Fevereiru

Liafuan “justisa” neʼebé uza iha Bíblia signifika halo buat neʼebé loos tuir Maromak nia haree no halo neʼe hodi la todan ba sorin. Hanoin toʼok kona-ba oinsá Jesus nia hahalok hatudu sai ninia hanoin kona-ba justisa. Iha ninia tempu, ulun-naʼin relijiaun Judeu nian odi ema husi nasaun seluk, hakribi ema Judeu baibain, no la respeitu feto sira. Maibé Jesus nunka todan ba sorin. Nia simu ema husi nasaun seluk neʼebé fiar nia. (Mt 8:5-10, 13) Nia haklaken ba ema hotu, kiak no riku. (Mt 11:5; Lc 19:2, 9) Nia nunka siʼak ka trata aat feto sira. Nia hatudu respeitu no laran-diʼak ba feto sira, inklui feto sira neʼebé ema seluk la hafolin. (Lc 7:37-39, 44-50) Ita bele banati-tuir ­Jesus hodi la todan ba sorin no haklaken ba ema hotu neʼebé hakarak atu rona, no la haree ba sira-nia situasaun ka sira-nia relijiaun. Mane Kristaun sira halo tuir Jesus nia ezemplu hodi hatudu respeitu ba feto sira. w19.05 p. 2 par. 1; p. 5 par. 15-17

Katuas kongregasaun sira mós bele koʼalia ho laran-diʼak bainhira uza Bíblia atu fó kmaan ba ema. Entaun, katuas kongregasaun deʼit mak bele fó kmaan ba sira neʼebé sai vítima ba abuzu seksuál ka lae? Lae. Ita ida-idak iha responsabilidade atu “kontinua fó aten-brani ba malu”. (1 Tes 4:18) Irmán Kristaun neʼebé maduru bele anima irmán seluk neʼebé presiza hetan kmaan. Tuir loloos, Jeová kompara ninia an hanesan inan ida neʼebé fó kmaan ba ninia oan-mane. (Isa 66:13) Bíblia mós temi kona-ba feto sira neʼebé fó kmaan ba ema seluk iha tempu susar. (Job 42:11) Ita bele fiar katak Jeová sente kontente tebes atu haree feto Kristaun ohin loron fó kmaan ba irmán Kristaun neʼebé hasoru daudaun terus. Iha situasaun balu, karik katuas kongregasaun sira sei husu irmán maduru ida atu ajuda irmán neʼebé hasoru terus. Bainhira ita ajuda irmaun ka irmán, kuidadu atu la husu kona-ba buat neʼebé sira lakohi atu fó sai.​—1 Tes 4:11. w19.05 p. 16-17 par. 10-12

Tanbasá katuas kongregasaun presiza iha sasin naʼin-rua antes atu prova katak ema ida halo sala sériu? Tanba neʼe mak Bíblia nia matadalan kona-ba justisa. Bainhira ema duun katak ema ida halo sala maibé la fó sai ninia sala, entaun presiza sasin naʼin-rua antes katuas sira bele forma grupu tesi-lia nian. (Deut 19:15; 1 Tim 5:19) Se ema neʼe nega, katuas sira sei rona fali ba sasin sira. Katuas sira sei forma grupu tesi-lia nian se iha sasin naʼin-rua, katak sasin husi ema ­neʼebé duun no mós ema seluk neʼebé hatene. Maski la iha sasin naʼin-rua, neʼe la dehan katak buat neʼebé ema duun la loos. Maski labele prova kona-ba abuza seksuál ba labarik tanba la iha sasin naʼin-rua, maibé katuas sira rekoñese katak karik sala sériu akontese duni. Katuas sira kontinua fó apoia ba vítima no matan-moris hodi proteje kongregasaun.​—Após 20:28. w19.05 p. 11 par. 15-16

Inan-aman presiza hanorin oan sira oinsá atu estuda. Oan sira presiza aprende oinsá atu prepara ba reuniaun ka oinsá atu halo riset kona-ba problema neʼebé mosu iha eskola. (Ebr 5:14) Se oan sira uza tempu balu iha uma atu estuda tópiku balu husi Bíblia, fasil liu ba sira atu komprende informasaun neʼebé hatoʼo iha reuniaun sira, no reuniaun boot sira. Maibé, tempu neʼebé inan-aman uza atu estuda hamutuk oan sira depende ba oan sira-nia tinan no kbiit atu komprende. Ita-nia estudante Bíblia mós presiza aprende oinsá atu estuda. Bainhira sira foin aprende Bíblia, ita sente kontente se sira prepara ba sira-nia estuda ka reuniaun sira hodi riska sira-nia livru. Maibé ita mós presiza hanorin sira oinsá atu halo riset no oinsá sira bele estuda mesak. Atu nuneʼe, bainhira problema mosu, sira hatene ona oinsá atu hetan informasaun husi ita-nia publikasaun sira neʼebé bele ajuda sira. w19.05 p. 26 par. 2; p. 28 par. 10-11

Satanás hakarak tebes atu troka ita-nia hanoin. Nia uza hanorin no ideia oioin atu estraga ita-nia hanoin neʼebé hetan ona treinu husi Maromak nia Liafuan. Satanás kontinua halo ema duvida hodi uza pergunta neʼebé uluk nia husu ba Eva iha jardín Eden: “Maromak dehan duni katak . . . ?” (Gén 3:1) Iha mundu neʼebé Satanás mak ukun, ita rona beibeik pergunta sira hanesan: ‘Maromak la simu duni mane kaben ho mane ka feto kaben ho feto ka lae? Maromak lakohi duni atu Ita selebra Natál no loron-moris ka lae? Ita-nia Maromak haruka duni Ita atu la simu transfuzaun raan ka lae? Maromak neʼebé nakonu ho domin haruka duni Ita atu la ransu tan ho ema neʼebé kongregasaun hasai ka lae?’ Ita presiza hametin ita-nia fiar. Se ita la buka-hatene resposta ba pergunta importante kona-ba Ita-nia fiar, ida-neʼe bele halo ita komesa duvida. Sentimentu duvida bele estraga ita-nia hanoin no halakon ita-nia fiar. w19.06 p. 12-13 par. 15-17

Jeová hadomi tebes ita. (João 3:16) Ita hakarak banati-tuir ita-nia Aman domin nian. Tan neʼe, ita hakaʼas an atu “hanoin malu, hadomi malu hanesan maun-alin, [no] hatudu laran-sadiʼa” ba ema hotu, liuliu ba “ba ita-nia maluk fiar-naʼin”. (Gal 6:10) Bainhira irmaun-irmán sira hasoru situasaun susar neʼebé lori estrese, ita hakarak atu ajuda sira. Oinsá mak ita bele fó kmaan ba ema neʼebé nia kaben mate ona? Hakat importante primeiru mak koʼalia ho nia maski Ita sente moe no la hatene atu koʼalia saida. Paula neʼebé ninia laʼen mate derrepente hatete: “Haʼu komprende katak ema barak la hatene atu halo saida kuandu ema ida mate. No ema balu taʼuk se sira koʼalia liafuan neʼebé sala. Maibé aat liu se ema la koʼalia buat ida.” Ema neʼebé triste daudaun karik la hein ita atu hatete liafuan furak ba sira. Paula hatete: “Haʼu hafolin tebes bainhira maluk sira hatete deʼit, ‘Haʼu hatoʼo haʼu-nia kondolénsias ba ó’.” w19.06 p. 20 par. 1; p. 23 par. 14

Se governu bandu ita-nia serbisu, katuas sira sei organiza atu Ita tuir reuniaun iha dalan neʼebé la dada inimigu nia atensaun. Karik sira haruka Ita atu halo reuniaun iha grupu kiʼik, no sei muda beibeik tempu no fatin ba reuniaun sira. Kona-ba serbisu haklaken, situasaun iha fatin ida-idak la hanesan. Maibé ita hadomi Jeová no hakarak atu fó-hatene ema seluk kona-ba ninia Ukun, tan neʼe ita sei buka dalan atu haklaken. (Lc 8:1) Matenek-naʼin kona-ba istória naran Emily B. Baran, konta kona-ba Testemuña ba Jeová iha Uniaun Soviétika, hodi dehan: “Bainhira governu hatete ba fiar-naʼin sira katak sira labele haklaken tan kona-ba sira-nia fiar, Testemuña sira komesa haklaken ba sira-nia viziñu, kolega serbisu, no belun sira. Dala ruma ema hatama Testemuña sira ba komarka tanba haklaken iha dalan sira-neʼe, maibé Testemuña sira haklaken ba dadur seluk.” Maski governu bandu, ita-nia irmaun-irmán sira iha neʼebá la para atu haklaken. Ita mós bele banati-tuir sira. w19.07 p. 11 par. 12-13

Oinsá mak ita bele ajuda ema neʼebé la iha relijiaun atu aprende hadomi Maromak no sai Kristu nia dixípulu? Ita tenke rekoñese katak ema nia moris-fatin bele afeta dalan neʼebé sira simu ka la simu mensajen neʼebé ita haklaken. Porezemplu, ema husi Europa karik la hanesan ho ema husi Ázia. Tanbasá? Iha Europa, ema barak hatene informasaun balu kona-ba Bíblia no rona ona katak Maromak mak kria buat hotu. Maibé iha Ázia, ema barak hatene uitoan ka la hatene buat ida kona-ba Bíblia, no karik sira la fiar ba Kriadór. Hanoin pozitivu. Tinan-tinan, ema barak neʼebé uluk la iha relijiaun sai Testemuña ba Jeová. Sira barak iha ona morál neʼebé diʼak no hakribi ulun-naʼin relijiaun tanba laran-makerek. Sira seluk la iha morál no presiza husik hahalok aat. Ho Jeová nia ajuda, ita bele fiar katak ita sei hetan ema “neʼebé prontu atu simu lia-loos neʼebé lori ba moris rohan-laek”.​—Após 13:48; 1 Tim 2:3, 4. w19.07 p. 20-21 par. 3-4

Maski ita-nia esperansa mak atu moris ba nafatin iha lalehan ka iha rai, ita hotu tenke kontinua halai atu hetan ita-nia kolen. Maski ita tahan hasoru susar oioin, ita labele hateke ba kotuk ka husik buat ruma hanetik ita atu serbí Jeová. (Flp 3:16) Karik ita sente hanesan ita hein kleur ba ita-nia esperansa atu sai loos, ka sai fraku tanba sai ferik-katuas, ka karik ita hasoru susar ka ema fó-terus ba ita durante tempu kleur. Maski nuneʼe, “keta hanoin resin kona-ba buat ida”. Maibé halo orasaun no harohan ba Maromak, no nia sei fó ita dame neʼebé ita nunka imajina. (Flp 4:6, 7) Hanesan ema neʼebé halai-taru hakaʼas an makaʼas bainhira besik ona rohan, ita mós presiza tau fokus ba ita-nia objetivu atu halai toʼo rohan hodi manán moris. Ita hakarak kontinua halo ida-neʼe agora tuir ita-nia forsa no situasaun. w19.08 p. 7 par. 16-17

Maski karik ita la hatene atu hatete saida ba ema neʼebé triste, maibé se sira haree ita tanis, sira sei hatene katak ita hanoin sira. Bainhira Jesus nia belun Lázaro mate, Maria no Marta no ema seluk tanis ba sira-nia alin no belun. Loron haat depois neʼe bainhira Jesus toʼo, nia “matan-been suli”, maski nia hatene katak nia sei halo Lázaro moris-hiʼas. (João 11:17, 33-35) Jesus nia matan-been hatudu ninia Aman iha lalehan nia sentimentu. Jesus nia matan-been mós hatudu katak Jesus hadomi família neʼe, no karik neʼe fó kmaan ba Maria no Marta. Nuneʼe mós bainhira irmaun-irmán sente katak ita hadomi no hanoin sira, sira sei hatene katak sira la mesak maibé iha belun neʼebé tau matan no apoia sira. Dala ruma ita tenke rona didiʼak ba nia. Fó tempu ba nia atu fakar sai ninia sentimentu, no keta sente laran-kanek se nia “koʼalia liafuan arbiru deʼit”. (Job 6:2, 3) Karik nia sente estrese tanba ninia família neʼebé laʼós Testemuña obriga nia. Entaun halo orasaun ho nia. Husu ba “Maromak neʼebé rona ba orasaun” atu hametin nia no halo nia iha hanoin neʼebé loos.​—Sal 65:2. w19.04 p. 18-19 par. 18-19

Maski ita serbí iha Betel ka haklaken tempu-tomak, baibain ita hadomi ema no mós gosta fatin neʼebé ita serbí bá. Tan neʼe, ita sente triste tebes atu husik ita-nia knaar neʼe. Ita hanoin tebes ita-nia irmaun-irmán sira neʼebé ita husik hela, no laran-taridu kona-ba sira, liuliu se ita husik hela sira tanba ema kontra ita. (Mt 10:23; 2 Kor 11:28, 29) No karik ita mós sente susar tebes atu muda ba fatin seluk tanba ita presiza sai toman ho kultura foun. Ema balu neʼebé hasoru mudansa hanesan neʼe, karik hetan problema ekonomia. Karik sira sente laran-kraik no la hakmatek. Saida mak bele ajuda sira? Hakbesik nafatin ba Jeová. (Tgo 4:8) Oinsá? Liuhusi tau fiar ba nia nuʼudar “Maromak neʼebé rona ba orasaun”. (Sal 65:2) Jeová bele “halo barak liu fali buat hotu neʼebé ita husu ka hanoin”. (Éf 3:20) Jeová la fó deʼit buat neʼebé ita husu iha orasaun. Maibé nia mós bele rezolve ita-nia problema iha dalan neʼebé ita seidauk imajina. w19.08 p. 21 par. 5-6

Ema balu fiar katak mundu sei lakon mohu tanba funu nukleár ka dezastre naturais. Maibé Bíblia hanorin katak lakleur tan sei mosu funu ida neʼebé lori rezultadu diʼak. Funu neʼe hanaran Armagedon, no sei halo ita kontente. (Apok 1:3) Funu Armagedon sei la halakon ema hotu, maibé sei salva ema barak. Oinsá? Funu neʼe sei halakon ema nia governu, sei halakon ema aat no husik ema laran-loos moris, no mós sei halakon ema neʼebé estraga mundu. (Apok 11:18) Liafuan “Armagedon” mosu dala ida deʼit iha Bíblia no neʼe mak fraze Ebraiku ida neʼebé signifika “Foho Megido”. (Apok 16:16; nota) Megido mak sidade ida iha Izraél antigu. (Jos 17:11) Maibé Armagedon la refere ba fatin ida. Tuir loloos, neʼe refere ba situasaun bainhira liurai hotu iha mundu halibur hamutuk atu kontra Jeová.​—Apok 16:14. w19.09 p. 8 par. 1-3

Feto neʼe presiza duni ajuda. Nia bá konsulta ho doutór barak tanba hakarak atu sai isin-diʼak. Nia moras durante tinan 12, maibé la iha ema ida mak bele kura nia. Tuir Ukun-Fuan, nia la moos. (Lev 15:25) Kuandu nia rona katak Jesus bele kura ema neʼebé moras, nia bá buka Jesus. Bainhira nia hetan Jesus, nia kona saren iha Jesus nia roupa ninin, no nia sai isin-diʼak kedas. Maibé Jesus la kura deʼit nia, Jesus mós hatudu domin no respeitu ba nia. Porezemplu, Jesus koʼalia ho respeitu ba nia hodi bolu nia “oan-feto”. Klaru katak feto neʼe sente duni kmaan no forsa. (Lc 8:44-48) Bíblia dehan katak feto neʼe mak bá hasoru Jesus. Neʼe katak nia rasik hakaʼas an atu hakbesik ba Jesus. Ohin loron, ita mós tenke hakaʼas an atu hakbesik ba Jesus. Jesus la kura ita-nia moras ho milagre bainhira ita hakbesik ba nia. Maibé nia nafatin konvida ita: “Mai besik haʼu. . . . Haʼu sei fó kmaan ba imi.”​​—Mt 11:28. w19.09 p. 20 par. 2-3

Profeta Zacarias mós fó-hatene nanis kona-ba buat neʼebé hanesan. Zacarias hakerek: “Iha tempu neʼebá, mane naʼin-sanulu husi língua hotu husi nasaun oioin sei kaer metin mane Judeu ida nia roupa, hodi dehan: ‘Ami hakarak bá hamutuk ho imi, tanba ami rona ona katak Maromak hamutuk ho imi.’” (Zac 8:23) Testemuña sira komprende katak atu bele halibur ema husi língua hotu, ema tenke haklaken liafuan diʼak iha língua barak. Ohin loron sira halo serbisu tradusaun barak liu, no iha língua atus ba atus. Klaru katak, Jeová halo duni milagre hodi halibur ema-lubun boot husi nasaun hotu. Tanba iha ona Bíblia no mós ai-han espirituál iha língua barak, ema-lubun boot adora Jeová ho unidade, maski sira mai husi fatin oioin. No Jeová nia povu koñesidu tanba sira laran-manas atu haklaken no hadomi malu. Neʼe hametin duni ita-nia fiar.​—Mt 24: 14; João 13:35. w19.09 p. 30 par. 16-17

Durante terus boot, ema sei hakfodak bainhira sira haree buat hotu neʼebé uluk sira hanoin katak dura ba nafatin komesa lakon. Sira sei “laran-susar tebetebes”, no taʼuk mate tanba sira tama iha tempu neʼebé susar liu hotu iha ema nia istória. (Sof 1:14, 15) Iha momentu neʼebá, moris sei sai susar liu no neʼe kona mós Jeová nia povu. Karik ita mós sei hasoru susar oioin tanba ita la sai parte ba mundu neʼe. Karik ita sei falta buat balu neʼebé ita presiza. “Atan laran-metin no matenek” prepara daudaun ita atu bele laran-metin nafatin durante terus boot. (Mt 24:45) Atan neʼe ajuda ita liuhusi dalan oioin, ezemplu ida mak ita-nia reuniaun boot ba loron tolu hahú husi tinan 2016 toʼo 2018. Programa sira-neʼe anima ita atu hametin hahalok sira neʼebé ita presiza nuʼudar Jeová nia loron besik daudaun. w19.10 p. 14 par. 2; p. 16 par. 10; p. 17 par. 12

Bainhira ita tolan ona ai-han ida, ita labele hili oinsá ai-han neʼe afeta ita-nia isin. Ai-han neʼebé diʼak bele halo ita iha saúde diʼak. Ai-han neʼebé la diʼak bele estraga ita-nia saúde. Karik ita la nota kedas rezultadu, maibé liutiha tempu balu ita bele nota ida-neʼe. Nuneʼe mós bainhira ita hili atividade halimar nian, ita bele hili buat neʼebé ita sei hatama iha ita-nia neon. Maibé depois neʼe, atividade halimar nian neʼebé ita hili bele fó influénsia ba ita-nia hanoin no sentimentu. Atividade halimar nian neʼebé diʼak halo ita sente kmaan, maibé atividade halimar nian neʼebé aat estraga ita. (Tgo 1:14, 15) Karik ita sei la nota kedas rezultadu husi atividade halimar nian neʼebé aat, maibé ikusmai ita sei nota ida-neʼe. Tan neʼe mak Bíblia fó avizu ba ita hodi dehan: “Buat naran deʼit neʼebé ema kari, nia mós sei koʼa ida-neʼe. Ema neʼebé kari hodi tuir hakarak isin nian sei koʼa mate husi ninia isin.” (Gal 6:7, 8) Importante tebes atu hasees an husi atividade halimar nian neʼebé hatudu sai buat sira neʼebé Jeová odi.​—Sal 97:10. w19.10 p. 30 par. 12-14

Jeová hatudu ninia domin ba ita hodi fó ninia Oan-Mane nuʼudar sakrifísiu. (João 3:16) Oinsá mak ita bele banati-tuir Jeová nia domin? Hodi haree irmaun-irmán ida-idak nuʼudar folin-boot, no mós ita kontente atu simu fali “bibi-malae neʼebé lakon dalan” maibé fila fali ba Jeová. (Sal 119:176; Lc 15:7, 10) Ita hatudu katak ita hadomi irmaun-irmán sira hodi fó tempu no forsa atu ajuda sira, liuliu bainhira sira presiza. (1 João 3:17) Jesus fó mandamentu ba ninia dixípulu sira atu hatudu domin neʼebé la hanoin an deʼit. (João 13:34, 35) Mandamentu neʼe foun tanba ita tenke hadomi ita-nia maluk fiar-naʼin hanesan Jesus hadomi ita. Neʼe la hanesan ho Ukun-Fuan neʼebé Maromak fó ba ema Izraél. Neʼe presiza duni domin neʼebé la hanoin an deʼit. Ita hadomi ita-nia irmaun-irmán sira liu fali hadomi ita-nia an rasik. Ita tenke hadomi sira toʼo prontu atu fó ita-nia moris ba sira, hanesan Jesus halo. w19.05 p. 4 par. 11-13

Atu bele simu ajuda husi espíritu santu, ita tenke halo orasaun beibeik hodi husu ida-neʼe. (Lc 11:13) Jesus nia ai-knanoik iha Lucas 11:5-9 ajuda ita atu haree tanbasá Jeová sei fó ninia espíritu santu ba ita. Mane iha ai-knanoik neʼe hakarak sai uma-naʼin neʼebé diʼak. Nia sente katak nia iha obrigasaun atu fó hahán ba bainaka neʼebé mai kalan-boot maibé nia la iha hahán. Jesus hatete katak mane neʼe nia viziñu ajuda tanba mane neʼe husu beibeik paun. Jesus hanorin saida ba ita? Se ema neʼebé la perfeitu prontu ajuda ninia viziñu neʼebé husu beibeik, sá tan ita-nia Aman iha lalehan neʼebé laran-diʼak, nia sei prontu atu ajuda sira neʼebé husu beibeik ninia espíritu santu. Tan neʼe, ita bele halo orasaun ho konfiansa katak Jeová sei hatán ba ita-nia orasaun atu husu ninia espíritu santu. (Sal 10:17; 66:19) Ita bele fiar katak maski Satanás kontinua koko ita, maibé ita bele tahan. w19.11 p. 13 par. 17-19

Jesus hatene katak dala ruma nia no ninia apóstolu sira presiza deskansa. Maski nuneʼe, ema barak iha tempu neʼebá no mós ohin loron mak hanesan ho mane riku iha Jesus nia ai-knanoik. Mane neʼe hatete ba ninia an: “Hakmatek bá, han, hemu no halo kontente ó-nia an bá.” (Lc 12:19; 2 Tim 3:4) Nia hanoin katak deskansa no ksolok mak buat neʼebé importante liu. Maibé Jesus no ninia apóstolu sira la haree deskansa no ksolok nuʼudar buat neʼebé importante liu. Ohin loron, ita hakaʼas an atu banati-tuir Jesus hodi uza ita-nia tempu feriadu atu deskansa no mós atu haklaken no tuir reuniaun sira. Tuir loloos, ita haree haklaken no reuniaun nuʼudar buat neʼebé importante tebes, tan neʼe ita hakaʼas an atu hola parte beibeik iha atividade sira-neʼe. (Ebr 10:24, 25) Bainhira ita bá feriadu, ita nafatin tuir reuniaun sira. No ita buka oportunidade atu koʼalia kona-ba Bíblia ho ema neʼebé ita hasoru.​—2 Tim 4:2. w19.12 p. 7 par. 16-17

Jeová fó liberdade ba ita atu hili oinsá ita halaʼo ita-nia moris. Nia hanorin ita oinsá atu halo desizaun diʼak, no nia ajuda ita atu hetan susesu bainhira ita foti desizaun neʼebé halo nia kontente. (Sal 119:173) Bainhira ita aplika matenek neʼebé ita aprende husi Bíblia, ita sei halo desizaun neʼebé diʼak. (Ebr 5:14) Maski ita halo desizaun diʼak, maibé dala ruma susar ba ita atu kumpre buat neʼebé ita hahú ona. Hanoin toʼok ezemplu balu: Irmaun joven ida deside atu lee Bíblia tomak. Nia lee Bíblia ba semana balu, maibé depois neʼe nia para. Irmán ida deside atu serbí nuʼudar pioneiru maibé nia demora atu komesa. Grupu katuas halo desizaun atu hakaʼas an vizita ema iha kongregasaun, maibé liutiha fulan balu sira seidauk komesa. Situasaun sira-neʼe la hanesan, maibé iha buat ida neʼebé hanesan. Sira halo desizaun maibé la halo tuir. w19.11 p. 26 par. 1-2

Jesus kompara ita-nia tempu ho “Noé nia tempu” no ita hatene ho klaru katak ita moris iha tempu neʼebé iha “problema barak neʼebé susar atu tahan”. (Mt 24:37; 2 Tim 3:1) Tanba razaun neʼe mak feen-laʼen balu deside atu la iha oan hodi nuneʼe sira bele uza sira-nia tempu atu halo serbisu barak liután ba Jeová. Bainhira deside atu iha oan ka lae no iha oan naʼin-hira, feen-laʼen neʼebé matenek sei ‘sura sira-nia osan’. (Lc 14:28, 29) Inan-aman neʼebé iha esperiénsia atu haboot oan hatete katak haboot oan gasta osan barak no mós presiza uza tempu no enerjia barak. Tan neʼe, importante tebes ba feen-laʼen atu hanoin kona-ba pergunta sira hanesan: ‘Ami naʼin-rua presiza serbisu atu bele tau matan ba família nia presiza ka lae? Ami naʼin-rua iha hanoin neʼebé hanesan kona-ba buat neʼebé ami-nia família presiza ka lae? Se ami naʼin-rua presiza serbisu, sé mak sei tau matan ba ami-nia oan? Ami hakarak sé atu fó influénsia ba sira-nia hahalok no hanoin?’ Se feen-laʼen koʼalia hamutuk pergunta sira-neʼe, sira aplika liafuan iha eskritura ba ohin. w19.12 p. 23 par. 6-7

Apóstolu Paulo hasoru situasaun oioin neʼebé lori perigu ba ninia moris. (2 Kor 11:23-28) Nia tenke tahan ‘ai-tarak iha isin’, karik neʼe refere ba problema saúde. (2 Kor 12:7) No nia mós tenke tahan laran-kanek tanba Demas neʼebé uluk serbisu ho nia, husik nia “tanba [Demas] hadomi mundu neʼe”. (2 Tim 4:10) Paulo mak ema Kristaun neʼebé iha esperansa atu bá lalehan, nia aten-brani no la hanoin an deʼit hodi ajuda ema seluk, maski nuneʼe dala ruma nia mós sente laran-kraik. (Rom 9:1, 2) Paulo simu kmaan no apoia neʼebé nia presiza. Oinsá? Jeová uza ninia espíritu santu atu hametin nia. (2 Kor 4:7; Flp 4:13) Jeová mós fó kmaan ba nia liuhusi maluk Kristaun sira. Paulo dehan katak ninia maluk serbisu-naʼin balu “sai ona ajuda-naʼin neʼebé fó kmaan boot” ba nia. (Kol 4:11) Ninia maluk sira-neʼe balu mak Aristarco, Tíkiko, no Marcos. Sira hametin Paulo no ajuda nia atu tahan. w20.01 p. 8 par. 2-3

Jesus fó sai katak susar atu esplika ba ema neʼebé Maromak la hili kona-ba saida mak Kristu nia alin sira sente bainhira “moris dala ida tan”, ka “moris husi Maromak nia espíritu”. (João 3:3-8) Oinsá mak ema Kristaun nia hanoin troka bainhira Maromak hili sira atu bá lalehan? Antes Jeová hili ema Kristaun sira-neʼe, sira hafolin esperansa atu moris ba nafatin iha rai. Sira hein namanas ba tempu neʼebé Jeová sei halakon buat aat hotu no halo rai neʼe sai paraízu. Karik sira imajina kona-ba hasoru fali sira-nia família ka belun neʼebé mate ona. Maibé bainhira Maromak hili sira atu bá lalehan, sira-nia hanoin komesa troka. Tanbasá? Neʼe laʼós tanba sira la gosta ona esperansa atu moris iha rai. Sira la troka sira-nia hanoin tanba estrese ka hasoru susar. Sira la derrepente deʼit sente katak moris iha rai sei halo sira baruk. Maibé, Jeová uza ninia espíritu santu atu troka dalan neʼebé sira hanoin no esperansa neʼebé sira hafolin. w20.01 p. 22 par. 9-11

Tuir Moisés nia Ukun-Fuan, mane neʼebé iha responsabilidade sei tesi-lia ba buat neʼebé liga ho adorasaun no mós tesi-lia ba krime ruma. Maibé tuir “Kristu nia ukun-fuan,” katuas sira-nia knaar mak atu tau matan ba problema neʼebé liga deʼit ho adorasaun. (Gal 6:2) Sira rekoñese katak governu mak simu responsabilidade husi Maromak atu tesi-lia ba kazu krime sira. Neʼe inklui podér atu fó kastigu hanesan selu multa ka hatama komarka. (Rom 13:2-4) Bainhira ema halo sala sériu iha kongregasaun laran, saida mak katuas sira presiza hanoin? Sira uza Eskritura atu tetu kona-ba problema neʼe no halo desizaun. Sira hanoin-hetan katak domin mak fundasaun ba Kristu nia ukun-fuan. Domin book katuas sira atu hanoin: Saida mak ami tenke halo atu ajuda ema neʼebé sai vítima ba hahalok sala sériu iha kongregasaun laran? Kona-ba ema neʼebé halo sala, domin book katuas sira atu hanoin: Nia arrepende an ka lae? Ami bele ajuda nia atu iha fali relasaun diʼak ho Maromak ka lae? w19.05 p. 7 par. 23-24

Jesus rekoñese katak ninia Aman mak Hun ba ninia moris no ajuda nia atu kontinua moris. Jesus tau fiar tomak ba ninia Aman, no Jeová tau matan ba Jesus nia presiza isin nian. Importante liu mak Jeová tau matan ba Jesus nia presiza espirituál. (Mt 4:4) Jeová mós tau matan ba ita-nia presiza espirituál. Liuhusi ninia Liafuan, nia hatudu sai lia-loos kona-ba ninia an, ninia hakarak, kona-ba tanbasá nia kria ita, no kona-ba futuru. Bainhira ita foin aprende lia-loos, nia hatudu interese ba ita ida-idak liuhusi ita-nia inan-aman ka mestre Bíblia neʼebé ajuda ita atu koñese nia. No nia kontinua apoia ita liuhusi katuas kongregasaun no irmaun-irmán sira neʼebé maduru. Liután neʼe, Jeová hanorin ita no irmaun-irmán sira liuhusi reuniaun sira. Liuhusi dalan sira-neʼe no dalan seluk tan, Jeová hatudu ninia interese ba ita hotu nuʼudar Aman ida.​—Sal 32:8. w20.02 p. 3 par. 8; p. 5 par. 13

Se ita laran-moras ba malu, neʼe sei halakon dame. Ita presiza fokit sai tiha laran-moras husi ita-nia laran no mós kuidadu atu la halo ema seluk sai laran-moras. Oinsá ita bele ajuda ema seluk kontra hasoru laran-moras, no oinsá ita bele haburas dame? Ita-nia hanoin no hahalok bele fó influénsia ba ema seluk. Mundu hakarak ita atu gaba an kona-ba buat neʼebé ita iha. (1 João 2:16) Maibé hahalok neʼe haburas laran-moras. Ita bele ajuda ema seluk atu la sai laran-moras hodi la koʼalia beibeik kona-ba buat neʼebé ita iha ka ita-nia planu atu sosa buat ruma. Dalan seluk atu la halo ema seluk laran-moras mak hodi iha hanoin neʼebé loos kona-ba ita-nia priviléjiu iha kongregasaun. Se ita dada atensaun demais ba ita-nia priviléjiu, karik ita sei halo ema seluk sente laran-moras. Maibé hodi hatudu interese ba ema seluk no rekoñese buat diʼak neʼebé sira halo, ita sei ajuda sira sente kontente ho buat neʼebé sira iha no haburas unidade no dame iha kongregasaun. w20.02 p. 18 par. 15-16

Ita bele aprende kona-ba Jeová liuhusi ninia kriasaun. (Apok 4:11) Medita kona-ba ai-horis no animál neʼebé Jeová kria ona no hanoin kona-ba oinsá buat sira-neʼe hatudu sai Jeová nia matenek. Aprende kona-ba dalan furak neʼebé Jeová kria Ita-nia isin-lolon. (Sal 139:14) No hanoin kona-ba oinsá Jeová kria loro-matan neʼebé iha kbiit boot. Ita-nia loro-matan mak fitun ida husi fitun biliaun ba biliaun. (Isa 40:26) Bainhira Ita halo nuneʼe, Ita sei respeitu Jeová liután. Importante atu hatene katak Jeová mak matenek no iha kbiit boot. Maibé atu hametin Ita-nia domin ba Jeová no atu sai ninia belun, Ita presiza koñese nia liután. Ita presiza fiar katak Jeová hadomi tebes Ita. Hanoin-hetan katak ‘se Ita buka nia, Ita sei hetan nia’. (1 Krón 28:9) Tuir loloos, Ita estuda Bíblia tanba Jeová ‘dada Ita besik’ ba nia. (Jer 31:3) Bainhira Ita hafolin liután buat hotu neʼebé Jeová halo ona ba Ita, Ita-nia domin ba nia sei sai boot liután. w20.03 p. 4 par. 6-7

Apóstolu Paulo hatudu ezemplu diʼak kona-ba tau uluk Maromak nia serbisu iha ninia moris. Bainhira nia iha Korinto durante ninia viajen nuʼudar misionáriu ba dala segundu, nia iha osan uitoan deʼit no tenke serbisu atu halo tenda. Nia halo serbisu neʼe atu bele apoia nia hodi haklaken liafuan diʼak ba ema Korinto no “la simu kolen” husi sira. (2 Kor 11:7) Maski Paulo tenke halo serbisu atu manán osan, maibé nia kontinua tau uluk Maromak nia serbisu, no nia haklaken Sábadu-Sábadu. Kuandu Paulo nia situasaun troka, nia bele tau fokus liután ba serbisu haklaken. Nia “uza nia tempu tomak hodi haklaken Maromak nia liafuan no fó sasin ba ema Judeu sira atu hatudu katak Jesus mak Kristu”. (Após 18:3-5; 2 Kor 11:9) Liutiha neʼe, bainhira Paulo sai dadur iha ninia uma rasik iha Roma ba tinan rua, nia haklaken ba ema neʼebé vizita nia no nia hakerek karta sira. (Após 28:16, 30, 31) Paulo lakohi husik buat ida sai importante liu fali ninia serbisu haklaken. w19.04 p. 4 par. 9