Setembru

Jeová no Jesus nia ezemplu hatudu katak ita la presiza deskansa ka lae? Lae duni. Jeová nunka sai kole, tan neʼe nia la presiza deskansa. Maski nuneʼe, Bíblia hatete katak depois Jeová kria lalehan no rai, nia “para ninia serbisu no deskansa”. (Éx 31:17) Nia halo nuneʼe atu bele haree ho kontente buat neʼebé nia kria ona. No maski Jesus serbisu ho badinas bainhira iha rai, maibé nia nafatin buka tempu atu deskansa no han hamutuk ho ninia belun sira. (Mt 14:13; Lc 7:34) Bíblia anima Maromak nia povu atu gosta halo serbisu. Maromak nia atan sira presiza serbisu ho badinas, sira labele sai baruk-teen. (Prov 15:19) Karik Ita halo serbisu atu bele tau matan ba Ita-nia família. No Kristu nia dixípulu hotu presiza halo serbisu haklaken. Maski nuneʼe, Ita mós presiza deskansa. w19.12 p. 2 par. 2, 4; p. 3 par. 5

Labele konta istória kona-ba anju aat. Ita presiza banati-tuir Jesus nia ezemplu. Antes Jesus mai iha rai, nia hela iha lalehan, no nia hatene buat barak kona-ba Satanás no anju aat sira. Maibé nia la konta istória kona-ba saida mak anju aat sira halo. Jesus hakarak atu hanorin ema kona-ba Jeová laʼós Satanás. Ita bele banati-tuir Jesus hodi la habelar istória kona-ba anju aat sira. Maibé ita hatudu liuhusi ita-nia liafuan katak ita-nia “laran kontente tanba buat diʼak”, neʼe mak lia-loos. (Sal 45:1) Keta taʼuk anju aat sira. Iha mundu agora, karik buat aat akontese ba ita. Asidente, moras, ka mate bele akontese derrepente deʼit. Maibé ita la presiza hanoin katak anju aat sira mak halo ida-neʼe. Bíblia esplika katak “tempu susar no situasaun neʼebé mosu derrepente deʼit” kona ema hotu. (Ecle 9:11) Jeová hatudu sai ona katak nia forsa boot liu fali anju aat sira. w19.04 p. 23-24 par. 13-14

Katuas sira tenke halo tuir estadu nia lei atu kesar ba autoridade sira bainhira rona ema abuza labarik ka lae? Sin. Iha nasaun neʼebé iha lei kona-ba kesar ema neʼebé abuza labarik iha dalan seksuál, katuas sira tenke halo tuir. Lei neʼe la kontra Maromak nia ukun-fuan. (Após 5:28, 29) Entaun bainhira katuas sira hatene kona-ba abuzu seksuál, sira tenke buka kedas matadalan oinsá sira bele halo tuir lei neʼe. Katuas sira fó-hatene ba vítima no sira-nia inan-aman no mós ema seluk neʼebé hatene kona-ba problema neʼe katak sira iha direitu atu kesar ba autoridade sira. Maibé oinsá se ema ida kesar ema iha kongregasaun laran no ikusmai komunidade hatene kona-ba problema neʼe? Ema Kristaun neʼebé kesar la presiza sente katak nia hafoʼer Jeová nia naran. Tuir loloos, ema neʼebé abuza labarik iha dalan seksuál mak hafoʼer Maromak nia naran. w19.05 p. 10-11 par. 13-14

Bíblia haruka laʼen no feen atu hatudu respeitu ba malu no ba sira-nia juramentu kaben nian. Bíblia anima kaben-naʼin sira atu hakaʼas an hatudu laran-metin ba malu, hodi dehan: “Mane ida sei husik ninia inan-aman no nia sei hela hamutuk ho ninia feen, no sira sei sai isin ida deʼit.” (Gén 2:24) Maibé mundu neʼe habelar hanoin neʼebé la hanesan, hodi hatete katak feen ka laʼen presiza tau fokus ba sira-nia hakarak rasik. Livru ida kona-ba soe-malu hatete katak iha rai balu, ema troka liafuan ba juramentu. Duké promete katak sira sei moris hamutuk toʼo mate, sira promete atu moris hamutuk durante tempu neʼebé sira sei hadomi malu. Hanoin sala hanesan neʼe sobu família barak no hakanek ema nia laran. Klaru katak mundu nia hanoin kona-ba moris kaben nian mak beik duni. w19.05 p. 23 par. 12

Paulo hanoin barak tanba mundu nia ideia no filozofia neʼebé mai husi Satanás fó influénsia ba ema Kristaun balu. (Éf 4:17-19) Ida-neʼe mós bele akontese ba ita hotu. Satanás neʼebé ukun mundu neʼe uza lasu oioin atu koko hadook ita husi Jeová. Lasu ida mak hodi aproveita ita-nia hakarak atu hetan naran-boot. Karik nia mós uza ita-nia situasaun moris, ita-nia kultura ka buat neʼebé ita aprende iha eskola atu book ita halo tuir ninia hanoin. Bele ka lae sobu hanoin neʼebé metin ona iha ita-nia neon? (2 Kor 10:4) Haree toʼok saida mak Paulo hatete: “Ami sobu rahun hanoin neʼebé sala no ideia hotu neʼebé foti an kontra koñesimentu kona-ba Maromak. Neʼe hanesan ami kaer no lori hanoin hotu hodi halo tuir Kristu.” (2 Kor 10:5) Loos duni, ho Jeová nia ajuda, ita bele hadiʼa ita-nia hanoin neʼebé sala. w19.06 p. 8 par. 1-3

Maski Ana, David, no hakerek-naʼin salmo sente estrese tebes, sira buka Jeová nia ajuda. Sira halo orasaun ba Jeová kona-ba sira-nia laran-taridu. Sira koʼalia nakloke kona-ba tanbasá sira sente estrese tebes. No sira kontinua bá fatin adorasaun atu adora Jeová. (1 Sam 1:9, 10; Sal 55:22; 73:17; 122:1) Jeová hatán sira-nia orasaun ho laran-sadiʼa. Ikusmai Ana bele sente dame iha laran. (1 Sam 1:18) David hakerek: “Ema laran-loos hetan susar barak, maibé Jeová salva nia husi susar sira-neʼe hotu.” (Sal 34:19) No hakerek-naʼin ida ba livru Salmo sente katak Jeová “kaer metin [ninia] liman-loos”, no dirije nia ho domin. (Sal 73:23, 24) Ita aprende saida husi sira-nia ezemplu? Dala ruma, ita bele hasoru problema neʼebé halo ita estrese. Maibé ita bele tahan se ita hanoin kleʼan kona-ba oinsá Jeová ajuda ona ema seluk, sadere ba nia liuhusi orasaun no halo tuir nia hodi halo buat neʼebé nia hakarak ita atu halo.​​—Sal 143:1, 4-8. w19.06 p. 17 par. 14-15

Keta husik ema nia liafuan ka hahalok halo Ita sente moe tanba Ita mak Testemuña ba Jeová. (Miq 4:5) Hanoin kona-ba ezemplu husi apóstolu sira iha Jeruzalein lakleur depois ema oho Jesus. Sira hatene katak ulun-naʼin relijiaun Judeu nian odi tebes sira. (Após 5:17, 18, 27, 28) Maski nuneʼe, loroloron sira kontinua bá templu no haklaken hodi hatudu katak sira mak Jesus nia dixípulu. (Após 5:42) Sira la husik sentimentu taʼuk atu hapara sira. Ita mós bele manán sentimentu taʼuk hodi fó sai ba kolega serbisu, kolega eskola, no viziñu sira katak Ita mak Testemuña ba Jeová. (Após 4:29; Rom 1:16) Tanbasá apóstolu sira kontente? Sira hatene tansá ema odi sira, no maski sira hetan terus, sira haree ida-neʼe nuʼudar priviléjiu tanba halo Jeová nia hakarak. (Lc 6:23; Após 5:41; 1 Ped 2:19-21) Bainhira ita komprende katak ema odi ita tanba ita halo buat loos, ita sei nunka husik ida-neʼe hapara ita atu serbí Jeová. w19.07 p. 7 par. 19-20

Jesus no ema Judeu neʼebé sai ninia dixípulu, halo tuir loron Sábadu tanba sira iha Moisés nia Ukun-Fuan okos. Maibé Jesus hatudu liuhusi ninia liafuan no hahalok katak la sala atu hatudu laran-diʼak no ajuda ema seluk iha loron Sábadu. (Mt 12:9-11) Tuir Jesus nia hanoin, hatudu laran-diʼak no ajuda ema seluk iha loron Sábadu la kontra ukun-fuan. Jesus nia hahalok hatudu sai razaun importante tanbasá ema Izraél presiza halo tuir loron Sábadu. Hodi deskansa husi sira-nia serbisu, sira bele tau fokus atu adora Maromak. Jesus sai boot iha família neʼebé uza loron Sábadu atu adora Maromak. Ita bele hatene ida-neʼe husi buat neʼebé hakerek kona-ba Jesus bainhira nia bá Nazaré, fatin neʼebé nia sai boot. Bíblia hatete: “Hodi tuir [Jesus nia] toman iha loron Sábadu, nia tama ba sinagoga, no hamriik atu lee.” (Lc 4:15-19) No mós, Jesus nia dixípulu sira respeitu tebes ukun-fuan kona-ba loron Sábadu, tan neʼe sira hein toʼo loron Sábadu liu tiha mak sira foin prepara buat morin oioin atu kose ba Jesus nia mate-isin.​​—Lc 23:55, 56. w19.12 p. 4 par. 10

Ema Kristaun ida-idak bele ajuda atu hetan ema laran-loos sira. Ita bele kompara ida-neʼe ho buka labarik neʼebé lakon. Oinsá? Hanoin toʼok ezemplu ida neʼebé akontese duni. Labarik-mane tinan tolu laʼo lakon. Maizumenus ema naʼin-500 buka labarik neʼe. Ikusmai, liutiha oras 20, ema ida hetan labarik neʼe iha toʼos laran. Ema neʼe lakohi atu ema seluk gaba nia maski nia hetan labarik neʼe. Nia esplika katak tanba ema atus ba atus serbisu hamutuk mak bele hetan labarik neʼe. Ema barak mak hanesan labarik neʼebé lakon dalan. Sira la iha esperansa, no hakarak simu ajuda. Ita hamutuk naʼin-millaun ualu liu mak hola parte hodi buka ema sira hanesan neʼe. Maski karik Ita rasik la hetan ema ida neʼebé hakarak estuda Bíblia. Maibé, karik irmaun-irmán seluk neʼebé haklaken iha fatin hanesan hetan ema neʼebé hakarak atu aprende lia-loos husi Maromak nia Liafuan. Bainhira irmaun ka irmán hasoru ema ida no ikusmai ema neʼe sai Kristu nia dixípulu, ema hotu neʼebé hola parte iha serbisu neʼe bele sente kontente. w19.07 p. 16-17 par. 9-10

Apóstolu Paulo fó-hanoin ba ema kristaun sira iha Filipe atu kontinua tahan hodi halai toʼo rohan. Bainhira kongregasaun Filipe foin harii, ema fó-terus ba sira. Paulo no Silas simu konvite husi Maromak atu “hakat liu mai Masedónia”. Paulo no Silas toʼo iha Filipe maizumenus tinan 50 EC. (Após 16:9) Sira haso­ru feto ida naran Lídia neʼebé “rona no Jeová loke nia laran atu simu” liafuan diʼak. (Após 16:14) Tuirmai nia no ninia umakain hetan batizmu. Maibé, Diabu komesa hamosu problema. Ema iha sidade lori Paulo no Silas bá hasoru majistradu tribunál, no duun katak sira hamosu problema. Rezultadu mak, ema baku Paulo no Silas, hatama sira ba komarka, no ikusmai haruka sira sai husi sidade. (Após 16:16-40) Paulo no Silas rende an ka lae? Lae! Oinsá ho irmaun-irmán sira iha kongregasaun foun neʼe? Sira mós la rende an. Karik sira hetan aten-brani tanba Paulo no Silas nia ezemplu. w19.08 p. 2 par. 1-2

Klaru katak “hahalok loos” neʼe inklui domin ba Jeová no ninia povu. Neʼe mós inklui koʼalia ba ema seluk kona-ba ita-nia fiar ba Jesus no ita-nia esperansa furak. Ita hatudu “hahalok loos” bainhira ita hakaʼas an hola parte iha serbisu importante atu hanorin ema sai dixípulu. (Mt 28:18-20) Ita bele sai hanesan ahi-oan neʼebé fó naroman iha situasaun oioin. Dala ruma, buat neʼebé hanetik ita atu haklaken liafuan diʼak bele sai fali oportunidade ba ita atu haklaken. Porezemplu, Paulo hakerek karta ba ema Kristaun iha Filipe bainhira nia hela iha uma ida iha Roma nuʼudar dadur. Maibé, ninia situasaun la hanetik nia atu haklaken ba guarda sira no mós ema neʼebé vizita nia. Paulo haklaken ho laran-manas iha situasaun neʼe, no neʼe halo irmaun-irmán sira sai aten-brani “atu koʼalia Maromak nia liafuan la ho taʼuk”.​—Flp 1:12-14; 4:22. w19.08 p. 12 par. 15-16

Razaun importante liu atu haburas hahalok haraik an mak tanba neʼe halo Jeová kontente. Apóstolu Pedro fó sai ida-neʼe ho klaru bainhira nia hakerek liafuan sira iha eskritura ba ohin. Livru “Mai Tuir Haʼu” iha kapítulu 3 parágrafu 23, koʼalia kona-ba Pedro nia liafuan, dehan: “Hahalok foti an mak hanesan venenu ida. Foti an bele estraga buat barak. Hahalok neʼe bele halo ema neʼebé matenek sai la folin iha Maromak nia matan. Maibé, ema neʼebé ladún matenek bele sai folin-boot ba Maromak Jeová tanba ninia hahalok haraik an, no Maromak bele uza ema neʼe atu halo ninia serbisu . . . Maromak sei kontente atu haraik bensaun mai ita tanba ita-nia hahalok haraik an.” Loos duni, halo Jeová kontente mak buat neʼebé diʼak liu hotu. (Prov 23:15) Kuandu ita haburas hahalok haraik an, ita sei simu benefísiu oioin. Porezemplu, se ita haraik an, ema sei hakarak ransu ho ita. Tanbasá? Hanoin toʼok kona-ba ema hanesan saida mak ita gosta atu ransu.​​—Mt 7:12. w19.09 p. 4 par. 8-9

Katuas sira hakaʼas an atu ajuda irmaun-irmán sira. No sira mós la sente katak sira diʼak liu fali ema seluk tanba sira-nia responsabilidade. Maibé, sira tau matan ba kongregasaun ho laran-diʼak. (1 Tes 2:7, 8) Tanba sira haraik an no hadomi ema seluk, sira koʼalia ho laran-diʼak. Andrew neʼebé serbí nuʼudar katuas ba tinan barak ona dehan: “Haʼu haree katak se katuas ida hatudu domin no laran-diʼak, neʼe book duni irmaun-irmán. Hahalok sira-neʼe book kongregasaun atu apoia katuas sira.” Tony neʼebé mós serbí nuʼudar katuas ba tinan barak ona dehan: “Haʼu koko atu aplika konsellu iha Filipe 2:3 no kontinua hakaʼas an atu haree ema seluk boot liu fali haʼu. Neʼe ajuda haʼu la obriga ema atu halo tuir haʼu.” Katuas sira tenke hatudu haraik an hanesan Jeová. Maski Jeová mak Ukun-Naʼin Boot Liu iha lalehan no rai, nia “hakruʼuk” atu ajuda “ema kiʼik hamriik husi rai-rahun”. (Sal 18:35; 113:6, 7) Tuir loloos, Jeová hakribi ema sira neʼebé foti an. w19.09 p. 16-17 par. 11-12

Atu ita hetan kmaan hodi lori Jesus nia ai-leba, ita tenke kontinua iha hanoin neʼebé loos. Ita halo Jeová nia serbisu, tan neʼe tenke halo buat hotu tuir Jeová nia hakarak. Ita mak serbisu-naʼin, no Jeová mak Patraun. (Lc 17:10) Se ita koko atu halo Jeová nia serbisu tuir deʼit ita-nia hakarak, neʼe sei lori susar ba ita-nia an rasik. Maibé se ita halo Jeová nia serbisu tuir ninia hakarak, ita bele kumpre buat furak oioin no tahan hasoru susar oioin. Hanoin-hetan katak la iha ema ida bele hanetik Jeová nia hakarak atu sai loos. (Rom 8:31; 1 João 4:4) Ita-nia objetivu mak atu fó glória ba ita-nia Aman domin nian, Jeová. Iha Jesus nia tempu, ema balu iha motivu la loos hanesan hanoin an deʼit no hakarak hetan buat ruma, ikusmai sira sai la kontente no husik Jesus nia ai-leba. (João 6:25-27, 51, 60, 66; Flp 3:18, 19) Maibé iha mós ema balu neʼebé husik domin ba Maromak no sira-nia maluk mak motiva sira, no sira sente kontente atu lori Jesus nia ai-leba durante sira-nia moris tomak iha rai, no iha esperansa atu serbí hamutuk ho Kristu iha lalehan. Ita bele kontente nafatin hanesan sira se ita lori Jesus nia ai-leba ho motivu neʼebé loos. w19.09 p. 20 par. 1; p. 24-25 par. 19-20

Hanoin kona-ba benefísiu neʼebé Ita hetan tanba sai livre husi hanorin falsu. Ita kontente tebes atu simu liberdade neʼe. Iha futuru, ita bele sai livre iha dalan diʼak liután. Lakleur, Jesus sei halakon relijiaun falsu hotu no mós ema nia ukun hotu neʼebé la justu. Maromak sei proteje “ema-lubun boot” neʼebé serbí nia, no tuirmai sira sei moris kontente iha mundu paraízu. (Apok 7:9, 14) Ema barak sei simu moris-hiʼas no hetan oportunidade atu sai livre husi buat aat hotu neʼebé mosu tanba Adão nia sala. (Após 24:15) Durante Kristu nia Ukun ba Tinan Rihun Ida, Jesus no sira neʼebé ukun hamutuk ho nia sei ajuda ema atu hetan saúde neʼebé perfeitu no sai fali Maromak nia oan sira. Ema Izraél antigu sai livre durante Tinan Livre nian, maibé durante Kristu nia Ukun ba Tinan Rihun ida ema hotu sei hetan liberdade neʼebé diʼak liu. Rezultadu mak ema hotu neʼebé serbí Maromak ho laran-metin sei sai perfeitu no livre husi sala. w19.12 p. 12-13 par. 14-16

Iha apóstolu sira-nia tempu, mane laran-luak ida naran José (apelidu Barnabé) husik Jeová atu uza nia. (Após 4:36, 37) Bainhira Saul sai ona fiar-naʼin, irmaun-irmán barak taʼuk atu hakbesik nia tanba uluk nia kontra ema sira neʼebé fiar Jesus. Maibé, Barnabé ajuda Saul. (Após 9:21, 26-28) Liutiha tempu balu, katuas sira iha Jeruzalein sente katak presiza haruka ema atu anima irmaun-irmán sira neʼebé hela dook iha Antiokia iha Síria. Sira haruka sé? Barnabé. Sira halo desizaun diʼak. Bíblia konta katak Barnabé “hahú fó aten-brani ba sira hotu atu kontinua laran-metin ba Naʼi”. (Após 11:22-24) Nuneʼe mós ohin loron, Jeová bele uza ita atu fó kmaan ba irmaun-irmán sira. Porezemplu, nia bele uza ita atu fó kmaan ba ema sira neʼebé família foin mate. Ka nia bele book ita atu vizita ka telefone ema neʼebé moras ka iha depresaun atu bele fahe liafuan balu neʼebé fó kmaan. Ita sei husik Jeová uza ita hanesan Barnabé ka lae?​—1 Tes 5:14. w19.10 p. 22 par. 8

Kuandu ita haklaken beibeik hamutuk ho irmaun-irmán sira, dala ruma ita nota sira-nia kbiit no mós sira-nia fraku. Saida mak bele ajuda ita? Tuir loloos, ita labele hein katak ita-nia irmaun-irmán sira sei hatudu hahalok perfeitu. Tan neʼe, bainhira ita iha ona relasaun diʼak nuʼudar belun, ita presiza hakaʼas an atu hametin nafatin relasaun neʼe. Se ita-nia belun halo sala, karik ho laran-diʼak ita presiza fó konsellu neʼebé nakloke ba nia tuir Maromak nia Liafuan. (Sal 141:5) No se sira hakanek ita-nia laran, ita presiza perdua sira. Bainhira ita perdua ona sira, ita labele koʼalia fali kona-ba neʼe. Durante loron ikus sira-neʼe, importante tebes atu fokus ba irmaun-irmán sira-nia hahalok diʼak duké fokus ba sira-nia fraku! Neʼe sei hametin ita-nia relasaun nuʼudar belun. Ita presiza belun diʼak durante terus boot. w19.11 p. 6 par. 13, 16

Bainhira ita estuda Bíblia ho ema, ita hakaʼas an atu ‘hanorin ema sai dixípulu no hanorin sira atu halo tuir Jesus nia mandamentu hotu’. Ita presiza ajuda ema komprende tanbasá importante ba sira atu halo desizaun hodi serbí Jeová no apoia ninia Ukun. Neʼe katak ita presiza hakaʼas an atu motiva ema hodi aplika lia-loos neʼebé sira aprende, dedika sira-nia moris ba Jeová, no hetan batizmu. Se sira halo nuneʼe, sira sei hetan salvasaun. (1 Ped 3:21) Hela tempu uitoan deʼit atu sistema aat neʼe lakon. Tan razaun neʼe, ita lalika gasta tempu atu estuda Bíblia ho ema neʼebé lakohi halo mudansa atu sai Kristu nia dixípulu. (1 Kor 9:26) Ita-nia serbisu mak urjente! Iha ema barak tan neʼebé presiza rona liafuan diʼak kona-ba Maromak nia Ukun antes la iha tan oportunidade. w19.10 p. 11-12 par. 14-15

Iha Loron Hamoos Sala nian neʼebé halaʼo tinan-tinan, nasaun Izraél halibur hamutuk no amlulik boot hasaʼe sakrifísiu. Sakrifísiu sira-neʼe fó-hanoin ema Izraél katak sira presiza hamoos sira-nia sala. Maibé primeiru, amlulik boot tenke fakar insensu morin ba ahi-klaak leten, no kuartu laran neʼe sai nakonu ho buat morin Ita bele aprende saida husi neʼe? Bíblia hatudu katak Maromak nia atan laran-metin sira-nia orasaun mak hanesan insensu. (Sal 141:2; Apok 5:8) Hanoin-hetan katak amlulik boot lori insensu ba Jeová nia oin ho respeitu kleʼan. Nuneʼe mós, bainhira ita hakbesik ba Jeová liuhusi orasaun, ita tenke hatudu respeitu kleʼan. Ita agradese tebes tanba ita-nia Kriadór husik ita hakbesik ba nia hanesan oan ida hakbesik ba ninia aman. (Tgo 4:8) Nia simu ita nuʼudar ninia belun! (Sal 25:14) Ita hafolin tebes priviléjiu neʼe no lakohi atu hakanek ninia laran. w19.11 p. 20-21 par. 3-5

Iha Ita-nia área, ema barak hanoin oinsá kona-ba serbisu? Iha rai barak, ema serbisu makaʼas durante oras barak liu fali uluk. Sira la iha tempu atu hamutuk ho família, atu deskansa ka atu aprende liután kona-ba Maromak. (Ecle 2:23) Maibé problema seluk mak dala ruma ema balu la gosta serbisu no sira buka razaun oioin atu la serbisu. (Prov 26:13, 14) Ema barak iha mundu iha hanoin la loos kona-ba serbisu. Maibé hanoin toʼok kona-ba Jeová no Jesus nia hanoin kona-ba serbisu. Ita hatene katak Jeová gosta serbisu. Jesus fó sai ho klaru hodi hatete: “Haʼu-nia Aman kontinua serbisu toʼo ohin loron, no haʼu mós kontinua serbisu.” (João 5:17) Hanoin toʼok kona-ba serbisu hotu neʼebé Jeová halo bainhira nia kria anju barak no mós universu. Nia mós kria buat furak oioin iha mundu. w19.12 p. 2 par. 1-2

Oinsá David bele besik tebes ho Jeová? David aprende kona-ba Jeová liuhusi kriasaun. Kuandu David sei joven, nia tau matan ba ninia aman nia bibi-malae tan neʼe nia gasta tempu barak iha liʼur. Karik iha tempu neʼe mak nia komesa hanoin kleʼan kona-ba Jeová nia kriasaun. Porezemplu, bainhira David hateke ba lalehan iha kalan, nia haree fitun rihun ba rihun, no mós hanoin kona-ba Jeová nia hahalok sira. (Sal 19:1, 2) Bainhira David hanoin kona-ba dalan neʼebé Jeová kria ema, nia bele haree duni katak Jeová mak matenek tebes. (Sal 139:14) Bainhira David hanoin kleʼan kona-ba buat sira neʼebé Jeová halo, nia rekoñese katak nia mak kiʼik deʼit se kompara ho Jeová. (Sal 139:6) Lisaun saida mak ita bele aprende? Loroloron, hanoin kleʼan ­kona-ba buat neʼebé Ita bele aprende kona-ba Jeová liuhusi ai-horis, animál sira no mós ema. Hodi halo nuneʼe, loroloron Ita sei koñese liután Ita-nia Aman domin nian. (Rom 1:20) No Ita-nia domin ba Jeová sei sai boot liután loroloron. w19.12 p. 19-20 par. 15-17

Moisés hili atu serbí Maromak. Kuandu Moisés nia idade maizumenus 40, nia hili atu apoia Maromak nia povu, ema Izraél, duké ema koñese nia nuʼudar “Faraó nia oan-feto nia oan”. Moisés husik tiha ninia pozisaun aas. Moisés hatudu fiar neʼebé metin hodi apoia ema Izraél maski nia hatene katak Faraó sei sai hirus tebes kona-ba neʼe. Faraó mak liurai neʼebé iha kbiit boot tebes, no ema Ejitu haree nia nuʼudar maromak ida. Razaun importante tanbasá Moisés iha relasaun diʼak ho Jeová durante ninia moris tomak mak tanba nia tau fiar ba Jeová. (Prov 3:5) Lisaun saida mak ita bele aprende? Hanesan Moisés, ita hotu presiza deside: Ita sei hili atu serbí Jeová no halibur hamutuk ho ninia povu ka lae? Karik ita presiza halo sakrifísiu atu bele serbí Maromak, no karik ema sira neʼebé la hatene Jeová sei kontra ita. Maibé se ita tau fiar ba ita-nia Aman iha lalehan, ita bele fiar katak nia sei apoia ita. w19.12 p. 17 par. 5-6

Maski Maromak kria ita husi rai-rahun, maibé ita folin-boot liu fali rai-rahun. Hanoin toʼok razaun balu tanbasá ita hatene katak Jeová hafolin ita. Nia kria ema ho kbiit atu haleno ninia hahalok. (Gén 1:27) Tan neʼe mak ita diʼak liu fali ninia kriasaun seluk iha rai, no ita iha knaar atu tau matan ba rai no animál sira. (Sal 8:4-8) Maski Adão halo sala, maibé Jeová kontinua hafolin ema. Nia hafolin tebes ita toʼo fó ninia Oan-Mane Jesus nuʼudar sakrifísiu atu taka ita-nia sala. (1 João 4:9, 10) Liuhusi Jesus nia sakrifísiu, Jeová sei fó moris-hiʼas ba ema neʼebé mate ona tanba Adão nia sala, katak “ema neʼebé hatudu hahalok loos no mós ema neʼebé hatudu hahalok la loos”. (Após 24:15) Bíblia hatudu katak ita mak folin-boot ba Maromak maski ita moras, kiak, ka idade ona.​—Após 10:34, 35. w20.01 p. 15 par. 5-6

Ema labele simu esperansa atu bá lalehan husi sira-nia família nuʼudar liman-rohan. Sira simu neʼe husi Maromak. (1 Tes 2:12) Entaun labele husu pergunta neʼebé bele halo ema laran-kanek. Porezemplu, se irmán ida nia laʼen iha esperansa atu bá lalehan, ita lakohi husu kona-ba oinsá nia sente tanba sei moris ba nafatin iha rai la hamutuk ho ninia laʼen. Tuir loloos, ita bele fiar metin katak iha mundu foun, Jeová sei halo kontente ema hotu hodi fó buat neʼebé sira hakarak. (Sal 145:16) Ita mós bele proteje ita-nia an rasik se ita la haree ema neʼebé atu bá lalehan importante liu fali ema seluk. Oinsá? Bíblia hatete katak ema balu neʼebé atu bá lalehan karik sei la hatudu laran-metin. (Mt 25:10-12; 2 Ped 2:20, 21) Se ita la admira ema, neʼe sei proteje ita atu la tuir deʼit ema, maski sira koñesidu, atu bá lalehan, ka serbí Jeová tempu kleur ona. (Jud 16, nota) Se ita halo nuneʼe, ita sei la lakon ita-nia fiar ba Jeová ka para atu serbí Jeová se sira la laran-metin ka husik kongregasaun. w20.01 p. 29 par. 9-10

Tanba ita mak Jeová nia “oan doben”, ita hakaʼas an atu banati-tuir nia. Ita banati-tuir ninia hahalok sira hodi hatudu domin, laran-diʼak no prontu atu perdua ema seluk. Karik ema sira neʼebé la hatene Jeová sei hakarak atu aprende liután kona-ba nia tanba sira haree ita-nia hahalok diʼak sira. (1 Ped 2:12) Inan-aman Kristaun sira iha razaun diʼak atu banati-tuir Jeová bainhira sira tau matan ba sira-nia oan. Kuandu sira halo nuneʼe, ida-neʼe karik sei book sira-nia oan atu haburas relasaun diʼak ho Aman Jeová. Ita sente orgullu ho ita-nia Aman Jeová, no hakarak atu ema seluk hatene kona-ba nia. Ita mós sente hanesan Liurai David neʼebé dehan: “Haʼu sei koʼalia kona-ba Jeová ho orgullu.” (Sal 34:2) Maibé oinsá se ita mak moedór? Oinsá ita bele sai aten-brani? Ita sei hetan aten-brani se ita tau fokus ba oinsá ita-nia haklaken halo Jeová kontente no lori benefísiu ba ema neʼebé aprende kona-ba Jeová. Jeová sei fó ita aten-brani neʼebé ita presiza. Nia ajuda irmaun-irmán sira iha apóstolu sira-nia tempu atu sai aten-brani, no nia mós sei ajuda ita.​—1 Tes 2:2. w20.02 p. 11 par. 12; p. 13 par. 13

Estudante Bíblia barak laʼo ba oin no hetan batizmu. Maibé, dala ruma ema balu neʼebé estuda beibeik Bíblia ho ita taʼuk atu sai dixípulu. Sira gosta estuda Bíblia, maibé sira la laʼo ba oin atu hetan batizmu. Se Ita estuda daudaun Bíblia ho ema ida, ami fiar katak Ita hakarak ajuda Ita-nia estudante atu aplika buat neʼebé nia aprende no sai Kristu nia dixípulu. Jeová hakarak ema atu adora nia tanba domin. Tan neʼe ita hakarak ajuda estudante Bíblia atu komprende katak Jeová hanoin no hadomi tebes sira. Ita hakarak ajuda sira atu haree Jeová nuʼudar “aman ba oan-kiak sira no proteje feto-faluk sira”. (Sal 68:5) Bainhira Ita-nia estudante hatene katak Jeová hadomi sira, karik sira mós komesa hadomi Jeová. Tan neʼe ajuda sira komprende katak ita-nia Maromak domin nian hakarak sira atu hetan moris ba nafatin, no nia prontu atu ajuda sira. w20.01 p. 3 par. 7-8

Apóstolu Paulo haraik an, tan neʼe nia hatene katak nia presiza hetan kmaan husi ninia belun sira. Nia la hanoin barak katak ema seluk sei haree nia nuʼudar ema fraku tanba hetan kmaan husi ema seluk durante tempu estrese. (Kol 4:7-11) Bainhira ita ho haraik an rekoñese katak ita presiza hetan kmaan, ita-nia irmaun-irmán sira sei kontente atu apoia ita. Paulo hatene katak Eskritura sira bele fó kmaan ba nia. (Rom 15:4) Eskritura mós fó nia matenek atu tahan hasoru susar oioin. (2 Tim 3:15, 16) Bainhira sai dadur iha Roma ba dala segundu, Paulo sente katak lakleur tan nia sei mate. Nia husu Timóteo atu mai lalais no “lori mós livru sira”. (2 Tim 4:6, 7, 9, 13) Tanbasá? Tanba karik livru sira-neʼe mak parte husi Eskritura Lian Ebraiku neʼebé Paulo bele uza atu estuda mesak. Bainhira ita banati-tuir Paulo hodi estuda beibeik Maromak nia Liafuan, Jeová sei uza Eskritura sira-neʼe atu fó kmaan mai ita maski ita hasoru situasaun neʼebé susar loos. w20.02 p. 23 par. 14-15

Elifaz, Bildad no Zofar la uza tempu atu hanoin kona-ba oinsá ajuda Job. Sira hanoin deʼit kona-ba oinsá sira bele hatudu katak Job halo ona sala. Sira fó sai informasaun loos balu, maibé buat barak liu neʼebé sira fó sai kona-ba Job no Jeová mak la loos no la hatudu laran-diʼak. Sira duun katak Job mak ema aat. (Job 32:1-3) Jeová halo saida kona-ba neʼe? Jeová sai hirus makaʼas hasoru mane naʼin-tolu neʼe. Nia bolu sira beik no haruka sira atu husu Job harohan ba sira. (Job 42:7-9) Ita aprende lisaun balu husi ­Elifaz, Bildad no Zofar nia ezemplu aat. Primeiru, ita labele tesi-lia ba irmaun-irmán sira. (Mt 7:2-5) Maibé ita tenke rona didiʼak ba sira antes koʼalia. Hodi halo nuneʼe, ita bele komprende sira-nia situasaun. (1 Ped 3:8) Segundu, bainhira ita koʼalia, ita tenke koʼalia ho laran-diʼak no koʼalia buat loos. (Éf 4:25) No terseiru, Jeová interese tebes ba buat neʼebé ita koʼalia ba malu. w20.03 p. 22-23 par. 15-16

Hodi hanorin ema seluk kona-ba Jeová, ita rasik mós sei hatene diʼak liután Jeová. Porezemplu, ita bele haree Jeová nia laran-sadiʼa bainhira nia ajuda ita hetan ema neʼebé hakarak sai ninia belun. (João 6:44; Após 13:48) Ita haree katak Bíblia iha duni kbiit, tanba ida-neʼe ajuda ita-nia estudante Bíblia atu para toman aat sira no tau hahalok foun. (Kol 3:9, 10) No Ita bele haree Maromak nia pasiénsia tanba nia fó oportunidade barak ba ema iha ita-nia área atu aprende kona-ba nia no hetan salvasaun. (Rom 10:13-15) Maski ita serbí Jeová kleur ona ka lae, ita tenke kontinua hafolin ita-nia relasaun diʼak ho Jeová. Dalan ida atu halo nuneʼe mak hodi koʼalia ba nia liuhusi orasaun. Se Ita hakarak habelun ho ema ida, Ita tenke koʼalia beibeik ho nia. Nuneʼe mós atu iha relasaun diʼak ho Maromak, Ita presiza halo orasaun ba nia beibeik, no keta taʼuk atu fó sai Ita-nia hanoin no sentimentu ba nia. w19.12 p. 19 par. 11, 13-14

Bainhira ita hanoin kona-ba neʼe, ida-neʼe halo ita sente kmaan duni! Nuʼudar Liurai ba Maromak nia Ukun, Jesus sei halakon susar hotu neʼebé Satanás no ninia mundu hamosu ba ita. (Isa 65:17; 1 João 3:8; Apok 21:3, 4) Neʼe fó ba ita esperansa neʼebé furak tebes! Maski Jesus fó ita knaar neʼebé susar, maibé nia hamutuk ho ita no apoia ita durante loron ikus. (Mt 28:19, 20) Neʼe fó duni aten-brani ba ita! Kmaan, esperansa, no aten-brani mak importante atu ita bele nafatin sente dame iha ita-nia neon. Entaun, oinsá mak ita bele nafatin sente dame iha Ita-nia laran bainhira Ita hasoru susar oioin? Ita bele hetan dame hodi banati-tuir buat neʼebé Jesus halo. Primeiru, halo orasaun, no harohan beibeik. Segundu, halo tuir Jeová no haklaken ho badinas maski dala ruma susar. No terseiru, sadere ba Ita-nia belun sira atu ajuda ita tahan Ita-nia susar. Depois neʼe, Maromak nia dame sei proteje Ita-nia hanoin no laran. (Flp 4:6, 7) No hanesan Jesus, Ita mós sei manán susar naran deʼit.​—João 16:33. w19.04 p. 13 par. 16-17