Marsu

Apóstolu Pedro anima irmaun-irmán sira atu uza sira-nia abilidade no talentu atu hametin malu. Pedro hakerek: “Uza prezente neʼebé imi ida-idak simu atu serbí malu nuʼudar atan diʼak neʼebé simu ona Maromak nia laran-diʼak neʼebé boot.” (1 Ped 4:10) Ita labele dada an atu uza ita-nia abilidade tanba taʼuk ema seluk sente laran-kraik ka laran-moras. Maibé ita mós presiza kuidadu atu la gaba an kona-ba neʼe. (1 Kor 4:6) Hanoin-hetan katak abilidade hotu neʼebé ita iha mak prezente husi Maromak. Ita presiza uza abilidade sira-neʼe atu hametin kongregasaun laʼós atu gaba an. (Flp 2:3) Ita sei sente haksolok bainhira ita uza ita-nia forsa no abilidade atu halo Maromak nia hakarak. Ita kontente laʼós tanba ita hatudu katak ita diʼak liu fali ema seluk ka halo buat barak liu fali ema seluk, maibé tanba ita fó hahiʼi ba Jeová. w22.04 p. 11-12 par. 7-9

Jesus hafolin tebes Eskritura Sagrada. Salmo 40:8 fó sai nanis kona-ba Jesus nia sentimentu ba Maromak nia Liafuan: “Oh haʼu-nia Maromak, haʼu gosta tebes atu halo tuir Ita-nia hakarak, no Ita-nia ukun-fuan iha haʼu-nia fuan-laran.” Tan neʼe, Jesus kontente no kontinua serbí Jeová. Ita mós bele moris kontente no kontinua serbí Jeová se ita hakaʼas an atu lee Bíblia no aprende atu hafolin ida-neʼe. (Sal 1:​1-3) Mai ita halo tuir Jesus nia liafuan no ezemplu hodi aumenta ita-nia matenek atu lee Bíblia. Ita bele komprende liután istória sira iha Bíblia hodi halo orasaun, lee ho neineik, husu pergunta sira no hakerek nota badak. Ita bele komprende buat neʼebé ita lee hodi uza ita-nia publikasaun sira atu analiza ida-neʼe. No ita bele husik Bíblia fó influénsia ba ita hodi iha atitude neʼebé loos bainhira ita lee. Bainhira ita hakaʼas an atu halo buat sira-neʼe, ita sei hetan benefísiu liután husi lee Bíblia no hakbesik liután ba Jeová.—Sal 119:17; Tgo 4:8. w23.02 p. 13 par. 15-16

Halo planu espesífiku no tuirmai hakaʼas an atu kumpre Ita-nia planu. Oinsá Ita bele halo nuneʼe? Karik Ita hakarak aumenta liután Ita-nia matenek atu hanorin. Se nuneʼe, Ita bele estuda didiʼak broxura Hakaʼas An atu Lee no Hanorin. Bainhira Ita hetan knaar iha reuniaun loron baileet, Ita bele husu irmaun neʼebé iha esperiénsia atu rona uluk ba Ita-nia aprezentasaun no fó sujestaun kona-ba oinsá atu halo Ita-nia knaar diʼak liután. Prepara nanis Ita-nia knaar atu nuneʼe ema bele haree katak Ita badinas no ema bele tau fiar ba Ita. (2 Kor 8:22) Oinsá se skill neʼebé Ita hakarak aprende mak susar ba Ita atu halo? Keta rende an. Porezemplu, Timóteo sai oradór no mestre neʼebé matenek tebes ka lae? Bíblia la fó sai kona-ba neʼe. Maibé ita bele fiar katak nia kontinua aumenta ninia matenek atu halaʼo ninia knaar sira tanba halo tuir Paulo nia konsellu.—2 Tim 3:10. w22.04 p. 24 par. 8-11

Animál fuik neʼebé iha ulun hitu reprezenta saida? Animál fuik neʼebé iha ulun hitu haree hanesan leopardu ida, ninia ain hanesan ursu, ninia ibun hanesan leaun nia ibun no nia iha dikur sanulu. Animál fuik haat neʼebé temi iha Daniel kapítulu 7 mós iha karaterístiku sira-neʼe. Maibé livru Apokalipse temi animál fuik ida deʼit neʼebé iha karaterístiku sira-neʼe hotu, laʼós animál fuik haat neʼebé ketaketak. Animál fuik neʼe la reprezenta governu ida deʼit ka ukun ida deʼit. Bíblia hatete katak animál fuik neʼe “ukun ema husi suku, povu, língua no nasaun hotu”. Neʼe katak animál fuik neʼe iha kbiit boot liu fali governu ida deʼit. (Apok 13:7) Entaun, animál fuik neʼebé iha ulun hitu tenke reprezenta governu hotu neʼebé ukun ema toʼo agora. (Ecle 8:9) Iha Bíblia laran, dala barak númeru sanulu reprezenta buat neʼebé kompletu. w22.05 p. 9 par. 6

Sé mak sei simu bensaun furak sira-neʼe? Ulukliu ema-lubun boot neʼebé moris liu Armagedon no mós bebé sira neʼebé karik moris iha mundu foun mak sei simu bensaun sira-neʼe. Maibé Apokalipse kapítulu 20 mós promete katak ema mate sira sei moris-hiʼas. (Apok 20:​11-13) Ema laran-metin sira neʼebé “hatudu hahalok loos” no mós “ema neʼebé hatudu hahalok la loos” neʼebé la iha oportunidade atu aprende kona-ba Jeová, sira sei moris fali iha rai. (Após 24:15; João 5:​28, 29) Neʼe katak ema hotu sei hetan moris-hiʼas durante Kristu nia Ukun ba Tinan Rihun Ida ka lae? Lae. Ema sira neʼebé hatudu hahalok aat no lakohi aproveita oportunidade neʼebé iha atu serbí Jeová antes sira mate sei la simu moris-hiʼas. Sira hetan ona oportunidade, maibé sira hatudu katak sira la merese atu moris iha mundu paraízu.—Mt 25:46; 2 Tes 1:9; Apok 17:8; 20:15. w22.05 p. 18 par. 16-17

Liuhusi “atan laran-metin no matenek”, Jesus organiza ninia dixípulu sira iha organizasaun ida iha rai atu halaʼo adorasaun neʼebé loos. (Mt 24:45) Ita sente oinsá kona-ba organizasaun neʼe. Karik Ita sente hanesan apóstolu Pedro neʼebé hatete ba Jesus liafuan husi eskritura ba ohin. Ita-nia moris sei oinsá se ita la sai parte ba Jeová nia organizasaun? Liuhusi organizasaun neʼe, Jesus halo arranju atu ita hetan ai-han espirituál barak. Nia treinu ita atu bele haklaken ho matenek. Nia mós ajuda ita atu tau “hahalok foun” hodi nuneʼe ita bele halo Jeová kontente. (Éf 4:24) Jesus fó matadalan neʼebé matenek iha tempu neʼebé susar. Ita bele haree benefísiu husi ida-neʼe liuhusi matadalan neʼebé ita simu bainhira akontese pandemia COVID-19. Ema barak iha mundu la hatene atu halo saida, maibé Jesus halo arranju didiʼak hodi ita bele simu matadalan neʼebé klaru atu ita seguru nafatin. w22.07 p. 12 par. 13-14

Jeová haruka ema Izraél antigu atu hanorin beibeik sira-nia oan kona-ba nia. (Deut 6:​6, 7) Iha tempu neʼebá, inan-aman iha oportunidade barak iha loron ida nia laran atu koʼalia ba sira-nia oan no hanorin sira-nia oan atu hadomi Jeová. Porezemplu, iha Izraél antigu, labarik-mane sira uza oras barak atu ajuda sira-nia aman kuda fini ka koʼa ida-neʼe. Labarik-feto sira uza oras barak iha loron ida nia laran atu ajuda sira-nia inan atu suku roupa no mós halo serbisu seluk iha uma-laran. Bainhira inan-aman sira serbisu hamutuk ho sira-nia oan, sira bele koʼalia kona-ba tópiku importante oioin. Porezemplu, sira bele koʼalia kona-ba Jeová nia hahalok diʼak no hanoin kona-ba oinsá Jeová ajuda sira-nia família. Iha rai barak, inan-aman no oan sira labele gasta tempu barak hamutuk durante loron. Karik inan-aman bá serbisu no oan sira bá eskola. Tan neʼe, inan-aman presiza buka tempu atu koʼalia ho sira-nia oan.—Éf 5:​15, 16. w22.05 p. 28 par. 10-11

Sala sériu mak aat tebetebes tanba kontra Maromak nia ukun-fuan. Se ema Kristaun ida halo sala sira hanesan neʼe, nia presiza halo orasaun ba Jeová atu husu perdua no nia mós presiza koʼalia ho katuas kongregasaun. (Sal 32:5; Tgo 5:14) Katuas sira iha responsabilidade saida? Jeová fó responsabilidade ba katuas sira atu deside se ema neʼebé halo sala bele kontinua sai parte ba kongregasaun ka lae. (1 Kor 5:12) Maski nuneʼe, só Jeová deʼit mak iha podér atu fó perdua ba ema iha dalan neʼebé kompletu no nia fó perdua ba ita bazeia ba Jesus nia sakrifísiu. Maibé, katuas sira hakaʼas an atu buka resposta ba pergunta sira tuirmai: Ema neʼe ho neon halo planu nanis atu halo hahalok sala ka lae? Nia koko atu subar ninia sala husi ema seluk ka lae? Nia halo sala neʼebé sériu beibeik durante tempu kleur ka lae? Importante liu mak nia hatudu sai ho klaru katak nia arrepende an ka lae? Iha evidénsia ruma neʼebé hatudu katak Jeová perdua ona nia ka lae?—Após 3:19. w22.06 p. 9 par. 4

Jesus husu ninia dixípulu atu buka buat neʼebé loos. (Mt 5:6) Neʼe katak ita presiza iha hakarak atu halo buat neʼebé moos, loos, no diʼak tuir Maromak nia haree. Ita hadomi lia-loos no hahalok loos ka lae? Ami fiar katak Ita halo nuneʼe duni. Ita odi lia-bosok no buat hotu neʼebé sala no aat. (Sal 119:​128, 163) Ema neʼebé bosok banati-tuir Satanás ukun-naʼin mundu neʼe nian. (João 8:44; 12:31) Satanás nia objetivu ida mak atu hafoʼer Maromak Jeová nia naran neʼebé santu. Kuandu Satanás kontra Maromak iha jardín Eden, nia hahú habelar lia-bosok kona-ba Maromak. Nia koko halo ema fiar katak Jeová mak Ukun-Naʼin neʼebé bosok-teen, hanoin an deʼit no lakohi fó buat diʼak ba ema. (Gén 3:​1, 4, 5) Satanás nia lia-bosok neʼe kontinua book ema atu hanoin sala kona-ba Jeová. Bainhira ema hili atu la “hadomi lia-loos”, Satanás bele fó influénsia ba sira atu halo hahalok aat no sala oioin.—Rom 1:​25-31. w23.03 p. 2 par. 3

Bainhira Ita hakaʼas an atu husik toman aat ruma, karik dala ruma Ita sei monu fali ba Ita-nia toman neʼe. Ka karik Ita lakon pasiénsia no sente estrese tanba presiza tempu kleur liu atu bele kumpre Ita-nia planu. Saida mak bele ajuda Ita tahan? Hahalok importante ida mak domin ba Jeová. Ita-nia domin ba Jeová mak hahalok neʼebé furak tebes. (Prov 3:​3-6) Bainhira Ita iha domin neʼebé boot ba Jeová, neʼe sei ajuda Ita tahan susar sira ho susesu. Bíblia temi beibeik kona-ba Jeová nia domin neʼebé laran-metin ba ninia atan sira. Tan neʼe nia sei nunka husik hela ninia atan sira no nunka para atu hadomi sira. Maromak kria Ita tuir ninia ilas. (Gén 1:26) Oinsá mak Ita bele banati-tuir ninia domin? Hahú hodi haburas agradese. (1 Tes 5:18) Loroloron husu ba Ita-nia an: ‘Oinsá Jeová hatudu ona domin mai haʼu?’ Tuirmai fó obrigadu ba Jeová liuhusi orasaun. Ita bele temi buat espesífiku neʼebé nia halo ona mai Ita. w23.03 p. 12 par. 17-19

Jesus hatudu laran-diʼak no domin ba apóstolu naʼin-12. Saida mak ita aprende? Buat neʼebé importante laʼós buat neʼebé ema seluk halo ba ita, maibé saida mak ita halo kuandu ema halo sala hasoru ita. Bainhira ita sai hirus tanba maluk fiar-naʼin ida, husu ba Ita-nia an: ‘Tanbasá mak haʼu hirus ho buat neʼebé nia halo? Neʼe hatudu katak haʼu iha fraku ruma neʼebé haʼu presiza hadiʼa ka lae? Ema neʼebé hakanek haʼu-nia laran hasoru daudaun problema ka lae? Maski haʼu sente katak haʼu iha razaun loos atu sai laran-kanek, haʼu bele hatudu domin hodi fó perdua ba ema neʼe ka lae?’ Bainhira ita hatudu domin ba ema seluk, ita hatudu katak ita mak Jesus nia dixípulu. Jesus nia ezemplu mós hanorin ita atu koko komprende ita-nia maluk fiar-naʼin sira. (Prov 20:5) Jesus bele haree ema nia laran. Maibé ita labele. Maski nuneʼe, ita bele hatudu pasiénsia ba irmaun-irmán sira tanba sira-nia fraku. (Éf 4:​1, 2; 1 Ped 3:8) Fasil atu halo nuneʼe se ita koñese sira diʼak liután. w23.03 p. 30 par. 14-16

Dala ruma Satanás aproveita emerjénsia médiku atu halo ita la kaer metin ba ita-nia fiar. Karik doutór ka família neʼebé laʼós Testemuña obriga ita atu simu transfuzaun raan neʼebé kontra Maromak nia ukun-fuan. Ka karik ema ruma obriga ita atu simu tratamentu ruma neʼebé kontra Bíblia nia prinsípiu sira. Klaru katak ita lakohi mate, maibé ita hatene katak Jeová sei kontinua hadomi ita maski ita mate. (Rom 8:​37-39) Bainhira Jeová nia belun sira mate, nia kontinua hanoin-hetan sira hanesan sira sei moris hela. (Lc 20:37) Nia hakarak tebes atu halo sira moris fali. (Job 14:15) Jeová selu ona folin neʼebé karun atu nuneʼe ita bele “hetan moris rohan-laek”. (João 3:16) Ita hatene katak Jeová hadomi tebes ita no hanoin tebes ita. Tan neʼe, duké husik Jeová bainhira ita moras ka atu besik mate, diʼak liu atu sadere ba Jeová atu hetan kmaan, matenek no kbiit.—Sal 41:3. w22.06 p. 18 par. 16-17

Bíblia hatete: “Hamtaʼuk Jeová mak hakat primeiru atu bele hetan matenek, no koñesimentu kona-ba Maromak neʼebé Santu Liu Hotu mak sei fó kbiit atu komprende.” (Prov 9:10) Entaun buka-hatene Jeová nia hanoin bainhira ita presiza halo desizaun neʼebé importante. Ita bele halo nuneʼe hodi estuda Bíblia no publikasaun sira neʼebé bazeia ba Bíblia. Neʼe ajuda ita atu hatudu matenek neʼebé loos. (Prov 2:​5-7) Só Jeová deʼit mak bele fó ita matenek neʼebé loos. (Rom 16:27) Tanbasá Jeová mak Hun ba matenek? Primeiru, Jeová mak Kriadór no nia hatene buat hotu kona-ba ninia kriatura sira. (Sal 104:24) Segundu, buat hotu neʼebé Jeová halo hatudu sai ninia matenek. (Rom 11:33) Terseiru, Jeová nia konsellu sempre lori benefísiu ba ema neʼebé halo tuir ida-neʼe. (Prov 2:​10-12) Se ita hakarak atu iha matenek neʼebé loos, ita tenke simu lia-loos báziku sira-neʼe no husik neʼe dirije ita-nia hahalok no desizaun sira. w22.10 p. 19 par. 3-4

Tuir Apokalipse kapítulu 12, Satanás lakon funu. Nia no anju aat sira soe tun tiha ba rai. Satanás sai hirus tebes no nia fakar sai ninia hirus ba ema. Rezultadu mak “susar ba rai”. (Apok 12:​9-12) Oinsá profesia sira-neʼe afeta ita? Bainhira ita haree akontesimentu iha mundu no ema nia hahalok sai aat, neʼe ajuda ita hatene katak Jesus sai ona Liurai. Tan neʼe bainhira ita haree ema hatudu hahalok hanoin an deʼit no laran-aat, ita la presiza sai laran-kraik tanba ita hatene katak sira-nia hahalok kumpre Bíblia nia profesia. Maromak nia Ukun harii ona. (Sal 37:1) No mundu nia situasaun sei sai aat liután nuʼudar funu Armagedon besik daudaun. (Mc 13:8; 2 Tim 3:13) Ita agradese tebes tanba ita-nia Aman Jeová ajuda ita komprende tanbasá iha problema oioin iha mundu. w22.07 p. 3-4 par. 7-8

Ita bele husu Jeová atu ajuda ita-nia irmaun-irmán sira tahan susar tanba moras, dezastre naturais, funu, ema kontra ka susar seluk tan. Ita mós bele halo orasaun kona-ba irmaun-irmán sira neʼebé uza sira-nia tempu atu ajuda bainhira dezastre mosu. Karik Ita rasik koñese ema balu neʼebé hasoru daudaun susar, diʼak atu temi sira-nia naran iha Ita-nia orasaun. Ita hatudu domin neʼebé loos hodi husu Jeová atu ajuda irmaun-irmán sira tahan susar. Irmaun sira neʼebé dirije kongregasaun sei hafolin no hetan benefísiu bainhira ita halo orasaun kona-ba sira. Apóstolu Paulo mós sente katak nia presiza ema seluk atu halo orasaun kona-ba nia. Nia hakerek: “No mós harohan atu Maromak bele fó liafuan mai haʼu bainhira haʼu loke haʼu-nia ibun, atu nuneʼe haʼu bele koʼalia ho aten-brani atu halo ema hatene segredu santu husi liafuan diʼak.” (Éf 6:19) Ohin loron, iha irmaun barak neʼebé serbisu makaʼas atu dirije ita. Ita hatudu domin ba sira hodi husu Jeová haraik bensaun ba sira-nia serbisu. w22.07 p. 23-24 par. 14-16

Soldadu ida uza kapasete atu proteje ninia ulun. Ita mós halo funu espirituál hasoru Satanás, tan neʼe ita presiza proteje ita-nia neon husi Satanás. Nia uza tentasaun no ideia oioin atu estraga ita-nia hanoin. Hanesan kapasete proteje soldadu ida nia ulun, ita-nia esperansa proteje ita-nia hanoin atu ita bele laran-metin nafatin ba Jeová. Maibé se ita-nia esperansa sai fraku no ita komesa hanoin deʼit kona-ba ita-nia hakarak rasik, ita sei haluha ita-nia esperansa ba futuru. Hanoin toʼok kona-ba ema Kristaun balu iha sidade Korinto antigu. Sira la tau fiar tan ba buat neʼebé importante, neʼe mak esperansa kona-ba moris-hiʼas. (1 Kor 15:12) Paulo hakerek katak ema neʼebé la iha esperansa ba futuru halo tuir deʼit sira-nia hakarak isin nian. (1 Kor 15:32) Ohin loron, ema barak la tau esperansa ba Maromak nia promesa, tan neʼe sira halo buat naran deʼit atu bele sente kontente. Maibé ita tau fiar ba Maromak nia promesa kona-ba futuru. w22.10 p. 25-26 par. 8-9

Jeová konvida Ita atu halo orasaun ba nia. Nia haree problema sira neʼebé Ita hasoru, no nia promete atu rona ba Ita-nia orasaun iha tempu naran deʼit. Nia gosta atu rona ba ninia atan sira. (Prov 15:8) Ita bele halo orasaun kona-ba saida bainhira Ita sente mesamesak? Ita bele fakar sai Ita-nia sentimentu ba Jeová. (Sal 62:8) Fó sai Ita-nia problema sira ba Jeová no mós Ita-nia sentimentu kona-ba problema sira-neʼe. Husu Jeová ajuda Ita hatene oinsá atu tahan bainhira sente triste ka mesamesak no husu aten-brani atu fó sai Ita-nia fiar. Ita mós bele husu matenek atu bele esplika Ita-nia fiar ho respeitu. (Lc 21:​14, 15) Se Ita sente depresaun, husu Jeová atu ajuda Ita koʼalia kona-ba neʼe ba ema Kristaun neʼebé maduru. Ita bele husu Jeová atu ajuda ema neʼe komprende Ita-nia sentimentu. Haree oinsá nia hatán Ita-nia orasaun no sai prontu atu simu ajuda husi ema seluk. Neʼe sei ajuda Ita atu la sente mesamesak. w22.08 p. 10 par. 6

Ema kontra makaʼas kongregasaun foun iha Tesalónika. Ema-lubun neʼebé hirus makaʼas lori “maun-alin balu ba ukun-naʼin sidade nian”. (Após 17:6) Klaru katak fiar-naʼin sira-neʼe taʼuk tebes. Situasaun neʼe bele halakon sira-nia laran-manas atu serbí Jeová. Apóstolu Paulo lakohi ida-neʼe akontese. Maibé nia arranja ema atu tau matan didiʼak ba kongregasaun foun neʼe. Paulo fó-hatene maluk Kristaun sira iha Tesalónika: “Ami haruka ita-nia alin Timóteo . . . , atu nia bele hametin imi no fó kmaan ba imi kona-ba imi-nia fiar, atu nuneʼe imi-nia fiar labele nakdoko tanba susar sira-neʼe.” (1 Tes 3:​2, 3) Timóteo haree ona oinsá Paulo hametin irmaun-irmán sira iha Listra. Nia mós haree ona oinsá Jeová ajuda iha tempu neʼebá, tan neʼe nia bele hametin irmaun-irmán foun sira-neʼe katak Jeová mós sei ajuda sira.—Após 14:​8, 19-22; Ebr 12:2. w22.08 p. 21 par. 4

Iha tinan 1870, grupu Estudante Bíblia neʼebé Charles Taze Russell mak dirije komesa estuda didiʼak Eskritura sira. Sira hakarak hatene lia-loos kona-ba Jesus nia sakrifísiu no oinsá atu komemora Jesus nia loron mate. Ohin loron, ita hetan benefísiu husi sira-nia hakaʼas an atu estuda didiʼak Bíblia. Oinsá? Ita komprende signifikadu husi Jesus nia sakrifísiu no oinsá ida-neʼe lori benefísiu mai ita no mós ema hotu. (1 João 2:​1, 2) Ita mós aprende katak Bíblia temi kona-ba esperansa rua ba ema neʼebé halo Maromak kontente. Ema balu iha esperansa atu moris ba nafatin iha lalehan no mós ema barak iha esperansa atu moris ba nafatin iha rai. Ita bele hakbesik liután ba Jeová bainhira ita hanoin kona-ba ninia domin mai ita no oinsá ita bele hetan benefísiu husi Jesus nia sakrifísiu. (1 Ped 3:18) Entaun, hanesan irmaun sira iha tempu uluk neʼebé laran-metin, ita mós konvida ema seluk atu asiste Memoriál tuir buat neʼebé Jesus hanorin ona ba ninia dixípulu sira. w23.01 p. 21 par. 6-7

Jesus hanorin ema kona-ba bensaun sira neʼebé Maromak nia Ukun sei haraik mai mundu. Ita sente agradese ba Jesus nia sakrifísiu tanba neʼe loke dalan mai ita atu iha relasaun diʼak ho Jeová no Jesus. Ema sira neʼebé hatudu fiar ba Jesus iha esperansa atu moris ba nafatin no hasoru fali sira-nia família no belun neʼebé mate ona. (João 5:​28, 29; Rom 6:23) Tuir loloos, ita la merese atu simu bensaun sira-neʼe, no ita mós nunka bele selu fali buat neʼebé Maromak no Kristu halo ona mai ita. (Rom 5:​8, 20, 21) Maibé ita bele hatudu katak ita hafolin tebes ida-neʼe. Oinsá? Liuhusi uza buat naran deʼit neʼebé ita iha atu serbí Jeová. Porezemplu, ita bele ajuda harii no halo manutensaun ba fatin adorasaun sira. w23.01 p. 26 par. 3; p. 28 par. 5

Sira neʼebé sai liurai iha Maromak nia Ukun sei ajuda tau matan ema biliaun ba biliaun neʼebé hela iha mundu tomak. Hanesan Jesus, ema naʼin-144.000 sei serbí nuʼudar liurai no amlulik sira. (Apok 5:10) Tuir Moisés nia Ukun-Fuan, amlulik sira-nia responsabilidade importante mak ajuda povu atu iha saúde diʼak no hakbesik liután ba Jeová. “Ukun-Fuan mak lalatak ba buat diʼak neʼebé atu mai”, tan neʼe ita bele fiar katak sira neʼebé ukun hamutuk ho Jesus sei ajuda tau matan ba ema nia saúde fíziku no espirituál. (Ebr 10:1) Ita tenke hein atu haree oinsá liurai no amlulik sira-neʼe komunika ho povu husi Maromak nia Ukun. Ita bele fiar metin katak iha Paraízu iha futuru, ita sei hetan matadalan neʼebé ita presiza.—Apok 21:​3, 4. w22.12 p. 11 par. 11-13

Razaun ida ita konvida ema seluk tuir Memoriál mak ita hakarak sira neʼebé tuir ba dala primeiru atu aprende lia-loos kona-ba buat neʼebé Jeová no Jesus halo ona ba ita hotu. (João 3:16) Ita hein katak buat neʼebé sira haree no rona iha Memoriál sei book sira atu aprende liután no serbí Jeová. Ita mós konvida Testemuña sira neʼebé la ativu ona. Ita halo nuneʼe hodi fó-hanoin sira katak Maromak nafatin hadomi sira. Sira barak mak simu konvite no ita kontente atu hasoru fali sira. Bainhira sira tuir Memoriál, neʼe fó-hanoin sira katak uluk sira sente kontente tanba serbí Jeová. (Sal 103:​1-4) Maski ema simu ka la simu ita-nia konvite, ita kontinua konvida ema seluk tuir Memoriál, tanba ita hatene katak Jeová hafolin ema ida-idak neʼebé tuir Memoriál.—Lc 15:7; 1 Tim 2:​3, 4. w23.01 p. 20 par. 1; p. 23 par. 9-11

Iha kalan antes Jesus mate, nia husu Aman Jeová atu tau matan ba ninia dixípulu sira. (João 17:​15, 20) Jeová sempre tau matan no proteje ninia povu. Maibé Jesus hatene katak Satanás sei fó-terus makaʼas ba ninia dixípulu. Jesus rekoñese katak sira presiza Jeová nia ajuda atu bele tahan hasoru Diabu nia ataka. Ohin loron, Satanás nia mundu aat neʼe hamosu problema oioin ba ema Kristaun loos. Ita hotu hasoru problema sira neʼebé bele halo ita laran-kraik no koko ita-nia laran-metin ba Jeová. Ita la presiza taʼuk. Jeová tau matan ba ita, neʼe katak nia haree susar hotu neʼebé ita hasoru no nia mós prontu atu ajuda ita tahan. Sin, Jeová tau matan ba ema “sira neʼebé hamtaʼuk nia . . . atu salva sira.”—Sal 33:​18-20. w22.08 p. 8 par. 1-2

Tinan-tinan, durante tempu Memoriál, ita hatudu agradese ba buat neʼebé Jesus halo liuhusi uza tempu atu halo orasaun no hanoin kleʼan kona-ba benefísiu husi Jesus nia mate. Ita mós konvida ema barak atu asiste serimónia espesiál neʼe. Ita hakaʼas an atu la husik buat naran deʼit hanetik ita atu tuir Memoriál. Iha Memoriál, ita aprende tanbasá mak Jesus presiza mate no oinsá mak ninia mate bele sosa ema barak husi sala. Ita mós hanoin fali kona-ba paun no tua-uvas reprezenta saida no sé mak bele han paun no hemu tua-uvas. (Lc 22:​19, 20) Ita mós hanoin kleʼan kona-ba futuru kapás ba ema sira neʼebé iha esperansa atu moris ba nafatin iha mundu. (Isa 35:​5, 6; 65:​17, 21-23) Ita presiza hafolin lia-loos sira-neʼe. w23.01 p. 20 par. 2; p. 21 par. 4

Hodi fó ninia Oan-Mane nuʼudar sakrifísiu atu taka ita-nia sala, Maromak loke dalan ba ita atu bele hetan moris ba nafatin. (Mt 20:28) Apóstolu Paulo hakerek: “Tanba mate mai liuhusi ema ida, nuneʼe mós moris-hiʼas husi mate mai liuhusi ema ida. Ema hotu mate tanba Adão, nuneʼe mós ema hotu sei hetan moris tanba Kristu.” (1 Kor 15:​21, 22) Jesus hanorin ninia dixípulu atu halo orasaun hodi husu Maromak nia Ukun atu mai no atu Maromak nia hakarak sai loos iha rai. (Mt 6:​9, 10) Maromak nia hakarak ida mak atu ema moris ba nafatin iha rai. Atu kumpre ida-neʼe, Jeová hili ona ninia Oan-Mane nuʼudar Liurai ba Maromak nia Ukun. Maromak halibur daudaun ema naʼin-144.000 husi rai atu apoia Jesus kumpre Maromak nia hakarak.—Apok 5:​9, 10. w22.12 p. 5 par. 11-12

Bainhira ema neʼebé ita hadomi mate, ita saudades loos nia. Foufoun, karik ita sente laran-kanek loos liuliu se nia terus tebes antes mate. Maibé nuʼudar tempu liu daudaun, ita komesa sente kontente fali bainhira hanoin kona-ba buat neʼebé nia hanorin, halo ka hatete atu anima ita ka atu halo ita hamnasa. Iha dalan neʼebé hanesan, ita mós sente triste bainhira lee kona-ba Jesus nia terus no mate. Durante tempu Memoriál, ita uza tempu atu hanoin kona-ba Jesus nia sakrifísiu neʼebé folin-boot. (1 Kor 11:​24, 25) Maibé ita mós bele hetan ksolok bainhira hanoin kleʼan kona-ba buat hotu neʼebé Jesus halo no hatete kuandu nia iha mundu. Ita mós bele hetan laran-manas bainhira hanoin kona-ba buat neʼebé nia halo agora daudaun no sei halo iha futuru. w23.01 p. 26 par. 1-2

Dixípulu sira sente triste bainhira Jesus mate. Sira lakon ema neʼebé sira hadomi no mós sente katak sira lakon sira-nia esperansa. (Lc 24:​17-21) Maski nuneʼe, bainhira Jesus mosu ba sira, nia uza tempu atu ajuda sira komprende oinsá nia kumpre Bíblia nia profesia. Nia mós fó ba sira serbisu neʼebé importante. (Lc 24:​26, 27, 45-48) Bainhira Jesus saʼe ba lalehan, dixípulu sira la sente triste tan, maibé sira kontente tebes. Sira sente kontente tanba hatene katak Jesus moris-hiʼas no sei ajuda sira atu halo serbisu neʼebé nia entrega ba sira. Sira-nia ksolok book sira atu kontinua fó ba hahiʼi ba Jeová. (Lc 24:​52, 53; Após 5:42) Atu Ita bele banati-tuir Jesus nia dixípulu ita presiza tau uluk Maromak nia Ukun iha ita-nia moris. Maski ita presiza kontinua tahan atu bele nafatin serbí Jeová, maibé Jeová promete atu haraik bensaun barak se ita halo nuneʼe.—Prov 10:22. w23.01 p. 30-31 par. 15-16

Ita lakohi halo sala neʼebé hanesan ho Adão no Eva. Se nuneʼe saida mak ita bele halo? Ita presiza kontinua aprende kona-ba Jeová, hafolin ninia hahalok sira, no hakaʼas an atu komprende ninia hanoin. Se ita halo nuneʼe, ita-nia domin ba nia sei sai boot liután. Hanoin toʼok kona-ba Abraão. Nia hadomi tebes Jeová. Maski dala ruma susar ba nia atu komprende Jeová nia desizaun, maibé nia la kontra Jeová. Nia kontinua hakaʼas an atu koñese Jeová diʼak liután. Porezemplu, bainhira Abraão hatene katak Jeová deside atu halakon Sodoma no Gomorra, foufoun nia taʼuk katak “Juís ba mundu tomak” sei halakon ema laran-loos hamutuk ho ema aat. Abraão hatene katak Jeová sei nunka halo ida-neʼe, entaun ho respeitu nia husu pergunta oioin ba Jeová no Jeová hatán ho pasiénsia. Ikusmai Abraão komprende katak Jeová hatene ema nia laran no nunka fó-kastigu ba ema diʼak hamutuk ho ema aat.—Gén 18:​20-32. w22.08 p. 28 par. 9-10

Depois Governadór Neemias harii moru Jeruzalein iha tinan 455 AEC, nia buka mane sira neʼebé nia bele tau fiar atu tau matan didiʼak sidade. Mane ida neʼebé Neemias hili mak Hananias, xefe ba Uma Aas Seguru. Neemias hatete: “Hananias mak ema neʼebé haʼu bele fiar liu no nia hamtaʼuk Maromak liu fali ema seluk hotu.” (Neem 7:2) Hananias hadomi Jeová no lakohi halo Jeová laran-kanek, no neʼe book nia atu halaʼo didiʼak knaar hotu neʼebé nia simu. Bainhira ita hatudu hahalok hanesan Hananias, ema mós bele tau fiar ba ita atu halo Jeová nia serbisu. Ezemplu seluk mak Tíkiko. Apóstolu Paulo tau fiar ba nia. Paulo tau fiar ba Tíkiko no hatete katak Tíkiko mak “serbisu-naʼin ida neʼebé laran-metin”. (Éf 6:​21, 22) Paulo tau fiar ba Tíkiko atu lori ninia karta sira ba irmaun-irmán sira iha Éfeso no Koloso no mós atu anima no fó kmaan ba sira. Ohin loron iha irmaun barak neʼebé tau matan ba ita-nia presiza espirituál hanesan Tíkiko.—Kol 4:​7-9. w22.09 p. 9-10 par. 5-6

José hasoru susar oioin durante maizumenus tinan 13. Karik José bele hanoin katak Maromak la hadomi ona nia. Nia mós bele hanoin katak Jeová husik ona nia iha tempu neʼebé nia presiza tebes ajuda. Maibé José la rai odi. Duké halo nuneʼe, nia kontinua iha hanoin neʼebé loos hodi kalma nafatin. Bainhira iha oportunidade atu selu aat fali ba ninia maun sira, nia la halo ida-neʼe maibé nia hatudu domin ba sira no mós perdua sira. (Gén 45:​4, 5) José halo nuneʼe tanba nia iha hanoin neʼebé loos. Duké tau fokus ba ninia problema, nia tau fokus ba buat neʼebé importante, neʼe mak Jeová nia hakarak. (Gén 50:​19-21) Ita aprende saida? Se ema trata aat Ita, keta sai hirus ba Jeová ka hanoin katak nia husik ona Ita. Duké halo nuneʼe, medita kona-ba oinsá nia ajuda Ita atu tahan susar sira. Liután neʼe, bainhira ema trata aat Ita, hakaʼas an atu hatudu domin no sai prontu atu perdua sira. w22.11 p. 21 par. 4

Profeta Daniel haree vizaun oioin neʼebé hatudu ho klaru katak Jeová iha podér boot liu fali autoridade sira hotu. Primeiru, Daniel haree animál boot haat neʼebé reprezenta ukun boot iha mundu neʼebé mosu ona no mosu daudaun. Neʼe mak Babilónia, Média-Pérsia, Grésia, Roma no mós Bretaña ho Estadus Unidus neʼebé agora sai nuʼudar ukun boot iha mundu. (Dan 7:​1-3, 17) Tuirmai Daniel haree Jeová tuur iha ninia kadunan iha lalehan. (Dan 7:​9, 10) Daniel konta katak Maromak hasai podér hotu husi ema nia governu no entrega ba sira neʼebé merese simu ida-neʼe no iha kbiit boot liu. Maromak entrega ba sé? Nia entrega ba “ida neʼebé hanesan oan-mane husi ema” katak Jesus Kristu no mós ba “ema santu sira neʼebé serbí Ida neʼebé Aas Liu” katak ema naʼin-144.000 neʼebé sei ukun “tinan ba tinan ba nafatin”. (Dan 7:​13, 14, 18) Klaru katak, Jeová mak “Ida neʼebé Aas Liu”. Buat neʼebé Daniel haree iha ninia vizaun liga duni ho buat neʼebé nia fó sai antes neʼe. Daniel hatete katak “Maromak iha lalehan” mak “hasai liurai sira no foti liurai sira”.—Dan 2:​19-21. w22.10 p. 14-15 par. 9-11