Juñu

Job iha relasaun diʼak ho Jeová. Nia iha família boot neʼebé kontente no nia mós riku tebes. (Job 1:​1-5) Maibé iha loron ida deʼit nia laran, Job lakon buat barak. Primeiru, nia lakon ninia rikusoin. (Job 1:​13-17) Tuirmai, ninia oan hotu mate. Imajina toʼok triste neʼebé Job no ninia feen sente bainhira hatene katak sira-nia oan naʼin-sanulu hotu mate. Tan neʼe, Job lees ninia roupa hodi hatudu katak nia triste tebes no nia hakneʼak. (Job 1:​18-20) Tuirmai Satanás fó moras ba Job no neʼe hamoe Job. (Job 2:​6-8) Antes neʼe, ema respeitu tebes Job no ema mai atu buka matadalan husi nia. (Job 29:​7, 8, 21) Agora sira lakohi liga nia. Ninia família, belun no mós atan sira abandona nia.—Job 19:​13, 14, 16. w22.06 p. 21 par. 5-6

Depois hetan tiha batizmu, ita hotu presiza halo tuir matadalan neʼebé apóstolu Paulo fó sai ba ema Kristaun iha Éfeso. Nia anima sira atu sai ema Kristaun neʼebé maduru. (Éf 4:13) Sira presiza kontinua laʼo ba oin. Klaru katak Ita hadomi tebes Jeová. Maibé Ita bele halo Ita-nia domin ba Jeová sai boot liután. Paulo halo orasaun atu ema Kristaun iha Filipe bele halo sira-nia domin “sai boot liután”. Oinsá? Iha Filipe 1:​9, apóstolu Paulo fó sai dalan ida. Neʼe mak liuhusi hetan “koñesimentu neʼebé loos no komprende Maromak nia hakarak ho didiʼak”. Bainhira ita koñese Jeová ho diʼak liután, ita-nia domin ba nia sai boot liután no ita sei hafolin liután ninia hahalok no ninia dalan sira. Ita hakarak atu halo nia kontente no lakohi hakanek ninia laran. Ita hakaʼas an atu komprende ninia hakarak no halo tuir ida-neʼe. w22.08 p. 2-3 par. 3-4

Informasaun iha livru Apokalipse laʼós ba ema jerál, maibé ba ita neʼebé serbí Maromak. Nuʼudar Maromak nia atan, ita la hakfodak katak ita hola parte atu kumpre profesia sira neʼebé hakerek iha livru neʼe. Apóstolu João fó sai kona-ba tempu neʼebé profesia sira-neʼe sai loos. Nia hatete: “Maromak nia espíritu lori haʼu ba Naʼi nia loron.” (Apok 1:10) Bainhira João hakerek liafuan sira-neʼe iha tinan 96 EC, “Naʼi nia loron” sei kleur. (Mt 25:​14, 19; Lc 19:12) Bíblia nia profesia sira hatudu katak loron neʼe hahú iha tinan 1914 kuandu Jesus sai Liurai iha lalehan. Husi tinan 1914 ba oin, profesia sira iha livru Apokalipse neʼebé mós kona Maromak nia povu, komesa sai loos. Ita moris daudaun iha “Naʼi nia loron”.—Apok 1:3. w22.05 p. 2 par. 2-3

Animál fuik no profeta falsu sei soe moris deʼit ba tasi neʼebé ahi lakan makaʼas ho enxofre. Entaun, governu sira-neʼe neʼebé sai nuʼudar Maromak nia inimigu sei lakon ba nafatin bainhira sira ukun daudaun. Tanbasá ida-neʼe importante ba ita? Nuʼudar ema Kristaun, ita tenke laran-metin ba Maromak no ninia Ukun. (João 18:36) Ita presiza neutrál nafatin kona-ba buat polítiku. Maibé dala ruma susar tebes atu neutrál nafatin tanba governu sira hakarak ita atu apoia sira ho ita-nia liafuan no hahalok. Ema neʼebé rende an no apoia governu sira-neʼe, simu marka husi animál fuik. (Apok 13:​16, 17) Maibé Jeová sei la simu ema sira-neʼe, no sira sei la hetan moris ba nafatin. (Apok 14:​9, 10; 20:4) Importante tebes ba ita ida-idak atu kontinua neutrál nafatin maski governu koko makaʼas atu obriga ita apoia sira. w22.05 p. 10-11 par. 12-13

Planu ida neʼebé Ita bele halo mak aprende skill neʼebé Jeová nia organizasaun presiza. Se ita aumenta ita-nia skill, ita bele halo buat barak liután atu serbí Jeová. Porezemplu, ita presiza serbisu-naʼin barak atu harii Betel, Salaun ba Asembleia no Reuniaun-Fatin sira. Irmaun-irmán barak aprende skill foun bainhira serbisu hamutuk ho irmaun-irmán sira neʼebé iha esperiénsia. Ohin loron, irmaun-irmán sira aprende skill neʼebé bele ajuda sira tau matan ba Salaun ba Asembleia no Reuniaun-Fatin sira. Maromak Jeová “Liurai Rohan-Laek” no Kristu Jesus “Liurai . . . ba liurai” sira kumpre buat kmanek oioin ohin loron hodi uza serbisu-naʼin sira neʼebé iha esperiénsia. (1 Tim 1:17; 6:15) Ita hakarak serbisu ho badinas no uza ita-nia skill atu fó glória ba Jeová, laʼós ba ita-nia an rasik.—João 8:54. w22.04 p. 24 par. 7, 11

Salomão riku tebetebes no nia iha moris diʼak. (1 Reis 10:​7, 14, 15) Jesus iha sasán uitoan deʼit no la iha uma rasik. (Mt 8:20) Maski nuneʼe, sira naʼin-rua iha hanoin neʼebé loos kona-ba osan no sasán tanba sira-nia matenek mai husi Maromak Jeová. Salomão rekoñese katak se ita iha osan, ita bele sosa buat neʼebé ita presiza loroloron no mós karik sosa buat balu neʼebé ita hakarak. Maski Salomão riku tebetebes, maibé nia rekoñese katak iha buat neʼebé importante liu fali osan. Porezemplu, nia hakerek: “Diʼak liu atu iha naran diʼak [ka, “reputasaun diʼak”, nota] duké iha rikusoin barak.” (Prov 22:1) Salomão mós haree katak ema neʼebé hadomi osan dala barak la kontente ho buat neʼebé sira iha. (Ecle 5:​10, 12) Nia fó avizu atu labele hanoin katak osan mak buat neʼebé importante liu tanba osan bele lakon lalais deʼit.—Prov 23:​4, 5. w22.05 p. 20-21 par. 4-5

Bainhira ita hanoin kleʼan kona-ba bensaun neʼebé ita simu agora, neʼe sei hametin ita-nia relasaun diʼak ho Jeová. No bainhira ita hanoin kleʼan kona-ba bensaun neʼebé Jeová sei haraik ba ita iha futuru, neʼe hametin ita-nia esperansa atu serbí Jeová ba nafatin iha futuru. Buat hotu neʼe sei ajuda ita atu kontinua serbí Jeová ho haksolok agora. Jeová sei “hamriik” hodi ajuda ita bainhira nia halakon mundu aat neʼe. Ita hatene katak Jeová mak “Maromak justisa nian” no nia sei halakon Satanás nia mundu iha tempu neʼebé loos. (Isa 25:9) Ita hein ho pasiénsia hamutuk ho Jeová ba loron neʼebé nia sei salva ita. Antes neʼe, mai ita hakaʼas an atu kontinua hafolin orasaun, estuda Bíblia no aplika ida-neʼe no mós hanoin kleʼan kona-ba bensaun neʼebé ita simu. Bainhira ita halo nuneʼe, Jeová sei ajuda ita tahan ho haksolok hodi adora nia. w22.11 p. 13 par. 18-19

Maski Bíblia la esplika kona-ba Timóteo nia loron batizmu, maibé ita bele imajina Timóteo nia inan Eunice sente oinsá iha loron neʼebé Timóteo hetan batizmu. (Prov 23:25) Maski susar, Eunice konsege hanorin ninia oan-mane atu hadomi Jeová no mós Jesus Kristu. Timóteo nia inan-aman tuir relijiaun neʼebé la hanesan. Ninia aman mak ema Gregu no ninia inan no mós avó-feto mak ema Judeu. (Após 16:1) Karik Eunice no Loide sai ema Kristaun bainhira Timóteo joven. Maibé ninia aman la sai ema Kristaun. Relijiaun ida-neʼebé mak Timóteo hili? Inan Kristaun sira ohin loron mós hadomi sira-nia família. No sira hakarak tebes atu ajuda sira-nia oan atu iha relasaun diʼak ho Jeová. Jeová hafolin tebes sira-nia hakaʼas an. (Prov 1:​8, 9) Jeová ajuda ona inan barak atu hanorin sira-nia oan kona-ba lia-loos. w22.04 p. 16 par. 1-3

Lakleur tan, Jeová sei “tau ninia hanoin” iha ulun-naʼin polítiku sira-nia laran atu kumpre ninia hakarak. Neʼe sei lori rezultadu saida? Ulun-naʼin sira-neʼe ka “liurai naʼin-sanulu” sei ataka relijiaun falsu no halakon sira. (Apok 17:​1, 2, 12, 16) Oinsá ita bele hatene katak Babilónia Boot besik atu lakon ona? Atu hatán ba pergunta neʼe, diʼak atu hanoin-hetan kona-ba bee husi Mota Eufrates neʼebé haleʼu no proteje sidade Babilónia antigu. Livru Apokalipse kompara ema millaun ba millaun neʼebé apoia Babilónia Boot ho bee neʼebé proteje nia. (Apok 17:15) Maibé livru Apokalipse mós fó sai katak bee neʼe sei ‘sai maran’. Neʼe hatudu katak ema barak sei la apoia tan relijiaun falsu. (Apok 16:12) Ohin loron, profesia neʼe sai loos daudaun tanba ema barak la tuir tan relijiaun falsu no sira buka resposta husi fatin seluk. w22.07 p. 5-6 par. 14-15

Bainhira ita fó perdua, ita hatudu katak ita hafolin Jeová nia laran-sadiʼa. Iha Jesus nia ai-knanoik ida, nia kompara Jeová ho liurai ida neʼebé halo livre ninia atan ida husi debe boot neʼebé atan neʼe labele selu fali. Maibé atan neʼe la hatudu laran-sadiʼa ba atan ida neʼebé debe osan uitoan deʼit husi nia. (Mt 18:​23-35) Saida mak ita aprende? Se ita hafolin Jeová nia laran-sadiʼa ba ita, neʼe sei book ita atu perdua ema seluk. (Sal 103:9) Tinan barak liubá, Livru Haklaken ida hatete: “Maski ita fó perdua beibeik ba ema seluk, maibé neʼe labele kompara ho dalan neʼebé Maromak fó perdua no hatudu laran-sadiʼa ba ita ida-idak liuhusi Kristu nia sakrifísiu.” Se ita fó perdua ba ema seluk, Jeová mós sei fó perdua ba ita. Jeová sei hatudu laran-sadiʼa ba ita se ita mós hatudu laran-sadiʼa ba ema seluk. (Mt 5:7) Jesus esplika ho klaru kona-ba neʼe bainhira nia hanorin ninia dixípulu sira kona-ba oinsá atu halo orasaun.—Mt 6:​14, 15. w22.06 p. 10 par. 8-9

Jesus mai iha rai nuʼudar ema no haleno ninia Aman nia hahalok sira ho perfeitu. (João 14:9) Tan neʼe bainhira ita aprende kona-ba Jesus, ita bele koñese no hadomi Maromak Jeová. Ita mós hetan benefísiu husi Jesus nia hanorin no mós dalan neʼebé nia dirije kongregasaun Kristaun ohin loron. Nia hanorin ita atu halaʼo ita-nia moris iha dalan neʼebé Jeová simu. Ita hotu mós bele hetan benefísiu tanba Jesus mate. Bainhira Jesus moris-hiʼas, nia entrega folin husi ninia raan nuʼudar sakrifísiu neʼebé perfeitu atu “hamoos ita-nia sala hotu”. (1 João 1:7) Agora nia mak Liurai neʼebé Kbiit Boot no sei nunka mate. Lakleur tan, Jesus sei harahun samea nia ulun. (Gén 3:15) Ita sei kontente tebes bainhira Satanás la iha tan. Maibé agora keta rende an. Ita bele tau fiar ba Maromak. Maromak sei haraik bensaun ba “nasaun sira hotu iha mundu”. w22.07 p. 18 par. 13; p. 19 par. 19

Bainhira ita halo planu, ita presiza hanoin-hetan katak ita la iha kbiit atu kontrola buat hotu iha ita-nia moris, tan neʼe ita presiza prontu atu halo mudansa tuir situasaun. Porezemplu, apóstolu Paulo ajuda atu forma kongregasaun foun iha sidade Tesalónika. Maibé ema kontra makaʼas Paulo no nia tenke husik sidade neʼe. (Após 17:​1-5, 10) Se Paulo kontinua hela iha neʼebá, nia sei tau irmaun-irmán sira-nia moris iha perigu laran. Maibé Paulo la rende an. Nia halo mudansa tuir ninia situasaun foun. Liutiha tempu balu, Paulo haruka Timóteo ba sidade Tesalónika atu tau matan ba irmaun-irmán foun sira-nia presiza espirituál. (1 Tes 3:​1, 2) Irmaun-irmán sira iha Tesalónika kontente. Ita bele aprende husi Paulo nia esperiénsia iha sidade Tesalónika. Karik ita hakaʼas an atu hetan priviléjiu ruma, maibé situasaun neʼebé ita labele kontrola mak hanetik ita atu simu priviléjiu neʼe. (Ecle 9:11) Se Ita-nia situasaun mak hanesan neʼe, sai prontu bá atu halo planu seluk neʼebé Ita bele kumpre. w22.04 p. 25-26 par. 14-15

Jeová fó kmaan mai ita hodi fó ita esperansa ba futuru. Hanoin toʼok kona-ba Bíblia nia hanorin balu neʼebé bele fó kmaan ba ita bainhira ita hasoru susar. Iha Bíblia, Jeová promete katak la iha buat ida mak bele “haketak ita husi Maromak nia domin”, inklui susar neʼebé ita hasoru daudaun. (Rom 8:​38, 39) Nia mós promete katak nia “besik ba ema hotu neʼebé bolu nia” liuhusi orasaun. (Sal 145:18) Jeová hatete katak se ita sadere ba nia, ita bele tahan hasoru susar naran deʼit no mós sente kontente. (1 Kor 10:13; Tgo 1:2) Bíblia mós fó-hanoin ita katak susar sira mak temporáriu deʼit, no badak deʼit se kompara ho moris ba nafatin neʼebé Jeová promete mai ita. (2 Kor 4:​16-18) Jeová promete katak nia sei halakon Diabu Satanás, hun ba susar hotu no mós sira neʼebé halo tuir Satanás nia hahalok aat. (Sal 37:10) Ita dekór ona eskritura balu neʼebé bele ajuda Ita tahan ka lae? w22.08 p. 11 par. 11

Karik Ita hanoin barak katak Ita labele halo tuir Jeová nia matadalan kona-ba buat neʼebé loos loroloron, ka tinan-tinan. Jeová promete katak ita-nia hahalok loos bele sai “hanesan tasi nia laloran”. (Isa 48:18) Imajina toʼok Ita hamriik iha tasi-ibun no haree laloran kontinua baku bá-mai. Bainhira haree ida-neʼe, Ita duvida katak loron ida laloran sei para atu baku bá-mai ka lae? Lae. Ita hatene katak neʼe sei nunka para. Ita bele kompara hahalok loos ho tasi nia laloran. Oinsá? Bainhira Ita presiza halo desizaun ruma, ulukliu hanoin kona-ba saida mak Jeová hakarak Ita atu halo. Tuirmai halo tuir ida-neʼe. Maski Ita presiza halo desizaun neʼebé susar, maibé Aman Jeová sei kontinua fó Ita kbiit no ajuda Ita atu nafatin halo buat neʼebé loos loroloron.—Isa 40:​29-31. w22.08 p. 30 par. 15-17

Bainhira tinan 1.000 remata, Satanás sei livre fali. Depois neʼe, nia sei koko atu lohi ema perfeitu sira. Durante koko neʼe, ema perfeitu hotu iha rai hetan oportunidade atu hatudu ho klaru sira respeitu Jeová nia naran no apoia ninia direitu atu ukun ka lae. (Apok 20:​8-10) Sira-nia desizaun mak sei determina sira-nia naran bele hakerek ho permanente iha livru moris nian ka lae. Ema balu sei la simu Jeová nia ukun hanesan Adão ho Eva. Saida mak sei akontese ba sira? Apokalipse 20:15 hatete: “Ema sira neʼebé naran la hakerek iha livru moris nian sei soe tiha ba tasi neʼebé iha ahi-lakan.” Sin, kontradór sira-neʼe sei lakon ba nafatin. Maibé ema perfeitu barak sei liu koko ikus neʼe. w22.09 p. 23-24 par. 15-16

Ema balu iha apóstolu sira-nia tempu ezije atu ema Kristaun sira neʼebé mai husi nasaun seluk atu hetan sirkunsizaun, karik sira halo ida-neʼe tan deʼit lakohi ema Judeu seluk kritika sira. (Gal 6:12) Apóstolu Paulo la konkorda ho sira, maski nuneʼe nia la ezije sira atu halo tuir deʼit ninia hanoin. Ho haraik an nia husu matadalan husi apóstolu no katuas sira iha Jeruzalein. (Após 15:2) Rezultadu mak ema Kristaun sira bele mantein ksolok no iha dame iha kongregasaun. (Após 15:​30, 31) Se mosu haksesuk malu kona-ba asuntu importante ruma, ita bele haburas dame hodi buka matadalan husi irmaun sira neʼebé Jeová hili atu tau matan kongregasaun. Dala barak organizasaun fó matadalan ba ita liuhusi publikasaun ka karta sira. Ita bele haburas dame liuhusi halo tuir matadalan sira-neʼe duké halo tuir ita-nia ideia rasik. w22.08 p. 22 par. 8-9

Dala ruma, ita hotu sente katak ita presiza fó sai ita-nia sentimentu ba ema ida. Dala ruma neʼe susar. Karik ita la toman atu fahe ita-nia sentimentu ba ema seluk no ita sente laran-kanek tebes bainhira ita-nia belun ida konta fali ba ema seluk buat neʼebé ita fó sai ba nia. Maibé ita agradese ba belun sira neʼebé rai didiʼak informasaun neʼebé ita fahe ba sira. Katuas kongregasaun neʼebé rai didiʼak ema nia informasaun privadu mak hanesan “subar-fatin husi anin, no fatin mahon” ba irmaun-irmán sira. (Isa 32:2) Ita bele koʼalia ho katuas sira kona-ba buat naran deʼit tanba ita hatene katak sira sei la konta fali ida-neʼe ba ema seluk. Ita mós labele obriga sira atu fó sai ema seluk nia informasaun privadu. Ita mós hafolin katuas sira-nia feen tanba sira la husu informasaun privadu husi sira-nia laʼen. Tuir loloos feen sira sente kontente tanba sira la hatene informasaun privadu kona-ba irmaun-irmán sira. w22.09 p. 11 par. 10-11

Ita bele fiar metin katak durante “terus boot” neʼebé atu mai, Jeová sei salva ninia povu neʼebé laran-metin. (Mt 24:21; Dan 12:1) Nia sei halo ida-neʼe bainhira grupu nasaun sira katak Gog husi rai-Magog ataka sira neʼebé laran-metin ba Jeová iha mundu tomak. Maski karik grupu neʼe inklui nasaun 193 hotu neʼebé sai nuʼudar membru ba Nasoins Unidas, maibé sira-nia kbiit labele kompara ho Ida neʼebé Aas Liu no mós tropa lalehan nian. Jeová promete: “Haʼu sei fó duni glória ba haʼu-nia an iha nasaun barak nia oin, no halo santu haʼu-nia an, no mós halo sira hatene kona-ba haʼu. Nuneʼe sira sei hatene duni katak haʼu mak Jeová.” (Eze 38:​14-16, 23) Bainhira Gog ataka Jeová nia povu, neʼe sei hamosu funu Armagedon no iha funu neʼe Jeová sei halakon “liurai sira iha mundu tomak”. (Apok 16:​14, 16; 19:​19-21) “Ema laran-loos deʼit mak sei hela iha rai, no ema neʼebé hatudu nafatin integridade mak sei hela nafatin iha neʼebá.”—Prov 2:​21, nota. w22.10 p. 16-17 par. 16-17

Ita la hatene ema nia laran, só Jeová deʼit mak bele ‘buka-hatene didiʼak ema nia laran’. (Prov 16:2) Nia hadomi ema hotu husi situasaun moris oioin no kultura oioin. No nia anima ita atu ‘loke luan mós ita-nia laran’. (2 Kor 6:13) Ita hakaʼas an atu hadomi irmaun-irmán hotu no la tesi-lia ba sira. Ita mós labele tesi-lia ba ema neʼebé laʼós parte ba kongregasaun. Ita labele tesi-lia ba Ita-nia família neʼebé fiar la hanesan ho Ita hodi dehan: “Nia sei nunka tama lia-loos.” Se Ita tesi-lia, neʼe katak Ita foti an no sente katak Ita mak ema laran-loos liu. Toʼo agora Jeová sei kontinua fó oportunidade ba “ema iha fatin hotu” atu arrepende an. (Após 17:30) Hanoin-hetan katak ema neʼebé sente katak nia mak ema laran-loos liu la hatudu hahalok loos. Bainhira ita hafolin Jeová nia matadalan kona-ba buat neʼebé loos, ita sei sente kontente no ajuda ema seluk atu hakbesik liután ba ita no ba Jeová. w22.08 p. 31 par. 20-22

Ita hatene katak dala ruma ema sei kontra ita kuandu ita haklaken. Ita bele fiar katak iha futuru ema sei kontra ita makaʼas liután. (Dan 11:44; 2 Tim 3:12; Apok 16:21) Maski nuneʼe, ita iha konfiansa katak Jeová sei ajuda ita. Tanbasá? Tanba Jeová sempre ajuda ninia atan sira atu kumpre sira-nia knaar, maski neʼe susar. Hanoin toʼok kona-ba profeta Ezequiel nia moris. Ezequiel haklaken ba ema Judeu neʼebé sai nuʼudar dadur iha Babilónia. Ezequiel presiza haklaken ba ema hanesan saida? Jeová dehan katak sira “lakohi rona”, “laran-toos” no “kontradór”. Sira perigu hanesan ai-tarak no sakunar. Tan neʼe, Jeová hatete beibeik ba Ezequiel: “Keta taʼuk.” (Eze 2:​3-6) Ezequiel konsege kumpre ninia knaar atu haklaken tanba (1) Jeová mak haruka nia atu halo serbisu neʼe, (2) Maromak nia espíritu santu fó kbiit ba nia, no (3) Maromak nia liafuan hametin ninia fiar. w22.11 p. 2 par. 1-2

Buat moris sira neʼebé Jeová kria iha mundu ikusmai mate, só ema deʼit mak Jeová kria atu moris ba nafatin. Nia fó ema oportunidade úniku atu nunka mate. Jeová mós kria ita ho hakarak neʼebé makaʼas atu kontinua moris. Bíblia dehan katak Maromak “tau ona tempu neʼebé la iha rohan iha ema sira-nia laran”. (Ecle 3:11) Tan neʼe mak ita haree mate nuʼudar inimigu. (1 Kor 15:26) Baibain kuandu ita moras todan, ita sei simu deʼit situasaun neʼe no rende an ka lae? Lae. Ita sei konsulta ho doutór no hemu ai-moruk atu kura moras neʼe. Tuir loloos, ita hakaʼas an atu halo buat ruma hodi labele mate. No bainhira ema neʼebé ita hadomi mate, maski nia mak joven ka idade, ita sente laran-triste ba tempu kleur. (João 11:​32, 33) Klaru katak ita-nia Kriadór neʼebé domin sei la fó ita hakarak neʼe no mós abilidade atu kontinua moris se nia lakohi ema atu moris ba nafatin. w22.12 p. 3 par. 5; p. 4 par. 7

Durante tempu susar neʼe, ita nia maluk fiar naʼin barak karik moras, taʼuk ka sente mesamesak. Hakaʼas an atu komunika ho irmaun-irmán sira. Kuandu mosu moras-peste, karik ita presiza halo distánsia fíziku bainhira hamutuk ho maluk sira. Karik ita mós sente hanesan buat neʼebé apóstolu João sente. Nia hakarak hasoru ninia kolega Gaio oin ba oin. (3 João 13, 14) Maibé nia hatene katak ba tempu balu nia labele hasoru malu ho Gaio. Entaun João halo buat neʼebé nia bele halo. Nia hakerek karta ida ba Gaio. Se Ita labele vizita irmaun-irmán sira, koko dalan oioin atu kontaktu sira. Bainhira Ita nafatin kontaktu malu ho maluk Kristaun sira, Ita sei sente dame no seguru. Kontaktu katuas sira se Ita sente laran-taridu tebes no Ita bele hetan anima husi sira.—Isa 32:​1, 2. w22.12 p. 17-18 par. 6-7

Bíblia esplika katak ba tempu balu ema kesi José nia ain ho korrente no tau besi iha ninia kakorok. (Sal 105:​17, 18) José nia situasaun sai aat liután. Ninia situasaun troka husi atan neʼebé ninia naʼi tau fiar, sai fali prizioneiru ida. Ita hasoru ona situasaun susar neʼebé sai aat liután, maski Ita harohan ba Jeová ka lae? Neʼe bele akontese. Jeová la proteje Ita husi susar sira iha mundu neʼebé Satanás mak ukun. (1 João 5:19) Maski nuneʼe, Ita bele fiar katak Jeová hatene ho didiʼak susar neʼebé Ita hasoru, no nia hanoin Ita. (Mt 10:​29-31; 1 Ped 5:​6, 7) Nia mós promete ona: “Haʼu sei nunka husik ó, no haʼu sei nunka fila kotuk ba ó.” (Ebr 13:5) Jeová bele ajuda Ita tahan, maski Ita-nia situasaun haree hanesan la iha ona esperansa. w23.01 p. 16 par. 7-8

Bíblia promete katak Maromak sei la husik hela ita kuandu ita halo sala. Ema Izraél halo sala beibeik hasoru Jeová. Maski nuneʼe, bainhira sira arrepende an ho laran, Jeová perdua sira. Ema Kristaun iha apóstolu sira-nia tempu mós hatene katak Jeová hadomi tebes sira. Jeová dirije apóstolu Paulo atu anima maluk fiar-naʼin sira atu ‘fó perdua no fó kmaan’ ba mane ida neʼebé uluk halo sala sériu maibé arrepende an ona. (2 Kor 2:​6, 7; 1 Kor 5:​1-5) Ita sente kontente tebes tanba hatene katak Jeová la husik deʼit ninia atan sira neʼebé halo sala. Maibé ho domin nia ajuda, korrije no konvida sira atu sai fali ninia belun. Nia mós promete atu halo nuneʼe ba ema hotu neʼebé arrepende sira-nia sala ohin loron. (Tgo 4:​8-10) Bíblia hatudu sai Maromak nia matenek, justisa no domin. Bíblia prova katak Jeová hakarak ita atu koñese nia. Nia hakarak ita atu sai ninia belun. w23.02 p. 7 par. 16-17

Ita iha razaun diʼak atu buka-hatene oinsá akontesimentu sira iha mundu kumpre Bíblia nia profesia. Porezemplu, Jesus fó-hatene ita kona-ba akontesimentu espesífiku atu ajuda ita hatene bainhira Satanás nia sistema nia rohan besik ona atu mai. (Mt 24:​3-14) Apóstolu Pedro anima ita atu hanoin didiʼak kona-ba oinsá profesia sira sai loos atu ita-nia fiar bele metin nafatin. (2 Ped 1:​20, 21) Apóstolu Pedro ajuda ita atu hanoin kona-ba tanbasá ita presiza estuda Bíblia nia profesia. Nia anima ita atu “hanoin-hetan nafatin kona-ba Jeová nia loron neʼebé atu mai”. (2 Ped 3:​11-13) Tanbasá? Laʼós tanba ita hakarak buka-hatene “loron no oras” neʼebé Armagedon sei toʼo mai, maibé tanba ita hakarak uza tempu neʼebé sei iha atu “hatudu hahalok santu no laran-metin ba Maromak”. (Mt 24:36; Lc 12:40) Ita hakarak hatudu hahalok diʼak no hakaʼas an atu serbí Jeová tanba hadomi nia. Atu bele halo ida-neʼe, ita presiza kuidadu didiʼak ita-nia an. w23.02 p. 16 par. 4, 6

Iha buat balu neʼebé “bibi-malae seluk” presiza halo agora hodi bele hela iha Paraízu. Ita tenke hatudu oinsá ita sente kona-ba Jesus. Porezemplu, ita hatudu katak ita hadomi nia liuhusi dalan neʼebé ita trata Kristu nia alin sira no Jesus sei tesi-lia ba bibi-malae sira bazeia ba ida-neʼe. (Mt 25:​31-40) Ita bele apoia sira hodi halo serbisu haklaken no hanorin ema sai dixípulu. (Mt 28:​18-20) Ita la presiza hein toʼo moris iha Paraízu mak foin hatudu hahalok neʼebé Jeová hakarak ema atu hatudu iha tempu neʼebá. Agora ita bele hakaʼas an atu onestu liuhusi ita-nia liafuan no hahalok no mós kontrola ita-nia hahalok. Ita bele laran-metin ba Jeová, ba ita-nia kaben, no ba maluk Kristaun sira. Se ita halo tuir Jeová iha mundu aat neʼe, fasil liu ba ita atu halo tuir nia iha Paraízu. Ita mós bele haburas skill no toman oioin atu hatudu katak ita prepara ona atu moris iha Paraízu. w22.12 p. 11-12 par. 14-16

Ita hadomi Jesus nuʼudar ita-nia Liurai tanba nia mak Ukun-Naʼin neʼebé diʼak tebes. Jeová treinu ninia Oan-Mane no hili nia atu ukun nuʼudar Liurai. (Isa 50:​4, 5) Hanoin mós kona-ba oinsá Jesus hatudu ona domin neʼebé la hanoin an deʼit. (João 13:1) Nuʼudar Ita-nia Liurai, Jesus merese atu hetan Ita-nia domin. Nia esplika katak nia bolu sira neʼebé hadomi nia nuʼudar ninia belun sira no sira hatudu sai sira-nia domin liuhusi halo tuir ninia mandamentu sira. (João 14:15; 15:​14, 15) Neʼe mak priviléjiu boot atu bele habelun ho Jeová nia Oan-Mane! Ita hatene katak Jesus mak haraik an no nia banati-tuir ninia Aman ho perfeitu. Ita aprende ona katak Jesus fó ai-han ba ema neʼebé hamlaha, fó kmaan ba ema neʼebé laran-kraik no mós kura ema neʼebé moras. (Mt 14:​14-21) Ita mós haree ona oinsá nia dirije ninia kongregasaun ohin loron. (Mt 23:10) No Ita hatene katak nuʼudar Liurai ba Maromak nia Ukun, nia mós sei halo buat furak oioin iha futuru. Oinsá Ita bele hatudu katak Ita hadomi nia? Liuhusi halo tuir ninia ezemplu. Hakat primeiru mak dedika Ita-nia an ba Jeová no hetan batizmu. w23.03 p. 4 par. 8, 10

Jeová halo nakonu lalehan, rai no mós tasi ho kriasaun furak oioin no buat hotu neʼe bele hanorin ita kona-ba nia. (Sal 104:​24, 25) Hanoin toʼok kona-ba dalan neʼebé Jeová kria ita. Nia kria ita ho abilidade atu hafolin buat furak oioin iha natureza. Nia fó ita sentidu atu haree, rona, kona, koko, no horon, ida-neʼe ajuda ita atu haksolok ho buat neʼebé nia kria ona. Bíblia fó sai razaun importante seluk tanbasá ita presiza haree didiʼak Jeová nia kriasaun. Kriasaun sira hanorin ita kona-ba Jeová nia hahalok sira. (Rom 1:20) Porezemplu, hanoin kona-ba buat neʼebé Jeová kria no haree oinsá nia halo buat sira-neʼe ho didiʼak. Neʼe hanorin ita katak Maromak matenek tebes. Hanoin kona-ba ai-han gostu oioin neʼebé ita bele han. Neʼe hatudu katak Maromak hadomi ema. Bainhira ita haree Jeová nia hahalok liuhusi buat neʼebé nia kria, ita sei koñese nia liután no neʼe book ita atu hakbesik liután ba nia. w23.03 p. 16 par. 4-5

Nuʼudar situasaun iha mundu sai aat liután, ita-nia fiar ba Maromak nia Liafuan mós sei hetan koko. Karik ema sei koko halo ita duvida katak Bíblia mak loos no Jeová mak hili atan laran-metin no matenek atu dirije ninia povu ohin loron. Maibé se ita fiar katak Jeová nia Liafuan mak sempre loos, neʼe sei ajuda ita tahan bainhira ita-nia fiar hetan koko. Ita sei deside metin atu ‘halo tuir Jeová nia ukun-fuan sira iha tempu hotu, toʼo mate’. (Sal 119:112) Ita sei “la moe” atu fó sai lia-loos ba ema seluk no anima sira atu moris tuir Bíblia. (Sal 119:46) Ita mós sei iha kbiit atu tahan situasaun neʼebé susar tebes “ho pasiénsia no ksolok”, inklui kuandu ema fó-terus ita. (Kol 1:11; Sal 119:​143, 157) Lia-loos ajuda ita sente kalma, iha konfiansa, no mós iha objetivu ba moris. Lia-loos fó ita esperansa kona-ba futuru kapás iha Maromak nia Ukun okos. w23.01 p. 7 par. 16-17

Iha kalan antes Jesus mate, nia halo orasaun naruk kona-ba ninia dixípulu sira. Nia husu ninia Aman atu “tau matan ba sira tanba aat-naʼin”. (João 17:15) Jesus hadomi duni ninia dixípulu sira. Maski Jesus besik atu hasoru susar boot, maibé nia hanoin kona-ba ninia apóstolu sira-nia diʼak. Ita hakarak banati-tuir Jesus hodi la tau fokus deʼit ba ita-nia presiza rasik. Tan neʼe, ita halo orasaun beibeik kona-ba irmaun-irmán sira. Bainhira ita halo nuneʼe, ita halo tuir Jesus nia mandamentu atu hadomi malu no ita hatudu ba Jeová katak ita hadomi tebes ita-nia irmaun-irmán sira. Halo orasaun kona-ba irmaun-irmán sira laʼós saugati deʼit. Maromak nia Liafuan hatete katak “ema laran-loos nia harohan iha forsa boot tebes”. (Tgo 5:16) Ita presiza halo orasaun kona-ba irmaun-irmán sira tanba sira hasoru susar barak. w22.07 p. 23-24 par. 13-15