Jullu

Bainhira ema koʼalia liafuan kroʼat ka hatudu hahalok aat ba ita, karik ita sente laran-taridu, liuliu se ema neʼe mak ita-nia belun diʼak ka família. Atu hamenus laran taridu, ita bele aprende buat barak husi ezemplu iha Bíblia kona-ba Ana neʼebé ninia laʼen nia feen seluk hatún beibeik. (1 Sam 1:12) Hanesan Ana, ita bele koʼalia naruk ho Jeová kona-ba ita-nia laran-taridu no ita-nia taʼuk. Ita la presiza hatoʼo buat hotu ho perfeitu ka uza liafuan furak oioin. Dala ruma ita tanis bainhira fó sai ita-nia laran-susar ba Jeová. Maski nuneʼe, Jeová nunka kole atu rona ba ita. Ita mós presiza hanoin-hetan konsellu neʼebé hakerek iha Filipe 4:6, 7. Apóstolu Paulo hatete katak ita presiza fó agradese ba Jeová liuhusi orasaun. Iha razaun barak atu fó agradese ba Jeová tanba fó ita moris, kria buat furak oioin, hatudu domin neʼebé laran-metin ba ita no fó ita esperansa furak. w20.02 p. 21 par. 3, 6

Kbiit atu koʼalia mak prezente husi Jeová. (Éx 4:10, 11; Apok 4:11) Liuhusi Bíblia mak Jeová ajuda ita atu komprende oinsá uza prezente neʼe ho didiʼak. Diʼak atu ita sempre prontu koʼalia kona-ba Jeová no ninia Ukun. (Mt 24:14; Rom 10:14) Hodi halo nuneʼe, ita banati-tuir Jesus. Razaun importante ida tanbasá Jesus mai rai mak atu fó sai lia-loos kona-ba ninia Aman. (João 18:37) Maibé ita presiza hanoin-hetan katak dalan neʼebé ita koʼalia mós importante. Tan neʼe, bainhira ita koʼalia ba ema seluk kona-ba Jeová, ita presiza halo ida-neʼe ho “laran-maus no respeitu kleʼan”, no ita presiza hanoin ema nia sentimentu no fiar. (1 Ped 3:15) Hodi halo nuneʼe, ita sei hanorin sira no bele book sira-nia laran. Katuas sira labele dada an atu koʼalia se sira haree katak irmaun ka irmán ida presiza simu konsellu ruma. Maibé sira presiza buka tempu diʼak atu koʼalia hodi la hamoe irmaun ka irmán neʼe. w20.03 p. 18-19 par. 2-4

Ita bele halo orasaun kona-ba saida? Ita bele halo orasaun hodi husu Jeová atu halo ita-nia “fiar boot liután”. (Lc 17:5; João 14:1) Ita presiza fiar tanba Satanás sei koko ema hotu neʼebé halo tuir Jesus. (Lc 22:31) Oinsá mak fiar bele ajuda ita? Bainhira ita halo ona buat hotu tuir ita-nia kbiit hodi tahan susar neʼe, fiar sei book ita atu entrega susar neʼe ba Jeová nia liman. Ita sente dame tanba ita fiar katak Jeová hatene diʼak liu oinsá atu rezolve situasaun neʼe duké ita. (1 Ped 5:6, 7) Orasaun ajuda ita atu nafatin sente dame maski ita hasoru susar oioin. Hanoin toʼok esperiénsia husi katuas kongregasaun ida neʼebé laran-metin naran Robert, neʼebé idade 80 liu. Nia dehan: “Konsellu iha Filipe 4:6, 7 ajuda ona haʼu atu tahan susar barak iha haʼu-nia moris. Haʼu tenke tahan hasoru susar ekonomia nian. No haʼu lakon haʼu-nia priviléjiu nuʼudar katuas ba tempu uitoan.” Saida mak ajuda Robert atu nafatin sente dame? Nia dehan: “Bainhira haʼu komesa sente neon-susar, haʼu halo kedas orasaun. Kuandu haʼu halo orasaun beibeik no harohan, haʼu sente liután dame iha laran.” w19.04 p. 9-10 par. 5-7

Abuza labarik iha dalan seksuál mak sala hasoru Maromak. Bainhira ema ida halo sala hasoru ema seluk, nia mós halo sala hasoru Jeová. Hanoin toʼok ezemplu ida husi Ukun-Fuan neʼebé Maromak fó ba ema Izraél. Ukun-Fuan dehan katak ema neʼebé lohi ninia maluk, ema neʼe “la hatudu laran-metin ba Jeová”. (Lev 6:2-4) Entaun, se ema ida iha kongregasaun abuza labarik iha dalan seksuál, nia la laran-metin ba Maromak tanba nia lohi labarik no halo labarik la sente seguru. Ema iha kongregasaun neʼebé abuza labarik iha dalan seksuál hafoʼer duni Jeová nia naran. Tan neʼe mak ita tenke rekoñese katak abuzu seksuál ba labarik mak sala neʼebé aat tebes hasoru Maromak. Artigu husi Livru Haklaken no Matan-moris bá! esplika ona oinsá vítima ba abuzu seksuál bele tahan sira-nia laran-kanek, oinsá ema seluk bele ajuda no anima sira, no oinsá inan-aman bele proteje sira-nia oan. Katuas kongregasaun sira mós hetan ona treinu husi Bíblia kona-ba saida mak sira tenke halo bainhira ema abuza labarik iha dalan seksuál. Organizasaun kontinua hafoun matadalan kona-ba saida mak katuas sira presiza halo. w19.05 p. 9-10 par. 8-9

Maromak nia Liafuan mak hanesan surik kroʼat no bele hatudu sai lia-bosok neʼebé Satanás habelar. (Éf 6:17) Porezemplu, Maromak nia Liafuan hatudu sai lia-bosok neʼebé dehan katak ema mate bele koʼalia ho ema moris. (Sal 146:4) Maromak nia Liafuan mós fó-hanoin ita katak só Jeová deʼit mak bele fó sai ho loloos kona-ba futuru. (Isa 45:21; 46:10) Se ita lee no medita Maromak nia Liafuan beibeik, ita sei odi no la simu lia-bosok neʼebé anju aat sira hakarak ita atu fiar. Tan neʼe ita lakohi halo buat naran deʼit neʼebé liga ho espiritizmu. Nuʼudar ema Kristaun loos, ita sei nunka halo espiritizmu. Porezemplu, ita la bá hasoru matan-dook ka koko atu koʼalia ho ema mate iha dalan seluk tan. Ita hasees an husi kostume atu hakoi mate neʼebé bazeia ba fiar katak ema mate sira sei moris hela iha fatin ruma. No ita la uza astrolojia ka siʼik futuru hodi koko atu buka-hatene saida mak akontese iha futuru. Ita hatene katak toman sira hanesan neʼe mak perigozu tebes tanba iha ligasaun ho Satanás no anju aat sira. w19.04 p. 21-22 par. 8-9

Ema neʼebé moris tuir mundu nia matenek la hafolin Bíblia nia matadalan kona-ba morál, no hatete katak Bíblia la lójiku. Ema sira-neʼe karik husu: ‘Se Maromak mak kria ita ho hakarak seksuál nian, tanbasá nia haruka ita atu kontrola ida-neʼe?’ Sira hanoin sala katak ema tenke halo tuir deʼit sira-nia hakarak. Maibé Bíblia nia hanorin kona-ba morál halo ema iha dignidade tanba hanorin ema atu luta hasoru hakarak neʼebé sala. (Kol 3:5) Liután neʼe, Jeová mós halo arranju kaben nian atu ema bele kumpre hakarak seksuál nian iha dalan neʼebé loos. (1 Kor 7:8, 9) La hanesan ho mundu nia matenek, Bíblia hanorin ita atu iha hanoin neʼebé loos kona-ba relasaun seksuál. Bíblia hatete katak relasaun seksuál bele lori ksolok. (Prov 5:18, 19) Maibé, Bíblia mós hatete: “Imi ida-idak tenke hatene oinsá atu kontrola imi-nia isin rasik hodi bele santu nafatin no iha dignidade, atu la kaan hahalok seksuál neʼebé labele kontrola.”​​—1 Tes 4:4, 5. w19.05 p. 22-23 par. 7-9

Maromak sei la husik nasaun sira atu halakon ninia povu. Ninia povu orgullu atu lori ninia naran no sira halo tuir ona ninia mandamentu hodi hasees an husi Babilónia Boot. (Após 15:16, 17; Apok 18:4) Sira mós hakaʼas an atu ajuda ema seluk hasees an husi Babilónia Boot. Tan neʼe, Jeová nia atan sei la hetan kastigu neʼebé Babilónia Boot hetan. Maski nuneʼe, sira-nia fiar sei hetan koko. (Eze 38:2, 8) Bainhira relijiaun falsu hotu lakon, sei hela deʼit relijiaun ida iha mundu, neʼe mak Jeová nia povu. Tuir loloos, Satanás sei sai hirus. Nia sei hatudu sai ninia hirus liuhusi “liafuan foʼer”, katak lia-bosok neʼebé mai husi anju aat atu book grupu nasaun hotu ataka Jeová nia atan sira. (Apok 16:13, 14) Grupu nasaun sira-neʼe hanaran “Gog husi rai-Magog”. Bainhira nasaun sira ataka Maromak nia povu, funu Armagedon sei hahú.​—Apok 16:16. w19.09 p. 11 par. 12-13

Iha ema Izraél nia tempu, Satanás uza relijiaun falsu atu habelar hahalok la morál. Ohin loron, nia mós halo buat neʼebé hanesan. Relijiaun falsu sira tolera no mós halo ema hanoin katak hahalok la morál mak buat neʼebé normál. Rezultadu mak ema barak neʼebé hatete katak sira serbí Maromak la halo tuir ninia matadalan kona-ba morál. Apóstolu Paulo esplika iha ninia karta ba ema Roma kona-ba rezultadu husi hahalok la morál. (Rom 1:28-31) “Buat neʼebé la diʼak” neʼebé Paulo temi inklui sala seksuál oioin hanesan omoseksuál. (Rom 1:24-27, 32; Apok 2:20) Importante tebes atu kaer metin ba Bíblia nia hanorin! Ema nia filozofia kontra malu ho Jeová nia prinsípiu neʼebé loos. Ida-neʼe la ajuda ema haburas hahalok sira neʼebé mai husi espíritu santu, maibé haburas “hahalok sira neʼebé husi isin”. (Gal 5:19-23) Neʼe book ema atu sai foti an no loko an, no rezultadu mak “ema sei hadomi deʼit sira-nia an”. (2 Tim 3:2-4) Hahalok aat sira-neʼe la hanesan duni ho laran-maus no haraik an neʼebé Maromak hakarak ninia atan sira atu haburas.​—2 Sam 22:28. w19.06 p. 5-6 par. 12-14

Elias serbí Jeová durante tempu susar no nia hasoru susar barak. Jeová haruka Elias atu fahe serbisu ba Eliseu. Hodi halo nuneʼe, Jeová fó ba Elias belun diʼak ida neʼebé bele ajuda nia tahan hasoru sentimentu laran-kraik. Hanesan neʼe mós, bainhira ita fó sai ita-nia sentimentu ba ita-nia belun ida, nia bele ajuda ita atu tahan hasoru ita-nia estrese. (2 Reis 2:2) Se Ita hanoin katak Ita labele fahe Ita-nia sentimentu ba ema ruma, halo orasaun ba Jeová atu ajuda Ita buka ema Kristaun maduru ida neʼebé bele anima Ita. Jeová ajuda Elias atu tahan hasoru estrese no serbí ho laran-metin ba tinan barak. Elias nia esperiénsia fó ita esperansa. Dala ruma, ita sente estrese toʼo ita-nia isin no hanoin sai kole tebes. Maski nuneʼe, se ita sadere ba Jeová, nia sei fó mai ita forsa atu kontinua serbí nia.​—Isa 40:28, 29. w19.06 p. 15 par. 4; p. 16 par. 9-10

Ita bele sai aten-brani liután hodi haklaken liafuan diʼak kona-ba Maromak nia Ukun ba ema seluk. Tanbasá? Tanba kuandu ita haklaken, ita aprende atu tau fiar ba Jeová no la taʼuk ba ema. Hanesan ema nia uat sai forte liután bainhira treinu, ita mós sai aten-brani liután bainhira ita haklaken husi uma ba uma, iha fatin públiku, iha dalan la formál, no iha fatin negósiu. Se agora ita sai aten-brani liután atu haklaken, ita sei sai prontu atu kontinua haklaken maski governu bandu. (1 Tes 2:1, 2) Ita bele aprende husi irmán laran-metin ida neʼebé hatudu aten-brani tebes. Maski irmán Nancy Yuen aas metru ida ho balu deʼit, maibé susar atu halo nia taʼuk. Nia lakohi para atu haklaken kona-ba Maromak nia Ukun. Rezultadu mak nia tama komarka durante tinan 20 iha rai-Xina. No ema neʼebé halo interrogasaun ba nia dehan katak nia mak “ema ulun-toos liu hotu” iha nasaun neʼe. w19.07 p. 5-6 par. 13-14

Ema balu karik hakarak tebes atu aprende lia-loos husi Bíblia, maibé ema barak foufoun ladún interese. Karik ita presiza ajuda sira atu iha interese hodi aprende liután. Atu bele hetan susesu bainhira haklaken, ita presiza prepara didiʼak. Hili tópiku sira neʼebé karik ema sei gosta. Tuirmai halo planu kona-ba oinsá atu fahe tópiku neʼe. Porezemplu, karik Ita bele husu ba uma-naʼin: “Haʼu bele husu Ita-nia hanoin kona-ba buat ruma? Problema barak neʼebé ita hasoru ohin loron mós kona ema iha mundu tomak. Tuir Ita-nia hanoin, iha ka lae governu ida neʼebé bele rezolve problema sira iha mundu tomak?” Tuirmai Ita bele koʼalia kona-ba Daniel 2:44. Ka karik Ita bele dehan ba ema seluk: “Tuir Ita-nia hanoin, saida mak xave atu haboot oan hodi iha hahalok diʼak?” Tuirmai koʼalia kona-ba Deuteronómio 6:6, 7. Ita sente kontente tebes bainhira ita ajuda ema sai Kristu nia dixípulu. w19.07 p. 15 par. 4, 6-7

Irmaun ida iha Ázia parte leste, iha esperiénsia atu haklaken ba ema neʼebé la iha relijiaun, nia hatete: “Baibain kuandu ema ida dehan: ‘Haʼu la fiar Maromak’, neʼe signifika nia la adora maromak sira neʼebé ema barak adora iha área neʼe. Entaun dala barak haʼu konkorda katak baibain ema mak halo maromak sira no neʼe laʼós maromak. Baibain haʼu lee Jeremias 16:20 no tuirmai husu: ‘Oinsá ita bele hatene maromak ida-neʼebé mak loos no ida-neʼebé mak ema halo?’ Haʼu rona didiʼak ba sira, no tuirmai haʼu lee Isaias 41:23: ‘Konta ba ami buat neʼebé sei akontese iha futuru, atu nuneʼe ami bele hatene katak imi mak maromak.’ Depois neʼe, haʼu hatudu ezemplu ida kona-ba oinsá Jeová fó-hatene nanis kona-ba futuru.” Irmaun ida seluk dehan: “Haʼu hatudu ezemplu balu kona-ba matenek husi Bíblia, profesia neʼebé kumpre ona, no ukun-fuan neʼebé kontrola universu. Tuirmai, haʼu esplika oinsá buat hotu neʼe hatudu katak iha Kriadór neʼebé moris no matenek. Bainhira ema komesa simu ideia katak Maromak iha, haʼu hatudu buat neʼebé Bíblia koʼalia kona-ba Jeová.” w19.07 p. 23-24 par. 14-15

Buat importante sira-neʼe inklui Jeová nia naran sai santu, ninia hakarak sira sai loos, no dame ho unidade iha kongregasaun. (Mt 6:9, 10; João 13:35) Bainhira ita tau uluk buat sira-neʼe iha ita-nia moris, ita hatudu katak ita hadomi Jeová. Apóstolu Paulo mós hatete katak ita tenke “laran-moos”. Dala ruma liafuan Gregu neʼe mós bele tradús nuʼudar “la iha sala”. Neʼe la signifika ita tenke sai perfeitu. Maibé Jeová sei haree ita nuʼudar ema perfeitu se ita hakaʼas an atu hametin ita-nia domin no tau uluk buat sira neʼebé importante liu. Dalan ida atu hatudu ita-nia domin mak hakaʼas an atu la halo ema seluk sidi. Mandamentu kona-ba la halo ema seluk sidi mak sériu tebes. Oinsá mak ita bele halo ema seluk sidi? Karik liuhusi atividade halimar nian, roupa, ka serbisu neʼebé ita hili. Buat neʼebé ita halo karik la sala. Maibé se ema seluk nia konxiénsia sente la diʼak no sira sidi, neʼe mak buat neʼebé sériu.​—Mt 18:6. w19.08 p. 10 par. 9-11

Hahú husi tinan 1935, Testemuña sira komprende katak ema-lubun boot neʼebé João haree iha ninia vizaun mak ema Kristaun neʼebé laran-metin no iha esperansa atu moris ba nafatin iha rai. (Apok 7:9, 10) Atu bele liu terus boot, sira tenke aprende kona-ba Jeová no adora nia antes Jesus nia Ukun ba Tinan Rihun Ida hahú. Sira tenke hatudu fiar metin atu bele ‘halai sees husi buat hotu neʼebé atu akontese’ antes Kristu nia Ukun ba Tinan Rihun Ida hahú. (Lc 21:34-36) Ema-lubun boot haksolok ho sira-nia esperansa. Sira komprende katak Jeová mak deside se ninia atan sira sei serbí nia iha rai ka lalehan. Ema sira neʼebé iha esperansa atu bá lalehan no mós ema-lubun boot rekoñese katak sira bele simu sira-nia kolen tanba deʼit Jeová nia laran-diʼak boot neʼebé nia hatudu liuhusi Jesus Kristu nia sakrifísiu.​—Rom 3:24. w19.09 p. 28 par. 10; p. 29 par. 12-13

Ita simu knaar foun ka lae? Ita bele hetan susesu. Keta hanoin katak Ita ladún halo didiʼak Ita-nia knaar uluk nian ka Ita la iha ona folin. Hanoin kona-ba dalan oioin neʼebé Jeová ajuda Ita agora no kontinua haklaken. Banati-tuir ema Kristaun sira neʼebé laran-metin iha apóstolu sira-nia tempu. “Sira neʼebé namkari, sira laʼo iha rai tomak hodi haklaken liafuan diʼak”. (Após 8:1, 4) Ita-nia hakaʼas an atu kontinua haklaken sei lori rezultadu diʼak. Porezemplu, governu duni sai pioneiru barak husi nasaun ida no sira muda ba nasaun viziñu neʼebé mós presiza haklaken-naʼin liután iha língua neʼebé sira hatene. Liutiha fulan balu deʼit, sira harii grupu foun balu iha língua neʼebé sira haklaken bá. Ita-nia ksolok tenke mai husi ita-nia relasaun diʼak ho Jeová. Tan neʼe, kontinua laʼo ho Jeová, buka matadalan, matenek, no apoia husi nia. Hanoin-hetan katak Ita gosta Ita-nia knaar uluk nian tanba Ita hakaʼas an atu ajuda ema iha neʼebá. Entaun, hakaʼas an atu ajuda ema iha Ita-nia knaar foun no haree oinsá Jeová ajuda Ita atu gosta knaar neʼe.​—Ecle 7:10. w19.08 p. 24-25 par. 15-16

Ita tenke hakruʼuk ba Jeová tanba nia mak ita-nia Kriadór. Tan neʼe, nia iha direitu atu fó matadalan ba ninia kriasaun sira. (Apok 4:11) Maibé razaun seluk atu halo tuir nia mak tanba ninia dalan atu ukun mak diʼak liu hotu. Ukun-naʼin barak iha podér no ukun ema seluk. Se kompara ho sira, Jeová mak Ukun-Naʼin neʼebé matenek liu, iha domin boot, laran-sadiʼa, no laran-diʼak. (Éx 34:6; Rom 16:27; 1 João 4:8) Ita hakruʼuk ba Jeová liuhusi hakaʼas an atu halo tuir nia iha buat hotu no hakaʼas an atu luta hasoru ita-nia hakarak atu sadere ba ita-nia matenek rasik. (Prov 3:5) Se ita aprende liután kona-ba Jeová nia hahalok furak sira, fasil liu ba ita atu hakruʼuk ba nia. Tanbasá? Nia halo buat hotu tanba ninia hahalok furak sira. (Sal 145:9) Bainhira ita aprende liután kona-ba Jeová, ita mós sei hadomi nia liután. No bainhira ita hadomi Jeová, ita la presiza ukun-fuan barabarak kona-ba buat neʼebé ita tenke halo ka la halo. w19.09 p. 14 par. 1, 3

Satanás halo ema lakon esperansa. Porezemplu, nia hakarak ita fiar katak Jeová sei nunka perdua ita-nia sala no la hadomi ita. Neʼe mak lia-bosok aat tebes neʼebé halo ema laran-kraik.(João 8:44) Maromak perdua ita-nia sala sira bainhira ita hakbesik ba Kristu. (Mt 11:28) Tuir loloos, Jeová hadomi tebes ita hotu. (Rom 8:32, 38, 39) Responsabilidade neʼebé Jesus fó ba ita la hanesan ho ita-nia responsabilidade seluk. Porezemplu, bainhira remata serbisu atu manán osan, karik ema barak sente kole no mós la kontente. Maibé, bainhira ita uza tempu barak atu serbí Jeová no Kristu, ita sente kontente tebes. Karik ita kole no tenke obriga an atu tuir reuniaun. Maibé, dala barak bainhira ita fila husi reuniaun, ita sente fresku no hetan forsa. Ita mós sente nuneʼe bainhira ita haklaken no estuda Bíblia mesak. Ita-nia hakaʼas an la saugati deʼit. w19.09 p. 20 par. 1; p. 23-24 par. 15-16

Hela tempu uitoan deʼit ona atu “Jeová nia loron” komesa, no Jeová hakarak ita atu haklaken ho badinas nafatin. Ita presiza “sai badinas nafatin iha Naʼi nia serbisu”. (1 Kor 15:58) Bainhira Jesus koʼalia kona-ba akontesimentu boot sira neʼebé sei akontese durante loron ikus sira, nia dehan: “Liafuan diʼak neʼe ema tenke haklaken uluk iha nasaun hotu.” (Mc 13:4, 8, 10; Mt 24:14) Bainhira ita bá haklaken, ita hola parte atu kumpre Bíblia nia profesia neʼe. Tinan-tinan, serbisu haklaken kontinua ba oin no ema barak tan rona kona-ba Maromak nia Ukun. Porezemplu, hanoin toʼok kona-ba oinsá haklaken-naʼin sira aumenta iha mundu tomak durante loron ikus sira. Iha tinan 1914, iha haklaken-naʼin 5.155 iha rai 43. Maibé agora, iha haklaken-naʼin millaun 8,5 iha rai 240. Maski nuneʼe, ita-nia serbisu seidauk hotu. Ita tenke kontinua haklaken katak Maromak nia Ukun deʼit mak bele rezolve ema nia problema.​—Sal 145:11-13. w19.10 p. 8 par. 3; p. 9-10 par. 7-8

Jeová uza Barzilai atu ajuda Liurai David. David no ninia ema sira “hamlaha, kole no hamrook” tanba halai husi ninia oan-mane Absalão. Barzilai neʼebé katuas ona, hamutuk ho ema seluk tau sira-nia moris iha perigu laran atu ajuda David no mós ema neʼebé hamutuk ho David. Barzilai la hanoin katak tanba nia katuas ona, Jeová labele tan atu uza nia. Maibé, nia ho laran-luak uza buat neʼebé nia iha atu ajuda Maromak nia atan sira neʼebé presiza. (2 Sam 17:27-29) Ita bele aprende saida? Maski ita idade ona ka lae, Jeová bele uza ita iha rai neʼebé ita hela bá ka iha rai seluk atu ajuda ita-nia maluk fiar-naʼin neʼebé presiza ajuda. (Prov 3:27, 28; 19:17) Karik ita rasik labele bá atu ajuda sira, maibé ita bele fó kontribuisaun ba serbisu iha mundu tomak no osan neʼe bele uza hodi fó ajuda bainhira presiza.​—2 Kor 8:14, 15. w19.10 p. 21 par. 6

Karik susar ba ita atu fó sai ita-nia sentimentu ba ema seluk tanba uluk ema ruma hakanek ita-nia laran. (Prov 18:19) Ka karik ita sente katak ita la iha tempu no forsa atu haburas relasaun diʼak nuʼudar belun. Maibé, ita labele rende an. Se ita hakarak irmaun-irmán sira-nia apoiu durante tempu susar, ita tenke hakaʼas an hametin ita-nia relasaun nuʼudar belun. Dalan importante ida atu halo nuneʼe mak hodi fó sai ita-nia hanoin no sentimentu ba sira. (1 Ped 1:22) Jesus hatudu katak nia tau fiar ba ninia belun sira liuhusi koʼalia nakloke ba sira. (João 15:15) Ita bele banati-tuir nia hodi fó sai ita-nia ksolok, neon-susar, no estrese ba ita-nia belun sira. Rona didiʼak bainhira ema ida koʼalia ba Ita, no karik Ita bele haree katak Ita-nia hanoin, sentimentu no planu hanesan ho sira-nia nian. Bainhira Ita koʼalia kona-ba Ita-nia hanoin no sentimentu ho Ita-nia belun no rona bainhira sira koʼalia, Ita sei hametin Ita-nia relasaun nuʼudar belun.​—Prov 27:9. w19.11 p. 4 par. 8-9

Durante terus boot, karik sei iha mudansa ba mensajen neʼebé ita haklaken. Ohin loron, ita haklaken liafuan diʼak kona-ba Maromak nia Ukun no hakaʼas an ajuda ema sai Jesus nia dixípulu. Maibé iha tempu neʼebá, karik ita sei haklaken mensajen tesi-lia nian neʼebé todan hanesan jelu-fatuk. (Apok 16:21) Karik ita haklaken katak lakleur tan Satanás nia mundu sei lakon mohu. Iha futuru ita sei hatene ho loloos mensajen saida mak ita sei fó sai no oinsá atu fó sai ida-neʼe. Ita sei uza dalan neʼebé ita uza ona ka ita sei uza dalan seluk? Hein deʼit. Maibé, ita bele fiar katak ita sei hetan priviléjiu atu haklaken ho aten-brani mensajen kona-ba Jeová nia tesi-lia. (Eze 2:3-5) Karik ita-nia mensajen sei book nasaun sira atu koko hapara ita atu haklaken. Ohin loron ita sadere ba Jeová atu apoia ita haklaken, nuneʼe mós ita presiza ninia apoia iha tempu neʼebá. Ita bele fiar katak Jeová sei fó ita kbiit atu kumpre ninia hakarak.​​—Miq 3:8. w19.10 p. 16 par. 8-9

Liafuan neʼebé tradús nuʼudar “hadook an” bele fó ideia katak ita-nia hanoin fahe ona tanba ita tau fokus liu atu hetan buat neʼebé ita la presiza. Tuirmai, neʼe book ita atu haburas “hakarak beik no aat oioin” iha ita-nia laran. (1 Tim 6:9) Duké husik hakarak sira-neʼe buras iha ita-nia laran, diʼak liu atu hanoin-hetan katak Satanás uza hakarak sira-neʼe nuʼudar armas atu halo fraku ita-nia fiar. Karik ita iha osan atu sosa sasán barak. Sala ka lae atu sosa buat neʼebé ita hakarak maski ita la presiza? Karik lae. Maibé hanoin toʼok pergunta sira-neʼe: Maski ita bele sosa buat ruma, maibé ita iha duni tempu no enerjia atu uza no tau matan ba ida-neʼe ka lae? No mós, ita komesa hadomi ita-nia rikusoin ka lae? Mane joven ida la simu Jesus nia konvite atu aumenta serbisu ba Maromak tanba domin ba rikusoin. Ita-nia domin ba rikusoin mós bele book ita atu halo hanesan neʼe ka lae? (Mc 10:17-22) Diʼak liu atu moris simples no uza ita-nia tempu no forsa atu halo Maromak nia hakarak! w19.11 p. 17-18 par. 15-16

Maromak bele fó ba Ita “kbiit” atu halo tuir desizaun ruma. (Flp 2:13) Tan neʼe, halo orasaun hodi hetan kbiit atu kumpre buat ruma. Husu Jeová atu haraik ninia espíritu santu hodi Ita iha kbiit neʼebé Ita presiza. Kontinua halo orasaun se Ita sente katak Maromak seidauk hatán Ita-nia orasaun. Jesus hatete: “Kontinua husu, no imi sei simu [espíritu santu].” (Lc 11:9, 13) No mós, halo planu. Ita presiza halo planu atu bele kumpre buat neʼebé Ita hahú ona. Tuirmai Ita tenke halo tuir Ita-nia planu neʼe. Nuneʼe mós bainhira Ita halo desizaun, diʼak atu halo lista espesífiku kona-ba buat neʼebé Ita presiza halo atu bele kaer metin ba Ita-nia desizaun. Se Ita fahe serbisu boot sira ba kiʼik-kiʼik, neʼe bele ajuda Ita atu hatene buat neʼebé Ita kumpre ona. Apóstolu Paulo anima kongregasaun Korinto atu tau ketak buat ruma “iha loron primeiru semana-semana” hodi fó nuʼudar kontribuisaun duké hein toʼo Paulo mai mak foin halibur osan. (1 Kor 16:2) Se Ita fahe serbisu boot sira ba kiʼik-kiʼik, neʼe bele ajuda Ita atu sente kmaan, no la hanoin barak. w19.11 p. 29 par. 13-14

Karik ita hanoin katak ita hatene ona kona-ba Jeová tanba ita hatene ninia naran ka hatene buat balu neʼebé nia hatete ka halo. Maibé neʼe la dehan katak ita hatene didiʼak nia. Atu hatene didiʼak Jeová ita presiza halo buat seluk tan. Ita presiza uza tempu atu aprende kona-ba Jeová no ninia hahalok furak sira. Tuirmai ita bele komesa komprende tanbasá nia hatete ka halo buat ruma. Ida-neʼe sei ajuda ita atu hatene se Jeová gosta ita-nia hahalok no hanoin ka lae. Bainhira ita hatene ona saida mak Jeová hakarak ita atu halo, ita presiza halo tuir. Ema balu karik goza ita tanba ita hakarak adora Jeová, no karik sira kontra ita liután se ita komesa tuir reuniaun sira. Maibé se ita tau fiar ba Jeová, nia sei nunka husik ita mesak. Ita komesa harii relasaun diʼak ho Maromak no neʼe sei dura ba nafatin. Ita bele hatene didiʼak Jeová ka lae? Sin, bele! w19.12 p. 16-17 par. 3-4

Dala ruma, inan-aman sente susar atu hanorin sira-nia oan, maibé oan sira mak prezente husi Jeová. Nia sempre prontu atu ajuda inan-aman sira. Nia prontu atu rona ba inan-aman nia orasaun. Nia hatán orasaun sira-neʼe liuhusi Bíblia, ita-nia publikasaun, no liuhusi ezemplu no konsellu husi inan-aman maduru seluk iha kongregasaun. Inan-aman balu hatete katak presiza tinan 20 atu haboot oan, maibé knaar nuʼudar inan-aman nunka iha rohan. Buat diʼak liu neʼebé inan-aman bele fó ba sira-nia oan mak domin, tempu no treinamentu neʼebé bazeia ba Bíblia. Labarik ida-idak nia reasaun la hanesan. Maski nuneʼe, labarik barak neʼebé sai boot iha família ho inan-aman neʼebé hadomi Jeová, sente hanesan ho irmán Joanna Mae husi Ázia: “Haʼu agradese tebes tanba haʼu-nia inan-aman dixiplina haʼu no hanorin haʼu atu hadomi Jeová. Sira laʼós deʼit fó moris ba haʼu, maibé sira mós fó ba haʼu moris neʼebé iha duni folin.” (Prov 23:24, 25) Ita-nia maluk Kristaun rihun ba rihun mós sente hanesan neʼe. w19.12 p. 27 par. 21-22

Iha irmaun-irmán barak neʼebé presiza hetan kmaan. Tan neʼe, ita presiza buka dalan atu ajuda ema seluk maski ita sente taʼuk. Porezemplu, karik ita taʼuk tanba la hatene atu hatete saida ka halo saida ba ema neʼebé presiza hetan kmaan. Maibé, ita bele fó kmaan ba ema seluk se ita hatudu katak ita hanoin sira. Tanba mundu nia rohan besik ona, mundu neʼe sei kontinua sai aat liu no moris sei sai susar liután. (2 Tim 3:13) No ita sei presiza nafatin atu hetan kmaan tanba ita la perfeitu no halo sala beibeik. Razaun ida Paulo bele tahan ho laran-metin toʼo rohan mak tanba nia hetan kmaan husi maluk Kristaun sira. Hodi banati-tuir sira-nia ezemplu, ita mós bele ajuda ita-nia irmaun-irmán sira atu kontinua serbí Jeová ho laran-metin.​​—1 Tes 3:2, 3. w20.01 p. 12-13 par. 17-19

Ema sira neʼebé atu bá lalehan la hein atu ema seluk trata nia iha dalan espesiál. (Flp 2:2, 3) Nia hatene katak bainhira Jeová hili nia, Jeová la fó-hatene ema seluk kona-ba neʼe. Tan neʼe, ema neʼebé atu bá lalehan la hakfodak se ema balu foufoun la fiar kedas katak Maromak hili ona nia. Nia komprende katak Bíblia haruka ita atu labele tau fiar kedas ba ema neʼebé dehan katak Maromak fó ona responsabilidade espesiál ba nia. Tanba lakohi dada atensaun ba ninia an rasik, ema neʼebé atu bá lalehan la konta ba ema neʼebé nia foin hasoru katak Maromak hili ona nia. No nia mós lakohi duni atu gaba an. (1 Kor 4:7, 8) Ema Kristaun neʼebé atu bá lalehan la buka malu atu bele koʼalia kona-ba oinsá Maromak hili sira no forma grupu atu estuda Bíblia. (Gal 1:15-17) Se halo nuneʼe, kongregasaun sei la iha unidade. No sira sei kontra espíritu santu neʼebé ajuda Maromak nia povu atu iha dame no unidade.​—Rom 16:17, 18. w20.01 p. 28 par. 6-7

Iha tempu neʼebá, karik ema sei sai hirus ba ita tanba sira-nia relijiaun lakon maibé relijiaun Testemuña ba Jeová la lakon. Karik sira sei fó sai sira-nia hirus iha dalan oioin inklui liuhusi média sosiál. Nasaun sira no sira-nia ukun-naʼin Satanás sei odi ita tanba ita-nia relijiaun deʼit mak seidauk lakon. Sira seidauk kumpre sira-nia planu atu halakon relijiaun hotu. Tan neʼe sira sei fokus ba ita. Iha momentu neʼe, nasaun sira sei sai Gog husi rai-Magog. Sira sei apoia malu atu ataka Jeová nia povu ho sira-nia kbiit tomak. (Eze 38:2, 14-16) Karik ita bele komesa laran-taridu kona-ba buat neʼebé sei akontese durante terus boot, liuliu tanba ita la hatene informasaun hotu kona-ba neʼe. Maibé, ita bele fiar katak ita la presiza taʼuk terus boot. Jeová sei fó ita matadalan neʼebé bele salva ita-nia moris.​—Sal 34:19. w19.10 p. 16 par. 10-11

Ita la sente deʼit agradese, maibé ita mós hatudu sai ita-nia agradese ba Jeová liuhusi liafuan no hahalok. Tan neʼe ita la hanesan ho ema barak ohin loron. Sira la hatudu agradese ba buat hotu neʼebé Jeová halo ba sira. Tuir loloos, sinál ida neʼebé hatudu katak ita moris iha “loron ikus sira” mak ema la hatene atu fó agradese. (2 Tim 3:1, 2) Ita lakohi sai hanesan neʼe. Jeová hakarak ninia oan hotu sai belun diʼak. Tuir loloos, domin neʼebé ita hatudu ba malu mak sinál katak ita mak ema Kristaun loos. (João 13:35) Ita konkorda ho ema neʼebé hakerek salmo ida: “Diʼak tebes no kmanek loos bainhira maun-alin sira hela hamutuk ho unidade!” (Sal 133:1) Bainhira ita hadomi irmaun-irmán sira, ita hatudu katak ita hadomi Jeová. (1 João 4:20) Ita kontente atu sai parte ba família ida neʼebé ema hotu “hatudu laran-diʼak ba malu, [no] hanoin malu”.​—Éf 4:32. w20.02 p. 9 par. 6-7

Ana nia susar la lakon kedas. Nia nafatin hela iha uma neʼebé hanesan ho Penina. Bíblia la fó sai katak Penina troka ninia hahalok. Entaun karik Ana tenke kontinua tahan hasoru Penina nia liafuan kroʼat. Maibé Ana la sai laran-taridu tan. Depois Ana entrega tiha ninia laran-susar ba Jeová, Ana la hanoin barak tan. Nia sadere ba Jeová atu fó kmaan no halo nia kontente. Tempu balu liutiha, Jeová haraik bensaun ba Ana hodi iha oan. (1 Sam 1:2, 6, 7, 17-20) Ita bele sente kmaan fali maski ita-nia problema la lakon. Maski ita kontinua halo orasaun no tuir beibeik reuniaun sira, dala ruma ita-nia problema balu sei iha nafatin. Husi Ana nia ezemplu, ita aprende katak la iha buat ida mak bele hanetik Jeová atu halo ita sente kmaan. Jeová nunka haluha ita, no nia sei fó kolen ba ita-nia laran-metin.​—Ebr 11:6. w20.02 p. 22 par. 9-10

Katuas sira labele dada an atu fahe Bíblia nia prinsípiu neʼebé bele ajuda irmaun-irmán sira atu hatudu hahalok matenek. Tanbasá importante atu koʼalia ho aten-brani bainhira presiza? Hanoin toʼok ezemplu kona-ba Eli: Amlulik Boot Eli iha oan-mane naʼin-rua no nia hadomi tebes sira. Maibé ninia oan sira-neʼe la hatudu respeitu ba Jeová. Maski sira mak amlulik no serbí iha tenda santu, maibé sira uza sala sira-nia podér. Sira la hatudu respeitu ba sakrifísiu neʼebé hasaʼe ba Jeová, no sira la moe hodi halo sala seksuál. (1 Sam 2:12-17, 22) Tuir Moisés nia Ukun-Fuan, Eli nia oan sira presiza mate, maibé Eli korrije sira iha dalan neʼebé mamar no husik sira kontinua serbí iha tenda santu. (Deut 21:18-21) Jeová sente oinsá ho buat neʼebé Eli halo? Jeová hatete ba Eli: “Tanbasá mak ó hafolin liu ó-nia oan-mane sira duké haʼu?” Jeová deside katak mane aat naʼin-rua neʼe tenke mate.​—1 Sam 2:29, 34. w20.03 p. 19 par. 4-5