Marsu

Domin ba Maromak no ninia Liafuan fó aten-brani mai ita atu halo tuir Jeová bainhira ita-nia família ka belun obriga ita atu hola parte iha toman neʼebé kontra Bíblia kona-ba ema mate. Karik sira koko hamoe ita hodi dehan katak ita la hadomi ka la respeitu ema neʼebé mate ona. Ka karik sira dehan katak ita-nia hahalok sei halo ema mate neʼe fó kastigu ba sira neʼebé moris. Iha nasaun ida iha Karaíba, ema fiar katak bainhira ema ida mate, ninia “klamar” bá-mai no fó kastigu ba ema neʼebé halo aat ba nia no mós bele hamosu problema iha komunidade. Iha Áfrika, baibain ema nia kostume mak atu taka espellu sira iha mate uma no fila foto sira ba didin. Tanbasá? Ema balu dehan katak ema mate labele haree sira-nia an iha buat sira-neʼe! Nuʼudar Jeová nia atan, ita lakohi fiar hanorin falsu ka hola parte iha toman neʼebé habelar Satanás nia lia-bosok!​—1 Kor 10:21, 22. w19.04 p. 16 par. 11-12

Jesus hanorin prinsípiu sira neʼebé ajuda ninia dixípulu sira atu hatudu hahalok neʼebé justu ba ema seluk. Porezemplu, Jesus hanorin katak se ita hakarak ema atu hatudu hahalok neʼebé justu ba ita. Ita mós tenke hatudu hahalok hanesan neʼe ba sira. Karik neʼe sei book sira atu hatudu hahalok neʼebé justu ba ita. Maibé oinsá se ema trata aat ita? Jesus mós hanorin ninia dixípulu sira atu fiar katak ema neʼebé halerik ba Jeová loron-kalan sei “hetan duni justisa”. (Lc 18:6, 7) Liafuan neʼe mak promesa ida husi Ita-nia Maromak. Nia hatene susar neʼebé ita hasoru iha loron ikus sira-neʼe, no nia sei halo ita hetan justisa iha tempu neʼebé loos. (2 Tes 1:6) Bainhira ita halo tuir prinsípiu neʼebé Jesus hanorin, ita sei hatudu hahalok neʼebé justu ba ema seluk. No se ita mak vítima ba ema seluk nia hahalok la justu iha Satanás nia mundu neʼe, ita bele sente kmaan tanba hatene katak Jeová sei halo ita hetan justisa. w19.05 p. 5 par. 18-19

Se Ita mak eskola oan, karik Ita-nia kolega eskola goza ita tanba la kanta inu nasionál. Ita hakarak esplika Bíblia nia hanorin ba sira. Maibé karik Ita sente la iha matenek atu halo nuneʼe. Entaun Ita presiza halo estuda mesak. Ita iha razaun rua atu halo nuneʼe: (1) atu hametin Ita-nia fiar katak Ita tenke ketak nafatin husi mundu neʼe no (2) atu aumenta Ita-nia matenek atu esplika Ita-nia fiar. (João 17:16) Husu ba Ita-nia an: ‘Tanbasá mak haʼu-nia kolega sira dehan katak sira tenke kanta inu nasionál?’ Tuirmai halo riset kona-ba neʼe hodi uza ita-nia publikasaun sira. Karik Ita sei hakfodak tanba fasil deʼit atu esplika kona-ba Ita-nia fiar. Ema barak fiar katak sira tenke kanta inu nasionál tanba ema seluk haruka sira atu halo nuneʼe. Se Ita buka-hetan faktu ida ka rua no esplika neʼe ba ema seluk, karik Ita bele ajuda ema neʼebé hakarak atu aprende lia-loos.​—Kol 4:6. w19.05 p. 29 par. 13

Bainhira profeta Elias halai husi ema neʼebé hakarak oho nia, nia laran-kraik tebes no husu atu mate deʼit. Jeová haruka ninia anju ida atu vizita Elias. Anju neʼe fó buat neʼebé Elias presiza. Nia fó Elias ai-han no anima nia atu han. (1 Reis 19:5-8) Istória neʼe hanorin ita lia-loos ida katak dala ruma, buat kiʼik neʼebé ita halo, fó ajuda boot ba ema neʼebé simu ita-nia ajuda. Karik ita bele fó ai-han, prezente simples, ka hakerek karta neʼebé hatudu katak ita hanoin no hadomi sira. Maski la fasil ba ita atu koʼalia ho ema kona-ba sira-nia sentimentu, maibé ita nafatin bele halo buat ruma atu ajuda sira. Liuhusi milagre, Jeová ajuda Elias atu laʼo dook toʼo Foho Horeb, dook husi ema sira neʼebé koko atu oho nia. Saida mak ita bele aprende? Se ita hakarak fó kmaan ba sira neʼebé sai vítima ba abuzu seksuál, karik diʼak atu ajuda uluk sira atu sente seguru liu atu koʼalia iha uma ka iha Reuniaun-Fatin. w19.05 p. 16 par. 11; p. 17 par. 13-14

Karik Ita lee daudaun livru Zacarias kapítulu 12, neʼebé fó sai nanis kona-ba Mesias nia mate. (Zac 12:10) Iha versíkulu 12, Ita lee katak “Natan nia família” sei tanis makaʼas ba Mesias nia mate. Duké lee liu deʼit versíkulu sira-neʼe, Ita bele para no husu ba Ita-nia an: ‘Natan nia família iha ligasaun saida ho Mesias?’ Ita komesa halo riset. Referénsia marjinál lori Ita ba 2 Samuel 5:13, 14, iha neʼebá Ita aprende katak Natan mak Liurai David nia oan-mane ida. Referénsia marjinál ida tan lori Ita ba Lucas 3:23, 31, neʼebé hatudu katak Jesus mai husi Natan nia liña jerasaun liuhusi Maria. Tuirmai Ita hakarak atu buka-hatene liután. Ita hatene ona katak Bíblia fó sai nanis katak Jesus sei mai husi David nia liña jerasaun. (Mt 22:42) Maibé hanoin-hetan David iha oan-mane naʼin-20 liu. Tan neʼe ita admira tebes atu haree Zacarias fó sai nanis kona-ba Natan nia umakain neʼebé sei tanis bainhira Jesus mate. w19.05 p. 30 par. 17

Saida mak ita presiza halo? Hodi badinas estuda mesak, ita bele prova ba ita-nia an katak buat neʼebé ita aprende husi Bíblia mak lia-loos. Ita bele fiar metin katak Jeová nia morál mak loos. No hanesan ai-hun neʼebé iha abut metin, ita sei hamriik metin, ita-nia fiar mós sei sai metin. (Kol 2:6, 7) Ita rasik deʼit mak bele hametin Ita-nia fiar. Tan neʼe, Ita presiza hafoun Ita-nia hanoin no laran. Halo orasaun beibeik, harohan ba Maromak atu fó ninia espíritu santu. Hanoin kleʼan no kontinua buka-hatene kona-ba Ita-nia hanoin no motivu. Hili didiʼak Ita-nia belun no halibur ho ema sira neʼebé bele ajuda Ita troka Ita-nia hanoin. Hodi halo nuneʼe, Ita sei proteje Ita-nia an husi Satanás nia mundu no sobu rahun “hanoin neʼebé sala no ideia hotu neʼebé foti an kontra koñesimentu kona-ba Maromak”.​—2 Kor 10:5. w19.06 p. 13 par. 17-18

Hanesan Rute neʼebé nafatin hamaluk Noemi, ita mós presiza kontinua fó apoiu ba sira neʼebé nia kaben mate. (Rute 1:16, 17) Paula hatete: “Depois haʼu-nia laʼen mate, ema barak mai atu ajuda no fó kmaan mai haʼu. Maibé liutiha tempu balu, sira sai okupadu ho sira-nia moris hanesan uluk. Maski nuneʼe, haʼu-nia moris la hanesan uluk ona. Se ema rekoñese katak ita triste nafatin no presiza apoiu maski fulan ka tinan barak liu tiha ona, neʼe sei ajuda tebes.” Ema ida-idak la hanesan, ema balu lalais atu sai toman ho situasaun foun. Maibé ema seluk, bainhira halo atividade balu neʼebé uluk sira halo hamutuk ho sira-nia kaben, sira sempre hanoin fali sira-nia kaben neʼebé mate ona. Ema ida-idak triste iha dalan neʼebé la hanesan. Hanoin-hetan nafatin katak Jeová fó ita priviléjiu no responsabilidade atu apoia ema neʼebé triste tanba sira-nia kaben mate. w19.06 p. 24 par. 16

Bainhira governu bandu, ita tenke hatene tempu neʼebé ita presiza “atu nonook”. (Ecle 3:7) Ita tenke proteje informasaun neʼebé segredu, hanesan irmaun-irmán sira-nia naran, fatin ba reuniaun sira, oinsá ita haklaken, no oinsá ita simu ai-han espirituál. Ita lakohi atu fó sai informasaun sira-neʼe ba autoridade sira. No mós ita lakohi fahe informasaun sira-neʼe ba belun ka família iha ita-nia rai ka rai seluk. Se ita la kuidadu, ita sei tau ita-nia irmaun-irmán sira iha perigu laran. Keta husik problema kiʼik atu haketak ita. Satanás hatene katak umakain ida sei la metin se ninia ema funu malu. (Mc 3:24, 25) Nia sei kontinua koko atu halo ita haketak malu no nia hein katak ita sei funu malu duké funu ho nia. Ema Kristaun neʼebé maduru mós presiza kuidadu. Se ita hakaʼas an atu hadiʼa problema ho ita-nia irmaun-irmán sira, ita sei la husik buat ida atu sobu ita-nia unidade.​—Kol 3:13, 14. w19.07 p. 11-12 par. 14-16

Dala barak, ema simu mensajen neʼebé ita haklaken, laʼós tanba ita-nia liafuan, maibé tanba dalan neʼebé ita hatoʼo. Sira gosta bainhira ita hatudu laran-diʼak, respeitu, no interese ba sira. Ita la obriga sira atu rona ba ita. Maibé, ita koko atu komprende tanbasá sira la iha relijiaun no atu komprende sira-nia sentimentu. Porezemplu, bainhira Paulo koʼalia ho ema Judeu, nia uza Eskritura. Maibé, bainhira nia koʼalia ba ema Gregu iha Areópago, nia la dehan katak nia foti liafuan sira husi Bíblia. (Após 17:2, 3, 22-31) Oinsá mak ita bele banati-tuir Paulo? Se Ita hasoru ema neʼebé la fiar Bíblia, diʼak atu la dehan katak Ita-nia liafuan mai husi Bíblia. Se Ita nota katak ema ida sente la diʼak bainhira ema seluk haree nia lee Bíblia hamutuk ho Ita, koko atu hatudu eskritura iha dalan neʼebé la dada ema nia atensaun, hanesan liuhusi sasán eletróniku. w19.07 p. 21 par. 5-6

Satanás ho matenek tenta ema Izraél atu adora estátua. Nia hatene katak ema Izraél presiza ai-han, tan neʼe nia aproveita ida-neʼe atu book sira halo tuir nia. Bainhira ema Izraél tama ba rai neʼebé Maromak promete, sira presiza aprende dalan foun atu halo toʼos. Uluk kuandu iha rai-Ejitu, ema Izraél uza bee husi Mota Nilo atu rega sira-nia toʼos. Maibé iha rai neʼebé Maromak promete, la iha mota boot, tan neʼe atu halo toʼos sira presiza sadere ba udan-been no mós mahobeen. (Deut 11:10-15; Isa 18:4, 5) Entaun, ema Izraél presiza aprende dalan foun atu halo toʼos. Maibé tanbasá mak Jeová fó avizu kona-ba adorasaun ba maromak falsu sira bainhira koʼalia daudaun kona-ba halo toʼos? Jeová hatene katak ninia povu sei hetan tentasaun atu aprende halo toʼos husi povu jentiu sira neʼebé hela haleʼu sira no toʼos-naʼin Kanaan adora maromak Baal no sira-nia adorasaun neʼe fó influénsia ba sira-nia hanoin.​—Núm 25:3, 5; Juís 2:13; 1 Reis 18:18. w19.06 p. 3 par. 4-6

Bainhira apóstolu Paulo, Silas, Lucas, no Timóteo toʼo iha sidade Filipe neʼebé Roma mak ukun, sira hetan ema barak neʼebé hatudu interese ba liafuan diʼak kona-ba Maromak nia Ukun. Irmaun naʼin-haat neʼe ajuda harii kongregasaun, no dixípulu hotu komesa halibur hamutuk karik iha Lídia nia uma. Nia mak fiar-naʼin ida neʼebé laran-luak tebes. (Após 16:40) Lakleur deʼit kongregasaun foun neʼe hasoru susar. Satanás book ema atu odi lia-loos no kontra makaʼas serbisu haklaken neʼebé ema Kristaun laran-metin sira-neʼe halo. Ema kaer Paulo no Silas, baku sira ho ai, no hatama sira ba komarka. Bainhira sira sai husi komarka, sira vizita dixípulu foun sira no fó aten-brani ba sira. Tuirmai Paulo, Silas, no Timóteo husik sidade neʼe maibé karik Lucas hela nafatin. Saida mak irmaun-irmán foun sira halo? Jeová ajuda sira liuhusi ninia espíritu, tan neʼe fiar-naʼin foun sira-neʼe kontinua serbí Jeová ho laran-manas. (Flp 2:12) Paulo iha razaun diʼak atu sente orgullu kona-ba fiar-naʼin sira-neʼe! w19.08 p. 8 par. 1-2

Foin daudauk ita muda uma ka lae? Dala ruma atu muda mak karun tebes no fasil deʼit ba ita atu debe osan. Tan neʼe keta empresta osan atu sosa sasán neʼebé Ita ladún presiza. (Prov 22:3) Bainhira hasoru situasaun neʼebé halo ita neon-susar hanesan tau matan ba família neʼebé moras, neʼe bele halo susar ba ita atu deside osan hira mak ita presiza empresta. Iha situasaun hanesan neʼe, hanoin-hetan katak “orasaun no harohan” bele ajuda Ita atu halo desizaun ho matenek. Jeová bele hatán ba Ita-nia orasaun hodi fó Ita dame neʼebé sei ‘proteje Ita-nia laran no kbiit atu hanoin’, atu nuneʼe Ita bele hanoin ho kalma. (Flp 4:6, 7; 1 Ped 5:7) Habelun ho ema neʼebé fó influénsia diʼak. Fahe Ita-nia sentimentu no esperiénsia ba belun diʼak sira, liuliu sira neʼebé karik hasoru situasaun hanesan ho Ita. Halo nuneʼe bele ajuda Ita atu sente kontente. (Ecle 4:9, 10) Karik Ita iha ona belun iha fatin neʼebé antes ita muda. w19.08 p. 22 par. 9-10

Tanbasá Jeová liga ninia funu ikus ho Megido? Iha tempu antigu, ema halo funu barak iha Megido no iha Rai-Tetuk Jezreel neʼebé besik husi Megido. Dala ruma, Jeová ajuda ninia povu atu manán funu sira-neʼe. Porezemplu, “besik mota iha Megido”, Maromak ajuda Juís Barac husi Izraél atu manán ema Kanaan nia tropa no mós sira-nia xefe Sísera. Barac no profeta Débora fó agradese ba Jeová tanba ajuda sira manán. Sira kanta: “Husi lalehan mak fitun sira halo funu . . . hasoru Sísera. . . . Husik Ita-nia inimigu hotu lakon mohu, oh Jeová, maibé halo sira neʼebé hadomi Ita sai hanesan bainhira loro-matan saʼe no fó naroman boot.” (Juís 5:19-21, 31) Iha Armagedon, Maromak nia inimigu sira mós sei lakon, maibé ema neʼebé hadomi Maromak sei hetan salvasaun. Maski nuneʼe, iha diferensa boot entre funu rua neʼe. Iha Armagedon, Maromak nia povu la hola parte iha funu neʼe. Sira mós sei la kaer armas. Sira iha kbiit tanba sira “kalma nafatin no tau fiar” ba Jeová no ninia tropa sira husi lalehan.​—Isa 30:15; Apok 19:11-15. w19.09 p. 9 par. 4-5

Dalan ida atu hakbesik ba Jesus mak hodi hakaʼas an atu aprende kona-ba ninia liafuan no hahalok. (Lc 1:1-4) Ita rasik presiza estuda kona-ba Jesus. Ita mós hakbesik ba Jesus bainhira ita halo desizaun atu hetan batizmu no sai Kristu nia dixípulu. Dalan ida tan atu hakbesik ba Jesus mak hodi hakbesik ba katuas kongregasaun sira se ita presiza ajuda. Mane sira-neʼe mak hanesan prezente neʼebé Jesus fó atu tau matan ba ninia bibi-malae. (Éf 4:7, 8, 11; João 21:16; 1 Ped 5:1-3) Ita tenke hakaʼas an atu husu ajuda husi sira. Ita labele hein katak katuas sira hatene ita-nia hanoin no presiza maski ita la fó-hatene sira. Irmaun ida naran Julian dehan: “Haʼu husu ajuda, no katuas sira-nia vizita mak hanesan prezente diʼak liu neʼebé haʼu simu.” Hanesan katuas naʼin-rua neʼebé vizita Julian, katuas sira mós bele ajuda ita atu hatene “Kristu nia hanoin”, katak atu komprende no banati-tuir Kristu nia hanoin no hahalok. (1 Kor 2:16; 1 Ped 2:21) Sira-nia ajuda mak hanesan prezente furak ba ita. w19.09 p. 21 par. 4-5

Iha Bíblia, ita bele lee kona-ba fiar-naʼin mane no feto sira neʼebé espíritu santu mak dirije, maibé sira la sai parte ba ema naʼin-144.000. Ema sira-neʼe ida mak João Batista. (Mt 11:11) No seluk tan mak David. (Após 2:34) Sira no mós ema barak tan sei hetan moris-hiʼas iha paraízu iha rai. Sira hotu, hamutuk ho ema-lubun boot sei iha oportunidade atu hatudu laran-metin ba Jeová no apoia ninia direitu atu ukun. Agora mak primeiravés Maromak halibur ema millaun ba millaun husi nasaun hotu atu adora nia ho unidade. Maski ita-nia esperansa mak atu moris iha lalehan ka rai, ita presiza ajuda ema barak liután atu sai parte ba ema-lubun boot husi “bibi-malae seluk”. Lakleur tan, Jeová sei hamosu terus boot neʼebé sei halakon ema nia governu no mós relijiaun sira neʼebé haterus ema. Ema-lubun boot iha priviléjiu boot atu serbí Jeová ba nafatin iha rai.​—Apok 7:14. w19.09 p. 31 par. 18-19

Nuʼudar Satanás nia sistema besik ona atu remata, ita hatene katak ita sei hetan terus barak liután neʼebé koko ita-nia laran-metin ba Maromak no ninia Ukun. Karik ema sei kontinua goza ita. Karik neʼe akontese tanba ita neutrál iha Satanás nia mundu neʼe. Ita tenke hametin ita-nia laran-metin agora atu nuneʼe ita bele laran-metin nafatin durante terus boot. Durante terus boot, sei iha mudansa kona-ba irmaun sira neʼebé dirije ita iha mundu. Iha tempu neʼebá, Jesus nia alin hotu neʼebé sei iha rai sei saʼe ba lalehan atu hola parte iha funu Armagedon. (Mt 24:31; Apok 2:26, 27) Neʼe katak la iha tan Grupu Administradór hamutuk ho ita iha rai. Maibé, ema-lubun boot sei nafatin organiza an ho didiʼak. Irmaun sira neʼebé iha esperiénsia husi bibi-malae seluk mak sei dirije ita. Ita presiza hatudu laran-metin hodi apoia irmaun sira-neʼe no halo tuir matadalan neʼebé sira simu husi Maromak. Ita-nia salvasaun depende ba ida-neʼe! w19.10 p. 17 par. 13-14

Noemi mak feto laran-metin ida neʼebé hadomi Jeová. Maibé depois ninia laʼen no oan-mane naʼin-rua mate, nia hakarak atu troka ninia naran sai fali “Mara” neʼebé signifika “Moruk”. (Rute 1:3, 5, 20, nota, 21) Noemi nia feto-foun Rute, nafatin hamaluk nia iha susar laran. Rute laʼós deʼit ajuda Noemi, maibé nia mós koʼalia hodi fó kmaan ba Noemi. Rute hatudu ninia domin no apoia Noemi liuhusi liafuan simples neʼebé mai husi laran. Bainhira ita-nia irmaun ka irmán nia kaben mate, nia presiza ita-nia apoiu. Feen-laʼen mak hanesan ai-hun rua neʼebé moris besik malu. Tinan ba tinan, sira-nia abut bobar metin ba malu. Bainhira ai-hun ida mate, ida-neʼe sei fó impaktu ba ai-hun ida seluk. Nuneʼe mós bainhira ema ida nia kaben mate, ema neʼe iha sentimentu triste oioin ba tempu kleur. w19.06 p. 23 par. 12-13

Ita presiza kontrola atividade halimar saida mak ita hili, no mós kontrola tempu neʼebé ita uza. Se lae, karik ita sei uza tempu barak liu atu halo atividade halimar nian duké serbí Jeová. Entaun, buka-hatene tempu neʼebé Ita uza. Durante semana ida koko hakerek iha Ita-nia kalendáriu tempu neʼebé Ita uza atu haree televizaun, uza internét, no halimar game iha Ita-nia telemovel. Se Ita sente katak Ita uza tempu barak liu, diʼak atu halo oráriu. Planu atu halo uluk buat importante liu, no tuirmai fahe tempu atu halo atividade halimar nian. Depois neʼe, husu Jeová nia ajuda atu kumpre Ita-nia planu. Hodi halo nuneʼe, Ita sei iha tempu no enerjia atu estuda Bíblia mesak, halaʼo adorasaun família, tuir reuniaun, no serbí Jeová liuhusi haklaken no hanorin ema seluk. Karik Ita mós sei la fó sala ba Ita-nia an kona-ba tempu neʼebé Ita uza atu halo atividade halimar nian. w19.10 p. 30 par. 14, 16; p. 31 par. 17

Maizumenus iha tinan 55 EC, kongregasaun Korinto halo desizaun importante ida. Bainhira rona katak irmaun-irmán iha Jeruzalein no Judeia presiza ajuda, sira deside atu tau hamutuk kontribuisaun hodi ajuda sira. (1 Kor 16:1; 2 Kor 8:6) Maibé fulan balu liutiha, apóstolu Paulo rona katak kongregasaun ­Korinto la halo tuir sira-nia desizaun. Rezultadu mak karik sira-nia kontribuisaun sei la prontu tuir tempu atu bele lori ba Jeruzalein hamutuk ho kontribuisaun husi kongregasaun seluk. (2 Kor 9:4, 5) Kongregasaun Korinto halo ona desizaun diʼak, no Paulo gaba sira tanba sira iha fiar no hakarak atu hatudu laran-luak. Maibé nia mós presiza anima sira atu kumpre buat neʼebé sira hahú ona. (2 Kor 8:7, 10, 11) Sira-nia esperiénsia hanorin ita katak ema Kristaun neʼebé laran-metin mós dala ruma sente susar atu halo tuir desizaun diʼak neʼebé sira halo ona. Tanbasá? Tanba la perfeitu, karik ita demora. Ka situasaun ruma akontese no neʼe halo susar ba ita atu halo tuir.​—Ecle 9:11. w19.11 p. 26-27 par. 3-5

Hanesan eskudu boot bele proteje soldadu nia isin, nuneʼe mós fiar proteje Ita husi hahalok la morál, violénsia, no influénsia aat husi sistema aat neʼe. Nuʼudar ema Kristaun, ita tenke halo funu hasoru anju aat. (Éf 6:10-12) Oinsá mak Ita hatene katak Ita-nia fiar metin ona atu bele tahan bainhira hetan koko? Primeiru, Ita tenke halo orasaun atu husu Maromak nia ajuda. Tuirmai, Ita presiza uza Maromak nia Liafuan atu ajuda haree Ita-nia an hanesan Maromak ­haree Ita. (Ebr 4:12) Bíblia hatete: “Tau fiar ba Jeová ho ó-nia laran tomak, no labele sadere ba ó-nia matenek rasik.” (Prov 3:5, 6) Hanoin kona-ba situasaun ruma neʼebé foin lalais Ita hasoru no saida mak Ita halo. Porezemplu, Ita hasoru ona susar ekonomia ka lae? Iha tempu neʼebá, Ita hanoin-hetan ka lae Jeová nia promesa iha Ebreu 13:5 neʼebé dehan: “Haʼu sei nunka husik ó, no haʼu sei nunka fila kotuk ba ó”? Promesa neʼe halo Ita iha konfiansa katak Jeová bele ajuda Ita ka lae? Se Ita halo nuneʼe, neʼe hatudu katak Ita tau matan didiʼak ba Ita-nia eskudu fiar nian. w19.11 p. 14 par. 1, 4

Inan no mós aman presiza uza tempu no enerjia atu tau matan ba oan ida-idak. Tan neʼe, se feen-laʼen iha oan barak iha tempu badak nia laran, susar ba sira atu fó atensaun ba oan ida-idak. Inan-aman balu neʼebé iha oan barak hatete katak sira sente susar duni. Inan ida karik sente kole tebetebes iha dalan fíziku no mós emosaun. Karik nia bele sente kole tebes toʼo la iha tan enerjia atu estuda, halo orasaun, no haklaken beibeik. Karik susar mós ba nia atu tau atensaun bainhira tuir reuniaun no hetan benefísiu husi reuniaun. Laʼen neʼebé hadomi ninia feen, sei hakaʼas an atu apoia ninia feen iha reuniaun-fatin no mós iha uma bainhira sira-nia oan presiza hetan atensaun. Porezemplu, nia bele ajuda ninia feen atu halo serbisu uma-laran nian. Nia sei hakaʼas an atu halaʼo Adorasaun Família nian semana-semana. No nia sei haklaken beibeik hamutuk ho ninia família. w19.12 p. 24 par. 8

Ema Izraél hetan benefísiu saida husi Tinan Livre nian? Imajina toʼok, ema Izraél ida monu ba debe boot no tenke faʼan ninia rai atu selu fali debe. Durante Tinan Livre nian, nia bele hetan fali ninia rai. Nuneʼe nia bele “fila fali ba rai neʼebé [nia] simu ona nuʼudar liman-rohan” no tuirmai rai neʼe mós bele sai liman-rohan ba ninia oan. Imajina mós mane ida monu ba debe boot no tenke faʼan ninia oan ka ninia an nuʼudar atan hodi bele selu debe. Durante Tinan Livre nian, atan neʼe tenke “fila fali ba [ninia] família”. (Lev 25:10) Entaun, atan hotu iha esperansa atu sai livre. Liután neʼe Jeová dehan: “La iha ema ida iha imi-nia leet mak sei sai kiak, tanba Jeová sei haraik duni bensaun ba imi iha rai neʼebé Jeová, imi-nia Maromak, sei fó ba imi atu foti nuʼudar imi-nia liman-rohan.” (Deut 15:4) Ohin loron mundu la hanesan neʼe, baibain ema riku sai riku liután no ema kiak sai kiak liután. w19.12 p. 8-9 par. 3-4

Bainhira Jesus hasoru tentasaun, nia halo orasaun “ho lian makaʼas no ho matan-been”. (Ebr 5:7) Ninia orasaun hatudu katak nia laran-metin ba Jeová no ida-neʼe ajuda nia atu halo tuir ninia Aman. Ba Jeová, Jesus nia orasaun mak hanesan insensu neʼebé morin. Dalan neʼebé Jesus halaʼo ninia moris halo kontente ninia Aman no apoia ninia Aman nia direitu atu ukun. Ita bele banati-tuir Jesus hodi hakaʼas an hatudu laran-metin ba Jeová no halo tuir nia. Bainhira ita hetan koko, halo orasaun atu husu Jeová nia ajuda tanba ita hakarak halo nia kontente. Ita hatene katak Jeová sei la simu ita-nia orasaun se ita halo buat neʼebé nia odi. Maibé se ita moris tuir Jeová nia matadalan sira, ita bele iha konfiansa katak Jeová sei haree ita-nia orasaun husi laran hanesan insensu neʼebé morin. No ita bele fiar katak ita-nia integridade no laran-metin sei halo ita-nia Aman iha lalehan kontente. w19.11 p. 21-22 par. 7-8

Iha tinan 1919, Jesus hili irmaun balu neʼebé iha ­esperansa atu bá lalehan hodi sai nuʼudar grupu neʼebé hanaran “atan laran-metin no matenek”. Atan neʼe dirije serbisu haklaken no ‘fó ai-han iha tempu loloos’ ba Kristu nia dixípulu sira. Satanás no ninia mundu hakaʼas an atu hapara atan neʼe nia serbisu. Se atan neʼe la simu ajuda husi Jeová, karik atan neʼe labele kontinua halo serbisu neʼe. Maski akontese funu mundiál dala rua, krize ekonomia, ema kontra makaʼas no trata aat Maromak nia povu, maibé atan laran-metin no matenek kontinua fó ai-han espirituál ba Kristu nia dixípulu sira iha rai. Hanoin toʼok kona-ba ai-han espirituál barak neʼebé ita simu ohin loron ho gratuitu iha língua 900 liu. Neʼe hatudu ho klaru katak Jeová apoia atan neʼe. Serbisu haklaken mós hatudu katak Jeová haraik bensaun ba atan neʼe, tanba ema haklaken liafuan diʼak “iha mundu tomak”.​—Mt 24:14. w19.11 p. 24 par. 15-16

Iha Loron Hamoos Sala nian neʼebé halaʼo tinan-tinan, amlulik boot tenke sunu uluk insensu antes nia bele hasaʼe sakrifísiu sira. Hodi halo nuneʼe, nia bele halo Maromak kontente bainhira nia hasaʼe sakrifísiu sira. Bainhira iha rai, Jesus iha knaar importante ida atu halo antes hasaʼe ninia moris nuʼudar sakrifísiu, no knaar neʼe importante liu fali salva ema nia moris. Saida mak neʼe? Nia presiza laran-metin nafatin ba Jeová durante ninia moris tomak iha rai atu nuneʼe Jeová bele simu ninia sakrifísiu. Hodi halo nuneʼe, Jesus hatudu katak dalan diʼak liu atu halaʼo ita-nia moris mak halo tuir Jeová nia dalan. Jesus hatudu katak ninia Aman nia dalan atu ukun mak diʼak liu no justu. Durante Jesus moris iha rai, nia halo tuir Jeová ho didiʼak. Maski nia hasoru tentasaun no susar, maibé nia hakarak tebes atu hatudu katak ninia Aman nia dalan atu ukun mak diʼak liu.​​—Flp 2:8. w19.11 p. 21 par. 6-7

Durante tempu neʼebé Jesus haklaken, ninia apóstolu sira neʼebé laran-metin mak ninia belun diʼak. (Prov 18:24) Jesus hafolin belun sira-neʼe. Durante ninia serbisu haklaken, ninia alin sira la tau fiar ba nia. (João 7:3-5) Dala ida, ninia família mós dehan katak nia bulak ona. (Mc 3:21) Maibé, iha Jesus nia kalan ikus antes nia mate, nia dehan ba apóstolu sira liafuan iha eskritura ba ohin. Dala ruma apóstolu sira hakanek Jesus nia laran, maibé nia la tau fokus ba sira-nia sala. Jesus haree katak sira tau fiar ba nia. (Mt 26:40; Mc 10:13, 14; João 6:66-69) Iha Jesus nia kalan ikus hamutuk ho ninia apóstolu neʼebé laran-metin antes nia mate, nia hatete ba sira: “Haʼu bolu imi belun, tanba haʼu fó-hatene ona ba imi buat hotu neʼebé haʼu rona husi haʼu-nia Aman.” (João 15:15) Jesus nia belun sira anima tebes nia. w19.04 p. 11 par. 11-12

Oinsá mak ema ida hatene katak Maromak hili ona nia atu bá lalehan? Ita bele hetan resposta neʼebé klaru iha apóstolu Paulo nia liafuan ba ema Kristaun iha Roma neʼebé Maromak “bolu nuʼudar ema santu”. Antes nia temi liafuan sira iha eskritura ba ohin nian, nia mós hatete: “Maromak nia espíritu la lori ita atu sai atan no halo ita taʼuk, maibé lori ita atu sai nuʼudar oan-hakiak, no ho espíritu neʼe mak ita bolu: ‘Abba, Aman!’” (Rom 1:7; 8:15) Entaun liuhusi espíritu santu, Maromak hatudu sai ho klaru ba ema neʼebé nia hili katak sira iha esperansa atu bá lalehan. (1 Tes 2:12) Bainhira Jeová fó konvite ba ema atu bá lalehan, nia la halo sira sente duvida iha sira-nia neon no laran kona-ba neʼe. (1 João 2:20, 27) Ema neʼebé Maromak hili atu bá lalehan la presiza ema ida atu fó-hatene ba sira katak Maromak hili ona sira. w20.01 p. 22 par. 7-8

Kristu nia ukun-fuan iha fundasaun ida neʼebé diʼak liu hotu, neʼe mak domin. (Gal 6:2) Jesus halo buat hotu tanba domin. Jesus hatudu domin hodi hanoin ema no hatudu laran-sadiʼa. Tanba hanoin tebes ema, Jesus hanorin ema-lubun, kura ema moras, fó ai-han ba ema neʼebé hamlaha, no fó moris-hiʼas ba ema mate. (Mt 14:14; 15:32-38; Mc 6:34; Lc 7:11-15) Jesus prontu atu tau uluk ema seluk nia presiza. Liután neʼe, nia hatudu domin boot hodi fó ninia moris ba ema. Ita bele banati-tuir Jesus hodi tau uluk ema seluk nia diʼak. Ita mós bele banati-tuir nia hodi hatudu laran-sadiʼa ba ema iha ita-nia haklaken-fatin. Ita halo tuir Kristu nia ukun-fuan bainhira laran-sadiʼa book ita atu haklaken no hanorin liafuan diʼak. w19.05 p. 4 par. 8-10

Jesus ajuda ema atu sai livre husi ulun-naʼin relijiaun sira-nia doutrina falsu. Iha tempu neʼebá, ema Judeu barak sai atan ba tradisaun no hanorin neʼebé sala. (Mt 5:31-37; 15:1-11) Ulun-naʼin relijiaun mak hanesan ema matan-delek. Sira dehan katak sira ajuda ema serbí Maromak, maibé tuir loloos sira rasik la serbí Maromak iha dalan loos. Sira la simu Mesias no lia-loos neʼebé nia hanorin, tan neʼe sira nafatin iha nakukun laran no la hetan perdua husi sira-nia sala. (João 9:1, 14-16, 35-41) Hodi hanorin lia-loos no hatudu ezemplu diʼak, Jesus hatudu ba ema haraik an katak sira bele sai livre husi hanorin falsu. (Mc 1:22; 2:23–3:5) No mós, Jesus loke dalan ba ema atu sai livre husi atan ba sala. Liuhusi Jesus nia sakrifísiu, Maromak bele fó perdua ba ema neʼebé hatudu fiar no simu sakrifísiu neʼe.​​—Ebr 10:12-18. w19.12 p. 10 par. 8; p. 11 par. 10-11

Jeová uza ninia espíritu santu atu hatudu ho klaru ba ema Kristaun neʼebé bá lalehan katak nia hili ona sira. Iha dalan neʼe, espíritu santu “mak hanesan garantia” ka promesa neʼebé Maromak fó ba sira katak iha futuru sira sei moris ba nafatin iha lalehan, laʼós iha rai. (2 Kor 1:21, 22) Kuandu Maromak hili ema ida atu bá lalehan, neʼe katak ema neʼe sei simu duni ninia kolen ka lae? Lae. Maski nia fiar metin katak Maromak hili ona nia, maibé nia tenke hanoin-hetan konsellu neʼe: “Maun-alin sira, sai badinas liután atu imi bele fiar katak imi mak ema neʼebé Maromak bolu no hili ona, tanba se imi kontinua halo buat sira-neʼe, imi sei la husik imi-nia fiar.” (2 Ped 1:10) Entaun, maski Maromak hili ona ema Kristaun ida atu bá lalehan, maibé ema neʼe bele simu ninia kolen só deʼit se nia laran-metin nafatin.​—Flp 3:12-14; Ebr 3:1; Apok 2:10. w20.01 p. 21-22 par. 5-6

Razaun ida tanbasá Job nia belun falsu naʼin-tolu la hatudu laran-sadiʼa ba nia mak tanba sira la komprende ho loloos saida mak akontese ba Job. Rezultadu mak sira halo konkluzaun neʼebé sala no duun matak nia. Saida mak ajuda ita atu la halo sala hanesan sira? Ita presiza rekoñese katak só Jeová deʼit mak hatene ho loloos ema ida nia situasaun. Rona didiʼak ba liafuan sira neʼebé ema neʼe fó sai. Koko atu komprende terus neʼebé nia hasoru. Ida-neʼe sei ajuda ita atu hatudu katak ita hanoin irmaun ka irmán neʼe. Laran-sadiʼa sei hanetik ita atu la habelar gosip kona-ba ema seluk nia problema. Ema neʼebé gosip la hametin kongregasaun, maibé sobu ida-neʼe. (Prov 20:19; Rom 14:19) Nia bele hakanek ema neʼebé terus daudaun. (Éf 4:31, 32) Tan neʼe diʼak liu atu fokus deʼit ba ema nia hahalok diʼak no hanoin kona-ba oinsá ita bele ajuda ema atu tahan hasoru susar. w19.06 p. 21-22 par. 8-9