Dezembru

Hahalok furak ida neʼebé Jesus hatudu mak nia komprende problema neʼebé ita hasoru tanba la perfeitu. Bainhira iha rai, Jesus “haksolok ho sira neʼebé haksolok” no “tanis ho sira neʼebé tanis”. (Rom 12:15) Porezemplu, bainhira ninia dixípulu naʼin-70 fila fali ho haksolok depois haklaken ho susesu, Jesus sai “haksolok tebetebes iha espíritu santu”. (Lc 10:17-21) Iha situasaun seluk, kuandu Jesus haree ema neʼebé hadomi Lázaro sente triste tanba ninia mate, Jesus sai “laran-triste tebes no neon-susar”. (João 11:33) Saida mak ajuda Jesus neʼebé perfeitu atu hatudu laran-sadiʼa no laran-diʼak ba ema sala-naʼin? Primeiru mak ninia domin ba ema. “Buat neʼebé [Jesus] gosta liu mak ema”. (Prov 8:31) Domin neʼe book nia atu komprende didiʼak ema nia hanoin. Apóstolu João esplika: “Nia hatene saida mak iha ema nia laran.”​—João 2:25. w19.03 p. 20 par. 1-2

Satanás koko Job hodi halakon buat hotu neʼebé Job iha, oho Job nia atan sira, no hafoʼer Job nia naran diʼak. Nia oho Job nia oan doben naʼin-sanulu. Tuirmai nia hamosu fisur aat ba Job husi ulun toʼo ain. Job nia feen sai triste tebes, toʼo nia obriga Job atu rende an no hatete aat Maromak no mate. Job mós hakarak atu mate deʼit, maibé nia kaer metin nafatin ba ninia integridade. Tuirmai Satanás koko dalan seluk. Nia uza Job nia kolega naʼin-tolu. Mane sira-neʼe vizita Job ba loron barak, maibé sira la fó kmaan ba nia. Sira ho laran-aat kritika nia makaʼas. Sira dehan katak Maromak mak hamosu ninia susar sira-neʼe no la hanoin kona-ba ninia integridade. Sira mós dehan katak Job mak ema aat no merese hetan susar neʼebé akontese daudaun ba nia!​—Job 1:13-22; 2:7-11; 15:4, 5; 22:3-6; 25:4-6. w19.02 p. 4 par. 7-8

Dala ruma diʼak atu sente taʼuk. Porezemplu, ita presiza sente taʼuk atu halo Jeová triste. Se Adão no Eva haburas taʼuk hanesan neʼe, sira sei la kontra Jeová. Maibé realidade mak sira kontra duni Jeová no sira-nia matan nakloke hodi hatene ho klaru katak sira sai ona ema sala-naʼin. Sira hadaʼet sala no mate ba sira-nia oan. Bainhira sira komprende katak sira la halo tuir Maromak nia ukun-fuan, sira sai moe tanba sira molik no sira taka sira-nia isin. (Gén 3:7, 21) Ita la presiza taʼuk demais kona-ba mate. Jeová loke ona dalan ba ita atu hetan moris rohan-laek. Se ita halo sala maibé arrepende an ho laran, Jeová sei fó perdua ba ita-nia sala. Nia perdua ita tanba ita-nia fiar ba ninia Oan-Mane nia sakrifísiu. Dalan importante atu hatudu ita-nia fiar mak hodi dedika ita-nia moris ba Maromak no hetan batizmu.​—1 Ped 3:21. w19.03 p. 5-6 par. 12-13

Ema Izraél iha razaun barak atu hatudu agradese. Sira sai livre ona husi rai-Ejitu depois Jeová hamosu tiha Susar Sanulu ba Ejitu. Tuirmai Maromak salva sira husi perigu liuhusi halakon tropa Ejitu iha Tasi Mean. Ema Izraél agradese tebes toʼo sira kanta knananuk manán nian hodi hahiʼi Jeová. Maibé sira kontinua hatudu agradese ka lae? Bainhira ema Izraél hasoru susar foun, sira haluha kedas buat diʼak hotu neʼebé Jeová halo ona ba sira. Sira la hatudu agradese. (Sal 106:7) Oinsá? “Ema Izraél tomak hahú muramura hasoru Moisés no Arão”, maibé tuir loloos sira muramura hasoru Jeová. (Éx 16:2, 8) Nia la kontente tanba sira la hatudu agradese. Ikusmai nia fó-hatene nanis katak jerasaun neʼe tomak sei mate iha rai-fuik, só deʼit Josué no Caleb mak sei la mate.​—Núm 14:22-24. w19.02 p. 17 par. 12-13

Jesus la dada atensaun ba ninia nia an rasik hodi haruka ninia dixípulu sira atu komemora ninia mate iha dalan neʼebé komplikadu. Duké halo nuneʼe, Jesus hatete ba sira katak tinan ida dala ida sira tenke hanoin-hetan nia liuhusi Memoriál neʼebé simples. (João 13:15; 1 Kor 11:23-25) Memoriál simples neʼe hatudu katak Jesus laʼós ema neʼebé foti an. Ita kontente tanba hahalok haraik an mak ita-nia Liurai iha lalehan nia hahalok furak ida. (Flp 2:5-8) Oinsá mak ita bele banati-tuir Jesus nia hahalok haraik an? Ita hatudu haraik an hodi tau uluk ema seluk nia diʼak duké ita-nian rasik. (Flp 2:3, 4) Hanoin fali kona-ba Jesus nia kalan ikus iha rai. Jesus hatene katak lakleur tan nia sei mate, maibé nia hanoin liu kona-ba ninia apóstolu sira neʼebé laran-metin, tanba lakleur sira sei triste kona-ba ninia mate. Entaun, nia uza ninia kalan ikus hodi hanorin, anima, no hametin sira. (João 14:25-31) Jesus ho haraik an hatudu katak nia hanoin ema seluk nia diʼak duké ninia an rasik. Jesus hatudu duni ezemplu kapás ba ita! w19.01 p. 21 par. 5-6

Ita sente nakdedar bainhira atu foti liman hodi fó komentáriu ka lae? Se nuneʼe, Ita la mesak. Tuir loloos, ita barak sente taʼuk uitoan bainhira fó komentáriu. Tuir loloos, la sala atu sente hanesan neʼe. Neʼe hatudu katak Ita haraik an no haree ema seluk boot liu fali Ita. Jeová gosta tebes hahalok haraik an. (Sal 138:6; Flp 2:3) Maibé Jeová mós hakarak Ita atu hahiʼi nia no fó laran-manas ba irmaun-irmán sira iha reuniaun. (1 Tes 5:11) Nia hadomi Ita no nia sei fó aten-brani ba Ita. Hanoin toʼok prinsípiu balu husi Bíblia. Bíblia hatete katak ita hotu halo sala ho ita-nia liafuan no dalan neʼebé ita koʼalia. (Tgo 3:2) Jeová komprende katak ita mak ema neʼebé la perfeitu, irmaun-irmán sira mós komprende. (Sal 103:12-14) Sira mak ita-nia família, no hadomi ita. (Mc 10:29, 30; João 13:35) Sira komprende katak dala ruma ita koʼalia liafuan neʼebé sala bainhira ita fó komentáriu. w19.01 p. 8 par. 3; p. 10-11 par. 10-11

Iha mundu ohin loron, la fasil atu halo nuneʼe, maibé Ita bele. Jeová hakarak Ita atu hetan susesu no moris kontente. Ho Maromak nia ajuda, Ita bele hetan susesu, laʼós iha tempu joven deʼit, maibé mós iha Ita-nia moris tomak. Porezemplu, hanoin kona-ba buat neʼebé ajuda ema Izraél atu manán rai neʼebé Maromak promete ona. Bainhira ema Izraél besik ona atu tama rai neʼebé Maromak promete, Maromak la haruka sira atu aumenta sira-nia matenek atu halo funu. (Deut 28:1, 2) Maibé Maromak haruka deʼit sira atu halo tuir ninia mandamentu no tau fiar ba nia. (Jos 1:7-9) Tuir ema nia hanoin, matadalan neʼe la matenek! Maibé neʼe mak matadalan neʼebé diʼak liu hotu, tanba Jeová ajuda beibeik sira atu manán hasoru ema Kanaan. (Jos 24:11-13) Sin, sira presiza duni atu iha fiar hodi halo tuir Maromak, maibé fiar neʼe sempre lori susesu ba sira, nuneʼe mós ho ohin loron. w18.12 p. 25 par. 3-4

Ohin loron ema balu sidi tanba esplikasaun foun kona-ba eskritura balu. Ema seluk tan, apoia ema neʼebé fila kotuk ba lia-loos ka kontra lia-loos. Rezultadu mak sira ho neon komesa ona “hadook an” husi Jeová no kongregasaun. (Ebr 3:12-14) Tuir loloos, diʼak liu sira halo tuir apóstolu Pedro nia ezemplu no hatudu konfiansa ba Jesus. Ema seluk, neineik-neineik mak husik lia-loos, karik sira rasik mós la nota ida-neʼe akontese daudaun. Ema neʼebé neineik-neineik laʼo sees husi lia-loos mak hanesan ró neʼebé neineik-neineik bee lori ba fatin neʼebé dook. Bíblia fó avizu katak ita mós tenke kuidadu atu la “laʼo sees” husi lia-loos. (Ebr 2:1) Baibain ema neʼebé neineik-neineik laʼo sees husi lia-loos la iha planu atu halo nuneʼe. Maibé tanba nia husik ninia relasaun diʼak ho Jeová sai fraku, ikusmai nia bele halakon ninia relasaun diʼak neʼe. w18.11 p. 9 par. 5-6

Ita hakarak hetan treinu liután hodi bele serbí Jeová iha dalan boot liután ka lae? Karik Ita bele hatama formuláriu atu tuir Eskola ba Haklaken-Naʼin Tempu-Tomak. Eskola neʼe fó treinu ba irmaun-irmán maduru sira neʼebé serbí daudauk Jeová tempu-tomak, hodi Jeová nia organizasaun bele uza sira atu halo serbisu barak liután. Ema sira neʼebé tuir eskola neʼe tenkesér prontu atu serbí iha fatin neʼebé deʼit bainhira hetan ona graduasaun husi eskola neʼe. Ita hakarak halo serbisu barak liután ba Jeová liuhusi dalan neʼe ka lae? (1 Kor 9:23) Ita hatudu laran-luak, laran-diʼak no domin tanba ita mak Jeová nia povu. Loron-loron ita hanoin kona-ba ema seluk nia presiza. Neʼe lori kontente no dame ba ita. (Gal 5:22, 23) Maski ita ida-idak nia situasaun la hanesan, Ita bele hetan ksolok nafatin, naran katak Ita banati-tuir Jeová nia hahalok laran-diʼak, no kaer metin ba Ita-nia priviléjiu hodi sai ninia maluk serbisu-naʼin.​—Prov 3:9, 10. w18.08 p. 27 par. 16-18

Ema balu husu: “Iha ka lae, razaun ruma ba ema Kristaun atu halo divórsiu no kaben fali?” Kona-ba ida-neʼe, Jesus hatete: “Ema naran deʼit neʼebé soe ninia feen no kaben fali ho ema seluk, nia halo adultériu . . . no se feto ida soe malu tiha ho ninia laʼen no kaben fali ho mane seluk, feto neʼe halo adultériu.” (Mc 10:11, 12; Lc 16:18) Klaru katak Jesus hafolin arranju kaben nian no hakarak ema seluk mós halo hanesan. Se mane ka feto ida soe ninia kaben neʼebé laran-metin ba nia ho razaun neʼebé laloos no kaben fali ho ema seluk, mane ka feto neʼe halo adultériu. Tanbasá? Tanba tuir Maromak nia haree, soe malu deʼit ho razaun neʼebé la loos la hakotu moris kaben nian, no sira naʼin-rua nafatin “isin ida deʼit”. Jesus mós hatete katak, se mane ida soe ninia feen neʼebé la halo sala, karik ninia feen sei hetan tentasaun atu halo adultériu. Oinsá? Karik feen neʼe sente katak nia presiza kaben fali atu bele iha mane ida neʼebé tau matan ba nia. Maibé se feen neʼe kaben fali, nia sei halo adultériu. w18.12 p. 11 par. 8-9

Kuandu Habakuk koʼalia hotu tiha ho Jeová nia sente neon hakmatek. Tan neʼe, Habakuk hakarak tebes atu hein ba Jeová atu halo buat ruma. Habakuk repete ninia hakarak neʼe hodi dehan: “Haʼu sei kalma nafatin hodi hein ba loron susar nian.” (Hab 3:16) Ita bele aprende saida husi Habakuk nia ezemplu? Primeiru, ita tenke halo orasaun beibeik ba Jeová no fó sai ita-nia problema hotu ba nia. Segundu, ita presiza rona no halo tuir buat neʼebé Jeová hatete ba ita liuhusi ninia Liafuan no organizasaun. No terseiru, ita presiza hein ho pasiénsia ba Jeová no tau fiar katak nia sei halakon ita-nia susar sira iha tempu neʼebé nia deside ona. Se ita halo orasaun ho laran ba Jeová, rona ba nia no hein ho pasiénsia, hanesan Habakuk, ita sei iha neon neʼebé hakmatek hodi tahan. Ita-nia esperansa bele ajuda ita atu hatudu pasiénsia no kontente maski hasoru daudaun problema sira. Ita iha konfiansa katak ita-nia Aman iha lalehan sei ajuda ita.​—Rom 12:12. w18.11 p. 15-16 par. 11-12

Saida mak Maromak nia haree kona-ba halo ema seluk sidi? Jesus hatete: “Haʼu dehan ba imi kona-ba kiʼikoan sira neʼebé tau fiar mai haʼu: Se ema ruma halo sira ida sidi, diʼak liu tara fatuk dulas trigu nian ba ninia kakorok no soe nia ba tasi.” (Mc 9:42) Jesus nia liafuan mak buat neʼebé sériu tebes. Jesus haleno ninia Aman nia hahalok sira iha dalan neʼebé perfeitu. Tan neʼe ita bele fiar katak Jeová mós sente la kontente bainhira ema ida halo Jesus nia dixípulu ida sidi. (João 14:9) Ita mós iha Jeová no Jesus nia haree kona-ba la halo ema seluk sidi ka lae? Ita-nia hahalok hatudu saida? Porezemplu, karik ita gosta modelu ida kona-ba hatais ka hadiʼa an. Maibé oinsá se ita hatene katak neʼe bele halo ema balu iha kongregasaun la kontente ka book sira hamosu hanoin neʼebé la morál, ita sei halo saida? Ita-nia domin ba irmaun-irmán sira sei book ita hodi hasees an husi modelu neʼe ka lae? w18.11 p. 25 par. 9-10

Tanbasá mak ita hotu presiza integridade? Ita presiza integridade tanba Satanás duun Jeová no mós Ita. Anju neʼe hafoʼer Jeová nia naran hodi halo Adão ho Eva sente katak Maromak mak Ukun-Naʼin neʼebé aat, hanoin an deʼit, no la laran-moos. Triste mak Adão ho Eva apoia Satanás, hodi kontra Jeová. (Gén 3:1-6) Sira iha oportunidade barak atu hametin sira-nia domin ba Jeová iha jardín Eden. Maibé iha momentu neʼebé Satanás hasaʼe lia, sira-nia domin la kompletu ka la tomak. Entaun, mosu pergunta seluk: Ema bele laran-metin nafatin ba Maromak Jeová tanba hadomi nia ka lae? Ka, ema bele hatudu integridade ka lae? Pergunta neʼe mosu iha Job nia tempu. (Job 1:8-11) Job mós la perfeitu hanesan ita. Nia halo sala. Maibé, Jeová hadomi Job tanba ninia integridade. w19.02 p. 3-4 par. 6-7

Jesus konta ai-knanoik ida kona-ba negósiu-naʼin neʼebé laʼo rai hodi buka pérola neʼebé diʼak. Bainhira nia hetan pérola ida neʼebé folin-boot tebes, nia faʼan kedas buat hotu atu sosa pérola neʼe. Pérola neʼe reprezenta lia-loos kona-ba Maromak nia Ukun. Liuhusi ai-knanoik neʼe Jesus hatudu katak lia-loos iha folin-boot duni ba ema neʼebé buka daudaun lia-loos. (Mt 13:45, 46) Kuandu ita foin aprende lia-loos kona-ba Maromak nia Ukun no lia-loos seluk tan husi Bíblia neʼebé folin-boot, ita prontu atu halo sakrifísiu oioin hodi hetan lia-loos neʼe. Se ita mak nafatin hafolin lia-loos, ita sei nunka husik lia-loos neʼe. (Prov 23:23) Maibé triste mak, Maromak nia povu balu la hafolin no husik ona lia-loos neʼe. Mai ita hakaʼas an atu nunka husik lia-loos. Ita hakarak halo tuir Bíblia nia konsellu atu “kontinua laʼo iha lia-loos”. (3 João 2-4) Atu laʼo iha lia-loos neʼe katak ita tau uluk lia-loos iha ita-nia moris no moris tuir lia-loos. w18.11 p. 9 par. 3

Anju neʼe hatete ba Josué katak sira la bele ataka Jerikó, maibé marxa haleʼu deʼit sidade neʼe loron ida dala ida ba loron neen. No iha loron hitu sira tenke marxa ba dala hitu. Karik sira hanoin: ‘Neʼe soe tempu deʼit!’ Maibé ema Izraél nia Ulun-Naʼin Jeová hatene saida mak nia sei halo. Halo tuir Jeová nia matadalan sira hametin liután ema Izraél sira-nia fiar, no sira la presiza halo funu hasoru soldadu sira husi Jerikó. (Jos 6:2-5) Ita bele aprende saida husi istória neʼe? Dala ruma Jeová nia organizasaun uza dalan foun atu halo buat ruma, no dala barak ita la komprende tanbasá. Porezemplu, karik foufoun ita iha dúvida kona-ba uza sasán eletróniku hodi estuda mesak, haklaken, ka tuir reuniaun sira. Maibé agora karik ita haree se ita uza sasán sira-neʼe lori benefísiu mai ita. Bainhira ita haree mudansa sira lori duni benefísiu diʼak oioin, ita-nia fiar no unidade sai metin liután. w18.10 p. 23-24 par. 8-9

Jesus nia dixípulu sira hanoin nuneʼe. Ema judeu sira hakarak Mesias atu rezolve sira-nia problema. Tan neʼe mak povu iha Galileia hakarak atu Jesus sai sira-nia liurai. Sira hanoin katak nia sei sai ulun-naʼin neʼebé diʼak. Nia koʼalia ho matenek, bele kura ema moras, no bele fó ai-han ba ema neʼebé hamlaha. Bainhira Jesus fó han ema maizumenus naʼin-5.000, neʼe halo ema hotu sai hakfodak. Jesus hatene saida mak sira hakarak atu halo. Bíblia hatete: “Jesus hatene katak sira atu mai kaer nia hodi obriga nia atu sai liurai, tan neʼe nia hasees an hodi saʼe ba foho mesamesak.” (João 6:10-15) Loron tuirmai bainhira ema hotu komesa sai kalma, Jesus esplika ba sira katak nia mai atu hanorin sira kona-ba Maromak nia Ukun, laʼós atu ajuda sira kona-ba sira-nia presiza loron-loron nian. Nia hatete ba sira: “Keta hakaʼas an atu hetan hahán neʼebé sei mohu, maibé hakaʼas an atu hetan hahán neʼebé la mohu, neʼebé fó moris rohan-laek.”​—João 6:25-27. w18.06 p. 4 par. 4-5

Jesus komprende sentimentu husi ema sira neʼebé laran-kraik no fraku hanesan “duʼut-kain” ka “ahi-oan neʼebé besik atu mate”, tan neʼe nia hatudu laran-diʼak no pasiénsia ba sira. (Mc 10:14) Ita la iha kbiit atu komprende ka hanorin ema hanesan Jesus. Maibé ita bele hatudu ita hanoin ema seluk iha haklaken-fatin liuhusi dalan neʼebé ita koʼalia ba sira, bainhira, no tempu hira. Ohin loron, ulun-naʼin sira iha sistema ekonomia, polítika no relijiaun mak nakonu ho korrupsaun, la hanoin ema no “hanehan” ema barak iha mundu neʼe. (Mt 9:36) Rezultadu mak ema barak la fiar malu no lakon esperansa. Tan neʼe mak liafuan neʼebé ita uza no mós ita-nia lian, presiza hatudu katak ita laran-diʼak no hanoin ema. Ema barak hakarak rona ba ita-nia mensajen laʼós tan deʼit ita uza didiʼak Bíblia, maibé tanba ita mós hatudu interese no respeitu ba sira. w18.09 p. 31-32 par. 13-14

Ita bele halo saida hodi hatudu katak ita presiza Maromak nia matadalan? Hodi estuda Bíblia, halo tuir Maromak, no tau uluk ita-nia adorasaun. Halo buat sira-neʼe bele ajuda ita atu sai kontente. Neʼe bele hametin liután ita-nia fiar ba Maromak nia promesa sira. (Tito 2:13) Hametin ita-nia relasaun ho Jeová mak dalan neʼebé importante tebes atu bele sai kontente. Apóstolu Paulo hatete: “Haksolok nafatin bá iha Naʼi [Jeová]. Dala ida tan haʼu dehan, haksolok bá!” (Flp 4:4) Ita presiza matenek husi Jeová atu bele iha relasaun neʼebé besik ho nia. (Prov 3:13, 18) Maibé atu sai kontente ba nafatin, importante tebes atu kontinua aplika buat neʼebé ita aprende husi Maromak nia Liafuan, laʼós lee deʼit. Jesus rasik konkorda katak importante atu halo nuneʼe hodi dehan: “Se imi hatene buat sira-neʼe, ksolok ba imi kuandu imi halo tuir.” (João 13:17; Tgo 1:25) Neʼe mak xave importante atu iha relasaun neʼebé metin ho Jeová no kontente ba nafatin. w18.09 p. 18 par. 4-6

Epafras hatene didiʼak irmaun-irmán sira, no nia hanoin tebes sira. Paulo bolu Epafras nuʼudar ninia “maluk iha dadur”, entaun Epafras mós iha ninia problema rasik. (Flm 23) Maski nuneʼe, nia hanoin nafatin ema seluk no koko atu ajuda sira. Epafras halo orasaun kona-ba irmaun-irmán sira no ita mós bele halo buat neʼebé hanesan hodi temi irmaun-irmán sira-nia naran iha ita-nia orasaun. Orasaun hanesan neʼe iha kbiit boot. (2 Kor 1:11; Tgo 5:16) Hanoin kona-ba sesé deʼit mak Ita bele temi iha Ita-nia orasaun. Karik Ita-nia belun husi kongregasaun ka família ruma neʼebé hasoru daudauk problema balu. Karik sira presiza halo desizaun neʼebé susar ka hasoru daudauk tentasaun ruma. Ita mós bele halo orasaun kona-ba sira neʼebé lakon ema neʼebé sira hadomi iha mate, sira neʼebé foin daudauk moris liu funu ka dezastre ruma, no sira neʼebé hasoru problema ekonomia nian. Iha irmaun-irmán barak neʼebé presiza ita halo orasaun kona-ba sira. w18.09 p. 5 par. 12-13

Paulo la koʼalia deʼit kona-ba fó sasán. Maibé mós kona-ba fó laran-manas, matadalan, no fó ajuda ba ema neʼebé presiza ajuda. (Após 20:31-35) Liuhusi buat neʼebé Paulo hatete no halo, nia hanorin mai ita katak, importante tebes atu fó ho laran-luak ita-nia tempu, forsa, atensaun, no domin. Peskizadór sira neʼebé estuda kona-ba ema nia hahalok mós hatete katak, fó halo ema kontente. Tuir relatóriu ida, ema hatete katak bainhira halo buat neʼebé diʼak ba ema seluk, sira sente kontente liután. Peskizadór sira hatete, se ita fó ajuda ba ema seluk, ita bele sente ita-nia moris iha folin. Tan neʼe, matenek-naʼin balu fó sujestaun ba ema atu halo serbisu voluntáriu hodi bele iha saúde neʼebé diʼak liu no kontente liután. Ita la hakfodak ho komentáriu sira-neʼe tanba ita-nia Kriadór Jeová sempre hatete katak fó sei halo ita kontente.​—2 Tim 3:16, 17. w18.08 p. 22 par. 17-18

Profesia neʼebé Isaías fó sai kona-ba Jesus Kristu fó anima no esperansa ba ita. Isaías fó sai katak Jesus sei “la tesi lia tuir deʼit buat neʼebé nia matan haree, no nia sei la fó dixiplina tuir deʼit buat neʼebé nia tilun rona. Nia sei tesi lia ba ema kiʼik sira ho loloos”. (Isa 11:3, 4) Tanbasá mak liafuan sira-neʼe anima tebes ita? Tanba ita hela daudauk iha mundu neʼebé nakonu ho hahalok diskriminasaun, ema sempre tesi lia kona-ba ema seluk tuir deʼit buat neʼebé sira-nia matan haree. Tan neʼe, ita presiza Jesus, nia mak Juis neʼebé perfeitu. Nia sei nunka tesi lia ba ita tuir deʼit buat neʼebé matan haree! Iha moris loron-loron, ita sempre tesi lia kona-ba ema seluk. Maibé ita la hanesan ho Jesus, ita la perfeitu, tan neʼe tesi-lia neʼebé ita halo kona-ba ema seluk mós la perfeitu. Fasil ba ita atu tesi lia tuir deʼit buat neʼebé matan haree. Tan neʼe Jesus fó mandamentu ba ita atu la tesi lia tuir deʼit “buat neʼebé imi haree”, maibé tesi lia “tuir dalan neʼebé loos”. Sin, Jesus hakarak ita halo tuir nia atu la tesi lia ba ema seluk tuir deʼit buat neʼebé matan haree. w18.08 p. 8 par. 1-2

Tuir loloos, ita la rona Maromak koʼalia ba ita husi lalehan. Maibé, nia fó matadalan ba ita liuhusi ninia Liafuan Bíblia. Liután neʼe, Jeová nia espíritu book “atan neʼebé laran-metin no matenek” atu kontinua fó ai-han ba Ninia povu. (Lc 12:42) Ita simu ai-han espirituál barak hanesan livru sira no informasaun online, vídeo barak, no mós gravasaun sira ba ita-nia livru. Maromak nia liafuan sira neʼebé hakerek iha Bíblia, bele fó ita konfiansa katak Jeová kontrola buat hotu no nia sei hadiʼa buat aat hotu neʼebé Satanás no mundu aat neʼe halo ba ita. Mai ita hakaʼas an atu rona didiʼak ba Jeová nia lian. Se ita halo nuneʼe, ita sei hetan susesu hodi tahan problema hotu neʼebé ita hasoru agora no iha futuru. Bíblia fó-hanoin ita katak ‘ita presiza tahan, atu nuneʼe, bainhira ita halo tiha Maromak nia hakarak, ita bele simu buat neʼebé nia promete ona’.​—Ebr 10:36. w19.03 p. 13 par. 17-18

Moisés lori ema Izraél ba tinan barak ona, maibé agora Josué mak sei lori fali sira. Tan neʼe karik nia hanoin: ‘Maromak nia povu sei simu haʼu nuʼudar sira-nia ulun-naʼin ka lae?’ (Deut 34:8, 10-12) Matenek-naʼin ida koʼalia kona-ba Josué 1:1, 2 hodi hatete katak tempu neʼebé susar no perigu liu hotu ba nasaun ida iha tempu uluk no ohin loron mak bainhira troka ulun-naʼin ida. Maski Josué iha dúvida, maibé nia tau fiar ba Jeová no la demora atu halo tuir Jeová nia matadalan sira. (Jos 1:9-11) Maromak haraik bensaun ba Josué tanba tau fiar ba nia no nia haruka anju ida hodi dirije Josué no ema Izraél sira. Ita bele fiar katak anju neʼe mak bolu nuʼudar Liafuan, Maromak nia Oan-Mane primeiru. (Êx 23:20-23; João 1:1) Jeová ajuda nasaun Izraél atu simu mudansa neʼe hodi tuir sira-nia ulun-naʼin foun, Josué. w18.10 p. 22-23 par. 1-4

Jeová hatene ema neʼebé serbí nia ho hakarak rasik, no nia hakerek sira-nia naran iha ninia “livru ida hodi hanoin-hetan sira”. Se ita hakarak Jeová rai nafatin ita-nia naran iha ninia livru, ita tenke halo buat ida. Malaquias hatete katak ita tenke hamtaʼuk Jeová no hanoin kleʼan kona-ba ninia naran. Se ita mak adora fali ema ka sasán ruma, Jeová sei hamoos tiha ita-nia naran husi ninia livru! (Êx 32:33; Sal 69:28) Tan neʼe, latoʼo atu promete ba Jeová hodi halo tuir ninia hakarak, depois hetan batizmu. Buat sira-neʼe ita halo dala ida deʼit iha ita-nia moris, maibé adora Jeová mak buat neʼebé ita halo ba nafatin. Loron ba loron ita tenke hatudu ba nia iha ita-nia moris tomak katak ita halo tuir nia liuhusi hahalok.​—1 Ped 4:1, 2. w18.07 p. 23-24 par. 7-9

Maibé sai ema kristaun neʼebé maduru la akontese automátiku deʼit. Ita presiza hakaʼas an nafatin no aumenta beibeik ita-nia matenek no koñesimentu. Tan neʼe, importante tebes atu lee Bíblia loron-loron. (Sal 1:1-3) Ita halo ida-neʼe daudaun ka lae? Se Ita lee Bíblia loron-loron, Ita sei komprende liután Jeová nia ukun-fuan no prinsípiu sira. Saida mak ukun-fuan neʼebé importante liu ba ema kristaun sira? Neʼe mak ukun-fuan domin nian. Jesus hatete ba ninia dixípulu sira: “Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.” (João 13:35) Domin bolu nuʼudar “liurai nia ukun-fuan neʼebé boot liu hotu” no apóstolu Paulo dehan katak “domin kumpre ukun-fuan”. (Tgo 2:8; Rom 13:10) Ita la hakfodak katak domin mak importante, tanba Bíblia dehan “Maromak mak domin.”​—1 João 4:8. w18.06 p. 19 par. 14-15

Maski ida neʼebé ema Izraél kontra mak Jeová, maibé Moisés mak sai hirus. Nia la kontrola an no koʼalia hodi la hanoin uluk kona-ba konsekuénsia sira. Moisés la hateke tan ba Jeová tanba nia husik ema seluk nia hahalok fahe ninia atensaun. Dala primeiru neʼebé povu muramura kona-ba bee, Moisés halo buat neʼebé loos. (Êx 7:6) Maibé nia sai kole no hirus tanba ema Izraél sira kontra ba tinan barak. Karik iha tempu neʼebá, Moisés hanoin deʼit kona-ba nia rasik nia sentimentu, duké hanoin kona-ba oinsá mak nia bele fó glória ba Jeová. Se profeta neʼebé laran-metin hanesan Moisés bele monu ba sala no la fó atensaun ba Jeová, buat hanesan neʼe mós bele akontese ba ita. Moisés besik ona atu tama ba rai promete nian, no ita besik ona atu tama ba mundu foun. (2 Ped 3:13) Ita lakohi duni atu lakon priviléjiu espesiál neʼe. Maibé atu bele tama ba mundu foun, ita tenke hateke beibeik ba Jeová no sempre halo tuir nia.​—1 João 2:17. w18.07 p. 15 par. 14-16

Satanás la bele obriga ema atu halo buat neʼebé sira lakohi atu halo. (Tgo 1:14) Ema barak iha mundu neʼe la hatene katak sira apoia Satanás. Maibé, kuandu ema ida aprende kona-ba lia-loos, nia tenke deside rasik atu apoia Jeová ka apoia Satanás. (Após 3:17; 17:30) Se ita hakaʼas an nafatin atu halo tuir Maromak, Satanás la bele sobu ita-nia laran-metin. (Jó 2:3; 27:5) Iha tan buat balu neʼebé Satanás ho anju aat sira la bele halo. Porezemplu, Bíblia nunka hatete katak sira bele haree ita-nia laran ka hatene saida mak ita hanoin. Só Jeová no Jesus deʼit mak iha kbiit atu halo hanesan neʼe. (1 Sam 16:7; Mc 2:8) Se ita mak hakaʼas an hodi koʼalia no halo tuir Maromak nia hakarak, ita bele fiar katak Jeová sei nunka husik Diabu atu lori perigu permanente ba ita. (Sal 34:7) Ita presiza hatene kona-ba ita-nia inimigu, maibé ita la presiza taʼuk ba nia. Maski ita ema la perfeitu, maibé ho Jeová nia apoiu ita bele manán hasoru Satanás! Se ita mak kontra hasoru nia, nia sei halai husi ita.​—Tgo 4:7; 1 Ped 5:9. w18.05 p. 26 par. 15-17

Imajina toʼok katak Ita planu daudauk atu halo viajen ida hodi bá tuir programa importante ida iha fatin dook. Ita presiza saʼe bís atu bá fatin neʼe. Toʼo tiha terminál bís nian, ita haree iha bís barak. Maibé Ita hatene atu bá neʼebé no atu saʼe bís saida. Ita lakohi saʼe bís seluk tanba Ita hatene katak bís seluk bá fali fatin neʼebé la hanesan. Moris mak hanesan viajen neʼe, no joven sira ohin loron bele sai bilán kona-ba opsaun oioin neʼebé Ita bele hili ba Ita-nia moris. Maibé se Ita mak hatene atu bá neʼebé, neʼe sei halo fasil ba Ita atu halo desizaun neʼebé loos. Ita hili atu tau fokus hodi halo buat neʼebé Jeová gosta iha Ita-nia moris, ka lae? Neʼe inklui halo tuir Jeová nia matadalan kona-ba desizaun hotu neʼebé Ita halo iha moris, hanesan hili edukasaun, serbisu, ka atu kaben no iha oan ka lae. Neʼe inklui mós halo planu espirituál sira neʼebé bele halo Ita hakbesik liután ba Jeová. Se Ita mak tau fokus hodi serbí Jeová, Ita bele fiar katak nia sei fó bensaun ba Ita no ajuda Ita atu hetan susesu. w18.04 p. 25 par. 1-3

Jefte kaer metin ba ninia promesa hodi haruka ninia oan-feto bá serbí iha tabernákulu iha ninia moris tomak. (Juíz 11:30-35) Maski neʼe susar tebes ba Jefte, no karik liuliu ba ninia oan-feto, maibé ho laran, Jefte nia oan-feto halo tuir buat neʼebé ninia aman promete ona. (Juíz 11:36, 37) Halo nuneʼe signifika katak ninia oan-feto sei nunka kaben ka atu iha oan. Neʼe mós sei hakotu família nia liña jerasaun. Oan-feto neʼe presiza duni atu hetan kmaan no anima husi ema seluk. Bíblia dehan kona-ba ema nia toman iha Izraél: “Tinan-tinan, feto joven sira husi Izraél bá hodi gaba Jefte nia oan-feto, ema Gilead. Sira halo neʼe ba loron haat iha tinan ida nia laran.” (Juíz 11:39, 40) Ezemplu husi Jefte nia oan-feto fó-hanoin ita kona-ba ema kristaun barak ohin loron hili atu la kaben hodi sira bele serbí Jeová liután. Ita hakarak gaba no fó laran-manas ba sira ka lae?​—1 Kor 7:32-35. w18.04 p. 17 par. 10-11

Anju barak apoia Satanás hodi kontra Maromak. Antes Rai-Nabeen akontese iha Noé nia tempu, Satanás lasu anju balu hodi halo relasaun seksuál ho feto sira iha rai. Bíblia uza símbolu hodi esplika buat neʼebé akontese iha tempu neʼebá hodi dehan katak, samea boot monu husi lalehan no dada fitun sorin balu hamutuk ho nia. (Gên 6:1-4; Apok 12:3, 4) Bainhira anju sira-neʼe sai husi Maromak nia umakain, sira hili atu apoia Satanás. Ohin loron Satanás mak kontrola daudauk anju la laran-metin sira-neʼe. Sira mós organiza an iha dalan neʼebé la runguranga. Satanás inventa tuir Maromak nia Ukun hodi harii governu ida ba ninia an. Nia halo ninia an sai liurai, organiza anju aat sira, fó kbiit ba sira, no foti sira sai naʼi-ulun ba mundu tomak. (Éf 6:12) Satanás uza ninia organizasaun neʼe hodi kontrola ema hotu nia governu sira. w18.05 p. 23 par. 5-6

Dala ruma Maromak hatudu ninia domin mai ita hodi korrije ita, hanesan aman ida korrije oan neʼebé nia hadomi. David hafolin konsellu hanesan neʼe. David hanoin kleʼan kona-ba Maromak nia hanoin, no halo ninia hanoin sai hanesan Maromak nian no husik ida-neʼe troka ninia hahalok. Se ita mós halo nuneʼe, ita bele haburas domin ba Maromak no hakarak liután atu halo nia kontente. Ita mós sei sai ema Kristaun neʼebé maduru. Irmán ida naran Christin hatete: “Bainhira halo riset no medita kona-ba buat neʼebé haʼu lee, haʼu sente katak Jeová hakerek buat sira-neʼe ba haʼu rasik!” Se ita mak ema espirituál, ita sei iha hanoin hanesan ho Maromak kona-ba mundu neʼe no futuru. Tanbasá mak Jeová fó koñesimentu no matenek neʼebé kleʼan hanesan neʼe mai ita? Tanba nia hakarak ita atu hatene saida mak importante liu iha ita-nia moris, atu halo desizaun neʼebé diʼak, no nia lakohi ita atu sente taʼuk ba futuru!​—Isa 26:3. w18.12 p. 26 par. 9-10