Agostu

Maski ema kontra Jesus, maibé nia sente dame iha laran tanba nia hatene katak nia halo ninia Aman kontente. Nia nafatin halo tuir maski dala ruma susar. Nia hadomi ninia Aman no nia tau uluk serbisu ba Jeová iha ninia moris. Antes nia mai iha rai, nia mak Maromak nia “badaen neʼebé matenek”. (Prov 8:30) No bainhira iha rai, nia ho laran-manas hanorin ema seluk kona-ba ninia Aman. (Mt 6:9; João 5:17) Serbisu neʼe halo Jesus haksolok tebes. (João 4:34-36) Ita bele banati-tuir Jesus hodi halo tuir Jeová no “sai badinas nafatin iha Naʼi nia serbisu”. (1 Kor 15:58) Bainhira ita uza “tempu tomak” atu haklaken, ita sei haburas hanoin neʼebé loos kona-ba ita-nia problema. (Após 18:5) Porezemplu, dala barak ema sira neʼebé ita hasoru bainhira haklaken hasoru problema boot liu fali ita. Maibé, kuandu sira aprende atu hadomi Jeová no aplika ninia konsellu, sira-nia moris sai diʼak liu no kontente liu. Bainhira ita haree ida-neʼe akontese, neʼe hametin liután ita-nia fiar katak Jeová sei tau matan ba ita. w19.04 p. 10-11 par. 8-9

Ema sira-neʼe hakaʼas an atu kontra anju aat. Sira-nia ­livru kona-ba masonik mak karun tebes. Maski nuneʼe sira sunu ­livru sira-neʼe duké fó ka faʼan ba ema seluk. Sira hanoin liu kona-ba oinsá halo Jeová kontente duké hanoin kona-ba sira-nia ­livru nia folin. Oinsá mak ita bele banati-tuir ezemplu husi ema Kristaun iha apóstolu sira-nia tempu? Diʼak atu soe ita-nia sasán naran deʼit neʼebé karik iha ligasaun ho espiritizmu. Neʼe inklui biru, maninga, ka sasán neʼebé ema tara ka uza atu proteje sira husi anju aat. (1 Kor 10:21) Hanoin didiʼak Ita-nia atividade halimar nian. Husu ba Ita-nia an, ‘Haʼu-nia atividade halimar nian balu liga ho espiritizmu ka lae?’ Hakaʼas an atu halo desizaun neʼebé sei ajuda Ita hodi hadook an husi buat neʼebé Jeová odi. Ita hakarak “hakaʼas an atu nafatin iha konxiénsia neʼebé moos iha Maromak nia oin”.​—Após 24:16. w19.04 p. 22-23 par. 10-12

Katuas sira presiza hanoin kona-ba buat oioin bainhira sira rona kona-ba sala sériu ruma. Sira-nia objetivu prinsipál mak atu halo santu Maromak nia naran. (Lev 22:31, 32; Mt 6:9) Sira mós hakarak ajuda irmaun-irmán atu iha relasaun diʼak ho Maromak no hakarak ajuda vítima. Liután neʼe, se ema iha kongregasaun mak halo sala sériu, katuas sira koko atu buka-hatene se nia arrepende an ona ka lae, no ajuda nia atu hadiʼa ninia relasaun ho Jeová. (Tgo 5:14, 15) Ema Kristaun neʼebé monu ba hakarak neʼebé sala no halo sala sériu mak hanesan ema neʼebé moras iha dalan espirituál. Neʼe katak nia la iha tan relasaun diʼak ho Jeová. Tan neʼe, ita bele kompara katuas sira ho doutór. Sira hakaʼas an atu “halo ema moras [katak ema neʼebé halo sala sériu] sai diʼak fali”. Sira-nia konsellu neʼebé bazeia ba Eskritura bele ajuda ema atu hadiʼa fali ninia relasaun ho Maromak se ema neʼe arrepende duni ninia sala.​—Após 3:19; 2 Kor 2:5-10. w19.05 p. 10 par. 10-11

Jeová bele fó ita hakarak atu halo buat neʼebé nia hakarak. Karik ita haree katak iha kongregasaun presiza ajuda ka iha fatin ruma. Karik neʼe book ita atu husu ba ita-nia an: ‘Oinsá mak haʼu bele ajuda?’ Ka karik ita simu knaar neʼebé susar, maibé ita la hatene se ita bele halo knaar neʼe ho didiʼak. Ka bainhira ita lee tiha eskritura balu, karik ita hanoin: ‘Oinsá mak haʼu bele uza eskritura sira-neʼe atu ajuda ema seluk?’ Bainhira Jeová haree katak ita hanoin daudaun kona-ba buat neʼebé ita bele halo, Nia bele fó ita hakarak atu halo ida-neʼe. Jeová mós bele fó ita kbiit atu halo buat neʼebé nia hakarak. (Isa 40:29) Nia bele fó espíritu santu atu aumenta abilidade neʼebé ita iha ona. (Éx 35:30-35) Jeová uza ninia organizasaun atu hanorin ita oinsá halo knaar ruma. Se ita ladún hatene oinsá atu halo knaar ruma, diʼak atu husu ajuda. No mós ita bele husu ajuda ba ita-nia Aman iha lalehan neʼebé laran-luak atu fó ita “kbiit neʼebé la hanesan baibain”.​—2 Kor 4:7; Lc 11:13. w19.10 p. 21 par. 3-4

Ema iha mundu hatudu hahalok hadomi deʼit sira-nia an. Ensiklopédia ida hatete katak husi tinan 1970, ema hakerek livru barak neʼebé fó konsellu kona-ba oinsá atu hetan moris susesu. Livru balu hatete katak ema presiza kontente ho sira-nia an no la presiza troka sira-nia hahalok. Hanoin toʼok ezemplu ida, livru ida anima ema atu hadomi sira-nia an rasik tanba sira mak bonita liu, no diʼak liu hotu. Livru neʼe mós hatete katak ema bele deside rasik sira-nia hahalok no halo tuir deʼit sira-nia hakarak. Hanoin hanesan neʼe laʼós buat neʼebé foun loos ka lae? Satanás anima Eva atu halo buat neʼebé hanesan. Satanás hatete ba Eva katak nia bele “sai hanesan Maromak hodi hatene buat diʼak no aat”. (Gén 3:5) Ohin loron, ema barak hanoin katak sira mak diʼak liu no ema seluk la presiza hatete ba sira buat neʼebé loos no sala, inklui mós Maromak. Ita bele haree ida-neʼe liuhusi ema nia hanoin kona-ba moris kaben nian. w19.05 p. 23 par. 10-11

Dala ruma, Liurai David mós sente estrese tebes. Hanoin toʼok kona-ba susar sira neʼebé nia hasoru. Ninia konxiénsia fó sala ba nia tanba sala barak neʼebé nia halo ona. (Sal 40:12) Ninia oan-mane Absalão kontra nia, no ikusmai ema oho Absalão. (2 Sam 15:13, 14; 18:33) No David nia belun ida kontra hasoru nia. (2 Sam 16:23–17:2; Sal 55:12-14) Iha salmo balu neʼebé David hakerek, nia fó sai ninia laran-kraik no mós ninia fiar neʼebé metin ba Jeová. (Sal 38:5-10; 94:17-19) Hakerek-naʼin ida ba livru Salmo sente laran-moras ba ema aat sira-nia moris. Karik nia mak ema Levi ida husi Asaf nia jerasaun no nia serbí iha “Maromak nia fatin sagradu neʼebé kmanek”. Hakerek-naʼin neʼe sente estrese tebes toʼo halo nia la sente kontente tan. Nia mós komesa hanoin katak Jeová la fó bensaun ba nia.​—Sal 73:2-5, 7, 12-14, 16, 17, 21. w19.06 p. 17 par. 12-13

Satanás aproveita ema nia hakarak. Normál ba ita hotu atu hakarak aprende skill balu neʼebé bele ajuda ita atu sustenta ita no ita-nia família nia presiza. (1 Tim 5:8) Baibain, ita bele aprende skill hanesan neʼe liuhusi eskola no sai estudante neʼebé badinas. Maibé ita tenke kuidadu. Sistema edukasaun iha nasaun barak la hanorin deʼit kona-ba skill maibé mós ema nia filozofia. Eskola anima estudante sira atu la fiar Maromak no la hafolin Bíblia. Sira mós hanorin katak ema matenek tenke fiar katak moris mai husi evolusaun. (Rom 1:21-23) Hanorin sira-neʼe labele ajuda ema hatene Maromak. (1 Kor 1:19-21; 3:18-20) Ita presiza deside metin atu nunka husik “filozofia no hanorin bosok neʼebé la iha folin” husi Satanás nia mundu atu lohi ita. (Kol 2:8) Keta husik Satanás lohi ita ho ninia lasu sira. (1 Kor 3:18) Keta husik Satanás halo ita haluha kona-ba Jeová. Moris tuir Jeová nia morál neʼebé loos. No keta husik Satanás lohi ita atu la rona ba Jeová nia matadalan. w19.06 p. 5 par. 13; p. 7 par. 17

Diʼak atu hanoin kona-ba Ita-nia rona-naʼin bainhira hili tópiku ruma. Hanoin kona-ba benefísiu neʼebé sira sei hetan hodi aprende kona-ba Bíblia nia hanorin. Bainhira koʼalia ho sira, importante atu rona didiʼak no respeitu sira-nia opiniaun. Ho ida-neʼe, Ita bele komprende sira diʼak liután, no karik sira mós sei prontu atu rona ba Ita. Antes ema ida deside atu estuda Bíblia, karik Ita presiza uza tempu no hakaʼas an atu vizita beibeik. Tanbasá? Karik ema neʼe sai hela bainhira ita vizita. No mós, karik Ita presiza vizita beibeik atu uma-naʼin sai toman ho Ita no hakarak atu estuda Bíblia. Hanoin-hetan, ai-horis ida bele sai buras bainhira rega beibeik. Nuneʼe mós, ema nia domin ba Jeová no Kristu bele sai buras bainhira ita vizita beibeik hodi koʼalia kona-ba Maromak nia Liafuan. w19.07 p. 14 par. 1; p. 15-16 par. 7-8

Jesus nia liafuan sira-neʼe katak sá? Jesus la dehan katak ema Kristaun kontente bainhira ema odi sira. Maibé, nia fó avizu kona-ba buat neʼebé bele akontese ba ita. Ita laʼós parte husi mundu neʼe. Ita moris tuir Jesus nia hanorin no haklaken mensajen neʼebé nia mós haklaken. Tan neʼe mundu odi ita. (João 15:18-21) Ita hakarak halo kontente Jeová. Entaun keta sente la diʼak se ema odi ita tanba ita hadomi ita-nia Aman. Keta hanoin katak ita la iha folin bainhira ema odi ita. Ita la hatene bainhira mak ema sei fó-terus ba ita ka governu bandu ita-nia adorasaun ba Jeová. Maibé, ita bele prepara agora liuhusi hametin ita-nia relasaun ho Jeová, sai aten-brani liután, no aprende atu tahan bainhira ema odi ita. Preparasaun neʼebé ita halo agora sei ajuda ita atu hamriik metin iha futuru. w19.07 p. 6 par. 17-18; p. 7 par. 21

Bainhira ita estuda Bíblia ho ema neʼebé la iha relijiaun, ita tenke kontinua ajuda sira hametin sira-nia fiar katak Maromak iha. No ita presiza ajuda sira atu hametin sira-nia fiar ba Bíblia. Karik neʼe katak ita tenke repete beibeik hanorin balu. Tempu ida-idak neʼebé ita estuda Bíblia ho ema, karik ita presiza koʼalia kona-ba evidénsia neʼebé hatudu katak Bíblia mak Maromak nia Liafuan no koʼalia kona-ba Bíblia nia profesia neʼebé kumpre ona, oinsá Bíblia apoia siénsia no fó sai istória neʼebé loos, ka oinsá Bíblia bele ajuda ema nia moris loroloron. Ita ajuda ema sai Kristu nia dixípulu liuhusi hatudu domin ba sira, maski sira iha relijiaun ka lae. (1 Kor 13:1) Bainhira ita hanorin sira, ita-nia objetivu mak atu hatudu katak Maromak hadomi sira no nia hakarak sira hadomi nia. Tinan-tinan ema rihun ba rihun neʼebé uluk iha interese uitoan ka la iha interese ba relijiaun hetan batizmu tanba sira haburas domin ba Maromak. Tan neʼe, mai ita hanoin pozitivu, hatudu domin no interese ba ema hotu, rona didiʼak no hakaʼas an atu komprende sira. Hanorin sira atu sai Kristu nia dixípulu liuhusi Ita-nia ezemplu. w19.07 p. 24 par. 16-17

Jeová uza Salum nia oan-feto sira atu ajuda harii fali moru Jeruzalein. (Neem 2:20; 3:12) Maski sira-nia aman Salum mak ulun-naʼin, maibé sira prontu atu halo serbisu neʼebé susar no perigozu. (Neem 4:15-18) Ohin loron, irmán barak kontente atu halo serbisu sagradu. Sira halo serbisu konstrusaun no tau matan ba fatin sira neʼebé dedika ona ba Jeová. Ita presiza irmán sira-neʼe nia matenek, laran-manas, no laran-metin atu bele halo serbisu sira-neʼe. Jeová motiva fiar-naʼin ida naran Tabita atu halo ‘hahalok diʼak barak no fó ajuda’, liuliu ba feto-faluk sira. (Após 9:36) Tanba ninia laran-luak no laran-diʼak neʼebé boot, ema barak triste bainhira nia mate. Maibé sira sente haksolok tebes bainhira apóstolu Pedro halo Tabita moris-hiʼas fali. (Após 9:39-41) Saida mak ita aprende husi Tabita? Maski ita mak joven ka idade ona, mane ka feto, ita hotu bele halo buat oioin atu ajuda ita-nia irmaun-irmán sira. w19.10 p. 23 par. 11-12

Oinsá mak ita bele halo ema seluk sidi? Hanoin toʼok situasaun neʼe. Estudante Bíblia ida hakaʼas an kontrola ninia toman atu hemu tua. Nia komprende katak nia labele tan hemu tua, laʼo ba oin no hetan batizmu. Loron ida, irmaun ida konvida nia bá festa no oferese tua ba nia, hodi dehan: “Se ó kontrola an, ó bele hemu tua uitoan.” Ida-neʼe bele lori konsekuénsia aat tebes se irmaun foun neʼe rona ba konsellu neʼebé la loos. Ita-nia reuniaun Kristaun sira ajuda ita atu aplika konsellu iha eskritura ba ohin. Reuniaun sira ajuda ita hatene saida mak importante liu tuir Jeová nia hanoin no ita aprende oinsá atu aplika buat neʼebé ita rona atu nuneʼe ita bele sai laran-moos ka sai perfeitu tuir Maromak nia haree. Sira mós anima ita atu hatudu ita-nia domin ba Maromak no ba ita-nia irmaun-irmán sira. Bainhira ita hadomi Maromak no irmaun-irmán sira ho laran tomak, ita sei hakaʼas an atu la halo sira sidi. w19.08 p. 10 par. 9; p. 11 par. 13-14

Iha ema balu neʼebé fiar an no la moe atu fó sai sira-nia opiniaun, maibé neʼe la dehan katak sira foti an. (João 1:46, 47) Maibé, maski ita mak ema neʼebé fiar an ka lae, ita hotu presiza hakaʼas an atu iha haraik an neʼebé loos. Hanoin toʼok kona-ba apóstolu Paulo. Maromak uza nia dala barak atu harii kongregasaun iha sidade oioin. Karik nia halo serbisu neʼebé barak liu fali Jesus Kristu nia apóstolu sira seluk. Maski nuneʼe, nia la haree ninia an diʼak liu fali sira. Nia hatete katak nia iha relasaun neʼebé diʼak ho Jeová, tan deʼit Jeová hatudu laran-diʼak ba nia, laʼós tanba ninia matenek rasik. (1 Kor 15:10) Sin, Paulo hatudu ezemplu diʼak tebes kona-ba haraik an iha ninia karta ba ema Korinto, maski ema balu iha kongregasaun kritika nia.​—2 Kor 10:10. w19.09 p. 3 par. 5-6

Razaun ida tanbasá susar atu hakruʼuk ba Jeová mak tanba ita hotu sala-naʼin no la perfeitu. Tan neʼe, dala ruma ita iha hakarak atu kontra Maromak. Bainhira Adão no Eva kontra Maromak hodi han ai-fuan neʼebé Maromak bandu, sira deside ba sira-nia an rasik saida mak diʼak no aat. (Gén 3:22) Ohin loron, ema barak hili atu la halo tuir Jeová no hakarak deside rasik saida mak diʼak no aat. Maibé dala ruma, ema sira neʼebé hatene no hadomi Jeová mós sente susar atu sempre hakruʼuk ba nia. Apóstolu Paulo mós sente hanesan. (Rom 7:21-23) Hanesan Paulo, ita hakarak halo buat neʼebé loos iha Maromak nia oin. Maibé ita tenke kontinua luta hasoru ita-nia hakarak atu halo sala. Razaun seluk tanbasá susar atu hakruʼuk ba Jeová mak tanba hetan influénsia husi ita-nia kultura. Ema barak nia hanoin mak kontra Jeová nia hakarak. Tan neʼe, ita tenke hakaʼas an atu labele iha hanoin hanesan sira. w19.09 p. 15 par. 4-6

Ita tenke rekoñese katak ita-nia forsa mak limitadu. Tan neʼe ita presiza hanoin didiʼak kona-ba saida mak ita bele halo. Porezemplu, ita bele estraga ita-nia forsa se ita koko atu buka rikusoin. Haree toʼok buat neʼebé Jesus hatete ba mane joven riku neʼebé husu Jesus: “Saida mak haʼu tenke halo atu hetan moris rohan-laek?” Karik nia mak ema neʼebé diʼak tanba Evanjellu Marcos hatete katak Jesus “sente domin ba nia”. Jesus konvida mane neʼe ho liafuan sira neʼebé temi iha leten. Maski mane joven neʼe hakarak halo tuir Jesus, maibé nia sente susar atu husik ninia “rikusoin barak”. (Mc 10:17-22) Rezultadu mak nia lakohi atu simu ai-leba neʼebé Jesus fó ba nia, maibé nia kontinua sai atan ba “Rikusoin”. (Mt 6:24) Iha situasaun hanesan neʼe, Ita rasik sei halo desizaun saida? Dala ruma, diʼak atu hanoin kona-ba saida mak ita tau uluk iha ita-nia moris. Tanbasá? Hodi ita bele hatene se ita uza didiʼak ita-nia forsa ka lae. w19.09 p. 24 par. 17-18

Ita kontinua haklaken Maromak nia Ukun toʼo Jeová dehan para. Ita la hatene hela tempu hira tan ba ema atu aprende kona-ba Maromak Jeová no Jesus Kristu. (João 17:3) Maibé ita hatene katak antes terus boot komesa, sei iha oportunidade ba ema sira neʼebé “prontu atu simu lia-loos neʼebé lori ba moris rohan-laek” atu serbí Jeová. (Após 13:48) Oinsá mak ita bele ajuda sira antes la iha tan oportunidade? Liuhusi Jeová nia organizasaun, Jeová fó buat hotu neʼebé ita presiza atu hanorin ema kona-ba lia-loos. Porezemplu, ita simu treinu semana-semana iha reuniaun loron baileet nian. Reuniaun neʼe hanorin ita oinsá atu koʼalia bainhira hasoru ema ba dala primeiru no vizita fali. No bainhira koʼalia tiha ho ema ida neʼebé interese, karik ita bele fó panfletu ka revista ba nia atu nia bele lee toʼo ita vizita fali nia. Ita ida-idak presiza sai badinas nafatin fulan-fulan hodi haklaken Maromak nia Ukun. w19.10 p. 9 par. 7; p. 10 par. 9-10

Jeová promete ba ninia atan ida iha Jeruzalein neʼebé katuas ona naran Simeão katak nia sei la mate toʼo nia haree Mesias. Promesa neʼe karik anima duni Simeão tanba nia hein Mesias durante tinan barak ona. Jeová fó kolen ba Simeão tanba ninia fiar no tahan nafatin. Loron ida, “Maromak nia espíritu dirije nia” atu bá templu no iha neʼebá nia haree bebé Jesus. No Jeová uza Simeão atu fó sai profesia ida katak bebé neʼe sei sai Kristu. (Lc 2:25-35) Maski karik Simeão mate antes Jesus hahú ninia serbisu haklaken, maibé Simeão agradese tebes ho priviléjiu neʼebé nia simu, no nia sei hetan buat diʼak barak iha futuru. Iha mundu foun, mane laran-metin neʼe sei haree oinsá Jesus nia ukun lori bensaun ba ema hotu iha rai. (Gén 22:18) Ita mós bele sente agradese tanba priviléjiu neʼebé Jeová fó ba ita atu halo ninia serbisu. w19.10 p. 22 par. 7; p. 23 par. 12

Maski ita iha osan uitoan ka barak, maibé ita presiza proteje ita-nia laran. Oinsá? Keta haburas domin ba osan. Keta husik serbisu atu manán osan sai importante liu fali serbisu ba Jeová. Oinsá mak ita hatene kona-ba neʼe? Ita bele husu pergunta balu ba Ita-nia an: ‘Haʼu sempre hanoin kona-ba haʼu-nia serbisu bainhira haʼu tuir reuniaun ka haklaken ka lae? Haʼu kontinua laran-taridu kona-ba osan ka lae? Osan no sasán hamosu problema iha haʼu-nia moris kaben nian ka lae? Haʼu prontu atu halo serbisu neʼebé ema seluk lakohi halo se ida-neʼe fó tempu liután mai haʼu atu serbí Jeová ka lae?’ (1 Tim 6:9-12) Bainhira hanoin kona-ba pergunta sira-neʼe, ita tenke hanoin-hetan katak Jeová hadomi ita no promete ba ema hotu neʼebé serbí deʼit nia: “Haʼu sei nunka husik ó, no haʼu sei nunka fila kotuk ba ó.” Tan neʼe mak apóstolu Paulo hakerek: “Iha imi-nia moris, keta hadomi osan.”​—Ebr 13:5, 6. w19.10 p. 29 par. 10

Bainhira ita haklaken hamutuk ho maluk fiar-naʼin no haree rasik sira-nia hahalok furak, ita bele aprende husi sira no hakbesik liután ba sira. Porezemplu, Ita sente oinsá bainhira Ita haklaken no rona irmaun-irmán sira ho aten-brani defende sira-nia fiar ka ho laran sira fó sai sira-nia fiar kona-ba Jeová no ninia hakarak? Klaru katak Ita sei sai besik liután ba sira. Irmán Adeline neʼebé idade 23 husu ninia belun Candice atu hamaluk nia bá haklaken iha fatin neʼebé kongregasaun la haklaken beibeik. Adeline dehan: “Ami hakarak sai laran-manas no haksolok ho ami-nia serbisu haklaken. Ami naʼin-rua presiza hetan anima atu nuneʼe ami bele kontinua serbí Jeová ho laran tomak.” Benefísiu saida mak sira hetan hodi haklaken hamutuk? Adeline dehan: “Iha ­loron ­ida-idak nia rohan, ami koʼalia kona-ba oinsá ami sente, buat neʼebé anima ami bainhira haklaken, no oinsá Jeová ajuda ami iha serbisu haklaken. Ami naʼin-rua kontente tebes atu koʼalia ba malu no bele koñese malu diʼak liután.” w19.11 p. 5 par. 10-11

Iha tempu antigu, soldadu ida sei sente moe se nia fila ba uma no la lori ninia eskudu. Matenek-naʼin ida kona-ba ema Roma nia istória naran Tácito hakerek: “Se soldadu ida husik hela ninia eskudu, neʼe mak buat neʼebé hamoe duni nia.” Neʼe mak razaun ida tanbasá soldadu sira hakaʼas an atu kaer metin sira-nia eskudu. Ita bele kaer metin ita-nia eskudu fiar nian hodi tuir reuniaun beibeik no koʼalia kona-ba Jeová nia naran no ninia Ukun ba ema seluk. (Ebr 10:23-25) Liután neʼe, lee Bíblia loroloron no halo orasaun hodi husu Maromak nia ajuda atu aplika Bíblia nia matadalan. (2 Tim 3:16, 17) Se ita halo nuneʼe, Satanás nia armas hotu neʼebé nia uza labele lori susar ba ita ba nafatin. (Isa 54:17) Ita-nia “eskudu boot fiar nian” sei proteje ita. Ita sei hamriik metin hodi serbí Maromak hamutuk ho ita-nia irmaun-irmán sira. No loroloron ita sei manán hasoru ita-nia susar sira no hametin ita-nia fiar. No importante liu mak ita apoia Jesus bainhira nia manán funu hasoru Satanás no sira neʼebé apoia Satanás.​—Apok 17:14; 20:10. w19.11 p. 19 par. 18-19

Se Ita hakerek buat neʼebé Ita planu atu halo, neʼe bele halo fasil ba Ita atu halo tuir Ita-nia desizaun. (1 Kor 14:40) Porezemplu, grupu katuas hetan matadalan atu hili katuas ida atu hakerek desizaun neʼebé sira halo, inklui sé mak simu knaar atu halo tuir desizaun neʼe no data atu kumpre knaar neʼe. Se katuas sira halo tuir matadalan neʼe, fasil liu ba sira atu halo tuir sira-nia desizaun. Ita bele halo buat neʼebé hanesan. Porezemplu, Ita bele hakerek lista loroloron. Bainhira Ita halo lista, hakerek uluk buat neʼebé Ita hakarak halo primeiru. Neʼe bele ajuda Ita atu kumpre buat neʼebé Ita hahú ona no mós halo buat barak liután. Maibé Ita presiza hakaʼas an atu halo tuir Ita-nia planu no kumpre buat neʼebé Ita hahú ona. (Rom 12:11) Apóstolu Paulo hatete ba Timóteo atu “hakaʼas an” atu sai mestre neʼebé diʼak liu. Ita bele ­aplika Paulo nia konsellu neʼe ba buat hotu neʼebé Ita hakarak halo ba Jeová.​—1 Tim 4:13, 16. w19.11 p. 29-30 par. 15-16

Kuandu Jeová haruka Moisés atu dirije ema Izraél sai husi rai-Ejitu, Moisés sente la fiar an no hatete beibeik ba Jeová katak nia labele halo ida-neʼe. Maromak hatudu laran-sadiʼa hodi komprende Moisés nia sentimentu no ajuda nia. (Éx 4:10-16) Rezultadu mak Moisés bele hatoʼo mensajen tesi-lia nian ba Faraó. Tuirmai Moisés haree Jeová uza ninia kbiit iha tempu neʼebé Jeová salva ema Izraél no halakon Faraó hamutuk ho ninia tropa sira iha Tasi Mean. (Éx 14:26-31; Sal 136:15) Depois Moisés lori ema Izraél sai husi rai-Ejitu, sira muramura beibeik. Maski nuneʼe, Moisés bele haree katak Jeová pasiénsia tebes ba ema neʼebé nia salva husi moris nuʼudar atan. (Sal 78:40-43) Moisés mós haree Jeová nia haraik an bainhira Jeová la halakon ema Izraél tanba Moisés husu ba nia. (Éx 32:9-14) Depois sai husi rai-Ejitu, Moisés nia relasaun ho Jeová mak besik tebes toʼo nia hanesan bele haree ninia Aman lalehan.​​—Ebr 11:27. w19.12 p. 17 par. 7-9

Jesus nia dixípulu barak mak ema Galileia. Entaun fasil liu atu halaʼo reuniaun ho ema barak iha foho ida iha Galileia duké iha uma ida iha Jeruzalein. No mós, Jesus neʼebé moris hiʼas ona, hasoru ona apóstolu naʼin-11 iha uma ida iha Jeruzalein. Se Jesus hakarak atu apóstolu sira deʼit mak haklaken no hanorin ema sai dixípulu, nia bele fó mandamentu neʼe ba sira iha Jeruzalein duké husu sira atu bá Galileia hamutuk ho feto sira-neʼe no dixípulu seluk. (Lc 24:33, 36) Jesus nia mandamentu atu hanorin ema sai ninia dixípulu laʼós deʼit ba sira neʼebé moris iha tempu neʼebá. Tanbasá ita bele dehan nuneʼe? Jesus remata ninia mandamentu ba ninia dixípulu sira ho liafuan: “Haʼu sei hamutuk nafatin ho imi toʼo mundu neʼe nia rohan.” (Mt 28:19, 20) Ohin loron Testemuña barak hanorin ema seluk atu sai dixípulu. Tinan-tinan maizumenus ema naʼin-300.000 hetan batizmu nuʼudar Testemuña ba Jeová no sai Jesus Kristu nia dixípulu. w20.01 p. 2 par. 1; p. 3 par. 5-6

Joven hela, maibé iha moras neʼebé halo nia sai fraku ba beibeik. Idade aumenta, no susar atu hetan serbisu. Tanba sai ferik-katuas liu, labele tan halo buat barak ba Jeová hanesan uluk. Se Ita mós hasoru situasaun hanesan neʼe, karik Ita sente katak Jeová labele uza tan Ita. Situasaun sira-neʼe bele halakon Ita-nia ksolok, halo Ita sente la iha folin, no hanetik Ita atu iha relasaun diʼak ho ema seluk. Mundu neʼe haleno Satanás nia hanoin kona-ba ema nia moris. Horiuluk kedas Satanás la hafolin ema. Nia ho laran-aat dehan ba Eva katak Eva bele sai livre se kontra Maromak, maski nia hatene rezultadu mak mate. Horiuluk kedas Satanás kontrola mundu neʼe. Tan neʼe ita la hakfodak bainhira ulun-naʼin barak haleno ninia hahalok neʼebé la respeitu ema nia moris no dignidade. Maibé Jeová hakarak ita atu hatene katak ita iha folin, no nia apoia ita bainhira ita hasoru situasaun neʼebé bele halo ita sente folin-laek.​—Rom 12:3. w20.01 p. 14 par. 1-4

Maizumenus durante tinan 40 liu, Jeremias hela iha povu neʼebé la laran-metin nia leet, neʼe inklui ninia viziñu no mós karik ninia família sira husi Anatot. (Jer 12:6) Maibé, nia la hadook an husi ema seluk. Tuir loloos, nia fó sai ninia sentimentu ba ninia sekretáriu Baruc neʼebé laran-metin no ita mós bele hatene ninia sentimentu tanba hakerek ona iha Bíblia laran. (Jer 8:21; 9:1; 20:14-18; 45:1) Bainhira Baruc hakerek buat neʼebé akontese ba Jeremias, ita bele fiar katak Baruc no Jeremias haburas respeitu no domin ba malu. (Jer 20:1, 2; 26:7-11) Durante tinan barak, Jeremias ho aten-brani fó avizu ba ema Izraél kona-ba buat neʼebé atu akontese ba Jeruzalein. (Jer 25:3) Bainhira Jeová koko tan atu ajuda povu neʼe atu arrepende an, Jeová husu Jeremias atu hakerek Ninia avizu iha surat-tahan lulun ida. (Jer 36:1-4) Karik Jeremias no Baruc serbisu hamutuk ba fulan barak atu kumpre knaar neʼebé Maromak fó ba sira, no ita bele fiar katak sira koʼalia ba malu kona-ba buat neʼebé hametin sira-nia fiar. w19.11 p. 2-3 par. 3-4

Ita presiza hanoin oinsá kona-ba irmaun-irmán sira neʼebé atu bá lalehan? La diʼak atu admira demais ema, maski ema neʼe mak Kristu nia alin. (Mt 23:8-11) Bainhira Bíblia koʼalia kona-ba katuas sira, Bíblia anima ita atu “halo tuir sira-nia fiar”, maibé la dehan katak ita bele foti ema ida sai ita-nia ulun-naʼin. (Ebr 13:7) Bíblia hatete katak ema balu merese atu simu “respeitu neʼebé kleʼan liu”. Maibé ida-neʼe tanba sira “tau matan didiʼak ba kongregasaun” no “serbisu makaʼas atu koʼalia no hanorin”, laʼós tanba Maromak hili ona sira atu bá lalehan. (1 Tim 5:17) Se ita gaba no tau atensaun demais ba ema neʼebé atu bá lalehan, karik ita sei hamoe sira. Ka aat liután mak ita bele halo sira sai foti an. (Rom 12:3) Ita hotu lakohi halo buat ida neʼebé bele halo Kristu nia alin ida monu ba sala boot hanesan neʼe.​​—Lc 17:2. w20.01 p. 29 par. 8

Iha buat barak neʼebé halo apóstolu Paulo laran-taridu. Nia sente laran-taridu kona-ba problema neʼebé irmaun-irmán sira hasoru. (2 Kor 2:4) Dala barak ema baku nia no hatama nia ba komarka. Nia mós tenke tahan susar sira seluk neʼebé halo nia laran-taridu, hanesan iha “sasán uitoan” deʼit. (Flp 4:12) Dala tolu ró neʼebé nia saʼe sai aat, tan neʼe ita bele fiar katak nia sente laran-taridu bainhira halo viajen ho ró. (2 Kor 11:23-27) Oinsá mak Paulo tahan hasoru laran-taridu? Maski Paulo laran-taridu kona-ba ninia irmaun-irmán sira neʼebé hasoru susar, maibé nia la koko atu hadiʼa sira-nia problema mesak. Paulo hatudu haraik an no husu ema seluk atu ajuda nia tau matan ba kongregasaun, mane sira neʼebé nia bele konfia hanesan Timóteo no Tito. Ita bele fiar katak irmaun sira-neʼe nia serbisu ajuda Paulo atu la sente laran-taridu demais.​—Flp 2:19, 20; Tito 1:1, 4, 5. w20.02 p. 22-23 par. 11-12

Jeová mós hakarak ita hotu atu halo tuir nia. Ita presiza halo tuir nia tanba nia mak ita-nia Kriadór, nia ajuda ita atu kontinua moris, no mós nia matenek liu fali aman hotu. Maibé, razaun importante liu atu halo tuir Jeová mak tanba ita hadomi nia. (1 João 5:3) Maski iha razaun barak ba ita atu halo tuir Jeová, maibé nia la obriga ita atu halo tuir nia. Jeová fó ita liberdade atu hili, tan neʼe nia kontente bainhira ita hili atu halo tuir nia tanba domin. Inan-aman sira hakarak sira-nia oan sente seguru. Tan neʼe sira halo regra oioin atu proteje sira-nia oan. Bainhira oan sira halo tuir regra sira-neʼe, sira hatudu katak sira tau fiar no respeitu sira-nia inan-aman. Entaun importante liután atu hatene no halo tuir ita-nia Aman iha lalehan nia lei sira. Hodi halo nuneʼe, ita hatudu katak ita hadomi no respeitu Jeová no ita mós hetan benefísiu. (Isa 48:17, 18) Maibé, ema neʼebé la halo tuir Jeová no ninia lei sira, ikusmai hetan susar oioin.​—Gal 6:7, 8. w20.02 p. 9-10 par. 8-9

Hanesan Abigail, ita presiza aten-brani atu koʼalia se ita haree ema ruma halo buat neʼebé bele lori nia ba sala sériu. (Sal 141:5) Ita tenke hatudu respeitu, maibé mós tenke aten-brani. Bainhira ita fó konsellu ba ema ho domin, ita hatudu katak ita mak belun diʼak. (Prov 27:17) Importante liu ba katuas sira atu koʼalia ho aten-brani ba ema neʼebé komesa laʼo sala dalan iha kongregasaun. (Gal 6:1) Ho haraik an katuas sira rekoñese katak sira mós la perfeitu no karik loron ida presiza simu konsellu. Maibé katuas sira la husik ida-neʼe hanetik sira atu korrije ema sira neʼebé presiza dixiplina. (2 Tim 4:2; Tito 1:9) Bainhira fó konsellu ba ema ida, katuas sira koko uza kbiit atu koʼalia hodi hanorin iha dalan neʼebé matenek no ho pasiénsia. Sira hadomi irmaun-irmán sira, no domin neʼe book sira atu ajuda irmaun-irmán sira. (Prov 13:24) Maibé buat neʼebé importante liu ba sira mak atu fó glória ba Jeová hodi apoia ninia matadalan sira no proteje kongregasaun.​—Após 20:28. w20.03 p. 20 par. 8-9

Jeová halo Moisés sai salvadór ba Izraél. Maibé bainhira loos mak Jeová uza nia? Jeová la uza Moisés iha tempu neʼebé Moisés hanoin katak nia kumpre ona kritéria tanba simu ona “hanorin tuir ema Ejitu nia matenek hotu”. (Após 7:22-25) Maibé Jeová uza Moisés bainhira nia ajuda ona Moisés sai ema haraik an no laran-maus. (Após 7:30, 34-36) Jeová fó aten-brani ba Moisés atu koʼalia ba ukun-naʼin kbiit boot iha Ejitu. (Éx 9:13-19) Husi neʼe ita bele haree katak Jeová uza ema neʼebé hakaʼas an atu banati-tuir ninia hahalok no sadere ba nia atu hetan kbiit. Husi uluk kedas, Jeová sempre uza ninia atan sira iha dalan oioin. Nia sei uza Ita iha dalan saida? Neʼe depende ba Ita-nia hakaʼas an. (Kol 1:29) Se Ita husik Jeová atu uza Ita, nia bele halo Ita sai haklaken-naʼin neʼebé laran-manas, mestre neʼebé diʼak, ema neʼebé fó kmaan, serbisu-naʼin neʼebé matenek, belun neʼebé sempre fó apoia, ka sai buat naran deʼit neʼebé nia presiza atu kumpre ninia hakarak. w19.10 p. 21 par. 5; p. 25 par. 14

Belun diʼak sei ajuda ita atu laran-metin nafatin ba Jeová. Dalan diʼak liu hotu atu hetan belun diʼak mak ita rasik presiza sai belun diʼak. (Mt 7:12) Porezemplu, Bíblia anima ita atu uza ita-nia tempu no enerjia hodi ajuda ema seluk, liuliu “ema neʼebé presiza”. (Éf 4:28) Bainhira ita sai okupadu atu ajuda ema seluk, ita sei sai kontente liután. (Após 20:35) Ita-nia belun sira sei apoia ita bainhira ita hasoru susar, no ajuda ita atu nafatin sente dame iha laran. Hanesan Eliú rona didiʼak bainhira Job koʼalia kona-ba ninia susar, ita-nia belun mós ajuda ita hodi rona didiʼak bainhira ita fó sai ita-nia neon-susar. (Job 32:4) Maski ita labele husu ita-nia belun atu halo desizaun ba ita, maibé matenek se ita rona ba sira-nia konsellu neʼebé bazeia ba Bíblia. (Prov 15:22) Hanesan Liurai David ho haraik an simu ajuda husi ninia belun, ita mós tenke ho haraik an simu ajuda husi ita-nia belun bainhira ita presiza. (2 Sam 17:27-29) Tuir loloos, belun diʼak sira-neʼe mak prezente husi Jeová.​—Tgo 1:17. w19.04 p. 11 par. 12; p. 12 par. 14-15