Novembru

Bainhira serbí Jeová, ita iha esperansa katak Jeová sei fó ba ita buat hotu neʼebé Adão ho Eva lakon, inklui oportunidade atu moris ba nafatin. Adão no Eva hili atu la serbí Jeová tanba sira la haburas domin neʼebé boot ba nia. Maski nuneʼe, Jeová husik sira moris ba tempu kleur hodi iha oan no halo desizaun rasik kona-ba oinsá haboot oan sira-neʼe. Rezultadu husi Adão no Eva nia desizaun atu livre husi Jeová hatudu ho klaru katak neʼe mak desizaun neʼebé beik. Sira-nia oan primeiru oho ninia alin neʼebé la halo sala, depois neʼe violénsia no hahalok hanoin an deʼit mak domina ema. (Gén 4:8; 6:11-13) Maibé, Jeová loke dalan atu salva Adão no Eva nia oan sira neʼebé hakarak serbí nia. (João 6:38-40, 57) Bainhira Ita aprende liután kona-ba Jeová nia pasiénsia no domin, Ita-nia domin ba nia mós sei sai boot liután. Ita sei la halo tuir Adão no Eva nia desizaun, maibé Ita sei dedika an ba Jeová. w19.03 p. 2 par. 3; p. 4 par. 9

Atu bele haburas hahalok hanoin malu, koko atu komprende susar neʼebé ita-nia família no irmaun-irmán sira hasoru. Hatudu interese ba joven sira iha kongregasaun no mós sira neʼebé moras, ferik-katuas, no sira neʼebé lakon ema neʼebé sira hadomi tanba mate. Husu sira-nia situasaun. Rona didiʼak bainhira sira fó sai sira-nia sentimentu. Ajuda sira haree katak ita komprende sira-nia situasaun. Oferese ajuda ba sira. Bainhira ita halo nuneʼe, ita hatudu domin neʼebé loos. (1 João 3:18) Bainhira ajuda ema seluk, ita presiza prontu atu troka tuir situasaun. Tanbasá? Tanba ema nia dalan atu hasoru susar mak la hanesan. Ema balu hakarak tebes atu koʼalia, maibé balu lakohi atu koʼalia kona-ba sira-nia problema. Tan neʼe, maski ita hakarak ajuda, maibé ita tenke kuidadu atu la husu pergunta sira neʼebé halo sira sente moe. (1 Tes 4:11) Bainhira ema fó sai sira-nia sentimentu, karik ita la konkorda ho sira. Maski nuneʼe, ita presiza rekoñese katak neʼe mak sira-nia sentimentu. Ita hakarak lalais atu rona no la ansi atu koʼalia.—Mt 7:1; Tgo 1:19. w19.03 p. 19 par. 18-19

Ita sente nakdedar bainhira atu haklaken kona-ba lia-loos ka lae? Hanoin kona-ba Neemias nia ezemplu. Nia serbí iha liurai kbiit boot ida nia palásiu. Neemias sente triste tanba nia rona katak sidade Jeruzalein nia moru no portaun sira rahun hela. (Neem 1:1-4) Imajina toʼok oinsá Neemias sente bainhira liurai husu nia atu esplika tanbasá nia triste. Neemias halo kedas orasaun no tuirmai nia hatán ba liurai. Rezultadu mak liurai halo buat oioin atu ajuda Maromak nia povu. (Neem 2:1-8) Hanoin mós kona-ba Jonas. Bainhira Jeová haruka nia atu koʼalia ba ema neʼebé hela iha Nínive, Jonas sente taʼuk tebes toʼo nia halai ba fatin seluk. (Jonas 1:1-3) Maibé ho Jeová nia ajuda, Jonas bá haklaken iha Nínive. No liafuan neʼebé nia fó sai book duni ema Nínive. (Jonas 3:5-10) Ita aprende husi Neemias katak importante tebes atu halo orasaun uluk antes hatán. No ita aprende husi Jonas katak Jeová bele ajuda ita atu serbí nia maski ita sente taʼuk tebes. w19.01 p. 11 par. 12

Kuandu ita moris tuir lia-loos husi Bíblia, karik ita-nia relasaun diʼak ho kolega no família sei troka. Tanbasá? Jesus halo orasaun kona-ba ninia dixípulu sira, hodi dehan: “Halo sira santu ho lia-loos. Ita-nia liafuan mak lia-loos.” (João 17:17) “Halo santu” bele signifika “haketak”. Kuandu ita komesa halo tuir lia-loos husi Bíblia iha ita-nia moris, ita haketak an husi mundu neʼe tanba ita moris tuir morál husi Bíblia. Maski ita koko atu iha nafatin relasaun diʼak ho ita-nia kolega ka família, karik sira balu hadook an husi ita ka karik kontra ita-nia fiar. Ita la hakfodak kona-ba neʼe. Jesus hatete: “Neʼe duni, ema nia inimigu sei mai husi ninia umakain rasik.” (Mt 10:36) Maibé Jesus mós promete katak, bainhira ita sosa lia-loos, ita sei simu bensaun barak liu fali sakrifísiu neʼebé ita halo ona! w18.11 p. 6 par. 11

Apóstolu Paulo hafolin tebes ninia irmaun-irmán sira no hatudu neʼe liuhusi dalan neʼebé nia koʼalia kona-ba sira. Nia sempre fó obrigadu ba Maromak kona-ba sira iha ninia orasaun. Nia mós hatudu ninia agradese bainhira nia hakerek karta ba sira. Iha Roma 16:1-15, Paulo temi maluk Kristaun naʼin-27 nia naran. Paulo temi Prisca no Áquila neʼebé “tau sira-nia moris iha perigu laran” tanba nia, no nia temi Febe nuʼudar ema neʼebé “defende ona maun-alin barak”, inklui Paulo. Nia gaba irmaun-irmán doben sira-neʼe neʼebé serbisu makaʼas. Paulo mós hatene katak ninia maluk sira la perfeitu, maibé nia hili atu tau fokus ba sira-nia hahalok diʼak. Klaru katak irmaun-irmán sira-neʼe hetan duni anima bainhira rona Paulo nia liafuan neʼebé sira lee iha kongregasaun! Tan neʼe ita bele fiar katak sira-nia relasaun nuʼudar belun sai metin liu. Ita mós sempre hatudu agradese ba buat diʼak neʼebé ema iha kongregasaun laran koʼalia no halo ka lae? w19.02 p. 16 par. 8-9

Ita tenke sai perfeitu atu bele hatudu integridade ka lae? Lae duni, tanba ita hotu la perfeitu no halo sala beibeik. Ita la presiza sai perfeitu hodi hatudu integridade tanba Jeová la fokus deʼit ba ita-nia sala. Ninia Liafuan hatete ba ita: “Oh Jah, oh Jeová, sé mak bele tahan se Ita hateke deʼit ba sala sira?” (Sal 130:3) Nia hatene katak ita la perfeitu no sala-naʼin, no nia prontu atu perdua ita. (Sal 86:5) No mós, Jeová hatene ita iha limite, no nia la husu ita atu halo liu fali ita-nia kbiit. (Sal 103:12-14) Domin mak xave atu Jeová nia atan sira hatudu integridade. Ita tenke hatudu domin no laran-metin neʼebé kompletu ba ita-nia Aman iha lalehan. Se ita kontinua hatudu domin hanesan neʼe maski ita hetan koko, neʼe katak ita hatudu integridade. (1 Krón 28:9; Mt 22:37) Ita hatene Jeová nia prinsípiu mak loos, no ita fokus deʼit atu halo ita-nia Aman iha lalehan kontente. Domin ba nia book ita atu sempre hanoin uluk ninia hakarak antes ita halo desizaun atu nuneʼe ita hatudu katak ita iha integridade. w19.02 p. 3 par. 4-5

Bainhira ita hetan benefísiu tanba halo buat diʼak, ita-nia fiar sai metin liután. (Tgo 1:2, 3) Ita sente kontente tanba ita halo Jeová orgullu ho ita nuʼudar ninia oan, no ita hakarak liután atu halo nia kontente. (Prov 27:11) Tentasaun ida-idak neʼebé ita hasoru mak hanesan oportunidade atu hatudu katak ita serbí ita-nia Aman ho laran tomak. (Sal 119:113) Ita hadomi Jeová ho laran tomak hodi hakaʼas an halo tuir ninia mandamentu no hakarak. (1 Reis 8:61) Tanba la perfeitu, ita sei kontinua halo sala. Tan neʼe, hanoin-hetan Liurai Ezequias nia ezemplu. Nia halo sala, maibé nia arrepende an, no kontinua serbí Jeová ho “laran tomak”. (Isa 38:3-6; 2 Krón 29:1, 2; 32:25, 26) Entaun, mai ita la simu Satanás nia hanoin neʼebé bele estraga ita-nia hanoin. Mai ita halo orasaun katak ita sei haburas “laran neʼebé prontu atu halo tuir” no laran-metin nafatin ba Jeová.​—1 Reis 3:9; Sal 139:23, 24. w19.01 p. 19 par. 17-18

Ita hetan benefísiu bainhira fó komentáriu iha reuniaun sira. (Isa 48:17) Oinsá? Primeiru, se ita hakarak atu fó komentáriu, neʼe sei book ita atu prepara didiʼak ba reuniaun. No bainhira ita prepara didiʼak, ita sei komprende liután Maromak nia Liafuan. Bainhira ita komprende didiʼak, fasil liu ba ita atu aplika buat neʼebé ita aprende. Segundu, ita sei sente kontente liu atu tuir reuniaun se ita hola parte. Terseiru, tanba ita prepara didiʼak antes fó komentáriu, neʼe sei ajuda ita atu hanoin-hetan nafatin pontu importante husi ita-nia komentáriu. No mós, ita halo Jeová kontente bainhira ita fó sai ita-nia fiar. Ita bele fiar katak Jeová rona ita no hafolin tebes ita-nia hakaʼas an atu fó komentáriu iha reuniaun sira. (Mal 3:16) Nia hatudu katak nia hafolin ita hodi fó bensaun ba ita-nia hakaʼas an atu halo nia kontente. (Mal 3:10) Ita iha razaun diʼak oioin atu fó komentáriu iha reuniaun. w19.01 p. 8 par. 3; p. 9-10 par. 7-9

Jeová hanorin ita iha dalan neʼebé matenek tebes. Duké fó ukun-fuan barak, nia ho pasiénsia hanorin ita atu halo tuir ukun-fuan kona-ba domin. Nia hanorin ita atu moris tuir ninia prinsípiu no odi buat neʼebé aat. Iha Diskursu iha Foho, Jesus mós hanorin ita iha dalan hanesan neʼe hodi esplika tanbasá mak ema halo buat aat oioin. (Mt 5:27, 28) Nuʼudar Liurai ba Maromak nia Ukun, Jesus sei kontinua hanorin ita iha mundu foun, atu nuneʼe ita bele iha hanoin neʼebé hanesan nia kona-ba hahalok loos no sala. (Ebr 1:9) Nia mós sei halo ita-nia isin no neon sai perfeitu. Imajina toʼok, iha tempu neʼebá, ita sei sai livre husi hakarak atu halo buat neʼebé sala, no ita mós sei la hetan tan susar husi ita-nia sala. Ikusmai, ita sei goza duni “liberdade neʼebé furak” neʼebé Maromak promete ba ita. (Rom 8:21) Klaru katak ita-nia liberdade sempre iha limite. Ita bele hetan liberdade neʼebé kompletu kuandu ita haleno Maromak nia domin.​—1 João 4:7, 8. w18.12 p. 23 par. 19-20

Ukun-Fuan fó lisensa ba mane Izraél ida atu soe malu se “nia haree buat ruma neʼebé la loos” kona-ba ninia feen. Ukun-Fuan la esplika hahalok neʼebé “la loos” mak saida, maibé neʼe refere ba hahalok neʼebé aat tebes ka lori moe boot, laʼós problema kiʼik. (Deut 23:14) Triste tebes iha Jesus nia tempu, mane Judeu barak soe sira-nia feen “tan razaun naran deʼit”. (Mt 19:3) Ita lakohi atu iha hanoin hanesan neʼe. Iha profeta Malaquias nia tempu, mane barak soe sira-nia feen, karik atu kaben ho feto joven sira neʼebé la adora Jeová. Tan neʼe, Malaquias fó sai Jeová nia hanoin kona-ba soe-malu, hodi dehan: “Haʼu odi soe-malu.” (Mal 2:14-16) Neʼe apoia Jeová nia Liafuan ba kaben-naʼin primeiru, neʼebé dehan: ‘Mane ida sei hela hamutuk ho ninia feen, no sira sei sai isin ida deʼit.’ (Gén 2:24) Jesus mós apoia ninia Aman nia hanoin kona-ba arranju kaben nian, hodi dehan: “Buat neʼebé Maromak tau hamutuk, ema keta haketak.”​—Mt 19:6. w18.12 p. 11 par. 7-8

Ba irmaun-irmán sira neʼebé bele muda ba fatin neʼebé presiza haklaken-naʼin liután, sira hatudu hahalok neʼebé profeta Isaías hatudu. Bainhira Jeová husu: “Sé mak haʼu sei haruka? Sé mak sei lori ami-nia lia-menon?” Isaías hatán: “Haʼu mak neʼe! Haruka haʼu bá!” (Isa 6:8) Ita bele fó ajuda ba Jeová nia organizasaun hodi hatudu hahalok hanesan Isaías nian ka lae? Bainhira Jesus koʼalia kona-ba serbisu haklaken no ajuda ema sai ninia dixípulu, nia dehan: “Tan neʼe, husu ba toʼos-naʼin atu haruka tan ema hodi halo serbisu koʼa nian.” (Mt 9:38) Ita bele serbí nuʼudar pioneiru iha fatin neʼebé presiza tan haklaken-naʼin ka lae? Ka Ita bele ajuda ema seluk atu halo nuneʼe ka lae? Irmaun-irmán barak hatete katak, dalan neʼebé diʼak liu hotu atu hatudu sira-nia domin ba Maromak no ema seluk mak hodi foti pioneiru iha fatin neʼebé presiza haklaken-naʼin. Iha dalan seluk tan ka lae neʼebé Ita bele serbí Jeová liután? Se Ita mak halo nuneʼe, Ita sei sente kontente tebes. w18.08 p. 27 par. 14-15

Evanjellu sira hatudu ho klaru Jeová nia hanoin kona-ba rikusoin. Maromak hili rasik José no Maria atu haboot ninia Oan-Mane maski José no Maria laʼós ema neʼebé riku. (Lev 12:8; Lc 2:24) Iha tempu neʼebé Jesus moris, Maria “hatoba nia iha animál nia han-fatin, tanba la iha fatin ba sira hodi hela”. (Lc 2:7) Se Jeová hakarak, nia bele halo Jesus moris iha uma neʼebé diʼak liu. Maibé buat neʼebé importante ba Jeová mak Jesus bele sai boot iha família neʼebé tau uluk adorasaun ba Maromak. Istória neʼe hanorin ita oinsá Jeová nia haree kona-ba rikusoin. Inan-aman balu hakarak sira-nia oan atu iha sasán neʼebé diʼak liu hotu, maski halo nuneʼe bele estraga oan nia relasaun diʼak ho Jeová. Maibé buat neʼebé importante liu ba Jeová mak ita-nia relasaun diʼak ho nia. Ita simu Jeová nia haree kona-ba neʼe ka lae? Ita rasik nia hahalok hatudu saida? w18.11 p. 24 par. 7-8

Jeová mak kontente nia Hun, nia hakarak ita atu sai kontente, no nia fó razaun barak ba ita atu sai kontente. (Deut 12:7; Ecle 3:12, 13) Maibé ohin loron, la fasil atu sai kontente. Tanbasá? Dala ruma situasaun susar hanesan, ema ruma neʼebé ita hadomi mate ka hasai husi kongregasaun, soe-malu ka lakon serbisu, bele halakon ita-nia kontente. Susar mós atu sai kontente se família la iha dame tanba diskute malu beibeik. Kolega serbisu ka eskola goza ita, ema fó-terus ka hatama ita ba komarka tanba ita-nia fiar, saúde sai fraku, moras ba templu kleur, ka moras depresaun mós bele halakon kontente. Maibé presiza hanoin-hetan katak, kuandu iha rai, Jesus Kristu, “Naʼi neʼebé iha kbiit boot no neʼebé ksolok”, gosta tebes atu fó kmaan no halo ema sai kontente. (1 Tim 6:15; Mt 11:28-30) Iha Jesus nia diskursu iha foho, nia temi hahalok balu neʼebé bele ajuda ita atu sai kontente maski ita hasoru problema oioin iha Satanás nia mundu neʼe. w18.09 p. 17 par. 1-3

Bainhira aprende lia-loos, fasil ba ema balu atu la halo tuir tan kostume no toman neʼebé Jeová la simu. (Prov 23:23) Maibé ba ema balu, neʼe la fasil. Sira hanoin barak kona-ba família, kolega serbisu, ka kolega seluk nia hanoin. Sira hatene katak baibain ema hatudu respeitu kleʼan ba kostume balu, hanesan halo buat ruma atu hatudu respeitu ba matebian sira. Entaun, saida mak bele ajuda ita atu halo mudansa? Ema seluk nia ezemplu diʼak bele ajuda ita halo mudansa. Ema sira iha Éfeso neʼebé uluk envolve iha masonik presiza halo saida hodi sosa lia-loos atu sai ema Kristaun? Bíblia dehan: “Sira halibur sira-nia livru hamutuk no sunu iha ema hotu nia oin. Sira sura hamutuk no hatene katak livru sira-neʼe nia folin mak osan-mutin 50.000. Tanba Jeová nia kbiit mak ninia liafuan kontinua habelar no ema barak tan sai fiar-naʼin.” (Após 19:19, 20) Ema Kristaun laran-metin sira-neʼe halo sakrifísiu neʼebé boot no Jeová haraik bensaun ba sira. w18.11 p. 7 par. 15-16

Bainhira ema Izraél hakur tiha Mota Jordaun, Josué hasoru mane ida kaer surik besik sidade Jerikó. Mane neʼe hatete ba nia katak nia mak “ulun-naʼin ba Jeová nia tropa”, anju neʼebé prontu atu defende Maromak nia povu. (Jos 5:13-15) Anju neʼe fó matadalan neʼebé klaru ba Josué oinsá atu funu manán Jerikó. Foufoun, karik matadalan balu haree hanesan planu neʼebé ladún diʼak. Porezemplu, anju neʼe haruka Josué atu halo sirkunsizaun ba soldadu hotu. Ida-neʼe signifika katak sira sei la bele halo funu ba loron balu. (Gên 34:24, 25; Jos 5:2) Karik soldadu sira hanoin: ‘Oinsá mak ami bele proteje ami-nia família se inimigu sira ataka ami?’ Maibé tuirmai iha buat ida la hanesan baibain akontese. Ema Jerikó sira sai taʼuk fali ba ema Izraél. Bíblia dehan: “Sidade Jerikó nia portaun taka metin loos tanba ema Izraél; la iha ema ida mak sai no la iha ema ida mak tama ba sidade neʼe.” (Jos 6:1) Ita bele fiar katak novidade neʼe halo ema Izraél tau fiar liután ba Maromak nia matadalan. w18.10 p. 23 par. 5-7

Oinsá mak ita bele banati-tuir Paulo nia ezemplu diʼak kona-ba hatudu haraik-an? Dalan ida mak ita la bele sente katak ita mak ema espesiál tanba ita kumpre ona knaar ruma ho Jeová nia ajuda. Ita ida-idak presiza husu ba ita-nia an: ‘Haʼu sente oinsá kona-ba ema iha haʼu-nia haklaken-fatin? Haʼu halo diskriminasaun ba ema husi rasa seluk ka lae?’ Iha mundu tomak, Testemuña ba Jeová koko atu buka ema oioin neʼebé hakarak rona kona-ba lia-loos. Balu hakaʼas an hodi aprende língua ka kostume neʼebé ema seluk la hafolin. Maski nuneʼe, sira nunka sente katak sira diʼak liu fali ema seluk. Sira koko atu komprende ema ida-idak nia situasaun hodi bele ajuda ema simu lia-loos. w18.09 p. 4 par. 9; p. 5 par. 11

Ikusmai ema Roma oho Judas. Hanesan ho Judas no ema seluk neʼebé fanátiku, ema judeu barak mós hein namanas ba Mesias. Sira hanoin katak Mesias sei halo sira sai livre husi governu Roma no halo nasaun Izraél sai fali nasaun neʼebé boot. (Lc 2:38; 3:15) Ema barak mak hanoin katak Mesias sei harii fali ukun ida iha nasaun Izraél. No ema judeu barak neʼebé hela daudaun iha fatin seluk sei fila fali mai Izraél iha tempu neʼebá. João Batista mós husu ba Jesus: “Ita mak ida neʼebé atu mai, ka ami sei hein ema seluk?” (Mt 11:2, 3) Karik João hanoin iha ema seluk mak sei mai atu halo ema judeu sai livre. No dixípulu naʼin-rua neʼebé laʼo hela iha dalan ba Emaus no hasoru Jesus neʼebé moris-hiʼas fali ona mós hanoin katak Jesus sei halo ema Izraél sai livre. (Lc 24:21) Tuirmai, apóstolu sira husu ba Jesus: “Naʼi, Ita-Boot sei hadiʼa fali Izraél nia ukun iha tempu neʼe ka lae?”​—Após 1:6. w18.06 p. 4 par. 3-4

Ita presiza kuidadu liuliu bainhira rona informasaun ruma kona-ba Jeová nia povu. Keta haluha katak Satanás sempre buka atu duun Maromak nia atan neʼebé laran-metin no “koʼalia aat” sira. (Apok 12:10) Jesus fó avizu katak inimigu sira sei “koʼalia lia-bosok oioin neʼebé aat” hasoru ita. (Mt 5:11) Se ita rona ba avizu neʼe, ita sei la hakfodak bainhira rona informasaun ruma neʼebé ladiʼak kona-ba Jeová nia povu. Ita gosta haruka e-mail ka mensajen ba kolega sira ka lae? Bainhira Ita haree ka rona informasaun foun ruma, Ita sente hanesan jornalista neʼebé hakarak fahe uluk informasaun neʼe ka lae? Antes haruka e-mail ka mensajen sira-neʼe, husu ba Ita-nia an: ‘Oinsá mak haʼu hatene katak informasaun sira-neʼe loos? Haʼu iha faktu saida deʼit?’ Se Ita iha duvida, karik buat neʼebé Ita habelar mak lia-bosok. Tan neʼe, se Ita mak iha duvida kona-ba informasaun ruma, keta haruka ba ema seluk. Hamoos kedas! w18.08 p. 3 par. 3; p. 4 par. 6-7

Jesus hakarak ita atu hatudu laran-luak tanba neʼe bele halo ita sai kontente. Kuandu ita hatudu laran-luak ba ema seluk, neʼe sei book sira atu hatudu fali laran-luak ba ita. Ita hatene katak laʼós ema hotu hafolin laran-luak neʼebé ita hatudu ba sira. Tan neʼe, maski sira la agradese, hatudu nafatin laran-luak. Ita la bele hatene liuhusi hahalok laran-luak neʼebé simples sei lori rezultadu saida. Ema neʼebé hatudu laran-luak fó laʼós hodi hein atu simu fali buat ruma. Jesus dehan: “Kuandu ó halo festa, konvida ema kiak, ain-kudeʼik, matan-delek, no ema aleijadu seluk; no ó sei haksolok, tanba sira la iha kbiit atu selu fali ó.” (Lc 14:13, 14) Bíblia mós dehan: “Ema neʼebé laran-luak sei hetan bensaun”, no “ksolok ba ema neʼebé hanoin ema kiʼik sira”. (Prov 22:9; Sal 41:1) Sin, ita tenke hatudu laran-luak tanba ita hakarak tebes atu fó ajuda ba ema seluk. w18.08 p. 21-22 par. 15-16

Ohin loron, susar tebes atu bele hetan faktu neʼebé loos no tetu didiʼak faktu sira-neʼe. Tanbasá? Tanba informasaun barak la kompletu ka balu ladún loos, no tanba ita la perfeitu. Saida mak bele ajuda ita? Prinsípiu sira husi Maromak nia Liafuan! Porezemplu, prinsípiu ida hatete katak, ita beik se ita hatán kedas antes haree ba faktu hotu. (Prov 18:13) Ida seluk hatete katak ita la bele fiar deʼit ba buat hotu se ita seidauk buka-hatene didiʼak buat neʼe sala ka loos. (Prov 14:15) No ikus mak, maski ita serbí Jeová ba tinan barak ona, ita la bele sadere ba ita rasik nia matenek. Bíblia nia prinsípiu sira bele proteje ita, naran katak ita uza faktu neʼebé loos atu halo konkluzaun diʼak no desizaun neʼebé matenek. w18.08 p. 7 par. 19

Bainhira ita hetan batizmu, ita hatudu ba ema hotu katak ita mak Jeová nian, no ita halo tuir nia ho ita-nia hakarak rasik. Jesus mós halo buat neʼebé hanesan bainhira nia hetan batizmu. Nia dehan: “Oh haʼu-nia Maromak, haʼu kontente atu halo Ita-nia hakarak.” (Sal 40:7, 8) Jeová sente oinsá bainhira Jesus hetan batizmu? Bíblia dehan: “Hetan tiha batizmu, Jesus sai husi bee, no tuirmai lalehan nakloke, no nia haree Maromak nia espíritu hanesan manu-pombu ida tun ba Jesus. No mós, lian ida husi lalehan dehan: ‘Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.’” (Mt 3:16, 17) Antes neʼe, Jesus sai ona Jeová nian. Maibé Jeová kontente atu haree Jesus hakarak uza ninia moris hodi serbí deʼit Nia. Jeová mós kontente hodi haree ita dedika ita-nia moris ba nia, no nia sei fó bensaun ba ita.​—Sal 149:4. w18.07 p. 23 par. 4-5

Moisés uza liafuan “ami”, karik nia refere ba nia ho Aarão. Moisés nia liafuan neʼe la hatudu respeitu tanba nia la fó glória hotu ba Jeová nuʼudar Hun ba milagre neʼebé akontese. Eskritura sira iha Salmo 106:32, 33 hatete katak: “Sira halo Maromak hirus iha bee Meribá nian, no sira-nia hahalok neʼe lori problema ba Moisés. Sira halo Moisés sai laran-hirus, no nia koʼalia hodi la hanoin uluk.” (Núm 27:14) Moisés la fó glória neʼebé Jeová merese atu simu. Tan neʼe Jeová hatete ba Moisés no Aarão: “Imi naʼin-rua kontra haʼu-nia mandamentu.” (Núm 20:24) Sala neʼe sériu tebes! Iha tempu uluk Jeová la husik Izraél nia jerasaun tomak atu tama ba rai promete tanba iha tempu neʼebá sira kontra nia. (Núm 14:26-30, 34) Tan neʼe, bainhira Moisés kontra Jeová, Jeová halo buat neʼebé loos no justu hodi fó kastigu neʼebé hanesan ba nia. Jeová la husik Moisés atu tama ba rai promete. w18.07 p. 14 par. 9, 12; p. 15 par. 13

Maski ita iha direitu atu hemu tua, maibé ita sei prontu atu husik ida-neʼe hodi la halo sidi ita-nia maluk neʼebé iha konxiénsia la hanesan ita-nian ka lae? Ita-nia irmaun-irmán balu uluk iha problema ho hemu tua demais antes sira tama lia-loos. Maibé agora sira deside metin atu sees husi tua. Ita lakohi duni halo buat ruma neʼebé bele book ema neʼe atu fila fali ba ninia toman uluk nian no lori susar ba ninia an! (1 Kor 6:9, 10) Tan neʼe, se ita simu ema iha ita-nia uma nuʼudar bainaka, ita sei obriga nia atu hemu tua ka lae, maski nia hatete ona nia lakohi? Lae duni, tanba neʼe la hatudu domin. Bainhira Timóteo sei joven, nia hakarak atu simu sirkunsizaun maski neʼe moras tebes. Nia halo ida-neʼe tanba nia hatene katak sirkunsizaun mak importante tebes ba ema judeu neʼebé nia atu haklaken bá. Hanesan Paulo, Timóteo lakohi halo ema ida sidi. (Após 16:3; 1 Kor 9:19-23) Ita mós prontu atu halo sakrifísiu hodi la halo ema sidi ka lae? w18.06 p. 18-19 par. 12-13

Kuandu Ita foin hasoru ema neʼebé seidauk tama lia-loos, Ita hatene saida deʼit kona-ba nia? Karik Ita hatene ninia naran no ninia oin, maibé la hatene ho loloos buat seluk kona-ba nia. Maibé oinsá se Ita foin hasoru ema neʼebé iha ona lia-loos? Ita hatene katak nia hadomi Jeová. Ita hatene Jeová mak dada nia no konvida nia atu sai parte husi ninia família. (João 6:44) Maski ema neʼe mai husi rai ka rasa neʼebé la hanesan, ka ninia situasaun moris ka kultura la hanesan, maibé Ita hatene ona buat barak kona-ba ema neʼe, no nia mós hatene buat barak kona-ba Ita! Kuandu Ita foin hasoru Testemuña ida, maski ema neʼe koʼalia língua neʼebé la hanesan, Ita bele hatene katak, Ita no Testemuña neʼe koʼalia “língua neʼebé moos” husi lia-loos. Neʼe katak Ita no ema neʼe mós iha fiar neʼebé hanesan kona-ba Maromak, morál, no esperansa ba futuru. Buat sira-neʼe sei ajuda duni ita atu fiar malu no sai belun diʼak ba nafatin. w18.12 p. 21 par. 9-10

Kristu dirije grupu administradór hodi fó sai katak ema kristaun neʼebé laʼós ema judeu la presiza atu halo sirkunsizaun. (Após 15:19, 20) Maski nuneʼe, tinan balu liutiha, ema kristaun judeu barak halo nafatin sirkunsizaun ba sira-nia oan-mane. Karik ita bele husu: ‘Tanbasá mak Jesus husik kazu kona-ba sirkunsizaun kontinua ba tempu kleur, maski Moisés nia Ukun-Fuan la vale ona husi tempu neʼebé Jesus mate?’ (Kol 2:13, 14) Ema balu presiza tempu atu simu esplikasaun neʼebé foun. Ema kristaun judeu balu presiza duni tempu atu hadiʼa sira-nia hanoin. (João 16:12) Ema balu sente susar atu simu katak sirkunsizaun laʼós tan sinál neʼebé hatudu katak ema iha relasaun espesiál ho Maromak. (Gên 17:9-12) Balu tan taʼuk katak komunidade judeu sei fó-terus ba sira tanba la hanesan ho sira. (Gal 6:12) Maibé neineik-neineik, Kristu hatudu tan matadalan ba sira liuhusi Paulo nia karta sira.​—Rom 2:28, 29; Gal 3:23-25. w18.10 p. 24-25 par. 10-12

Caifás hein toʼo kalan no haruka soldadu sira bá kaer Jesus. Maibé Jesus hatene ona kona-ba planu atu oho nia. Tan neʼe, durante ninia han-kalan hamutuk ho apóstolu sira, nia haruka sira prepara surik. Surik rua toʼo ona atu hanorin sira lisaun importante ida. (Lc 22:36-38) Tuirmai, iha kalan neʼe, soldadu sira mai atu kaer Jesus. Pedro sai hirus ho situasaun la justisa neʼe, no nia losu surik no ataka mane sira-neʼe ida. (João 18:10) Maibé Jesus hatete ba Pedro: “Hatama fali ó-nia surik ba nia fatin, tanba ema hotu neʼebé kaer surik sei mate ho surik.” (Mt 26:52, 53) Jesus hanorin lisaun importante saida ba ninia dixípulu sira? Sira labele sai parte ba mundu neʼe. Neʼe mak buat neʼebé Jesus temi iha ninia orasaun kalan antes neʼe. (João 17:16) Ema la iha kbiit atu luta ba justisa, só Maromak deʼit bele lori justisa. Maibé ita iha dame no unidade. Jeová kontente tanba haree katak ninia povu sira iha unidade, maski ema iha mundu neʼe haketak malu.​—Sof 3:17. w18.06 p. 6-7 par. 13-14, 16

Satanás mós koko halo taʼuk ita hodi ita la laran-metin tan ba Jeová. Porezemplu, karik nia bele fó influénsia ba governu hodi bandu ita-nia serbisu haklaken. Nia bele book ita-nia kolega serbisu ka eskola atu goza ita tanba ita halo tuir Bíblia nia morál sira. (1 Ped 4:4) Satanás mós bele book ita-nia família neʼebé la adora Jeová hodi uza razaun ho hakarak neʼebé diʼak atu hanetik ita hodi la tuir reuniaun sira. (Mt 10:36) Oinsá mak ita bele tahan? Primeiru, ita la presiza hakfodak kona-ba dalan neʼebé Satanás ataka ita, tanba ita hatene katak nia halo daudauk funu hasoru ita. (Apok 2:10) Segundu, ita mós presiza hanoin-hetan liafuan neʼebé Satanás hasaʼe. Nia dehan katak ita serbí Jeová durante tempu neʼebé fasil deʼit, maibé ita sei husik Jeová se ita hasoru situasaun susar. (Jó 1:9-11; 2:4, 5) Terseiru, ita tenke husu beibeik Jeová atu fó forsa ba ita atu tahan. Keta haluha katak Jeová sei nunka husik hela ita.​—Ebr 13:5. w18.05 p. 26 par. 14

Keta haluha katak ita-nia haklaken bele fó impaktu ba ema seluk maski haree hanesan ema la rona ba ita. Ema seluk nota ita. Sira bele haree katak ita hatais kabeer, hatudu respeitu, no diʼak ba ema hotu. Karik neʼe bele book sira, no neineik-neineik karik sira neʼebé hanoin sala kona-ba ita bele komesa iha fali hanoin neʼebé loos kona-ba ita. Sergio no Olinda, neʼebé serbisu nuʼudar pioneiru dehan: “Ba tempu uitoan ami la bá largu tanba moras. Bainhira ami bá fali, ema neʼebé laʼo iha dalan hatete: ‘Saida mak akontese ba imi? Ami hanoin kona-ba imi.’” Ita envolve daudauk iha serbisu importante hodi fó “sasin ba nasaun hotu”, tan neʼe keta husik Ita-nia “liman deskansa” hodi fó sai ba ema kona-ba Maromak nia Ukun. (Mt 24:14) Importante liu mak Ita sei hetan ksolok neʼebé boot tanba Ita halo Jeová sente kontente. Nia hadomi ema hotu neʼebé tahan no fó fuan nafatin!​—Lc 8:15. w18.05 p. 16 par. 16-18

Jeová mak Maromak neʼebé sempre fó aten-brani no kmaan ba ema. Ita bele haree kona-ba neʼe husi tempu neʼebé ema monu ba sala no sai la perfeitu. Bainhira Adão no Eva kontra nia, nia fó sai kedas profesia ida neʼebé sei fó aten-brani no esperansa ba ema iha futuru. Profesia neʼe hakerek iha Gênesis 3:15 neʼebé promete katak Diabu Satanás ho ninia hahalok aat sira sei lakon hotu. (1 João 3:8; Apok 12:9) Jeová nia atan Noé moris iha tempu neʼebé nakonu ho hahalok violénsia no la morál. Noé ho ninia família deʼit mak adora Jeová. Karik Noé mós sente laran-kraik. (Gên 6:4, 5, 9, 11; Jud 6) Maibé Jeová hatete ba Noé katak nia atu halakon ema aat sira, no nia esplika ba Noé kona-ba saida mak Noé presiza halo atu Noé nia família bele hetan salvasaun. (Gên 6:13-18) Ba Noé, Jeová mak Maromak neʼebé fó aten-brani duni. w18.04 p. 15 par. 1-2

Oinsá se ita sente la fiar an atu fó laran-manas ba ema seluk? Tuir loloos la susar atu halo nuneʼe. Koko atu hatudu deʼit oin-midar ba ema seluk. Se ema ruma la hatudu fali oin-midar ba Ita, karik sira hasoru daudauk problema ruma no hakarak buka ema atu fó sai sira-nia sentimentu. Ita bele fó kmaan ba sira liuhusi rona ba sira. (Tgo 1:19) Ita hotu bele fó kmaan no hametin ita-nia irmaun-irmán sira. Liurai Salomão dehan: “Liafuan neʼebé koʼalia iha tempu neʼebé loos mak furak tebetebes! Matan neʼebé nabilan [ka, “hateke ho oin-midar”] halo ema laran-kontente; no mensajen neʼebé diʼak fó forsa ba ruin sira.” (Prov 15:23, 30) No Paulo mós hatete katak kanta hamutuk knananuk adorasaun nian bele halo ita sente diʼak fali. (Kol 3:16; Após 16:25) Jeová nia loron besik loos ona atu mai, tan neʼe importante tebes ba ita atu hametin malu liután.—Ebr 10:25. w18.04 p. 23 par. 16; p. 24 par. 18-19