Janeiru

Maromak nia atan hotu neʼebé laran-metin hakarak aprende oinsá sira bele “kumpre didiʼak” serbisu neʼe. (2 Tim 4:5) Serbisu neʼe mak importante, no urjente liu duké serbisu seluk. Maibé, dala ruma susar atu uza tempu barak iha serbisu neʼe tuir ita-nia hakarak. Atividade importante seluk gasta tempu no enerjia. Karik loroloron ita presiza serbisu ba oras barak atu manán osan hodi tau matan ba ita no ita-nia família. Karik ita hasoru susar tanba ita ka ita-nia família moras, hetan depresaun, ka iha problema saúde tanba idade ona. Se ita-nia situasaun hanetik ita atu uza tempu barak hodi halo Jeová nia serbisu, ita la presiza sente laran-kraik. Jesus hatene katak laʼós ema hotu iha abilidade atu fó fuan neʼebé hanesan, katak fó tempu no enerjia neʼebé hanesan hodi haklaken. (Mt 13:23) Jeová hafolin tebes buat hotu neʼebé ita halo iha ninia serbisu tuir ita-nia kbiit.​—Ebr 6:10-12. w19.04 p. 2 par. 1-3

Satanás nia lia-bosok kona-ba mate hafoʼer Jeová nia naran. Lia-bosok sira-neʼe inklui hanorin falsu katak Maromak fó kastigu ba ema mate iha infernu. Hanorin neʼe hafoʼer duni Maromak nia naran! Tanbasá? Tanba neʼe halo ema fiar katak Maromak neʼebé domin mós laran-aat hanesan Diabu. (1 João 4:8) Neʼe halo Ita sente oinsá? Jeová sente oinsá kona-ba lia-bosok neʼe? Tuir loloos, nia odi hahalok aat hotu. (Jer 19:5) Satanás nia lia-bosok kona-ba mate halo ema hanoin katak sira la presiza Jesus nia sakrifísiu. (Mt 20:28) Satanás nia lia-bosok seluk tan mak ema iha klamar neʼebé labele mate. Se neʼe loos, neʼe katak ema hotu moris ba nafatin ona. Entaun, Kristu la presiza entrega ninia moris nuʼudar sakrifísiu atu ita bele hetan moris ba nafatin. Hanoin-hetan katak Kristu nia sakrifísiu mak dalan boot liu neʼebé Jeová no Jesus hatudu domin ba ema. (João 3:16; 15:13) Imajina toʼok oinsá Jeová no ninia Oan-Mane sente kona-ba hanorin neʼebé halo ema fiar katak sira la presiza prezente folin-boot neʼe! w19.04 p. 14 par. 1; p. 16 par. 8-9

Jesus nia hanorin hakerek iha neʼebé? Jesus nia liafuan no hahalok bainhira iha rai hakerek iha Evanjellu haat. Livru seluk iha Eskritura Lian Gregu mós bele ajuda ita atu komprende liután Jesus nia hanoin tanba espíritu santu mak book ema balu neʼebé “iha Kristu nia hanoin” atu hakerek ida-neʼe. Jesus nia hanorin bele ajuda ema iha situasaun oioin. Tan neʼe Kristu nia ukun-fuan bele ajuda ita iha uma, serbisu-fatin, eskola, no iha kongregasaun. (Gal 6:2) Ita aprende ukun-fuan neʼe hodi lee no medita kona-ba Eskritura Lian Gregu. Ita halo tuir ukun-fuan neʼe hodi moris tuir hanorin, mandamentu, no prinsípiu neʼebé hakerek ona. Bainhira ita halo tuir Kristu nia ukun-fuan, ita mós halo tuir ita-nia Maromak domin nian Jeová, Hun ba Kristu nia hanorin hotu.​—João 8:28. w19.05 p. 3 par. 6-7

Triste bainhira ema halo tuir Satanás nia hakarak. Maski nuneʼe, Jeová hatene Satanás nia planu sira. Jeová hatene susar neʼebé ita hasoru no nia bele fó kmaan ba ita. Ita agradese tebes tanba serbí “Maromak neʼebé fó kmaan ba ema iha situasaun hotu. Nia fó kmaan ba ita iha ita-nia susar hotu, atu nuneʼe ita bele fó kmaan ba ema seluk iha sira-nia susar hotu ho kmaan neʼebé ita simu ona husi Maromak”. (2 Kor 1:3, 4) Ema neʼebé presiza hetan kmaan mak oan neʼebé inan-aman la ajuda kuandu sira sai vítima ba abuzu ­seksuál ka oan neʼebé sai vítima ba abuzu seksuál husi belun ka família. Liurai David hatene katak Jeová sempre fó kmaan. (Sal 27:10) David fiar katak Jeová sei sai Aman ba sira neʼebé hetan terus husi família. Oinsá? Nia uza ninia atan sira neʼebé serbí nia ho laran-metin. Ita-nia irmaun-irmán sira iha kongregasaun mak hanesan família ba ita. Porezemplu, Jesus hatete katak ema neʼebé adora Jeová hamutuk ho nia mak ninia alin, feton no inan.​—Mt 12:48-50. w19.05 p. 15-16 par. 8-9

Ita presiza estuda uluk kona-ba saida? Ita tenke uza tempu atu estuda Maromak nia Liafuan loroloron. Agora, versíkulu sira ba programa atu lee Bíblia iha Reuniaun ba Moris Kristaun no Haklaken mós hamenus ona, atu nuneʼe ita bele iha tempu atu medita no halo riset kona-ba neʼe. Diʼak atu la lee liu deʼit versíkulu sira, maibé ita presiza husik Bíblia nia mensajen book ita-nia laran hodi hakbesik liután ba Jeová. (Sal 19:14) Estuda Livru Haklaken ajuda ita atu komprende Bíblia. Tan neʼe, tau atensaun ba eskritura ida-idak, liuliu eskritura sira neʼebé sei lee kuandu estuda iha kongregasaun. Haree didiʼak oinsá liafuan ka fraze sira iha eskritura apoia pontu importante iha parágrafu. Liután neʼe, Ita mós presiza medita kona-ba eskritura neʼebé Ita lee no oinsá Ita bele aplika ida-neʼe iha Ita-nia moris rasik.​—Jos 1:8. w19.05 p. 27 par. 5; p. 28 par. 9

Jesus hatudu ezemplu diʼak hodi iha hanoin neʼebé loos kona-ba serbisu ba Maromak. Buat neʼebé importante liu iha ninia moris mak atu koʼalia kona-ba Maromak nia Ukun. Nia laʼo kilómetru atus ba atus atu haklaken ba ema barak. Nia aproveita oportunidade hotu atu koʼalia ba ema iha fatin públiku no iha ema nia uma. Jesus tau uluk serbisu ba Maromak iha ninia moris. Ita bele banati-tuir Kristu hodi buka dalan atu koʼalia kona-ba liafuan diʼak iha tempu no fatin naran deʼit. Ita prontu atu halo sakrifísiu hodi bele halo serbisu haklaken. (Mc 6:31-34; 1 Ped 2:21) Ema balu iha kongregasaun serbí nuʼudar pioneiru tempu-tomak, regulár ka estra. Ema seluk aprende atu koʼalia língua seluk ka muda ba área neʼebé presiza haklaken-naʼin. Maibé, haklaken-naʼin baibain mós kumpre buat barak hodi haklaken tuir sira-nia kbiit. Jeová la husu ita atu halo buat neʼebé liu fali ita-nia kbiit. w19.04 p. 3-4 par. 7-8

Husu ba Ita-nia an: ‘Haʼu laran-moras ba ema seluk ka lae?’ (1 Ped 2:1) ‘Haʼu sente katak haʼu diʼak liu fali ema seluk tanba haʼu-nia rasa, edukasaun ka rikusoin ka lae?’ (Prov 16:5) ‘Haʼu la hafolin ema neʼebé la iha pozisaun ka rasa hanesan haʼu ka lae?’ (Tgo 2:2-4) ‘Haʼu gosta buat neʼebé Satanás nia mundu oferese ka lae?’ (1 João 2:15-17) ‘Haʼu gosta atividade halimar nian neʼebé nakonu ho violénsia no buat seksuál ka lae?’ (Sal 97:10; 101:3; Amós 5:15) Resposta ba pergunta sira-neʼe, sei ajuda Ita hatene buat neʼebé Ita presiza hadiʼa. Ema neʼebé ita ransu bele fó influénsia ba ita. (Prov 13:20) Ema iha ­eskola ka serbisu-fatin la ajuda ita atu hanoin iha dalan neʼebé Maromak simu. Maibé ita bele hetan duni belun neʼebé diʼak iha reuniaun Kristaun sira. Iha Reuniaun-Fatin, ita bele hetan laran-manas atu “hatudu domin no hahalok diʼak”.​—Ebr 10:24, 25, nota. w19.06 p. 12 par. 13-14

Neʼe laʼós Jeová nia hakarak atu ita hetan problema no susar ohin loron. Tan neʼe, dala ruma Jeová nia atan sira sei koʼalia arbiru kuandu hasoru problema boot. (Job 6:2, 3) Maski karik ema neʼe koʼalia liafuan la loos kona-ba Jeová ka ita, ita la presiza sai hirus lalais no tesi-lia ba nia. Dala ruma, ema neʼebé hasoru daudaun problema neʼebé lori estrese presiza simu konsellu ka korrije. (Gal 6:1) Katuas sira bele fó konsellu iha dalan oinsá? Katuas sira bele banati-tuir Eliú neʼebé rona ba Job ho laran-diʼak. (Job 33:6, 7) Eliú komprende didiʼak uluk Job nia hanoin antes fó konsellu. Katuas sira neʼebé banati-tuir Eliú nia ezemplu sei rona didiʼak no koko atu komprende ema neʼe nia situasaun. Hodi halo nuneʼe, karik sira-nia konsellu sei kona ema neʼe nia laran. w19.06 p. 22-23 par. 10-11

Oinsá atu kontinua adora Jeová maski governu bandu? Sukursál sei fó matadalan no sujestaun ba katuas kongregasaun. Se sukursál labele kontaktu katuas kongregasaun sira, entaun katuas sira sei ajuda ita no ema hotu iha kongregasaun atu kontinua adora Jeová. Sira sei fó matadalan tuir Bíblia no ita-nia publikasaun sira. (Mt 28:19, 20; Ebr 10:24, 25) Jeová promete ona katak ninia atan sira sei sai bosu iha dalan espirituál. (Isa 65:13, 14; Lc 12:42-44) Entaun Ita bele fiar metin katak ninia organizasaun sei hakaʼas an atu fó buat neʼebé Ita presiza atu bele laran-metin nafatin. Saida mak Ita bele halo? Bainhira governu bandu, buka fatin neʼebé seguru atu subar Ita-nia Bíblia no publikasaun sira. Kuidadu atu la husik publikasaun neʼebé print ona ka eletróniku iha fatin neʼebé ema bele hetan lalais. Ita ida-idak tenke hakaʼas an atu hametin Ita-nia relasaun ho Jeová. w19.07 p. 10 par. 10-11

Uluk ema barak iha mundu sai parte ba relijiaun. Maibé agora iha mudansa boot. Ema barak liután la iha relijiaun. Tuir loloos, iha rai balu, populasaun barak dehan katak sira la iha relijiaun. (Mt 24:12) Tanbasá? Ema balu karik fokus liu atu buka ksolok ka fokus ba sira-nia problema. (Lc 8:14) Ema balu tan uluk fiar Maromak maibé agora la fiar ona Maromak. Ema seluk fiar Maromak maibé hanoin katak relijiaun mak antigu ona, la ajuda ema, la apoia siénsia no la lójiku. Karik sira rona beibeik husi sira-nia belun, mestre, ka ema husi média katak moris mai husi evolusaun, maibé karik sira ladún rona razaun tanbasá sira bele fiar katak Maromak iha. Ema seluk tan hakribi ulun-naʼin relijiaun tanba kaan osan no podér. Iha rai balu, governu bandu atividade relijiaun nian. w19.07 p. 20 par. 1-2

Ita la presiza forsa fíziku atu hametin ita-nia fiar ba Jeová no serbí nia ho laran-manas. Tuir loloos, ema barak neʼebé sai fraku tanba sai ferik ka katuas kontinua hakaʼas an atu serbí Jeová ho kbiit tomak. (2 Kor 4:16) Karik Ita serbí ona Jeová ba tinan barak no agora Ita-nia saúde hanetik Ita atu halo buat barak hanesan uluk. Se nuneʼe, keta laran-kraik. Fiar metin bá katak Jeová hafolin serbisu neʼebé uluk Ita halo ho laran-metin. (Ebr 6:10) No kona-ba agora, hanoin-hetan katak ita-nia laran-metin ba Jeová la depende ba serbisu hira mak ita bele halo. Maibé, ita hatudu ita-nia laran-metin ba nia hodi iha hanoin pozitivu no halo buat neʼebé ita bele tuir ita-nia kbiit. (Kol 3:23) Jeová komprende ita-nia limitadu no la husu ita atu halo liu fali ita-nia kbiit.​—Mc 12:43, 44. w19.08 p. 3 par. 6; p. 5 par. 11-12

Jeová dada ema ba nia liuhusi ninia atan sira-nia “hahalok diʼak”. (Mt 5:14, 15; 1 Ped 2:12) Se Ita-nia kaben laʼós Testemuña ba Jeová, nia hasoru ona irmaun-irmán balu ka lae? Konvida ita-nia kaben atu tuir reuniaun sira hamutuk ho ita. (1 Kor 14:24, 25) Ita hakarak ita-nia família hotu serbí Jeová hamutuk ita. Maibé karik ita-nia família la tama lia-loos maski ita hakaʼas an makaʼas atu ajuda sira. Se nuneʼe, ita labele fó sala ba ita-nia an. Tuir loloos, ita labele obriga ema atu simu ita-nia fiar. Maibé se ita-nia família haree katak ita kontente tanba serbí Jeová, karik neʼe sei fó influénsia ba sira. Halo orasaun kona-ba sira. Koʼalia ba sira ho laran-diʼak. Keta rende an atu ajuda sira. (Após 20:20) Fiar metin katak Jeová sei haraik bensaun ba ita-nia hakaʼas an. Se ita-nia família deside atu rona ba ita, sira sei hetan salvasaun. w19.08 p. 18-19 par. 15-17

Jesus nia liafuan neʼe ­signifika saida? Nia hakarak ita atu halaʼo moris simples ka tau fokus ba planu ka objetivu ida deʼit, no la husik buat ida fahe ita-nia atensaun. Jesus rasik hatudu ezemplu diʼak hodi tau fokus ba ninia serbisu haklaken, no nia hanorin ninia dixípulu atu kontinua tau fokus ba Jeová nia serbisu no ninia Ukun. Ita banati-tuir Jesus hodi tau uluk serbisu haklaken no “kontinua buka uluk Maromak nia Ukun no buat neʼebé loos tuir Maromak nia haree”. (Mt 6:33) Dalan ida atu tau fokus ba serbisu haklaken mak hodi halo moris simples atu nuneʼe ita bele uza tempu barak liu atu ajuda ema seluk hatene no hadomi Jeová. Porezemplu, ita bele hamenus oras serbisu nian hodi ita bele uza tempu barak liután atu haklaken durante ­loron baileet ka lae? Ita bele hamenus atividade halimar nian neʼebé gasta tempu barak liu ka lae? w19.04 p. 5-6 par. 12-13

Foin daudaun, iha irmaun-irmán barak neʼebé laran-metin simu knaar foun. La fasil ba irmaun-irmán sira atu halo tuir mudansa sira-neʼe. Sira balu triste tebes atu husik knaar neʼebé sira gosta no halo ba tempu kleur ona, no sente susar atu halo mudansa hodi halaʼo fali knaar foun. Maski nuneʼe, sira kontente atu halo tuir mudansa sira. Tanbasá? Tanba sira-nia domin ba Jeová. Sira komprende katak sira dedika an ba Maromak, laʼós ba serbisu, pozisaun, ka knaar ruma. (Kol 3:23) Sira kontente atu kontinua serbí Jeová ho haraik an iha situasaun naran deʼit. Sira “entrega [sira-nia] laran-susar hotu ba nia”, tanba hatene katak nia hanoin sira. (1 Ped 5:6, 7) Se ita haburas haraik an, neʼe sei lori diʼak ba ema seluk, no ba Ita-nia an rasik. Neʼe sei ajuda ita tahan hasoru problema sira iha ita-nia moris. Importante liu mak, ita sai besik liután ho ita-nia Aman iha lalehan. w19.09 p. 6-7 par. 15-17

Jeová hili David nuʼudar ulun ba ninia família no mós ba nasaun Izraél tomak. Nuʼudar liurai, David iha podér boot. Dala ruma, nia uza sala podér neʼe no halo sala boot. (2 Sam 11:14, 15) Maibé, nia hatudu katak nia hakruʼuk ba Jeová hodi simu dixiplina. Nia fakar sai ninia laran tomak ba Jeová liuhusi orasaun. No nia koko makaʼas atu halo tuir Jeová nia konsellu. (Sal 51:1-4) Liután neʼe, nia mós hatudu haraik an hodi simu konsellu diʼak husi mane no mós feto sira. (1 Sam 19:11, 12; 25:32, 33) David aprende husi ninia sala no hakaʼas an atu tau uluk Jeová iha ninia moris. Nia hatene katak hakruʼuk ba Jeová lori benefísiu. Ohin loron, ita bele haree diferensa entre ema neʼebé hakruʼuk ba Jeová no ema neʼebé lakohi simu ninia konsellu. Ema neʼebé hakruʼuk ba Jeová “haklalak ho haksolok tanba laran-kontente”.​—Isa 65:13, 14. w19.09 p. 17 par. 15; p. 19 par. 21

Iha tinan 1935, Testemuña ba Jeová sira komprende katak ema-lubun boot la presiza bá lalehan hodi bele “hamriik iha kadunan nia oin no iha Bibi-Oan nia oin”. Neʼe mak simbóliku deʼit. Maski ema-lubun boot sei hela iha rai, maibé sira bele “hamriik iha kadunan nia oin” liuhusi rekoñese katak Jeová mak ukun-naʼin ba universu no mós simu ninia pozisaun nuʼudar ukun-naʼin hodi halo tuir nia. (Isa 66:1) Sira bele hamriik iha “Bibi-Oan nia oin” liuhusi hatudu fiar ba Jesus nia sakrifísiu. Liután neʼe, Mateus 25:31, 32 mós dehan “nasaun hotu”, inklui ema aat sira, halibur iha Jesus nia kadunan oin. Klaru katak, nasaun sira-neʼe hotu laʼós iha lalehan maibé iha rai. Hanorin foun neʼe mak lójiku. Neʼe ajuda ita komprende tanbasá Bíblia la temi katak ema-lubun boot sei moris-hiʼas bá lalehan. Só grupu ida deʼit mak iha esperansa atu moris ba nafatin iha lalehan, neʼe mak ema naʼin-144.000, neʼebé sei “ukun nuʼudar liurai ba mundu tomak” hamutuk ho Jesus.​—Apok 5:10. w19.09 p. 28 par. 9

Jeová hakarak ninia atan sira atu hasees an husi Babilónia Boot. Maibé neʼe seidauk toʼo. Ita mós tenke hakaʼas an atu kaer metin ba adorasaun neʼebé loos, no serbí Jeová mesak deʼit. Hanoin toʼok dalan rua atu halo nuneʼe. Primeiru, ita tenke kaer metin Jeová nia matadalan kona-ba morál. Ita labele simu mundu nia hahalok la morál. Porezemplu, ita la simu sala seksuál hotu, inklui mane kaben ho mane ka feto kaben ho feto, no hahalok omoseksuál seluk. (Mt 19:4, 5; Rom 1:26, 27) Segundu, ita tenke kontinua adora Jeová hamutuk ho maluk Kristaun sira. Ita hakaʼas an atu halibur hamutuk iha Reuniaun-Fatin ka halibur iha ema nia uma ka subasubar se presiza. Ita hakarak atu halibur hamutuk nafatin maski hasoru situasaun oioin. Tuir loloos, ita presiza halibur hamutuk ‘liuliu bainhira ita haree loron neʼe besik daudaun ona’.​​—Ebr 10:24, 25. w19.10 p. 15-16 par. 6-7

Jeová hakarak ita atu moris kontente, no atividade halimar nian bele halo ita kontente. Tuir loloos, Bíblia dehan: “Diʼak liu ba ema ida atu han, hemu no hetan ksolok husi ninia serbisu makaʼas, tanba la iha buat ida mak diʼak liu fali ida-neʼe.” (Ecle 2:24) Maibé, atividade halimar nian barak iha mundu neʼe bele fó influénsia aat ba ita. Neʼe bele book ema atu simu ka hadomi buat neʼebé Maromak hakribi. Ita hakarak atu adora Jeová mesak deʼit, tan neʼe ita labele han husi “Jeová nia meza” no mós “anju aat nia meza”. (1 Kor 10:21, 22) Baibain han hamutuk ho ema ruma mak sinál katak sira mak belun. Se ita hili atividade halimar nian neʼebé hatudu violénsia, espiritizmu, sala seksuál, ka hakarak no hahalok isin nian seluk, tuir loloos ita han ai-han neʼebé Maromak nia inimigu prepara ona. Rezultadu mak, ita lori susar ba ita-nia an no mós estraga ita-nia relasaun diʼak ho Jeová. w19.10 p. 26 par. 2; p. 29-30 par. 11-12

Se ró-naʼin hakarak anin lori ninia ró, nia tenke halo buat rua. Primeiru, nia tenke muda ninia ró ba fatin neʼebé anin huu. Ninia ró sei la book an se nia para deʼit iha ponte-kais dook husi fatin neʼebé anin huu. Segundu, nia tenke loke luan ró nia laan. Klaru katak maski anin huu, maibé ninia ró bele muda só deʼit se anin kona ró nia laan. Nuneʼe mós, ita bele kontinua serbí Jeová só deʼit se ita simu ajuda husi espíritu santu. Atu espíritu santu ajuda ita, ita tenke halo buat rua. Primeiru, ita tenke halo atividade sira neʼebé Maromak nia espíritu santu dirije ita atu halo. Segundu, ita tenke hakaʼas an atu halo atividade sira-neʼe tuir ita-nia kbiit. (Sal 119:32) Espíritu santu se ajuda ita atu tahan susar neʼebé hanesan laloran boot, no mós ajuda ita kontinua serbí Jeová ho laran-metin. w19.11 p. 9 par. 8; p. 10 par. 11

Jesus laran-susar tebes iha ninia loron ikus iha rai. Lakleur tan ema aat sira sei haterus no oho nia. Maibé Jesus hanoin barak laʼós deʼit tanba nia atu mate. Nia hadomi tebes ninia Aman no hakarak atu halo nia kontente. Jesus hatene katak se nia laran-metin nafatin bainhira hasoru koko neʼebé makaʼas, nia bele apoia hodi halo santu Jeová nia naran. Jesus mós hadomi ema, no nia hatene katak atu ema bele hetan moris rohan-laek iha futuru, neʼe depende ba ninia laran-metin ba Jeová toʼo mate. Maski Jesus laran-susar tebes, maibé nia sente dame. Nia iha “Maromak nia dame”, tan neʼe nia sente kalma neʼebé mai husi relasaun diʼak ho Jeová. Dame neʼe ajuda Jesus atu la hanoin barak. (Flp 4:6, 7) Ita sei la hasoru terus hanesan Jesus nian, maibé ema hotu neʼebé halo tuir Jesus sei hasoru susar oioin. (Mt 16:24, 25; João 15:20) Hanesan Jesus, dala ruma ita sente laran-susar. w19.04 p. 8 par. 1-3

Husu ba Ita-nia an: ‘Haʼu agradese tanba sai parte ba Jeová nia organizasaun parte rai nian ka lae?’ Jeová hatudu ho klaru katak nia fó bensaun ba ninia povu ohin loron. Ita agradese tebes ho ida-neʼe. (1 Tes 5:18) Oinsá mak ita bele hatudu katak ita apoia organizasaun neʼebé Jeová uza? Ita hatudu neʼe hodi aplika buat neʼebé ita aprende kona-ba Bíblia husi ita-nia publikasaun sira, reuniaun, no reuniaun boot sira. Ita mós bele hatudu neʼe hodi hola parte beibeik iha serbisu haklaken no hanorin. (1 Kor 15:58) Ita hakarak Jeová simu ita-nia sakrifísiu. Ita serbí Jeová tanba ita hatudu agradese ba nia. Ita kontinua fó buat diʼak liu ba Jeová tanba ita hadomi nia ho laran tomak. No ita hakaʼas an atu apoia organizasaun neʼebé Jeová uza ohin loron. Hodi halo buat sira-neʼe, ita hatudu ba Jeová katak ita hafolin priviléjiu atu serbí nia nuʼudar ninia Testemuña. w19.11 p. 25 par. 17-18

Neʼe la signifika ita sei halo milagre hanesan Jesus. Maibé neʼe katak ita sei haklaken no hanorin iha fatin barak liu, durante tempu neʼebé kleur liu no ba ema barak liu. Se Ita serbisu, husu ba Ita-nia an: ‘Iha haʼu-nia serbisu-fatin, ema koñese haʼu nuʼudar serbisu-naʼin neʼebé badinas ka lae? Haʼu kumpre haʼu-nia serbisu tuir tempu no tuir haʼu-nia kbiit ka lae?’ Se Ita hatán sin ba pergunta sira-neʼe, neʼe katak Ita-nia patraun bele tau fiar ba Ita. No karik neʼe sei book ema iha Ita-nia serbisu-fatin atu hakarak rona lia-loos. Kona-ba serbisu haklaken no hanorin, husu ba Ita-nia an: ‘Ema koñese haʼu nuʼudar haklaken-naʼin neʼebé badinas ka lae? Haʼu prepara didiʼak antes haklaken ka lae? Kuandu ema hatudu interese, haʼu vizita fali sira lalais ka lae? Haʼu hola parte atu haklaken iha dalan oioin ka lae?’ Se Ita hatán sin ba pergunta sira-neʼe, Ita sei haksolok ho serbisu haklaken. w19.12 p. 5 par. 14-15

Feen-laʼen neʼebé deside atu iha oan tenke koʼalia hamutuk kona-ba pergunta importante rua: Primeiru, bainhira mak sira hakarak atu iha oan? Segundu, sira hakarak atu iha oan naʼin-hira? Bainhira mak tempu diʼak ba feen-laʼen atu koʼalia kona-ba neʼe? No tanbasá pergunta rua neʼe importante? Baibain, antes mane no feto ida kaben, sira presiza koʼalia hamutuk kona-ba atu iha oan ka lae. Tanbasá? Tanba importante tebes atu sira iha hanoin neʼebé hanesan kona-ba neʼe. No mós, sira presiza hanoin kona-ba se sira prontu ka lae atu simu responsabilidade neʼe. Feen-laʼen balu deside atu hein ba tinan ida ka rua depois sira-nia kazamentu atu bele iha oan tanba bainhira sira iha oan, sira sei uza tempu no enerjia barak atu tau matan ba oan. Sira sente katak hodi hein uitoan, sira bele sai toman ho moris nuʼudar feen-laʼen no hakbesik ba malu. w19.12 p. 23 par. 4-5

Iha mundu tomak, Jeová nia atan barak hasoru situasaun neʼebé susar no lori estrese. Maluk Kristaun balu tenke tahan susar tanba moras todan ka ema neʼebé sira hadomi mate. Maluk Kristaun seluk tenke tahan laran-kanek tanba família ka belun diʼak husik lia-loos. Maluk Kristaun seluk tan tenke tahan susar tanba dezastre naturais. Irmaun-irmán sira-neʼe hotu presiza hetan kmaan. Oinsá mak ita bele ajuda sira? Sai belun neʼebé laran-metin. Belun neʼebé laran-metin fó sira-nia tempu no enerjia atu apoia sira-nia irmaun-irmán. Porezemplu, doutór hatete ba irmaun Peter katak nia iha moras ida neʼebé ­lalais atu sai grave no nia sei mate. Peter nia feen Kathryn hatete: “Kaben-naʼin ida iha ami-nia kongregasaun mak tula ami bá hasoru doutór no iha tempu neʼe mak doutór hetan Peter nia moras. Kaben-naʼin neʼe deside kedas katak sira sei ajuda ami atu tahan situasaun susar neʼe no sira nafatin akompaña ami iha tempu hotu neʼebé ami presiza sira.” Ita sente kmaan duni hodi iha belun neʼebé loos neʼebé bele ajuda ita atu tahan ita-nia susar sira! w20.01 p. 8 par. 1; p. 9 par. 5; p. 10 par. 6

Sei ita mak dixípulu ida neʼebé halibur iha kuartu ida iha andár leten iha loron Pentekostes tinan 33 EC, ita sei la duvida katak Maromak hili ona Ita liuhusi ninia espíritu santu atu bá lalehan. (Após 2:5-12) Maibé Maromak sei hili ema hotu iha dalan neʼebé kmanek no iha tempu neʼebé hanesan ka lae? Lae. Hanoin kona-ba bainhira mak Maromak hili ema ida atu bá lalehan. Iha tempu neʼebá Maromak la hili deʼit ema Kristaun naʼin-120. Tuir loloos, Maromak mós hili ema maizumenus naʼin-3.000 tan liuhusi espíritu santu. Sira simu esperansa atu bá lalehan kuandu sira hetan batizmu. (Após 2:37, 38, 41) Maibé depois neʼe, laʼós ema hotu simu esperansa atu bá lalehan kuandu sira hetan batizmu. Ema Samaria sira simu sira-nia esperansa neʼe tempu balu depois sira hetan batizmu. (Após 8:14-17) Cornélio no ninia umakain simu esperansa neʼe iha dalan neʼebé úniku. Sira simu esperansa neʼe antes sira hetan batizmu.​—Após 10:44-48. w20.01 p. 20-21 par. 2-4

Iha Evanjellu haat, Jesus uza liafuan “Aman” maizumenus dala 165 hodi refere ba Jeová. Tanbasá Jesus koʼalia beibeik kona-ba Jeová nuʼudar Aman? Razaun ida mak atu ajuda ema iha konfiansa katak Jeová mak Aman neʼebé domin. (João 17:25) Ita bele aprende saida husi dalan neʼebé Jeová tau matan ba ninia Oan-Mane Jesus? Jeová sempre rona no hatán ba Jesus nia orasaun. (João 11:41, 42) Maski Jesus hasoru susar oioin, maibé nia bele sente ninia Aman nia domin no apoia. (Lc 22:42, 43) Tanba Jeová mak Aman neʼebé domin, nia ajuda Jesus atu iha konfiansa katak nia sei apoia Jesus. (Mt 26:53; João 8:16) Maski Jeová la proteje Jesus husi susar hotu, maibé nia ajuda Jesus tahan susar sira-neʼe. Jesus iha konfiansa katak terus neʼebé nia hasoru mak temporáriu deʼit. (Ebr 12:2) Jeová hatudu katak nia hadomi Jesus liuhusi rona, treinu, apoia no tau matan ba Jesus nia presiza.​—João 5:20; 8:28. w20.02 p. 3 par. 6-7, 9

Bainhira ita deside atu hola parte ka lae iha kostume ka tradisaun ruma, ita tenke hanoin kona-ba oinsá ita-nia desizaun bele kona ema seluk nia konxiénsia, liuliu maluk Kristaun. Ita lakohi halo ema seluk sidi! (Mc 9:42) No mós, ita hakarak kuidadu hodi la halo ema neʼebé laʼós Testemuña laran-kanek. Domin sei book ita atu koʼalia ba sira ho respeitu, no neʼe lori glória ba Jeová. Ita lakohi atu haksesuk malu ho ema ka hatún sira-nia tradisaun. Hanoin-hetan katak, domin mak forsa boot liu! Bainhira ita hatudu domin hodi hanoin no respeitu ema neʼebé kontra ita, neʼe bele book sira atu la hirus tan ita. Fó sai katak Ita mak Testemuña ba Jeová. (Isa 43:10) Kuandu Ita-nia família mate, karik fasil liu atu tahan situasaun susar neʼe se Ita esplika nanis Ita-nia fiar ba família. Mai ita hakaʼas an atu nunka sente moe kona-ba ita-nia desizaun hodi defende lia-loos.​—Rom 1:16. w19.04 p. 17-18 par. 14-16

Apóstolu naʼin-12 laʼo tuir Jesus durante Jesus haklaken iha rai, maibé apóstolu Paulo sai ema Kristaun depois Jesus mate no moris-hiʼas. Maski ikusmai Paulo simu knaar nuʼudar “apóstolu ba nasaun sira”, maibé nia la simu priviléjiu espesiál atu sai parte ba apóstolu naʼin-12. (Rom 11:13; Após 1:21-26) Paulo la laran-moras ba apóstolu naʼin-12 tanba sira iha relasaun besik ho Jesus, maibé nia kontente ho buat neʼebé nia iha. Se ita haraik an no kontente ho buat neʼebé ita iha, ita sei sai hanesan Paulo no hatudu respeitu ba ema sira neʼebé simu ona responsabilidade husi Jeová. (Após 21:20-26) Jeová arranja katuas sira atu dirije kongregasaun Kristaun. Maski sira la perfeitu, maibé Jeová haree sira nuʼudar “prezente”. (Éf 4:8, 11) Bainhira ita hatudu respeitu ba sira no ho haraik an halo tuir sira-nia matadalan, ita sei hakbesik nafatin ba Jeová no iha dame ho maluk Kristaun sira. w20.02 p. 17 par. 13-14

Antes estuda ho Testemuña ba Jeová, karik Ita hafolin ona Bíblia no hadomi ona Jesus. No tanba agora Ita estuda Bíblia ho Testemuña ba Jeová, karik Ita gosta atu ransu ho sira. Klaru katak Ita hadomi no hafolin buat sira-neʼe. Maibé karik buat sira-neʼe la book Ita atu dedika an ba Jeová no hetan batizmu. Razaun importante liu atu hetan batizmu mak domin ba Maromak Jeová. Bainhira Ita hadomi Jeová liu fali buat seluk, Ita sei la husik buat ida ka ema ida atu hanetik Ita serbí nia. Domin ba Jeová sei book Ita atu hetan batizmu no sei ajuda Ita atu laran-metin nafatin ba Jeová depois hetan batizmu. Jesus hatete katak ita tenke hadomi Jeová ho ita-nia laran tomak, moris tomak, neon tomak no kbiit tomak. (Mc 12:30) Oinsá Ita bele haburas domin no respeitu neʼebé kleʼan ba Jeová? Se ita medita kona-ba Jeová nia domin boot ba ita, neʼe sei book ita atu hadomi fali nia. w20.03 p. 4 par. 4-5

Kumpre didiʼak ita-nia serbisu ba Maromak katak sá? Atu kumpre didiʼak ita-nia serbisu ba Maromak, ita tenke hola parte beibeik iha serbisu haklaken no hanorin tuir ita-nia kbiit. Maibé neʼe la depende deʼit ba tempu neʼebé ita uza. Buat neʼebé importante ba Jeová mak ita-nia motivu. Ita halo serbisu ba Maromak ho moris tomak tanba ita hadomi Jeová no ita-nia maluk. (Mc 12:30, 31; Kol 3:23) Serbí Maromak ho moris tomak signifika katak ita uza ita-nia forsa no enerjia atu halo ninia serbisu. Bainhira ita hafolin priviléjiu atu haklaken, ita sei hakaʼas an atu fahe liafuan diʼak ba ema barak. Karik Ita la iha tempu barak atu haklaken. Maski nuneʼe Ita gosta tebes atu haklaken. Ita hakaʼas an atu aumenta Ita-nia matenek atu fahe liafuan diʼak iha dalan neʼebé book ema nia laran. Ita tau uluk serbisu haklaken iha Ita-nia moris. w19.04 p. 2 par. 3; p. 3 par. 4, 6

Satanás nia lia-bosok aumenta ema nia triste no neon-susar. Dala ruma ema dehan ba inan-aman neʼebé triste hela tanba oan mate, katak Maromak foti ona oan neʼe hodi sai anju iha lalehan. Satanás nia lia-bosok neʼe aumenta deʼit ema nia neon-susar. Iha tempu uluk, hanorin falsu kona-ba infernu halo ema hanoin katak sira bele haterus ema neʼebé kontra igreja nia hanorin hodi sunu iha ai-riin. Livru ida kona-ba tribunál neʼebé uluk haterus ema neʼebé kontra igreja Katólika, dehan katak juís balu husi tribunál neʼe sunu ema neʼebé la simu igreja nia hanorin atu nuneʼe sira bele arrepende an antes sira mate no la hetan kastigu ba nafatin iha infernu. Iha rai balu, ema sente katak sira tenke adora, respeitu, ka husu bensaun husi beiʼala neʼebé mate ona. Ema seluk hakarak halo sira-nia beiʼala kontente nafatin atu labele hetan kastigu. Triste mak fiar sira neʼebé bazeia ba Satanás nia lia-bosok la lori kmaan neʼebé loos. Maibé, lia-bosok sira-neʼe halo ema sente neon-susar no mós taʼuk. w19.04 p. 14 par. 1; p. 16 par. 10