Abríl

Aristarco mak ema Kristaun ida husi Tesalónika neʼebé iha Masedónia, no nia mak apóstolu Paulo nia belun neʼebé laran-metin. Dala primeiru neʼebé ita lee kona-ba Aristarco mak iha istória kona-ba tempu neʼebé Paulo vizita Éfeso durante ninia viajen nuʼudar misionáriu ba dala terseiru. Ema-lubun kaer Aristarco bainhira nia akompaña Paulo. (Após 19:29) Bainhira nia sai livre, nia kontinua tau ninia moris iha perigu laran hodi kontinua akompaña Paulo ho laran-metin. Fulan balu liutiha, Aristarco nafatin akompaña Paulo iha Grésia maski kontradór sira kontinua koko atu oho Paulo. (Após 20:2-4) Maizumenus iha tinan 58 EC, ema haruka Paulo ba Roma nuʼudar dadur, no Aristarco akompaña Paulo durante viajen neʼe, no sira tahan susar hamutuk bainhira ró mout. (Após 27:1, 2, 41) Kuandu toʼo iha Roma, karik nia mós tama komarka ba tempu balu hamutuk ho Paulo. (Kol 4:10) Paulo hetan anima no kmaan tanba iha belun neʼebé laran-metin hanesan neʼe. Hanesan Aristarco, ita bele sai belun neʼebé laran-metin hodi kontinua apoia ita-nia irmaun-irmán sira iha tempu diʼak no mós “tempu susar”. w20.01 p. 9 par. 4-5

Ema neʼebé Maromak hili ona atu bá lalehan karik sente katak sira la merese atu simu priviléjiu neʼe. Maibé sira nunka duvida katak Maromak hili ona sira. Sira-nia laran nakonu ho ksolok no agradese bainhira hanoin kona-ba esperansa iha futuru. (1 Ped 1:3, 4) Neʼe katak ema neʼebé Maromak hili ona hakarak mate ka lae? Apóstolu Paulo fó resposta ba pergunta neʼe. Nia kompara sira-nia isin hanesan tenda ida no hatete: “Tuir loloos, ita neʼebé sei hela iha tenda neʼe halerik no sente todan tebes. Neʼe laʼós tanba ita hakarak hasai tenda neʼe, maibé tanba ita hakarak tau fali ida seluk, hodi nuneʼe moris bele tolan tiha buat neʼebé sei mohu.” (2 Kor 5:4) Ema Kristaun sira-neʼe la sai baruk atu moris iha rai no lakohi atu mate lalais. Tuir loloos sira gosta moris no loroloron sira hakarak uza moris neʼe atu serbí Jeová hamutuk ho sira-nia família no belun. Maibé, sira sempre hanoin-hetan sira-nia esperansa furak kona-ba futuru.​—1 Kor 15:53; 2 Ped 1:4; 1 João 3:2, 3. w20.01 p. 23 par. 12-13

Atu bele treinu ita, ita-nia Aman neʼebé domin fó dixiplina ba ita bainhira presiza. Nia halo iha dalan oioin. Porezemplu, dala ruma ita lee ninia Liafuan ka rona buat ruma iha reuniaun no rekoñese katak ita presiza halo mudansa. Ka karik katuas sira mak fó matadalan neʼebé ita presiza. Maski Jeová fó dixiplina iha dalan oioin, maibé nia sempre halo nuneʼe tanba hadomi ita. (Jer 30:11) Jeová ajuda ita tahan durante tempu susar. Aman neʼebé hadomi ninia oan ajuda ninia oan durante tempu susar, nuneʼe mós ho ita-nia Aman iha lalehan. Nia uza ninia espíritu santu atu proteje ita husi buat hotu neʼebé bele estraga ita-nia relasaun diʼak ho nia. (Lc 11:13) Jeová mós proteje ita liuhusi ajuda ita bainhira ita laran-kraik. Porezemplu, nia fó ita esperansa furak. Esperansa neʼe ajuda ita atu tahan susar sira. Hanoin toʼok ida-neʼe: Maski buat aat akontese ba ita, ita-nia Aman domin nian bele ­hadiʼa ida-neʼe iha dalan neʼebé kompletu. Susar hotu neʼebé ita hasoru daudaun mak temporáriu deʼit, maibé bensaun husi Jeová mak ba nafatin.​—2 Kor 4:16-18. w20.02 p. 5 par. 14-15

Ita bele hetan susesu hodi kontra hasoru laran-moras. Hanoin kona-ba José nia maun sira-nia ezemplu. Tinan barak liutiha depois sira halo aat ba José, sira hasoru nia iha rai-Ejitu. Antes José fó sai ninia an ba sira, nia koko sira atu haree se sira halo ona mudansa ka lae. Nia han hamutuk ho sira, no tau atensaun liu ba ninia alin Benjamim duké ba ninia maun sira. (Gén 43:33, 34) Maibé sira la sai laran-moras ba Benjamim. Sira hatudu katak sira hanoin tebes sira-nia alin no sira-nia aman Jacob. (Gén 44:30-34) Tanba José nia maun sira la laran-moras tan, sira bele haburas fali dame iha família laran. (Gén 45:4, 15) Nuneʼe mós se ita fokit sai tiha laran-moras husi ita-nia laran, ita sei haburas dame iha família no kongregasaun. Jeová hakarak ita atu kontra hasoru laran-moras no buka dame. Se ita haburas haraik an, kontente ho buat neʼebé ita iha no hatudu agradese, ita sei la hatudu laran-moras. w20.02 p. 19 par. 17-18

Dalan ida atu hatudu fali Ita-nia domin ba Jeová mak hodi koʼalia ho nia liuhusi orasaun. Ita-nia domin ba Maromak sei aumenta bainhira Ita konta ba nia kona-ba Ita-nia laran-taridu no fó agradese ba nia kona-ba buat hotu neʼebé nia halo ona ba Ita. Ita-nia relasaun diʼak ho Jeová sei metin liután bainhira Ita haree nia hatán ba Ita-nia orasaun. Ita sei fiar metin liután katak nia komprende Ita. Maibé atu hakbesik liután ba Jeová, Ita presiza komprende ninia dalan atu hanoin. Ita mós presiza hatene saida mak nia hakarak husi Ita. Dalan ida deʼit atu hetan koñesimentu mak liuhusi estuda ninia Liafuan Bíblia. Tan neʼe aprende atu hafolin livru ne’e. Só Bíblia deʼit mak fó sai lia-loos kona-ba Jeová no ninia hakarak mai Ita. Ita hatudu katak Ita hafolin Bíblia liuhusi lee Bíblia loroloron, prepara livru neʼebé Ita sei estuda ho Ita-nia mestre Bíblia, no aplika buat neʼebé Ita aprende. (Sal 119:97, 99; João 17:17) Ita iha programa atu lee Bíblia ka lae? Ita lee Bíblia loroloron ka lae? w20.03 p. 5 par. 8-9

Se ita iha problema saúde no labele laʼo, karik ita bele tuur iha fatin públiku hodi bele haklaken ba ema neʼebé laʼo bá-mai. Ka karik ita bele haklaken la formál, hakerek karta, ka haklaken liuhusi telefone. Haklaken-naʼin barak neʼebé iha problema saúde, hetan ksolok hodi haklaken iha dalan sira-neʼe. Maski ita iha problema saúde, ita bele kumpre didiʼak ita-nia serbisu haklaken. Paulo dehan: “Tanba iha situasaun hotu haʼu hetan forsa liuhusi nia neʼebé fó kbiit mai haʼu.” (Flp 4:13) Paulo presiza forsa neʼe bainhira nia sai moras durante ninia viajen nuʼudar misionáriu. Nia esplika ba ema Kristaun iha Galásia: “Tanba haʼu moras mak haʼu hetan oportunidade primeiru atu fó sai liafuan diʼak ba imi.” (Gal 4:13) Nuneʼe mós, Ita-nia problema saúde karik fó Ita oportunidade atu fó sai liafuan diʼak ba ema seluk hanesan doutór, enfermeiru, no ema neʼebé tau matan Ita. Karik ema sira-neʼe bá serbisu bainhira haklaken-naʼin sira vizita. w19.04 p. 4-5 par. 10-11

Iha tinan 2018, haklaken-naʼin 223.000 liu hela iha rai neʼebé governu bandu ka hanetik ita-nia atividade adorasaun nian. Ita la hakfodak kona-ba neʼe. Ema Kristaun hatene katak ema sei fó-terus ba sira. Iha fatin oioin, karik derrepente deʼit governu bele bandu ita atu labele adora tan ita-nia Maromak domin nian, Jeová. Se governu bandu ita-nia adorasaun, karik neʼe halo ita hanoin sala katak Maromak la simu ona ita. Maibé hanoin-hetan, bainhira ema fó-terus ba ita, neʼe la dehan katak Maromak la kontente ona ho ita. Porezemplu, Maromak simu apóstolu Paulo. Nia iha priviléjiu atu hakerek karta 14 neʼebé sai parte ba Eskritura Lian Gregu, no nia mak apóstolu ba nasaun sira. Maski nuneʼe, ema ­fó-terus makaʼas ba nia. (2 Kor 11:23-27) Husi apóstolu Paulo nia esperiénsia, ita aprende katak dala ruma Jeová husik ema fó-terus ba ninia atan sira neʼebé laran-metin. w19.07 p. 8 par. 1, 3

Dalan ida neʼebé Jeová hatudu katak nia hanoin ita nuʼudar ninia atan mak hodi ajuda ita kontra ita-nia inimigu. Ita-nia inimigu boot liu mak Satanás no ninia anju aat sira. Jeová fó avizu ba ita kona-ba inimigu sira-neʼe, no nia fó buat neʼebé ita presiza atu kontra sira. (Éf 6:10-13) Bainhira ita simu Jeová nia ajuda no sadere ba nia ho laran tomak, ita bele kontra Diabu ho susesu. Ita bele iha konfiansa hanesan apóstolu Paulo. Nia hakerek: “Se Maromak hamutuk ho ita, sé mak bele kontra ita?” (Rom 8:31) Nuʼudar ema Kristaun loos, ita la tau fokus ba Satanás no ninia anju aat sira. Maibé tau fokus hodi aprende kona-ba Jeová no serbí nia. (Sal 25:5) Maski nuneʼe, ita presiza hatene buat sira neʼebé Satanás halo. Tanbasá? Atu nuneʼe nia labele lohi ita.​—2 Kor 2:11; nota. w19.04 p. 20 par. 1-2

Bainhira ita ajuda ema neʼebé hasoru susar, ita mak rona-naʼin neʼebé diʼak ka lae? Karik ita hanoin, rona didiʼak katak tuur metin no nonook deʼit. Ita bele hatudu laran-sadiʼa no hanoin ema bainhira rona didiʼak. Dala ruma, ita-nia liafuan neʼebé diʼak bele hatudu sai ita-nia sentimentu. Karik ita bele hatete: “Haʼu sente triste ho buat neʼebé akontese ba Ita.” Karik Ita mós bele husu pergunta ida ka rua atu ajuda Ita komprende liután buat neʼebé Ita rona. Karik Ita bele husu, “Bele esplika liután buat neʼebé Ita hatete?” ka “Buat neʼebé haʼu komprende husi Ita-nia liafuan mak . . . Neʼe loos ka lae?” Liafuan sira hanesan neʼe bele halo ema neʼe sente katak Ita rona didiʼak, no koko atu komprende nia. (1 Kor 13:4, 7) Maibé kuidadu hodi “la ansi atu koʼalia”. Keta korta ema neʼe hodi fó matadalan ka korrije ninia hanoin. Hatudu pasiénsia bá! Duké koko fó solusaun atu rezolve sira-nia problema, ita hatudu domin no laran-sadiʼa.​—1 Ped 3:8. w19.05 p. 17-18 par. 15-17

Iha família laran, laʼen tenke hadomi ninia feen “hanesan Kristu halo ba kongregasaun”. (Éf 5:28, 29) Laʼen tenke banati-tuir Kristu nia domin neʼebé la hanoin an deʼit hodi tau uluk ninia feen nia presiza no hakarak. Mane balu karik sente susar atu hatudu domin hanesan neʼe, tanba karik sira sai boot iha família neʼebé la hatudu domin no justisa ba malu. Karik susar ba sira atu hadiʼa sira-nia toman aat, maibé sira tenke halo mudansa hodi bele halo tuir Kristu nia ukun-fuan. Laʼen neʼebé hatudu domin neʼebé la hanoin an deʼit sei hetan respeitu husi ninia feen. Aman neʼebé hadomi tebes ninia oan nunka trata aat ninia oan liuhusi liafuan ka hahalok. (Éf 4:31) Maibé, nia hatudu sai ninia domin iha dalan neʼebé halo ninia oan sira sente seguru. Aman hanesan neʼe sei hetan domin no konfiansa husi ninia oan sira. w19.05 p. 6 par. 21

Maria hanoin saida bainhira rona ida-neʼe? Nia hanoin katak Jesus sei troka Liurai Herodes nia fatin ka ukun-naʼin seluk neʼebé ukun Izraél ka lae? Se Jesus sai liurai, Maria sei sai liurai-feto, no ninia família sei moris iha palásiu. Maibé loloos, ita nunka lee iha Bíblia katak Maria husu ba Jesus kona-ba pozisaun iha Maromak nia Ukun. Maria mak feto neʼebé haraik an tebetebes. Hanoin-hetan katak ita-nia razaun primeiru atu estuda Maromak nia Liafuan no publikasaun sira mak atu sai besik liután ba Jeová. Ita mós hakarak atu haree ho klaru liután ‘ita mak ema oinsá’ no mudansa saida mak ita presiza halo hodi bele halo Maromak kontente. (Tgo 1:22-25; 4:8) Tan neʼe antes ita estuda, ita presiza husu Jeová atu haraik ninia espíritu santu ba ita. Ita presiza husu ba Jeová atu ajuda ita hetan benefísiu husi buat neʼebé ita estuda no buka-hatene mudansa saida mak ita presiza halo. w19.05 p. 31 par. 18-19

Dala ruma, ita hasoru problema barak iha tempu hanesan. Haree toʼok ezemplu sira tuirmai. Testemuña ida naran John, neʼebé moras todan, sente triste tebes kuandu ninia feen neʼebé kaben ho nia ba tinan 19 ona, soe hela nia. Tuirmai ninia oan-feto naʼin-rua mós la serbí tan Jeová. Feen-laʼen ida naran Bob no Linda hasoru problema seluk fali. Sira lakon serbisu, no mós tenke muda uma tanba labele selu. Liután neʼe, doutór hatete katak Linda iha moras-fuan no ida-neʼe perigu ba ninia moris. Nia mós iha moras seluk tan neʼebé aat tebes. Ita bele fiar katak Jeová, Ita-nia Kriadór no Aman neʼebé nakonu ho domin, komprende ita-nia sentimentu bainhira ita estrese. Nia hakarak ajuda ita atu tahan hasoru problema sira. (Flp 4:6, 7) Iha ezemplu barak iha Bíblia kona-ba fiar-naʼin sira neʼebé hasoru susar oioin. Bíblia mós esplika kona-ba oinsá Jeová ajuda sira atu tahan hasoru situasaun neʼebé halo sira estrese. w19.06 p. 14 par. 2-3

Ita hatudu katak ita hadomi ema sira neʼebé faluk ona kuandu ita hatudu hahalok diʼak ba sira. Tanba agora sira mesamesak, sira presiza belun diʼak. Oinsá mak Ita bele hatudu katak Ita mak belun neʼebé diʼak? Ita bele konvida sira atu han iha Ita-nia uma. Ita mós bele halo atividade halimar nian hamutuk ka bá haklaken hamutuk. Dala ruma, Ita mós bele konvida sira tuir Ita-nia adorasaun família nian. Se Ita halo nuneʼe, Ita sei halo Jeová kontente, tanba nia “besik ema sira neʼebé laran-kanek” no nia “proteje feto-faluk sira”. (Sal 34:18; 68:5) Lakleur tan, Maromak nia Governu sei ukun mundu tomak, no “ema sei haluha terus uluk nian”. Ita hein namanas ba tempu neʼebé “ema sei la hanoin tan buat uluk nian, no buat sira-neʼe sei la rai nafatin iha ema nia laran”. (Isa 65:16, 17) Nuʼudar ita hein ba tempu neʼe, mai ita apoia malu no hatudu liuhusi ita-nia liafuan no hahalok katak ita hadomi irmaun-irmán sira.​—1 Ped 3:8. w19.06 p. 25 par. 18-19

Tinan barak liubá, Livru Haklaken dehan: “Ema neʼebé koñese didiʼak Maromak sei tau fiar tomak ba nia bainhira hetan koko.” Neʼe loos duni. Atu bele tahan ho susesu bainhira ema fó-terus, ita tenke hadomi no tau fiar tomak ba Jeová. (Mt 22:36-38; Tgo 5:11) Lee Bíblia loroloron ho objetivu atu hakbesik liután ba Jeová. (Tgo 4:8) Bainhira lee Bíblia, tau fokus ba Jeová nia hahalok furak sira. Sente ninia ­domin liuhusi ninia liafuan no hahalok. (Éx 34:6) Karik susar ba ema balu atu fiar katak Maromak hadomi sira tanba sira nunka sente domin. Se Ita sente nuneʼe, loroloron koko atu hakerek lista kona-ba oinsá Jeová hatudu ona laran-sadiʼa no laran-diʼak ba Ita. (Sal 78:38, 39; Rom 8:32) Se Ita hanoin kona-ba Ita-nia esperiénsia rasik no medita kona-ba buat neʼebé Ita lee iha Maromak nia Liafuan, karik Ita bele hakerek buat oioin neʼebé Jeová halo ona ba Ita. Bainhira Ita hafolin buat neʼebé Jeová halo ona ba Ita, Ita-nia relasaun ho nia sei sai metin liután.​—Sal 116:1, 2. w19.07 p. 2-3 par. 4-5

Jeová la fó ita podér atu halo desizaun ba ema seluk. Ema neʼebé halo ukun-fuan neʼebé la presiza, tuir loloos koko atu domina irmaun-irmán sira-nia fiar no la proteje sira. Diabu Satanás sei nunka para atu koko fó-terus ba Jeová nia atan sira neʼebé laran-metin. (1 Ped 5:8; Apok 2:10) Satanás no ninia ema sira sei koko atu bandu ita-nia adorasaun ba Jeová. Maibé, ita sei nunka para atu serbí Jeová maski ita taʼuk. (Deut 7:21) Jeová hamutuk ho ita, no nia sei kontinua apoia ita maski governu bandu ita-nia serbisu. (2 Krón 32:7, 8) Mai ita hakaʼas an atu iha hanoin neʼebé hanesan ho irmaun-irmán sira iha apóstolu sira-nia tempu, neʼebé hatete ba ukun-naʼin sira iha tempu neʼebá: “Se imi hanoin katak rona ba imi duké rona ba Maromak mak buat loos iha Maromak nia oin, imi rasik deside bá. Maibé ba ami, ami labele para atu koʼalia kona-ba buat neʼebé ami haree no rona ona.”​—Após 4:19, 20. w19.07 p. 13 par. 18-20

Kuandu ita haklaken, ita tenke hakaʼas an komprende tanbasá sira hanoin hanesan neʼe. Apóstolu Paulo sai boot iha ema Judeu nia leet. Entaun nia presiza troka ninia dalan atu haklaken bainhira koʼalia ho ema jentiu neʼebé hatene uitoan ka la hatene buat ida kona-ba Jeová no Eskritura. Karik ita presiza halo riset atu ita bele komprende ema nia hanoin iha ita-nia haklaken-fatin. (1 Kor 9:20-23) Ita-nia ­objetivu mak atu buka ema neʼebé “merese” atu ita vizita. (Mt 10:11) Atu bele hetan rezultadu, ita tenke husu sira-nia hanoin no rona didiʼak ba sira. Irmaun ida iha Inglaterra husu ema nia hanoin kona-ba oinsá atu halaʼo moris kaben nian neʼebé kontente, oinsá atu haboot oan, ka oinsá atu tahan maski ema la hatudu hahalok justisa. Depois rona tiha ba sira-nia opiniaun, irmaun neʼe dehan: “Ita hanoin oinsá kona-ba konsellu ida-neʼe neʼebé hakerek besik tinan 2.000 liubá?” Tuirmai, maski nia la temi liafuan Bíblia, maibé nia hatudu ba sira eskritura neʼebé nia prepara ona iha ninia telefone. w19.07 p. 21 par. 7-8

Ita-nia domin ba Maromak tenke boot oinsá? Jesus hatete ba ema Farizeu ida: “Imi tenke hadomi Jeová, imi-nia Maromak, ho imi-nia laran tomak, ho imi-nia moris tomak no ho imi-nia neon tomak.” (Mt 22:36, 37) Ita hakarak hadomi Jeová ho ita-nia laran tomak no hakarak ita-nia domin aumenta liután loron ba loron. Ita presiza hatene kona-ba Maromak atu bele hadomi nia. Bíblia hatete: “Ema neʼebé la hatudu domin la hatene Maromak, tanba Maromak mak domin.” (1 João 4:8) ­Apóstolu Paulo fó sai katak ita-nia domin ba Maromak sei sai boot liután bainhira ita hatene lia-loos kona-ba Maromak no komprende ninia hanoin. (Flp 1:9) Bainhira ita foin estuda Bíblia, ita haburas domin ba Maromak maski ita seidauk hatene buat hotu kona-ba ninia hahalok furak sira. Tuirmai bainhira ita aprende liután kona-ba Jeová, ita-nia domin sai boot liután. Tan neʼe importante tebes atu estuda beibeik Bíblia no medita kona-ba Maromak nia Liafuan.​—Flp 2:16. w19.08 p. 9 par. 4-5

Se ita hetan knaar foun, ita mós presiza buka belun foun iha fatin foun. Hanoin-hetan katak atu iha belun, Ita presiza hatudu laran-diʼak. Konta ba ema seluk kona-ba Ita-nia esperiénsia atu nuneʼe ema seluk bele haree kontente neʼebé Ita hetan bainhira serbí Jeová. Se Ita presiza husik Ita-nia knaar tanba Ita-nia kaben moras, keta fó sala ba nia. Ka se Ita rasik mak moras, keta fó sala ba Ita-nia an no sente katak Ita hakanek Ita-nia kaben nia laran. Hanoin-hetan, imi naʼin-rua mak “isin ida deʼit”, no imi promete ba Jeová atu tau matan ba malu iha situasaun hotu. (Mt 19:5, 6) Se Ita husik Ita-nia knaar tanba Ita-nia feen isin-rua, ajuda Ita-nia oan atu hatene katak nia importante liu fali Ita-nia knaar. Fó-hatene beibeik ba Ita-nia oan katak Ita haree nia nuʼudar “prezente” husi Maromak. (Sal 127:3-5) No mós, konta ba nia kona-ba esperiénsia furak neʼebé Ita hetan iha Ita-nia knaar. Hodi halo nuneʼe, Ita bele motiva Ita-nia oan atu uza ninia moris hodi serbí Jeová hanesan Ita. w19.08 p. 22 par. 10-11

Babilónia Boot, katak relijiaun falsu hotu, hafoʼer duni Jeová nia naran. Nia hanorin lia-bosok kona-ba Maromak. Nia hanesan feto-aat tanba la laran-metin ba Maromak hodi apoia ema nia governu sira. Nia uza ninia podér atu domina ninia povu no foti sira-nia osan. Nia mós oho ema barak, inklui Maromak nia atan sira. (Apok 18:24; 19:2) Jeová sei halakon “feto-aat neʼebé naran-boot” hodi uza “dikur sanulu” no ‘animál fuik kór-mean’. Animál fuik neʼe reprezenta Nasoins Unidas. Dikur sanulu reprezenta governu sira neʼebé apoia organizasaun neʼe. Iha tempu neʼebé Maromak deside ona, governu sira no Nasoins Unidas sei ataka Babilónia Boot. Sira “sei halakon nia no halo nia isin-tanan” hodi hadau ninia rikusoin no hatudu sai ninia hahalok aat sira. (Apok 17:3, 16) Babilónia Boot sei lakon lalais deʼit, hanesan iha loron ida deʼit. Tan neʼe, ema sira neʼebé apoia Babilónia Boot sei hakfodak, liuliu tanba Babilónia Boot toman atu gaba an no dehan: “Haʼu sei nunka tanis.”​​—Apok 18:7, 8. w19.09 p. 10 par. 10-11

Jesus konvida ema hotu atu hakbesik ba nia no nia nunka hadook an husi ema neʼebé hakarak serbí Maromak ho laran. (João 6:37, 38) Kristu nia dixípulu hotu simu priviléjiu atu hola parte iha serbisu neʼebé Jeová haruka Jesus atu halo. Ita bele fiar metin katak Jesus sempre hamutuk ho ita hodi ajuda ita halo serbisu neʼe. (Mt 28:18-20) Ema haraik an gosta hakbesik ba Jesus. (Mt 19:13, 14; Lc 7:37, 38) Tanbasá? Tanba Jesus la hanesan ho ema Farizeu. Ulun-naʼin relijiaun sira-neʼe foti an no la hatudu domin. (Mt 12:9-14) Maibé Jesus haraik an no hatudu domin. Ema Farizeu sira hakarak sai ema importante liu no foti an kona-ba sira-nia pozisaun iha komunidade. Jesus dehan katak la diʼak atu hatudu hahalok sira-neʼe. Nia hanorin ninia dixípulu sira atu haraik an no serbí ema seluk. (Mt 23:2, 6-11) Ema Farizeu domina ema seluk hodi halo sira taʼuk no ameasa sira. (João 9:13, 22) Jesus halo ema sente kmaan hodi hatudu domin no koʼalia ho laran-diʼak. Ita halo tuir ona Jesus nia hahalok sira-neʼe ka lae? w19.09 p. 20 par. 1; p. 21 par. 7-8; p. 23 par. 9

Reuniaun ajuda ita atu hakbesik liután ba Jeová. Ita-nia hanoin kona-ba tuir reuniaun beibeik mak sinál se ita bele tahan bainhira ema fó-terus ba ita iha futuru. (Ebr 10:24, 25) Tanbasá? Se agora deʼit ita husik buat kiʼik hanetik ita atu tuir reuniaun, saida mak sei akontese se iha futuru ita presiza tau ita-nia moris iha perigu laran hodi tuir reuniaun sira? Maibé, se agora ita hakaʼas an atu tuir reuniaun sira, ita sei la rende an bainhira inimigu sira koko atu hapara ita halibur hamutuk. Agora mak tempu atu haburas domin ba reuniaun sira. Se ita gosta tebes tuir reuniaun, maski ema kontra ka governu bandu, ita sei halo tuir Maromak duké halo tuir ema. (Após 5:29) Dekór eskritura neʼebé Ita gosta. (Mt 13:52) Ita-nia neon la perfeitu, maibé Jeová bele uza ninia espíritu santu neʼebé kbiit boot atu halo Ita hanoin-hetan fali eskritura sira neʼebé Ita dekór ona. (João 14:26) Eskritura sira-neʼe ajuda Ita atu nafatin besik ba Jeová no tahan ho laran-metin. w19.07 p. 3 par. 5; p. 4 par. 8-9

Ita moris depois tinan 1914 ka lae? Se nuneʼe, durante Ita-nia moris tomak Ita hela iha “loron ikus sira” husi sistema aat neʼe. Ita hotu haree ka rona ona notísias kona-ba akontesimentu oioin neʼebé Jesus fó-hatene nanis ona kona-ba ita-nia tempu. Neʼe inklui funu, rai-hamlaha, rai-nakdoko, moras-peste, hahalok aat neʼebé aumenta ba beibeik, no ema fó-terus ba Jeová nia povu. (Mt 24:3, 7-9, 12; Lc 21:10-12) Ita mós haree ona katak ema nia hahalok tuir duni liafuan neʼebé apóstolu Paulo fó-hatene nanis ona. Nuʼudar Jeová nia atan, ita fiar duni katak ita moris “iha loron sira-neʼe nia rohan”. (Miq 4:1, nota) Tempu barak liu ona husi tinan 1914, neʼe katak agora ita moris iha parte ikus husi “loron ikus sira”. Tanba sistema aat neʼe nia rohan besik loos ona, ita presiza hanoin kona-ba pergunta importante balu: Akontesimentu saida deʼit mak sei mosu iha “loron ikus” sira-nia rohan? Jeová hakarak ita atu halo saida nuʼudar ita hein ba akontesimentu sira-neʼe? w19.10 p. 8 par. 1-2

Ita-nia kbiit atu tahan la depende ba situasaun. Ita bele hametin ita-nia kbiit atu tahan hodi sadere ba Jeová. (Rom 12:12) Jesus nia promesa iha eskritura ohin nian fó-hanoin ita katak ita tenke laran-metin nafatin maski hasoru susar oioin. Hodi tahan susar ida-idak agora, ita bele hametin ita-nia fiar antes terus boot komesa. Ita presiza sadere ba Jeová hodi iha kbiit atu tahan, nuneʼe mós ita presiza sadere ba Jeová atu iha aten-brani. Oinsá ita bele sadere liután ba Jeová? Hodi lee Bíblia loroloron no medita kona-ba oinsá Jeová salva ona ninia povu iha tempu uluk. (Sal 68:20; 2 Ped 2:9) Bainhira nasaun sira ataka ita durante terus boot, ita presiza aten-brani no tau fiar ba Jeová liu fali tempu seluk. (Sal 112:7, 8; Ebr 13:6) Se ita sadere ba Jeová agora, ita sei sai aten-brani bainhira Gog ataka. Ita fiar katak ita bele sente seguru nafatin tanba Jeová proteje ita ho domin.​—1 Kor 13:8. w19.10 p. 18 par. 15-16

Diabu mak kontrola mundu aat neʼe, no nia uza mundu neʼe atu halo ita sente katak ita-nia hakarak mak importante liu no mós halo susar ba ita atu kontrola ita-nia hakarak isin nian. (Éf 2:1-3) Nia hakarak ita atu hadomi mós buat seluk atu nuneʼe ita labele hadomi deʼit Jeová. Depois hakerek tiha katak Satanás nia mundu sei remata no mundu foun sei mai, apóstolu Pedro dehan: “Maluk doben sira, tanba imi hein hela buat sira-neʼe, hakaʼas an liután atu ikusmai Maromak haree imi nuʼudar ema neʼebé moos, sala-laek no iha dame ho Maromak.” (2 Ped 3:14) Bainhira ita halo tuir konsellu neʼe no hakaʼas an atu moos nafatin iha dalan morál no adora Jeová iha dalan neʼebé nia simu, ita hatudu katak ita adora Jeová mesak deʼit. Satanás no ninia mundu neʼe sei kontinua tenta ita atu tau uluk buat sira seluk duké adorasaun ba Jeová. (Lc 4:13) Maibé, Ita hakarak hadomi Jeová ho ita-nia laran tomak no ita lakohi hadomi ema ruma ka buat ruma liu fali nia. Ita hakarak adora Jeová mesak deʼit tanba nia merese simu ida-neʼe. w19.10 p. 26 par. 4; p. 31 par. 18-19

Laran-taridu balu mak diʼak. Porezemplu, diʼak se ita laran-taridu tanba hanoin kona-ba oinsá atu halo Jeová no Jesus kontente. (1 Kor 7:32) Se ita halo sala sériu, ita laran-taridu kona-ba oinsá atu hadiʼa fali ita-nia relasaun ho Maromak. Ita mós laran-taridu kona-ba oinsá atu halo kontente ita-nia kaben no ajuda ita-nia família no mós maluk fiar-naʼin. (1 Kor 7:33; 2 Kor 11:28) Maibé, laran-taridu demais bele halo ita hanoin beibeik kona-ba ai-han no roupa neʼebé natoon. (Mt 6:31, 32) Tan neʼe, karik ita tau fokus atu buka sasán no rikusoin. Se ita husik ida-neʼe akontese, ita-nia fiar ba Jeová sei sai fraku no bele estraga ita-nia relasaun ho nia. (Mc 4:19; 1 Tim 6:10) Ka karik ita sai laran-taridu demais kona-ba ema seluk nia hanoin ba ita. Tan neʼe karik ita taʼuk liu se ema goza ka kontra ita duké taʼuk atu hakanek Jeová nia laran. Atu proteje ita-nia an husi perigu neʼe, ita tenke husu Jeová atu fó ita fiar no aten-brani atu tahan susar neʼe.​—Prov 29:25; Lc 17:5. w19.11 p. 15 par. 6-7

Ita labele troka desizaun importante balu. Porezemplu, ita kaer metin ita-nia desizaun atu serbí Jeová, no laran-metin ba ita-nia kaben. (Mt 16:24; 19:6) Maibé, dala ruma ita presiza halo mudansa ba desizaun balu. Tanbasá? Tanba ita-nia situasaun troka. Saida mak bele ajuda ita atu halo desizaun neʼebé diʼak? Ita hotu “presiza matenek”. Tan neʼe sadere ba Jeová bainhira ita halo desizaun no bainhira presiza halo mudansa ba ita-nia desizaun. Hodi halo nuneʼe, Jeová sei ajuda ita atu halo desizaun neʼebé diʼak. Halo riset. Buka matadalan husi Maromak nia Liafuan, lee publikasaun sira husi Ita-nia organizasaun, no koʼalia ho ema neʼebé Ita konfia. (Prov 20:18) Halo riset hanesan neʼe mak importante tebes antes halo desizaun kona-ba troka serbisu, muda ba fatin seluk, ka hili edukasaun neʼebé bele ajuda Ita serbí Jeová. w19.11 p. 27 par. 6-8

Ita kontente tanba Maromak arranja atu halo ita livre husi sala. Liuhusi Jesus mak ita bele sai livre. Tinan 700 liu antes Jesus mai mundu, profeta Isaias fó sai nanis katak iha futuru ema sei hetan liberdade neʼebé diʼak liu fali liberdade neʼebé ema Izraél hetan iha Tinan Livre nian. Isaias hakerek: “Jeová, Naʼi Ukun-Naʼin Boot Liu, fó ona ninia espíritu mai haʼu, tanba Jeová hili haʼu atu haklaken liafuan diʼak ba ema neʼebé laran-maus. Nia haruka haʼu atu kura ema neʼebé laran-kanek, atu fó sai liberdade ba ema dadur sira.” (Isa 61:1) Sé mak kumpre profesia neʼe? Profesia importante neʼe komesa sai loos kuandu Jesus hahú ninia serbisu haklaken. Bainhira Jesus bá Nazaré, fatin neʼebé nia sai boot, nia tama ba sinagoga no lee Isaias nia profesia ba ema Judeu neʼebé halibur hamutuk iha neʼebá no fó sai katak nia kumpre liafuan sira-neʼe.​—Lc 4:16-19. w19.12 p. 9-10 par. 6-8

Ita presiza aten-brani atu bele tahan kuandu ema haterus Ita. Se Ita sente katak Ita ladún aten-brani, Ita bele halo saida? Hanoin-hetan, aten-brani neʼebé loos la depende ba ita-nia isin, forsa, ka abilidade. Hanoin toʼok joven David nia ezemplu bainhira nia kontra hasoru Golias. Se kompara ho jigante neʼe, David mak kiʼik, fraku, no la iha armas kompletu. David mós la iha surik. Maski nuneʼe, nia aten-brani tebes. David ho aten-brani halai ba oin atu funu hasoru jigante foti an neʼe. Tanbasá mak David aten-brani tebes? Nia fiar metin katak Jeová hamutuk ho nia. (1 Sam 17:37, 45-47) David la tau fokus ba Golias nia isin neʼebé boot se kompara ho nia. Maibé, David tau fokus ba oinsá Golias mak kiʼik deʼit se kompara ho Jeová. Saida mak ita aprende husi istória neʼe? Ita sei sente aten-brani se ita fiar metin katak Jeová hamutuk ho ita, no mós ita-nia inimigu mak kiʼik deʼit se kompara ho Maromak neʼebé Kbiit Boot Liu Hotu.​—2 Krón 20:15; Sal 16:8. w19.07 p. 5 par. 11-13

Tíkiko mak belun neʼebé apóstolu Paulo bele tau fiar. (Após 20:4) Maizumenus iha tinan 55 EC, Paulo arranja atu halibur kontribuisaun hodi ajuda ema Kristaun sira iha Judeia, no karik nia husu Tíkiko atu ajuda halibur kontribuisaun. (2 Kor 8:18-20) Ikusmai bainhira Paulo tama komarka iha Roma ba dala primeiru, Tíkiko mak lori Paulo nia lia-menon. Nia lori Paulo nia karta no lia-menon ba kongregasaun sira iha Ázia atu anima sira. (Kol 4:7-9) Tíkiko kontinua sai Paulo nia belun diʼak neʼebé Paulo bele tau fiar. (Tito 3:12) Iha tempu neʼebá, laʼós ema Kristaun hotu mak Paulo bele tau fiar hanesan Tíkiko. Maizumenus iha tinan 65 EC durante Paulo tama komarka ba dala segundu, Paulo hakerek katak mane Kristaun barak iha provínsia Ázia lakohi ransu ho Paulo, karik tanba sira taʼuk kontradór sira. (2 Tim 1:15) Maibé, Paulo bele tau fiar ba Tíkiko no fó nia knaar ida tan. (2 Tim 4:12) Klaru katak Paulo agradese tebes hodi iha belun diʼak hanesan Tíkiko. w20.01 p. 10 par. 7-8

Karik Ita hanoin katak Maromak hili ona Ita atu bá lalehan liuhusi ninia espíritu santu. Se nuneʼe, hanoin kona-ba pergunta importante sira-neʼe: Ita laran-manas tebes atu halo Jeová nia hakarak ka lae? Ita sente katak Ita badinas tebes atu haklaken ka lae? Ita mak estudante Bíblia neʼebé badinas no gosta aprende kona-ba “buat kleʼan husi Maromak” ka lae? Ita sente katak Jeová haraik ona bensaun furak ba Ita-nia serbisu haklaken ka lae? Ita sente katak Ita iha responsabilidade boot atu hanorin ema seluk kona-ba Maromak ka lae? Ita haree ona Jeová ajuda Ita iha dalan espesífiku iha Ita-nia moris ka lae? Se Ita hatán sin ba pergunta sira-neʼe hotu, neʼe katak Maromak hili ona Ita atu bá lalehan ka lae? Lae. Tanbasá? Tanba Maromak nia atan hotu bele sente hanesan neʼe. Ema sira neʼebé Jeová hili atu bá lalehan la duvida katak Jeová hili ona sira! Sira hatene ho klaru! w20.01 p. 23 par. 14