Fevereiru

Eskritura ba ohin neʼe katak sá? Jesus esplika katak neʼe mak domin neʼebé la hanoin an deʼit no domin neʼe sei book ema Kristaun ida atu mate ba ninia maluk fiar-naʼin se presiza. Bíblia fó sai katak domin mak importante. Porezemplu, ema balu nia eskritura favoritu mak hanesan tuirmai: “Maromak mak domin.” (1 João 4:8) “Imi tenke hadomi imi-nia maluk hanesan imi-nia an rasik.” (Mt 22:39) “Ema neʼebé iha domin, sempre prontu atu fó perdua ba sala barak.” (1 Ped 4:8) “Domin nunka lakon.” (1 Kor 13:8) Versíkulu sira-neʼe no mós versíkulu sira seluk hatudu ho klaru katak importante tebes atu haburas no hatudu domin. Tanba domin mai husi Jeová, no só ema neʼebé Jeová haraik bensaun no simu ninia espíritu santu mak bele hatudu domin neʼebé loos. (1 João 4:7) Tan neʼe mak Jesus dehan katak só ninia dixípulu sira deʼit mak hatudu domin neʼebé loos ba malu. Hanesan Jesus hatete nanis, ohin loron ema barak hatene ninia dixípulu neʼebé loos liuhusi domin neʼebé sira hatudu ba malu. w23.03 p. 27-28 par. 5-8

Ita hakarak sai toman atu perdua ema seluk ka lae? Karik Ita bele hahú hodi lee no medita kona-ba ema sira iha Bíblia neʼebé prontu atu fó perdua no mós sira neʼebé la fó perdua. Hanoin toʼok kona-ba Jesus nia ezemplu. Nia prontu atu fó perdua. (Lc 7:47) Jesus la tau fokus ba ema nia fraku, nia tau fokus ba buat neʼebé sira bele kumpre iha futuru. Maibé ema Farizeu “haree ema seluk folin-laek”. (Lc 18:9) Depois medita tiha kona-ba ezemplu sira-neʼe, husu ba Ita-nia an: ‘Haʼu haree ema seluk oinsá? Haʼu hili atu tau fokus ba ema nia hahalok ida-neʼebé?’ Se Ita sente susar atu fó perdua ba ema ruma, koko atu hakerek hahalok diʼak oioin neʼebé ema neʼe hatudu. Tuirmai, husu ba Ita-nia an: ‘Jesus sente oinsá kona-ba ema neʼe? Nia sei fó perdua ba ema neʼe ka lae?’ Se ita halo nuneʼe, neʼe bele ajuda ita troka ita-nia dalan atu hanoin. Foufoun karik susar atu perdua ema neʼebé hakanek ita-nia laran, maibé se ita kontinua hakaʼas an, ikusmai sei fasil liu ba ita atu perdua ema seluk. w22.04 p. 23 par. 6

Livru Apokalipse temi kona-ba animál fuik oioin neʼebé reprezenta Maromak nia inimigu. Porezemplu, iha ‘animál fuik ida neʼebé sai husi tasi laran’. No animál fuik neʼe “iha dikur sanulu no ulun hitu”. (Apok 13:1) Tuirmai, “animál fuik ida seluk sai husi rai”. Animál fuik neʼe “koʼalia hanesan samea boot ida” no “halo ahi tun husi lalehan”. (Apok 13:​11-13) Iha mós animál fuik seluk tan, “animál fuik neʼe kór-mean” no feto-aat ida mak tuur iha ninia leten. Animál fuik tolu neʼe reprezenta inimigu neʼebé kontra Jeová no ninia Ukun durante tempu kleur. Tan neʼe, importante atu hatene inimigu sira-neʼe mak sé. (Apok 17:​1, 3) Ita presiza komprende signifikadu husi liafuan simbóliku sira-neʼe. Dalan diʼak liu mak husik eskritura sira esplika eskritura seluk. Símbolu barak neʼebé temi iha livru Apokalipse esplika ona iha livru seluk iha Bíblia. w22.05 p. 8-9 par. 3-4

Jeová nia atan balu labele halo buat barak ba Jeová tanba idade aumenta ka moras, no neʼe halo sira sente laran-kraik. Se dala ruma, Ita sente laran-kraik tanba labele halo buat barak ba Jeová, husu ba Ita-nia an: ‘Jeová hakarak haʼu halo saida?’ Jeová hakarak Ita fó buat neʼebé diʼak liu hotu tuir Ita-nia situasaun agora daudaun. Imajina toʼok ida-neʼe: Irmán ida neʼebé tinan 80 sente laran-kraik tanba nia labele halo buat barak iha serbisu haklaken hanesan nia halo uluk bainhira nia tinan 40. Nia hanoin katak maski nia fó buat neʼebé diʼak liu hotu ba Jeová, maibé Jeová la kontente ho ida-neʼe. Jeová sente hanesan neʼe duni ka lae? Hanoin toʼok ida-neʼe: Se irmán neʼe fó buat neʼebé diʼak liu hotu bainhira nia tinan 40 no mós bainhira nia tinan 80, neʼe katak nia nunka para atu fó buat neʼebé diʼak liu hotu ba Jeová. Se ita serbí Jeová ho laran tomak, nia sei hatete ba ita: “Diʼak tebes!” (Kompara ho Mateus 25:​20-23.) Ita sei sente haksolok liu se ita tau fokus ba buat neʼebé ita bele kumpre, duké buat neʼebé ita labele kumpre. w22.04 p. 10 par. 2, 4; p. 11 par. 5-6

Apokalipse kapítulu 21 kompara ema naʼin-144.000 ho sidade furak ida neʼebé hanaran “Jeruzalein Foun”. Sidade neʼe iha fatuk 12 nuʼudar ninia fundasaun “no iha fatuk sira-neʼe hakerek tiha Bibi-Oan nia apóstolu naʼin-12 nia naran”. (Apok 21:​10-14; Éf 2:20) Sidade simbóliku neʼe la hanesan ho sidade sira seluk. Ninia dalan boot halo ho osan-mean, portaun 12 halo husi pérola, moru no fundasaun sira hafurak ho fatuk folin-boot oioin, no sidade neʼe haree hanesan kuadradu ho luan no naruk hanesan deʼit. (Apok 21:​15-21) Maibé iha buat ida mak falta. João hatete: “Haʼu la haree templu ida iha sidade neʼe nia laran, tanba Maromak Jeová, Ida neʼebé Kbiit Boot Liu Hotu, no mós Bibi-Oan mak sidade neʼe nia templu. Sidade neʼe la presiza loro-matan no fulan atu fó naroman, tanba Maromak nia glória mak fó naroman ba sidade neʼe, no Bibi-Oan mak sidade neʼe nia ahi-oan.” (Apok 21:​22, 23) Sira neʼebé sai parte ba Jeruzalein Foun sei hamutuk ho Jeová iha lalehan.—Ebr 7:27; Apok 22:​3, 4. w22.05 p. 17-18 par. 14-15

Maski Jeová mak Ida neʼebé Fó Ukun-Fuan, Kriadór no Juís, maibé nia mós ita-nia Aman neʼebé hadomi ita. (Sal 100:3; Isa 33:22) Bainhira ita halo sala hasoru nia no arrepende an ho laran, nia hakarak no iha podér atu fó perdua ba ita. (Sal 86:5) Liuhusi profeta Isaias, Jeová hatete: “Maski imi-nia sala sira mak mean, sira sei sai mutin fali hanesan jelu-rahun.” (Isa 1:18) Tanba ita la perfeitu, dala ruma ita koʼalia no halo buat neʼebé hakanek ema seluk nia laran. (Tgo 3:2) Maibé, neʼe la dehan katak ita labele iha relasaun diʼak ho sira. Ita bele duni iha relasaun diʼak se ita aprende atu fó perdua. (Prov 17:9; 19:11; Mt 18:​21, 22) Se ema ruma koʼalia ka halo buat kiʼik ruma neʼebé hakanek ita-nia laran, Jeová hakarak ita atu perdua ema neʼe. Ita presiza fó perdua ba nia tanba Jeová ‘fó perdua ba ita ho laran-luak’.—Isa 55:7. w22.06 p. 8 par. 1-2

Maski la diʼak atu kompara ita-nia an ho ema seluk, maibé ita bele hetan benefísiu liuhusi aprende husi Jeová nia atan sira neʼebé laran-metin. Porezemplu, hanoin toʼok kona-ba Jesus nia ezemplu. Jesus mak ema perfeitu, maski nuneʼe ita bele aprende husi ninia hahalok furak sira no buat kmanek oioin neʼebé nia halo. (1 Ped 2:21) Bainhira ita hakaʼas an atu halo tuir ninia ezemplu ho didiʼak, ita bele serbí Jeová ho diʼak liután. Bíblia fó sai ezemplu barak kona-ba mane no feto fiar-naʼin sira neʼebé ita bele banati-tuir maski sira la perfeitu. Hanoin toʼok kona-ba Liurai David. Jeová hatete katak David “monu loos ba haʼu-nia laran”. (Após 13:22) Maibé David halo sala sériu balu. Maski nuneʼe, nia mak ezemplu diʼak mai ita. Tanbasá? Tanba nia la koko atu defende an. Maibé, nia simu konsellu no arrepende an ho laran. Rezultadu mak Jeová perdua nia.—Sal 51:​3, 4, 10-12. w22.04 p. 13 par. 11-12

Bíblia hatete katak mate mak hanesan inimigu ida. (1 Kor 15:​25, 26) Karik ita sente laran-taridu bainhira hanoin kona-ba mate, liuliu se ita ka ema neʼebé ita hadomi moras todan. Tanbasá ita taʼuk mate? Tanba Jeová kria ita ho hakarak atu moris ba nafatin. (Ecle 3:11) La sala se ita taʼuk mate tanba neʼe bele proteje ita-nia moris. Neʼe bele book ita atu halo desizaun diʼak kona-ba han hahán neʼebé saudavel no halo ezersísiu, konsulta ba doutór no hemu ai-moruk bainhira presiza no mós hasees an husi situasaun neʼebé perigu. Satanás hatene katak ita hafolin moris. Nia duun katak ita prontu atu husik buat naran deʼit, inklui ita-nia relasaun diʼak ho Jeová atu bele kontinua moris. (Job 2:5) Maibé Satanás sala boot! Maski nuneʼe, Satanás “iha kbiit atu halo mate” no nia koko atu aproveita ita-nia sentimentu taʼuk mate atu book ita hadook an husi Jeová.—Ebr 2:​14, 15. w22.06 p. 18 par. 15-16

Kuandu governu bandu, karik ita presiza hasoru malu nuʼudar grupu kiʼik-kiʼik. Entaun importante liután atu mantein dame entre ita. Ita presiza luta hasoru Satanás, laʼós irmaun-irmán sira. Haluha deʼit ita-nia maluk nia sala, ka keta demora atu rezolve problema. (Prov 19:11) Prontu atu ajuda malu. (Tito 3:14) Dalan neʼebé maluk sira husi grupu haklaken ida ajuda irmán ida lori impaktu boot ba grupu tomak. Sira sai besik liután hanesan família. (Sal 133:1) Irmaun-irmán rihun ba rihun nafatin serbí Jeová maski governu bandu ita-nia atividade sira. Sira balu tama komarka tanba sira-nia fiar. Ita bele halo orasaun kona-ba sira no sira-nia família. Ita mós bele halo orasaun kona-ba sira neʼebé la taʼuk atu tama komarka tanba apoia irmaun-irmán sira neʼebé iha komarka laran. Sira anima irmaun sira-neʼe atu nafatin tau fiar ba Jeová, sira fó buat neʼebé irmaun-irmán sira presiza no mós defende sira iha tribunál. (Kol 4:​3, 18) Hanoin-hetan katak Ita-nia orasaun bele ajuda irmaun-irmán sira-neʼe.—2 Tes 3:​1, 2; 1 Tim 2:​1, 2. w22.12 p. 26 par. 15-16

Oan sira dala barak banati-tuir sira-nia inan-aman. Klaru katak, la iha inan-aman ida mak perfeitu. (Rom 3:23) Maski nuneʼe, inan-aman neʼebé matenek hakaʼas an atu hatudu ezemplu diʼak ba sira-nia oan. Aman ida dehan: “Sira hanesan esponja neʼebé xupa buat hotu.” Nia hatutan tan: “Ita-nia oan sei hasé ita kuandu ita-nia hahalok la tuir buat neʼebé ita hanorin ba sira.” Tan neʼe, se ita hakarak ita-nia oan hadomi Jeová, ita mós tenke hametin ita-nia domin ba Jeová no mós hatudu neʼe liuhusi ita-nia hahalok. Iha dalan oioin ba inan-aman atu hanorin sira-nia oan hadomi Jeová. Irmaun Andrew neʼebé tinan 17 hatete: “Haʼu-nia inan-aman sempre fó-hanoin haʼu katak importante atu halo orasaun. Kalan-kalan, apá halo orasaun ho haʼu maski haʼu halo ona orasaun mesak. . . . Agora fasil deʼit ba haʼu atu halo orasaun ba Jeová no sente katak Jeová mak Aman neʼebé hadomi haʼu.” Inan-aman sira, hanoin-hetan katak Ita-nia domin ba Jeová bele ajuda Ita-nia oan atu hadomi Jeová. w22.05 p. 28 par. 7-8

Atu ita prontu ba batizmu, buat primeiru neʼebé ita presiza halo mak arrepende ita-nia sala ho laran. (Após 2:​37, 38) Bainhira ita arrepende an ho laran, neʼe sei book ita atu halo mudansa. Ita para ona ka lae atu halo buat neʼebé Jeová la gosta hanesan halaʼo moris neʼebé la morál, uza tabaku ka uza liafuan foʼer ka tolok? (1 Kor 6:​9, 10; 2 Kor 7:1; Éf 4:29) Kontinua hakaʼas an atu halo mudansa. Koʼalia ho ema neʼebé estuda Bíblia ho Ita ka husu ajuda no matadalan husi katuas kongregasaun ida. Se Ita mak joven ida no hela ho inan-aman, husu sira atu ajuda Ita husik tiha toman aat ruma neʼebé hanetik Ita atu hetan batizmu. Importante mós atu iha toman diʼak atu halo atividade espirituál. Ida-neʼe inklui asiste no hola parte iha reuniaun sira. (Ebr 10:​24, 25) Bainhira Ita kumpre ona kritéria atu bá haklaken, hakaʼas an atu haklaken beibeik. w23.03 p. 10-11 par. 14-16

Profesia iha Génesis 3:​14, 15 temi kona-ba “samea” ida no samea nia “bei-oan”. Ita hotu hatene katak samea ida labele komprende buat neʼebé Jeová hatete iha jardín Eden. Tan neʼe samea neʼebé Jeová deside atu fó-kastigu tenke kriatura ida neʼebé matenek. Sé mak neʼe? Apokalipse 12:9 esplika ho klaru kona-ba neʼe. Eskritura neʼe fó sai katak “samea uluk nian” mak Diabu Satanás. Dala ruma Bíblia uza liafuan “bei-oan” iha dalan simbóliku atu refere ba sira neʼebé banati-tuir ema ka anju ida ho didiʼak, tan neʼe ita bele dehan katak ema ka anju neʼe mak sira-nia aman. Entaun samea nia bei-oan mak inklui kriatura espíritu no ema neʼebé kontra Jeová no ninia povu hodi banati-tuir Satanás. Neʼe inklui anju sira iha Noé nia tempu neʼebé husik sira-nia serbisu iha lalehan no mós ema aat sira neʼebé hatudu hahalok hanesan sira-nia aman Diabu.—Gén 6:​1, 2; João 8:44; 1 João 5:19; Jud 6. w22.07 p. 14-15 par. 4-5

Apóstolu Paulo hadomi tebes irmaun-irmán sira. Nia rasik mós hasoru ona susar oioin. Tan neʼe nia bele hatudu laran-diʼak no laran-sadiʼa ba maluk fiar-naʼin sira bainhira sira hasoru susar. Loron ida, Paulo la iha osan no presiza buka serbisu atu tau matan ninia an no mós maluk sira neʼebé hamutuk nia. (Após 20:34) Paulo matenek atu halo tenda. Bainhira nia toʼo iha Korinto, nia serbisu hamutuk ho Áquila no Priscila atu halo tenda. Maibé “Sábadu-Sábadu”, nia haklaken ba ema Judeu no ema Gregu. Tuirmai bainhira Silas no Timóteo mai, “Paulo uza nia tempu tomak hodi haklaken Maromak nia liafuan”. (Após 18:​2-5) Paulo nunka haluha kona-ba buat neʼebé importante liu iha ninia moris, neʼe mak atu serbí Jeová. Paulo hatudu ezemplu kapás kona-ba haklaken ho badinas no tau matan ba ninia presiza rasik, tan neʼe nia bele anima irmaun-irmán sira. Paulo fó-hanoin sira atu tau uluk “buat sira neʼebé importante liu”, neʼe mak buat hotu neʼebé liga ho sira-nia adorasaun ba Jeová, duké hanoin barak kona-ba moris no mós serbisu atu sustenta família. w22.08 p. 20 par. 3

Ohin loron, Maromak hakarak ema atu haklaken liafuan diʼak kona-ba ninia Ukun iha mundu tomak. (1 Tim 2:​3, 4) Neʼe mak Jeová nia serbisu, no serbisu neʼe importante. Tan neʼe nia fó knaar ba ninia Oan-Mane atu dirije serbisu neʼe. Jesus mak Ulun-Naʼin neʼebé matenek, tan neʼe ita bele fiar katak ita sei kumpre serbisu haklaken tuir Maromak nia hakarak antes mundu nia rohan toʼo mai. (Mt 24:14) Tanbasá ita bele fiar ida-neʼe? Antes Jesus saʼe ba lalehan, nia hasoru ninia dixípulu balu iha foho ida iha Galileia. Nia hatete ba sira: “Kbiit tomak iha lalehan no rai entrega ona mai haʼu.” Nia mós hatutan tan: “Neʼe duni, laʼo bá no hanorin ema husi nasaun hotu atu sai haʼu-nia dixípulu.” (Mt 28:​18, 19) Neʼe hatudu katak Jeová mós fó ona kbiit ba Jesus atu dirije serbisu haklaken. No Jesus nafatin tau matan ba serbisu haklaken toʼo ohin loron. w22.07 p. 8 par. 1, 3; p. 9 par. 4

Ema neʼebé hatudu hahalok loos antes mate sei “moris hiʼas atu hetan moris rohan-laek” tanba sira-nia naran hakerek ona iha livru moris nian. Ema neʼebé “halo buat diʼak” neʼebé temi iha João 5:29 mak hanesan ho “ema neʼebé hatudu hahalok loos” neʼebé temi iha Apóstolu 24:15. Esplikasaun neʼe tuir duni Roma 6:7 neʼebé hatete: “Ema neʼebé mate, nia selu ona tusan hotu ba ninia sala.” Bainhira sira mate, Jeová perdua tiha sala neʼebé uluk sira halo, maibé Jeová kontinua hanoin-hetan sira-nia laran-metin. (Ebr 6:10) Ema neʼebé hatudu hahalok loos no hetan moris-hiʼas, presiza kontinua hatudu laran-metin atu nuneʼe sira-nia naran labele hamoos husi livru moris nian. w22.09 p. 18 par. 13, 15

Profeta Daniel hatudu ezemplu diʼak. Maski nia sai dadur iha Babilónia, maibé nia hatudu katak ema bele tau fiar ba nia. Ema komesa tau fiar liután ba nia bainhira Jeová ajuda nia atu esplika Liurai Nabukodonozór nia mehi. (Dan 4:​20-22, 25) Tinan barak liutiha, Daniel hatudu tan katak ema bele tau fiar ba nia bainhira nia esplika letra sira neʼebé mosu iha palásiu nia didin iha Babilónia. (Dan 5:​5, 25-29) Depois neʼe, Dário ema Média no ukun-naʼin sira seluk nota katak Daniel “matenek tebes”. Sira rekoñese katak Daniel “laran-metin no ema la hetan buat aat ida ka sala ida iha nia”. (Dan 6:​3, 4) Diʼak atu husu ba ita-nia an: ‘Sira koñese haʼu nuʼudar ema neʼebé bele tau fiar ka lae?’ Ita lori glória ba Jeová bainhira ema seluk bele tau fiar ba ita. w22.09 p. 8-9 par. 2-4

Ita hetan benefísiu bainhira ita halo tuir Jeová nia matadalan kona-ba saida mak loos no sala. Oinsá? Imajina toʼok saida mak sei akontese se badaen ida-idak deside rasik kona-ba medida. Klaru katak rezultadu sei sai runguranga. Se doutór no enfermeiru sira la halo tuir matadalan espesífiku kona-ba tau matan pasiente ida, rezultadu mak pasiente neʼe sei mate. Kuandu ema kria matadalan no halo tuir, neʼe bele lori rezultadu diʼak. Nuneʼe mós Maromak nia matadalan kona-ba saida mak loos no sala bele fó protesaun ba ita. Jeová haraik bensaun ba sira neʼebé hakaʼas an atu moris tuir ninia matadalan. Nia promete: “Ema laran-loos sira sei simu rai nuʼudar sira-nian, no sira sei moris ba nafatin iha rai.” (Sal 37:29) Bainhira ita halo tuir Jeová nia matadalan, ita sei iha unidade, dame no kontente. Jeová hakarak ita moris kontente. Ita hotu iha razaun atu hafolin buat neʼebé Jeová dehan katak loos. w22.08 p. 27-28 par. 6-8

Bainhira problema ruma mosu no hakanek ita-nia laran, neʼe bele koko ita-nia laran-metin ba Jeová no ninia organizasaun. Oinsá mak ita bele manán susar sira-neʼe? Ita presiza matan-moris no kontinua iha hanoin neʼebé loos hodi kaer metin ba ita-nia fiar. Kontinua matan-moris ka iha hanoin neʼebé loos signifika katak kalma nafatin, hanoin didiʼak no hakaʼas an atu haree situasaun tuir Jeová nia haree. Se ita halo nuneʼe, ita-nia emosaun sei la kontrola ita-nia hanoin. Karik ita sente katak maluk fiar-naʼin sira trata aat ita, ka irmaun ida neʼebé iha responsabilidade, hanesan katuas kongregasaun trata aat Ita. Karik irmaun neʼe la ho neon hakanek Ita-nia laran. (Rom 3:23; Tgo 3:2) Maibé ida-neʼe halo Ita laran-triste tebes. No karik Ita mós hanoin: ‘Se irmaun ida bele hatudu hahalok hanesan neʼe, entaun neʼe mak Maromak nia organizasaun duni ka lae?’ Satanás hakarak ita hanoin hanesan neʼe. (2 Kor 2:11) Hanoin negativu hanesan neʼe bele halo ita haketak an husi Jeová no ninia organizasaun. Tan neʼe ita tenke kuidadu atu la rai odi. w22.11 p. 20 par. 1, 3; p. 21 par. 4

Jeová fó mai ita esperansa kapás atu moris ba nafatin. Ema balu iha esperansa atu moris ba nafatin iha lalehan nuʼudar kriatura espíritu. (1 Kor 15:​50, 53) Maibé ema maioria iha esperansa atu moris iha rai ho saúde neʼebé perfeitu no moris kontente. (Apok 21:​3, 4) Maski ita iha esperansa atu moris iha rai ka iha lalehan, ita-nia esperansa mak folin-boot duni. Ita bele fiar katak ita-nia esperansa ba futuru sei sai loos tanba neʼe mai husi Jeová. (Rom 15:13) Ita hatene buat neʼebé Jeová promete ona, no ita hatene katak nia sempre kumpre ninia promesa sira. (Núm 23:19) Ita fiar katak Jeová hakarak no nia iha forsa atu kumpre buat hotu neʼebé nia promete ona. Ita-nia Aman iha lalehan hadomi ita no hakarak ita atu tau fiar ba nia. Bainhira ita-nia esperansa ba Jeová mak metin, neʼe ajuda ita atu tahan hasoru susar sira no kontinua hatudu aten-brani no sente haksolok. w22.10 p. 24 par. 1-3

Tanba povu neʼe lakohi rona, Isaias fó sai nanis katak Jeová sei husik sira atu kona dezastre. (Isa 30:​5, 17; Jer 25:​8-11) Profesia neʼe sai loos bainhira ema Judeu sai dadur iha Babilónia. Maibé iha mós ema Judeu balu neʼebé laran-metin, no Isaias hatete katak loron ida Jeová sei husik sira fila fali ba Izraél. (Isa 30:​18, 19) Ikusmai sira sai livre duni husi Babilónia. Maibé tinan barak liutiha mak ida-neʼe akontese. Fraze “Jeová hein ho pasiénsia atu hatudu laran-diʼak ba imi” hatudu katak tempu balu tenke liu tiha antes Jeová salva ema neʼebé laran-metin. Tuir loloos, ema Izraél sai nuʼudar dadur iha Babilónia durante tinan 70 no tuirmai mak sira balu bele fila fali ba Jeruzalein. (Isa 10:21; Jer 29:10) Bainhira sira fila fali ba sira-nia rai, sira la tanis tan tanba triste maibé tanba sente kontente tebes. w22.11 p. 9 par. 4

Ohin loron, iha rai balu ita-nia irmaun-irmán sira hasoru daudaun susar neʼebé apóstolu sira mós hasoru bainhira ema kontra sira tanba haklaken kona-ba Jesus. Dala barak, ema Judeu nia tribunál aas liu “haruka sira atu labele koʼalia tan buat ruma ka hanorin hodi Jesus nia naran”. (Após 4:​18-20; 5:​27, 28, 40) Maibé sira hatene katak Maromak neʼebé iha podér boot liu mak ‘fó mandamentu ba sira atu haklaken ba ema no fó sasin ho didiʼak’ kona-ba Kristu. (Após 10:42) Entaun Pedro no João reprezenta sira-nia maluk no ho aten-brani dehan katak sira sei halo tuir Maromak duké juís sira-neʼe no mós nunka para atu haklaken kona-ba Jesus. (Após 5:29) Apóstolu sira nafatin laran-metin maski ema baku sira. Depois sai husi tribunál, sira “haksolok tanba sira hetan moe tanba Jesus nia naran” no sira kontinua haklaken.—Após 5:​41, 42. w22.10 p. 12-13 par. 2-4

Bainhira ita komesa aprende kona-ba Jeová, ita aprende deʼit hanorin báziku husi Bíblia. Iha apóstolu Paulo nia karta ba ema Ebreu, nia hatete katak hanorin báziku mak hanesan “buat báziku”. Maibé neʼe la dehan katak “hanorin báziku” mak la importante. Nia esplika katak hanorin sira-neʼe mak hanesan susubeen neʼebé bebé hemu. (Ebr 5:12; 6:1) Nia mós anima ema Kristaun hotu atu laʼo ba oin no aprende kona-ba lia-loos kleʼan husi Bíblia. Ita haburas ona hakarak atu aprende lia-loos kleʼan husi Bíblia ka lae? Ita prontu atu laʼo ba oin no kontinua aprende kona-ba Jeová no ninia hakarak ka lae? Ita barak sente susar atu estuda. Ita rasik sente nuneʼe ka lae? Iha eskola, Ita aprende oinsá atu lee no estuda ho didiʼak ka lae? Ita gosta estuda no aprende ka lae? Ka Ita hanoin katak Ita la iha matenek atu aprende husi livru sira? Se nuneʼe, Ita la mesak, ema seluk mós sente nuneʼe. Maibé Jeová bele ajuda Ita. Nia mak perfeitu no Mestre diʼak liu hotu. w23.03 p. 9-10 par. 8-10

Se ita laran-maus, ita sei husik Bíblia troka ita-nia hahalok. Ita presiza hasees an husi hahalok kritika ema no foti an atu nuneʼe ita bele hetan influénsia husi Bíblia nia hanorin kona-ba laran-sadiʼa, laran-diʼak no domin. Dalan neʼebé ita trata ema seluk bele hatudu sai se ita husik Bíblia fó influénsia ba ita. Ema Farizeu la husik Eskritura sira atu book sira-nia laran, tan neʼe sira “tesi-lia ba sira neʼebé la halo sala”. (Mt 12:7) Ita-nia hanoin kona-ba ema seluk no dalan neʼebé ita trata sira mós bele hatudu sai se ita husik Bíblia troka ita-nia hahalok. Porezemplu, ita toman atu gaba ema seluk nia hahalok diʼak ka ita toman atu koʼalia deʼit kona-ba sira-nia fraku? Ita hatudu laran-sadiʼa no prontu atu perdua ema ka ita kritika ema no rai hirus ba sira? Ita-nia resposta bele hatudu se ita husik buat neʼebé ita lee atu fó influénsia ba ita-nia hanoin, sentimentu no hahalok.—1 Tim 4:​12, 15; Ebr 4:12. w23.02 p. 12-13 par. 13-14

Hanoin toʼok kona-ba José husi Arimateia. Ema Judeu respeitu loos nia. Nia mak membru ba ema Judeu nia tribunál aas naran Sinédriu. Durante Jesus haklaken iha mundu, José la hatudu aten-brani. João hatete katak José mak “Jesus nia dixípulu ida, maibé nia la fó sai kona-ba neʼe tanba taʼuk ema Judeu sira”. (João 19:38) Maski José hatudu interese ba mensajen kona-ba Maromak nia Ukun, maibé nia subar husi ema seluk katak nia fiar Jesus. Karik nia taʼuk katak ema sei la respeitu tan nia. Maibé Bíblia hatete katak depois Jesus mate, José “ho aten-brani bá hasoru Pilatos hodi husu Jesus nia mate-isin”. (Mc 15:​42, 43) José la subar tan katak nia mak Jesus nia dixípulu. Hanesan José, Ita mós sente taʼuk ba ema ka lae? w23.01 p. 30 par. 13-14

Liurai-feto husi Sabá rona kona-ba ema Izraél neʼebé moris ho dame no moris diʼak bainhira Salomão sai liurai. Liurai-feto neʼe halo viajen dook ba Jeruzalein atu bele haree rasik ida-neʼe. (1 Reis 10:1) Depois haree tiha Salomão nia ukun, feto neʼe hatete liafuan sira neʼebé temi iha leten. Maibé situasaun iha Salomão nia ukun mak ezemplu kiʼik deʼit kona-ba buat neʼebé Jeová sei halo ba ema bainhira ninia Oan-Mane Jesus mak ukun. Jesus mak diʼak liu fali Salomão iha buat hotu. Salomão mak ema la perfeitu no halo sala sériu neʼebé ikusmai lori problema ba Maromak nia povu. Maibé Jesus mak Ukun-Naʼin perfeitu neʼebé nunka halo sala. (Lc 1:32; Ebr 4:​14, 15) Kristu hatudu ona katak nia sei nunka halo sala ka halo buat ruma neʼebé lori susar ba ninia povu. Nia mak ita-nia Liurai neʼebé diʼak liu. w22.12 p. 11 par. 9-10

Ita presiza halo saida se iha ita-nia área mosu moras neʼebé lalais atu hadaʼet? Ita presiza halo tuir matadalan husi autoridade sira, hanesan fase liman, halo distánsia sosiál, uza máskara, no mós kuarentena. Se ita halo buat sira-neʼe, ita hatudu katak ita hafolin tebes moris neʼebé Maromak fó mai ita nuʼudar prezente. Durante tempu emerjénsia, karik ita-nia kolega, viziñu no média fó sai informasaun neʼebé la loos. Duké fiar deʼit ba “liafuan hotu” neʼebé ita rona, diʼak atu rona ba informasaun husi governu no doutór sira neʼebé ita bele tau fiar. (Prov 14:15) Grupu Administradór no sukursál sira hakaʼas an atu buka informasaun neʼebé loos antes fó matadalan kona-ba reuniaun sira no mós serbisu haklaken. Hodi halo tuir matadalan sira, ita proteje ita-nia an no ema seluk husi perigu. Ida-neʼe mós bele ajuda ema iha komunidade atu iha hanoin neʼebé loos kona-ba Testemuña ba Jeová.—1 Ped 2:12. w23.02 p. 23 par. 11-12

Bainhira ema Izraél tama ba Rai neʼebé Maromak Promete, sira hela iha fatin oioin. Karik fasil deʼit ba ema Izraél iha área ida atu la hanoin ema Izraél iha área seluk. Maibé Jeová halo arranju atu ema Izraél halibur hamutuk iha tempu oioin atu rona amlulik sira lee no esplika Maromak nia Liafuan. (Deut 31:​10-12; Neem 8:​2, 8, 18) Imajina toʼok ema Izraél neʼebé laran-metin sente oinsá bainhira sira toʼo iha Jeruzalein no haree sira-nia maluk fiar-naʼin millaun ba millaun neʼebé mai husi fatin oioin! Jeová nia arranju neʼe ajuda ninia povu atu kontinua iha unidade. Tuirmai, bainhira kongregasaun Kristaun forma tiha, iha ema neʼebé koʼalia língua oioin no sira-nia situasaun moris la hanesan. Maibé, sira bele adora Maromak loos ho unidade. Ema neʼebé sai fiar-naʼin bele komprende Maromak nia Liafuan só deʼit ho ajuda husi maluk fiar-naʼin sira no mós hodi halibur hamutuk.—Após 2:42; 8:​30, 31. w23.02 p. 3 par. 7

Jeová promete katak ema neʼebé halo tuir nia sei hetan “moris rohan-laek”. (Rom 6:23) Bainhira ita medita kona-ba buat neʼebé Jeová oferese, ita-nia domin ba nia sei aumenta liután. Hanoin toʼok kona-ba neʼe, ita-nia Aman iha lalehan hadomi tebes ita, tan neʼe nia halo arranju atu ita nunka ketak husi nia. Maromak nia promesa kona-ba moris rohan-laek ajuda ita atu tahan susar agora. Maski inimigu sira ameasa atu oho ita, ita sei nunka husik ita-nia laran-metin ba Jeová. Tanbasá? Razaun ida mak se ita kontinua laran-metin ba Jeová toʼo mate, Jeová sei fó moris-hiʼas ba ita no ita iha esperansa atu moris ba nafatin. (João 5:​28, 29; 1 Kor 15:​55-58; Ebr 2:15) Ita hatene katak Jeová bele ajuda ita atu moris ba nafatin tanba nia mak Hun ba moris no nia moris ba nafatin. (Sal 36:9) Bíblia hatudu katak Jeová sempre iha no sei iha ba nafatin.—Sal 90:2; 102:​12, 24, 27. w22.12 p. 2 par. 1-3

Ita la hakfodak bainhira hasoru problema. Bíblia hatete: “Ita tenke tama ba Maromak nia Ukun liuhusi susar barak.” (Após 14:22) Ita mós hatene katak ita-nia problema balu sei labele rezolve toʼo ita hela iha Maromak nia mundu foun, no iha neʼebá mak “mate sei la iha tan, no ema sei la triste tan ka tanis ka sente moras”. (Apok 21:4) Jeová la proteje ita husi susar sira. Maibé, nia ajuda ita atu tahan. Haree toʼok apóstolu Paulo nia liafuan ba ema Kristaun iha Roma. Ulukliu nia temi kona-ba problema oioin neʼebé nia no irmaun-irmán seluk hasoru. Tuirmai nia hakerek: “Iha buat sira-neʼe hotu, ami sei manán liuhusi nia neʼebé hadomi ami.” (Rom 8:​36, 37) Neʼe katak Jeová bele ajuda ita hetan susesu, maski ita hasoru daudaun susar. w23.01 p. 14 par. 1-2