Abríl

Husu ba Ita-nia an: ‘Saida mak haʼu halo bainhira ema fó konsellu mai haʼu? Haʼu lalais atu rekoñese haʼu-nia sala, ka haʼu koko atu defende an? Haʼu lalais atu duun fali ema seluk ka lae?’ Bainhira Ita lee kona-ba fiar-naʼin sira husi Bíblia, haree oinsá sira tahan hasoru problema sira. Iha situasaun ida-idak, husu ba Ita-nia an: ‘Oinsá haʼu bele banati-tuir Jeová nia atan sira-neʼe?’ Ita mós bele aprende husi irmaun-irmán sira neʼebé idade no mós sira neʼebé joven. Porezemplu, karik Ita bele hanoin kona-ba irmaun ka irmán ruma iha kongregasaun neʼebé hasoru susar, hanesan hetan tentasaun husi kolega, família kontra ka iha problema saúde. Karik sira hatudu hahalok diʼak neʼebé Ita hakarak atu banati-tuir. Hodi hanoin kona-ba sira-nia ezemplu, karik Ita bele aprende oinsá atu tahan Ita-nia problema sira. Ita agradese tebes tanba irmaun-irmán sira hatudu ezemplu diʼak kona-ba fiar neʼebé ita bele banati-tuir.—Ebr 13:7. w22.04 p. 13 par. 13-14

Bainhira ita hasoru susar, ita agradese tebes kuandu katuas sira uza tempu atu rona no fó kmaan ba ita. Bainhira ita presiza ajuda atu halaʼo estuda Bíblia, ita kontente kuandu pioneiru neʼebé iha esperiénsia akompaña ita no fó sujestaun ruma. Irmaun-irmán sira-neʼe hotu kontente atu ajuda ita. Ita mós bele sente kontente se ita prontu atu ajuda irmaun-irmán sira. Se Ita hakarak aumenta liután Ita-nia serbisu iha dalan sira-neʼe ka iha dalan seluk tan, saida mak bele ajuda Ita? Keta halo planu neʼebé jerál demais. Porezemplu, karik Ita hanoin: ‘Haʼu hakarak halo buat barak liután iha kongregasaun.’ Maibé karik susar atu hatene oinsá atu kumpre planu neʼe, no mós susar atu hatene se Ita kumpre ona planu neʼe tanba planu neʼe jerál demais. Tan neʼe, diʼak atu halo planu espesífiku. Ita mós bele hakerek Ita-nia planu no mós hakat sira atu bele kumpre ida-neʼe. w22.04 p. 25 par. 12-13

Ohin loron, Jeová halibur daudaun “ema-lubun boot” no treinu sira atu moris iha ninia Ukun okos. (Apok 7:​9, 10) Maski ema barak iha mundu neʼe haketak malu tanba odi malu no funu, “ema-lubun boot” hakaʼas an atu hasai tiha hahalok odi. Neʼe hanesan sira tuku sira-nia surik sai xarrua. (Miq 4:3) Duké hola parte iha funu no oho ema barak, sira ajuda ema atu hetan “moris neʼebé loloos” liuhusi hanorin ema kona-ba Maromak neʼebé loos no ninia hakarak. (1 Tim 6:19) Sira-nia família karik kontra sira ka sira hasoru problema ekonomia tanba apoia Maromak nia Ukun, maibé Jeová sei ajuda sira atu hetan buat neʼebé sira presiza. (Mt 6:​25, 30-33; Lc 18:​29, 30) Faktu sira-neʼe hatudu katak Maromak nia Ukun mak realidade no neʼe sei kontinua kumpre Maromak nia hakarak. w22.12 p. 6 par. 13

Bainhira Kristu nia Ukun ba Tinan Rihun Ida remata, ema hotu neʼebé moris iha rai sei perfeitu. La iha ona ema ida neʼebé hetan konsekuénsia aat husi Adão nia sala. (Rom 5:12) Ita sai livre husi Adão nia sala. Iha dalan neʼe mak ema sira iha rai sei “hetan moris” nuʼudar ema perfeitu bainhira Kristu nia Ukun ba Tinan Rihun Ida remata. (Apok 20:5) Ita hatene katak Jesus laran-metin nafatin, maski Satanás koko atu tenta nia. Maibé ema perfeitu hotu sei laran-metin nafatin ba Jeová bainhira Satanás koko sira ka lae? Ema ida-idak iha oportunidade atu hatudu ida-neʼe bainhira Satanás sai husi rai-kuak kuandu Jesus nia Ukun ba Tinan Rihun Ida remata. (Apok 20:7) Sira neʼebé laran-metin durante koko ba dala ikus sei simu moris ba nafatin no ikusmai sei kontente tanba iha liberdade neʼebé loos. (Rom 8:21) Sira neʼebé kontra Jeová sei lakon ba nafatin.—Apok 20:​8-10. w22.05 p. 19 par. 18-19

Profesia neʼe sai loos bainhira Satanás uza ema Judeu no ema Roma atu oho Maromak nia Oan-Mane. (Lc 23:​13, 20-24) Bainhira ema ida nia ain-tuban kanek, nia labele laʼo ba tempu balu. Nuneʼe mós ho Jesus, bainhira nia mate, nia labele halo buat ida ba tempu balu tanba nia iha rate laran durante loron tolu. (Mt 16:21) Profesia iha Génesis 3:15 hatudu katak Jesus sei la mate ba nafatin. Tanbasá? Tanba tuir profesia neʼe, bei-oan sei harahun samea nia ulun. No atu ida-neʼe bele akontese, Jesus tenke hetan moris-hiʼas. Neʼe sai loos duni. Iha loron terseiru depois Jesus mate, nia hetan moris-hiʼas nuʼudar kriatura espíritu neʼebé sei nunka mate tan. Jesus sei harahun Satanás iha tempu neʼebé Maromak deside ona. (Ebr 2:14) Sira neʼebé sei ukun hamutuk ho Kristu sei ajuda atu halakon Maromak nia inimigu hotu iha rai katak samea nia bei-oan.—Apok 17:14; 20:​4, 10. w22.07 p. 16 par. 11-12

Inan-aman, ajuda Ita-nia oan atu iha belun neʼebé diʼak. Bíblia hatudu ho klaru katak belun sira bele fó influénsia diʼak ka la diʼak ba ita. Ita koñese Ita-nia oan nia belun sira ka lae? Oinsá Ita bele ajuda Ita-nia oan atu habelun ho ema sira neʼebé hadomi Jeová? (1 Kor 15:33) Ita bele ajuda Ita-nia oan atu hetan belun neʼebé diʼak, liuhusi konvida irmaun-irmán sira neʼebé iha relasaun diʼak ho Jeová atu ransu hamutuk ho Ita-nia família. (Sal 119:63) Aman ida naran Tony hatete: “Durante tinan barak, haʼu no haʼu-nia feen konvida irmaun-irmán ho idade oioin no situasaun moris la hanesan atu mai ami-nia uma. Sira han hamutuk ho ami no tuir ami-nia adorasaun família. Neʼe mak dalan neʼebé diʼak atu koñese ema neʼebé hadomi Jeová no serbí Jeová ho kontente. . . . Sira-nia esperiénsia, sira-nia laran-manas no sakrifísiu neʼebé sira halo, fó impaktu boot ba ami-nia oan no ajuda sira hakbesik liután ba Jeová.” w22.05 p. 29-30 par. 14-15

Bainhira katuas sira hasoru ema ida neʼebé halo sala, sira-nia objetivu mak atu foti desizaun neʼebé Jeová foti ona iha lalehan. Oinsá arranju neʼe lori benefísiu ba kongregasaun? Bainhira hasai ema neʼebé halo sala husi kongregasaun, neʼe proteje Jeová nia bibi sira. (1 Kor 5:​6, 7, 11-13; Tito 3:​10, 11) Neʼe mós bele ajuda ema neʼebé halo sala atu arrepende an no hetan perdua husi Jeová. (Lc 5:32) Katuas sira halo orasaun kona-ba ema neʼebé arrepende an no husu Jeová atu ajuda ema neʼe hadiʼa fali ninia relasaun diʼak ho Jeová. (Tgo 5:15) Oinsá se ema ida la arrepende an bainhira katuas sira hasoru nia? Se nuneʼe, ema neʼe sei hasai husi kongregasaun. Maibé Jeová prontu atu fó perdua ba ema neʼe se nia rekoñese katak nia halo sala, arrepende an no troka ninia hanoin no hahalok. (Lc 15:​17-24) Jeová prontu atu fó perdua ba ema neʼe maski nia halo sala sériu.—2 Krón 33:​9, 12, 13; 1 Tim 1:15. w22.06 p. 9 par. 5-6

Ho Jeová nia ajuda, irmaun-irmán sira iha mundu tomak konsege tahan hasoru situasaun susar oioin no hetan susesu atu kontra hasoru Diabu. (1 Ped 5:9) Ita mós bele halo nuneʼe. Lakleur tan Jeová sei haruka Jesus no sira neʼebé ukun hamutuk ho Jesus atu “harahun Diabu nia serbisu hotu”. (1 João 3:8) Depois neʼe, Maromak nia povu neʼebé serbí nia iha rai ‘sei la taʼuk buat ida no la iha buat ida mak halo sira nakdedar’. (Isa 54:14; Miq 4:4) Maibé antes neʼe, ita presiza hakaʼas an atu manán ita-nia sentimentu taʼuk. Ita presiza kontinua hametin ita-nia fiar katak Jeová hadomi no proteje ninia atan sira. Bainhira ita hanoin kleʼan no koʼalia ba ema seluk kona-ba oinsá Jeová proteje ona ninia atan sira iha tempu uluk, neʼe bele ajuda ita. Ita mós bele hanoin kona-ba oinsá Jeová ajuda ona ita iha situasaun neʼebé susar. Ho Jeová nia ajuda, ita bele manán sentimentu taʼuk.—Sal 34:4. w22.06 p. 19 par. 19-20

Ukun boot ida ikus mak estátua nia ‘ain parte kraik neʼebé halo husi besi kahur ho rai-mean’, no bainhira Bretaña no Estadus Unidus serbisu hamutuk durante Funu Mundiál Primeiru, sira sai nuʼudar ukun boot neʼe. Nabukodonozór nia mehi kona-ba estátua mós fó sai katak ukun boot neʼe la hanesan ho ukun sira antes neʼe. Ukun boot Bretaña ho Estadus Unidus halo husi besi kahur ho rai-mean. Maibé ukun sira antes neʼe, halo husi materiál toos oioin hanesan osan-mean ka osan-mutin. Rai-mean reprezenta “ema nia oan sira”, neʼe katak povu baibain. (Dan 2:​43, nota) Ohin loron, ita bele haree ho klaru oinsá ema fó influénsia makaʼas ba governu sira liuhusi eleisaun, halo kampaña kona-ba ema nia direitu, protesta no harii organizasaun neʼebé apoia serbisu-naʼin nia direitu, neʼe halo susar ba ukun-naʼin sira atu implementa sira-nia planu polítiku. w22.07 p. 4-5 par. 9-10

Ita dada an atu hetan batizmu ka lae? Diʼak atu husu ba Ita-nia an: ‘Saida mak hanetik haʼu atu hetan batizmu?’ (Após 8:36) Jesus kompara halo ninia Aman nia hakarak ho ai-han. Tanbasá? Ai-han mak diʼak ba ita. Jesus hatene katak buat hotu neʼebé Jeová husu ita atu halo mak diʼak ba ita. Jeová lakohi ita halo buat ida neʼebé bele lori susar ba ita. Jeová hakarak Ita atu hetan batizmu ka lae? Sin. (Após 2:38) Entaun Ita bele iha konfiansa katak halo tuir mandamentu atu hetan batizmu sei lori benefísiu ba Ita. Ita sei la dada an atu han ai-han neʼebé gostu, loos ka lae? Entaun Ita mós lalika dada an atu hetan batizmu. Tanbasá ema balu seidauk hetan batizmu? Karik sira sente katak sira seidauk prontu. Desizaun importante liu neʼebé Ita halo iha Ita-nia moris mak atu dedika an ba Jeová no hetan batizmu. Entaun Ita presiza hanoin didiʼak desizaun neʼe, no Ita presiza tempu no hakaʼas an atu sai prontu. w23.03 p. 7 par. 18-20

Bainhira Jesus simu espíritu santu, nia sai nuʼudar feto neʼe nia bei-oan prinsipál. Depois Jesus mate no moris hiʼas, Maromak “tau koroa glória no hahiʼi nian” no fó “kbiit tomak iha lalehan no rai” ba nia, inklui kbiit atu “harahun Diabu nia serbisu hotu”. (Ebr 2:7; Mt 28:18; 1 João 3:8) Maibé iha tan ema seluk neʼebé sai nuʼudar feto neʼe nia bei-oan. Apóstolu Paulo nia liafuan ba ema Judeu no ema husi nasaun seluk neʼebé iha esperansa atu bá lalehan ajuda ita hatene kona-ba neʼe. Nia hatete: “Se imi Kristu nian, imi mak Abraão nia bei-oan duni, imi sei simu liman-rohan tuir Maromak nia promesa.” (Gal 3:​28, 29) Bainhira Jeová hili ema Kristaun ida ho espíritu santu atu bá lalehan, ema neʼe sai parte ba feto nia bei-oan. Entaun Jesus Kristu no ema nain-144.000 neʼebé ukun hamutuk ho nia mak sai parte ba feto nia bei-oan. (Apok 14:1) Sira hotu hakaʼas an atu banati-tuir sira-nia Aman Maromak Jeová. w22.07 p. 16 par. 8-9

Ita hatene katak ita sei hasoru susar sira iha loron ikus sira. (2 Tim 3:1) Bainhira ida-neʼe akontese, karik ita sente laran-susar no laran-kraik, liuliu se susar sira-neʼe mosu tuituir malu ka mosu iha tempu neʼebé hanesan. Maibé hanoin-hetan bá katak Jeová tau matan ba ita, no ita bele tahan hasoru susar naran deʼit ho ninia ajuda. Haree oinsá Jeová ajuda mane laran-metin ida naran Job. Job hasoru susar oioin iha tempu badak nia laran. Iha loron ida deʼit, Job rona katak ema oho ka naʼok ninia animál hakiak, oho ninia atan sira no mós ninia oan sira hotu mate. (Job 1:​13-19) Maski nia sente triste hela, nia mós kona moras neʼebé aat tebes. (Job 2:7) Jeová kontinua tau matan ba Job. Jeová hadomi Job, tan neʼe nia ajuda Job atu tahan hasoru susar no kontinua laran-metin. w22.08 p. 11 par. 8-10

Dixiplina bele halo ita laran-kanek. Karik ita sente katak dixiplina neʼe la kona ita ka neʼe makaʼas liu. Neʼe bele hanetik ita atu komprende buat neʼebé importante liu, neʼe mak Jeová korrije ita tanba nia hadomi ita. (Ebr 12:​5, 11) Entaun, simu dixiplina no halo mudansa. Jesus korrije Pedro ba dala balu iha apóstolu seluk nia oin. (Mc 8:33; Lc 22:​31-34) Neʼe bele halo Pedro sente moe. Maski nuneʼe, Pedro laran-metin nafatin ba Jesus. Nia simu dixiplina no aprende husi ninia sala. Rezultadu mak Jeová haraik bensaun ba Pedro nia laran-metin no fó knaar importante ba nia iha kongregasaun. (João 21:​15-17; Após 10:​24-33; 1 Ped 1:1) Ita no mós ema seluk sei hetan benefísiu se ita la tau fokus ba ita-nia sentimentu moe tanba hetan dixiplina, maibé simu dixiplina no halo mudansa. Bainhira ita halo nuneʼe, Jeová no irmaun sira bele fó responsabilidade liután ba ita. w22.11 p. 21-22 par. 6-7

Abraão hatene katak Jeová sei nunka halo hahalok aat ka la hatudu domin. Apóstolu Paulo dehan katak Abraão hatene Jeová bele halo Isaac moris-hiʼas fali. (Ebr 11:​17-19) No tuir loloos, Jeová promete ona katak Isaac sei sai nuʼudar aman ba nasaun ida, no iha tempu neʼebá Isaac seidauk iha oan. Abraão hadomi Jeová, tan neʼe nia fiar katak Aman Jeová sei halo buat neʼebé loos. Tanba fiar, Abraão halo tuir Maromak maski neʼe susar. (Gén 22:​1-12) Oinsá ita bele banati-tuir Abraão? Ita presiza kontinua aprende kona-ba Jeová. Neʼe sei ajuda ita hakbesik liután ba Jeová no hadomi nia. (Sal 73:28) Ita sei treinu ita-nia konxiénsia tuir Maromak nia hanoin. (Ebr 5:14) Rezultadu mak bainhira ema ruma tenta ita atu halo sala, ita sei la halo tuir. Ita sei nunka hanoin atu halo buat neʼebé hakanek ita-nia Aman nia laran no bele estraga ita-nia relasaun diʼak ho nia. w22.08 p. 28-29 par. 11-12

Bainhira apóstolu Paulo no Barnabé vizita fali Listra, Ikónio no Antiokia, sira “hili katuas sira iha kongregasaun ida-idak”. (Após 14:​21-23) Klaru katak katuas sira-neʼe fó kmaan duni ba kongregasaun sira, hanesan katuas kongregasaun sira halo ohin loron. Katuas sira, hakaʼas an bá atu ajuda ema sira neʼebé presiza rona “liafuan neʼebé diʼak” atu sai aten-brani. Paulo fó-hanoin ninia maluk fiar-naʼin sira katak iha “testemuña barak hanesan kalohan” neʼebé tahan ona susar oioin ho Jeová nia kbiit. (Ebr 12:1) Paulo komprende oinsá esperiénsia husi ema sira neʼebé tahan susar ho susesu iha tempu uluk bele fó aten-brani ba irmaun-irmán sira no ajuda sira atu tau fokus ba “Maromak moris nia sidade”. (Ebr 12:22) Ohin loron, ita mós sai aten-brani bainhira lee kona-ba oinsá Jeová ajuda Gideão, Barak, David, Samuel, no ema seluk.—Ebr 11:​32-35. w22.08 p. 21-22 par. 5-6

Maromak sei tesi-lia ba ema tuir “hahalok” saida? Hahalok neʼebé sira hatudu antes mate ka lae? Lae. Hanoin-hetan katak Maromak perdua ona sira-nia sala bainhira sira mate. Entaun neʼe katak “sira-nia hahalok” la refere ba sira-nia dalan moris uluk nian. Maibé neʼe refere ba dalan neʼebé sira halo tuir buat neʼebé sira aprende iha mundu foun. Ema laran-metin sira hanesan Noé, Samuel, David no Daniel tenke aprende kona-ba Jesus Kristu no tau fiar ba Jesus nia sakrifísiu sá tan ho ema neʼebé uluk hatudu hahalok la loos, sira presiza aprende buat barak liután. Saida mak sei akontese ba sira neʼebé lakohi simu oportunidade furak neʼe? Apokalipse 20:15 hatete: “Ema sira neʼebé naran la hakerek iha livru moris nian sei soe tiha ba tasi neʼebé iha ahi-lakan.” Sin, sira sei lakon ba nafatin. Entaun, importante tebes atu hakaʼas an hodi ita-nia naran hakerek iha livru moris nian no hakerek permanente iha livru neʼe. w22.09 p. 19 par. 17-19

Dala barak ita halo desizaun kona-ba saúde no tratamentu médiku bazeia ba ita-nia konxiénsia neʼebé hetan ona treinu husi Bíblia. (1 Tim 3:9) Bainhira halo desizaun no koʼalia ba ema seluk, ita hakaʼas an atu aplika prinsípiu iha Filipe 4:5: “Halo ema hotu haree katak imi la ulun-toos.” Ita hatudu katak ita la ulun-toos hodi la hanoin barak demais kona-ba ita-nia saúde. Ita hadomi no respeitu irmaun-irmán sira maski sira halo desizaun neʼebé la hanesan ho ita-nian. (Rom 14:​10-12) Ita hatudu agradese ba Jeová, Hun ba moris, liuhusi proteje ita-nia moris no fó buat hotu neʼebé diʼak liu ba nia. (Apok 4:11) Ohin loron, ita sei nafatin kona moras no hasoru susar barak. Maibé neʼe laʼós moris neʼebé nia hakarak fó ba ita. Lakleur tan nia sei fó ita moris ba nafatin, sei la iha tan mate no mós susar. (Apok 21:4) Agora daudaun ita kontente tanba bele moris no mós serbí ita-nia Aman Jeová iha lalehan! w23.02 p. 25 par. 17-18

Jeová hatudu ona ho klaru katak nia iha podér boot liu “autoridade sira”. (Rom 13:1) Hanoin toʼok kona-ba ezemplu tolu. Faraó husi rai-Ejitu halo Maromak nia povu sai nuʼudar atan no kontinua la husik sira livre. Maibé Maromak halo ninia povu livre no halo Faraó mout iha Tasi Mean. (Éx 14:​26-28; Sal 136:15) Liurai Belsazar husi Babilónia halo festa ida no “foti an hasoru Naʼi iha lalehan” no “fó hahiʼi ba maromak sira neʼebé halo husi osan-mean, [no] osan-mutin” duké ba Jeová. (Dan 5:​22, 23) Maibé Maromak hamoe mane foti an neʼe. “Iha kalan neʼe kedas”, ema oho Belsazar no tuirmai ninia ukun entrega fali ba ema Média no Pérsia. (Dan 5:​30, 31) Liurai Herodes Agripa I husi rai-Palestina haruka ema oho apóstolu Tiago no tuirmai hatama Pedro ba komarka no hanoin atu oho Pedro. Maibé Jeová hanetik Herodes atu kumpre ninia planu. “Jeová nia anju fó moras ba nia”, no nia mate.—Após 12:​1-5, 21-23. w22.10 p. 15 par. 12

Bainhira ita lee kona-ba oinsá uluk Jeová tau matan ba ninia atan sira, ita-nia esperansa sei sai metin liután. Buat hotu iha Bíblia “hakerek hodi hanorin ita. Neʼe fó ita esperansa tanba Eskritura sira-neʼe ajuda ita atu tahan no fó kmaan mai ita”. (Rom 15:4) Hanoin kleʼan kona-ba oinsá Jeová kumpre ninia promesa. Hanoin toʼok buat neʼebé Maromak halo ba Abraão no Sara. Sira ferik-katuas, tan neʼe sira labele iha oan. Maibé Maromak promete ba sira katak sira sei iha oan. (Gén 18:10) Abraão sente oinsá? Bíblia hatete: “Nia fiar katak nia bele sai aman ba nasaun barak.” (Rom 4:18) Maski Abraão la hatene Maromak sei kumpre promesa neʼe iha dalan oinsá, maibé nia fiar katak Jeová sei kumpre duni ninia promesa. No Jeová halo nuneʼe duni. (Rom 4:​19-21) Istória husi fiar-naʼin sira bele ajuda ita atu fiar katak Jeová sempre kumpre ninia promesa. w22.10 p. 27 par. 13-14

Liafuan sira-neʼe sai loos bainhira ema Judeu sai livre husi Babilónia. Jeová sai nuʼudar “Mestre Boot” ba sira no fó matadalan ba sira, ida-neʼe ajuda povu hetan susesu atu halaʼo fali adorasaun loos. Ita sente kontente tebes tanba Jeová sai nuʼudar ita-nia “Mestre Boot” ohin loron. Isaias konta ai-knanoik neʼebé hatudu katak ita mak hanesan estudante sira neʼebé simu hanorin husi Jeová, hodi hatete: “Imi sei haree imi-nia Mestre Boot ho imi-nia matan rasik.” Iha ai-knanoik neʼe, Isaias hatete katak Mestre hamriik iha ninia estudante sira-nia oin. Ita iha priviléjiu boot atu simu hanorin husi Jeová ohin loron. Oinsá Jeová hanorin ita? Liuhusi ninia organizasaun. Ita agradese tebes tanba simu matadalan neʼebé klaru husi Jeová nia organizasaun. Matadalan neʼebé ita simu iha reuniaun, husi ita-nia publikasaun sira, broadcasting no dalan seluk ajuda ita atu tahan ho haksolok durante tempu susar. w22.11 p. 10 par. 8-9

Kona-ba bainhira Jeruzalein no ninia templu sei lakon, no mós “mundu neʼe nia rohan”, no agora ita hela iha tempu neʼe, Jesus hatete: “Kona-ba loron ka oras, ema ida la hatene, anju sira iha lalehan la hatene no Oan-Mane mós la hatene, só Aman deʼit mak hatene.” Tuirmai nia fó avizu ba ninia dixípulu sira atu “matan-moris nafatin bá”. (Mc 13:​32-37) Ema Kristaun Judeu iha apóstolu sira-nia tempu tenke kontinua matan-moris atu sira bele hetan salvasaun. Jesus fó-hatene ba ninia dixípulu: “Bainhira imi haree tropa sira haleʼu Jeruzalein, imi hatene bá katak sidade neʼe besik ona atu lakon.” Iha tempu neʼebá, sira presiza halo tuir Jesus nia avizu no “halai ba foho”. (Lc 21:​20, 21) Ema neʼebé halo tuir la mate bainhira tropa Roma halakon Jeruzalein. Ita moris iha mundu aat neʼe nia rohan. Tan neʼe ita tenke proteje ita-nia neon no matan-moris nafatin. w23.02 p. 14 par. 1-2; p. 16 par. 3

Jeová hanorin ninia atan sira atu hatudu laran-moos no hahalok loos. Ida-neʼe ajuda sira sente katak sira iha folin no iha dame iha laran. (Prov 13:​5, 6) Karik Jeová halo ona buat sira-neʼe ba Ita bainhira Ita estuda Bíblia. Ita aprende ona katak Jeová nia dalan sira mak diʼak liu ba ema hotu no mós ba Ita rasik. (Sal 77:13) Tan neʼe, Ita hakarak halo buat neʼebé loos tuir Maromak nia haree. (Mt 6:33) Ita hakarak defende lia-loos no prova katak buat neʼebé Satanás fó sai kona-ba Jeová mak la loos. Oinsá Ita bele halo ida-neʼe? Ita bele halaʼo Ita-nia moris iha dalan neʼebé hatudu ho klaru katak Ita la simu Satanás nia lia-bosok, Ita apoia buat neʼebé loos, Ita hakarak Jeová sai nuʼudar Ita-nia Ukun-Naʼin no mós hakarak halo buat neʼebé nia hatete mak loos. Oinsá Ita bele halo ida-neʼe? Halo orasaun ba Jeová atu dedika an ba nia no tuirmai hatudu sai Ita-nia dedikasaun iha ema seluk nia oin hodi hetan batizmu. Ita-nia domin ba buat neʼebé loos no diʼak iha kbiit boot atu book Ita hetan batizmu. w23.03 p. 3 par. 4-5

Ema barak iha mundu la hatene kona-ba “Maromak nia dame”. Dame neʼe mak sentimentu kalma neʼebé ita hetan tanba iha relasaun diʼak ho Maromak. Bainhira ita iha Maromak nia dame, ita sente seguru. (Flp 4:​6, 7) Ita kontente tanba iha relasaun diʼak ho ema seluk neʼebé hadomi Jeová. No ita mós kontente tanba bele habelun ho “Maromak neʼebé fó dame”. (1 Tes 5:23) Bainhira ita hatene, tau fiar no halo tuir Aman Jeová, ninia dame sei halo ita kalma bainhira ita hasoru susar. Ita bele hetan duni Maromak nia dame maski hasoru daudaun susar hanesan moras-peste, dezastre, funu, no ema fó-terus ita ka lae? Maski neʼe bele halo ita sente taʼuk, maibé irmaun-irmán sira halo tuir Jesus nia konsellu neʼebé temi iha eskritura ba ohin. Ho Jeová nia ajuda, sira bele sente dame maski hasoru susar sira. w22.12 p. 16 par. 1-2

Ita labele kontrola buat hotu neʼebé akontese iha ita-nia moris. Tan neʼe, importante atu la hanoin katak Jeová hafolin ita tanba deʼit knaar neʼebé ita iha. No labele kompara ita-nia an ho ema seluk neʼebé halaʼo knaar neʼebé ita gosta. (Gal 6:4) Importante atu buka dalan atu ajuda ema no serbí Jeová. Ita bele halo buat barak liután iha Jeová nia serbisu se Ita halaʼo moris neʼebé simples no labele debe se Ita la presiza. Halo planu kiʼik-kiʼik sira atu Ita bele kumpre Ita-nia planu boot. Porezemplu, se Ita iha planu atu serbí nuʼudar pioneiru regulár, karik agora daudaun Ita bele serbí nuʼudar pioneiru estra ba nafatin. Se Ita-nia planu mak atu serbí nuʼudar atan ba kongregasaun, karik Ita bele aumenta tempu neʼebé Ita uza atu haklaken. Esperiénsia neʼebé Ita hetan agora, bele ajuda Ita atu hetan priviléjiu seluk iha futuru. Hakaʼas an atu halaʼo Ita-nia knaar hotu ho didiʼak. w22.04 p. 26 par. 16-17

Jeová bele ajuda ita tahan problema sira no sente kontente nuʼudar ita serbí nia. Bainhira ita halo orasaun ba Jeová no fó sai buat neʼebé halo ita hanoin barak, karik buat primeiru neʼebé Jeová halo mak fó ita kbiit atu tahan situasaun neʼe. No se ita hasoru susar neʼe ba tempu kleur, karik ita presiza husu beibeik Jeová atu fó ita kbiit hodi bele tahan. Jeová konvida ita atu halo nuneʼe. Ita bele hatene ida-neʼe liuhusi Isaias nia liafuan tuirmai: “Keta husik [Jeová] deskansa.” (Isa 62:7) Ida-neʼe katak sá? Ita presiza halo orasaun beibeik ba Jeová toʼo neʼe hanesan la fó tempu ba Jeová atu deskansa. Isaias nia liafuan halo ita hanoin kona-ba Jesus nia ai-knanoik kona-ba orasaun iha Lucas 11:​8-10, 13. Iha eskritura neʼe, Jesus anima ita atu “kontinua husu” Maromak atu fó ninia espíritu santu. Ita mós bele husu Jeová atu fó ita matadalan hodi halo desizaun neʼebé diʼak. w22.11 p. 8 par. 1; p. 9 par. 6-7

Ita no Ita-nia família bele prepara an ba terus neʼebé sei mosu. Keta imajina buat aat oioin neʼebé karik sei akontese. Maibé hametin Ita-nia relasaun diʼak ho Jeová no ajuda Ita-nia oan sira atu halo buat neʼebé hanesan. Kuandu Ita sente laran-taridu, fakar sai Ita-nia sentimentu ba Maromak. (Sal 62:​7, 8) Halo diskusaun nuʼudar família kona-ba tanbasá mak Ita bele tau fiar ba Jeová. Ita-nia preparasaun ba dezastre bele ajuda Ita no Ita-nia oan sira. Nuneʼe mós Ita bele ajuda Ita-nia oan hodi prepara an antes ema fó-terus ba sira. Sira sei sente aten-brani no sente kalma tanba Ita hanorin sira atu tau fiar ba Jeová. Maromak nia dame halo ita sente seguru. (Flp 4:​6, 7) Jeová nia dame halo ita sente kalma, maski mosu moras-peste, akontese dezastre no ema fó-terus ita. Nia uza katuas sira atu tau matan ba ita. No nia fó ita oportunidade atu ajuda malu. Durante tempu dame neʼebé ita iha agora, ita bele prepara ba susar oioin neʼebé sei mosu, inklui durante “terus boot”.—Mt 24:21. w22.12 p. 27 par. 17-18

Ita tenke hakaʼas an atu la fó-sala tan ba ita-nia an kona-ba sala sériu neʼebé uluk ita halo. Maski nuneʼe, ita lakohi haree Jesus nia sakrifísiu nuʼudar razaun atu “halo beibeik sala ho neon”. (Ebr 10:​26-31) Maibé ita bele fiar katak se ita arrepende an duni, buka ajuda ona husi Jeová no katuas sira, no mós troka ita-nia hahalok, Jeová perdua ona ita iha dalan neʼebé kompletu. (Isa 55:7; Após 3:19) Jesus nia sakrifísiu iha duni kbiit atu hamoos ita-nia sala hotu no loke dalan atu moris iha Paraízu. Ita sei la baruk atu moris iha Paraízu. Ita sei hasoru ema oioin no halo serbisu neʼebé lori ksolok mai ita. Buat furak liu mak loroloron ita sei koñese liután ita-nia Aman iha lalehan no goza buat sira neʼebé nia fó mai ita. Klaru katak sei iha buat barak atu aprende kona-ba Jeová, no mós kona-ba ninia kriasaun. w22.12 p. 13 par. 17, 19

“Feto neʼe” laʼós Eva. Profesia hatete katak feto neʼe nia bei-oan sei “harahun” samea nia ulun. Samea neʼe mak Diabu Satanás, no Eva nia bei-oan neʼebé la perfeitu la iha kbiit atu harahun kriatura espíritu hanesan Satanás. Entaun sé mak sei harahun Satanás? Livru ikus iha Bíblia fó sai kona-ba sé mak “feto” neʼebé temi iha Génesis 3:15. (Apok 12:​1, 2, 5, 10) Neʼe laʼós feto ida iha mundu. Bíblia hatete katak fulan mak iha ninia ain okos, no iha fitun 12 nuʼudar koroa iha ninia ulun. Nia tuur-ahi oan ida neʼebé espesiál, neʼe mak Maromak nia Ukun. Ukun neʼe iha lalehan, tan neʼe feto neʼebé temi iha Génesis 3:15 mós tenke iha lalehan. Feto neʼe reprezenta Jeová nia organizasaun parte lalehan neʼebé forma husi ninia kriatura espíritu sira neʼebé laran-metin. (Gal 4:26) Maromak nia Liafuan mós ajuda ita hatene sé mak feto nia bei-oan prinsipál. Bei-oan neʼe tenke mai husi Abraão nia liña jerasaun.—Gén 22:​15-18. w22.07 p. 15-16 par. 6-8

Jeová nia prezente, Bíblia, mak nakonu ho ninia matenek. Bíblia nia konsellu bele fó influénsia diʼak no troka ema nia moris. Bainhira Moisés hakerek livru lima primeiru iha Bíblia, nia hatete ba Maromak nia povu Izraél: “Liafuan sira-neʼe laʼós liafuan mamuk deʼit, maibé neʼe mak moris ba imi.” (Deut 32:47) Ema neʼebé halo tuir Eskritura sira bele hetan moris neʼebé kontente no susesu. (Sal 1:​2, 3) Maski Bíblia hakerek tinan barak liubá, maibé neʼe nafatin iha kbiit atu ajuda ema iha moris neʼebé diʼak liu. Prinsípiu sira iha Bíblia sempre diʼak no ajuda ema oioin neʼebé moris iha tempu neʼebé la hanesan. Bainhira ita lee Bíblia no medita kona-ba buat neʼebé ita aprende, Maromak uza ninia espíritu santu atu ajuda ita hatene oinsá ita bele aplika Bíblia nia matadalan. (Sal 119:27; Mal 3:16; Ebr 4:12) Sin, Jeová neʼebé dirije ema atu hakerek Bíblia mak moris no nia prontu atu ajuda Ita. Ida-neʼe book tebes Ita atu lee Bíblia! w23.02 p. 3 par. 5-6

Apokalipse kapítulu 13 esplika liután katak ulun númeru hitu neʼe ka Bretaña ho Estadus Unidus nia ukun, hatudu hahalok hanesan animál fuik ho “dikur rua hanesan bibi-malae oan nia dikur, maibé nia hahú koʼalia hanesan samea boot ida”. Animál fuik neʼe “hatudu sinál boot sira, no nia mós halo ahi tun husi lalehan ba rai iha ema nia oin”. (Apok 13:​11-15) Apokalipse kapítulu 16 no 19 bolu animál fuik neʼe nuʼudar “profeta falsu”. (Apok 16:13; 19:20) Daniel temi buat neʼebé besik atu hanesan, katak Bretaña ho Estadus Unidus nia ukun sei “halakon buat barak”. (Dan 8:​19, 23, 24) Neʼe akontese duni durante Funu Mundiál Segundu. Bretaña no Estadus Unidus uza bomba nukleár rua neʼebé sientista sira husi rai rua neʼe halo hamutuk, no ikusmai neʼe halo Funu Mundiál Segundu remata. Neʼe hanesan Bretaña ho Estadus Unidus nia ukun “halo ahi tun husi lalehan ba rai”. w22.05 p. 10 par. 9