Maiu

João mós haree “ema-lubun boot”. La hanesan ho ema naʼin-144.000, Bíblia la fó sai ema naʼin-hira mak sai parte ba ema lubun boot. Ita hatene saida kona-ba grupu neʼe? Apokalipse 7:14 hatete: “Sira mak ema neʼebé liu terus boot. Sira fase ona sira-nia roupa no halo mutin ona sira-nia roupa ho Bibi-Oan nia raan.” Depois ema-lubun boot moris liu terus boot, sira sei moris iha rai no hetan bensaun furak oioin. (Sal 37:​9-11, 27-29; Prov 2:​21, 22; Apok 7:​16, 17) Maski ita iha esperansa atu bá lalehan ka moris ba nafatin iha rai, ita presiza fiar katak ita sei haree profesia iha Apokalipse kapítulu 7 sai loos. Iha tempu neʼebá, Maromak nia atan grupu rua neʼe sei kontente tebes. Ita sei haksolok tebes tanba ita hili atu apoia Jeová nia ukun. w22.05 p. 16 par. 6-7

Baibain Ita halo orasaun atu husu matenek bainhira Ita hakarak atu halo desizaun importante ruma tanba Ita hatene katak Ita presiza matenek husi Jeová. (Tgo 1:5) Liurai Salomão hakerek: “Matenek mak buat neʼebé importante liu.” (Prov 4:7) Salomão la koʼalia kona-ba ema nia matenek. Nia koʼalia kona-ba matenek neʼebé mai husi Maromak Jeová. Maibé matenek husi Jeová bele ajuda ita kuandu hasoru problema ka lae? Sin, bele duni. Dalan ida atu bele sai matenek liután mak hodi estuda no aplika konsellu husi mane naʼin-rua neʼebé iha naran-boot tanba sira-nia matenek. Primeiru, hanoin kona-ba Salomão. Bíblia hatete katak “Maromak fó matenek barak tebes no fó kbiit atu tetu didiʼak ba Salomão”. (1 Reis 4:29) Tuirmai, hanoin kona-ba Jesus neʼebé matenek liu ema hotu. (Mt 12:42) Bíblia fó-hatene nanis kona-ba Jesus hodi dehan: “Jeová nia espíritu sei tun ba nia, tan neʼe mak nia sei hatudu matenek no komprende ho didiʼak.”—Isa 11:2. w22.05 p. 20 par. 1-2

Maski ita idade ona, ita mós bele halo planu no kumpre ida-neʼe. Hanoin toʼok kona-ba irmán Beverley neʼebé idade 75. Nia iha problema saúde neʼebé halo nia susar atu laʼo. Nia hakarak hola parte iha kampaña Memoriál. Tan neʼe, nia halo planu espesífiku. Bainhira irmán Beverley kumpre ninia planu neʼe, nia sente kontente tebes. Ninia ezemplu book ema seluk atu hakaʼas an liután iha serbisu haklaken. Jeová hafolin tebes serbisu hotu neʼebé irmaun-irmán ferik-katuas sira halo, maski sira-nia situasaun mak limitadu. (Sal 71:17) Halo planu neʼebé Ita bele kumpre. Haburas hahalok neʼebé halo Jeová kontente. Aprende skill neʼebé Maromak nia organizasaun presiza. Buka dalan oioin atu ajuda liután irmaun-irmán sira. Hanesan Timóteo, Jeová sei haraik bensaun ba ita no ‘ema hotu bele haree ho momoos oinsá Ita laʼo ba oin’.—1 Tim 4:15. w22.04 p. 27 par. 18-19

Oinsá se Ita hakaʼas an ona, maibé Ita-nia oan ida dehan katak nia lakohi serbí Jeová? Keta hanoin katak Ita falla nuʼudar inan ka aman. Jeová fó ba ita hotu, inklui ita-nia oan, liberdade atu hili. Keta lakon esperansa katak loron ida nia sei serbí fali Jeová. Hanoin-hetan ai-knanoik kona-ba oan-mane neʼebé sai husi uma. (Lc 15:​11-19, 22-24) Mane joven neʼe halo buat oioin neʼebé la diʼak. Maibé ikusmai nia fila fali. Inan-aman sira, imi iha priviléjiu boot atu haboot jerasaun foun neʼebé sei adora Jeová. (Sal 78:​4-6) Neʼe la fasil. Ami gaba imi husi laran tanba imi hakaʼas an atu ajuda imi-nia oan hadomi Jeová no haboot sira tuir dixiplina no matadalan husi Jeová. Imi bele fiar katak ita-nia Aman iha lalehan sei kontente tebes ho imi.—Éf 6:4. w22.05 p. 30-31 par. 16-18

Atu bele haburas dame no unidade iha kongregasaun, ita ida-idak presiza fó buat neʼebé diʼak liu hotu ba Jeová tuir ita-nia kbiit. Hanoin toʼok kona-ba ema Kristaun sira iha apóstolu sira-nia tempu neʼebé iha abilidade no knaar oioin. (1 Kor 12:​4, 7-11) Maski nuneʼe, sira la kompete malu ka haketak malu. Paulo anima sira ida-idak atu “hametin Kristu nia isin-lolon”. Paulo hakerek ba ema Kristaun iha Éfeso: “Kuandu parte ida-idak halo ninia serbisu ho loloos, ida-neʼe ajuda isin-lolon atu sai boot hodi isin-lolon tomak sai metin iha domin.” (Éf 4:​1-3, 11, 12) Bainhira irmaun-irmán sira-neʼe halo tuir Paulo nia konsellu, neʼe ajuda sira atu haburas dame no unidade, no ita mós bele haree ida-neʼe iha kongregasaun Kristaun ohin loron. Hakaʼas an atu la kompara ita-nia an ho ema seluk. Maibé aprende husi Jesus no hakaʼas an atu banati-tuir ninia hahalok diʼak sira. Ita bele fiar katak Jeová sei ‘nunka hatudu hahalok aat hodi haluha Ita-nia serbisu’. (Ebr 6:10) Nia hafolin serbisu hotu neʼebé ita halo ho laran tomak. w22.04 p. 14 par. 15-16

Ita kontente atu hatene katak ita la iha responsabilidade atu deside se ema neʼebé halo sala merese hetan perdua husi Jeová ka lae. Jeová mak sei deside. Maibé iha buat ida neʼebé ita bele deside. Saida mak neʼe? Dala ruma ema neʼebé halo sala hasoru ita, husu deskulpa no husu ita atu perdua nia. Maibé dala ruma, nia la husu deskulpa. Maski nuneʼe, ita bele hili atu perdua nia no koko atu la rai hirus ba nia. Klaru katak presiza tempu no hakaʼas an atu halo nuneʼe, liuliu se ema neʼe hakanek duni ita-nia laran. Livru Haklaken 15 Setembru 1994 hatete: “Se ita fó perdua ba ema neʼebé halo sala, neʼe la dehan katak ita simu deʼit ninia sala. Ema Kristaun neʼebé fó perdua, fiar katak Jeová sei tesi-lia ho loloos kona-ba situasaun neʼe. Jeová mak Juís ba lalehan no rai, no nia sei tesi-lia ho loloos iha tempu neʼebé loos.” w22.06 p. 9 par. 6-7

Jeová promete katak ohin loron nia sei halibur ema husi nasaun, suku, no língua oioin atu adora nia ho unidade. Sira mak “ema-lubun boot”. (Apok 7:​9, 10) Maski ema sira neʼebé sai parte ba grupu neʼe mai husi situasaun moris neʼebé la hanesan, maibé sira hanesan família ida neʼebé iha unidade no iha dame. (Sal 133:1; João 10:16) Sira sempre prontu atu fahe sira-nia esperansa kona-ba mundu foun ba ema hotu neʼebé hakarak rona. (Mt 28:​19, 20; Apok 14:​6, 7; 22:17) Se Ita mak parte ba ema-lubun boot, Ita hafolin tebes esperansa kona-ba mundu foun. Diabu lakohi Ita atu iha esperansa ba futuru. Nia hakarak Ita atu fiar katak Jeová sei la kumpre ninia promesa sira. Se Satanás konsege halakon ita-nia esperansa, ita sei lakon aten-brani no karik para atu serbí Jeová. w22.06 p. 20-21 par. 2-3

Ita-nia esperansa ajuda ita atu kalma nafatin bainhira ita hasoru problema sira tanba ita fiar katak buat hotu sei sai diʼak. Hanoin-hetan, Jesus fó avizu nanis katak ema sei haterus ita. (João 15:20) Tan neʼe hodi hanoin kleʼan kona-ba ita-nia promesa ba futuru bele ajuda ita atu kontinua serbí Jeová. Esperansa ajuda Jesus atu nafatin laran-metin, maski nia hatene katak nia sei mate iha dalan neʼebé aat tebes. Iha loron Pentekostes tinan 33 EC, apóstolu Pedro temi fali profesia husi livru Salmo neʼebé esplika Jesus nia sentimentu kalma no konfiansa: “Haʼu sei moris ho esperansa, tanba Ita sei la husik hela haʼu iha rate laran, no mós Ita sei la husik Ita-nia atan neʼebé laran-metin ba Ita atu ninia isin sai dodok. . . . Ita halo haʼu nakonu ho ksolok iha Ita-nia oin.” (Após 2:​25-28; Sal 16:​8-11) Jesus iha esperansa neʼebé metin katak Maromak sei halo nia moris-hiʼas no nia sei hasoru fali ninia Aman iha lalehan.—Ebr 12:​2, 3. w22.10 p. 25 par. 4-5

Iha situasaun ida, apóstolu Tiago no João haruka sira-nia inan atu husu Jesus fó ba sira pozisaun importante iha Maromak nia Ukun. (Mt 20:​20, 21) Tiago no João hatudu hahalok foti an no hakarak sai ema neʼebé importante liu. (Prov 16:18) Maibé laʼós deʼit João no Tiago mak hatudu hahalok la diʼak iha tempu neʼebá. Haree saida mak apóstolu sira seluk halo. Bíblia hatete: “Kuandu sira naʼin-sanulu seluk rona kona-ba neʼe, sira sai hirus ba maun-alin naʼin-rua neʼe.” (Mt 20:24) Ita bele imajina katak Tiago no João diskute malu makaʼas ho apóstolu sira seluk. Saida mak Jesus halo iha situasaun neʼe? Jesus la sai hirus. Nia la dehan katak nia sei buka apóstolu neʼebé diʼak liu, neʼebé haraik an liu no mós sempre hatudu domin ba malu. Duké halo nuneʼe, Jesus koʼalia ba sira ho pasiénsia tanba nia hatene katak sira hakarak atu halo buat neʼebé diʼak. (Mt 20:​25-28) Nia sempre hatudu laran-diʼak ba sira. w23.03 p. 28-29 par. 10-13

Ita kumpre ona buat diʼak oioin. Karik durante tinan barak, Ita estuda Bíblia ho badinas. Rezultadu mak Ita fiar metin katak Bíblia mak Maromak nia Liafuan. Ita mós koñese no hadomi Maromak neʼebé dirije ema hakerek Bíblia. No tanba Ita hadomi tebes Jeová, Ita dedika an no hetan batizmu. Ita halo desizaun neʼebé diʼak tebes. Nuʼudar joven, karik Ita-nia fiar hetan koko iha dalan oioin bainhira Ita laʼo ba oin no hetan batizmu. Bainhira Ita sai maduru liután iha dalan espirituál, Ita mós sei hasoru koko foun. Satanás sei koko atu halo fraku Ita-nia domin ba Jeová no mós koko book Ita atu la serbí tan Jeová. (Éf 4:14) Ita labele husik ida-neʼe akontese. Saida mak bele ajuda Ita atu laran-metin nafatin ba Jeová no kumpre Ita-nia dedikasaun ba nia? Ita presiza kontinua “laʼo ba oin” hodi sai ema Kristaun neʼebé maduru.—Ebr 6:1. w22.08 p. 2 par. 1-2

Iha família laran, ema ida-idak presiza rai didiʼak informasaun privadu kona-ba família. Porezemplu, karik laʼen Kristaun ida sente katak ninia feen iha toman ida neʼebé komik. Nia sei la konta ida-neʼe ba ema seluk no hamoe ninia feen. Nia hadomi ninia feen no lakohi hakanek ninia feen nia laran. (Éf 5:33) Importante tebes atu inan-aman hanoin-hetan katak sira mós presiza hatudu respeitu ba sira-nia oan neʼebé joven. Sira labele hamoe sira-nia oan hodi fó sai oan sira-nia sala ba ema seluk. (Kol 3:21) Oan sira mós presiza aprende atu hatudu matenek no la konta ba ema seluk buat neʼebé bele hamoe membru ba família. Bainhira ema ida-idak iha família hakaʼas an atu la fahe informasaun privadu ba ema seluk, neʼe sei halo ema hotu iha família besik ba malu liután. w22.09 p. 10 par. 9

Bainhira koʼalia ho Job, Jeová fó sai kona-ba ninia matenek no domin ba ninia kriatura sira. Nia koʼalia kona-ba animál oioin. (Job 38:​1, 2; 39:​9, 13, 19, 27; 40:15; 41:​1, 2) Jeová mós uza mane joven ida neʼebé laran-metin naran Eliú atu hametin no fó kmaan ba Job. Eliú hatete ba Job katak Jeová sempre fó kolen ba ninia atan sira neʼebé tahan susar ho laran-metin. Maibé Jeová mós uza Eliú atu fó konsellu ba Job. Eliú fó-hanoin Job katak nia mak kiʼik deʼit se kompara ho Jeová neʼebé kria universu, no neʼe ajuda Job atu tau fokus ba buat neʼebé importante liu no la tau fokus deʼit ba ninia an rasik. Jeová mós haruka Job atu halo orasaun kona-ba ninia belun naʼin-tolu neʼebé halo sala. (Job 42:​8-10) Oinsá Jeová ajuda ita ohin loron bainhira ita hasoru susar? Jeová la koʼalia diretamente ba ita hanesan nia halo ba Job. Maibé Jeová koʼalia ba ita liuhusi Bíblia.—Rom 15:4. w22.08 p. 11 par. 10-11

Irmaun-irmán sira iha kongregasaun Roma mak ema Judeu no mós ema husi nasaun oioin. Bainhira Moisés nia Ukun-Fuan la vale ona, ema neʼebé adora Jeová la presiza halo tuir tan ukun-fuan kona-ba la han ai-han ruma. (Mc 7:19) Hahú husi tempu neʼe, ema Judeu balu neʼebé sai ona ema Kristaun deside atu han ai-han naran deʼit. Maibé sira seluk lakohi. Situasaun neʼe halo kongregasaun lakon unidade. Apóstolu Paulo fó-hanoin sira katak importante atu haburas dame. Paulo ajuda maluk fiar-naʼin sira atu haree rezultadu aat neʼebé bele akontese ba sira no ba kongregasaun bainhira mosu haksesuk malu. (Rom 14:​19, 20) Paulo mós prontu atu troka ninia hahalok hodi la halo ema seluk sidi. (1 Kor 9:​19-22) Ita mós bele hametin malu no mantein dame se ita la haksesuk malu kona-ba buat neʼebé ema ida-idak bele deside rasik. w22.08 p. 22 par. 7

Baibain se ita halo planu atu aumenta ita-nia serbisu ba Jeová, ita sei hakaʼas an atu kumpre ida-neʼe. Ita mós presiza hakaʼas an atu hatudu hahalok loos. Jeová sei kontinua ajuda ita ho pasiénsia nuʼudar ita laʼo ba oin. (Sal 84:​5, 7) Ho domin, Jeová fó-hanoin ita katak la susar atu halo buat neʼebé loos tuir ninia haree. (1 João 5:3) Tuir loloos, ida-neʼe fó protesaun ba ita loroloron. Hanoin kona-ba ekipamentu funu nian neʼebé apóstolu Paulo temi. (Éf 6:​14-18) Parte ida-neʼebé mak proteje soldadu nia hirus-matan? Neʼe mak ‘hahalok loos neʼebé hanesan besi taka hirus-matan’, no neʼe reprezenta Jeová nia matadalan kona-ba buat neʼebé loos. Hanesan besi proteje soldadu nia hirus-matan, Jeová nia matadalan kona-ba buat neʼebé loos bele proteje ita-nia laran. Tan neʼe, importante atu ita-nia ekipamentu funu nian tenke inklui hahalok loos.—Prov 4:23. w22.08 p. 29 par. 13-14

Durante tinan rihun ba rihun, Maromak nia Liafuan fó sai matadalan diʼak ba ema sira neʼebé laran-metin. Oinsá neʼe bele akontese? Jeová ajuda ema atu halo kopia ba testu sagradu. Maski sira mak ema neʼebé la perfeitu, maibé sira halo kopia ho kuidadu tebes. Porezemplu, matenek-naʼin ida koʼalia kona-ba Eskritura Lian Ebraiku hodi hakerek: “Ita fiar metin katak la iha livru antigu seluk neʼebé kopia ho loloos hanesan livru neʼe.” Tan neʼe ita bele iha konfiansa katak buat neʼebé ita lee iha Bíblia fó sai Jeová nia hanoin. Jeová mak Hun ba “prezente diʼak ida-idak no prezente hotu neʼebé perfeitu”. (Tgo 1:17) Prezente diʼak ida neʼebé Maromak fó mai ita mak Bíblia. Bainhira ema fó prezente ida ba ita, baibain ida-neʼe hatudu sai oinsá nia koñese no hatene ita-nia presiza. Nuneʼe mós ho Bíblia. Bainhira ita ezamina prezente neʼe, ita bele aprende buat barak kona-ba Jeová. Ita aprende katak nia hatene didiʼak ita no mós ita-nia presiza. w23.02 p. 2-3 par. 3-4

Ita hotu sei kontente tebes bainhira ema komesa hetan moris-hiʼas iha rai durante Kristu nia Ukun ba Tinan Rihun Ida. Ema hotu hakarak tebes atu hasoru fali sira-nia família no belun neʼebé mate ona. Jeová mós hakarak ida-neʼe. (Job 14:15) Imajina toʼok ksolok neʼebé ema hotu sente bainhira hasoru fali sira-nia família no belun sira. “Ema neʼebé hatudu hahalok loos”, sira-nia naran hakerek ona iha livru moris nian no sei “moris hiʼas atu hetan moris rohan-laek”. (Após 24:15; João 5:29) Karik lakleur depois Armagedon, ita-nia família ka belun sei hetan moris-hiʼas. “Ema neʼebé hatudu hahalok la loos” katak sira neʼebé la iha oportunidade atu koñese Jeová no la serbí Jeová antes sira mate sei “moris hiʼas atu hetan tesi-lia”. Ema neʼebé hetan moris-hiʼas presiza simu hanorin. (Isa 26:9; 61:11) Tan neʼe ita sei halaʼo programa hanorin nian neʼebé boot liu iha ema nia istória.—Isa 11:10. w22.09 p. 20 par. 1-2

Jeová hatudu ona katak nia iha podér boot liu fali ukun-naʼin barak neʼebé serbisu hamutuk. Nia defende ema Izraél no ajuda sira atu manán rai barak iha Rai neʼebé Maromak Promete. (Jos 11:​4-6, 20; 12:​1, 7, 24) Dala barak Jeová hatudu katak nia mak Ida neʼebé Aas Liu. Maromak halo Liurai Nabukodonozór husi Babilónia sai bulak bainhira liurai neʼe gaba an kona-ba ninia “forsa no kbiit” no mós ninia “glória no kmanek” duké haraik an hodi rekoñese katak Jeová mak merese simu hahiʼi. Kuandu Nabukodonozór sai diʼak fali, nia “fó hahiʼi ba Maromak neʼebé Aas Liu Hotu” no rekoñese katak Jeová nia “ukun mak rohan-laek”. Nia hatutan tan: “La iha ema ida mak bele hapara nia.” (Dan 4:​30, 33-35) Ema neʼebé hakerek Salmo ida dehan: “Ksolok ba nasaun neʼebé adora Jeová nuʼudar ninia Maromak, povu neʼebé Nia hili ona atu sai Ninian.” (Sal 33:12) Ita iha razaun neʼebé loos atu kontinua kaer metin ita-nia integridade ba Jeová! w22.10 p. 15-16 par. 13-15

Tanba profesia barak sai loos ona, neʼe hametin ita-nia fiar katak Maromak nia promesa sira kona-ba futuru mós sei sai loos. Ita sente hanesan ema ida neʼebé hakerek salmo no halo orasaun ba Jeová hodi hatete: “Haʼu hakarak tebes hetan salvasaun husi Ita, tanba haʼu tau esperansa ba Ita-nia liafuan.” (Sal 119:81) Jeová hatudu laran-diʼak hodi fó ita “futuru kapás no esperansa” liuhusi Bíblia. (Jer 29:11) Ita-nia esperansa ba futuru la depende ba ema nia hakaʼas an, maibé bazeia ba Jeová nia promesa sira. Mai ita kontinua hametin ita-nia fiar ba Maromak nia Liafuan liuhusi estuda profesia iha Bíblia. Razaun ida tan atu tau fiar ba Bíblia mak hodi haree rezultadu diʼak neʼebé ema hetan tanba halo tuir Bíblia nia matadalan. (Sal 119:​66, 138) Porezemplu, feen-laʼen neʼebé uluk besik atu soe malu, agora moris hamutuk ho kontente tanba halo tuir Bíblia nia matadalan. Sira-nia oan sente kontente tanba iha inan-aman Kristaun neʼebé tau matan no hadomi sira.—Éf 5:​22-29. w23.01 p. 5 par. 12-13

Hanoin kona-ba oinsá Ita rasik hetan ona benefísiu husi promesa sira iha Bíblia neʼebé sai loos ona. Porezemplu, Jesus promete katak ninia Aman sei tau matan ba Ita-nia presiza. (Mt 6:​32, 33) Jesus mós hatete katak Jeová sei fó ba Ita espíritu santu bainhira Ita husu ida-neʼe ba nia. (Lc 11:13) Jeová kumpre duni ninia promesa sira-neʼe. Karik Ita bele hanoin kona-ba promesa seluk neʼebé Jeová kumpre no lori benefísiu mai Ita. Porezemplu, nia promete atu fó perdua ba Ita, fó kmaan ba Ita, no fó ai-han espirituál ba Ita. (Mt 6:14; 24:45; 2 Kor 1:3) Bainhira Ita hanoin kleʼan kona-ba buat neʼebé Maromak halo ona ba Ita, Ita-nia esperansa kona-ba buat neʼebé Maromak sei halo iha futuru sai metin liután. Ita fiar metin katak Jeová sei kumpre ninia promesa sira. Ema ida neʼebé hakerek Salmo hatete: “Ksolok ba ema neʼebé . . . tau esperansa ba ninia Maromak Jeová . . . Ida neʼebé sempre laran-metin.”—Sal 146:​5, 6. w22.10 p. 27 par. 15; p. 28 par. 17

Profesia kona-ba halaʼo fali adorasaun loos mós aplika ba ita ohin loron ka lae? Sin. Iha dalan oinsá? Husi tinan 1919 EC, ema millaun ba millaun sai livre husi Babilónia Boot, ka relijiaun falsu iha mundu tomak. Jeová dirije sira ba fatin neʼebé diʼak liu fali Rai neʼebé Maromak Promete ba ema Izraél. Jeová dirije sira ba paraízu espirituál. (Isa 51:3; 66:8) Husi tinan 1919 EC, ema neʼebé iha esperansa atu bá lalehan komesa tama iha paraízu espirituál. Ema neʼebé iha esperansa atu moris iha rai ka “bibi-malae seluk” mós tama ona ba paraízu espirituál no hetan ona bensaun barak husi Jeová. (João 10:16; Isa 25:6; 65:13) Ita bele hetan paraízu espirituál iha fatin oioin iha mundu tomak. Entaun maski ita hela iha fatin neʼebé deʼit, ita bele sai parte ba paraízu espirituál naran katak ita apoia adorasaun loos. w22.11 p. 11-12 par. 12-15

Susar ba ita atu komprende katak Maromak “iha ba nafatin” ka lae? (Isa 40:28) Ema barak mós sente hanesan neʼe. Eliú hatete: “[Maromak nia] tinan sira barak tebes toʼo ema labele komprende.” (Job 36:​26, nota) Maibé tanba deʼit susar ba ita atu komprende, la dehan katak neʼe la loos. Porezemplu, maski ita la komprende buat hotu kona-ba eletrisidade, maibé neʼe la dehan katak eletrisidade la eziste. Nuneʼe mós, maski ita sente susar atu komprende ho loloos oinsá mak Jeová sempre iha no sei kontinua iha, maibé neʼe la dehan katak Maromak labele moris tinan ba tinan ba nafatin. Lia-loos kona-ba ita-nia Kriadór la depende ba ita bele ka labele komprende kona-ba nia. (Rom 11:​33-36) Nia iha ona antes universu neʼe eziste, inklui loro-matan no fitun sira. Sin, Jeová iha ona antes nia “nahe lalehan hanesan hena”.—Jer 51:15. w22.12 p. 2-3 par. 3-4

Dala ruma ita presiza halo orasaun atu reprezenta ema seluk. Porezemplu, irmán ida neʼebé dirije estuda Bíblia karik husu irmán neʼebé akompaña nia atu halo orasaun. Irmán neʼe karik la koñese didiʼak estudante Bíblia. Tan neʼe diʼak ba nia atu halo orasaun bainhira remata estuda Bíblia. Hodi halo nuneʼe, nia iha tempu uitoan atu bele koñese estudante no temi estudante nia presiza bainhira halo orasaun. Irmaun ida karik presiza halo orasaun iha reuniaun atu organiza serbisu haklaken ka iha reuniaun kongregasaun nian. Se nuneʼe, irmaun neʼe presiza hanoin-hetan reuniaun neʼe nia objetivu. Orasaun laʼós dalan atu fó konsellu ka fó avizu ba kongregasaun. Baibain iha reuniaun sira, minutu lima uza ba knananuk no orasaun. Tan neʼe irmaun neʼebé hatoʼo orasaun labele uza liafuan barabarak, liuliu bainhira halo orasaun atu loke reuniaun.—Mt 6:7. w22.07 p. 24-25 par. 17-18

Jesus fó-hatene nanis katak durante loron ikus sira, sei mosu moras-peste “iha fatin oioin”. (Lc 21:11) Oinsá hatene ida-neʼe bele lori dame ba ita? Ita sei la hakfodak bainhira moras-peste ida mosu. Ita hatene katak Jesus nia liafuan sira sai loos duni. Tan neʼe diʼak atu halo tuir Jesus nia konsellu neʼebé nia fó ba sira neʼebé hela iha sistema neʼe nia rohan: “Kuidadu bá katak imi la sai taʼuk.” Bainhira mosu moras-peste, karik neʼe bele afeta Ita-nia atividade sira, maibé keta husik ida-neʼe hanetik Ita atu estuda mesak ka tuir reuniaun. Esperiénsia husi ita-nia publikasaun no mós vídeo sira fó-hanoin Ita katak irmaun-irmán sira mós kontinua serbí Jeová ho laran-metin maski hasoru problema neʼebé hanesan ho Ita. w22.12 p. 17 par. 4, 6

Jacob hatudu ho klaru katak nia hadomi tebes ninia oan-mane José. (Gén 37:​3, 4) Rezultadu mak Jacob nia oan-mane sira seluk sai laran-moras ba José. Bainhira iha oportunidade, sira faʼan José ba negósiu-naʼin sira husi Midian. Negósiu-naʼin sira-neʼe lori José ba rai-Ejitu neʼebé dook no faʼan nia ba xefe ba Faraó nia guarda sira naran Potifar. José nia moris troka derrepente. Uluk José mak oan neʼebé ninia aman hadomi tebes, maibé agora nia sai fali atan iha rai-Ejitu. (Gén 39:1) Dala ruma ita hetan susar neʼebé “baibain ema seluk mós hetan”. (1 Kor 10:13) Ka karik ita hetan susar tanba ita mak Jesus nia dixípulu. Porezemplu, karik ema goza, kontra ka fó-terus ba ita tanba ita-nia fiar. (2 Tim 3:12) Jeová bele ajuda ita atu tahan susar naran deʼit. w23.01 p. 14-15 par. 3-4

Dala ruma, ita sente katak ita presiza koʼalia ho maluk fiar-naʼin neʼebé hakanek ita-nia laran. Maibé antes halo nuneʼe, diʼak atu husu ba ita-nia an pergunta sira hanesan: ‘Haʼu komprende didiʼak buat neʼebé akontese ka lae?’ (Prov 18:13) ‘Nia iha duni intensaun atu hakanek haʼu-nia laran ka lae?’ (Ecle 7:20) ‘Haʼu mós halo ona sala neʼebé hanesan ka lae?’ (Ecle 7:​21, 22) ‘Se haʼu koʼalia ho nia kona-ba neʼe, neʼe sei hadiʼa situasaun ka halo situasaun sai aat liu?’ Bainhira ita uza tempu atu hanoin kleʼan kona-ba pergunta sira-neʼe, karik ita sente katak diʼak liu hatudu domin no haluha tiha sala neʼebé ita-nia maluk halo mai ita. Ita ida-idak hatudu katak ita mak Jesus nia dixípulu bainhira ita hatudu domin neʼebé la hanoin an deʼit ba ita-nia irmaun-irmán sira maski sira la perfeitu. Bainhira ita halo nuneʼe, neʼe sei ajuda ema seluk atu hatene relijiaun neʼebé loos no hakarak adora Jeová. Mai ita hakaʼas an atu kontinua hatudu domin ba malu nuʼudar ema Kristaun neʼebé loos. w23.03 p. 31 par. 18-19

Bíblia ajuda ita atu komprende katak Jeová nia hahalok furak liu mak domin. Tanba Jeová hadomi ita, nia la fó sai informasaun barak liu fali buat neʼebé ita presiza hatene atu bele serbí nia. (João 21:25) Jeová mós hatudu domin mai ita hodi komunika ba ita ho respeitu. Iha Bíblia, Jeová la fó sai lista naruk kona-ba regra oioin ka fó sai buat neʼebé ita bele halo ka labele halo iha situasaun hotu iha ita-nia moris. Duké halo nuneʼe, nia book ita atu hadomi no halo tuir nia ho laran liuhusi ema nia istória, profesia no matadalan sira iha Bíblia atu ajuda ita halo desizaun neʼebé diʼak. Bíblia mós hatudu katak Jeová hanoin tebes ita. Oinsá? Bíblia nakonu ho ema nia istória sira neʼebé ita bele komprende tanba ema iha istória sira-neʼe mak “iha sentimentu hanesan ita”. (Tgo 5:17) No importante liu, bainhira ita haree oinsá Jeová tau matan didiʼak ba ema neʼebé hanesan ita, neʼe ajuda ita komprende ho didiʼak katak “Jeová iha domin neʼebé boot tebes no laran-sadiʼa”.—Tgo 5:11. w23.02 p. 6 par. 13-15

Livru ikus iha Bíblia hahú hodi hatete: “Tuirmai neʼe mak liafuan kona-ba buat neʼebé Jesus Kristu hatudu sai ona. Jesus simu buat sira-neʼe husi Maromak, atu nuneʼe nia bele hatudu sai ba Maromak nia atan sira kona-ba buat neʼebé lakleur tan tenke akontese.” (Apok 1:1) Tan neʼe ita hakarak hatene kona-ba akontesimentu iha mundu no oinsá ida-neʼe karik kumpre Bíblia nia profesia. No karik ita mós hakarak atu koʼalia hamutuk ho maluk sira kona-ba akontesimentu sira-neʼe. Maibé bainhira ita koʼalia kona-ba Bíblia nia profesia, ita labele siʼik deʼit saida mak sei akontese. Tanbasá? Ita lakohi fó sai buat neʼebé bele halakon unidade iha kongregasaun. Porezemplu, karik ita rona ulun-naʼin sira koʼalia kona-ba oinsá sira sei halakon funu ruma no lori dame no hakmatek. Duké siʼik deʼit katak sira-nia liafuan kumpre profesia iha 1 Tesalónika 5:​3, ita presiza buka-hatene informasaun foun liu husi Jeová nia organizasaun. Bainhira ita-nia diskusaun ho maluk sira bazeia ba ita-nia publikasaun sira, ita ajuda kongregasaun atu iha unidade no “iha hanoin neʼebé hanesan”.—1 Kor 1:10; 4:6. w23.02 p. 16 par. 4-5

Tanbasá Ita hadomi Jesus Kristu? Jesus hanorin kona-ba lia-loos, hahalok haraik an no hahalok loos ka justisa. Se Ita hadomi lia-loos no justisa, klaru katak Ita mós hadomi Jesus Kristu. Hanoin toʼok kona-ba oinsá Jesus defende lia-loos no hahalok loos ho aten-brani. (João 18:37) Entaun oinsá mak Jesus hanorin Ita atu hatudu haraik an? Jesus hanorin kona-ba haraik an liuhusi ninia ezemplu. Porezemplu, nia sempre fó glória hotu ba ninia Aman no nunka buka glória ba ninia an rasik. (Mc 10:​17, 18; João 5:19) Ita sente oinsá kona-ba Jesus nia haraik an? Neʼe book Ita atu hadomi Jesus no halo tuir nia. Tanbasá Jesus hatudu haraik an? Tanba nia hadomi no banati-tuir ninia Aman neʼebé haraik an. (Sal 18:35; Ebr 1:3) Neʼe book Ita atu hadomi Jesus neʼebé banati-tuir Jeová nia hahalok ho perfeitu. w23.03 p. 3-4 par. 6-7

Bíblia koʼalia kona-ba ema grupu rua neʼebé iha oportunidade atu moris ba nafatin iha rai, neʼe mak “ema neʼebé hatudu hahalok loos” no “ema neʼebé hatudu hahalok la loos”. “Ema neʼebé hatudu hahalok loos” mak sira neʼebé serbí Jeová ho laran-metin antes sira mate. Maibé “ema neʼebé hatudu hahalok la loos” mak sira neʼebé la serbí Jeová. Tanba grupu rua neʼe sei hetan moris-hiʼas, neʼe katak sira-nia naran hakerek iha livru moris nian ka lae? Antes mate, “ema neʼebé hatudu hahalok loos” sira-nia naran hakerek ona iha livru moris nian. Maromak hamoos sira-nia naran husi livru neʼe bainhira sira mate ka lae? Lae, tanba sira kontinua “moris” iha Jeová nia memória. Jeová “laʼós Maromak ba ema neʼebé mate, maibé Maromak ba ema neʼebé moris. Ba nia sira hotu sei moris hela”. (Lc 20:38) Neʼe katak bainhira ema neʼebé hatudu hahalok loos hetan moris-hiʼas iha rai, sira-nia naran nafatin hakerek iha livru moris nian, maibé seidauk permanente.—Lc 14:14. w22.09 p. 16 par. 9-10

Jeová hakarak ema primeiru atu haksolok ho ninia kriasaun. Bainhira Maromak kria Adão, Maromak fó ba nia paraízu furak atu hela no fó knaar ba nia atu tau matan no halo luan paraízu neʼe. (Gén 2:​8, 9) Imajina toʼok Adão nia ksolok bainhira nia haree fini sira moris no ai-funan sira buras. Adão iha duni priviléjiu furak atu tau matan ba jardín Eden! Jeová mós husu Adão atu fó naran ba animál oioin. (Gén 2:​19, 20) Jeová bele fó rasik naran ba animál ida-idak, maibé duké halo nuneʼe, nia fó knaar neʼe ba Adão. Klaru katak antes Adão fó naran ba animál sira, nia haree didiʼak animál sira-neʼe nia modelu no jeitu. Ita bele fiar katak Adão kontente ho knaar neʼe. Neʼe ajuda nia atu komprende liután katak Jeová mak matenek no ninia kriasaun sira mak furak no kmanek. w23.03 p. 15 par. 3

Bíblia fó-hatene nanis katak estátua nia ain parte kraik neʼebé reprezenta Bretaña ho Estadus Unidus mak ukun boot ida ikus. (Dan 2:​31-33) La iha ema nia ukun ida seluk neʼebé sei troka ukun neʼe. Maromak nia Ukun mak sei halakon ukun boot neʼe hamutuk ho ema nia governu sira seluk iha funu Armagedon. (Apok 16:​13, 14, 16; 19:​19, 20) Oinsá profesia neʼe afeta ita? Daniel nia profesia fó sai evidénsia seluk tan neʼebé hatudu katak ita moris iha tempu nia rohan. Maizumenus tinan 2.500 liubá, Daniel fó-hatene nanis katak depois Babilónia nia ukun, sei mosu ukun boot haat seluk neʼebé sei domina fatin sira neʼebé Maromak nia povu barak hela bá. Nia mós fó sai katak Bretaña ho Estadus Unidus sei sai nuʼudar ukun ida ikus. Neʼe fó ita kmaan no esperansa katak lakleur tan Maromak nia Ukun sei halakon ema nia governu hotu no sei ukun mundu tomak. w22.07 p. 4 par. 9; p. 5 par. 11-12