʼe hatudu katak nia seidauk lakon esperansa maibé tau fiar nafatin ba Jeová. Habakuk hanoin barak tanba nia seidauk komprende tanbasá Jeová demora no husik nia hasoru terus sira-neʼe. w18.11 p. 14 par. 4-5

Uluk Pedro no André peskadór, maibé bainhira Jesus konvida sira atu sai ninia dixípulu, sira husik tiha sira-nia serbisu neʼe. (Mt 4:18-20) Neʼe la dehan katak bainhira Ita aprende lia-loos, Ita presiza husik tiha Ita-nia serbisu. Ita presiza serbisu no tau matan ba família. (1 Tim 5:8) Maibé kuandu Ita aprende lia-loos, Ita-nia hanoin kona-ba rikusoin presiza troka. Ita mós halo mudansa kona-ba saida mak importante liu iha ita-nia moris. Feto ida naran Maria halo nuneʼe. Maria nia planu ba moris mak atu sai golfista profisionál no manán osan barak. Maibé tuirmai Maria komesa estuda Bíblia. Nia halo mudansa iha ninia moris. Maria rekoñese katak susar duni atu tau fokus ba ninia relasaun ho Jeová no mós ba rikusoin. (Mt 6:24) Tan neʼe, nia halo sakrifísiu hodi la duni tuir tan ninia planu atu sai golfista profisionál. Agora Maria serbí daudaun nuʼudar pioneiru no nia hatete katak nia iha “moris neʼebé kontente no folin-boot liu hotu”. w18.11 p. 5 par. 9-10

Bainhira Jesus tinan 30, nia para husi serbisu badain-ai no sai fali mestre tanba nia hatene katak hanorin mak serbisu neʼebé importante liu hotu. Nia hatete katak haklaken kona-ba Maromak nia Ukun mak razaun ida neʼebé Maromak haruka nia mai iha mundu. (Mt 20:28; Lc 3:23; 4:43) Jesus tau fokus liu ba haklaken liafuan diʼak, no nia hakarak ema seluk mós halo buat neʼebé hanesan. (Mt 9:35-38) Karik ita laʼós badain-ai, maibé ita hotu mestre neʼebé hanorin ema seluk kona-ba liafuan diʼak. Serbisu neʼe importante tebes toʼo Maromak rasik mós envolve iha serbisu neʼe. Tan neʼe mak Bíblia bolu ita nuʼudar “Maromak nia maluk serbisu-naʼin”. (1 Kor 3:9; 2 Kor 6:4) Ita rekoñese duni katak “[Jeová nia] liafuan mak lia-loos”. (Sal 119:159, 160) Tan neʼe mak ita tenke kuidadu atu “uza ho didiʼak liafuan lia-loos nian” iha ita-nia serbisu haklaken. (2 Tim 2:15) Neʼe duni, hakaʼas an nafatin atu aumenta ita-nia matenek kona-ba oinsá atu uza didiʼak Bíblia, ekipamentu prinsipál atu hanorin ema seluk kona-ba Jeová, Jesus, no Maromak nia Ukun. w18.10 p. 11 par. 1-2

Kuandu laʼen banati-tuir ninia ulun, Jesus Kristu nia ezemplu kona-ba hatudu domin, neʼe sei halo fasil ba ninia feen atu hatudu “respeitu kleʼan” ba nia. (Éf 5:22-25, 33) No kuandu feen hatudu respeitu ba nia, feen sei hakaʼas an atu komprende laʼen nia sentimentu. Kuandu inan-aman hanoin kona-ba sira ida-idak nia sentimentu, sira sei hatudu ezemplu neʼebé diʼak ba oan. Sira mós presiza hanorin oan atu hanoin ema seluk. Porezemplu, inan-aman bele hanorin oan atu la bele halai iha Reuniaun-Fatin. Ka kuandu ransu atu han hamutuk ho ema seluk, sira bele hatete ba oan atu hein toʼo ema boot suru uluk. Kuandu labarik ida halo buat neʼebé diʼak, hanesan loke odamatan ba ema seluk, ita tenke gaba nia. Halo nuneʼe sei ajuda labarik neʼe sente diʼak no aprende katak “kontente liu atu fó duké simu”. w18.09 p. 29 par. 5-6

Matadalan neʼebé ita simu husi ita-nia Liurai Jesus Kristu neʼebé ukun daudauk sei ajuda ita agora no iha futuru. Koko atu hanoin kona-ba oinsá Ita hetan benefísiu tanba halo tuir mudansa sira foin daudauk neʼe. Iha tempu Ita halaʼo adorasaun família, koko atu koʼalia kona-ba mudansa sira iha reuniaun ka iha serbisu haklaken neʼebé ajuda ona Ita-nia família rasik. Se ita mak hanoin beibeik katak halo tuir matadalan husi Jeová nia organizasaun lori rezultadu diʼak oioin, neʼe sei halo fasil ba ita atu halo tuir ho haksolok. Porezemplu, ita la print ona livru barak hanesan uluk, tan neʼe la uza osan barak. No tanba ita uza teknolojia foun oioin, ita-nia organizasaun bele uza osan barak liu atu haklaken ba ema oioin. Ita rasik uza daudauk sasán eletróniku hodi asesu ita-nia publikasaun sira ka lae? Neʼe mak dalan ida atu apoia Kristu, nia hakarak ita atu uza didiʼak organizasaun nia sasán sira. Hodi apoia dalan neʼebé Kristu dirije ita, neʼe bele ajuda irmaun-irmán atu iha fiar no unidade neʼebé metin liután. w18.10 p. 25-26 par. 17-19

Se ita mak hatudu laran-sadiʼa hanesan Jeová, karik Jeová bele uza ita atu hatán ba irmaun-irmán sira-nia orasaun neʼebé husu kmaan. (2 Kor 1:3-6) Hanoin-hetan katak irmaun-irmán sira la perfeitu. Ita presiza iha hanoin neʼebé loos kona-ba sira. Se Ita mak buka hahalok perfeitu husi sira, neʼe sei halo Ita rasik laran-kraik. (Ecle 7:21, 22) Jeová nunka husu ita atu halo buat neʼebé ita la iha kbiit atu halo. Tan neʼe ita hakarak halo tuir ninia ezemplu hodi hatudu pasiénsia ba ita-nia maluk sira. (Éf 4:2, 32) Ita lakohi halo ita-nia irmaun-irmán sira sente katak, ita hanoin sira ladún hakaʼas an ka ita kompara sira ho ema seluk. Ita hakarak hametin sira no gaba sira kona-ba buat diʼak oioin neʼebé sira halo daudauk hodi serbí Jeová. Neʼe sei anima sira no bele ajuda sira atu sai kontente hodi serbí Jeová.​—Gal 6:4. w18.09 p. 16 par. 16-17

Halo tuir Maromak nia hakarak mak hanesan hahán ba Jesus. Han ai-han neʼebé diʼak halo ita sente diʼak no fó forsa ba ita, hanesan neʼe mós halo tuir Maromak nia hakarak bele halo ita sente diʼak no hametin ita-nia fiar. Ema matenek halo tuir Jeová nia matadalan no treinu. (Tgo 3:13) Bensaun husi matenek iha folin-boot tebes. “Neʼe diʼak liu fali buat hotu neʼebé [ema] gosta. . . . Se ema kaer metin ba matenek, neʼe sei sai nuʼudar ai-hun moris nian ba sira, no ema neʼebé kontinua kaer metin ba matenek sei sai kontente.” (Prov 3:13-18) Jesus hatete: “Se imi hatene buat sira-neʼe, ksolok ba imi kuandu imi halo tuir.” (João 13:17) Jesus nia dixípulu sira-nia ksolok depende ba halo tuir beibeik buat neʼebé Jesus haruka sira atu halo. Sira tenke halaʼo sira-nia moris hodi halo tuir Jesus nia hanorin no ezemplu. w18.09 p. 4 par. 4-5

Maski Adão no Eva mesak deʼit iha jardín Eden, maibé sira presiza hanoin kona-ba ema seluk. Tanbasá? Tanba Jeová fó ona knaar ba sira atu halo. Nia haruka sira atu halo mundu neʼe nakonu ho sira-nia oan no halo mundu tomak atu sai paraízu. (Gên 1:28) Jeová hakarak ema hotu iha rai atu moris ho kontente, no Adão no Eva mós tenkesér hanoin kona-ba sira-nia oan nia interese neʼe. Jeová hakarak sira hotu atu serbisu hamutuk hodi halo mundu neʼe sai paraízu tanba projetu neʼe boot tebes! Se Adão no Eva la halo sala, mundu agora nakonu ho ema neʼebé perfeitu. Ema perfeitu mós presiza serbisu hamutuk ho Jeová atu bele halo mundu neʼe sai paraízu no kumpre Jeová nia hakarak sira. Imajina toʼok ksolok neʼebé sira sei hetan husi serbisu neʼe! Jeová mós sei fó bensaun barak ba sira tanba sira la hanoin an, maibé hatudu interese ba ema seluk. w18.08 p. 18 par. 2; p. 19-20 par. 8-9

Oinsá se ema ruma habelar lia-bosok kona-ba Ita? Neʼe akontese ba Jesus no João Batista. (Mt 11:18, 19) Jesus halo saida? Nia la soe tempu no forsa atu fó prova katak istória sira-neʼe laloos. Nia fó laran-manas deʼit ba sira atu buka-hatene faktu sira liuhusi buat neʼebé nia halo no hanorin. Jesus dehan: “Liuhusi ema nia hahalok loos mak nia hatudu sai ninia matenek.” (Mt 11:19) Ita bele aprende lisaun importante husi Jesus. Dala ruma ema bele koʼalia buat neʼebé ladiʼak ka negativu kona-ba ita, no neʼe bele hafoʼer ita-nia naran. Maibé liuhusi dalan neʼebé ita halaʼo ita-nia moris bele fó prova katak buat neʼebé ema koʼalia laloos. Hanesan Jesus nia ezemplu hatudu katak, ita-nia hahalok bele halakon lia falsu neʼebé ema duun ba ita. w18.08 p. 6 par. 11-13

Bíblia temi sira neʼebé la laran-metin hanesan, Caim, Salomão, no ema Izraél sira. Tuir loloos, sira iha oportunidade atu arrepende an no troka sira-nia hahalok. (Após 3:19) Jeová nunka ansi atu husik ninia povu bainhira sira halo sala. Hanesan Aarão, Jeová fó perdua ba nia. Ohin loron, Jeová fó avizu ba ita ho domin liuhusi Bíblia, ita-nia livru sira, no ema kristaun seluk atu proteje ita hodi la monu ba sala. Se ita fó atensaun ba Jeová nia avizu sira, ita bele fiar katak nia sei hatudu laran-sadiʼa ba ita. Jeová la hatudu ninia laran-diʼak ho saugati deʼit, maibé iha objetivu. (2 Kor 6:1) Nia hatudu ninia laran-diʼak atu fó oportunidade ba ita hodi “la simu hahalok neʼebé la tuir ninia hakarak, no atu la simu hakarak mundu nian”. (Tito 2:11-14) Iha mundu neʼe, sempre iha situasaun neʼebé koko ita-nia laran-metin ba Jeová. Mai ita hakaʼas an atu fó apoiu tomak ba Jeová! w18.07 p. 21 par. 20-21

Oinsá mak ita bele hametin ita-nia hakarak atu sai ema neʼebé Jeová hatene duké buka mundu nia atensaun? Ita presiza hanoin-hetan faktu importante rua. Primeiru, Jeová sempre fó atensaun ba ema neʼebé serbí nia ho laran-metin. (Ebr 6:10; 11:6) Jeová haree ninia atan ida-idak neʼebé laran-metin hanesan buat neʼebé folin-boot tebes, nia sente se nia la fó atensaun ba sira, neʼe hanesan “hatudu hahalok aat”. Nia “haree didiʼak ema laran-loos nia hahalok” no nia hatene oinsá atu salva sira. (Sal 1:6; 2 Ped 2:9) Segundu mak karik Jeová sei uza dalan neʼebé ita nunka hanoin hodi hatudu katak nia hatene ita. Se ema halo buat diʼak tan deʼit atu hetan naran-boot husi ema seluk, Jeová sei la fó kolen ba ema neʼe. Tanbasá? Tanba hanesan Jesus hatete katak, ema neʼe simu ona ninia kolen tomak. (Mt 6:1-5) Maibé Jeová “neʼebé haree buat hotu”, fó atensaun ba sira neʼebé ema seluk la rekoñese kona-ba buat diʼak neʼebé sira halo. Nia haree buat neʼebé sira halo no nia fó kolen ba sira. w18.07 p. 9 par. 8, 10

Pedro seidauk komprende nafatin kona-ba vizaun neʼe. Maibé iha tempu neʼe kedas, ema neʼebé Cornélio haruka toʼo iha Pedro nia fatin. Espíritu santu dirije Pedro ba Cornélio nia uma, tan neʼe nia bá hamutuk ho ema sira-neʼe. Se Pedro mak tesi lia tuir deʼit buat neʼebé matan haree, nia sei la bá Cornélio nia uma. Ema judeu nunka sama ema jentiu sira-nia uma. Entaun tanbasá mak Pedro bá? Maski nia hatudu hahalok diskriminasaun ba ema jentiu sira, maibé vizaun neʼebé nia haree no diresaun husi espíritu santu troka ninia hanoin. Bainhira Pedro koʼalia tiha ho Cornélio, nia dehan: “Agora haʼu hatene ho didiʼak katak Maromak la todan ba sorin, maibé iha nasaun hotu, Maromak simu ema hotu neʼebé taʼuk ba nia no halo buat loos.” (Após 10:34, 35) Koñesimentu foun neʼe halo Pedro hakfodak tebes. w18.08 p. 9 par. 3-4

Ita hasees an husi buat neʼebé Maromak odi, maibé oinsá se ita hasoru situasaun neʼebé Bíblia la fó sai ukun-fuan? Oinsá mak ita bele hatene saida mak Maromak hakarak ita atu halo? Se ita treinu ona ita-nia konxiénsia tuir Bíblia, ita bele halo desizaun neʼebé matenek. Tanba Jeová hadomi ita, nia fó mai ita prinsípiu sira neʼebé bele treinu ita-nia konxiénsia. Nia esplika: “Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi, no dirije imi iha dalan neʼebé imi tenke laʼo bá.” (Isa 48:17, 18) Bainhira ita hanoin didiʼak kona-ba Bíblia nia prinsípiu sira no husik ida-neʼe book ita-nia laran, ita bele korrije no hadiʼa ita-nia konxiénsia. No ida-neʼe sei ajuda ita halo desizaun neʼebé matenek. Prinsípiu mak lia-loos importante ida neʼebé dirije ita-nia hanoin no ajuda ita atu foti desizaun neʼebé diʼak. Hatene Jeová nia prinsípiu sira ajuda ita atu komprende ninia hanoin, no mós ajuda ita atu hatene tanbasá mak nia fó ukun-fuan balu ba ita. w18.06 p. 17 par. 5; p. 18 par. 8-10

Ema neʼebé apoia Herodes, katak, sira neʼebé apoia Herodes nia ideia polítiku sira, hein katak se Jesus fó resposta dehan sira la presiza selu impostu, sira bele duun Jesus nuʼudar inimigu ba governu Roma. No sira mós hanoin katak se Jesus mak dehan tenke selu impostu, ema hotu sei la tuir tan Jesus. Entaun, saida mak Jesus halo? Ho matenek, Jesus nafatin hatudu neutrál iha situasaun neʼe. Jesus hatene katak kobradór impostu barak mak halo korrupsaun, maibé nia la fokus ba ida-neʼe. Nia nafatin fokus ba Maromak nia Ukun neʼebé bele lori solusaun ba problema hotu. Jesus hatudu ezemplu mai ita. Ita labele todan ba sorin iha buat polítiku naran deʼit, maski haree hanesan ida mak justisa, no ida fali lae. Ema kristaun fokus deʼit ba Maromak nia Ukun no buat neʼebé Maromak hatete mak loos. Tan razaun neʼe, ita tenke kuidadu atu la forma opiniaun kona-ba situasaun sira neʼebé la justisa, ka koʼalia sai hodi kontra. (Mt 6:33) Testemuña ba Jeová barak mak soe ona opiniaun polítiku nian neʼebé uluk sira iha no sira hetan susesu. w18.06 p. 5-6 par. 9-11

Satanás la uza deʼit hahalok seksuál hodi tenta anju sira-neʼe, karik nia mós halo promete ba sira katak, sira bele domina ema hotu. Karik liuhusi dalan neʼe mak Satanás koko atu hanetik Jeová nia planu atu sai loos kona-ba lori ‘feto nia bei-oan’. (Gên 3:15) Maibé Jeová la husik nia atu hetan susesu. Nia hamosu Rai-Nabeen hodi estraga Satanás no anju aat sira-nia planu hotu. Keta haluha katak, hahalok la morál no foti-an mak iska neʼebé perigu tebes. Anju sira neʼebé tuir Satanás, uluk hamutuk ho Maromak iha lalehan ba tinan barak tebes! Maski nuneʼe, sira barak husik hakarak neʼebé sala sai makaʼas no buras iha sira-nia laran. Ita tenke hanoin-hetan beibeik katak, maski ita serbí Jeová ba tempu kleur, hakarak neʼebé aat bele nafatin sai buras iha ita-nia laran. (1 Kor 10:12) Tan neʼe mak ita tenke analiza beibeik ita-nia laran hodi hasai tiha hanoin neʼebé la morál no hamate hahalok foti-an!​—Gal 5:26; Kol 3:5. w18.05 p. 25 par. 11-12

Paulo sente triste tanba ema judeu sira lakohi simu mensajen kona-ba Maromak nia Ukun. Maibé Paulo la rende an hodi haklaken ba sira. Nia esplika ninia sentimentu kona-ba ema judeu sira-neʼe hodi dehan: “Tuir loloos haʼu hakarak ho laran no harohan ba Maromak atu ema Izraél sira hetan salvasaun. Basá haʼu fó sasin katak sira laran-manas ba Maromak; maibé laʼós tuir lia-loos kona-ba Maromak.” (Rom 10:1, 2) Paulo hatete katak buat neʼebé book nia atu haklaken ba sira mak tanba nia “hakarak ho laran”. Nia hakarak tebes sira atu hetan salvasaun. (Rom 11:13, 14) Paulo husu makaʼas ba Jeová atu ajuda ema judeu sira hodi hakarak simu mensajen kona-ba Maromak nia Ukun. Paulo dehan: “Sira laran-manas ba Maromak.” Paulo iha hanoin diʼak kona-ba ema no nia hatudu konfiansa katak ema sira-neʼe sei serbí Jeová. Nia hatene katak ema judeu sira neʼebé fó laran ba Maromak bele sai Kristu nia dixípulu neʼebé badinas hanesan nia. w18.05 p. 13 par. 4; p. 15-16 par. 13-14

Ita ida-idak tenke fó atensaun kona-ba ema presiza saida hodi nuneʼe ita bele fó ajuda ba sira. Paulo hakerek karta ba ema kristaun ebreu sira hodi dehan: “Halo loos imi-nia liman neʼebé kbiit-laek no imi-nia ain-tuur neʼebé fraku, no kontinua halo loos dalan ba imi-nia ain, atu nuneʼe ida neʼebé kudeʼik la sai aat liután, maibé bele sai diʼak fali.” (Ebr 12:12, 13) Ita hotu bele hametin no fó kmaan ba ema seluk liuhusi ita-nia liafuan, maski ita mak joven. Paulo hakerek karta ba ema kristaun iha Filipe hodi dehan: “Se imi ida deʼit ho Kristu, no se imi fó laran-manas no fó kmaan ba ema seluk tan imi-nia domin, no mós se imi hatudu katak imi hanoin ema seluk, imi hadomi sira no hatudu laran-sadiʼa ba sira, entaun halo haʼu-nia ksolok sai kompletu hodi hatudu katak imi iha hanoin ida deʼit no hadomi malu, no imi sai ida deʼit, hodi iha neon ida. Keta halo buat ida hodi buka atu manán deʼit ka foti-an, maibé ho haraik-an hodi haree ema seluk boot liu imi. Keta buka deʼit imi rasik nia diʼak, maibé buka mós ema seluk nia diʼak.”​—Flp 2:1-4. w18.04 p. 22 par. 10; p. 23 par. 12

Jeová nia razaun hodi uza Jesus halo ita sai livre husi atan ba sala no mate mak atu ita bele uza ita-nia moris tomak hodi serbí Nia. Dalan diʼak liu hotu atu uza ita-nia liberdade mak uza ita-nia tempu no forsa tomak hodi serbí Jeová. Hodi halo nuneʼe, bele proteje ita atu la husik ita-nia planu iha mundu neʼe no ita rasik nia hakarak hodi sai buat neʼebé importante liu iha ita-nia moris. (Gal 5:16) Hanoin toʼok kona-ba saida mak Noé no ninia família halo. Sira moris iha mundu neʼebé nakonu ho hahalok violénsia no la morál. Maibé sira la envolve iha ema nia planu no atividade sira. Sira tau atensaun deʼit ba serbisu neʼebé Maromak fó ba sira atu halo. Sira harii arka, halibur hahán ba sira-nia an no mós ba animál sira, no sira fó avizu ba ema seluk kona-ba Rai-Nabeen. “Noé halo tuir mandamentu hotu neʼebé Maromak fó ba nia. Nia halo nuneʼe duni.” (Gên 6:22) Rezultadu husi halo buat sira-neʼe mak, Noé no ninia família hetan salvasaun bainhira ema hotu mate.​—Ebr 11:7. w18.04 p. 10 par. 8; p. 11 par. 11-12

Satanás ho anju aat sira mós uza relijiaun falsu no sistema ekonomia iha mundu neʼe hodi lohi “mundu tomak”, ka ema hotu. (Apok 12:9) Satanás uza relijiaun falsu hodi habelar lia-bosok kona-ba Jeová, no nia mós koko atu subar Maromak nia naran. (Jer 23:26, 27) Rezultadu mak ema barak hanoin katak sira adora Maromak, maibé tuir loloos sira adora hela anju aat sira. (1 Kor 10:20; 2 Kor 11:13-15) Satanás mós uza sistema ekonomia iha mundu neʼe hodi habelar ninia bosok, hanesan lia-bosok katak osan ka rikusoin bele halo ema moris kontente. (Prov 18:11) Ema neʼebé fiar lia-bosok neʼe uza sira-nia moris tomak hodi adora “Rikusoin” duké adora Maromak. (Mt 6:24) Maski ema sira-neʼe uluk hadomi Maromak, maibé domin ba rikusoin sai makaʼas tebes toʼo lakon sira-nia domin ba Maromak.​—Mt 13:22; 1 João 2:15, 16. w18.05 p. 23 par. 6-7