Janeiru

Tanbasá Jeová bele uza Timóteo? Tanba Timóteo hatudu hahalok Kristaun. (Flp 2:​19-22) Apóstolu Paulo nia liafuan hatudu katak Timóteo mak haraik an, laran-metin, badinas no ema bele tau fiar. Nia hanoin irmaun-irmán sira. Tan neʼe, Paulo hadomi Timóteo no la dada an atu fó knaar neʼebé susar ba Timóteo. Bainhira ita haburas hahalok sira neʼebé Jeová gosta, Jeová sei hadomi ita, no kongregasaun bele uza ita iha dalan oioin. (Sal 25:9; 138:6) Tan neʼe halo orasaun no hanoin kona-ba hahalok Kristaun oioin neʼebé Ita hakarak hatudu ho diʼak liután. Tuirmai, hili hahalok espesífiku ida. Karik Ita bele aprende oinsá atu hanoin ema liután. Karik Ita hakarak sai toman atu buka dame no fó perdua. Atu deside hahalok saida mak ita bele halo diʼak liután, karik Ita bele husu sujestaun husi Ita-nia belun ida.—Prov 27:6. w22.04 p. 23 par. 4-5

Jeová hakarak ita atu sente kontente. Ita hatene ida-neʼe tanba ksolok mak hahalok ida neʼebé mai husi espíritu santu. (Gal 5:22) Bíblia hatete katak kontente liu atu fó duké simu, tan neʼe ita sente haksolok bainhira ita haklaken ho badinas no ajuda irmaun-irmán sira iha dalan oioin. (Após 20:35) Iha eskritura ba ohin, apóstolu Paulo temi buat rua neʼebé bele ajuda ita atu nafatin haksolok. Primeiru, ita presiza fó buat diʼak liu hotu ba Jeová tuir ita-nia kbiit. No se ita halo nuneʼe, ita bele sente kontente. (Mt 22:​36-38) Segundu, ita labele kompara ita-nia an ho ema seluk. Ita presiza hatudu agradese ba Jeová kona-ba buat neʼebé ita bele halo tuir ita-nia saúde, treinamentu neʼebé ita hetan ka ita-nia abilidade. No se ema seluk matenek liu atu haklaken iha dalan ida, ita presiza haksolok tanba sira uza sira-nia talentu atu hahiʼi Jeová. w22.04 p. 10 par. 1-2

Relijiaun falsu sira sei lakon derrepente deʼit no neʼe halo ema hakfodak. (Apok 18:​8-10) Bainhira Babilónia Boot lakon, neʼe sei afeta mundu tomak no karik hamosu susar barak. Maibé Maromak nia povu iha razaun rua atu sente kontente. Razaun ida mak Maromak nia inimigu sei lakon ba nafatin. No razaun segundu mak ita-nia salvasaun besik ona. Daniel fó-hatene nanis katak “koñesimentu neʼebé loos sei sai barak”. Neʼe sai loos duni. Agora ita komprende profesia oioin kona-ba ita-nia tempu. (Dan 12:​4, 9, 10) Dalan neʼebé profesia sira-neʼe sai loos halo ita admira kona-ba Jeová no ninia Liafuan Bíblia. (Isa 46:10; 55:11) Tan neʼe kontinua hametin ita-nia fiar hodi estuda Bíblia ho badinas no ajuda ema seluk atu iha relasaun diʼak ho Jeová. Jeová sei proteje ema hotu neʼebé sadere ba nia no nia sei fó sira dame neʼebé ba nafatin.—Isa 26:3. w22.07 p. 6-7 par. 16-17

Livru Apokalipse fó sai katak Maromak nia Ukun harii ona iha lalehan no Satanás soe tun tiha ona mai rai. (Apok 12:​1-9) Neʼe lori buat diʼak ba lalehan, maibé lori susar barak ba ita. Tanbasá? Tanba Satanás sai hirus no ataka Jeová nia atan sira iha rai neʼebé laran-metin. (Apok 12:​12, 15, 17) Oinsá mak ita bele hamriik metin nafatin maski Satanás ataka ita? (Apok 13:10) Buat neʼebé bele ajuda ita mak hodi hatene saida mak sei akontese iha futuru. Porezemplu, iha livru Apokalipse, apóstolu João fó sai kona-ba bensaun balu neʼebé ita sei simu lakleur tan. Bensaun ida mak Maromak nia inimigu sei lakon. Apokalipse 1:1 hatete katak informasaun neʼebé ita lee iha livru neʼe fó sai “liuhusi sinál oioin”, neʼe katak informasaun sira-neʼe uza liafuan simbóliku barak. w22.05 p. 8 par. 1-3

Ema neʼebé la serbí Jeová sai hirus ba Jeová nia povu tanba sira kontinua laran-metin ba nia. Rezultadu mak grupu nasaun sira sei ataka Maromak nia povu iha mundu tomak. Bíblia bolu ida-neʼe nuʼudar ataka husi Gog husi rai-Magog. (Eze 38:​14, 15) Jeová sei halo saida bainhira inimigu sira-neʼe ataka? Jeová hatete: “Haʼu-nia hirus sei lakan makaʼas.” (Eze 38:​18, 21-23) Apokalipse kapítulu 19 fó sai buat neʼebé akontese tuirmai. Jeová haruka ninia Oan-Mane atu defende Ninia povu no halakon inimigu. Anju laran-metin sira no mós ema naʼin-144.000 neʼebé Bíblia bolu nuʼudar “tropa lalehan nian” sei apoia Jesus atu kontra inimigu. (Apok 17:14; 19:​11-15) Saida mak rezultadu husi funu neʼe? Ema no organizasaun hotu neʼebé kontra Jeová sei lakon mohu.—Apok 19:​19-21. w22.05 p. 16-17 par. 9-10

Lakleur depois Adão no Eva halo sala, Jeová fó sai profesia furak ida neʼebé sei fó esperansa ba Adão no Eva nia oan no bei-oan sira. Profesia neʼe hakerek iha Génesis 3:15: “Haʼu sei halo ó no feto neʼe odi malu, nuneʼe mós ho ó-nia bei-oan no ninia bei-oan. Nia sei harahun ó-nia ulun, no ó sei hakanek ninia ain-tuban.” Profesia neʼe fó sai iha livru primeiru husi Bíblia. Profesia neʼe importante tanba livru sira hotu iha Bíblia liga ho ida-neʼe. Hanesan tali kesi ai-kesak ida-idak hamutuk hodi sai ai-saar, nuneʼe mós liafuan iha Génesis 3:15 liga livru ida-idak iha Bíblia hodi fó sai mensajen ida deʼit. Mensajen mak Maromak sei haruka Salvadór ida atu harahun Diabu no sira hotu neʼebé apoia nia. Neʼe mak bensaun furak ba ema neʼebé hadomi Jeová. Hodi estuda Bíblia sei ajuda ita atu haree oinsá profesia neʼe sai loos no Ita hetan benefísiu saida husi profesia neʼe. w22.07 p. 14 par. 1-3

Husu Jeová atu fó matenek neʼebé Ita presiza atu ajuda Ita-nia oan haburas domin ba Jeová. (Tgo 1:5) Jeová mak matenek liu atu fó konsellu. Iha razaun oioin tanbasá. Mai ita hanoin kona-ba razaun rua. Primeiru, Jeová iha esperiénsia barak liu nuʼudar aman. (Sal 36:9) Segundu, ninia matadalan neʼebé matenek sempre lori benefísiu. (Isa 48:17) Liuhusi Jeová nia Liafuan no ninia organizasaun, nia fó ai-han espirituál barak neʼebé bele ajuda Ita haboot Ita-nia oan atu hadomi Jeová. (Mt 24:45) Porezemplu, Ita bele hetan matadalan diʼak husi série “Ajuda ba família” neʼebé uluk fó sai iha revista Matan-moris bá!, maibé agora Ita bele hetan iha Ita-nia website. Iha jw.org, Ita bele hetan vídeo barak, no neʼe bele ajuda Ita atu aplika Jeová nia matadalan nuʼudar Ita haboot oan sira.—Prov 2:​4, 5. w22.05 p. 27 par. 4-5

Iha universu tomak, Jeová mak fó perdua iha dalan neʼebé diʼak liu. Primeiru, nia sempre prontu atu fó perdua. Segundu, nia hatene buat hotu kona-ba ita no nia koñese didiʼak ita, tan neʼe nia bele deside se ita arrepende an ho laran ka lae. Terseiru, bainhira Jeová fó perdua ba ita, nia fó perdua ba ita iha dalan neʼebé kompletu hanesan ita nunka halo sala. Neʼe ajuda ita atu iha konxiénsia neʼebé moos no iha relasaun diʼak ho nia. Klaru katak tanba ita la perfeitu, ita kontinua halo sala. Maibé ita bele hetan kmaan tanba Jeová hatudu laran-sadiʼa hodi hanoin ninia atan sira-nia fraku. Tan neʼe ita la presiza sente triste demais liu kona-ba sala neʼebé ita halo tanba la perfeitu. (Sal 103:​8-14; 130:3) Se ita hakaʼas an atu moris tuir Jeová nia hakarak, ita bele sente kontente.—Flp 4:​4-6; 1 João 3:​19-22. w22.06 p. 7 par. 18-19

Satanás la aproveita deʼit ita-nia sentimentu taʼuk ba governu. Ema balu taʼuk liu ba buat neʼebé sira-nia família sei hanoin bainhira sira sai Testemuña duké hetan baku. Sira hadomi no hakarak sira-nia família atu koñese no hadomi Jeová. Sira sente triste bainhira sira-nia família koʼalia aat Maromak neʼebé loos no ninia atan sira. Iha situasaun balu família neʼebé uluk kontra, ikusmai simu lia-loos. Maibé oinsá se ita-nia família lakohi liga tan ita tanba ita-nia fiar foun? Saida mak ita sei halo? Lia-loos furak iha Salmo 27:10 bele fó kmaan ba ita. Bainhira ita hanoin-hetan katak Jeová hadomi tebes ita, ita sei la hanoin barak kona-ba saida mak sei akontese kuandu ema fó-terus mai ita. Ita fiar katak Jeová sei fó kolen ba ita kuandu ita tahan. Jeová sei tau matan ba ita-nia presiza fíziku, emosaun no espirituál iha dalan neʼebé diʼak liu. w22.06 p. 16-17 par. 11-13

Durante Jesus haklaken iha mundu, ema duun katak Jesus lanu-teen, kaan-teen, hetan kbiit husi Diabu, la halo tuir loron Sábadu no koʼalia aat Maromak. (Mt 11:19; 26:65; Lc 11:15; João 9:16) Maski nuneʼe, Jesus la hatán ho hirus. Hanesan Jesus, ita lakohi koʼalia aat fali ba ema neʼebé hirus ita. (1 Ped 2:​22, 23) Klaru katak la fasil atu halo nuneʼe. (Tgo 3:2) Saida mak bele ajuda ita? Se ema hirus ita bainhira ita haklaken, hakaʼas an atu kalma nafatin. Irmaun Sam hatete: “Haʼu hakaʼas an atu hanoin-hetan katak uma-naʼin presiza rona ba lia-loos, no nia bele troka ninia hahalok.” Dala ruma, uma-naʼin sai hirus tanba deʼit ita mai iha tempu neʼebé la diʼak. Bainhira ema hatán ho hirus, ita bele halo orasaun badak iha laran hodi husu Jeová ajuda ita sai kalma nafatin no la koʼalia sai liafuan neʼebé la respeitu. w22.04 p. 6 par. 8-9

Dalan importante ida atu ajuda Ita-nia oan hakbesik ba Jeová mak liuhusi estuda Bíblia ho sira. (2 Tim 3:​14-17) Maibé Bíblia mós fó sai dalan seluk tan neʼebé ita-nia oan bele aprende kona-ba Jeová. Iha livru Provérbios, aman ida fó-hanoin ninia oan-mane atu nunka haluha kona-ba Jeová nia hahalok sira neʼebé hatudu sai ho klaru liuhusi kriasaun. (Prov 3:​19-21) Klaru katak inan-aman sira gosta atu uza tempu hamutuk ho oan sira iha liʼur. Diʼak atu uza tempu neʼe hodi ajuda Ita-nia oan hatene Jeová nia hahalok husi buat neʼebé nia kria. (Rom 1:20) Haree oinsá Jesus uza kriasaun atu hanorin ema. Loron ida, Jesus husu ninia dixípulu sira atu hateke ba manu-metan sira no ai-funan líriu. (Lc 12:​24, 27-30) Nia hanorin ninia dixípulu sira lisaun importante kona-ba Aman Jeová nia laran-diʼak no laran-sadiʼa. Jeová sei fó hahán no roupa ba ninia atan sira neʼebé laran-metin, hanesan nia tau matan ba manu-metan sira no mós ai-funan líriu. w23.03 p. 20-21 par. 1-4

Ita fó obrigadu ba Jeová tanba ita bele halo orasaun ba nia liuhusi ninia Oan-Mane. Jesus mak dalan neʼebé Jeová uza atu hatán ita-nia orasaun. Jeová rona no hatán ita-nia orasaun neʼebé ita hatoʼo liuhusi Jesus nia naran no perdua ita-nia sala sira tanba Jesus nia sakrifísiu. (Rom 5:1) Eskritura bolu Jesus nuʼudar Amlulik Boot neʼebé tuur “iha liman sorin loos husi Maromak neʼebé Boot Liu nia kadunan iha lalehan”. (Ebr 8:1) Jesus mak ita-nia “ajuda-naʼin ida neʼebé hamutuk ho Aman”. (1 João 2:1) Ita agradese tebes tanba Jeová fó ba ita Amlulik Boot neʼebé komprende ita-nia fraku sira no “harohan ba ita”. (Rom 8:34; Ebr 4:15) Se Jesus la fó ninia moris nuʼudar sakrifísiu, ita labele hakbesik ba Jeová liuhusi orasaun. Ita agradese tebes tanba prezente folin-boot neʼebé Jeová fó ona mai ita, neʼe mak ninia Oan-Mane neʼebé nia hadomi. w22.07 p. 23 par. 10-12

Se ema ida hakaʼas an kumpre ninia promesa sira no koʼalia buat neʼebé loos, ema seluk bele tau fiar ba nia. (Sal 15:4) Ema seluk hatene katak sira bele sadere ba nia. Ita hakarak irmaun-irmán sira mós atu sente hanesan neʼe ho ita. Ita labele obriga ema seluk atu tau fiar ba ita. Ita tenke hatudu liuhusi ita-nia hahalok katak ema seluk bele tau fiar ba ita. Ita bele kompara tau fiar ba malu ho osan tanba susar atu hetan no fasil atu lakon. Jeová hatudu katak ita sempre bele tau fiar ba nia. Bíblia hatete: “Ema bele tau fiar ba buat hotu neʼebé [Maromak] halo.” (Sal 33:4) Jeová hakarak ita atu banati-tuir nia. (Éf 5:1) Ita agradese tebes tanba Jeová dada ita ba família boot neʼebé ema hotu hatudu domin no bele tau fiar ba malu. Ita hotu presiza hatudu katak irmaun-irmán sira bele tau fiar ba ita. Bainhira ita ida-idak hakaʼas an atu hatudu domin, haraik an, kbiit atu tetu didiʼak, onestu no kontrola an, neʼe sei ajuda ema hotu iha kongregasaun atu tau fiar ba malu. Mai ita banati-tuir Maromak Jeová no kontinua hatudu katak ema seluk bele tau fiar ba ita. w22.09 p. 8 par. 1-2; p. 13 par. 17

Maski iha irmaun-irmán barak, maibé dala ruma ita bele sente mesamesak no depresaun no hanoin katak ita tenke tahan neʼe mesak. Jeová lakohi ita atu sente hanesan neʼe. Hanoin toʼok kona-ba oinsá nia ajuda profeta Elias. Jeová anima Elias atu fó sai ninia hanoin. Dala rua Jeová husu Elias: “Ó halo saida iha neʼe?” (1 Reis 19:​9, 13) Jeová rona didiʼak bainhira Elias fakar sai ninia sentimentu. Tuirmai Jeová hatudu ba Elias katak nia hamutuk ho Elias no nia iha forsa boot. Jeová mós fó sai katak iha ema Izraél barak neʼebé adora nia. (1 Reis 19:​11, 12, 18) Klaru katak Elias sente kmaan bainhira nia fakar sai tiha ninia sentimentu no Jeová hatán nia. Jeová mós fó knaar importante oioin ba Elias. Nia husu Elias atu foti Hazael nuʼudar liurai ba rai-Síria, foti Jeú nuʼudar liurai ba Izraél no foti Eliseu nuʼudar profeta ida. (1 Reis 19:​15, 16) Hodi fó knaar sira-neʼe ba Elias, Jeová ajuda Elias atu tau fokus ba buat neʼebé pozitivu. Jeová mós fó belun diʼak ida ba Elias, neʼe mak Eliseu. w22.08 p. 8 par. 3; p. 9 par. 5

Ita-nia kongregasaun harii ka halo ona renovasaun ba Reuniaun-Fatin ka lae? Se nuneʼe, klaru katak Ita la haluha dala primeiru neʼebé Ita tuir reuniaun iha fatin foun. Ita agradese tebes ba Jeová. Karik Ita kontente toʼo atu besik tanis no susar atu kanta knananuk primeiru. Reuniaun-Fatin neʼebé harii ho didiʼak lori glória ba Jeová. Maibé ita mós bele fó glória ba Jeová iha dalan seluk no neʼe importante liu fali harii Reuniaun-Fatin. Neʼe mak atu hametin ema sira neʼebé tuir reuniaun atu adora Jeová. Apóstolu Paulo mós temi kona-ba neʼe iha eskritura ba ohin. Paulo hatudu ezemplu diʼak kona-ba hametin maluk fiar-naʼin sira. Nia hanoin sira. Ita bele banati-tuir nia no hametin irmaun-irmán sira.—1 Kor 11:1. w22.08 p. 20 par. 1-2

Ema Kristaun neʼebé hakarak halo buat loos tuir Maromak nia haree, tenke onestu bainhira halo negósiu. Ema neʼebé hatudu hahalok loos mós hafolin justisa no la kontente bainhira ema trata aat ema seluk. No atu bele “halo [Jeová] kontente iha buat hotu”, ema neʼebé hatudu hahalok loos tenke hanoin kona-ba oinsá Jeová sente kona-ba ninia desizaun sira. Bíblia dehan katak Jeová mak Hun ba hahalok loos. Tan neʼe, Bíblia bolu Jeová nuʼudar “hela-fatin ba hahalok loos”. (Jer 50:​7, nota) Nuʼudar Kriadór, Jeová deʼit mak iha direitu atu deside kona-ba saida mak loos no sala. Jeová hatene ho didiʼak saida mak loos no sala. (Prov 14:12; Isa 55:​8, 9) Maski nuneʼe, ita iha abilidade atu moris tuir ninia matadalan kona-ba hahalok loos tanba Jeová kria ita tuir ninia illas. (Gén 1:27) Ita kontente atu halo nuneʼe. Ita-nia domin ba Aman Jeová book ita atu banati-tuir nia ho didiʼak.—Éf 5:1. w22.08 p. 27 par. 5-6

Bainhira triste ka laran-kraik, karik ita sei halo buat ruma neʼebé bele ajuda ita atu la hanoin barak tan kona-ba ita-nia problema. Neʼe la sala, maibé ita tenke kuidadu atu la halo buat ruma neʼebé Jeová odi. (Éf 5:​10-12, 15, 16) Iha apóstolu Paulo nia karta ba kongregasaun Filipe, nia anima sira atu kontinua hanoin kona-ba buat neʼebé “diʼak tuir Maromak nia haree, . . . moos, . . . haburas domin, [no] santu.” (Flp 4:8) Maski Paulo la koʼalia kona-ba atividade halimar nian bainhira hakerek ida-neʼe, maibé ninia liafuan bele ajuda ita bainhira ita hili atividade ruma. Koko toʼok ida-neʼe: Bainhira Ita lee eskritura neʼe, koko atu troka liafuan “buat” ho liafuan “knananuk”, “filme”, “livru”, ka “vídeo game”. Neʼe sei ajuda Ita hatene saida mak Maromak gosta no la gosta. Ita hakarak halo tuir Maromak nia matadalan neʼebé aas.—Sal 119:​1-3. w22.10 p. 9 par. 11-12

Antes mate, sira balu “neʼebé hatudu hahalok la loos” halo hahalok neʼebé aat tebes. Tan neʼe sira presiza aprende kona-ba oinsá atu moris tuir Jeová nia matadalan. Atu bele hanorin sira, Maromak nia Ukun sei dirije programa hanorin nian neʼebé boot liu iha ema nia istória. Sé mak sei hanorin ema neʼebé hatudu hahalok la loos? Ema-lubun boot no mós ema neʼebé hatudu hahalok loos neʼebé sei hetan moris-hiʼas. Ema neʼebé hatudu hahalok la loos tenke haburas relasaun diʼak ho Jeová no dedika an ba nia, atu nuneʼe sira-nia naran bele hakerek iha livru moris nian. Jesus Kristu no mós ninia alin sira sei haree se ema sira-neʼe halo tuir ka la halo tuir buat neʼebé sira aprende. (Apok 20:4) Sira neʼebé lakohi halo tuir sei lakon ba nafatin, maski karik sira idade 100. (Isa 65:20) Jeová no Jesus bele hatene ema nia laran no sira sei la husik ema ida atu estraga mundu foun.—Isa 11:9; 60:18; 65:25. w22.09 p. 17 par. 11-12

Iha versíkulu neʼe, fraze “autoridade sira” refere ba ema nia ukun-naʼin sira neʼebé iha podér no kontrola ema seluk. Ema Kristaun hakruʼuk ba autoridade sira-neʼe. Autoridade sira mantein dame, aplika lei sira, no dala ruma sira mós defende Jeová nia povu. (Apok 12:16) Tan neʼe ita tenke selu taxa ba sira, hamtaʼuk no respeitu sira tanba sira hakarak ida-neʼe. (Rom 13:7) Autoridade sira-neʼe iha podér tanba Jeová mak husik sira atu hetan ida-neʼe. Jesus nia liafuan ba Governadór Pónsio Pilatos ajuda ita komprende prinsípiu neʼe. Kuandu Pilatos dehan katak nia iha podér atu husik Jesus livre ka atu fó-kastigu mate ba Jesus, Jesus hatete: “Se Ita-Boot la simu kbiit husi leten, Ita la iha kbiit atu halo buat ida kontra haʼu.” (João 19:11) Hanesan Pilatos, ukun-naʼin sira ohin loron iha podér neʼebé limitadu. w22.10 p. 13 par. 6

Maromak dirije Liurai David atu hakerek kona-ba moris sei sai oinsá bainhira liurai neʼebé matenek no laran-metin mak ukun iha futuru. (Sal 37:​10, 11, 29) Dala barak ita lee Salmo 37:11 ba ema seluk bainhira ita koʼalia kona-ba Paraízu neʼebé atu mai. Neʼe la sala tanba Jesus mós temi fali eskritura neʼe iha ninia diskursu iha foho, no neʼe hatudu katak eskritura neʼe mós sei sai loos iha futuru. (Mt 5:5) Maibé David nia liafuan mós hatudu kona-ba moris sei sai oinsá iha Liurai Salomão nia tempu. Bainhira Salomão ukun Izraél, Maromak nia povu moris ho dame no moris diʼak iha “rai neʼebé iha susubeen no bani-been barak”. Maromak dehan: “Se imi kontinua halo tuir haʼu-nia ukun-fuan . . . , haʼu sei lori dame ba rai neʼe, no imi sei toba no la iha ema ida mak halo imi taʼuk.” (Lev 20:24; 26:​3, 6) Promesa sira-neʼe sai loos durante Salomão nia ukun. (1 Krón 22:9; 29:​26-28) Liafuan iha Salmo 37:​10, 11, 29 sai loos iha tempu uluk no mós sei sai loos iha futuru. w22.12 p. 10 par. 8

Nuʼudar ema kristaun neʼebé loos, ita tenke halo tuir matadalan husi organizasaun. Bíblia oferese konsellu neʼebé bele ajuda ita: “Ho matadalan neʼebé matenek mak ó sei halo ó-nia funu, no ho konsellu-naʼin barak mak ó sei hetan susesu.” (Prov 24:​6, nota) Oinsá aplika eskritura neʼe bele ajuda ita atu haklaken no hanorin ho diʼak liután? Duké halo tuir deʼit ita-nia toman, koko atu halo tuir sujestaun neʼebé ita hetan husi organizasaun. Ita simu matadalan matenek iha reuniaun sira liuhusi diskursu no aprezentasaun sira no neʼe bele treinu ita. Jeová nia organizasaun mós prepara publikasaun no vídeo sira neʼebé bele ajuda ema atu komprende Bíblia. Ita agradese tebes ba konsellu diʼak neʼebé ita hetan husi Bíblia. Matenek husi Jeová mak folin-boot tebes. Mai ita hakaʼas an atu aplika Bíblia nia konsellu.—Prov 3:​13-17. w22.10 p. 23 par. 18-19

Bainhira ita han hahán no ita-nia isin xupa vitamina husi hahán neʼe, ita-nia isin hetan kbiit. Nuneʼe mós, bainhira ita estuda Bíblia no medita kona-ba neʼe, ita-nia fiar sai metin liután. Jeová hakarak ita atu komprende didiʼak ninia Liafuan. Ita bele halo nuneʼe liuhusi orasaun, lee no medita. Primeiru, halo orasaun hodi prepara ita-nia laran atu simu Maromak nia hanoin. Segundu, lee versíkulu balu. Terseiru, para uitoan no medita ka hanoin kleʼan kona-ba buat neʼebé ita lee. Rezultadu mak saida? Bainhira ita medita barak liután, ita sei komprende diʼak liután Maromak nia Liafuan no ita-nia fiar sei sai metin liután. Tanbasá importante atu lee no medita kona-ba Bíblia? Bainhira ita halo nuneʼe, ita hetan kbiit neʼebé ita presiza atu haklaken kona-ba Maromak nia Ukun agora no mós atu haklaken mensajen tesi-lia nian neʼebé lakleur tan ita sei fó sai. No mós bainhira ita medita kona-ba Jeová nia hahalok diʼak, ita-nia relasaun diʼak ho nia sei sai metin liután. w22.11 p. 6-7 par. 16-17

Ita no mós ema neʼebé laʼós parte ba kongregasaun sei hatene Jesus nia dixípulu neʼebé loos liuhusi domin neʼebé sira hatudu ba malu. No domin neʼebé Maromak nia povu hatudu ba malu mak espesiál. Klaru katak Testemuña ba Jeová sira laʼós ema neʼebé perfeitu. (1 João 1:8) Tan neʼe se ita koñese liután ema ida-idak iha kongregasaun, karik ita mós sei nota sira-nia fraku balu. (Rom 3:23) Triste mak ema balu lakohi tan atu serbí Jeová tanba husik ema seluk nia fraku halo sira sidi. Oinsá Jesus hatudu domin ba ninia dixípulu sira? Oinsá mak ita bele banati-tuir Jesus nia ezemplu ohin loron? Diʼak atu ita mós hanoin kleʼan resposta ba pergunta sira-neʼe. Hodi halo nuneʼe, ita bele hatudu domin liután ba ita-nia maluk fiar-naʼin liuliu bainhira sira halo sala hasoru ita.—Éf 5:2. w23.03 p. 26-27 par. 2-4

Nuʼudar ita besik liután ba sistema neʼe nia rohan, ita hatene katak sei mosu duni susar iha kongregasaun laran. Susar sira-neʼe bele koko ita-nia laran-metin ba Jeová. Tan neʼe ita tenke kontinua iha hanoin neʼebé loos. Se Ita sente irmaun-irmán sira trata aat Ita, keta sai hirus. Se Ita simu dixiplina, keta tau fokus deʼit ba buat neʼebé halo Ita moe, maibé simu konsellu no halo mudansa. No mós bainhira Jeová nia organizasaun halo mudansa neʼebé afeta Ita, ho laran tomak simu mudansa sira-neʼe no halo tuir matadalan. Mantein Ita-nia fiar ba Jeová no ninia organizasaun bainhira Ita hetan koko kona-ba Ita-nia fiar. Ita presiza kontinua iha hanoin neʼebé loos, neʼe katak kalma nafatin, hanoin didiʼak, no haree situasaun tuir Jeová nia haree. Halo orasaun ba Jeová atu hetan ajuda. No keta haketak an husi kongregasaun. Hodi halo nuneʼe, maski buat naran deʼit akontese, Satanás sei labele haketak Ita husi Jeová ka ninia organizasaun.—Tgo 4:7. w22.11 p. 24-25 par. 14-16

Katuas sira presiza ajuda irmaun-irmán sira atu prepara an antes dezastre akontese. Esplika saida mak irmaun-irmán sira presiza halo atu seguru nafatin no oinsá atu kontaktu katuas sira. Oinsá Ita rasik bele ajuda? Se akontese dezastre besik Ita-nia área, husu ba katuas sira oinsá Ita bele ajuda. Karik Ita bele fó hela-fatin ba maluk sira neʼebé lakon sira-nia uma ka ba maluk sira neʼebé mai atu ajuda. Karik Ita bele lori hahán no sasán neʼebé haklaken-naʼin sira presiza. Se mosu dezastre iha fatin neʼebé dook, Ita nafatin bele ajuda. Oinsá? Ita bele halo orasaun ba sira. (2 Kor 1:​8-11) Ita bele apoia serbisu atu ajuda ema durante dezastre hodi fó kontribuisaun ba serbisu iha mundu tomak. (2 Kor 8:​2-5) Se Ita bele bá no ajuda iha fatin neʼebé hetan dezastre, husu katuas sira kona-ba buat neʼebé Ita bele halo atu ajuda. Se Ita hetan konvite atu ajuda, Ita sei hetan treinu balu hodi nuneʼe Ita bele ajuda iha tempu naran deʼit no iha fatin naran deʼit neʼebé presiza ajuda. w22.12 p. 24 par. 8; p. 25 par. 11-12

Paulo hakerek liafuan sira husi eskritura ba ohin ba irmaun-irmán sira iha Korinto. Uluk sira balu halo adultériu, hahalok omoseksuál, no lanu-teen. (1 Kor 6:​9-11) Tuir ita-nia hanoin, depois hetan tiha batizmu, sira la presiza luta tan hakarak neʼebé sala ka lae? Lae. Maski sira iha esperansa atu bá lalehan, maibé sira mak ema neʼebé la perfeitu. Tan neʼe klaru katak dala ruma sira presiza luta hasoru hakarak neʼebé sala. Neʼe fó kmaan mai ita. Tanbasá? Tanba neʼe hatudu katak ema seluk mós manán hasoru hakarak sala neʼebé ita luta hasoru daudaun. Tuir loloos, ita bele fiar metin ‘tanba hatene katak ita-nia maluk fiar-naʼin iha mundu tomak mós tahan terus neʼebé hanesan ita-nian’.—1 Ped 5:9. w23.01 p. 12 par. 15

Jesus husu ba Jeová atu tau matan ba ninia dixípulu sira. (João 17:11) Tanbasá neʼe fó ita aten-brani? Tanba Jeová forsa boot liu fali ita-nia inimigu hotu. (1 João 4:4) Jeová haree buat hotu. Ita fiar katak se ita sadere ba Jeová, nia bele ajuda ita atu la taʼuk no sai aten-brani. Dala ruma Ita sente moe atu fó sai katak Ita mak Testemuña ba Jeová ka lae? Ita dada an atu sai haklaken-naʼin ka hetan batizmu tanba taʼuk buat neʼebé ema sei hanoin kona-ba Ita ka lae? Keta husik sentimentu sira-neʼe hanetik Ita atu halo buat neʼebé Ita hatene mak loos. Halo orasaun ho laran ba Jeová. Husu nia fó Ita aten-brani atu halo ninia hakarak. Bainhira Ita haree rasik oinsá Jeová hatán ba Ita-nia orasaun, neʼe sei ajuda Ita atu sai forsa liután no aten-brani liután.—Isa 41:​10, 13. w23.01 p. 29 par. 12; p. 30 par. 14

Atu hatudu katak ema Farizeu iha hanoin sala kona-ba Eskritura sira, Jesus husu pergunta: “Imi seidauk lee?” (Mt 12:​1-7) Iha tempu neʼebá, ema Farizeu duun katak Jesus la halo tuir loron Sábadu. Atu hatán ba sira, Jesus temi ezemplu rua husi Eskritura no temi versíkulu husi livru Oseias neʼebé hatudu katak ema Farizeu la komprende tanbasá Jeová fó ukun-fuan kona-ba loron Sábadu no sira mós la hatudu laran-sadiʼa. Tanbasá Maromak nia Liafuan la fó influénsia ba sira? Tanba sira lee ida-neʼe ho objetivu atu kritika ka buka ema seluk nia sala no foti an. Sira-nia atitude hanetik sira atu komprende buat neʼebé sira lee. (Mt 23:23; João 5:​39, 40) Iha Mateus 19:​4-6, Jesus mós husu ba ema Farizeu pergunta neʼebé atu hanesan: “Imi lee tiha ona ka lae?” Maski sira lee tiha ona istória kona-ba kriasaun, maibé sira la hanoin oinsá istória neʼe hanorin sira kona-ba Maromak nia haree ba moris kaben nian. Jesus nia liafuan hanorin katak ita presiza lee Bíblia ho atitude neʼebé loos. Ita lakohi sai hanesan ema Farizeu, ita presiza haraik an no prontu atu aprende. w23.02 p. 12 par. 12-13

Jeová fó Ukun-Fuan ba nasaun Izraél kona-ba oinsá atu proteje sira-nia an husi perigu iha uma no mós bainhira serbisu. (Éx 21:​28, 29; Deut 22:8) Se ema ida la ho neon oho ema seluk, nia sei hetan konsekuénsia neʼebé sériu. (Deut 19:​4, 5) Ukun-fuan dehan katak ema neʼebé la ho neon halo inan ida neʼebé isin-rua abortu sei hetan kastigu. (Éx 21:​22, 23) Eskritura hatudu ho klaru katak Jeová hakarak ita atu hasees an husi perigu oioin neʼebé bele hamosu asidente. Ita hatudu katak ita hafolin moris hodi hakaʼas an atu seguru nafatin iha uma no mós serbisu-fatin. Ita sei la soe arbiru sasán sira neʼebé kroʼat, buat kímiku sira neʼebé perigu ka ai-moruk sira. No ita mós rai didiʼak sasán sira-neʼe atu labarik sira labele foti. Se ita sunu ahi, nono bee, no uza mákina, diʼak atu la husik hela buat sira-neʼe. Ita labele lori karreta se ita hemu ai-moruk neʼebé bele halo ita dukur, hemu tua barak, ka kole demais, ka kaer telemovel bainhira lori karreta. w23.02 p. 21-22 par. 7-9

Jeová mak Mestre neʼebé hatudu pasiénsia, laran-diʼak no komprende ita. Nia tau fokus ba ita-nia hahalok diʼak. (Sal 130:3) No nia nunka husu ita atu halo buat neʼebé liu fali ita-nia kbiit. Hanoin-hetan, nia mak kria ita-nia kakutak, no neʼe mak prezente furak ida husi nia. (Sal 139:14) Ita-nia Kriadór hakarak ita atu gosta no kontinua aprende ba nafatin. Tan neʼe, diʼak atu “haburas hakarak” atu aprende lia-loos husi Bíblia. (1 Ped 2:2) Halo planu neʼebé Ita bele kumpre, no halo oráriu atu lee no estuda Bíblia beibeik no halo tuir Ita-nia oráriu. (Jos 1:8) Ho Jeová nia ajuda, Ita sei komesa gosta liután atu lee no aprende kona-ba Jeová. Koñesimentu mesak deʼit la toʼo. Ita presiza koñesimentu tanba neʼe bele ajuda Ita aprende liután kona-ba Jeová no haburas hahalok hanesan domin no fiar ba nia. (1 Kor 8:​1-3) Nuʼudar Ita aprende kona-ba Jeová, kontinua husu nia atu ajuda Ita aumenta Ita-nia fiar. (Lc 17:5) Nia sei hatán orasaun sira-neʼe ho laran-luak. w23.03 p. 10 par. 11, 13

Jesus hakarak ninia dixípulu atu sai okupadu nuʼudar sira hein ba sistema nia rohan. Jesus fó serbisu ba sira atu halo. Nia haruka sira atu haklaken liafuan diʼak “iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu”. (Após 1:​6-8) Jesus nia dixípulu iha serbisu barak atu halo! Sira bele uza didiʼak sira-nia tempu hodi hakaʼas an atu haklaken ba ema. Atu bele kuidadu didiʼak ita-nia an, ita presiza hanoin didiʼak kona-ba oinsá ita uza ita-nia tempu. “Situasaun neʼebé mosu derrepente deʼit” bele kona ita hotu. (Ecle 9:11) Ita bele mate derrepente deʼit. Ita bele uza didiʼak ita-nia tempu hodi halo Jeová nia hakarak no hametin ita-nia relasaun diʼak ho nia. (João 14:21) Ita presiza “laran-metin bá, no hamriik metin bá, no sai badinas nafatin iha Naʼi nia serbisu”. (1 Kor 15:58) Se ita halo nuneʼe, bainhira ita besik mate ka mundu nia rohan toʼo mai, ita sei la arrepende dalan neʼebé ita uza ita-nia tempu.—Mt 24:13; Rom 14:8. w23.02 p. 18 par. 12-14