Outubru

Ita haree ona evidénsia barak katak Jeová proteje ninia povu ohin loron. Hanoin toʼok kona-ba ida-neʼe: Ita haklaken no hanorin lia-loos iha rai hotu iha mundu neʼe. (Mt 28:19, 20) Rezultadu mak, ita hatudu sai Diabu nia hahalok aat sira. Entaun, se Satanás iha kbiit, nia sei hapara ita-nia atividade hotu, maibé nia labele halo nuneʼe. Tan neʼe, ita la presiza sai taʼuk ba anju aat sira. Se ita laran-metin ba Jeová, nia sei halakon susar hotu neʼebé anju aat halo. Maibé, ita hotu presiza kontra hasoru anju aat no tau fiar ba Jeová. Se ita halo nuneʼe, ita sei simu bensaun barak, no sei hasees an husi Satanás nia lia-bosok. No mós, ita sei la sai taʼuk kona-ba anju aat sira. Liután neʼe, ita sei hametin ita-nia relasaun ho Jeová nuʼudar belun. Dixípulu Tiago hakerek: “Kontra hasoru Diabu, no nia sei halai husi imi. Hakbesik ba Maromak, no nia sei hakbesik ba imi.”​—Tgo 4:7, 8. w19.04 p. 24 par. 15; p. 25 par. 18

Ita-nia oan mak prezente husi Maromak, no “liman-rohan husi Jeová”. Ita iha responsabilidade atu proteje Ita-nia oan. Saida mak Ita bele halo atu proteje Ita-nia oan husi abuzu seksuál? Primeiru, buka-hatene kona-ba abuzu seksuál. Buka-hatene ema hanesan saida mak abuza labarik no dalan neʼebé sira uza atu lohi labarik. Matan-moris hodi haree perigu sira. (Prov 22:3; 24:3) Hanoin-hetan katak, dala barak ema neʼebé abuza labarik iha dalan seksuál mak ema neʼebé labarik koñese no tau fiar. Segundu, koʼalia nakloke ba malu. (Deut 6:6, 7; Tgo 1:19) Hanoin-hetan katak baibain labarik sira taʼuk atu kesar kona-ba abuzu seksuál. Karik sira taʼuk katak ema sei la fiar sira, ka ema neʼebé abuza sira mak ameasa sira. Se Ita hanoin katak buat aat ruma akontese ba Ita-nia oan, ho laran-diʼak husu pergunta no rona didiʼak ba sira-nia resposta. Terseiru, hanorin Ita-nia oan. Hanorin Ita-nia oan saida mak sira tenke dehan no halo se ema ida koko atu kaer sira-nia isin neʼebé privadu. w19.05 p. 13 par. 19-22

Tanbasá Jeová hakribi ema neʼebé foti an? Razaun ida mak tanba ema sira neʼebé foti an hadomi deʼit sira-nia an hanesan Satanás. Porezemplu, Maromak uza Jesus atu kria buat hotu. Maibé ho foti an, Satanás fiar katak Jesus tenke hakneʼak hodi adora nia. (Mt 4:8, 9; Kol 1:15, 16) Maski ema neʼebé foti an sente katak sira matenek, maibé Maromak haree sira nuʼudar ema beik. (1 Kor 3:19) Maibé Bíblia ajuda ita atu iha hanoin neʼebé loos kona-ba ita-nia an rasik. Bíblia hatete katak la sala atu hadomi ita-nia an iha dalan neʼebé loos. Jesus hatete katak “hadomi imi-nia maluk hanesan imi-nia an rasik”, neʼe katak ita mós presiza fó atensaun ba ita-nia an rasik. (Mt 19:19) Maski nuneʼe, Bíblia la hanorin ita atu haree ita-nia an boot liu fali ema seluk. Bíblia hatete: “Keta halo buat ida hodi buka atu manán deʼit ka foti an, maibé ho haraik an hodi haree ema seluk boot liu fali imi.”​—Flp 2:3; Rom 12:3. w19.05 p. 24 par. 13-14

Hanoin fali toʼok mudansa sira neʼebé uluk Ita presiza halo bainhira Ita simu lia-loos husi Maromak nia Liafuan no deside atu serbí Jeová. Atu bele serbí Jeová, ita barak para atu la halo tan buat neʼebé sala. (1 Kor 6:9-11) Ita sente agradese tebes ba Jeová tanba nia ajuda ita atu la halo tan buat neʼebé sala. Maibé, ita labele hanoin katak ita la presiza tan halo mudansa. Maski ita la halo tan sala sériu sira neʼebé ita halo antes ita hetan batizmu, maibé ita presiza nafatin hakaʼas an atu hadook an husi buat naran deʼit neʼebé bele tenta ita atu halo fali hahalok sala. Ita presiza halo buat rua. Primeiru, ita “keta halo tuir” mundu neʼe. Segundu, ita presiza “troka” hodi hafoun ita-nia hanoin. Mudansa neʼe laʼós deʼit kona-ba buat neʼebé ema seluk bele haree husi liʼur. Neʼe envolve buat hotu iha ita-nia moris. Ita presiza hafoun ita-nia hanoin, katak ita-nia sentimentu no hakarak sira. w19.06 p. 9 par. 4-6

Bainhira ita sente estrese, ita bele hetan fali kbiit liuhusi tuir reuniaun Kristaun sira. Bainhira ita tuir reuniaun, ita fó Jeová oportunidade atu sai ita-nia “ajuda-naʼin” no fó kmaan ba ita. Liuhusi reuniaun, nia hametin ita hodi uza ninia espíritu santu, ninia Liafuan no ninia povu. Reuniaun fó ita oportunidade atu “anima no hametin malu”. (Rom 1:11, 12) Irmán ida naran Sophia hatete: “Jeová no irmaun-irmán sira ajuda haʼu atu tahan. Reuniaun mak importante tebes mai haʼu. Haʼu aprende katak se haʼu envolve an liután iha kongregasaun no serbisu haklaken, haʼu sente fasil liu atu tahan hasoru haʼu-nia estrese no laran-taridu.” Bainhira ita sente laran-kraik, mai ita hanoin-hetan Jeová nia promesa katak nia sei halakon problema hotu iha futuru no mós ajuda ita atu tahan hasoru estrese ohin loron. Nia sei fó ba ita “hakarak no kbiit” atu tahan sentimentu laran-kraik no mós lakon esperansa.​—Flp 2:13. w19.06 p. 19 par. 17-18

Buat primeiru neʼebé Jesus halo depois nia moris hiʼas mak arranja reuniaun ida ho ninia dixípulu sira. Iha reuniaun neʼe nia fó sira mandamentu neʼebé importante tebes. Iha reuniaun neʼe, Jesus esplika kona-ba serbisu importante neʼebé ninia dixípulu sira sei halo iha tempu neʼebá, no ohin loron ita mós halo serbisu neʼe. Jesus hatete: “Laʼo bá no hanorin ema husi nasaun hotu atu sai haʼu-nia dixípulu . . . Hanorin sira atu halo tuir mandamentu hotu neʼebé haʼu fó ona ba imi.” (Mt 28:19, 20) Jesus hakarak ninia dixípulu hotu atu haklaken. Nia la fó deʼit mandamentu neʼe ba apóstolu naʼin-11 neʼebé laran-metin. Tanbasá ita bele dehan nuneʼe? Bainhira Jesus fó mandamentu neʼe, laʼós apóstolu sira deʼit mak halibur iha foho ida iha Galileia. Oinsá ita hatene ida-neʼe? Hanoin-hetan anju ida nia liafuan ba feto sira: “Imi sei haree nia iha [Galileia].” (Mt 28:7) Entaun klaru katak feto laran-metin sira-neʼe mós tuir reuniaun neʼe. w20.01 p. 2 par. 1-4

Jesus esplika tanbasá ita la presiza hakfodak bainhira ema fó-terus ba ita. Nia hatete katak ema sei odi ita tanba ita laʼós parte husi mundu neʼe. Bainhira ema fó-terus ba ita, neʼe laʼós katak Jeová la haraik ona bensaun ba ita. Maibé, neʼe hatudu katak ita halo buat neʼebé loos. Ema neʼebé kontra ita la iha kbiit atu hapara ita-nia adorasaun ba Jeová, Maromak neʼebé Kbiit Boot Liu Hotu. Ema barak koko maibé la susesu. Porezemplu, durante Funu Mundiál Segundu, governu iha nasaun barak fó-terus makaʼas ba Maromak nia povu. Partidu Nazi bandu Testemuña ba Jeová iha rai-Alemaña, no mós governu Austrália, Kanadá, no rai sira seluk bandu Testemuña. Maibé saida mak akontese? Iha tinan 1939 bainhira funu komesa, iha deʼit haklaken-naʼin 72.475 iha mundu tomak. Maibé tanba Jeová nia bensaun, bainhira funu remata iha tinan 1945, iha haklaken-naʼin 156.299. Haklaken-naʼin aumenta ba dala rua liu. w19.07 p. 9 par. 4-5

Maski agora Ita la estuda Bíblia ho ema ida, maibé iha dalan seluk atu ajuda ema sai Kristu nia dixípulu. Porezemplu, bainhira ema foun mai Reuniaun-Fatin, Ita bele fó benvindu no habelun sira. Se Ita hatudu domin iha dalan hanesan neʼe, Ita bele ajuda sira fiar katak ita mak ema Kristaun loos. Ita-nia komentáriu durante reuniaun, maski badak, bele hanorin ema foun oinsá atu fó sai sira-nia fiar husi laran no ho respeitu. Ita mós bele akompaña haklaken-naʼin foun atu haklaken no ajuda nia atu uza eskritura atu hanorin ema. Hodi halo nuneʼe, Ita sei hanorin nia atu banati-tuir Kristu. (Lc 10:25-28) Ema Kristaun barak okupadu ho buat importante oioin. Maski nuneʼe, sira fahe tempu atu estuda Bíblia ho ema, no sira hetan kontente husi ida-neʼe. w19.07 p. 17 par. 11, 13

Apóstolu Paulo la husik buat ruma dada ninia atensaun, inklui buat diʼak ka aat neʼebé uluk nia halo. Tuir loloos, nia hatete katak nia tenke ‘haluha buat sira neʼebé iha kotuk’, atu nuneʼe nia bele “hakaʼas an atu hetan buat sira neʼebé iha oin”, ka halai toʼo rohan. Saida mak bele dada Paulo nia atensaun? Primeiru, Paulo hetan susesu barak antes nia sai ema Kristaun. Maibé, nia “haree buat sira-neʼe nuʼudar foʼer deʼit”. (Flp 3:3-8) Segundu, maski karik nia sente sala tanba uluk nia fó-terus ba ema Kristaun, maibé nia la husik ida-neʼe hapara nia serbí Jeová. Terseiru, nia la sente katak nia halo ona buat barak ba Jeová no la presiza hakaʼas an tan. Paulo halo serbisu barak ba Maromak maski nia tama komarka, ema baku nia, tuda nia, ró neʼebé nia saʼe rahun, no nia la iha ai-han no roupa. (2 Kor 11:23-27) Maski Paulo halo ona buat barak no hasoru susar barak, nia hatene katak nia tenke kontinua hakaʼas an. Ita mós tenke halo hanesan neʼe. w19.08 p. 3 par. 5

Ita-nia irmaun-irmán barak hela iha nasaun neʼebé bandu sira atu labele haklaken iha fatin públiku ka husi uma ba uma, tan neʼe sira buka dalan seluk atu haklaken liafuan diʼak. (Mt 10:17-20) Iha nasaun sira-neʼe ida, katuas área fó sujestaun atu haklaken-naʼin ida-idak haklaken ba sira-nia família, viziñu, kolega eskola, kolega serbisu, no ema neʼebé sira koñese. Iha tinan rua nia laran, kongregasaun iha área neʼe aumenta barak tan. Karik ita hela iha nasaun neʼebé ita bele haklaken ho livre. Maski nuneʼe, ita bele aprende lisaun importante husi irmaun-irmán sira-neʼe, neʼe mak sempre buka dalan oioin atu haklaken, no fiar metin katak Jeová sei fó ita kbiit atu haklaken maski hasoru susar. (Flp 2:13) Iha loron ikus sira-neʼe, ita tenke buka-hatene buat neʼebé importante liu, sai laran-moos, labele halo ema seluk sidi, no hatudu hahalok loos. Ho ida-neʼe, ita-nia domin sei sai boot liután no lori glória ba ita-nia Aman Jeová neʼebé hadomi ita. w19.08 p. 13 par. 17-18

Baibain ita la gosta ransu ho ema neʼebé sempre hakarak ema seluk halo tuir deʼit saida mak nia hakarak no lakohi rona ema seluk nia sujestaun. Maibé ita sei kontente atu ransu hamutuk ho ita-nia irmaun-irmán sira neʼebé “hanoin malu, hadomi malu hanesan maun-alin, hatudu laran-sadiʼa no haraik an”. (1 Ped 3:8) Se ita gosta hakbesik ba ema neʼebé haraik an, neʼe katak ema mós hakarak hakbesik mai ita se ita haraik an. Haraik an bele ajuda ita hasoru problema iha ita-nia moris. Dala ruma, ita haree buat oioin neʼebé la justisa akontese iha ita-nia moris. Ema balu tuir loloos iha talentu, maibé ema ladún hafolin sira. No dala ruma ema hafolin liu mak sira neʼebé la iha talentu. Maski nuneʼe, Salomão dehan atu simu realidade duké sai laran-kraik kona-ba situasaun moris neʼebé ita hasoru. (Ecle 6:9) Se ita haraik an, fasil ba ita atu simu situasaun moris nian maski karik ita ladún gosta. w19.09 p. 4-5 par. 9-10

Sira neʼebé kaer responsabilidade ruma, hanesan aman, bele ajuda ema seluk. Jeová fó responsabilidade ba aman sira nuʼudar família nia ulun, no Maromak hakarak sira atu treinu no dixiplina sira-nia oan. (1 Kor 11:3) Maibé aman sira labele halaʼo sira-nia responsabilidade tuir deʼit sira-nia hakarak tanba sira tenke hatán ba Jeová, ida neʼebé kria família hotu. (Éf 3:14, 15) Aman sira hatudu katak sira hakruʼuk ba Jeová hodi halaʼo sira-nia responsabilidade iha dalan neʼebé halo Maromak kontente. Porezemplu, (1) Labele uza sala podér neʼebé Jeová fó ba Ita. (2) Rekoñese Ita-nia sala, no simu ema seluk nia konsellu neʼebé bazeia ba Bíblia. Se Ita halo nuneʼe, Ita-nia família sei respeitu Ita tanba Ita haraik an. (3) Bainhira halo orasaun ho Ita-nia família, fakar sai Ita-nia laran ba Jeová, atu nuneʼe sira bele rona oinsá Ita sadere ba Jeová. (4) Tau uluk Ita-nia serbisu ba Jeová. (Deut 6:6-9) Ita-nia ezemplu diʼak mak prezente folin-boot neʼebé Ita bele fó ba Ita-nia família. w19.09 p. 15 par. 8; p. 17 par. 14; p. 18 par. 16

Marcos kontente atu serbí ema seluk. Porezemplu, ba tempu balu nia serbí hamutuk ho apóstolu Paulo no Pedro, no karik Marcos ajuda tau matan ba sira-nia presiza. (Após 13:2-5; 1 Ped 5:13) Paulo dehan katak Marcos mak ninia “maluk serbisu-naʼin ba Maromak nia Ukun” no “ajuda-naʼin neʼebé hametin” nia. (Kol 4:11, nota) Marcos sai Paulo nia belun diʼak. Porezemplu, maizumenus iha tinan 65 EC bainhira Paulo tama komarka ba dala ikus iha Roma, nia hakerek karta segundu ba Timóteo. Iha karta neʼe Paulo husu Timóteo atu mai Roma hamutuk ho Marcos. (2 Tim 4:11) Klaru katak Paulo hafolin tebes Marcos nia serbisu neʼebé nia halo ona ho laran-metin, tan neʼe Paulo husu Marcos atu akompaña nia durante tempu importante neʼe. Marcos ajuda Paulo iha dalan oioin, karik lori ai-han ka buat neʼebé nia presiza atu hakerek ninia karta. Ita bele fiar katak apoia no anima neʼebé Paulo simu, ajuda nia atu tahan ninia loron ikus sira toʼo hetan kastigu-mate. w20.01 p. 11 par. 12-13

Ita deside ona atu uza ita-nia moris hodi serbisu makaʼas no halo sakrifísiu. Jesus fó avizu katak ema sei kontra ita. Maibé ita bele fiar katak Jeová sei fó ita kbiit atu tahan susar hotu. Bainhira ita tahan susar, ita sei iha forsa liután. (Tgo 1:2-4) Ita mós fiar katak Jeová sei fó buat neʼebé ita presiza, Jesus sei tau matan ita, no irmaun-irmán sira sei anima ita. (Mt 6:31-33; João 10:14; 1 Tes 5:11) Feto neʼebé Jesus kura husi ninia moras “raan suli” hetan kedas kmaan iha loron neʼebá. (Lc 8:43-48) Maibé nia bele hetan kmaan ba nafatin se nia sai Kristu nia dixípulu. Ita la hatene ninia desizaun. Maibé se nia simu Jesus nia ai-leba, nia hetan ona kolen furak atu serbí hamutuk ho Jesus iha lalehan. Sakrifísiu hotu neʼebé nia halo atu sai Kristu nia dixípulu mak kiʼik deʼit se kompara ho bensaun neʼebé nia hetan. Maski ita iha esperansa atu moris ba nafatin iha lalehan ka rai, ita sente agradese tebes tanba simu Jesus nia konvite: “Mai besik haʼu”. w19.09 p. 25 par. 21-22

Tanba sira presiza ajuda, David nia ema sira bá husu ai-han uitoan husi mane Izraél ida naran Nabal. Sira iha razaun atu husu ajuda tanba sira proteje Nabal nia bibi-lubun iha rai-fuik. Maibé Nabal neʼebé hanoin an deʼit lakohi fó buat ida ba sira. David sai hirus no hakarak atu oho Nabal no mane hotu iha ninia umakain. (1 Sam 25:3-13, 22) Nabal nia feen Abigail mak bonita no matenek tebes. Abigail hatudu aten-brani, nia hakneʼak iha David nia oin no husu David atu labele halo sala hodi oho Nabal no mane hotu iha ninia umakain. Abigail fó sujestaun ba David atu sadere ba Jeová. Abigail nia liafuan neʼebé hatudu haraik an no hahalok matenek book tebes David nia laran. Tan neʼe David rekoñese katak Jeová mak haruka Abigail. (1 Sam 25:23-28, 32-34) Jeová bele uza Abigail tanba nia haburas ona hahalok neʼebé diʼak. Nuneʼe mós Jeová bele uza irmán Kristaun sira neʼebé haburas hahalok respeitu no matenek atu bele hametin sira-nia família no ema seluk iha kongregasaun.​—Tito 2:3-5. w19.10 p. 23 par. 10

Ema Kristaun loos hotu tenke hatudu ho klaru katak sira la iha ligasaun ho Babilónia Boot. Antes aprende lia-loos, karik estudante Bíblia ida mak membru ba relijiaun falsu ida. Karik nia tuir misa ka hola parte iha atividade oioin husi relijiaun neʼe. Ka karik nia fó osan kontribuisaun ba relijiaun neʼe. Antes katuas sira fó lisensa ba estudante Bíblia ida atu sai haklaken-naʼin, estudante neʼe tenke haketak an husi relijiaun falsu. Nia presiza hakerek karta atu rezigna an ka hakotu ninia relasaun hotu ho relijiaun falsu ka organizasaun neʼebé iha ligasaun ho Babilónia Boot. Ema Kristaun loos tenke haree didiʼak katak ninia serbisu la iha ligasaun ho Babilónia Boot. (2 Kor 6:14-17) Tanbasá ita halo desizaun metin hanesan neʼe? Tanba Maromak haree relijiaun falsu nuʼudar buat la moos no ita lakohi atu hola parte iha relijiaun nia hahalok aat no sala sira.​—Isa 52:11. w19.10 p. 12 par. 16-17

Jeremias mak hakerek livru Jeremias, no karik nia mós hakerek livru Primeiru no Segundu Reis. Knaar neʼe karik ajuda nia atu haree oinsá Jeová hatudu laran-sadiʼa ba ema neʼebé la perfeitu. Porezemplu, Jeremias hatene katak bainhira Liurai Acab arrepende an husi ninia hahalok aat, Jeová la husik Acab haree ninia família tomak mate durante ninia moris tomak. (1 Reis 21:27-29) Jeremias mós hatene katak Manasés hakanek Jeová nia laran hodi halo buat neʼebé aat liu fali Acab halo, maibé Jeová perdua Manasés tanba nia arrepende an. (2 Reis 21:16, 17; 2 Krón 33:10-13) Istória sira-neʼe karik ajuda Jeremias atu banati-tuir Jeová hodi hatudu pasiénsia no laran-sadiʼa. Hanoin kona-ba oinsá Jeremias ajuda Baruc bainhira Baruc la fokus ba ninia knaar ba tempu balu. Duké husik kedas ninia belun, Jeremias ajuda Baruc hodi fó sai Maromak nia mensajen neʼebé nakloke no hatudu sai Maromak nia laran-diʼak.​—Jer 45:1-5. w19.11 p. 6 par. 14-15

Iha livru Levítico, ita aprende katak ema Izraél bele hasaʼe sakrifísiu dame nian “atu hatudu agradese”. (Lev 7:11-13, 16-18) Nia fó sakrifísiu neʼe laʼós tanba iha obrigasaun maibé ho hakarak rasik. Ita-nia serbisu ba Maromak mak hanesan sakrifísiu dame nian tanba neʼe hatudu sai ita-nia domin ba nia. Ita hakarak fó buat diʼak liu ba Jeová, no ita halo nuneʼe tanba hadomi nia ho laran tomak. Ita bele fiar katak Jeová kontente tebes atu haree ema millaun ba millaun adora nia ho hakarak rasik tanba hadomi nia no ninia matadalan sira. Jeová haree no hafolin buat neʼebé ita halo no mós ita-nia motivu. Neʼe anima duni ita. Porezemplu, se ita idade ona no labele tan halo buat barak neʼebé ita hakarak, ita bele iha konfiansa katak Jeová komprende. Karik ita sente katak ita labele halo buat barak ba Jeová, maibé nia haree ita-nia domin boot neʼebé motiva ita atu halo buat neʼebé ita bele halo. Nia kontente atu simu buat neʼebé ita bele fó tuir ita-nia kbiit. w19.11 p. 22 par. 9; p. 23 par. 11-12

Importante atu iha hanoin neʼebé loos kona-ba serbisu. Maromak dirije Liurai Salomão atu hakerek: “Iha tempu neʼebé loos . . . ba atividade hotu.” Nia temi kona-ba tempu atu kuda, harii, tanis, hamnasa, dansa no atividade sira seluk. (Ecle 3:1-8) Klaru katak serbisu no deskansa mak importante. Jesus iha hanoin neʼebé loos kona-ba serbisu no deskansa. Porezemplu, loron ida kuandu apóstolu sira fila fali husi haklaken, sira okupadu tebes toʼo “la iha tempu atu deskansa”. Jesus hatete ba sira liafuan iha eskritura ba ohin. (Mc 6:30-34) Maski dala ruma Jesus no ninia dixípulu sira labele deskansa tuir sira-nia hakarak, maibé Jesus hatene katak sira hotu presiza deskansa. Dala ruma, ita presiza duni atu deskansa ka halo atividade seluk. Ita hatene ida-neʼe husi arranju ida neʼebé Jeová halo ba ninia povu kona-ba halo tuir loron Sábadu semana-semana. Ohin loron, ita la presiza halo tuir Moisés nia Ukun-Fuan. Maski nuneʼe, ita bele hetan benefísiu hodi aprende kona-ba loron Sábadu. w19.12 p. 3 par. 6-7

Jeová promete katak nia sei tau matan ba ninia atan sira neʼebé laran-metin, no nia sente katak nia iha obrigasaun atu kumpre promesa neʼe. (Sal 31:1-3) Jeová hatene katak ita sei triste no laran-kraik se nia la tau matan ba ita neʼebé sai parte ba ninia família. Nia promete atu fó buat neʼebé ita presiza no mós buat espirituál. La iha buat ida mak bele hanetik nia atu kumpre ninia promesa neʼe. (Mt 6:30-33; 24:45) Bainhira ita hanoin-hetan tanbasá Jeová kumpre ninia promesa, ita bele iha konfiansa katak Jeová sei ajuda ita bainhira ita hasoru problema ekonomia. Hanoin toʼok ezemplu husi ema Kristaun iha apóstolu sira-nia tempu. Bainhira ema kontra kongregasaun iha Jeruzalein, “dixípulu sira hotu halai namkari ba área Judeia no Samaria, só apóstolu sira deʼit mak hela iha Jeruzalein”. (Após 8:1) Ita bele fiar katak sira hasoru problema ekonomia. Ema Kristaun sira-neʼe karik lakon sira-nia uma no negósiu. Maibé Jeová la husik sira no sira mós la lakon sira-nia ksolok. (Após 8:4; Ebr 13:5, 6; Tgo 1:2, 3) Jeová apoia ema Kristaun laran-metin sira-neʼe, no nia mós sei apoia ita.​—Sal 37:18, 19. w20.01 p. 17-18 par. 14-15

Bainhira David proteje ninia aman nia bibi-malae husi leaun no ursu, nia rekoñese katak Jeová mak ajuda nia atu oho animál fuik sira-neʼe. Bainhira nia manán hasoru soldadu jigante naran Golias, David rekoñese katak Jeová mak dirije nia. (1 Sam 17:37) No bainhira nia halai husi Liurai Saul neʼebé laran-moras, David rekoñese katak Jeová mak salva nia. (Sal 18, introdusaun) Se David mak foti an, karik nia bele hanoin katak nia rasik mak halo buat sira-neʼe. Maibé David mak haraik an, tan neʼe nia rekoñese katak Jeová mak ajuda nia. Lisaun saida mak ita bele aprende? Ita presiza husu ajuda ba Jeová no mós rekoñese bainhira no oinsá nia ajuda ita. Se ita ho haraik an rekoñese katak ita iha limitadu, ita bele haree ho klaru katak Jeová ajuda ita atu halo buat neʼebé ita la iha kbiit atu halo. No bainhira ita haree Jeová ajuda ita, ita-nia relasaun diʼak ho nia sei sai metin liután. w19.12 p. 20 par. 18-19

Ita iha razaun barak atu fiar katak Jeová hafolin ita. Nia dada ita ba nia no nia haree oinsá ita simu liafuan diʼak. (João 6:44) Bainhira ita hakbesik liután ba Jeová, nia mós hakbesik liután ba ita. (Tgo 4:8) Jeová mós uza tempu no forsa atu hanorin ita, neʼe hatudu katak ita folin-boot ba nia. Nia hatene ita ida-idak mak ema hanesan saida no mós hatene ita bele sai ema diʼak liután iha futuru. No nia dixiplina ita tanba hadomi ita. Neʼe hatudu ho klaru katak Jeová hafolin ita. Ema balu haree Liurai David nuʼudar folin-laek, maibé David hatene katak Jeová hadomi no apoia nia. Neʼe ajuda nia atu tahan susar sira ho hanoin neʼebé loos. (2 Sam 16:5-7) Bainhira ita sente laran-kraik ka hasoru problema, Jeová bele ajuda ita iha hanoin neʼebé loos kona-ba ita-nia situasaun no nia mós bele ajuda ita atu manán susar naran deʼit. (Sal 18:27-29) Bainhira Jeová apoia ita, la iha buat ida mak bele hapara ita atu adora nia ho kontente.​—Rom 8:31. w20.01 p. 15 par. 7-8

Antes atu estuda Bíblia ho ema ida, diʼak atu loke ho orasaun. Se ita estuda ona Bíblia ho ema ba semana balu, diʼak atu loke no taka estuda ida-idak ho orasaun. Ita presiza ajuda estudante atu rekoñese katak atu bele komprende Bíblia ita presiza espíritu santu nia ajuda. Mestre Bíblia balu esplika tanbasá orasaun importante bainhira estuda Bíblia hodi lee Tiago 1:5, neʼebé dehan: “Se imi ida presiza matenek, nia tenke husu beibeik ba Maromak.” Tuirmai mestre neʼe husu ba estudante: “Oinsá mak Ita bele husu matenek husi Maromak?” Baibain estudante konkorda katak ita presiza halo orasaun ba Maromak. Hanorin Ita-nia estudante atu halo orasaun. Esplika ba nia katak Jeová hakarak rona ninia orasaun husi laran. Esplika katak bainhira ita halo orasaun, ita bele fakar sai ba Jeová ita-nia sentimentu neʼebé karik ita taʼuk atu konta ba ema seluk. Hanoin-hetan katak Jeová hatene saida mak iha ita-nia laran.​—Sal 139:2-4. w20.01 p. 2 par. 3; p. 5 par. 11-12

Jeová deside bainhira mak nia sei hili ema atu bá lalehan. (Rom 8:28-30) Jeová komesa hili ema atu bá lalehan depois Jesus moris-hiʼas. Karik ema Kristaun loos hotu iha apóstolu sira-nia tempu mak iha esperansa atu bá lalehan. Durante tinan barak depois neʼe, ema barak neʼebé dehan katak sira ema Kristaun, la halo tuir Kristu. Maski nuneʼe, durante tinan sira-neʼe iha ema Kristaun loos balu no Jeová hili sira atu bá lalehan. Sira mak hanesan trigu neʼebé Jesus dehan katak sei moris iha duʼut aat nia leet. (Mt 13:24-30) Durante loron ikus sira, Jeová kontinua hili ema neʼebé sai parte ba ema naʼin-144.000. Tan neʼe, se Maromak deside atu hili ema sira-neʼe balu foin antes mundu nia rohan toʼo mai, ita lakohi sente duvida ho ninia desizaun neʼe. (Rom 9:11) Ita tenke kuidadu atu la hatudu hahalok hanesan serbisu-naʼin sira neʼebé Jesus konta iha ninia ai-knanoik ida. Sira muramura kona-ba kolen neʼebé toʼos-naʼin ida fó ba serbisu-naʼin sira neʼebé mai ikusliu.​—Mt 20:8-15. w20.01 p. 30 par. 14

Jeová hakarak ninia família atu sente kontente. Iha razaun barak atu bele sente kontente agora maski ita hasoru susar oioin. Porezemplu, ita iha konfiansa katak ita-nia Aman iha lalehan hadomi tebes ita. Ita iha koñesimentu loos kona-ba Bíblia. (Jer 15:16) No ita sai parte ba família neʼebé hadomi Jeová, hadomi malu no hafolin ninia morál neʼebé aas. (Sal 106:4, 5) Ita bele kontente nafatin tanba ita iha esperansa katak ita sei hetan moris diʼak liu iha futuru. Ita hatene katak lakleur tan Jeová sei halakon buat aat hotu, no rai sei sai Paraízu fali iha ninia Ukun okos. Ita mós iha esperansa katak ema sira neʼebé mate ona sei moris-hiʼas fali no hamutuk fali ho ita. (João 5:28, 29) Neʼe mak tempu neʼebé haksolok tebes! No importante liu mak ita fiar katak lakleur tan sira hotu neʼebé moris iha lalehan no rai sei fó hahiʼi no adora ita-nia Aman neʼebé domin. w20.02 p. 13 par. 15-16

Se Ita halo sala sériu, keta subar Ita-nia sala. Koʼalia sai ba Jeová liuhusi orasaun. Depois neʼe Ita bele sente kmaan no la sente laran-taridu tan kona-ba Ita-nia sala. Maibé se Ita hakarak atu hadiʼa Ita-nia relasaun ho Jeová, Ita presiza halo buat seluk tan. Ita tenke simu dixiplina. Bainhira Jeová haruka profeta Natan atu koʼalia ba Liurai David kona-ba ninia sala ho Bat-Seba, David la koko atu defende an ka dehan katak ninia sala ladún sériu. David rekoñese kedas katak nia halo ona sala hasoru Bat-Seba nia laʼen no liuliu hasoru Jeová. David simu dixiplina husi Jeová, no Jeová perdua nia. (2 Sam 12:10-14) Se ita halo sala sériu, ita presiza koʼalia ho ema sira neʼebé Jeová hili atu tau matan ita. (Tgo 5:14, 15) Ita labele koko atu defende an. Se ita simu kedas dixiplina no halo tuir, ita sei hetan fali kmaan no kontente. w20.02 p. 24 par. 17-18

“Mane naʼin-sanulu” reprezenta ema neʼebé iha esperansa atu moris ba nafatin iha rai. Sira hatene katak Jeová haraik ona bensaun ba “mane Judeu ida” no sente neʼe mak priviléjiu atu adora Maromak hamutuk ho ema sira neʼebé Maromak hili liuhusi espíritu santu. Ohin loron maski ita la koñese ema ida-idak neʼebé Maromak hili atu bá lalehan, maibé sira neʼebé iha esperansa atu moris ba nafatin iha rai bele “bá hamutuk” ho ema sira neʼebé Maromak hili ona. Oinsá? Resposta mak iha eskritura ba ohin. Porezemplu, eskritura neʼe temi mane Judeu ida. Maibé liafuan “imi” refere ba ema barak. Neʼe signifika mane Judeu neʼe laʼós ema ida deʼit, maibé reprezenta grupu tomak neʼebé Maromak hili atu bá lalehan. No ema neʼebé iha esperansa atu moris iha rai serbí Jeová hamutuk ho sira neʼebé atu bá lalehan. Maibé, sira la hanoin katak ema neʼebé atu bá lalehan mak sira-nia ulun-naʼin, tanba sira hatene katak Jesus mak sira-nia Ulun-Naʼin.​—Mt 23:10. w20.01 p. 26 par. 1-2

Jesus hatete katak ema sei hatene ninia dixípulu sira neʼebé loos se sira hadomi ema seluk hanesan nia mós hadomi ema. Jesus nia liafuan neʼe aplika iha apóstolu sira-nia tempu no mós ohin loron. Tan neʼe importante tebes atu ita hatudu domin ba malu maski susar. Husu ba Ita-nia an: ‘Saida mak haʼu bele aprende husi irmaun-irmán sira neʼebé kontinua hatudu domin ba malu maski susar?’ Tanba la perfeitu, neʼe halo susar ba ita atu hadomi malu tebetebes. Maski nuneʼe, ita tenke hakaʼas an atu banati-tuir Kristu. Jesus hanorin ita katak importante tebes atu buka dame ho irmaun ka irmán neʼebé hirus ita. (Mt 5:23, 24) Nia hatete katak ita presiza kontinua iha relasaun diʼak ho ema seluk se ita hakarak halo Maromak kontente. Jeová kontente bainhira ita hakaʼas an atu buka dame ho irmaun-irmán sira. Nia lakohi simu ita-nia adorasaun se ita rai odi no la hakaʼas an atu buka dame.​—1 João 4:20. w20.03 p. 24 par. 1-4

Satanás mak “lia-bosok nia aman”. Nia hahú lohi ema husi Adão no Eva nia tempu. (João 8:44) Ninia lia-bosok balu inklui hanorin falsu kona-ba mate no ema mate nia kondisaun. Hanorin sira-neʼe mak hun ba kostume oioin. Tanbasá mak ema barak fiar lia-bosok neʼe? Satanás lohi ema hodi aproveita ema nia sentimentu kona-ba mate. Tanba Maromak kria ita atu moris ba nafatin, ita lakohi atu mate. (Ecle 3:11) Ita haree mate hanesan inimigu. (1 Kor 15:26) Maski Satanás hakaʼas an, maibé nia labele subar nafatin lia-loos kona-ba mate. Tuir loloos, agora ema barak hatene no fó sai Bíblia nia hanorin kona-ba ema mate nia kondisaun no esperansa. (Ecle 9:5, 10; Após 24:15) Lia-loos sira-neʼe fó kmaan mai ita, no halo ita la taʼuk no dúvida. w19.04 p. 14 par. 1; p. 15 par. 5-6

Maromak Jeová hadomi ninia atan sira. Nia sempre hadomi sira. Nia mós hadomi justisa. (Sal 33:5) Entaun, ita bele fiar buat rua kona-ba Jeová: (1) Nia sente laran-kanek bainhira ema trata aat ninia atan sira. (2) Nia sei ajuda ninia atan sira atu hetan justisa. Ukun-Fuan neʼebé Maromak fó ba ema Izraél liuhusi Moisés mak bazeia ba domin. Neʼe book ema atu hatudu justisa ba ema hotu, inklui sira neʼebé labele proteje sira-nia an rasik. (Deut 10:18) Ukun-Fuan neʼe hatudu katak Jeová hanoin tebes ninia atan sira. Moisés nia Ukun-Fuan remata iha tinan 33 Era Comum (EC) bainhira kongregasaun Kristaun harii ona. Maibé neʼe la dehan katak ema Kristaun la hetan ona benefísiu husi ukun-fuan seluk neʼebé bazeia ba domin no justisa. Ema Kristaun iha ukun-fuan foun. “Kristu nia ukun-fuan”. Jesus la hakerek lista ukun-fuan ba ninia dixípulu sira, maibé nia fó hanorin, mandamentu, no prinsípiu atu sira bele moris tuir. “Kristu nia ukun-fuan” inklui buat hotu neʼebé nia hanorin. w19.05 p. 2 par. 1-3

Ema hotu moris mai ho presiza atu hetan kmaan no mós bele fó kmaan. Porezemplu, bainhira labarik ida halimar no monu no ninia ain-tuur kanek, nia sei tanis no halai ba ninia inan ka aman. Inan-aman labele kura kedas kanek neʼe, maibé bele fó kmaan. Sira husu nia saida mak akontese, hamaran ninia matan-been, hatoʼo liafuan neʼebé fó kmaan no domin, no karik tau ai-moruk balu. Lakleur deʼit labarik neʼe la tanis tan no karik kontinua halimar. Liutiha tempu balu, ninia kanek sei sai diʼak. Maibé, dala ruma, oan sira sente kanek iha dalan neʼebé aat liu. Sira balu sai vítima ba abuzu seksuál. Karik sira hetan abuza dala ida deʼit ka durante tinan barak. Bainhira sira hetan abuzu seksuál, neʼe hakanek sira-nia emosaun ba tempu kleur. Dala ruma, ema neʼebé abuza labarik hetan kastigu. Maibé balu haree hanesan la hetan kastigu. Maski ema neʼebé abuza labarik hetan kedas kastigu, maibé labarik bele sente nafatin laran-kanek bainhira sira boot. w19.05 p. 14 par. 1-2