Juñu

Profeta Samuel nia inan, Ana, tenke tahan hasoru susar oioin. Ba tinan barak nia la iha oan. (1 Sam 1:2) Ema Izraél hanoin katak se feto ida labele iha oan, neʼe katak Maromak la haraik bensaun ba nia. Neʼe halo Ana sente moe. (Gén 30:1, 2) Aat liután mak ninia laʼen iha feen seluk naran Penina, no Penina iha oan no hatún beibeik Ana kona-ba neʼe. Ana sai triste tebes ho ninia situasaun. Nia sai triste “toʼo nia tanis no lakohi han”. Nia “sente laran-susar tebes”. (1 Sam 1:7, 10) Oinsá Ana bele hetan kmaan? Ana fakar sai ninia sentimentu ba Jeová liuhusi orasaun. Depois neʼe, nia esplika ninia situasaun ba Amlulik Boot Eli. No Eli hatete: “Laʼo ho dame bá. Haʼu hein katak Izraél nia Maromak sei fó buat neʼebé ó husu ona ba nia.” Rezultadu mak saida? Ana “fila no han, no ninia oin la murón tan”. (1 Sam 1:17, 18) Orasaun ajuda Ana atu sente kmaan fali. w20.02 p. 21 par. 4-5

Lakleur tan, Jeová sei halakon sistema aat neʼe. Só ema neʼebé “prontu atu simu lia-loos neʼebé lori ba moris rohan-laek” mak sei hetan salvasaun. (Após 13:48) Tan neʼe klaru katak ita mós hakarak haklaken ba ita-nia família atu sira bele serbí Jeová hamutuk ita. Ita-nia Aman Jeová neʼebé hadomi ita “lakohi ema ida lakon maibé nia hakarak ema hotu atu arrepende sala”. (2 Ped 3:9) Ita tenke hanoin-hetan katak iha dalan sala no loos atu fahe mensajen neʼebé lori salvasaun. Karik ita hatudu respeitu bainhira haklaken ba ema neʼebé ita la koñese, maibé ita koʼalia nakloke deʼit bainhira haklaken ba ita-nia família. Kuandu ita hanoin fali dala primeiru neʼebé ita haklaken ba ita-nia família, karik ita barak sente arrepende ho dalan neʼebé ita haklaken. Diʼak atu hanoin kona-ba konsellu neʼebé apóstolu Paulo fó, neʼebé temi iha eskritura ba ohin, bainhira ita koko atu koʼalia ba ita-nia família. Se lae, duké ajuda sira karik ita bele hakanek sira-nia laran. w19.08 p. 14-15 par. 3-5

Ita sente oinsá bainhira Ita aprende lia-loos sira tuirmai neʼe kona-ba Oan? Jesus iha pozisaun segundu iha universu. Nia prontu atu fó ninia moris nuʼudar sakrifísiu. Bainhira ita hatudu liuhusi ita-nia hahalok katak ita fiar ba Jesus nia sakrifísiu, ita bele hetan perdua ba ita-nia sala, haburas relasaun diʼak ho Maromak, no hetan moris rohan-laek. (João 3:16) Jesus mak ita-nia Amlulik Boot. Nia hakarak ajuda ita atu hetan benefísiu husi ninia sakrifísiu no iha relasaun diʼak ho ­Maromak. (Ebr 4:15; 7:24, 25) Tanba Jesus mak Liurai ba Maromak nia Ukun, Jeová sei uza nia atu halo santu Jeová nia naran, halakon ema aat hotu, no lori bensaun ba nafatin iha Paraízu. (Mt 6:9, 10; Apok 11:15) Jesus husik ezemplu ba ita atu halo tuir. Nia uza ninia moris atu halo Maromak nia hakarak no neʼe sai nuʼudar ezemplu ba ita. (João 4:34) Bainhira Ita fiar lia-loos husi Bíblia kona-ba Jesus, Ita sei hadomi liután Maromak nia Oan doben. Domin neʼe sei book Ita atu uza Ita-nia moris hodi halo Maromak nia hakarak hanesan Jesus halo. w20.03 p. 10 par. 12-13

Jesus halo orasaun beibeik durante ninia loron ikus iha rai. Bainhira nia hahú komemorasaun kona-ba ninia mate, nia halo orasaun kona-ba paun no tua-uvas. (1 Kor 11:23-25) Antes husik fatin neʼebé sira selebra Páskua, nia halo orasaun hamutuk ho ninia dixípulu sira. (João 17:1-26) Iha kalan neʼe, bainhira nia no ninia dixípulu sira toʼo iha Getsémani, nia halo orasaun beibeik. (Mt 26:36-39, 42, 44) No Jesus nia liafuan ikus antes nia mate mak orasaun. (Lc 23:46) Jesus halo orasaun ba Jeová kona-ba buat hotu neʼebé akontese iha ninia loron ikus. Razaun ida tanbasá Jesus bele tahan susar mak nia sadere ba ninia Aman liuhusi orasaun. Maibé ninia apóstolu sira la halo orasaun beibeik iha kalan neʼe. Rezultadu mak sira la hatudu aten-brani bainhira hasoru susar. (Mt 26:40, 41, 43, 45, 56) Bainhira ita hasoru susar, ita bele laran-metin nafatin se ita halo tuir Jesus nia ezemplu no “harohan beibeik”. w19.04 p. 8-9 par. 4-5

Jeová odi espiritizmu! Nia hatete ba ema Izraél: “Iha imi-nia leet labele iha ema neʼebé sunu ninia oan-mane ka oan-feto iha ahi, ema neʼebé siʼik futuru, ema neʼebé halo masonik, ema neʼebé buka sinál oioin atu siʼik futuru, matan-dook, ema neʼebé fekit ema seluk, ema neʼebé husu ba ema neʼebé koko atu koʼalia ho ema mate ka husu ba ema neʼebé siʼik futuru, ka ema neʼebé husu ema mate. Tanba Jeová hakribi ema neʼebé halo buat sira-neʼe.” (Deut 18:10-12) Maski ema Kristaun la presiza tan halo tuir Ukun-Fuan neʼebé Jeová fó ba ema Izraél. Maibé ita hatene katak ninia sentimentu kona-ba espiritizmu nunka troka. Jeová fó avizu ba ita kona-ba espiritizmu tanba nia hatene katak Satanás uza espiritizmu atu halo aat ba ema. Satanás uza ida-neʼe atu habelar lia-bosok, hanesan lia-bosok katak ema mate sira moris hela iha mundu seluk. (Ecle 9:5) Satanás mós uza ida-neʼe atu halo taʼuk ema no halo sira fila kotuk ba Jeová. Ninia objetivu mak atu ema neʼebé halo espiritizmu tau fiar ba anju aat sira duké ba Jeová. w19.04 p. 21 par. 5-6

Abuzu seksuál ba labarik mak sala neʼebé sériu. Ema neʼebé abuza labarik iha dalan seksuál lori konsekuénsia aat ba labarik nia moris tomak. Nia aproveita labarik nia konfiansa ba nia, no halo labarik la sente seguru. Ita tenke proteje labarik husi hahalok aat hanesan neʼe, no ita tenke fó kmaan no ajuda labarik sira neʼebé sai ona vítima. (1 Tes 5:14) Se ema neʼebé parte ba kongregasaun abuza labarik iha dalan seksuál, nia hafoʼer kongregasaun nia naran. (Mt 5:16; 1 Ped 2:12) Ami la husik deʼit ema neʼebé halo hahalok aat atu nafatin iha kongregasaun laran se sira la arrepende an no hafoʼer kongregasaun nia naran. Se ema ida iha kongregasaun kontra lei, hanesan abuza labarik iha dalan seksuál, nia halo sala kontra autoridade sira. (Kompara ho Apóstolu 25:8.) Maski katuas sira la iha podér atu fó kastigu ba ema neʼebé kontra lei estadu nian, maibé sira la proteje ema neʼebé abuza labarik iha dalan seksuál atu hetan kastigu tanba ninia sala. w19.05 p. 9 par. 4-7

Ita bele hetan solusaun ba problema hotu tanba Jeová mak ita-nia Mestre Boot. (Isa 30:20, 21) Ninia Liafuan hanorin ita atu “iha kbiit, no sai prontu hodi halo serbisu diʼak hotu”. (2 Tim 3:17) Kuandu ita moris tuir Bíblia nia hanorin, ita bele sai matenek liu fali ema neʼebé dehan katak diʼak atu moris tuir “matenek mundu neʼe nian”. (Sal 119:97-100) Baibain, mundu nia matenek bele book ita atu halo tuir hakarak isin nian. Karik ita sente susar atu kontrola ita-nia hanoin no hahalok atu la hanesan ho ema iha mundu neʼe. Tan neʼe, Bíblia esplika: “Kuidadu bá atu ema ida la kaer imi hanesan dadur liuhusi filozofia no hanorin bosok neʼebé la iha folin, neʼebé tuir deʼit ema nia lisan.” (Kol 2:8) Bíblia hatete nanis ona katak iha loron ikus sira, ema sei “hadomi deʼit ksolok”. (2 Tim 3:4) Liután neʼe, hahalok seksuál neʼebé livre hamosu moras oioin, hanesan AIDS. Neʼe mak evidénsia neʼebé hatudu katak mundu nia matenek mak buat neʼebé beik.​—2 Ped 2:19. w19.05 p. 21 par. 1-2; p. 22 par. 4-5

Satanás lohi ema Izraél atu fiar katak adora maromak falsu hanesan povu jentiu sira, bele lori rezultadu diʼak. Ema jentiu sira fiar katak sira-nia maromak sei halo udan tun se sira halo serimónia relijiaun nian. Ema Izraél neʼebé la laran-metin ba Jeová fiar katak sira presiza adora Baal atu hapara bailoro naruk. Satanás mós aproveita sira-nia hakarak atu halo hahalok la morál. Nasaun jentiu sira adora sira-nia maromak hodi halo hahalok seksuál oioin neʼebé foʼer. Neʼe inklui feto no mane neʼebé faʼan an iha templu. Ema jentiu sira-neʼe simu hahalok omoseksuál no sala seksuál seluk tan no haree buat sira-neʼe nuʼudar baibain deʼit. (Deut 23:17, 18; 1 Reis 14:24) Sira fiar katak hodi halo serimónia neʼebé la morál, neʼe sei book sira-nia maromak atu halo rai sai buras. Ema jentiu nia serimónia neʼebé la morál dada ema Izraél nia atensaun no book sira atu adora Baal. w19.06 p. 2 par. 3; p. 4 par. 7-8

Ema barak neʼebé serbí tempu-tomak, inklui sira neʼebé uluk serbí iha Betel mós simu knaar foun. Irmaun-irmán laran-metin sira-neʼe sente susar atu husik knaar neʼebé sira hafolin. Se ita mak simu knaar foun, saida mak bele ajuda ita atu sai toman ho mudansa? Loroloron lee no ­medita kona-ba Eskritura sira atu bele hakbesik nafatin ba Jeová. No mós, hakaʼas an atu hola parte beibeik iha serbisu haklaken hamutuk ho Ita-nia kongregasaun foun. Jeová nunka haluha ema neʼebé kontinua serbí nia ho laran-metin maski sira labele halo buat barak hanesan uluk. Halaʼo moris simples. Keta husik hanoin resin kona-ba moris iha Satanás nia mundu neʼe atu hanetik Ita serbí Maromak. (Mt 13:22) Keta rona ba belun, família, ka ema neʼebé la serbí Jeová se sira koko anima Ita atu buka osan barak. (1 João 2:15-17) Tau fiar ba Jeová neʼebé promete atu tau matan ba Ita-nia presiza espirituál, emosaun, no isin nian “iha tempu neʼebé loloos”.​—Ebr 4:16; 13:5, 6. w19.08 p. 20 par. 4; p. 21-22 par. 7-8

Ita hasoru daudaun situasaun neʼebé lori estrese ka lae? Ita sente kmaan tebes atu hatene katak Jeová komprende ita-nia laran-susar bainhira ita hasoru problema. Nia hatene buat neʼebé ita bele halo no labele halo, nia mós hatene ita-nia sentimentu no hanoin. (Sal 103:14; 139:3, 4) Hodi sadere ba Jeová, ita sei simu ajuda atu tahan hasoru problema sira neʼebé lori estrese. Estrese bele halo ita hanoin negativu no sente laran-kraik. Se ida-neʼe akontese, hanoin-hetan katak Jeová sei ajuda ita atu tahan hasoru estrese. Oinsá mak Jeová bele ajuda Ita? Nia konvida Ita atu fó sai Ita-nia problema no Ita-nia sentimentu. Nia sei hatán Ita-nia orasaun. (Sal 5:3; 1 Ped 5:7) Tan neʼe, halo orasaun beibeik ba Jeová kona-ba Ita-nia problema. Maromak sei la koʼalia ba Ita diretamente, maibé nia sei koʼalia ba Ita liuhusi ninia Liafuan, Bíblia, no mós ninia organizasaun. Ezemplu sira iha Bíblia bele fó kmaan no esperansa ba Ita. Ita-nia irmaun-irmán sira mós bele anima Ita.​​—Rom 15:4; Ebr 10:24, 25. w19.06 p. 16 par. 7-8

Bainhira ema fó-terus, halo orasaun ba Jeová, fó sai Ita-nia sentimentu “hanesan fakar sai bee” no fó-hatene ba Ita-nia Aman domin nian kona-ba Ita-nia taʼuk no neon-susar hotu. (Lam 2:19) Bainhira Ita halo beibeik orasaun hanesan neʼe, Ita sei hakbesik liután ba Jeová. (Rom 8:38, 39) Fiar metin katak Maromak sei haraik duni bensaun liuhusi ninia Ukun. (Núm 23:19) Se Ita la fiar metin ba Maromak nia promesa sira, fasil liu ba Satanás no ninia ema sira atu halo Ita taʼuk. (Prov 24:10; Ebr 2:15) Uza tempu atu estuda Maromak nia promesa neʼebé nia sei kumpre liuhusi ninia Ukun no tanbasá Ita bele fiar katak neʼe sei sai loos. Oinsá mak ida-neʼe bele ajuda Ita? Hanoin toʼok esperiénsia husi Stanley Jones. Nia tama komarka durante tinan hitu tanba ninia fiar. Saida mak ajuda nia atu tahan ho laran-metin? Nia hatete: “Haʼu-nia fiar mak metin tanba haʼu hatene kona-ba Maromak nia Ukun no buat neʼebé Ukun neʼe sei halo, no haʼu nunka duvida kona-ba neʼe. Tan neʼe, la iha ema ida mak bele halo haʼu husik Jeová.” Se Ita fiar metin ba Maromak nia promesa sira, Ita sei la rende an tanba taʼuk.​​—Prov 3:25, 26. w19.07 p. 2 par. 1; p. 3 par. 6-7

Tanbasá hanorin ema sai dixípulu mak importante? Tanba Kristu nia dixípulu deʼit mak bele sai belun ho Maromak. Liután neʼe, ema neʼebé halo tuir Kristu halaʼo moris neʼebé diʼak liu no iha esperansa atu moris ba nafatin iha futuru. (João 14:6; 17:3) Jesus fó responsabilidade importante ida ba ita, maibé laʼós ita mesak mak halo serbisu neʼe. Apóstolu Paulo hakerek kona-ba ninia an no ninia belun sira, hodi dehan: “Ita mak Maromak nia maluk serbisu-naʼin.” (1 Kor 3:9) Jeová no Kristu fó priviléjiu boot ba ema neʼebé la perfeitu. Hanorin ema sai dixípulu lori ksolok boot ba ita. Hakat primeiru atu ajuda ema sai dixípulu mak hodi buka ema sira neʼebé hakarak atu aprende kona-ba Jeová. Kuandu ita fó-hatene ema hotu kona-ba Jeová, ita hatudu katak ita mak Testemuña ba Jeová. Ita mós hatudu katak ita mak ema Kristaun neʼebé loos bainhira ita halo tuir Kristu nia mandamentu atu haklaken. w19.07 p. 15 par. 3-5

Ema barak gosta Bíblia nia prinsípiu neʼebé diʼak ba moris loroloron nian. Irmán ida iha Novaiorke, baibain vizita ema neʼebé koʼalia língua Xinés atu fahe Bíblia nia mensajen, no nia hatete: “Haʼu hakaʼas an atu hatudu interese no rona didiʼak ba ema. Se haʼu hatene katak sira foin muda mai husi rai seluk, haʼu husu sira: ‘Ita toman ona ho situasaun foun neʼe ka lae? Ita hetan ona serbisu ka lae? Ema haree Ita ho diʼak ka lae?’” Dala ruma, neʼe loke dalan atu fó sai Bíblia nia hanorin. Bainhira tempu diʼak, irmán neʼe dehan: “Tuir Ita-nia hanoin, saida mak xave atu iha relasaun diʼak ho ema seluk? Haʼu bele hatudu ba Ita lia-dadolin ida husi Bíblia ka lae? Neʼe dehan: ‘Hahú ­istori malu mak hanesan loke odamatan neʼebé tahan netik bee-lihun boot ida; tan neʼe, diʼak liu husik tiha fatin neʼe antes mosu istori malu.’ Tuir Ita-nia hanoin, konsellu neʼe bele ajuda ita atu iha relasaun diʼak ho ema seluk ka lae?” (Prov 17:14) Ida-neʼe bele ajuda ita hatene sé mak gosta atu ita vizita fali. w19.07 p. 23 par. 13

Sira neʼebé muda ba knaar foun, presiza liu atu ita komprende sira-nia situasaun. Karik sira ka sira-nia família tenke tahan hasoru problema saúde. Karik sira triste tanba ema neʼebé sira hadomi mate. Maski sira la fó sai, maibé karik sira mós triste tanba hanoin sira-nia belun iha fatin uluk neʼebé sira serbí. Presiza tempu atu sira la sente tan hanesan neʼe. Ita-nia apoiu no ezemplu bele ajuda sira atu sai toman ho situasaun foun. Irmán ida neʼebé serbí iha rai seluk ba tinan barak hatete: “Iha haʼu-nia knaar uluk, haʼu estuda Bíblia ho ema loroloron. Iha haʼu-nia knaar foun, susar tebes atu hetan oportunidade atu loke Bíblia ka hatudu vídeo bainhira haklaken. Maibé haklaken-naʼin sira konvida haʼu atu tuir sira bá vizita fali no estuda Bíblia. Neʼe ajuda haʼu iha hanoin neʼebé loos. Haʼu aprende oinsá atu komesa koʼalia ba ema iha haklaken-fatin foun neʼe. Buat hotu neʼe ajuda haʼu atu hetan fali ksolok.” w19.08 p. 22 par. 10; p. 24 par. 13-14

Hanesan Evódia no Síntike, dala ruma susar atu hadomi ita-nia irmaun-irmán sira tanba ita tau fokus ba sira-nia sala. Ita hotu halo sala loroloron. Se ita tau fokus ba sala neʼebé ema seluk halo, neʼe sei hanetik ita atu hatudu domin ba sira. Porezemplu, se irmaun ida haluha atu ajuda ita hamoos Reuniaun-Fatin, karik ita bele sai hirus. Se ita komesa hanoin kona-ba sala hotu neʼebé nia halo ona, ita-nia hirus sei sai boot liután no ita-nia domin ba nia sei menus. Se Ita iha problema hanesan neʼe, diʼak atu medita kona-ba lia-loos tuirmai neʼe: Jeová haree ita-nia sala no ita-nia maluk sira-nia sala. Maski nuneʼe, Jeová nafatin hadomi ita no ita-nia maluk. Tan razaun neʼe, ita tenke banati-tuir Jeová nia domin no kontinua tau fokus ba ita-nia maluk nia hahalok diʼak. Bainhira ita hakaʼas an atu hadomi ita-nia irmaun-irmán, ita sei hametin ita-nia unidade.​​—Flp 2:1, 2. w19.08 p. 9-10 par. 7-8

Jeová hadomi ema neʼebé haraik an. Só ema neʼebé hatudu haraik an neʼebé loos mak bele iha relasaun besik ho nia. Maibé, “nia hatene ema loko an husi dook deʼit”. Ita hotu hakarak halo Jeová kontente no sente ninia domin, tan neʼe ita iha razaun diʼak atu aprende oinsá atu haburas hahalok haraik an. Ema neʼebé haraik an la haree ninia an importante liu fali ema seluk. Nia la foti an. Nia komprende katak Jeová mak boot liu fali nia. Nia mós komprende katak ema seluk diʼak liu nia iha buat balu. (Flp 2:3, 4) Ema balu haree hanesan haraik an, maibé tuir loloos lae. Karik neʼe mak sira-nia hahalok moe deʼit. Ka, sira hatudu hahalok respeitu tanba kultura ka inan-aman mak haruka sira. Maibé tuir loloos, karik sira mak ema neʼebé foti an. Ikusmai sira sei hatudu sai saida mak iha sira-nia laran.​—Lc 6:45. w19.09 p. 2 par. 1, 3-4

“Liafuan diʼak kona-ba ita-nia Naʼi Jesus” inklui lia-loos hotu neʼebé Jesus hanorin. Ita halo tuir liafuan diʼak neʼe kuandu ita aplika ida-neʼe iha ita-nia moris. Ita mós halo tuir liafuan diʼak neʼe hodi tau uluk Jeová nia Ukun, moris tuir ninia matadalan sira, no haklaken kona-ba Maromak nia Ukun. (Mt 6:33; 24:14) Ita mós tenke apoia Kristu nia alin sira nuʼudar sira halaʼo sira-nia responsabilidade atu haklaken liafuan diʼak no hanorin ema sai dixípulu. (Mt 25:31-40) Lakleur tan, sira sei selu fali laran-diʼak neʼebé “bibi-malae seluk” hatudu ba sira. (João 10:16) Antes funu Armagedon hahú, ema restu husi ema naʼin-144.000 sei hetan moris-hiʼas ba lalehan nuʼudar espíritu neʼebé nunka mate. Tuirmai, ema naʼin-144.000 hotu sei sai parte ba tropa lalehan nian neʼebé sei halakon Gog no proteje “ema-lubun boot” neʼebé serbí Jeová. (Apok 2:26, 27; 7:9, 10) Sin, ema-lubun boot sei kontente tebes tanba sira apoia Kristu nia alin sira bainhira sira sei iha rai. w19.09 p. 12-13 par. 16-18

Tanbasá ita sente kmaan bainhira halo serbisu neʼebé Jesus fó ba ita? Tanba ita iha ulun-naʼin sira neʼebé diʼak liu. Maski Jeová mak Maromak Aas Liu Hotu, maibé nia laʼós ulun-naʼin neʼebé aat no la hatene fó agradese. Nia hafolin ita-nia serbisu. (Ebr 6:10) Nia fó kbiit neʼebé ita presiza atu bele kumpre ita-nia responsabilidade. (2 Kor 4:7; Gal 6:5, nota) Ita-nia Liurai Jesus fó ezemplu perfeitu ba ita. (João 13:15) No katuas sira neʼebé tau matan ita koko atu banati-tuir Jesus, ita-nia “bibi-atan boot”. (Ebr 13:20; 1 Ped 5:2) Sira hakaʼas an atu hatudu laran-diʼak, aten-brani, no anima ita nuʼudar sira tau matan no proteje ita. No mós ita iha belun neʼebé diʼak liu. Ema seluk la iha belun neʼebé hadomi malu ka halo serbisu ho objetivu hanesan ho ita. Hanoin toʼok: Ita iha priviléjiu atu serbisu hamutuk ho ema neʼebé iha morál aas maibé la sente katak sira mak diʼak liu. Sira haree ema seluk boot liu fali sira. Sira haree ita laʼós deʼit nuʼudar maluk serbisu-naʼin maibé nuʼudar belun. Relasaun neʼe besik tebes toʼo sira prontu atu mate ba ita. w19.09 p. 20 par. 1; p. 23 par. 12-14

Iha eskritura neʼe, apóstolu Paulo temi kona-ba “Jeová nia loron”. (1 Tes 5:1-6) Iha kontestu neʼe, fraze neʼe refere ba tempu neʼebé nasaun sira komesa ataka “Babilónia Boot”, katak relijiaun falsu hotu, no remata ho Armagedon. (Apok 16:14, 16; 17:5) Paulo mós fó-hatene ita buat neʼebé ita presiza halo atu sai prontu ba “Jeová nia loron”. Ita labele “toba-dukur hanesan ema seluk”. Ita tenke “hadeer nafatin” no kontinua matan-moris atu neutrál nafatin no nunka envolve an iha polítiku. Se ita envolve an, ita sai “mundu neʼe nian”. (João 15:19) Ita hatene katak Maromak nia Ukun deʼit mak bele lori dame ba mundu. Ita mós hakarak ajuda ema seluk atu aprende buat neʼebé Bíblia fó-hatene nanis atu akontese. Bainhira terus boot komesa, la iha tan oportunidade ba ema atu komesa serbí Jeová. Tan neʼe mak ita-nia serbisu haklaken urjente tebes agora. w19.10 p. 8 par. 3; p. 9 par. 5-6

Depois hakerek tiha mensajen iha surat-tahan lulun, Jeremias tenke tau fiar ba ninia belun Baruc atu fó sai mensajen neʼe. (Jer 36:5, 6) Baruc ho aten-brani kumpre knaar perigozu neʼe. Ita bele fiar katak Jeremias kontente tebes bainhira Baruc bá templu no lee surat-tahan lulun ba povu neʼe. (Jer 36:8-10) Ulun-naʼin sira husi Judá rona buat neʼebé Baruc halo, no sira haruka nia atu lee surat-tahan lulun neʼe ba sira. (Jer 36:14, 15) Ulun-naʼin sira-neʼe deside atu fó-hatene ba Liurai Jeoquim kona-ba Jeremias nia liafuan. Liurai Jeoquim sai hirus tebes bainhira rona liafuan neʼebé Jeremias hakerek iha surat-tahan lulun, tan neʼe nia sunu ida-neʼe no haruka ema atu kaer Jeremias no Baruc. Maibé, Jeremias foti surat-tahan lulun ida tan no fó neʼe ba Baruc. Tuirmai Jeremias fó sai Jeová nia mensajen, no Baruc hakerek fali “liafuan hotu neʼebé hakerek ona iha surat-tahan lulun ida uluk neʼebé Liurai Jeoquim husi Judá sunu tiha”.​​—Jer 36:26-28, 32. w19.11 p. 3-4 par. 4-6

Jeová bele sai buat naran deʼit neʼebé nia presiza atu kumpre ninia hakarak. Porezemplu, Jeová sai Mestre, Maromak neʼebé fó kmaan, no Maromak neʼebé fó sai liafuan diʼak. Neʼe mak knaar balu deʼit neʼebé nia halo. (Isa 48:17; 2 Kor 7:6; Gal 3:8) Maski nuneʼe, dala barak nia uza ema atu kumpre ninia hakarak. (Mt 24:14; 28:19, 20; 2 Kor 1:3, 4) Jeová mós bele fó ita matenek no forsa atu bele sai buat naran deʼit hodi kumpre ninia hakarak. Neʼe mak signifikadu husi Jeová nia naran neʼebé matenek-naʼin barak esplika. Ita hotu hakarak Jeová uza ita, maibé irmaun-irmán balu karik duvida katak Jeová bele uza sira. Tanbasá? Karik sira sente katak sira labele halo buat barak tanba sira-nia idade, situasaun, ka abilidade. Irmaun-irmán seluk karik sente katak buat neʼebé sira halo daudaun mak toʼo ona no la presiza aumenta tan. w19.10 p. 20 par. 1-2

Se ita hadomi sasán no rikusoin, neʼe bele halo fraku ita-nia fiar no hanetik ita atu halo serbisu barak ba Jeová. Apóstolu Paulo hatete: “Ema neʼebé sai nuʼudar soldadu la envolve an ho negósiu atu buka moris tanba nia hakarak atu halo kontente ema neʼebé hatama nia nuʼudar soldadu.” (2 Tim 2:4) Tuir loloos, soldadu Roma labele envolve an iha negósiu. Hanesan soldadu neʼebé diʼak, ita lakohi husik buat ruma dada ita-nia atensaun husi buat neʼebé importante liu, neʼe mak atu halo kontente ita-nia komandante Jeová no Jesus. Neʼe mak folin-boot liu fali buat hotu neʼebé Satanás nia mundu bele oferese. Ita tenke buka-hatene buat sira neʼebé importante liu atu ita bele iha tempu no enerjia atu serbí Maromak no tau matan ba ita-nia eskudu fiar nian no mós ba ekipamentu funu nian sira seluk neʼebé Maromak fó ba ita. Ita tenke matan-moris nafatin! Tanbasá? Apóstolu Paulo fó avizu katak “ema sira neʼebé hakarak duni atu sai riku” sei ‘hadook an husi fiar’.​—1 Tim 6:9, 10. w19.11 p. 17 par. 12, 14-15

Antes “Jeová nia loron”, sei iha deklarasaun kona-ba “dame no hakmatek”. (1 Tes 5:1-6) Liafuan “Jeová nia loron” iha 1 Tesalónika 5:2 refere ba “terus boot”. (Apok 7:14) Oinsá ita bele hatene terus boot atu hahú ona? Bíblia fó sai katak ukun-naʼin sira sei deklara “dame no hakmatek” no neʼe sei sai nuʼudar sinál katak terus boot atu hahú ona. Ulun-naʼin relijiaun nian sei hola parte ka lae? Karik. Maski nuneʼe, deklarasaun neʼe mak lia-bosok neʼebé mai husi anju aat sira. Lia-bosok neʼe perigu tebes tanba sei halo ema hanoin katak sira moris seguru, maibé tuir loloos terus boot liu hotu atu hahú ona. Sin, “sira sei lakon derrepente deʼit, hanesan feto isin-rua neʼebé sente moras tuur-ahi nian derrepente deʼit”. Oinsá ho Jeová nia povu sira neʼebé laran-metin? Maski Jeová nia loron hahú derrepente deʼit, maibé sira sei prontu ba ida-neʼe. w19.09 p. 9 par. 7-8

Bainhira halo desizaun ruma, halo planu neʼebé espesífiku. Se Ita iha planu neʼebé espesífiku, neʼe bele ajuda Ita atu kumpre buat neʼebé Ita hahú ona. Porezemplu, karik Ita deside atu lee Bíblia beibeik. Maibé se Ita la iha oráriu espesífiku, karik Ita labele kumpre Ita-nia objetivu. Ka karik katuas sira iha kongregasaun deside atu vizita beibeik ema iha kongregasaun, maibé liutiha tempu balu, sira seidauk halo tuir desizaun neʼe. Atu bele hetan susesu, sira bele husu pergunta sira hanesan: “Ami halo ona lista kona-ba irmaun no irmán neʼebé ami bele vizita ka lae? Ami deside ona tempu espesífiku atu vizita sira ka lae?” No mós, iha hanoin neʼebé loos. Ita la iha tempu, forsa ka kbiit atu halo buat hotu neʼebé ita hakarak halo. Tan neʼe, halo planu neʼebé Ita bele kumpre tuir Ita-nia abilidade. Karik Ita presiza troka Ita-nia desizaun se Ita rekoñese katak Ita-nia kbiit la toʼo atu halo tuir ida-neʼe. w19.11 p. 29 par. 11-12

Isaias 65:21-23 fó sai profesia kona-ba moris iha mundu. Ita sei la moris nuʼudar baruk-teen. Maibé Bíblia hatudu katak iha tempu neʼebá Maromak nia povu sei halo serbisu diʼak neʼebé halo sira kontente. Bainhira Kristu nia Ukun ba Tinan Rihun Ida remata, ita bele fiar katak ema “sei sai livre husi atan ba isin neʼebé dodok, no hetan liberdade neʼebé furak nuʼudar Maromak nia oan sira”. (Rom 8:21) Jeová arranja atu ema Izraél bele iha tempu atu serbisu no mós deskansa, no nia mós sei halo nuneʼe ba ninia povu durante Kristu nia Ukun ba Tinan Rihun Ida. Ita sei iha tempu atu adora Maromak. Iha mundu foun mós ita presiza adora Maromak atu bele hetan kontente neʼebé loos. Ita hotu neʼebé laran-metin ba Maromak sei kontente durante Kristu nia Ukun ba Tinan Rihun Ida tanba ita sei halo serbisu neʼebé halo ita kontente no serbí Maromak hamutuk. w19.12 p. 12 par. 15; p. 13 par. 17-18

Liafuan Ebraiku “hanorin” signifika “fó-hanoin beibeik ka repete beibeik hodi hanorin”. Atu halo nuneʼe, inan-aman presiza gasta tempu beibeik hamutuk ho sira-nia oan. Karik dala ruma, inan-aman sai laran-kraik tanba sira presiza repete beibeik matadalan ba oan sira. Maski nuneʼe, inan-aman bele haree ida-neʼe nuʼudar oportunidade atu ajuda sira-nia oan komprende Maromak nia Liafuan no aplika ida-neʼe. Tan neʼe koñese didiʼak Ita-nia oan. Salmo 127 kompara labarik sira ho rama-oan. (Sal 127:4) Rama-oan bele halo husi buat oioin no iha medida la hanesan, nuneʼe mós ho labarik sira, labarik ida-idak la hanesan. Tan neʼe, inan-aman presiza buka-hatene oinsá atu treinu oan ida-idak. Feen-laʼen ida husi rai-Izraél neʼebé haboot oan naʼin-rua ho susesu atu adora Jeová, fó sai buat neʼebé ajuda sira, hodi dehan: “Ami naʼin-rua halaʼo estuda Bíblia ho oan ketaketak.” Tuir loloos, família ida-idak nia ulun bele deside se sira presiza ka iha posibilidade ka lae atu halaʼo estudu hanesan neʼe. w19.12 p. 26-27 par. 18-20

Bainhira ita hasoru susar, ita agradese tebes ba maluk sira neʼebé ajuda ita. Ryan neʼebé ninia aman mate derrepente tanba asidente hatete: “Bainhira ita hasoru problema, susar atu halo atividade sira neʼebé baibain ita halo. Ita sente kmaan duni bainhira ema ruma ajuda ita, maski neʼe mak buat kiʼik deʼit.” Keta haluha katak maski Ita halo buat kiʼik deʼit atu ajuda ema seluk, maibé ida-neʼe bele fó kmaan ba sira. Dixípulu Marcos mak ema Kristaun neʼebé okupadu tebes. Maski nuneʼe, nia mós uza tempu atu fó kmaan ba apóstolu Paulo, no Paulo hatene katak nia bele husu Marcos nia ajuda. Ohin loron mós iha ema neʼebé hatudu hahalok hanesan Marcos hodi fó kmaan ba ema seluk ho hakarak rasik. Irmán Angela agradese tebes kuandu ema hatudu hahalok hanesan neʼe ba nia kuandu ema oho ninia família ida. Angela dehan: “Bainhira belun sira hatudu katak sira hakarak duni atu ajuda, neʼe halo fasil ba ita atu hakbesik ba sira. Ita bele nota katak sira la dada an ka taʼuk atu ajuda.” Entaun diʼak atu husu ba Ita-nia an: ‘Ema koñese haʼu nuʼudar ema neʼebé hakarak atu fó kmaan ba maluk fiar-naʼin sira ka lae?’ w20.01 p. 11-12 par. 14-16

Oinsá mak ema ida neʼebé atu bá lalehan han paun no hemu tua-uvas “la ho respeitu” iha Memoriál? Nia sei la hatudu respeitu se nia han paun no hemu tua-uvas maibé la moris tuir Jeová nia ukun-fuan sira. (Ebr 6:4-6; 10:26-29) Ema sira neʼebé Maromak hili rekoñese katak sira tenke laran-metin nafatin se sira hakarak atu simu ‘kolen neʼebé Maromak bolu sira atu simu, katak moris iha lalehan liuhusi Kristu Jesus’. (Flp 3:13-16) Jeová nia espíritu santu ajuda ninia atan sira atu haraik an, no la foti an. (Éf 4:1-3; Kol 3:10, 12) Tan neʼe, sira neʼebé atu bá lalehan la sente katak sira diʼak liu fali ema seluk. Sira hatene katak dala ruma Jeová la fó espíritu santu barak liu ba sira duké ba ninia atan seluk. Sira la sente katak sira komprende liu lia-loos iha Bíblia duké ema seluk. No sira nunka fó-hatene ema seluk katak Maromak mós hili ona ema neʼe atu bá lalehan no anima nia atu han paun no hemu tua-uvas iha Memoriál. Sira ho haraik an rekoñese katak Jeová deʼit mak bele hili ema atu bá lalehan. w20.01 p. 27-28 par. 4-5

Jeová hakarak ita atu hakbesik ba nia no koʼalia ba nia. Nia anima ita atu la “kole atu halo orasaun”, no nia sempre rona ba ita. (Rom 12:12) Nia nunka okupadu demais ka kole atu rona ba ita. No ita rona ba nia liuhusi lee ninia Liafuan Bíblia no ita-nia publikasaun sira neʼebé ajuda ita atu komprende Bíblia. Ita mós rona ba nia liuhusi tau atensaun didiʼak ba reuniaun sira. Se ita no Jeová koʼalia ba malu beibeik, neʼe sei ajuda ita atu hakbesik nafatin ba nia. Jeová hakarak ita atu fakar sai ita-nia laran tomak ba nia liuhusi orasaun. (Sal 62:8) Diʼak atu husu ba ita-nia an: ‘Haʼu-nia orasaun mak hanesan karta neʼebé kopia deʼit no la mai husi laran, ka haʼu-nia orasaun mak hanesan karta neʼebé haʼu hakerek rasik no mai husi laran?’ Klaru katak Ita hadomi tebes Jeová, no Ita hakarak atu iha relasaun neʼebé metin ho nia. Atu halo nuneʼe, Ita presiza koʼalia ba nia beibeik. Fó sai Ita-nia sentimentu ba nia. Fahe Ita-nia ksolok no Ita-nia laran-kanek ba nia. Iha konfiansa katak Ita bele hakbesik ba nia atu husu ajuda. w20.02 p. 9 par. 4-5

Jeová fó responsabilidade importante ba katuas sira atu tau matan ba ninia povu. Katuas sira bele aprende buat barak hodi estuda dalan neʼebé Neemias tau matan ba Jeová nia povu. Nuʼudar governadór iha Judá, Neemias iha podér barak. (Neem 1:11; 2:7, 8; 5:14) Hanoin toʼok susar balu neʼebé Neemias hasoru. Nia haree katak povu hafoʼer ona templu no la fó apoia ba ema Levi hodi tuir Ukun-Fuan. Ema Judeu sira kontra ukun-fuan kona-ba loron Sábadu, no mane balu kaben ho feto estranjeiru. Governadór Neemias presiza rezolve situasaun neʼe. (Neem 13:4-30) Neemias la uza sala ninia podér hodi obriga Maromak nia povu atu halo tuir ninia hanoin. Maibé Neemias buka matadalan husi Jeová liuhusi orasaun, no hanorin Jeová nia Ukun-Fuan ba povu. (Neem 1:4-10; 13:1-3) Neemias mós ho haraik an serbisu hamutuk ho ninia maluk sira hodi ajuda sira atu harii fali moru Jeruzalein.​—Neem 4:15. w19.09 p. 15-16 par. 9-10