Maiu

Saida mak inan-aman bele halo atu ajuda sira-nia oan hadomi Jeová? Halo orasaun atu husu Jeová nia ajuda, hanesan Manoá halo. No mós hanorin liuhusi ezemplu. Ita-nia liafuan mak importante maibé Ita-nia hahalok bele lori influénsia boot liu ba Ita-nia oan. Ita bele fiar katak José no Maria hatudu ezemplu diʼak ba sira-nia oan, inklui Jesus. José serbisu makaʼas atu tau matan ninia família. José mós anima ninia família atu hafolin sira-nia relasaun ho Maromak. (Deut 4:9, 10) José lori ninia família tomak bá Jeruzalein atu selebra Páskua tinan-tinan. (Lc 2:41, 42) Karik aman balu hanoin katak atu lori família tomak bá Jeruzalein mak susar, gasta tempu no osan barak. Maibé José hafolin tebes ninia relasaun diʼak ho Jeová no ­hanorin ninia oan sira atu halo hanesan. Maria mós hatene didiʼak Eskritura sira. Liuhusi ninia liafuan no hahalok, nia hanorin ninia oan sira atu hadomi Maromak nia Liafuan. w19.12 p. 24-25 par. 9-12

Ita haree Jeová nia domin ba ita bainhira ita hanoin kona-ba buat neʼebé nia halo kuandu Adão kontra nia. Bainhira Adão la halo tuir ninia Aman iha lalehan, nia la sai parte tan ba Jeová nia família neʼebé kontente, no ninia bei-oan hotu mós la sai parte tan ba família neʼe. (Rom 5:12) Maibé Jeová halo buat ruma atu ajuda. Jeová fó-kastigu ba Adão, maibé nia fó esperansa ba Adão nia bei-oan sira. Nia promete kedas katak ema laran-metin sira bele sai fali parte ba ninia família. (Gén 3:15; Rom 8:20, 21) Jeová halo nuneʼe liuhusi ninia Oan-Mane Jesus nia sakrifísiu. Hodi fó ninia Oan-Mane atu salva ita, Jeová hatudu katak nia hadomi tebes ita. (João 3:16) Nia mak Aman neʼebé diʼak liu. Nia rona ita-nia orasaun no tau matan ba ita-nia presiza isin nian no espirituál. Nia treinu no ajuda ita. Nia mós sei haraik bensaun furak oioin ba ita iha futuru. Ita sente kontente atu hatene katak ita-nia Aman hadomi ita no tau matan ba ita. w20.02 p. 6 par. 16-17; p. 7 par. 20

Ita sente ona laran-taridu demais ka lae? Karik tanba ema seluk hatete ka halo buat ruma ka tanba buat neʼebé Ita hatete ka halo ona. Porezemplu, karik Ita halo ona sala ida no hanoin barak katak Jeová sei nunka perdua Ita. Ka karik Ita sente katak tanba Ita laran-taridu demais, neʼe hatudu Ita ladún iha fiar no Ita mak ema aat. Maibé, mai ita haree ezemplu balu husi Bíblia. Ana, profeta Samuel nia inan, nia mak feto neʼebé iha fiar boot. Maibé nia mós tenke tahan hasoru laran-taridu tanba ema iha ninia umakain trata aat nia. (1 Sam 1:7) Apóstolu Paulo iha fiar neʼebé metin, maibé nia sente “laran-taridu kona-ba kongregasaun hotu”. (2 Kor 11:28) Liurai David iha fiar neʼebé metin no Jeová hadomi tebes nia. (Após 13:22) Maibé David halo sala neʼebé halo nia sente laran-taridu demais. (Sal 38:4) Jeová fó kmaan no halo kontente sira ida-idak. w20.02 p. 20 par. 1-2

Ita dedika an ba Jeová hodi halo orasaun ba nia husi laran no fó-hatene nia katak Ita sei uza Ita-nia moris atu serbí nia ba nafatin. Bainhira Ita dedika an ba Maromak, Ita “nega” Ita-nia an rasik. Ita sai Jeová nian, no neʼe mak priviléjiu neʼebé boot. (Rom 14:8) Ita fó-hatene nia katak husi tempu neʼe ba oin, Ita sei fokus liu atu serbí nia no la buka ksolok ba Ita-nia an rasik. Ita-nia dedikasaun mak juramentu ida ka promesa sériu neʼebé Ita fó sai ba Maromak. Jeová la obriga ita atu halo juramentu neʼe. Maibé bainhira ita halo nuneʼe, nia hakarak ita atu kumpre. (Sal 116:12, 14) Ita-nia dedikasaun mak privadu no ema la hatene bainhira Ita dedika Ita-nia an ba Jeová. Maibé Ita hetan batizmu iha ema barak nia oin, baibain iha reuniaun boot sira. Bainhira Ita hetan batizmu, Ita hatudu ba ema seluk katak Ita dedika an ona ba Jeová. Tan neʼe Ita-nia batizmu hatudu sai ba ema seluk katak Ita hadomi Jeová ho Ita-nia laran tomak, moris tomak, neon tomak no kbiit tomak, no Ita deside ona atu serbí nia ba nafatin.​—Mc 12:30. w20.03 p. 9 par. 4-5

Satanás halo ema haluha kona-ba Jeová. Depois Jesus nia apóstolu sira mate, ema Kristaun balu neʼebé kontra Maromak komesa habelar hanorin falsu. (Após 20:29, 30) Ema Kristaun sira-neʼe komesa subar Maromak loos nia identidade. Porezemplu, bainhira sira kopia Bíblia, sira la uza tan Maromak nia naran no troka ho liafuan “Naʼi”. Hodi halo nuneʼe, sira halo susar ba lee-naʼin sira atu hatene katak Jeová la hanesan ho “naʼi” sira seluk neʼebé temi iha Bíblia laran. (1 Kor 8:5) Sira uza liafuan “Naʼi” atu refere ba Jeová no Jesus, neʼe halo susar ba ema atu komprende katak Jeová no Jesus la hanesan no sira iha pozisaun neʼebé la hanesan. (João 17:3) Ikusmai, neʼe hamosu doutrina Trindade, neʼebé la mai husi Bíblia. Rezultadu mak ema barak hanoin katak Maromak mak mistériu no susar atu hatene nia. Neʼe mak lia-bosok neʼebé aat tebes.​—Após 17:27. w19.06 p. 4 par. 11

Dalan ida atu kumpre didiʼak ita-nia serbisu haklaken mak atu aumenta ita-nia matenek hodi haklaken. (Prov 1:5; 1 Tim 4:13, 15) Ita iha priviléjiu boot tanba ita bele sai Jeová nia “maluk serbisu-naʼin”! (1 Kor 3:9) Bainhira Ita “buka-hatene loloos buat sira neʼebé importante liu” no tau fokus ba Ita-nia serbisu ba Maromak, Ita sei “serbí Jeová ho haksolok”. (Flp 1:10; Sal 100:2) Nuʼudar Maromak nia atan, Ita bele iha konfiansa katak nia sei fó Ita kbiit atu kumpre Ita-nia serbisu ba nia maski hasoru susar oioin ka problema saúde. (2 Kor 4:1, 7; 6:4) Maski Ita uza tempu uitoan ka barak atu haklaken, maibé Ita “iha razaun atu haksolok” bainhira Ita halo serbisu haklaken ho moris tomak. (Gal 6:4) Bainhira Ita kumpre didiʼak Ita-nia serbisu ba Maromak, Ita hatudu domin ba Jeová no Ita-nia maluk. ‘Hodi halo nuneʼe mak Ita sei salva Ita-nia an rasik no mós ema sira neʼebé rona Ita.’​—1 Tim 4:16. w19.04 p. 6 par. 15; p. 7 par. 17

Dalan ida neʼebé Satanás no ninia anju aat sira uza atu lohi ema mak liuhusi espiritizmu. Ema neʼebé halo espiritizmu dehan katak sira hatene ka bele kontrola buat neʼebé baibain ema labele. Porezemplu, sira balu dehan katak liuhusi siʼik futuru ka astrolojia, sira bele hatene buat neʼebé sei akontese. Ema seluk hatudu hanesan sira bele koʼalia ho ema neʼebé mate ona. Balu tan uza maninga no masonik, no sira karik koko atu fekit ema seluk. Peskiza ida neʼebé ema halaʼo iha nasaun 18 iha Amérika Latina no Karaíba, fó sai katak maizumenus besik porsentu 30 husi ema neʼebé tuir peskiza neʼe fiar ba matan-dook, maninga, ka masonik, no besik númeru neʼebé hanesan fiar katak ema bele koʼalia ho mate-klamar. Peskiza seluk mós halo iha nasaun 18 iha Áfrika. Husi ema sira neʼebé tuir peskiza iha rai sira-neʼe, maizumenus porsentu 50 dehan katak sira fiar matan-dook. Klaru katak, iha fatin hotu, ita tenke proteje ita-nia an husi espiritizmu. w19.04 p. 20-21 par. 3-4

Maromak Jeová odi hahalok aat hotu. (Sal 5:4-6) Nia odi tebes abuzu seksuál, neʼe mak krime neʼebé aat tebes. Tanba banati-tuir Jeová, Testemuña ba Jeová mós hakribi abuzu seksuál ba labarik no sei la tolera se hatene ema iha kongregasaun laran halo hahalok neʼe. (Rom 12:9) Hahalok abuzu seksuál ba labarik mak kontra duni “Kristu nia ukun-fuan”. (Gal 6:2) Buat hotu neʼebé Jesus hanorin liuhusi liafuan no hahalok mak bazeia ba domin no justisa. Tanba ema Kristaun loos halo tuir ukun-fuan neʼe, sira trata labarik iha dalan neʼebé halo labarik sira sente seguru no domin. Maibé abuzu seksuál ba labarik mak hahalok hanoin an deʼit, hahalok la justu neʼebé halo labarik sira la sente seguru no domin. Triste katak neʼe mós kona ema Kristaun loos. Tanbasá? Tanba “ema aat” sai barak liután, no balu koko atu tama ba kongregasaun. (2 Tim 3:13) Liután neʼe, ema balu neʼebé sai parte ba kongregasaun mós monu ba hakarak isin nian neʼebé sala no abuza labarik iha dalan seksuál. w19.05 p. 8 par. 1-3

Karik susar ba ema neʼebé depresaun atu halo orasaun. Karik ema neʼe sente la merese atu hakbesik ba Jeová. Se ita hakarak atu fó kmaan ba ema hanesan neʼe, ita bele husu atu halo orasaun hamutuk ho nia, no temi ninia naran iha orasaun. Ita bele fó sai ba Jeová katak ita no irmaun-irmán hotu hadomi tebes nia. Ita bele husu Jeová atu ajuda nia sente kalma no kmaan. Orasaun hanesan neʼe bele fó kmaan duni. Hanoin uluk antes koʼalia. Liafuan neʼebé koʼalia sai antes hanoin uluk bele hakanek. Maibé liafuan neʼebé diʼak bele kura. (Prov 12:18) Tan neʼe, halo orasaun ba Jeová atu ajuda ita hili liafuan neʼebé diʼak no fó kmaan. Hanoin-hetan katak Jeová nia Liafuan mak iha kbiit boot tebes. (Ebr 4:12) Bainhira ita fó kmaan ba ema seluk, ita fó-hanoin sira kona-ba Jeová nia domin. No ita labele haluha katak Jeová mak Maromak justisa nian. Jeová hatene ema ida-idak neʼebé sai vítima ba abuzu seksuál. Jeová haree buat hotu, no nia sei fó kastigu ba ema aat sira neʼebé la arrepende an.​—Núm 14:18. w19.05 p. 18 par. 18; p. 19 par. 19, 21

Satanás hakarak ita atu kontra hasoru Jeová. Atu kumpre ninia planu, nia koko atu troka dalan neʼebé ita hanoin atu bele iha hanoin hanesan ninian. Nia koko lohi ita hodi aproveita ita-nia hakarak sira atu ita bele laʼo tuir nia. (Kol 2:4) Satanás bele lohi duni ita ka lae? Sin, bele duni! Hanoin-hetan, Paulo hakerek avizu iha Koloso 2:8 ba ema Kristaun sira neʼebé espíritu santu hili ona, laʼós ba ema neʼebé la fiar. (Kol 1:2, 5) Iha tempu neʼebá, ema Kristaun iha perigu laran, no ohin loron, ita hasoru perigu neʼebé boot liu. (1 Kor 10:12) Tanbasá? Satanás soe tun tiha ba rai no nia koko makaʼas atu lohi Maromak nia povu neʼebé laran-metin. (Apok 12:9, 12, 17) Liután neʼe, ita moris daudaun iha tempu neʼebé ema aat no bosok-teen sira “sai aat liután”.​—2 Tim 3:1, 13. w19.06 p. 2 par. 1-2

Elias sai taʼuk bainhira Liurai-feto Jezabel jura atu oho nia. Elias halai toʼo área Beer-Seba. Nia sai laran-kraik toʼo “nia husu atu mate deʼit”. Saida mak halo nia sente hanesan neʼe? Elias laʼós ema perfeitu, nia “iha sentimentu hanesan ita”. (Tgo 5:17) Karik nia sente hanesan neʼe tanba nia estrese no sente kole loos. Karik Elias hanoin katak ninia hakaʼas an atu ajuda povu adora Jeová mak saugati deʼit, la iha ema ida mak serbí Jeová, só nia deʼit. (1 Reis 18:3, 4, 13; 19:10, 14) Jeová komprende Elias nia sentimentu no la sai hirus ba nia tanba fó sai ona ninia sentimentu. Maibé nia ajuda Elias atu hetan fali forsa. (1 Reis 19:5-7) Jeová mós ho laran-diʼak hadiʼa Elias nia hanoin liuhusi hatudu sai ninia forsa. Tuirmai, Jeová fó sai ba Elias katak sei iha ema naʼin-7.000 iha Izraél neʼebé lakohi adora Baal. (1 Reis 19:11-18) Hodi fó sai buat sira-neʼe, Jeová hatudu ninia domin ba Elias. w19.06 p. 15-16 par. 5-6

Sempre halo tuir matadalan sira. Se ita halo tuir matadalan husi irmaun neʼebé iha responsabilidade, ita sei hasees an husi problema. Porezemplu, iha rai ida neʼebé governu bandu ita-nia serbisu, irmaun sira neʼebé iha responsabilidade fó matadalan ba haklaken-naʼin sira atu la fahe publikasaun bainhira haklaken. Maibé, irmaun pioneiru ida sente katak nia hatene liu no nia fahe publikasaun sira. Rezultadu mak saida? Lakleur depois nia no ema seluk remata atu haklaken la formál, polísia halo interrogasaun ba sira. Tuir loloos, ema ida husi governu tuir sira no foti publikasaun neʼebé sira fahe ona. Ita aprende saida husi esperiénsia neʼe? Ita presiza halo tuir matadalan maski ita sente katak ita hatene liu. Jeová sempre haraik bensaun ba ita se ita apoia irmaun sira neʼebé hetan knaar atu dirije ita.​—Ebr 13:7, 17. w19.07 p. 12 par. 17

Kalan antes ema oho Naʼi Jesus, nia hatete katak ema sei odi sira hotu neʼebé deside atu sai ninia dixípulu. (João 17:14) Husi tempu neʼebá toʼo agora, ema neʼebé kontra adorasaun loos fó-terus ba ema Kristaun neʼebé laran-metin. Nuʼudar mundu nia rohan besik ba daudaun, ita hatene ita-nia inimigu sei kontra ita makaʼas liután. (Mt 24:9) Saida mak ita bele halo agora atu bele tahan bainhira ema fó-terus? La presiza imajina kona-ba buat aat hotu neʼebé bele akontese ba ita. Tanba karik neʼe bele halo ita sai taʼuk no para atu serbí Jeová antes ita hasoru problema ruma. (Prov 12:25; 17:22) Ita-nia “inimigu, Diabu” koko uza ita-nia sentimentu taʼuk atu kontra ita. (1 Ped 5:8, 9) Tan neʼe, importante atu hametin ita-nia relasaun ho Jeová agora. w19.07 p. 2 par. 1-3

Karik apóstolu sira kontente tebes bainhira sira halibur iha foho ida. Jesus neʼebé moris-hiʼas ona, husu sira atu hasoru nia iha fatin neʼe. (Mt 28:16) Karik neʼe mak tempu neʼebé “nia mosu ba maun-alin naʼin-500 liu iha tempu ida”. (1 Kor 15:6) Tanbasá mak Jesus husu ninia dixípulu sira atu hasoru nia? Atu fó sira mandamentu furak ida: “Laʼo bá no hanorin ema husi nasaun hotu atu sai haʼu-nia dixípulu.” (Mt 28:18-20) Ikusmai dixípulu sira neʼebé rona Jesus nia liafuan sai parte ba kongregasaun Kristaun. Kongregasaun neʼe nia knaar primeiru mak atu hanorin ema sai Kristu nia dixípulu. Ohin loron, iha kongregasaun Kristaun neʼebé loos rihun ba rihun iha mundu tomak, no kongregasaun sira-neʼe nia knaar primeiru mós hanesan. w19.07 p. 14 par. 1-2

Katuas área ida iha rai-Noruega hatete katak dala barak ema neʼebé lakohi koʼalia kona-ba Maromak, prontu atu koʼalia kona-ba mundu nia situasaun. Depois kumprimenta tiha ema, nia dehan: “Tuir Ita-nia hanoin, oinsá Ita bele hetan futuru neʼebé diʼak? Ita bele hetan futuru diʼak liuhusi polítiku-naʼin, sientista, ka ema seluk?” Depois rona didiʼak tiha, nia lee ka fó sai liafuan husi eskritura ida neʼebé hatudu kona-ba futuru neʼebé diʼak. Ema balu gosta Bíblia nia promesa kona-ba mundu sei nunka lakon no ema diʼak sei hela iha mundu ba nafatin. (Sal 37:29) Ita tenke uza dalan oioin atu komesa koʼalia ho ema. Tanbasá? Tanba buat neʼebé ema ida gosta karik ema seluk la gosta. Ema balu kontente atu koʼalia kona-ba Maromak ka Bíblia, maibé ema seluk gosta atu koʼalia uluk kona-ba informasaun seluk. Maski nuneʼe, ita tenke koʼalia ba ema hotu. (Rom 1:14-16) Tuir loloos, Jeová mak halo lia-loos moris iha ema laran-loos sira-nia laran.​—1 Kor 3:6, 7. w19.07 p. 22-23 par. 10-11

Maromak nia domin ba ita sei book ita atu hadomi ita-nia irmaun-irmán sira. (1 João 4:20, 21) Karik ita hanoin katak fasil deʼit atu hadomi ita-nia irmaun-irmán sira tanba ita adora Jeová no koko atu banati-tuir ninia hahalok sira. Ita halo tuir ezemplu husi Jesus neʼebé hatudu domin boot hodi entrega ninia moris ba ita-nia diʼak. Maski nuneʼe, dala ruma ita sente susar atu halo tuir mandamentu atu hadomi malu. Evódia no Síntike mak irmán sira neʼebé laran-manas no serbisu hamutuk ho apóstolu Paulo. Maibé, karik mosu problema entre sira no halo sira la liga malu. Iha Paulo nia karta ba sira-nia kongregasaun, Paulo temi sira-nia naran no fó konsellu neʼebé klaru ba sira “atu iha hanoin neʼebé hanesan”. (Flp 4:2, 3) Paulo sente katak nia presiza haruka kongregasaun tomak atu “kontinua halo buat hotu hodi la muramura no la haksesuk malu”.​—Flp 2:14. w19.08 p. 9 par. 6-7

Kongregasaun no mós irmaun ka irmán barak hakaʼas an atu ajuda ema neʼebé serbí tempu-tomak atu bele kontinua halaʼo sira-nia knaar. Irmaun-irmán sira ajuda iha dalan oioin hanesan anima sira atu kontinua sira-nia serbisu, fó osan ka sasán atu apoia, ka tau matan ba sira-nia família neʼebé hela dook. Se sira neʼebé serbí tempu-tomak simu knaar foun hodi muda ba Ita-nia kongregasaun, keta hanoin katak mudansa neʼe tanba sira ladún halo didiʼak sira-nia knaar ka hetan dixiplina. Maibé, ajuda sira atu sai toman ho mudansa neʼe. Simu sira ho laran no gaba sira kona-ba serbisu neʼebé sira halo ona, maski karik sira labele halo buat barak tanba sira-nia saúde la diʼak. Buka atu koñese didiʼak sira. Aprende husi sira-nia koñesimentu, treinu neʼebé sira simu, no sira-nia esperiénsia. Dala ruma, sira neʼebé simu knaar foun karik presiza Ita-nia ajuda atu buka hela-fatin, transporte, serbisu, no buat seluk neʼebé sira presiza. w19.08 p. 23-24 par. 12-13

Iha tempu neʼebá, Gog sei tau fiar ba “ema nia liman”, ka ninia tropa sira. (2 Krón 32:8, nota) Ita sei tau fiar ba Maromak Jeová. Karik nasaun sira haree ita-nia desizaun neʼe nuʼudar buat beik. Tanbasá? Tanba uluk Babilónia Boot nia maromak sira labele salva nia husi “animál fuik” no “dikur sanulu”. (Apok 17:16) Entaun Gog sei hanoin katak fasil deʼit atu halakon ita. Nia sei ataka Jeová nia povu “hanesan kalohan neʼebé taka rai”. Maibé ikusmai Gog sei rekoñese katak nia tama ona ba lasu ida. Hanesan Faraó iha Tasi Mean, Gog mós sei hatene katak nia funu hasoru Jeová. (Éx 14:1-4; Eze 38:3, 4, 18, 21-23) Kristu no ninia tropa husi lalehan sei defende Jeová nia povu no halakon nasaun hotu hamutuk ho sira-nia tropa. (Apok 19:11, 14, 15) Maibé, saida mak sei akontese ho Jeová nia inimigu boot, Satanás? Jesus sei soe nia no ninia anju aat sira ba rai-kuak kleʼan, no sira sei iha neʼebá durante tinan rihun ida.​—Apok 20:1-3. w19.09 p. 11-12 par. 14-15

Baibain ita hakarak atu buat diʼak neʼebé Jeová promete ona sai loos. Maibé, bainhira buat neʼebé ita hein haree hanesan demora atu sai loos, karik ida-neʼe bele hamenus ita-nia laran-manas. Karik ita mós sai laran-kraik. (Prov 13:12) Neʼe akontese ba irmaun-irmán balu maizumenus besik tinan 1914. Iha tempu neʼebá, ema Kristaun barak neʼebé iha esperansa atu bá lalehan hein atu simu sira-nia kolen iha tinan 1914. Bainhira neʼe la akontese, oinsá mak sira bele tahan situasaun neʼe? Sira la rende an bainhira la simu sira-nia kolen, tanba sira-nia fokus mak atu halo Jeová nia hakarak ho laran-metin, laʼós atu hetan kolen. Sira hakaʼas an atu kontinua tahan hodi halai toʼo rohan. Klaru katak ita hein namanas atu haree Jeová halo ninia naran sai santu, hatudu katak ninia dalan atu ukun mak loos no kumpre ninia promesa hotu. Tan neʼe fiar metin bá katak buat sira-neʼe sei akontese tuir tempu neʼebé Jeová deside ona. Antes tempu neʼe mai, diʼak atu ita hotu kontinua okupadu atu serbí Maromak, no nunka sente laran-kraik tanba ita-nia esperansa seidauk sai loos. w19.08 p. 4-5 par. 9-10

Husu ba Ita-nia an: ‘Ema koñese haʼu nuʼudar ema laran-maus no haraik an ka lae? Haʼu prontu atu halo serbisu kiʼik sira hodi serbí ema seluk ka lae? Haʼu hatudu laran-diʼak ka lae?’ Ema hotu neʼebé serbisu hamutuk ho Jesus sente kmaan no gosta hakbesik ba nia tanba ninia hahalok diʼak sira, no nia kontente atu treinu sira. (Lc 10:1, 19-21) Nia anima ninia dixípulu sira atu husu pergunta, no nia hakarak rona sira-nia ideia. (Mt 16:13-16) Hanesan ai-horis neʼebé sai buras tanba rega beibeik, dixípulu sira sai maduru. Sira tau atensaun ba lisaun neʼebé Jesus hanorin no fó fuan hodi halo serbisu diʼak. Ita iha responsabilidade ruma ka lae? Se nuneʼe, husu ba Ita-nia an: ‘Oinsá haʼu trata ema iha serbisu-fatin no iha uma? Haʼu haburas dame ka lae? Haʼu anima ema atu husu pergunta ka lae? Haʼu prontu atu rona ba sira-nia ideia ka lae?’ Ita lakohi sai hanesan ema Farizeu neʼebé sai hirus bainhira ema husu pergunta no fó-terus ba ema bainhira iha ideia la hanesan ho sira-nian.​​—Mc 3:1-6; João 9:29-34. w19.09 p. 20 par. 1; p. 23 par. 9-11

Dala ruma ukun-naʼin sira iha mundu uza fraze hanesan neʼe bainhira koʼalia kona-ba hametin relasaun entre nasaun sira. Maibé, deklarasaun kona-ba “dame no hakmatek” neʼebé Bíblia fó-hatene nanis mak diferente. Tanbasá? Bainhira neʼe akontese, ­karik ema sei hanoin katak ukun-naʼin sira iha mundu neʼe hetan ona susesu atu halo mundu sai seguru liu. Maibé realidade mak “sira sei lakon derrepente deʼit” durante tempu “terus boot”. (Mt 24:21) Ita la hatene saida mak sei book ukun-naʼin sira atu deklara ida-neʼe ka oinsá sira fó sai deklarasaun neʼe. No ita la hatene ukun-naʼin sira sei fó sai deklarasaun neʼe dala balu ka dala ida deʼit. Maibé ita hatene katak ita labele husik buat ida atu halo ita fiar katak ukun-naʼin sira bele lori dame ba mundu. Loloos, neʼe mak sinál katak “Jeová nia loron” atu komesa ona!​—1 Tes 5:2. w19.10 p. 8-9 par. 3-4

Funu Armagedon mak sei halakon sistema aat neʼe. Maibé, ita la presiza taʼuk. Tanbasá? Tanba neʼe mak Maromak nia funu. (Prov 1:33; Eze 38:18-20; Zac 14:3) Bainhira Jeová fó orden, Jesus Kristu sei lori Maromak nia tropa ba funu. Ninia alin sira neʼebé moris-hiʼas ona no mós anju rihun ba rihun sei akompaña nia. Sira hotu sei funu hasoru Satanás, anju aat sira, no tropa sira iha rai. (Apok 6:2; 17:14) Jeová promete ona katak ‘armas naran deʼit neʼebé ema halo hodi kontra ita sei la hetan susesu’. (Isa 54:17) Jeová nia atan sira neʼebé laran-metin ba nia mak “ema-lubun boot” neʼebé sei “liu terus boot”. Tuirmai sira sei kontinua serbí nia. (Apok 7:9, 13-17) Bíblia fó ita razaun barak atu iha konfiansa katak ita sei hetan salvasaun iha futuru! Ita hatene katak “Jeová sei proteje sira neʼebé laran-metin ba nia”. (Sal 31:23) Ema hotu neʼebé hadomi no hahiʼi Jeová sei kontente atu haree Jeová nia naran sai santu.​—Eze 38:23. w19.10 p. 18-19 par. 17-18

Agora ita sai besik daudaun ba “loron ikus” sira-nia rohan, tan neʼe karik ita sei hasoru susar neʼebé boot liu. (2 Tim 3:1) Porezemplu, iha nasaun ida iha Áfrika parte oeste akontese violénsia barak depois kampaña eleisaun nian. Durante fulan neen liu, ita-nia irmaun-irmán sira neʼebé hela iha fatin konflitu labele laʼo ho livre. Saida mak ajuda sira atu tahan susar sira-neʼe? Sira balu hela iha irmaun-irmán sira-nia uma iha fatin neʼebé seguru. Irmaun ida dehan: “Iha situasaun hanesan neʼe, haʼu kontente tanba haʼu hamutuk ho belun diʼak sira. Ami bele anima malu.” Bainhira “terus boot” komesa, ita sei sente kontente se ita iha belun neʼebé hadomi ita. (Apok 7:14) Tan neʼe, agora mak urjente tebes atu haburas relasaun diʼak nuʼudar belun. (1 Ped 4:7, 8) Tanbasá? Tanba ita-nia inimigu koko atu haketak ita liuhusi lia-bosok no informasaun falsu. Sira sei koko atu halo ita kontra malu. Maibé sira-nia hakaʼas an sei la hetan susesu. Sira sei nunka hakotu ita-nia domin ba malu. w19.11 p. 2 par. 1-2; p. 7 par. 19

Satanás mak “lia-bosok nia aman” no nia uza ema sira neʼebé nia kontrola atu habelar lia-bosok kona-ba Jeová no kona-ba ita-nia irmaun-irmán sira. (João 8:44) Porezemplu, ema neʼebé kontra lia-loos karik fó sai informasaun bosok kona-ba Jeová nia organizasaun iha internét ka televizaun ka buat sira seluk. Lia-bosok sira-neʼe mak parte ba Satanás nia ‘rama-oan neʼebé lakan ho ahi’. Saida mak ita presiza halo se ema ida koʼalia lia-bosok sira-neʼe ba ita? Ita lakohi duni atu rona! Tanbasá? Tanba ita tau fiar ba Jeová no konfia ita-nia irmaun-irmán sira. Tuir loloos, ita lakohi atu koʼalia ho ema neʼebé kontra lia-loos. Ita lakohi diskute malu ho sira kona-ba buat ruma maski ita hakarak deʼit atu hatene saida mak sira sei dehan halo ita-nia fiar sai fraku. Ita konsege kontrola an atu la rona ba lia-bosok ka diskute malu ho ema sira neʼebé kontra lia-loos ka lae? Neʼe mak buat neʼebé diʼak. Maibé ita tenke kontinua matan-moris tanba Satanás uza armas seluk atu kontra ita. w19.11 p. 15 par. 8; p. 16 par. 11

Bainhira halo desizaun ruma, buka hatene ita-nia motivu. Jeová hakarak ita atu hatudu laran-moos iha buat hotu. Tan neʼe, bainhira ita halo desizaun, ita lakohi lohi ita-nia an no ema seluk kona-ba ita-nia motivu. Se ita lohi ita-nia an, karik susar ba ita atu halo tuir ita-nia desizaun. Porezemplu, irmaun joven ida deside atu sai pioneiru regulár. Maibé liutiha tempu balu, nia sente susar atu kumpre oras pioneiru nian no nia la sente kontente ho ninia serbisu haklaken. Karik uluk nia hanoin katak ninia motivu atu sai pioneiru mak atu halo Jeová kontente. Maibé karik tuir loloos ninia razaun mak atu halo kontente ninia inan-aman ka ema seluk. Hanoin toʼok kona-ba estudante Bíblia ida neʼebé deside atu para fuma. Nia la fuma ba semana ida ka rua maski neʼe susar ba nia, maibé tuirmai nia fuma fali. Ikusmai nia konsege para fuma. Ninia domin ba Jeová no ninia hakarak atu halo kontente Jeová mak book nia atu manán ninia toman neʼe.​—Kol 1:10; 3:23. w19.11 p. 27 par. 9; p. 29 par. 10

Apóstolu Paulo fiar metin katak nia bele halai toʼo rohan no simu ninia kolen. Nuʼudar ema Kristaun neʼebé iha esperansa atu bá lalehan, nia hein namanas atu ‘simu kolen neʼebé Maromak bolu nia atu simu, katak moris iha lalehan’. Maibé, atu kumpre ida-neʼe, nia hatene katak nia tenke “kontinua halai”. (Flp 3:14) Paulo uza ai-knanoik neʼebé furak atu ajuda ema Kristaun iha Filipe atu kontinua fokus ba sira-nia kolen. Paulo fó-hanoin ba ema Filipe sira katak ikusmai sira sei sai sidadaun lalehan nian. (Flp 3:20, nota) Tanbasá sira tenke kontinua hanoin kona-ba neʼe? Iha tempu neʼebá, ema hakarak tebes atu sai sidadaun Roma nian. Maibé, ema Kristaun neʼebé iha esperansa atu bá lalehan, sei sai sidadaun ba governu neʼebé diʼak liu, no hetan benefísiu barak liu. Sai sidadaun iha Maromak nia governu mak folin-boot liu se kompara ho sai sidadaun Roma nian. Ohin loron, Kristu nia alin sira, hatudu ezemplu diʼak tanba kontinua halai hodi hetan kolen atu moris ba nafatin iha lalehan. w19.08 p. 6 par. 14-15

Liberdade neʼe mak diʼak liu fali liberdade neʼebé ema Izraél simu iha Tinan Livre nian. (Lev 25:8-12) Porezemplu, mane neʼebé sai livre husi moris nuʼudar atan iha Tinan Livre nian bele sai fali atan no ikusmai mate. Maibé liberdade neʼebé mai husi Jesus mak ba nafatin. Iha loron Pentekostes 33 EC, liuhusi espíritu santu Jeová hili apóstolu sira no mós ema laran-metin seluk atu sai ninia oan-hakiak no ikusmai sira sei simu moris-hiʼas ba lalehan atu ukun hamutuk ho Jesus. (Rom 8:2, 15-17) Sira mak ema primeiru ­neʼebé hetan benefísiu husi liberdade neʼebé Jesus fó sai iha sinagoga iha Nazaré. (Lc 4:16-19, 21) Mane no feto sira-neʼe la sai tan atan ba hanorin falsu no kostume sira neʼebé la bazeia ba Maromak nia Liafuan. Tuir Maromak nia haree sira ­livre ona husi sala neʼebé lori sira ba mate. Tinan Livre nian iha dalan simbóliku hahú bainhira Maromak nia espíritu tun ba Jesus nia dixípulu sira iha tinan 33 EC, no sei remata bainhira Jesus nia Ukun ba Tinan Rihun Ida remata. w19.12 p. 11 par. 11-12

Inan-aman, ajuda Ita-nia oan atu hili didiʼak belun. Inan-aman presiza hatene sira-nia oan ransu ho sé no saida mak sira halo. Neʼe katak sira presiza hatene sira-nia oan koʼalia ho sé liuhusi média sosiál no telemovel. Ema neʼebé ita-nia oan ransu bele fó influénsia ba oan sira-nia hahalok no hanoin. Inan-aman barak hakaʼas an atu halo arranju oioin atu sira-nia oan bele ransu ho ema sira neʼebé hatudu ezemplu diʼak kona-ba serbí Maromak. Porezemplu, N’Déni no Bomine, feen-laʼen husi Kosta Marfín konvida beibeik katuas área atu hela iha sira-nia uma. N’Déni hatete: “Desizaun neʼe lori influénsia diʼak ba ami-nia oan-mane. Ami-nia oan-mane komesa serbí nuʼudar pioneiru no agora dala ruma nia serbí nuʼudar katuas área.” Diʼak liu ba inan-aman atu treinu sira-nia oan husi kiʼik kedas. (Prov 22:6) Hanoin toʼok kona-ba Timóteo. Timóteo nia inan Eunice, no ninia avó-feto Loide komesa treinu nia “husi kiʼik kedas”.​—2 Tim 1:5; 3:15. w19.12 p. 25 par. 14; p. 26 par. 16-17

Ita bele sai belun diʼak. Porezemplu, ita la promete deʼit atu fó ajuda ba irmaun-irmán sira, maibé ita mós halo tuir ita-nia promesa hodi ajuda sira. (Mt 5:37; Lc 16:10) Bainhira ema sira neʼebé presiza ajuda hatene katak sira bele tau fiar ba ita, sira sei sente kmaan duni. Tanbasá? Irmán ida esplika: “Ita bele sente kalma tanba hatene katak ema neʼebé oferese ajuda sei halo buat neʼebé nia promete ona.” Ema sira neʼebé hasoru susar ka laran-kanek, dala barak sente kmaan kuandu fó sai sira-nia sentimentu ba belun diʼak. Maibé atu bele sai belun diʼak, ita presiza haburas hahalok pasiénsia. Bainhira Zhanna nia laʼen husik nia, nia hetan kmaan hodi fó sai ninia sentimentu ba ninia belun diʼak. Nia hatete: “Sira rona ho pasiénsia maski karik haʼu repete beibeik haʼu-nia liafuan.” Ita mós bele sai belun neʼebé diʼak hodi rona didiʼak. w20.01 p. 11 par. 9-11

Bíblia temi ema laran-metin barak neʼebé simu espíritu santu maibé sira la iha esperansa atu moris iha lalehan. Jeová nia espíritu santu dirije David. (1 Sam 16:13) Espíritu santu ajuda nia atu komprende buat kleʼan kona-ba Jeová no mós dirije nia atu hakerek parte balu iha Bíblia. (Mc 12:36) Maski nuneʼe, apóstolu Pedro hatete katak “David la saʼe ba lalehan”. (Após 2:34) João Batista sai “nakonu ho espíritu santu”. (Lc 1:13-16) Jesus hatete katak la iha ema ida mak boot liu fali João, maibé Jesus mós dehan katak João la sai parte ba Ukun lalehan nian. (Mt 11:10, 11) Jeová uza ninia espíritu santu atu fó kbiit ba ema sira-neʼe atu halo buat kmanek oioin, maibé nia la uza espíritu neʼe atu hili sira hodi moris iha lalehan. Neʼe katak sira ladún laran-metin ka lae? Lae. Maibé Jeová sei halo sira moris-hiʼas fali iha paraízu iha mundu.​—João 5:28, 29; Após 24:15. w20.01 p. 23 par. 15

Jeová konvida ona ita atu sai parte ba ninia família neʼebé adora nia. Neʼe konvite neʼebé espesiál tebes. Ema sira neʼebé dedika an ona ba Maromak no hatudu fiar ba ninia Oan-Mane nia sakrifísiu mak sai parte ba família neʼe. Ita mak família ida neʼebé kontente. Ita-nia moris iha objetivu, no ita haksolok tanba iha esperansa atu moris ba nafatin iha lalehan ka iha Paraízu iha rai. Jeová loke dalan ba ita atu sai parte ba ninia família tanba nia hadomi tebes ita. Maibé atu halo nuneʼe, Jeová tenke halo sakrifísiu boot. (João 3:16) Jeová sosa ita “ho folin karun”. (1 Kor 6:20) Liuhusi Jesus nia sakrifísiu, Jeová loke dalan ba ita atu iha relasaun diʼak ho nia. Ita bele bolu Ukun-Naʼin Boot Liu Hotu nuʼudar ita-nia Aman. No Jeová mak Aman neʼebé diʼak liu. Karik ita mós husu pergunta hanesan ho ema neʼebé hakerek salmo ida: “Saida mak haʼu sei fó hodi selu fali Jeová tanba buat diʼak hotu neʼebé nia halo ona ba haʼu?” (Sal 116:12) Resposta mak ita nunka bele selu fali ita-nia Aman iha lalehan. Maibé, ninia domin ba ita book ita atu hadomi fali nia. w20.02 p. 8 par. 1-3