Setembru

Bainhira ita uza didiʼak ita-nia kbiit atu koʼalia, ita hatudu sai ba ema seluk katak ita adora Jeová. Ita ajuda ema seluk atu haree ho klaru oinsá “ema neʼebé serbí Maromak la hanesan ho ema neʼebé la serbí nia”. (Mal 3:18) Hanoin toʼok kona-ba irmán Kimberly nia esperiénsia. Nia presiza halo projetu ida hamutuk ho ninia kolega eskola ida. Ninia kolega neʼe nota katak Kimberly la hanesan ho estudante sira seluk. Kimberly la koʼalia aat kona-ba ema seluk, nia koʼalia ho laran-diʼak no nia la tolok. Kimberly nia kolega neʼe hakarak hatene liután no ikusmai nia komesa estuda Bíblia. Jeová kontente tebes bainhira ita book ema seluk atu aprende lia-loos liuhusi dalan neʼebé ita koʼalia. Ita hotu hakarak koʼalia iha dalan neʼebé lori glória ba Jeová. w22.04 p. 5-6 par. 5-7

Jesus halo Maria Madalena livre husi anju aat hitu. Tanba sente agradese, nia deside atu sai Jesus nia dixípulu no atu apoia Jesus iha serbisu haklaken. (Lc 8:​1-3) Maria agradese tebes ba buat neʼebé Jesus halo ona ba nia. Karik Maria la hatene katak Jesus mós sei fó prezente furak hodi fó ninia moris, “atu nuneʼe ema hotu neʼebé hatudu fiar ba nia” bele moris ba nafatin. (João 3:16) Maski nuneʼe, Maria hatudu agradese ba Jesus liuhusi hatudu laran-metin. Bainhira Jesus terus iha ai-riin, Maria hamriik besik tanba nia hanoin Jesus no hakarak fó kmaan ba ema seluk iha neʼebá. (João 19:25) Depois Jesus mate, Maria no feto naʼin-rua seluk lori buat morin oioin atu tau iha Jesus nia mate-isin. (Mc 16:​1, 2) Maria hetan oportunidade atu hasoru no koʼalia ho Jesus neʼebé moris-hiʼas. Só dixípulu uitoan deʼit mak hetan oportunidade neʼe.—João 20:​11-18. w23.01 p. 27 par. 4

Ita labele hanoin katak tanba ita serbí ona Jeová iha tempu uluk, ita la presiza tan serbí Jeová agora. Maski ita iha limitasaun barak liu fali uluk, maibé ita presiza kontinua badinas atu halo “Naʼi nia serbisu” no kontinua matan-moris toʼo rohan. (1 Kor 15:58; Mt 24:13; Mc 13:33) Ita tenke adora Jeová ho laran-manas no laran tomak. Ema Kristaun iha kongregasaun Laodiseia iha fraku seluk. Sira-nia adorasaun ba Jeová mak “morna” deʼit. Tanba sira la laran-manas, Jesus hatete ba sira: ‘Imi la kontente no kuitadu liu.’ Sira tenke hatudu laran-manas atu adora Jeová. (Apok 3:​16, 17, 19) Ita aprende saida? Se ita-nia laran-manas sai menus, ita tenke hatudu agradese liután ba buat diʼak hotu neʼebé Jeová no ninia organizasaun fó ona mai ita. (Apok 3:18) Ita lakohi buka moris diʼak agora toʼo ita la tau uluk ita-nia adorasaun ba Jeová. w22.05 p. 3-4 par. 7-8

Durante tinan rihun ba rihun, Jeová hakerek livru espesiál ida. Livru neʼe iha ema oioin nia naran, hahú ho Abel nia naran, nia mak testemuña primeiru neʼebé laran-metin. (Lc 11:​50, 51) Depois neʼe, Jeová kontinua aumenta naran seluk ba livru neʼe, no ohin loron ema millaun ba millaun nia naran hakerek ona iha livru neʼe. Bíblia bolu ida-neʼe nuʼudar livru atu “hanoin-hetan” ka “livru moris nian”. (Mal 3:16; Apok 3:5; 17:8) Ema hotu neʼebé respeitu ka hamtaʼuk Jeová no mós hafolin ninia naran, Jeová hakerek sira-nia naran iha livru neʼe. Sira iha oportunidade atu moris ba nafatin. Ohin loron, Maromak bele hakerek ita-nia naran iha livru neʼe se ita haburas relasaun diʼak ho nia liuhusi tau fiar ba ninia Oan-Mane Jesus Kristu nia sakrifísiu. (João 3:​16, 36) Ita hotu hakarak ita-nia naran hakerek iha livru neʼe, maski ita-nia esperansa mak atu moris iha lalehan ka iha rai. w22.09 p. 14 par. 1-2

Livru Apokalipse temi kona-ba “samea boot neʼebé mean lakan”. (Apok 12:3) Samea boot neʼe halo funu hasoru Jesus no ninia anju sira. (Apok 12:​7-9) Samea boot neʼe ataka Maromak nia povu no fó kbiit ba animál fuik sira katak governu sira. (Apok 12:17; 13:4) Sé mak samea boot neʼe? Neʼe mak “samea uluk nian, neʼebé hanaran Diabu no Satanás”. (Apok 12:9; 20:2) Nia mak kontrola inimigu hotu neʼebé kontra Jeová. Saida mak sei akontese ba samea boot neʼe? Apokalipse 20:​1-3 esplika katak anju ida sei soe tama Satanás ba rai-kuak neʼebé kleʼan tebes, neʼe hanesan prizaun ba Satanás. Bainhira Satanás iha rai-kuak laran, nia “labele lohi tan nasaun sira toʼo tinan 1.000 remata”. Ikusmai, Satanás no anju aat sira sei “soe tiha ba tasi neʼebé iha ahi-lakan no enxofre”, neʼe katak sira sei lakon ba nafatin. Imajina toʼok mundu sei sai oinsá bainhira la iha Satanás no anju aat sira. Neʼe sei furak tebes. w22.05 p. 14 par. 19-20

Jesus mós serbisu makaʼas. Bainhira nia joven, nia serbisu nuʼudar badaen-ai. (Mc 6:3) Klaru katak ninia inan-aman hafolin ninia serbisu tanba neʼe ajuda atu sustenta sira-nia família neʼebé boot. Jesus mak perfeitu no nia halo buat hotu ho perfeitu. Tan neʼe karik ema barak hakarak sosa buat neʼebé nia halo. Ita bele fiar katak Jesus kontente ho ninia serbisu. Maski nia serbisu makaʼas, maibé nia mós uza tempu atu halo atividade espirituál. (João 7:15) Ikusmai, bainhira nia haklaken tempu-tomak, nia hatete ba ninia rona-naʼin sira: “Keta serbisu atu hetan hahán neʼebé sei mohu, maibé serbisu atu hetan hahán neʼebé la mohu, neʼebé fó moris rohan-laek.” (João 6:27) Iha Jesus nia diskursu iha foho, nia hatete: “Imi tenke haloot rikusoin iha lalehan ba imi-nia an.” (Mt 6:20) Bainhira ita aplika Jeová nia matadalan neʼebé matenek, neʼe sei ajuda ita atu iha hanoin neʼebé loos kona-ba serbisu. Ita aprende katak nuʼudar ema Kristaun, ita tenke “halo serbisu makaʼas . . . no tenke halo serbisu neʼebé diʼak”. w22.05 p. 22 par. 9-10

Eunice hatudu ezemplu diʼak ba Timóteo. Nia bele haree katak ninia inan hadomi tebes Jeová liuhusi ninia hahalok no serbí Jeová lori kontente ba nia. Nuneʼe mós ho ohin loron, inan barak ajuda sira-nia família atu serbí Jeová, ‘laʼós liuhusi sira-nia liafuan, maibé liuhusi sira-nia hahalok’. (1 Ped 3:​1, 2) Ita mós bele halo nuneʼe. Oinsá? Tau uluk Ita-nia relasaun diʼak ho Jeová. (Deut 6:​5, 6) Hanesan inan sira seluk, Ita mós halo sakrifísiu oioin atu tau matan ba Ita-nia oan. Porezemplu, Ita sakrifika tempu, osan, dala ruma ladún toba no mós halo sakrifísiu seluk tan. Maibé keta sai okupadu demais toʼo la iha tempu atu hametin Ita-nia relasaun diʼak ho Jeová. Arranja beibeik tempu atu estuda Bíblia mesak, halo orasaun mesak no tuir reuniaun beibeik. Bainhira Ita halo ida-neʼe, neʼe sei hametin Ita-nia relasaun diʼak ho Jeová no hatudu ezemplu diʼak ba Ita-nia família no mós ba ema seluk. w22.04 p. 16 par. 1; p. 19 par. 12-13

Ita sente kmaan bainhira hatene katak ita la presiza tesi-lia ba ema. Jeová mak Juís neʼebé Boot Liu Hotu no nia mak sei tesi-lia. (Rom 14:​10-12) Ita bele fiar katak Jeová sei sempre tesi-lia tuir ninia matadalan neʼebé perfeitu kona-ba buat neʼebé loos no sala. (Gén 18:25) Nia nunka halo buat neʼebé la justu. Ita hein namanas ba tempu neʼebé Jeová sei halakon buat aat hotu neʼebé mosu tanba ema nia sala no la perfeitu. Iha tempu neʼebá, Jeová sei kura ita-nia laran-kanek no ita sei iha saúde neʼebé perfeitu. (Sal 72:​12-14; Apok 21:​3, 4) Ita sei nunka hanoin tan kona-ba susar sira neʼebé uluk ita hasoru. Nuʼudar ita hein ba tempu furak neʼe, ita agradese tebes ba Jeová tanba nia fó ba ita kbiit atu banati-tuir nia hodi fó perdua ba ema seluk. w22.06 p. 13 par. 18-19

Juís ba mundu tomak hatene buat neʼebé loos no sala iha dalan neʼebé diʼak liu. Juís neʼebé diʼak presiza hatene saida tan? Nia presiza hatene faktu hotu antes halo desizaun, tan neʼe Jeová mak Juís neʼebé diʼak liu hotu tanba nia sempre hatene faktu hotu. La hanesan ho ema nia juís, Jeová sempre hatene faktu hotu husi kazu ida-idak. (Gén 18:​20, 21; Sal 90:8) Ninia desizaun la bazeia deʼit ba buat neʼebé ema haree ka rona. Jeová hatene katak ema nia hahalok bele hetan influénsia husi hahalok no toman neʼebé mai husi inan-aman, edukasaun, hela-fatin no mós saúde mentál no fíziku. Jeová mós bele haree ema nia laran. Nia hatene ema ida-idak nia hakarak, intensaun no motivasaun. La iha buat ida mak subar husi nia. (Ebr 4:13) Tan neʼe bainhira Jeová fó perdua ba ema ida, neʼe tanba nia hatene faktu hotu. w22.06 p. 4 par. 8-9

Ita presiza tau atensaun ba buat oioin neʼebé Satanás uza atu koko Job tanba Satanás mós uza buat sira-neʼe atu koko ita ohin loron. Satanás duun katak ita la hadomi Jeová ho laran tomak no ita sei fila kotuk ba Jeová atu bele salva ita-nia moris. Satanás mós hatete katak Maromak la hadomi ita no la hafolin ita-nia hakaʼas an atu serbí nia. Se ita tau esperansa ba Jeová, ita sei la tau fiar ba Satanás nia lia-bosok tanba ita hatene buat neʼebé Satanás koko atu halo. Ita presiza haree susar sira nuʼudar oportunidade atu koñese ita-nia an diʼak liután. Susar sira neʼebé Job hasoru, ajuda nia atu hatene no hadiʼa ninia fraku sira. Porezemplu, nia aprende katak nia presiza haburas liután hahalok haraik an. (Job 42:3) Ita mós bele aprende buat barak kona-ba ita-nia an bainhira ita hasoru susar. Bainhira ita hatene ita-nia fraku sira, ita bele hakaʼas an hadiʼa ida-neʼe. w22.06 p. 23 par. 13-14

Jeová promete katak nia sei ajuda ita. Porezemplu, antes Jeová hatete: “Imi mak haʼu-nia testemuña”, nia hatete: “Bainhira ó laʼo liu bee sira, haʼu sei hamutuk ho ó, no bainhira ó hakur mota sira, sira sei la halo ó mout. Bainhira ó laʼo liu ahi, neʼe sei la han ó, no ahi nia lakan sei la han ó.” (Isa 43:2) Kuandu ita haklaken, dala ruma ita hasoru susar neʼebé atu hanesan ho bee neʼebé bele halo ita mout ka ahi neʼebé bele han ita. Maski nuneʼe, Jeová sei ajuda ita atu kontinua haklaken. (Isa 41:13) Ohin loron mós ema barak lakohi rona ita-nia mensajen. Maibé neʼe la dehan katak ita falla nuʼudar Jeová nia Testemuña. Ita hetan kmaan no kbiit tanba hatene katak Jeová kontente ho ita bainhira ita haklaken ho laran-metin. Apóstolu Paulo hatete: “[Ema] ida-idak sei simu kolen tuir sira-nia serbisu rasik.”—1 Kor 3:8; 4:​1, 2. w22.11 p. 3-4 par. 5-6

Ohin loron ita haree duni katak Bíblia nia profesia sai loos daudaun. Ema husi “língua hotu husi nasaun oioin” aprende atu koʼalia “língua neʼebé moos” ka lia-loos husi Bíblia. (Zac 8:23; Sof 3:9) Ema naʼin-millaun ualu liu iha rai 240 sai parte ba Jeová nia organizasaun no tinan-tinan ema rihun ba rihun hetan batizmu. Maibé buat neʼebé importante liu mak hahalok Kristaun ka “hahalok foun” neʼebé dixípulu foun sira-neʼe haburas ona. (Kol 3:​8-10) Ema barak para atu halo hahalok la morál, violénsia, diskriminasaun no nasionalizmu. Profesia neʼebé hakerek iha Isaias 2:4 sai loos daudaun, sira “la aprende tan funu”. Bainhira ita hakaʼas an atu tau hahalok foun, ita ajuda ema hakbesik ba Jeová nia organizasaun no ita hatudu katak ita halo tuir ita-nia Ulun-Naʼin Kristu Jesus. (João 13:35) Oinsá neʼe bele akontese? Neʼe tanba Jesus mak ajuda ita. w22.07 p. 9 par. 7-8

Bainhira ita halo orasaun ba Jeová, ita tenke hatudu respeitu. Hanoin kona-ba vizaun furak neʼebé Isaias, Ezequiel, Daniel no João haree. Vizaun sira-neʼe hotu hatudu katak Jeová mak Liurai neʼebé kmanek. Isaias “haree Jeová tuur hela iha ninia kadunan neʼebé iha fatin aas tebes”. (Isa 6:​1-3) Ezequiel haree Jeová tuur iha ninia karreta lalehan nian no “nabilan mak haleʼu nia hanesan arkiris”. (Eze 1:​26-28) Daniel haree “Naʼi husi Horiuluk Kedas” hatais roupa mutin no ahi sai husi ninia kadunan. (Dan 7:​9, 10) No João haree Jeová tuur iha kadunan no “arkiris neʼebé haree hanesan fatuk-ezmeralda haleʼu kadunan neʼe”. (Apok 4:​2-4) Bainhira ita hanoin kona-ba Jeová nia glória neʼebé kmanek tebes, neʼe book ita atu hafolin oportunidade atu hakbesik ba Jeová liuhusi orasaun no mós book ita atu halo orasaun ho respeitu. w22.07 p. 20 par. 3

Joven sira, Satanás sei koko hanetik Ita atu sai ema Kristaun neʼebé maduru. Karik nia sei hamosu dúvida kona-ba Bíblia nia hanorin balu. Porezemplu, karik Ita rona hanorin neʼebé dehan katak Maromak la kria ema no ita mai husi prosesu evolusaun. Bainhira kiʼik, karik Ita la hanoin kona-ba neʼe, maibé agora mestre sira hanorin ida-neʼe iha eskola. Karik mestre sira-nia esplikasaun kona-ba evolusaun rona lójiku. Maibé karik sira nunka hanoin kona-ba evidénsia neʼebé hatudu katak iha duni Kriadór. Hanoin-hetan prinsípiu iha Provérbios 18:17 neʼebé dehan: “Ema neʼebé konta uluk ninia kazu haree hanesan nia mak loos, toʼo ema neʼebé duun nia mai no husu pergunta ba nia hodi hetan lia-loos.” Duké simu kedas ideia sira neʼebé Ita rona iha eskola nuʼudar faktu, estuda didiʼak lia-loos husi Maromak nia Liafuan Bíblia no ita-nia publikasaun sira. w22.08 p. 2 par. 2; p. 4 par. 8

Ita hakarak atu komprende buat neʼebé ita lee iha Bíblia. Se ita la komprende, karik ita sei la hetan benefísiu. Porezemplu, hanoin toʼok kona-ba Jesus nia liafuan ba “ema ida neʼebé hatene didiʼak Ukun-Fuan”. (Lc 10:​25-29) Bainhira ema neʼe husu Jesus saida mak nia presiza halo atu hetan moris ba nafatin, Jesus ajuda nia hetan resposta husi Eskritura sira hodi husu: “Ukun-Fuan dehan saida? Ó komprende oinsá?” Ema neʼe bele fó resposta neʼebé loos hodi temi fali eskritura sira kona-ba hadomi Maromak no hadomi ninia maluk. (Lev 19:18; Deut 6:5) Maibé tuirmai nia hatete: “Sé loos mak haʼu-nia maluk?” Ema neʼe hatudu katak nia ladún komprende buat neʼebé nia lee. Tan neʼe nia la hatene oinsá atu halo tuir eskritura sira-neʼe ho didiʼak. Ita presiza Jeová nia ajuda atu bele komprende Eskritura sira. Tan neʼe husu nia fó espíritu santu atu ajuda ita tau fokus ba buat neʼebé ita lee, no tuirmai husu nia atu ajuda Ita aplika buat neʼebé Ita lee. w23.02 p. 9 par. 4-5

“Oinsá Ita hetan lia-loos?” Klaru katak Ita hatán beibeik ona pergunta neʼe. Dala barak Ita mak husu uluk pergunta neʼe ba maluk fiar-naʼin sira kuandu Ita hakarak koñese sira diʼak liután. Ita gosta atu rona oinsá irmaun-irmán sira koñese no hadomi Jeová, no ita mós kontente atu konta ba sira oinsá ita hafolin tebes lia-loos. (Rom 1:11) Rezultadu mak ita kontinua hanoin kona-ba oinsá lia-loos mak folin-boot tebes. Ita mós hakaʼas an liután atu “kontinua laʼo iha lia-loos”, neʼe katak kontinua halaʼo moris iha dalan neʼebé Jeová simu no hetan bensaun husi Jeová. Ita hafolin lia-loos tanba razaun oioin. Razaun importante liu mak tanba ita hadomi Jeová, Hun ba lia-loos. Bainhira ita aprende Bíblia, ita koñese Jeová nuʼudar Kriadór neʼebé iha kbiit boot, no mós nuʼudar Aman neʼebé hadomi ita no tau matan ba ita ho laran-diʼak.—1 Ped 5:7. w22.08 p. 14 par. 1, 3

Apóstolu Paulo anima irmaun-irmán sira atu hatudu domin liuhusi “hahalok diʼak”. (Ebr 10:24) Nia ajuda irmaun-irmán sira liuhusi ninia liafuan no hahalok. Porezemplu, bainhira maluk Kristaun sira iha Judeia hetan susar tanba rai-hamlaha, Paulo ajuda lori buat ruma neʼebé sira presiza. (Após 11:​27-30) Maski Paulo okupadu ho serbisu haklaken no hanorin, maibé nia sempre buka dalan atu apoia maluk sira neʼebé presiza ajuda iha dalan fíziku. Hodi halo nuneʼe, Paulo hametin maluk Kristaun sira-nia fiar katak Jeová sei tau matan ba sira. Ohin loron, bainhira ita uza ita-nia tempu, forsa no matenek atu ajuda irmaun-irmán sira iha tempu dezastre, ita mós sei hametin sira-nia fiar. Ita mós bele fó kontribuisaun beibeik atu apoia serbisu iha mundu tomak. Ita bele ajuda irmaun-irmán sira atu fiar katak Jeová sei nunka husik sira liuhusi dalan sira-neʼe no mós dalan seluk tan. w22.08 p. 23 par. 14

Bíblia fó sai profesia barak neʼebé sai loos ona. Profesia balu hakerek tinan atus ba atus antes sai loos. Istória hatudu katak profesia sira-neʼe sai loos ona. Ita la hakfodak tanba ita hatene katak profesia hotu iha Bíblia mai husi Jeová. Hanoin toʼok profesia kona-ba sidade Babilónia sei lakon. Maizumenus entre tinan 778 no 732 AEC, Jeová dirije profeta Isaias atu fó sai nanis katak ema sei manán sidade Babilónia neʼebé kbiit boot. Isaias fó sai katak mane ida naran Ciro mak sei manán sidade Babilónia no nia mós fó sai oinsá Ciro sei manán sidade neʼe. (Isa 44:27–45:2) Isaias mós fó sai katak ikusmai Babilónia sei rahun no ema sei la hela tan iha neʼebá. (Isa 13:​19, 20) Iha tinan 539 AEC, Média no Pérsia manán Babilónia, no ohin loron sidade neʼe hela fatuk butuk deʼit. w23.01 p. 4 par. 10

Jeová hili ita atu sai parte ba ninia família iha mundu tomak neʼebé adora nia. Neʼe priviléjiu neʼebé boot no mós lori bensaun oioin. (Mc 10:​29, 30) Iha mundu tomak, iha irmaun-irmán barak neʼebé hadomi Jeová hanesan ita no sira mós hakaʼas an atu halo tuir Jeová nia matadalan. Maski ita-nia língua, kultura no hatais la hanesan, maibé ita hadomi malu. No ita sente nuneʼe maski foin mak hasoru malu. Ita gosta tebes hamutuk ho sira, liuliu bainhira ita fó hahiʼi no adora Jeová, no atu iha unidade ho sira. (Sal 133:1) Dala ruma, sira ajuda ita kuandu ita hasoru susar. (Rom 15:1; Gal 6:2) Sira mós anima ita atu kontinua serbí Jeová ho badinas no iha fiar neʼebé metin. (Ebr 10:​23-25) Ita sei sente oinsá se kongregasaun la ajuda ita atu hamriik metin hodi kontra ita-nia inimigu, Diabu Satanás no ninia mundu aat neʼe? w22.09 p. 2-3 par. 3-4

Dala ruma susar atu kontrola an bainhira ita uza média sosiál. Se ita la kuidadu, karik ita fó sai informasaun privadu ba ema barak iha tempu ida deʼit. No bainhira ita fahe informasaun liuhusi internét, ita labele kontrola oinsá ema seluk sei uza informasaun neʼe no ita mós la hatene problema saida mak bele mosu. Hahalok kontrola an mós bele ajuda ita atu nafatin nonook bainhira kontradór sira koko lasu ita atu fó sai informasaun neʼebé bele lori perigu ba irmaun-irmán sira. Karik neʼe bele akontese se ita hela iha nasaun neʼebé governu bandu ita-nia atividade no polísia halo interrogasaun ba ita. Ita bele halo tuir prinsípiu atu “kuidadu no taka [ita-nia] ibun” iha situasaun neʼe no mós situasaun seluk. (Sal 39:1) Ita hakarak ita-nia família, belun sira, irmaun-irmán sira no ema seluk atu tau fiar ba ita. Atu sira bele halo nuneʼe, ita presiza kontrola an. w22.09 p. 13 par. 16

Atu bele sente kontente neʼebé loos, ita tenke lee no estuda Bíblia. Jesus kompara Maromak nia Liafuan ho ai-han. Entaun ita presiza lee no estuda Bíblia. Jesus dehan: “Ema labele moris deʼit ho paun, maibé ho liafuan hotu neʼebé sai husi Jeová nia ibun.” (Mt 4:4) Tan neʼe, ita tenke lee no estuda Bíblia loroloron. Iha Bíblia, Jeová fó sai informasaun importante oioin kona-ba oinsá ita bele moris kontente. Porezemplu, ita bele aprende kona-ba objetivu ba ita-nia moris, oinsá atu hakbesik ba Jeová no hetan perdua ba ita-nia sala, no mós esperansa furak neʼebé Jeová promete ona kona-ba futuru. (Jer 29:11) Bainhira ita aprende lia-loos sira-neʼe husi Bíblia, neʼe halo ita-nia laran haksolok. Bainhira ita halo tuir konsellu sira-neʼe, ita sei hetan ksolok. Bainhira ita sente laran-kraik tanba problema ruma, diʼak atu uza tempu barak liután atu lee Bíblia no medita kona-ba neʼe. w22.10 p. 7 par. 4-6

Tan neʼe mak Bíblia anima ita atu la kontinua sai ema neʼebé la iha esperiénsia. Ita bele hetan matenek hodi aplika Bíblia nia prinsípiu sira. Se ita halo nuneʼe, ita sei haree oinsá Bíblia ajuda ita atu hasees an husi problema no halo desizaun neʼebé matenek. Diʼak atu hanoin fali desizaun neʼebé ita halo ona. Se ita estuda Bíblia no tuir reuniaun ona ba tempu balu, karik diʼak atu husu ba ita-nia an tanbasá ita seidauk deside atu dedika an ba Jeová no hetan batizmu. Se ita batizmu ona, ita hakaʼas an aumenta ita-nia matenek atu haklaken no hanorin Bíblia ka lae? Ita-nia desizaun sira hatudu katak ita aplika Bíblia nia prinsípiu ka lae? Ita trata ema hanesan Jesus trata ema seluk ka lae? Se ita presiza halo mudansa ruma, diʼak atu hanoin kleʼan kona-ba Jeová nia matadalan neʼebé halo “ema neʼebé la iha esperiénsia sai matenek”.—Sal 19:7. w22.10 p. 20 par. 8

Iha vizaun ida, Ezequiel haree katak Maromak nia espíritu santu mak kbiit boot. Nia haree oinsá espíritu santu ajuda anju sira neʼebé kbiit boot no mós muda Maromak nia karreta lalehan nian neʼebé boot tebes. (Eze 1:21) Saida mak Ezequiel halo kuandu haree vizaun neʼe? Nia hakerek: “Bainhira haʼu haree ida-neʼe, haʼu hakneʼak hodi hakruʼuk ho oin ba rai.” Ezequiel hakneʼak tanba admira tebes ho vizaun neʼe. (Eze 1:28) Depois neʼe, bainhira Ezequiel hanoin kona-ba vizaun neʼe, nia sai fiar metin liután katak nia bele kumpre ninia serbisu haklaken tanba espíritu santu nia ajuda. Jeová hatete ba Ezequiel: “Oan-mane husi ema, hamriik bá, atu nuneʼe haʼu bele koʼalia ba ó.” Liafuan sira-neʼe no mós Maromak nia espíritu santu ajuda Ezequiel hetan kbiit neʼebé nia presiza atu hamriik. (Eze 2:​1, 2) Husi tempu neʼebá, Maromak nia “forsa” ka espíritu santu mak dirije Ezequiel.—Eze 3:22; 8:1; 33:22; 37:1; 40:1. w22.11 p. 4 par. 7-8

Profeta Isaias hatete katak Jeová mak hanesan Mestre neʼebé laʼo iha estudante sira-nia kotuk no dirije sira atu laʼo iha dalan neʼebé sira tenke laʼo. Ohin loron, ita rona Maromak nia lian husi ita-nia kotuk. Oinsá? Maromak nia liafuan hakerek iha Bíblia laran tinan barak liubá, neʼe hanesan iha ita-nia kotuk. Tan neʼe, bainhira ita lee Bíblia, neʼe hanesan ita rona Maromak nia lian husi ita-nia kotuk. (Isa 51:4) Oinsá mak ita bele hetan benefísiu husi matadalan neʼebé Jeová fó? Hanoin kona-ba fraze rua neʼebé Isaias uza. Primeiru, “dalan mak neʼe”. Segundu, “laʼo tuir ida-neʼe bá”. La toʼo atu hatene deʼit “dalan”. Ita mós presiza “laʼo tuir ida-neʼe”. Jeová nia Liafuan no esplikasaun sira husi ninia organizasaun ajuda ita hatene saida mak Jeová hakarak ita atu halo. Ita mós aprende oinsá atu halo tuir buat neʼebé ita aprende. Atu bele kontinua serbí Jeová ho haksolok, ita presiza halo hakat rua neʼe. Bainhira ita halo nuneʼe, ita bele fiar katak Jeová sei fó kolen mai ita. w22.11 p. 11 par. 10-11

Lakleur depois Jesus nia apóstolu sira mate, ema Kristaun falsu komesa tama ba kongregasaun laran. (Mt 13:​24-27, 37-39) Sira koʼalia “lia-bobar oioin hodi dada sees dixípulu sira atu halo tuir sira”. (Após 20:30) Lia-bobar ida neʼebé ema Kristaun falsu komesa hanorin mak Jesus la fó ninia isin nuʼudar sakrifísiu “dala ida deʼit ba nafatin atu lori ema barak nia sala” hanesan Bíblia hanorin, maibé sira hanorin katak ninia sakrifísiu tenke repete beibeik. (Ebr 9:​27, 28) Ohin loron, ema barak fiar hanorin falsu neʼe. Sira bá igreja semana-semana, ka dala ruma loroloron, atu komemora Jesus nia sakrifísiu, baibain relijiaun Katólika bolu ida-neʼe nuʼudar “Eukaristia”. Relijiaun seluk la komemora beibeik Jesus nia mate, no sira la komprende ho klaru signifikadu husi Jesus nia mate. w23.01 p. 21 par. 5

Durante Jesus nia Ukun ba Tinan Rihun Ida, ema mate sira sei moris fali no ema neʼebé halo tuir Jeová sei sai perfeitu. Ema sira neʼebé Jeová deside nuʼudar ema laran-loos, “sei simu rai nuʼudar sira-nian, no sira sei moris ba nafatin iha rai”. (Sal 37:​10, 11, 29) Tuirmai ema sei kontente tanba ‘inimigu ikus neʼebé sei lakon mak mate’. (1 Kor 15:26) Ita-nia esperansa atu moris ba nafatin bazeia ba Bíblia. Esperansa neʼe bele ajuda ita atu laran-metin nafatin durante loron ikus sira-neʼe neʼebé nakonu ho susar. Maibé atu halo kontente Jeová, ita tenke serbí nia laʼós deʼit tanba ita hakarak atu moris ba nafatin. Ita-nia razaun importante liu atu laran-metin ba Jeová no Jesus mak tanba ita hadomi tebes sira. (2 Kor 5:​14, 15) Domin neʼe motiva ita atu banati-tuir sira no fó sai ita-nia esperansa ba ema seluk. (Rom 10:​13-15) Bainhira ita aprende atu la hanoin an deʼit no hatudu laran-luak, Jeová sei hakarak atu sai ita-nia belun ba nafatin. w22.12 p. 7 par. 15-16

Bainhira ema fó-terus ita, ita bele lakon buat barak neʼebé ajuda ita atu sente kalma. Karik ita sai laran-taridu no taʼuk kona-ba saida mak sei akontese tuirmai. Sentimentu neʼe mak normál. Maibé ita tenke kuidadu. Jesus fó-hatene katak bainhira ema fó-terus ninia dixípulu sira, neʼe bele halo sira sidi. (João 16:​1, 2) Jesus fó-hatene nanis katak ema sei fó-terus ita, nia mós fó sai katak ita bele nafatin laran-metin. (João 15:20; 16:33) Bainhira governu bandu ka hanetik ita-nia atividade, karik ita simu matadalan husi sukursál no katuas sira. Objetivu husi matadalan sira-neʼe mak atu proteje ita, atu ita bele kontinua simu ai-han espirituál no ajuda ita atu kontinua haklaken tuir ita-nia situasaun. Hakaʼas an atu halo tuir matadalan sira neʼebé ita simu. (Tgo 3:17) Ita mós sei la fó sai informasaun kona-ba irmaun-irmán sira ba ema sira neʼebé la iha direitu atu hatene kona-ba neʼe.—Ecle 3:7. w22.12 p. 20 par. 14-16

Ohin loron, Jesus kontinua dirije ninia dixípulu sira nuʼudar sira haklaken kona-ba Maromak nia Ukun iha mundu tomak. Nia kumpre ninia promesa. Liuhusi Jeová nia organizasaun, Jesus treinu ita oinsá atu haklaken no fó ba ita ekipamentu oioin neʼebé ita presiza atu haklaken. (Mt 28:​18-20) Ita presiza halo ita-nia parte hodi haklaken no hanorin ho badinas no mós kontinua matan-moris nuʼudar ita hein ba Jeová atu halakon mundu aat neʼe. Hodi halo tuir konsellu iha Ebreu 6:​11, 12, ita sei kaer metin ba ita-nia esperansa “toʼo rohan”. Jeová hili ona loron no oras atu halakon Satanás nia sistema. Bainhira loron neʼe toʼo mai, Jeová sei kumpre profesia hotu neʼebé nia fó sai. Dala ruma ita hanoin katak mundu nia rohan demora. Maibé Jeová nia loron “sei la tarde”! (Hab 2:3) Tan neʼe, mai ita hakaʼas an atu “kontinua hein ba Jeová” no “hein ho pasiénsia ba Maromak neʼebé salva [ita]”.—Miq 7:7. w23.02 p. 19 par. 15-16

Ema neʼebé saʼe foho iha planu atu toʼo foho-tutun. Maibé durante ninia viajen, iha fatin oioin neʼebé nia bele para no haree buat furak sira. Nuneʼe mós ho Ita, uza tempu beibeik atu hanoin kona-ba oinsá Jeová ajuda Ita hetan susesu maski Ita hasoru daudaun susar. Iha loron ida-idak nia rohan, husu Ita-nia an: ‘Iha dalan saida mak Jeová haraik bensaun ba haʼu ohin? Maski haʼu hasoru daudaun susar, oinsá mak Jeová ajuda haʼu atu tahan?’ Haree toʼok se Ita bele hetan dalan ida neʼebé Jeová ajuda Ita atu hetan susesu. Karik ita halo orasaun atu husu Maromak halakon ita-nia susar. (Flp 4:6) Maibé ita mós presiza haree oinsá Maromak haraik bensaun ba ita agora. Tuir loloos, Jeová promete atu hametin no ajuda ita tahan. Tan neʼe sempre hatudu agradese tanba Jeová apoia ita. Rezultadu mak ita sei haree oinsá Jeová ajuda ita atu hetan susesu.—Gén 41:​51, 52. w23.01 p. 19 par. 17-18

Husu ba Ita-nia an: ‘Dalan neʼebé haʼu halaʼo haʼu-nia moris hatudu katak haʼu komprende lakleur tan mundu aat neʼe sei lakon ka lae? Haʼu-nia desizaun kona-ba edukasaun no serbisu hatudu katak serbí Jeová mak importante liu iha haʼu-nia moris ka lae? Haʼu fiar katak Jeová sei tau matan ba haʼu no haʼu-nia família ka lae?’ Jeová kontente tebes bainhira ita hakaʼas an atu moris tuir ninia hakarak. (Mt 6:​25-27, 33; Flp 4:​12, 13) Ita presiza ezamina beibeik ita-nia hanoin no tuirmai halo mudansa. Paulo hatete ba ema Kristaun iha Korinto: “Kontinua koko imi-nia an atu hatene se imi moris tuir fiar ka lae. Kontinua haree didiʼak imi ema oinsá.” (2 Kor 13:5) Tan neʼe ita presiza hafoun ita-nia hanoin liuhusi lee Bíblia, aprende atu iha hanoin hanesan Jeová nian no hakaʼas an atu halo mudansa hodi bele halo Jeová kontente.—1 Kor 2:​14-16. w23.01 p. 9 par. 5-6