Outubru

Ita labele haree ema nia laran hanesan Jeová no Jesus. Maski nuneʼe, ita bele koko komprende ema seluk nia sentimentu no presiza. (2 Kor 11:29) La hanesan ho mundu neʼebé hanoin an deʼit, ita hakaʼas an atu la “buka diʼak deʼit ba [ita-nia] an rasik, maibé buka mós ema seluk nia diʼak”. (Flp 2:4) Katuas kongregasaun presiza liu atu hatudu katak sira hanoin ema. Sira hatene katak sira tenke hatán ba Jeová kona-ba dalan neʼebé sira tau matan ba ninia bibi. (Ebr 13:17) Atu ajuda irmaun-irmán sira, katuas kongregasaun presiza hanoin sira-nia sentimentu. Oinsá mak katuas sira hatudu katak sira hanoin ema? Katuas neʼebé hanoin ema sei uza tempu hamutuk ho irmaun-irmán sira. Nia husu pergunta no rona didiʼak ho pasiénsia. Neʼe importante liu bainhira Maromak nia bibi ida hakarak fakar sai ninia sentimentu maibé sente susar atu fó sai ninia liafuan. (Prov 20:5) Bainhira katuas ida prontu atu fó ninia tempu, irmaun-irmán sira sei fiar nia, sai ninia belun, no hadomi nia.​—Após 20:37. w19.03 p. 17 par. 14-17

Se ita hatene katak ema seluk hafolin buat neʼebé ita halo, ita sente kontente. Bainhira ita hatudu agradese, ita halo ema seluk kontente. Nia sei hatene katak ninia hakaʼas an ajuda duni ita, ka nia fó buat neʼebé ita presiza. Rezultadu mak, ita-nia relasaun nuʼudar belun sei sai metin liután. Hatudu agradese mak folin-boot duni, hanesan temi ona iha eskritura ohin nian. Imajina toʼok! Masán osan-mean iha bikan osan-mutin mak furak no folin-boot tebes, loos ka lae? Ita sente oinsá se Ita simu ida-neʼe nuʼudar prezente? Ita-nia liafuan agradese mós iha folin-boot tebes hanesan masán osan-mean neʼe. Hanoin toʼok: Masán osan-mean bele dura ba tempu kleur. Nuneʼe mós, ema bele hanoin-hetan no hafolin Ita-nia liafuan agradese durante sira-nia moris tomak. w19.02 p. 15 par. 5-6

Bainhira Adão no Eva han ai-fuan husi ai-hun koñesimentu kona-ba buat diʼak no aat, sira hatudu ho klaru katak sira la fiar Jeová no ninia prinsípiu sira. Sira hili atu halo desizaun rasik kona-ba saida mak diʼak no aat. Maibé hanoin toʼok kona-ba buat neʼebé sira lakon. Sira lakon sira-nia relasaun diʼak ho Jeová, lakon oportunidade atu moris ba nafatin, no sira hadaʼet sala no mate ba sira-nia oan. (Rom 5:12) Kompara toʼok Adão no Eva nia hahalok ho ema-boot ida husi Etiópia bainhira Filipe haklaken ba nia. Ema-boot neʼe hafolin tebes buat neʼebé Jeová no Jesus halo ba nia toʼo nia deside kedas atu hetan batizmu. (Após 8:34-38) Bainhira ita dedika an ba Maromak no hetan batizmu hanesan ema-boot neʼe, ita hatudu ho klaru katak ita hafolin buat neʼebé Jeová no Jesus halo ona ba ita. Ita mós hatudu katak ita fiar Jeová no rekoñese katak nia mak iha direitu atu deside saida mak diʼak no aat. w19.03 p. 2 par. 1-2

Oinsá mak Maromak nia atan sira hatudu integridade? Sira halo nuneʼe hodi kontinua hatudu domin no laran-metin ba Jeová ho laran tomak no domin neʼe book sira atu halo nia kontente. Signifikadu simples husi liafuan integridade iha Bíblia laran mak kompletu, la iha moras, ka tomak. Porezemplu, bainhira hasaʼe sakrifísiu animál ba Jeová, tenke hasaʼe animál neʼebé la iha moras. (Lev 22:21, 22) Maromak nia povu labele hasaʼe animál neʼebé ain ida, tilun ida ka matan ida la iha, no mós labele iha moras. Jeová hakarak animál neʼebé kompletu, la iha moras, ka tomak. (Mal 1:6-9) Ita komprende tanbasá Jeová hakarak buat neʼebé la iha moras ka kompletu. Bainhira ita sosa buat ruma, maski neʼe mak livru ka ekipamentu ruma, ita lakohi neʼe iha kuak ka lakon parte ruma. Ita hakarak buat neʼebé kompletu ka tomak. Jeová mós sente hanesan. Nia hakarak ita hatudu domin no laran-metin neʼebé kompletu ka tomak. w19.02 p. 3 par. 3

Atu bele proteje ita-nia laran, ita laʼós deʼit taka ita-nia laran ba buat neʼebé aat, maibé ita mós presiza loke ita-nia laran ba buat neʼebé diʼak. Iha sidade antigu neʼebé moru haleʼu, mane neʼebé hein portaun taka sidade nia portaun atu hapara inimigu tama ba sidade, maibé iha tempu seluk mane neʼe loke portaun sira atu bele hatama ai-han no sasán sira ba sidade. Se portaun sira nunka loke, povu iha sidade neʼe sei mate hamlaha. Nuneʼe mós ita presiza loke ita-nia laran beibeik atu simu Maromak nia hanoin. Ita bele hetan Maromak nia hanoin iha Bíblia, entaun bainhira ita lee Bíblia, neʼe hanesan Jeová book ita-nia hanoin, sentimentu no hahalok. Atu ita bele hetan benefísiu husi lee Bíblia, importante tebes atu halo orasaun atu ajuda ita “haree ho momoos buat kmanek sira” husi ninia Liafuan. (Sal 119:18) Ita mós presiza medita kona-ba buat neʼebé ita lee. Se ita halo orasaun, lee no medita kona-ba Maromak nia Liafuan, neʼe sei book ‘ita-nia fuan-laran’ no ita sei hadomi Jeová nia hanoin.​—Prov 4:20-22. w19.01 p. 18 par. 14-15

Jeová hatene katak ita ida-idak iha kbiit no situasaun neʼebé la hanesan, no nia hafolin tebes sakrifísiu neʼebé ita bele fó. Hanoin toʼok kona-ba sakrifísiu oioin neʼebé nia simu husi ema Izraél. Ema Izraél balu iha kbiit atu fó bibi-malae ida ka bibi-timur ida. Maibé ema Izraél neʼebé kiak, karik bele fó deʼit “manu-lakateu rua ka manu-pombu oan rua”. No se ema Izraél ida la iha kbiit atu hola manu rua, Jeová mós simu “trigu uut neʼebé diʼak gomor isin ida”. (Lev 5:7, 11) Maski trigu uut la karun, maibé Jeová nafatin hafolin sakrifísiu neʼe, naran katak ida-neʼe mak “trigu uut neʼebé diʼak”. Toʼo ohin loron, Maromak la troka. Bainhira ita fó komentáriu, nia la haruka ita atu koʼalia iha dalan neʼebé matenek hanesan Apolo ka book ema nia laran hanesan Paulo. (Após 18:24; 19:8) Jeová hakarak ita fó komentáriu neʼebé diʼak liu tuir ita-nia kbiit. Hanoin toʼok kona-ba feto-faluk neʼebé fó kontribuisaun osan kiʼik rua. Jeová hafolin tebes nia tanba nia fó buat neʼebé diʼak liu tuir nia kbiit.​—Lc 21:1-4. w19.01 p. 8-9 par. 3-5

Ita hatene katak ema sei odi ita tanba ita mak Kristu nia dixípulu. Jesus fó sai nanis katak ninia dixípulu sira sei hetan terus durante loron ikus sira. (Mt 24:9; João 15:20) Isaias fó sai profesia katak ita-nia inimigu sei odi ita no mós sei uza armas oioin atu kontra hasoru ita. Armas sira-neʼe inklui lia-bosok oioin kona-ba ita no fó-terus makaʼas ba ita. (Mt 5:11) Jeová sei la hanetik inimigu sira atu uza armas sira-neʼe hodi kontra hasoru ita. (Éf 6:12; Apok 12:17) Maski nuneʼe, ita la presiza taʼuk. Jeová hatete katak “armas naran deʼit” neʼebé ema uza atu kontra hasoru ita sei “la hetan susesu”. (Isa 54:17) Hanesan moru neʼebé proteje ita husi anin-fuik, Jeová mós proteje ita bainhira “ukun-naʼin aat sira sai hirus”. (Isa 25:4, 5) Ita-nia inimigu sei nunka susesu atu halakon ita-nia moris ba nafatin. (Isa 65:17) Maromak nia povu nia inimigu hotu “sei lakon no mate”.​—Isa 41:11, 12. w19.01 p. 6-7 par. 13-16

Joven sira, Jeová hafolin liberdade, no nia mós kria ita atu hafolin liberdade. Maibé nia hakarak ita atu uza ho loloos ita-nia liberdade iha dalan neʼebé proteje ita-nia an. Karik Ita hatene ema balu neʼebé haree pornografia, halo buat neʼebé la tuir morál, halo desportu neʼebé perigozu, uza droga, ka hemu-lanu. Foufoun, buat sira-neʼe bele halo sira kontente, maibé dala barak sira hetan konsekuénsia hanesan moras, sai atan ba buat sira-neʼe, no bele mós mate. (Gal 6:7, 8) Karik sira sente “livre” atu halo buat naran deʼit, maibé tuir loloos, neʼe bosok deʼit. (Tito 3:3) Maibé oinsá se ita halo tuir Jeová? Ida-neʼe sei ajuda ita atu iha saúde diʼak no halo ita sente livre duni. (Sal 19:7-11) Liután neʼe, kuandu Ita uza didiʼak Ita-nia liberdade, katak halo tuir Maromak nia ukun-fuan no matadalan sira neʼebé perfeitu, Ita bele hatudu ba Maromak no mós ba Ita-nia inan-aman katak Ita merese atu sira tau fiar. No Ita-nia inan-aman sei fó liberdade boot liután ba Ita.​—Rom 8:21. w18.12 p. 22-23 par. 16-17

Bainhira Adão halo sala, buat barak troka. Mudansa boot ida mak ema mate, no ida-neʼe mós fó impaktu ba arranju kaben nian. Apóstolu Paulo esplika ba ema Kristaun katak mate mak hakotu moris kaben nian no ida neʼebé sai faluk ona bele kaben fali. (Rom 7:1-3) Ukun-Fuan neʼebé Maromak fó ba nasaun Izraél esplika didiʼak kona-ba arranju kaben nian. Porezemplu, mane Izraél sira iha ona toman atu kaben ho feen naʼin-rua ka liu, no Moisés nia Ukun-Fuan husik sira halo nuneʼe. Maibé Ukun-Fuan bandu sira atu labele trata aat feto no labarik sira. Porezemplu, se mane Izraél ida kaben ho atan-feto ida no depois kaben tan ho feen segundu, mane neʼe labele hamenus ai-han, roupa, no direitu kaben nian ba ninia feen primeiru. Maromak haruka mane neʼe atu proteje no tau matan ba feen neʼe. (Éx 21:9, 10) Ita la iha Moisés nia Ukun-Fuan okos, maibé Ukun-Fuan neʼe hanorin ita katak arranju kaben nian mak folin-boot ba Maromak. Neʼe ajuda ita atu hafolin arranju kaben nian, loos ka lae? w18.12 p. 10 par. 3; p. 11 par. 5-6

Bainhira Habakuk fó sai tiha ba Jeová kona-ba ninia problema sira, karik nia hanoin Jeová sei sente oinsá. Jeová la sai hirus tanba nia mak Aman neʼebé nakonu ho domin, nia komprende kona-ba Habakuk nia sentimentu. Nia hatene katak Habakuk hasoru daudaun terus no husu ajuda. Tan neʼe, Jeová fó sai ba Habakuk katak lakleur tan nia sei fó kastigu ba ema Judeu sira neʼebé la laran-metin. Karik Habakuk mak ema primeiru neʼebé Jeová fó-hatene katak jerasaun neʼebé halo violénsia lakleur tan sei lakon. Jeová esplika ba Habakuk katak nia prontu ona atu halo buat ruma. Nia sei fó kastigu ba ema iha Judá neʼebé hatudu hahalok aat no violénsia. Jeová uza liafuan “iha imi-nia tempu” hodi hatudu katak ninia loron tesi-lia nian sei mai durante Habakuk nia moris ka ema Izraél sira neʼebé moris iha tempu maizumenus hanesan ho Habakuk. Habakuk hakfodak kona-ba Jeová nia resposta, tanba buat neʼebé Jeová fó sai hatudu katak ema hotu iha Judá sei hetan terus makaʼas liután. w18.11 p. 15 par. 7-8

Ita sente oinsá kona-ba ema barak neʼebé seidauk aprende kona-ba lia-loos? Apóstolu Paulo haklaken ba ema judeu sira neʼebé hatene ona buat balu kona-ba Jeová. Bainhira Paulo halaʼo viajen primeiru nuʼudar misionáriu, nia ho Barnabé bá sidade Listra. Ema Likaónia neʼebé hela iha neʼebá hanoin sala katak Paulo no Barnabé mak sira-nia maromak falsu sira, naran Zeus no Hermes. Paulo no Barnabé sai foti-an ka lae? Sira sente kontente tanba ema la fó-terus tan ba sira hanesan sidade rua neʼebé uluk sira bá ka lae? Sira hanoin katak sira-nia naran boot bele fó oportunidade ba ema barak atu rona kona-ba lia-loos ka lae? Lae. Sira la kontente no koʼalia ho lian makaʼas: “Tansá mak imi halo buat sira-neʼe? Ami mós ema no iha fraku hanesan imi.”​—Após 14:8-15. w18.09 p. 4 par. 8-9

Se ita aprende lia-loos no hakarak moris tuir morál sira husi Bíblia, ita presiza halo mudansa ba ita-nia hahalok no ita-nia hanoin. Apóstolu Pedro dehan: “Nuʼudar oan neʼebé halo tuir Maromak, labele hatudu tan hahalok neʼebé tuir imi-nia hakarak aat neʼebé uluk imi iha bainhira imi seidauk hatene Maromak, maibé imi-nia hahalok hotu tenke santu.” (1 Ped 1:14, 15) Iha tempu uluk, ema barak iha sidade Korinto iha hahalok neʼebé la morál no tenkesér halo mudansa barak iha sira-nia moris hodi sosa lia-loos. Ohin loron mós hanesan, ema barak tenke troka sira-nia hahalok hodi sosa lia-loos. Pedro esplika kona-ba neʼe hodi dehan: “Uluk imi uza ona tempu barak atu halo tuir nasaun sira-nia hakarak hodi halo hahalok aat toʼo la sente moe, iha hakarak aat neʼebé labele kontrola, hemu tua barak demais, festa arbiru, halibur malu hodi hemu tua barak, no adora estátua neʼebé kontra ukun-fuan.”​—1 Ped 4:3. w18.11 p. 6 par. 13

Oinsá mak ita buka ema neʼebé “prontu atu simu lia-loos neʼebé lori ba moris rohan-laek”? Iha apóstolu sira-nia tempu, dalan ida deʼit atu buka ema sira-neʼe mak liuhusi haklaken. Jesus hatete ba ninia dixípulu sira: “Iha sidade ka knua naran deʼit neʼebé imi tama, buka ema neʼebé mak merese atu imi vizita.” (Mt 10:11) Ita hatene katak ema neʼebé la iha motivu loos, foti-an, ka la interese ba Maromak, sei la rona ba liafuan diʼak. Ita-nia objetivu mak atu buka ema neʼebé laran-moos, haraik-an, no hakarak hatene kona-ba lia-loos. Ita bele kompara buka ema hanesan buat neʼebé Jesus halo bainhira nia sei badain-ai. Primeiru Jesus tenke buka ai neʼebé diʼak ba sasán ida-idak, hanesan armáriu sira, odamatan, ai-leba, ka sasán seluk. Tuirmai nia hasai ninia kaixa ekipamentu nian, uza ninia matenek hodi halo sasán sira-neʼe. Hanesan neʼe mós ohin loron. Ita tenke buka uluk ema neʼebé hakarak aprende, no tuirmai uza didiʼak ita-nia ekipamentu no matenek atu ajuda sira sai Kristu nia dixípulu.​—Mt 28:19, 20. w18.10 p. 12 par. 3-4

Dixípulu Filipe hatudu ezemplu neʼebé diʼak tebes kona-ba tau fokus iha serbisu haklaken maski situasaun moris nian troka. Iha tempu ida nia haksolok hodi halaʼo ninia knaar foun iha Jeruzalein. (Após 6:1-6) Tuirmai situasaun troka. Ema oho Estevão no depois fó-terus makaʼas ba ema kristaun sira. Tanba terus sira-neʼe, ema kristaun sira halai husi Jeruzalein. Maski nuneʼe, Filipe hakarak serbí nafatin Jeová ho badinas, tan neʼe nia bá haklaken iha Samaria, sidade neʼebé ema presiza rona kona-ba liafuan diʼak. (Mt 10:5; Após 8:1) Filipe husik Maromak nia espíritu dirije nia hodi bá fatin neʼebé Jeová hakarak nia atu bá. Tan neʼe Jeová uza nia atu haklaken iha fatin neʼebé ema seidauk rona kona-ba liafuan diʼak. Ema judeu barak la hafolin ema Samaria no trata aat sira. Maibé Filipe la halo diskriminasaun ba sira, nia fahe liafuan diʼak ba sira ho laran-manas, no ema Samaria sira rona ba nia “ho hanoin ida deʼit”. (Após 8:6-8) Filipe badinas nafatin hodi haklaken, no Jeová kontinua haraik bensaun ba nia no ba ninia família.​—Após 21:8, 9. w18.10 p. 30 par. 14-16

Loron ida kuandu Jesus iha área Dekápolis nian, “ema lori ba Jesus mane ida neʼebé diuk no nanál toos”. (Mc 7:31-35) Jesus kura nia, maibé laʼós iha ema nia oin. Tanbasá? Tanba ema neʼe tilun-diuk, karik nia sente moe iha ema barak nia oin. Jesus komprende ninia sentimentu, no “nia lori mane neʼe dook” no kura nia iha neʼebá. Maski ita la bele halo milagre, maibé ita tenke hanoin kona-ba irmaun-irmán sira-nia presiza no sentimentu no hatudu laran-diʼak ba sira. Jesus komprende mane tilun-diuk nia sentimentu no hatudu laran-diʼak ba nia. Nuneʼe mós, ita presiza hanoin ema idade no aleijadu sira-nia sentimentu. Hahalok importante liu hotu husi kongregasaun mak domin, laʼós badinas atu kumpre buat barak. (João 13:34, 35) Domin book ita atu hakaʼas an hodi ajuda irmaun-irmán sira neʼebé idade ka aleijadu atu bá tuir reuniaun no haklaken. Ita ajuda sira maski iha tempu neʼebé ladún diʼak ba ita ka sira la bele halo buat barak.​—Mt 13:23. w18.09 p. 29-30 par. 7-8

Ema hotu neʼebé adora Jeová iha folin-boot ba nia no Jesus. (Gal 2:20) Ita hadomi tebes ita-nia irmaun-irmán sira, tan neʼe ita hakarak hatudu laran-sadiʼa ba sira. Ita “buka buat neʼebé haburas dame no buat neʼebé hametin malu”. (Rom 14:19) Ita hein namanas atu moris iha Paraízu, tempu neʼebé la iha tan buat ida atu halo ema sente laran-kraik. La iha tan moras no funu. Ema sei la mate tan husi Adão nia sala. Ema sei la fó-terus tan ba ita, problema sei la mosu tan iha família laran. Bainhira Jesus nia Ukun ba Tinan Rihun Ida ramata ona, ema hotu sei sai perfeitu. Ema neʼebé moris liu koko ba dala ikus sei sai Jeová nia oan no simu “liberdade neʼebé furak nuʼudar Maromak nia oan sira”. (Rom 8:21) Tan neʼe, mai ita hotu hatudu domin hodi hametin malu no ajuda malu atu moris toʼo Maromak nia mundu foun neʼebé furak. w18.09 p. 14 par. 10; p. 16 par. 18

Estuda Maromak nia Liafuan laʼós atu lee liu deʼit ka riska resposta sira. Bainhira ita estuda, ita hanoin informasaun neʼe hanorin saida ba ita kona-ba Jeová, ninia dalan, no hanoin sira. Ita hakaʼas an atu komprende tanbasá mak Jeová hakarak ita atu halo buat ruma no tanbasá mak nia la simu buat balu. Ita mós hanoin kona-ba mudansa saida mak ita presiza halo ba ita-nia hahalok no hanoin. Karik ita labele medita kona-ba pontu ida-idak iha estuda hotu. Maibé diʼak atu fahe ita-nia tempu atu estuda hodi uza porsentu 50 atu medita kona-ba buat neʼebé ita lee. (1 Tim 4:15) Kuandu ita medita beibeik kona-ba Maromak nia Liafuan, ita sei ‘hatene ho loloos’ katak Jeová nia hanoin mak perfeitu. Ita komesa haree buat hotu tuir Jeová nia haree no ikusmai konkorda ho ninia hanoin. Ita hafoun ita-nia hanoin no haburas fali dalan foun atu hanoin. (Rom 12:2) Neineik-neineik ita halo Jeová nia hanoin sai ita-nian. w18.11 p. 24 par. 5-6

Apóstolu Paulo refere ba ninia an no ema kristaun seluk iha ninia tempu hanesan “Maromak nia maluk serbisu-naʼin” tanba sira hotu haklaken no hanorin lia-loos ba ema. (1 Kor 3:6) Ohin loron ita mós bele sai “Maromak nia maluk serbisu-naʼin” liuhusi fó ita-nia tempu, forsa, no rikusoin ho laran-luak atu halo serbisu neʼebé Maromak fó ba ita. Ida-neʼe priviléjiu neʼebé boot tebes! Fó ita-nia tempu no forsa ho laran-luak hodi haklaken no hanorin sei lori ksolok neʼebé boot. Irmaun-irmán barak neʼebé iha ona oportunidade atu fó estuda Bíblia ba ema, sira konkorda kona-ba neʼe. Ita kontente tebes hodi haree ita-nia estudante sira haksolok bainhira sira buka-hatene saida mak Bíblia hanorin, sira-nia fiar aumenta, halo mudansa ba sira-nia moris, no hahú fó sai fali ba ema seluk kona-ba buat neʼebé sira aprende. Jesus mós sente hanesan neʼe bainhira ninia dixípulu naʼin-70 neʼebé nia haruka bá haklaken “fila ho haksolok” tanba sira hetan rezultadu neʼebé diʼak.​—Lc 10:17-21. w18.08 p. 20 par. 11-12

Sadere ba ita-nia matenek rasik bele sai lasu ba ita. Karik ita hanoin katak, ita bele komprende situasaun ida maski ita seidauk hetan faktu neʼebé kompletu. Susar seluk mak se ita iha problema ho irmaun ka irmán ruma, neʼe bele hanetik ita atu halo konkluzaun neʼebé loos kona-ba ema neʼe. Se ita mak hanoin beibeik kona-ba ita-nia problema ho nia, neʼe bele halo ita deskonfia nia. Tuirmai, se ita rona buat ruma neʼebé negativu kona-ba nia, karik ita sei fiar kedas, maski la iha evidénsia neʼebé loos. Neʼe hanorin saida mai ita? Se ita mak la gosta ita-nia irmaun-irmán sira, neʼe bele halo ita foti konkluzaun sala neʼebé la tuir faktu sira. (1 Tim 6:4, 5) Tan neʼe, la bele rai sentimentu laran-moras iha ita-nia laran. Keta haluha katak Jeová hakarak ita atu hatudu domin ba irmaun-irmán sira no fó perdua ba sira husi laran.​—Kol 3:12-14. w18.08 p. 6 par. 15; p. 7 par. 18

Tanba Jeová mak kria ema, tan neʼe ita hotu ninian. (Sal 100:3; Apok 4:11) Maski nuneʼe, Jeová hili ema grupu balu hodi sai ninian iha dalan neʼebé espesiál. Porezemplu, Salmo 135 hatete katak ema Izraél husi tempu antigu neʼebé adora Jeová ho laran-metin mak “ninia povu neʼebé espesiál”. (Sal 135:4) No Oseias mós fó sai profesia katak ema balu neʼebé la mai husi Izraél mós sei sai Jeová nia povu. (Os 2:23) Profesia neʼe sai loos iha tempu Jeová komesa hili ema neʼebé la mai husi Izraél atu ukun hamutuk ho Kristu. (Após 10:45; Rom 9:23-26) Ema sira-neʼe bolu nuʼudar “nasaun santu”, “povu neʼebé [Jeová] hili ba nia an rasik” liuhusi ninia espíritu santu. (1 Ped 2:9, 10) Maibé oinsá ho ema kristaun laran-metin ohin loron neʼebé iha esperansa atu moris ba nafatin iha rai? Jeová mós bolu sira nuʼudar “haʼu-nia povu” no “sira neʼebé haʼu hili ona”.​—Isa 65:22. w18.07 p. 22 par. 1-2

Jesus hatudu ezemplu neʼebé perfeitu ba ema kona-ba oinsá bele sai laran-luak, no ita hakarak banati-tuir ninia ezemplu. (Mt 20:28) Husu ba ita-nia an: ‘Oinsá mak haʼu bele halo tuir liután Jesus nia ezemplu?’ (1 Ped 2:21) Jeová kontente hodi haree ita halo tuir ezemplu perfeitu neʼebé nia no Jesus hatudu ba ita. Ita presiza hatudu interese ba ema seluk no buka dalan oioin atu ajuda sira. Iha ai-knanoik kona-ba ema Samaria neʼebé laran-diʼak, Jesus hatudu katak importante tebes ba ninia dixípulu hotu atu fó ajuda ba ema seluk, maski ema neʼe mai husi rai neʼebé la hanesan. (Lc 10:29-37) Sei hanoin-hetan ka lae, tanbasá mak Jesus konta istória neʼe? Neʼe tanba ema judeu ida husu ba nia: “Sé mak haʼu-nia maluk?” Resposta neʼebé Jesus fó, hanorin ita katak ita tenke hatudu laran-luak hanesan ema Samaria neʼe se ita hakarak halo kontente Jeová. w18.08 p. 19 par. 5-6

Jeová hatene no simu nafatin Maria tanba nia kontinua hatudu laran-metin hodi haboot no tau matan ba Jesus. Tan neʼe Jeová rai liafuan balu neʼebé Maria koʼalia no temi buat balu neʼebé Maria halo iha Bíblia. Bainhira Jesus halaʼo serbisu haklaken ba tinan tolu ho balu, Maria la tuir Jesus. Karik tanba nia sai ona feto-faluk no hela deʼit iha Nazaré. Maski nia lakon oportunidade barak tanba la tuir Jesus, maibé iha tempu Jesus mate, Maria konsege hamutuk ho nia. (João 19:26) Ikusmai, Maria mós hamutuk ho Jesus nia dixípulu sira iha Jeruzalein antes sira simu espíritu santu iha loron Pentekostes. (Após 1:13, 14) Ita bele fiar katak nia mós simu espíritu santu hamutuk dixípulu seluk. Se nuneʼe, nia mós hetan oportunidade atu hamutuk ho Jesus iha lalehan ba nafatin. Neʼe mak kolen neʼebé furak tebes ba ninia serbisu hotu ho laran-metin! w18.07 p. 9 par. 11; p. 10 par. 14

Jesus uza prinsípiu sira atu hanorin ninia dixípulu sira katak ema nia hahalok iha konsekuénsia. Porezemplu, nia hanorin katak hirus bele lori ema atu halo violénsia, no hanoin neʼebé foʼer bele lori ema atu halo sala seksuál. (Mt 5:21, 22, 27, 28) Bainhira ita husik Jeová nia prinsípiu sira atu dirije ita, ita-nia konxiénsia sei hetan treinu, no ita sei halo desizaun neʼebé lori glória ba Maromak. Maski ita uza Bíblia hodi treinu ita-nia konxiénsia, desizaun neʼebé ita foti karik la hanesan ho desizaun neʼebé ema kristaun seluk foti. Ezemplu ida mak kona-ba hemu tua. Bíblia la dehan katak sala atu hemu tua, maibé dehan ita la bele hemu demais no sai lanu. (Prov 20:1; 1 Tim 3:8) Ida-neʼe katak ema kristaun ida bele hemu deʼit no la presiza hanoin kona-ba ema seluk, naran katak la hemu demais ka lae? Lae. Maski ninia konxiénsia rasik husik nia atu hemu, maibé nia presiza nafatin atu hanoin kona-ba ema seluk nia konxiénsia. w18.06 p. 18 par. 10-11

Jesus fó avizu ba ninia dixípulu sira atu hadook an husi “fermentu”, ka hanorin husi ema farizeu, ema saduseu, no ema neʼebé apoia Herodes. (Mt 16:6, 12) No loloos, lakleur povu sira koko atu halo Jesus sai liurai mak Jesus fó avizu neʼe. Bainhira relijiaun sira hola parte iha buat polítiku, neʼe sempre hamosu violénsia. Jesus hanorin ninia dixípulu sira atu nafatin neutrál. Neʼe mak razaun ida tansá ulun-naʼin amlulik no farizeu sira hakarak oho Jesus. Sira taʼuk ema barak sei rona ba Jesus no la halo tuir tan sira. Se ida neʼe mak akontese duni, sira sei lakon sira-nia pozisaun iha relijiaun no polítiku. Sira hatete: “Se ita husik deʼit nia hanesan neʼe, sira hotu sei tau fiar ba nia, no ema Roma sira sei mai hodi hasai ita-nia fatin adorasaun nian no mós ita-nia nasaun.” (João 11:48) Tan neʼe amlulik boot Caifás halo planu hodi oho Jesus.​—João 11:49-53; 18:14. w18.06 p. 6 par. 12-13

Iska ida neʼebé Satanás uza mak buka-hatene kona-ba espiritizmu. Ohin loron, Satanás koko book ema atu hatudu interese ba buat neʼebé iha ligasaun ho anju aat sira liuhusi relijiaun falsu no mós atividade halimar nian. Filme, games, programa média oioin halo espiritizmu sai hanesan buat neʼebé jeitu. Oinsá mak ita bele hasees an husi espiritizmu? Tuir loloos, ita hatene katak Maromak nia organizasaun la halo lista kona-ba atividade halimar nian neʼebé diʼak no aat. Ita tenke treinu ita-nia konxiénsia hodi ita bele halo desizaun diʼak neʼebé tuir Jeová nia prinsípiu sira. (Ebr 5:14) Ita sei halo desizaun neʼebé matenek se ita halo tuir apóstolu Paulo nia konsellu neʼebé hakerek iha leten. Tan neʼe, bainhira atu hili atividade halimar nian, husu ba ita-nia an: ‘Atividade neʼebé haʼu hili hatudu katak haʼu laran-makerek ka lae? Se haʼu-nia estudante Bíblia ka vizita fali haree kona-ba atividade halimar nian neʼebé haʼu hili, sira sei hanoin katak haʼu hanorin buat ida maibé halo fali buat seluk ka lae?’ Se ita mak halo tuir prinsípiu sira neʼebé ita haklaken ba ema seluk, neʼe sei ajuda ita atu hasees an husi Satanás nia lasu sira.​—1 João 3:18. w18.05 p. 25 par. 13

Oinsá mak ita bele banati-tuir Paulo? Primeiru, ita presiza iha hakarak husi laran hodi buka sira neʼebé “prontu atu simu lia-loos neʼebé lori ba moris rohan-laek”. Segundu, ita harohan makaʼas ba Jeová atu ajuda ema neʼebé hakarak rona bainhira ita haklaken ba sira. (Após 13:48; 16:14) Neʼe mak buat neʼebé Silvana halo, nia pioneiru ona besik tinan 30. Nia dehan: “Antes haklaken iha uma ida-idak, haʼu halo orasaun ba Jeová atu husu nia ajuda haʼu hodi iha hanoin neʼebé pozitivu.” Ita mós halo orasaun ba Jeová atu husu ninia anju sira ajuda ita buka ema neʼebé hakarak rona. (Mt 10:11-13; Apok 14:6) Robert pioneiru ona ba tinan 30 liu dehan: “Serbisu hamutuk ho anju sira mak buat neʼebé furak tebes tanba sira hatene ema ida-idak nia situasaun.” Terseiru, ita hakarak hakaʼas an atu iha hanoin neʼebé diʼak kona-ba ema no hanoin pozitivu katak ema sei serbí Jeová. Irmaun Carl, katuas ida hatete: “Haʼu fó atensaun didiʼak ba sinál balu neʼebé hatudu katak ema iha duni interese, hanesan oin-midar, la hirus, ka husu pergunta ruma.” Se ita mak halo buat sira-neʼe, ita bele tahan no fó fuan nafatin hanesan Paulo. w18.05 p. 15 par. 13; p. 16 par. 15

Ita sente kontente hodi hatene katak ema neʼebé ita fó ajuda iha tempu uluk, agora laran-metin daudauk iha lia-loos. Apóstolu João dehan: “La iha buat ida neʼebé halo haʼu haksolok liu fali ida-neʼe, katak haʼu rona haʼu-nia oan sira kontinua laʼo iha lia-loos.” (3 João 4) Pioneiru barak sente haksolok tebes hodi rona katak ema neʼebé uluk sira ajuda hodi aprende kona-ba lia-loos, ohin loron serbí daudauk Jeová ho laran-metin, balu mós serbí daudauk nuʼudar pioneiru. Tan neʼe, se ita haree pioneiru ruma sente laran-kraik, ita bele fó-hanoin ba sira kona-ba buat barak neʼebé sira halo ona hodi ajuda ema seluk. Katuas área barak hatete katak, sira ho sira-nia feen sente kontente tebes bainhira sira simu karta husi irmaun-irmán sira neʼebé hatoʼo agradese ba sira-nia vizita. Nuneʼe mós kona-ba katuas kongregasaun, misionáriu, pioneiru, no ema Betel sira. Se ita hatoʼo agradese ba sira-nia laran-metin iha Jeová nia serbisu, neʼe sei fó laran-manas ba sira. w18.04 p. 23 par. 14-15

Salomão la halo tuir ukun-fuan neʼe. Ikusmai nia iha feen 700 no feen-kiʼik 300. (1 Reis 11:3) Husi feen sira-neʼe, barak mak mai husi rai seluk no sira adora maromak falsu oioin. Husi neʼe Salomão mós kontra Maromak nia ukun-fuan kona-ba la bele hola feto husi rai seluk. (Deut 7:3, 4) Neineik-neineik Salomão lakon ninia domin ba Jeová nia ukun-fuan sira. Ikusmai nia halo buat barak neʼebé aat tebes. Nia harii altár ba maromak-feto Astoret no maromak falsu Kemos, no nia adora maromak falsu sira-neʼe hamutuk ho ninia feen sira. Laʼós neʼe deʼit, nia mós harii altár sira-neʼe iha foho neʼebé hateke malu ho Jeruzalein neʼebé uluk nia harii Jeová nia templu. (1 Reis 11:5-8; 2 Reis 23:13) Karik Salomão bosok ninia an hodi hanoin katak, Jeová la fó atensaun ba buat aat sira neʼebé nia halo, importante mak nia hasaʼe nafatin sakrifísiu iha templu. Maibé Jeová nunka taka matan ba sala sira. w18.07 p. 18-19 par. 7-9

Saida mak “rama-oan ho ahi” neʼebé Satanás uza hodi ataka ita? Karik nia uza lia-bosok kona-ba Jeová hodi ataka Ita. Satanás hakarak ita atu sente katak Jeová la hanoin ita no nia la hadomi Ita. Ida tinan 19 dehan: “Dala barak haʼu sente Jeová dook husi haʼu no nia lakohi sai haʼu-nia Belun.” Irmán neʼe halo saida bainhira sentimentu neʼe mosu? Nia dehan: “Reuniaun sira hametin tebes haʼu. Uluk, haʼu nunka fó komentáriu iha reuniaun, tanba haʼu hanoin ema lakohi rona haʼu-nia komentáriu sira. Maibé agora haʼu prepara didiʼak no koko atu fó komentáriu rua ka tolu.” Maski medida ba soldadu nia eskudu nunka troka, maibé husi Ida nia esperiénsia ita aprende katak, ita-nia fiar bele aumenta boot no mós bele sai menus, bele sai forte ka sai fraku. Neʼe depende ba ita. (Mt 14:31; 2 Tes 1:3) Ita tenke halo ita-nia “eskudu boot” fiar nian sai boot no forte liután hodi bele proteje ita! w18.05 p. 29-30 par. 12-14

Rai-nakdoko liutiha mak guarda neʼe troka ninia hanoin no buka ajuda. (Após 16:25-34) Hanesan neʼe mós, ema balu lakohi rona ba mensajen sira husi Bíblia, maibé bainhira susar ruma kona tiha sira, karik neʼe sei book sira atu troka sira-nia hanoin no buka ajuda. Karik ema balu lakon sira-nia serbisu derrepente ka karik ema seluk tan sente triste tanba sira foin kona moras neʼebé grave ka tanba ema ruma foin mate. Karik ema komesa husu pergunta barak kona-ba moris, pergunta sira neʼebé uluk sira nunka hanoin atu husu. Karik sira mós bele hanoin: ‘Saida mak haʼu tenke halo atu hetan salvasaun?’ Karik neʼe mak primeiravés sira hakarak rona mensajen neʼebé ita hatoʼo ba sira kona-ba esperansa ba moris. Tan neʼe mak se ita kontinua haklaken ho laran-metin, ita prontu atu haklaken ba ema bainhira sira presiza hetan kmaan.​—Isa 61:1. w18.05 p. 19-20 par. 10-12

Ohin loron Satanás taka ema barak nia matan no sira la hatene katak sira sai atan daudauk ba relijiaun falsu, rikusoin, no sistema polítiku nian. (2 Kor 4:4) Hanesan Jesus, ita iha priviléjiu atu ajuda ema seluk hatene no adora Jeová, Maromak neʼebé fó liberdade. (Mt 28:19, 20) La fasil atu haklaken ba ema seluk. Iha fatin balu ema la iha interese atu hatene kona-ba Maromak, no balu sai hirus bainhira ita haklaken ba sira. Maibé tanba Jeová fó ona mandamentu ba ita atu haklaken, ita tenke husu ba ita-nia an, ‘Haʼu bele uza haʼu-nia liberdade atu serbí Jeová liután ka lae?’ Diʼak tebes atu haree Jeová nia povu barak mak rekoñese katak mundu aat neʼe nia rohan besik ona atu mai no sira deside hodi halaʼo moris neʼebé simples no foti pioneiru. (1 Kor 9:19, 23) Balu pioneiru iha sira rasik nia kongregasaun, balu muda ba kongregasaun neʼebé presiza ajuda. Furak tebes hodi haree katak iha ema barak neʼebé uza sira-nia liberdade atu serbí Jeová iha dalan hanesan neʼe!​—Sal 110:3. w18.04 p. 11-12 par. 13-14