Outubru

Ita hotu bele hola parte iha reuniaun hodi kanta hamutuk no mós fó komentáriu neʼebé ita prepara ona ho didiʼak. Ema balu sente susar atu kanta ka fó komentáriu. Ita rasik sente hanesan neʼe ka lae? Se nuneʼe, haree saida mak ema seluk halo ona atu la sente taʼuk atu kanta no fó komentáriu. Kona-ba kanta knananuk, ema balu sente katak kanta ho laran tomak bele ajuda. Bainhira ita kanta iha reuniaun, ita-nia objetivu primeiru mak atu fó hahiʼi ba Jeová. Tan neʼe, bainhira ita prepara ba reuniaun, treinu mós atu kanta knananuk sira no koko atu komprende oinsá knananuk nia liafuan liga ho tópiku neʼebé sei aprende iha reuniaun. No mós, tau fokus ba knananuk nia liafuan sira, duké ba ita-nia abilidade atu kanta. Ema balu sente susar atu fó komentáriu. Saida mak bele ajuda? Koko atu fó komentáriu beibeik. Hanoin-hetan katak la problema se ita-nia resposta mak badak, simples no temi deʼit pontu importante. Jeová hafolin tebes ita-nia hakaʼas an atu fó hahiʼi ba nia iha reuniaun sira. w22.04 p. 7-8 par. 12-15

Livru ida kona-ba Bíblia esplika katak liafuan “ajuda-naʼin” refere ba ema ida neʼebé halai atu ajuda ema neʼebé husu ajuda. Imajina kona-ba Jeová neʼebé halai atu salva ema neʼebé hasoru susar. Liafuan sira-neʼe ajuda ita komprende katak Jeová prontu no hakarak tebes atu ajuda ita. Ita bele tahan susar sira ho haksolok tanba Jeová mak ajuda ita. Oinsá Jeová ajuda ita? Atu hatán ba pergunta neʼe, mai ita haree livru Isaias. Tanbasá? Tanba profesia barak neʼebé Jeová fó sai ba Isaias bele aplika ba Maromak nia atan sira ohin loron. No mós baibain Isaias koʼalia kona-ba Jeová iha dalan neʼebé fasil ba ita atu komprende. Isaias kapítulu 30 iha ezemplu balu kona-ba neʼe. Iha kapítulu neʼe, Isaias uza ai-knanoik furak oioin atu esplika oinsá Jeová ajuda ita (1) liuhusi rona didiʼak no hatán ita-nia orasaun, (2) liuhusi fó matadalan ba ita no (3) liuhusi haraik bensaun ba ita agora no mós iha futuru. w22.11 p. 8 par. 2-3

Iha Jesus nia lia-menon ba kongregasaun iha Esmirna no Filadélfia, nia fó-hatene sira atu la sente taʼuk bainhira ema kontra sira tanba Jeová sei fó kolen se sira laran-metin nafatin. (Apok 3:10) Ita hatene katak ema sei kontra ita no ita presiza sai prontu atu tahan ida-neʼe. (Mt 24:​9, 13; 2 Kor 12:10) Livru Apokalipse fó-hatene ita katak ema sei kontra Maromak nia povu durante “Naʼi nia loron”, no ita moris daudaun iha tempu neʼe. (Apok 1:10) Apokalipse kapítulu 12 fó sai katak funu mosu iha lalehan lakleur depois Jesus sai Liurai. Miguel ka Jesus Kristu neʼebé hetan ona glória no ninia tropa sira funu hasoru Satanás no anju aat sira. (Apok 12:​7, 8) Rezultadu mak Maromak nia inimigu sira-neʼe lakon funu no soe tun tiha ba rai. Ida-neʼe lori susar barak ba rai no mós ba sira neʼebé hela iha rai.—Apok 12:​9, 12. w22.05 p. 5 par. 12-13

Jeová nia tesi-lia sempre loos no justu. Nia la todan ba sorin. Jeová perdua ema la bazeia ba oin-kapás, riku, naran-boot ka iha talentu. (1 Sam 16:7; Tgo 2:​1-4) La iha ema ida mak bele obriga Jeová ka selu Jeová atu troka ninia desizaun. Jeová nunka husik sentimentu hirus ka sentimentu seluk atu afeta ninia desizaun. (Éx 34:7) Jeová mak Juís neʼebé diʼak liu hotu tanba nia komprende ita no ita-nia situasaun. (Deut 32:4) Ema sira neʼebé hakerek Eskritura Lian Ebraiku rekoñese katak Jeová nia dalan atu fó perdua mak espesiál. Livru ida esplika katak iha liafuan Ebraiku ida neʼebé hakerek-naʼin sira “uza bainhira koʼalia kona-ba Jeová nia dalan atu perdua ema no liafuan neʼe nunka uza atu koʼalia kona-ba dalan neʼebé ema fó perdua ba malu”. Só Jeová deʼit mak iha kbiit atu fó perdua iha dalan neʼebé kompletu. w22.06 p. 4 par. 10-11

Se Ita haboot oan mesak ka Ita-nia laʼen la serbí Jeová, fiar bá katak Ita-nia ezemplu hametin no anima ema seluk. Saida mak Ita bele halo se Ita-nia oan la interese atu serbí Jeová maski Ita hakaʼas an ona? Hanoin-hetan katak presiza tempu atu bele treinu labarik sira. Bainhira Ita kuda fini, karik dala ruma Ita duvida se fini neʼe sei moris no fó fuan ka lae. Maski Ita labele kontrola ida-neʼe, maibé Ita nafatin rega ai-horis neʼe atu bele fó rezultadu diʼak. (Mc 4:​26-29) Nuneʼe mós nuʼudar inan, dala ruma Ita duvida se Ita konsege book Ita-nia oan nia laran ka lae. Ita labele kontrola oan sira-nia desizaun. Maibé se Ita kontinua atu treinu sira, Ita bele fó oportunidade ba sira atu sai Maromak nia belun. w22.04 p. 19-20 par. 16-17

Bainhira Salomão adora Jeová ho laran-metin, nia iha hanoin neʼebé loos kona-ba ninia an. Kuandu nia sei joven no foin komesa ukun, nia ho haraik an rekoñese ninia limitasaun no husu matadalan husi Jeová. (1 Reis 3:​7-9) Salomão mós komprende katak perigu atu sai foti an. Triste mak ikusmai Salomão la aplika ninia konsellu rasik. Ikusmai, nia ho foti an la halo tuir Maromak nia hakarak. Porezemplu, ukun-fuan ida hatete katak ema Izraél nia liurai “labele hola feto barak nuʼudar ninia feen, atu nuneʼe ninia laran labele sees husi” Jeová. (Deut 17:17) Salomão la halo tuir ukun-fuan neʼe no nia iha feen 700 no feen-kiʼik 300. (1 Reis 11:​1-3) Karik Salomão sente katak neʼe sei la lori perigu ba nia. Maibé ikusmai Salomão hetan konsekuénsia aat tanba hadook an husi Jeová.—1 Reis 11:​9-13. w22.05 p. 23 par. 12

Ohin loron ema presiza halo desizaun importante. Sira presiza deside atu apoia Maromak Jeová nuʼudar Ukun-Naʼin ba universu ka apoia Maromak nia inimigu Diabu Satanás. Ema hotu tenke hili atu apoia sé no labele neutrál deʼit. Atu bele hetan moris rohan-laek ka lae, neʼe depende ba desizaun neʼebé sira halo agora. (Mt 25:​31-33, 46) Durante “terus boot”, sira sei simu marka neʼebé hatudu katak sira sei hetan salvasaun ka sira sei lakon ba nafatin. (Apok 7:14; 14:​9-11; Eze 9:​4, 6) Se Ita hili atu apoia Jeová nia ukun, Ita halo desizaun neʼebé matenek. Ita mós hakarak atu ajuda ema seluk halo desizaun neʼebé diʼak. Sira neʼebé laran-metin atu apoia Maromak nia ukun sei simu bensaun. Ita presiza estuda lia-loos importante sira-neʼe. Neʼe sei ajuda ita atu deside metin atu kontinua serbí Jeová. Liután neʼe, ita bele uza buat neʼebé ita aprende ona atu ajuda ema seluk deside atu serbí Jeová no kontinua serbí Jeová. w22.05 p. 15 par. 1-2

Ita presiza rona ba Jeová, laʼós ba ita-nia inimigu sira. Job tau atensaun didiʼak bainhira Jeová koʼalia ba nia. Jeová ajuda Job atu hanoin kleʼan hodi husu pergunta hanesan: ‘Haʼu hatene buat hotu neʼebé akontese ona ba ó. Ó hanoin haʼu labele tau matan ba ó ka?’ Job hatán ho haraik an no hafolin Jeová nia hahalok diʼak sira. Job hatete: “Uluk haʼu-nia tilun rona ona kona-ba Ita, maibé agora haʼu-nia matan rasik haree Ita.” (Job 42:5) Bainhira Job hatete liafuan sira-neʼe, karik nia tuur daudaun iha ahi-kadesan laran, ninia isin-lolon nakonu ho fisur. Maski nuneʼe, Jeová fó sai katak nia hadomi Job no kontente ho Job. (Job 42:​7, 8) Ohin loron karik ema la hafolin ita no mós trata aat ita. Sira koko atu estraga ita-nia naran diʼak ka organizasaun nia naran diʼak. Ita aprende saida husi Job nia istória? Jeová fiar katak ita sei laran-metin ba nia maski iha susar laran. w22.06 p. 23-24 par. 15-16

Maski lalehan haksolok bainhira Babilónia Boot lakon, maibé iha buat seluk tan neʼebé lori ksolok boot ba lalehan. (Apok 19:​1-3) Neʼe mak “Bibi-Oan nia kazamentu”, no ida-neʼe mak akontesimentu importante neʼebé fó sai iha livru Apokalipse. Ema hotu neʼebé sai parte ba ema naʼin-144.000 saʼe ona ba lalehan antes funu Armagedon komesa. Maski nuneʼe, neʼe laʼós tempu atu halaʼo Bibi-Oan nia kazamentu. (Apok 21:​1, 2) Kazamentu neʼe sei halaʼo depois funu Armagedon no Maromak nia inimigu hotu lakon ona. (Sal 45:​3, 4, 13-17) Saida mak sei akontese bainhira halaʼo Bibi-Oan nia kazamentu? Kazamentu halo feto ida no mane ida sai ida deʼit. Nuneʼe mós Bibi-Oan nia kazamentu halo Liurai Jesus Kristu no ninia “noiva” katak ema naʼin-144.000 sei sai ida deʼit. Hahú husi akontesimentu neʼe, ema naʼin-144.000 hamutuk ho Jesus sei ukun mundu tomak durante tinan 1.000.—Apok 20:6. w22.05 p. 17 par. 11-13

Jesus fó-hatene nanis katak durante tempu nia rohan, nia sei hili “atan laran-metin no matenek” atu fó ai-han espirituál. (Mt 24:45) No neʼe akontese duni. Jesus uza irmaun grupu kiʼik ida neʼebé iha esperansa atu bá lalehan atu fó ai-han espirituál “iha tempu loloos” ba Maromak nia povu no ba ema neʼebé hatudu interese. Irmaun sira-neʼe la domina ita-nia fiar. (2 Kor 1:24) Duké halo nuneʼe, sira rekoñese katak Jesus Kristu mak “ulun-naʼin no ukun-naʼin” ba ninia povu. (Isa 55:4) Husi tinan 1919, atan laran-metin prepara publikasaun oioin atu ajuda ema aprende lia-loos husi Maromak nia Liafuan. Iha tinan 1921, atan neʼe prepara livru Maromak nia Arpa atu ajuda ema aprende lia-loos báziku husi Bíblia. Nuʼudar tempu liu daudaun, atan neʼe mós halo publikasaun sira seluk. Publikasaun saida mak ajuda Ita atu koñese no hadomi Jeová? w22.07 p. 10 par. 9-10

Jeová mak laran-luak tebes. Jeová sempre fó barak liu fali se kompara ho buat neʼebé Ita fó ba nia. (Mc 10:​29, 30) Nia sei fó ba Ita moris neʼebé kontente no iha objetivu, maski agora daudaun Ita moris iha mundu neʼebé aat. Ita hahú iha relasaun diʼak ho Jeová no Ita bele kontinua serbí Jeová ba nafatin. Domin entre Ita no Ita-nia Aman Jeová sei kontinua sai boot liután. Ita sei moris ba nafatin hanesan ho nia. Bainhira Ita dedika an ba Maromak no hetan batizmu, Ita bele fó buat neʼebé folin-boot ba nia. Nia fó ona buat diʼak hotu neʼebé halo Ita kontente. Atu hatudu agradese, Ita bele fó ba Maromak buat neʼebé nia seidauk iha, neʼe mak Ita-nia laran-metin. (Job 1:8; 41:11; Prov 27:11) Serbí Maromak ho laran-metin mak dalan diʼak liu atu uza Ita-nia moris. w23.03 p. 6 par. 16-17

Bainhira joven, hakarak seksuál bele sai makaʼas no dala ruma ema seluk bele fó presaun ba Ita atu halo sala seksuál. Satanás hakarak Ita atu halo tuir deʼit Ita-nia hakarak rasik. Saida mak bele ajuda Ita atu moos nafatin iha dalan morál? (1 Tes 4:​3, 4) Halo orasaun ba Jeová hodi fó sai Ita-nia sentimentu no husu nia atu fó forsa ba Ita. (Mt 6:13) Hanoin-hetan katak Jeová hakarak ajuda Ita, laʼós fó-kastigu ba Ita. (Sal 103:​13, 14) Keta koko atu rezolve Ita-nia problema mesak deʼit. Importante atu koʼalia ho Ita-nia inan-aman kona-ba susar neʼebé Ita hasoru, maski dala ruma la fasil atu koʼalia kona-ba tópiku neʼebé privadu. Bainhira Ita lee Bíblia no medita kona-ba Bíblia nia prinsípiu sira, fasil liu atu foti desizaun sira neʼebé halo Jeová kontente. Ita sei nota katak Ita la presiza ukun-fuan ba situasaun ida-idak tanba Ita komprende Jeová nia hanoin kona-ba situasaun neʼe. w22.08 p. 5 par. 10-12

Ulun ba família presiza kaer didiʼak sira-nia responsabilidade atu tau matan ba família. Karik Ita hanoin barak katak Ita labele sosa hahán no mós selu aluga. Karik Ita mós hanoin barak katak se Ita lakon Ita-nia serbisu, Ita labele hetan fali serbisu seluk ka Ita hanoin katak Ita sei nunka bele moris ho osan uitoan deʼit. Satanás konsege hapara ema barak atu serbí Jeová tanba taʼuk. Satanás koko atu halo ita fiar katak Jeová la hadomi ita no Jeová sei la ajuda ita atu tau matan ba ita-nia família. Tan neʼe, karik ita hanoin katak ita presiza halo buat naran deʼit atu la lakon serbisu. Karik neʼe inklui halo buat neʼebé kontra Bíblia nia prinsípiu sira. w22.06 p. 15 par. 5-6

Ita hatene katak ita-nia Maromak mak “laran-sadiʼa no laran-diʼak, la hirus lalais no nakonu ho domin neʼebé laran-metin no lia-loos”. (Éx 34:6) Jeová hadomi justisa. (Isa 61:8) Nia sente laran-kanek bainhira haree ita hasoru susar, no nia mós prontu no hakarak atu halakon susar hotu iha tempu neʼebé nia deside ona. (Jer 29:11) Ita hein namanas ba tempu neʼe. Neʼe mak razaun ida tanbasá ita hadomi tebes Jeová. Saida mak razaun seluk atu hafolin lia-loos? Lia-loos lori benefísiu mai ita. Hanoin toʼok ezemplu ida. Lia-loos husi Bíblia mós inklui esperansa kona-ba futuru. Hanesan ankor neʼebé halo ró la muda arbiru, ita-nia fiar neʼebé bazeia ba Bíblia mós bele ajuda ita hamriik metin bainhira hasoru susar. Iha eskritura ba ohin, apóstolu Paulo koʼalia kona-ba esperansa atu bá lalehan. Maibé ninia liafuan mós aplika ba ema Kristaun sira neʼebé hein namanas atu moris ba nafatin iha mundu paraízu. (João 3:16) Klaru katak ita-nia moris iha objetivu bainhira ita aprende tiha kona-ba esperansa atu moris ba nafatin. w22.08 p. 14-15 par. 3-5

Domin bele ajuda ita atu tau fiar ba ema seluk. Primeiru Korinto kapítulu 13 temi parte oioin husi domin neʼebé bele ajuda ita hametin ka tau fiar fali ba ema seluk. (1 Kor 13:​4-8) Porezemplu, versíkulu 4 hatete katak “domin mak pasiénsia no laran-diʼak”. Jeová hatudu pasiénsia mai ita, maski ita halo sala hasoru nia. Tan neʼe, ita presiza hatudu pasiénsia ba irmaun-irmán sira kuandu sira hatete ka halo buat ruma neʼebé halo ita hirus ka laran-kanek. Versíkulu 5 hatete: “[Domin] la sai hirus lalais. Domin la hanoin fali buat aat neʼebé nia simu.” Neʼe katak ita lakohi hanoin hela buat aat hotu neʼebé irmaun-irmán sira halo atu hakanek ita-nia laran. Eclesiastes 7:9 hatete katak ita labele “sente an lalais”. Hakaʼas an haree irmaun-irmán sira tuir Jeová nia haree. Maromak hadomi sira no haluha tiha sira-nia sala. Ita mós tenke halo nuneʼe. (Sal 130:3) Duké tau fokus ba sira-nia fraku, tau fokus ba sira-nia hahalok diʼak.—Mt 7:​1-5. w22.09 p. 3-4 par. 6-7

Livru Daniel fó sai akontesimentu tuituir malu neʼebé sei akontese durante tempu nia rohan. Porezemplu, Daniel 12:1 esplika katak Miguel ka Jesus Kristu “hamriik daudaun hodi apoia” Maromak nia povu. Profesia neʼe komesa sai loos iha tinan 1914 bainhira Jesus sai nuʼudar Liurai ba Maromak nia Ukun iha lalehan. Maibé Daniel mós esplika katak Jesus “sei hamriik” durante “tempu susar neʼebé ema seidauk hasoru husi tempu neʼebé harii nasaun sira toʼo tempu neʼe”. “Tempu susar” neʼe mak “terus boot” neʼebé temi iha Mateus 24:21. Jesus sei hamriik atu defende Maromak nia povu iha tempu susar nia rohan, katak iha funu Armagedon. Livru Apokalipse bolu povu neʼe nuʼudar “ema-lubun boot” neʼebé “liu terus boot”.—Apok 7:​9, 14. w22.09 p. 21 par. 4-5

Maromak bele hamoos ka apaga ema nia naran husi livru moris nian. Neʼe hanesan naran neʼe hakerek deʼit ho lapis. (Apok 3:​5, nota) Ita tenke hakaʼas an atu Maromak la hamoos ita-nia naran husi livru neʼe toʼo tempu neʼebé ita-nia naran hakerek ho permanente iha livru neʼe hanesan hakerek ho lapizeira. Ema neʼebé naran hakerek ona iha livru moris nian mak sira neʼebé Maromak hili atu ukun hamutuk ho Jesus iha lalehan. Kona-ba ema neʼebé Maromak hili atu ukun hamutuk ho Jesus iha lalehan, apóstolu Paulo dehan katak sira-nia naran hakerek ona iha livru moris nian. Nia fó sai ida-neʼe iha ninia karta ba “maluk serbisu-naʼin” sira iha Filipe. (Flp 4:3) Maibé atu Maromak la hamoos sira-nia naran, sira presiza kontinua laran-metin. Bainhira sira simu sinál ikus antes sira mate ka antes terus boot hahú, sira-nia naran sei hakerek permanente iha livru neʼe.—Apok 7:3. w22.09 p. 14 par. 3; p. 15 par. 5-6

Hanoin toʼok, ema ida teʼin Ita-nia hahán favoritu. Maibé Ita han lalais deʼit no la uza tempu atu sente ai-han nia sabór tanba ansi ka okupadu. Ikusmai, Ita arrepende an tanba han ho ansi. Nuneʼe mós ho lee Bíblia. Dala ruma Ita lee ho ansi, tan neʼe Ita ladún sente sabór husi Bíblia nia mensajen. Diʼak atu uza tempu atu hafolin buat neʼebé Ita lee husi Bíblia. Porezemplu, imajina buat neʼebé akontese, imajina katak Ita rona lian oioin, no hanoin kona-ba buat neʼebé Ita lee. Bainhira Ita halo ida-neʼe, Ita sei sente kontente liu. Jesus hili “atan laran-metin no matenek” atu fó ai-han espirituál iha tempu neʼebé loos, no ita simu ai-han espirituál barak. (Mt 24:45) Ai-han espirituál hotu neʼebé atan neʼe prepara bazeia ba Bíblia.—1 Tes 2:13. w22.10 p. 7-8 par. 6-8

Bíblia hatete katak iha loron ikus sira, sei mosu gozadór barak. (2 Ped 3:​3, 4) Gozadór sira halo ida-neʼe tanba hakarak halo tuir “sira-nia hakarak rasik hodi halo buat neʼebé aat”. (Jud 7, 17, 18) Saida mak ita presiza halo atu la sai hanesan gozadór sira? Dalan ida mak keta ransu ho ema neʼebé kritika buat hotu. (Sal 1:1) Neʼe katak ita sei la rona ka lee buat ruma husi apóstata sira. Ita rekoñese katak se ita la kuidadu, ita bele sai toman atu kritika no mós komesa duvida kona-ba Jeová no matadalan neʼebé ita simu husi ninia organizasaun. Atu bele hasees an husi hahalok neʼe, husu ba ita-nia an: ‘Haʼu sempre kritika matadalan no esplikasaun foun ka lae? Haʼu sempre buka sala husi ema sira neʼebé dirije Jeová nia povu ka lae?’ Se ita hapara kedas toman aat sira-neʼe, Jeová sei kontente ho ita.—Prov 3:​34, 35. w22.10 p. 20 par. 9-10

Maromak nia espíritu fó kbiit ba Ezequiel atu halo ninia knaar atu haklaken ba ema neʼebé “ulun-toos no laran-toos”. Jeová hatete ba Ezequiel: “Haʼu halo ona ó-nia oin sai toos hanesan sira-nia oin no ó-nia reen-toos sai toos hanesan sira-nian. Haʼu halo ona ó-nia reen-toos sai hanesan fatuk-diamante, toos liu fali fatuk-ahi. Keta taʼuk ba sira no keta nakdedar bainhira ó haree sira-nia oin.” (Eze 3:​8, 9) Neʼe hanesan Jeová hatete ba Ezequiel: ‘Keta sai laran-kraik tanba ema ulun-toos. Haʼu sei hametin ó.’ Depois neʼe, Maromak nia espíritu santu ajuda Ezequiel iha serbisu haklaken. Ezequiel hakerek: “Haʼu sente Jeová nia forsa neʼebé boot.” Ezequiel presiza semana ida atu bele aprende no komprende didiʼak mensajen neʼebé nia simu. (Eze 3:​14, 15) Tuirmai Jeová haruka Ezequiel atu laʼo ba rai-tetuk no iha neʼebá nia sai “nakonu ho espíritu”. (Eze 3:​23, 24) Ezequiel prontu ona atu komesa haklaken. w22.11 p. 4 par. 8-9

Profeta Habakuk hasoru susar barak. Loron ida, nia duvida kona-ba Jeová hanoin nia ka lae. Tan neʼe, nia fakar sai ninia sentimentu ba Jeová liuhusi orasaun. Jeová hatán Habakuk nia orasaun. (Hab 2:​2, 3) Depois Habakuk medita tiha kona-ba oinsá uluk Jeová salva ninia povu, Habakuk sai kontente fali. Nia fiar metin katak Jeová hanoin nia no sei ajuda nia atu tahan susar naran deʼit. (Hab 3:​17-19) Ita aprende saida? Bainhira ita hasoru susar, halo orasaun ba Jeová no fó sai ita-nia sentimentu. Tuirmai buka ajuda husi nia. Bainhira ita halo nuneʼe, ita bele fiar metin katak Jeová sei fó ita kbiit atu tahan. Bainhira ita sente katak nia apoia ita, ita-nia fiar sei sai metin liután. Se Ita kontinua mantein Ita-nia toman espirituál, Ita sei la husik susar sira ka sentimentu duvida atu haketak Ita husi Jeová.—1 Tim 6:​6-8. w22.11 p. 15 par. 6-7

Jesus no mós kriminozu naʼin-rua neʼebé hetan kastigu iha ai-riin sente moras tebes nuʼudar sira besik atu mate. (Lc 23:​32, 33) Kriminozu naʼin-rua neʼe goza Jesus. (Mt 27:44; Mc 15:32) Maibé kriminozu ida troka ninia hahalok. Nia hatete: “Jesus, hanoin-hetan haʼu bá kuandu Ita tama iha Ita-nia Ukun.” Jesus hatán ho liafuan sira iha eskritura ba ohin. (Lc 23:​39-42) Jesus nia liafuan ba kriminozu neʼe book ita atu hanoin kona-ba moris iha Paraízu. Ita bele aprende buat ruma kona-ba Paraízu hodi hanoin kona-ba Liurai Salomão nia ukun neʼebé iha dame. No Bíblia dehan katak Jesus mak boot liu fali Salomão. Entaun ita bele fiar katak Jesus no sira neʼebé ukun ho nia sei serbisu hamutuk atu halo rai sai paraízu neʼebé furak. (Mt 12:42) Tan neʼe, “bibi-malae seluk” hakarak hatene saida mak sira presiza halo atu bele moris ba nafatin iha Paraízu.—João 10:16. w22.12 p. 8 par. 1; p. 9 par. 4

Isaias nia liafuan hatudu katak Jeová sei rona didiʼak bainhira ita husu ajuda husi nia no nia sei halo buat ruma lalais atu hatán ita-nia orasaun. Isaias mós hatete: “Nia sei hatán kedas bainhira nia rona imi halerik.” Liafuan sira-neʼe fó kmaan mai ita tanba ita-nia Aman prontu no hakarak ajuda ita kuandu ita husu ajuda husi nia. Neʼe mós ajuda ita atu tahan ho haksolok. Jeová rona didiʼak ba ita ida-idak nia orasaun. Tanbasá ita bele dehan nuneʼe? Iha lian orijinál, parte primeiru husi Isaias kapítulu 30 uza liafuan “imi” tanba Jeová koʼalia ba ninia povu nuʼudar grupu. Maibé iha versíkulu 19, Isaias uza liafuan “ó” tanba koʼalia ba ema ida-idak. Isaias hakerek: “Ó sei la tanis tan”; “Maromak sei hatudu duni laran-diʼak ba ó”; ‘Nia sei hatán ó’. Jeová mak Aman neʼebé domin, tan neʼe Jeová hanoin ita no rona didiʼak ba ita ida-idak nia orasaun.—Sal 116:1; Isa 57:15. w22.11 p. 9 par. 5-6

Ita sei hetan ksolok no dame bainhira ita kontinua haklaken no hanorin maski ema fó-terus ita. Iha apóstolu sira-nia tempu, bainhira ulun-naʼin Judeu sira haruka apóstolu sira atu para haklaken, sira hili atu halo tuir Maromak. Sira kontinua haklaken, no ida-neʼe halo sira sente kontente. (Após 5:​27-29, 41, 42) Bainhira autoridade bandu serbisu haklaken, ita tenke haklaken ho kuidadu. Maibé se ita hakaʼas an, ita sei hetan dame tanba halo Jeová kontente no fahe mensajen neʼebé bele salva moris. Fiar bá katak maski hasoru susar oioin, ita bele iha dame. Iha tempu susar sira, ita tenke hanoin-hetan katak ita presiza dame neʼebé mai deʼit husi Jeová. Sadere ba nia bainhira mosu moras-peste, akontese dezastre ka kuandu ema fó-terus ita. Nafatin hakbesik ba Jeová nia organizasaun. Hateke ba futuru kapás neʼebé lakleur tan ita sei hetan. Se ita halo nuneʼe, ‘Maromak dame nian sei hamutuk ho ita’.—Flp 4:9. w22.12 p. 21 par. 17-18

Ita presiza hakaʼas an atu halo nuneʼe. Ita presiza hakaʼas an atu hasai hahalok aat sira hanesan laran-nakali no hirus. (Éf 4:​31, 32) Tanbasá neʼe susar? Tanba hahalok aat balu karik metin ona iha ita-nia laran. Porezemplu, Bíblia hatete katak ema balu “hirusdór” no “sempre sai hirus lalais”. (Prov 29:22) Ema neʼebé iha hahalok aat sira-neʼe, presiza kontinua hakaʼas an atu halo mudansa maski nia batizmu ona. (Rom 7:​21-23) Halo orasaun ba Jeová kona-ba hahalok neʼebé ita sente susar atu troka, no fiar katak nia sei rona no ajuda ita. (1 João 5:​14, 15) Maski Jeová la hasai kedas ita-nia hahalok aat neʼe, maibé nia bele hametin ita atu ita la halo fali hahalok neʼe. (1 Ped 5:10) Ita mós tenke halo tuir ita-nia orasaun hodi hasees an husi buat neʼebé bele book ita atu hatudu fali hahalok tuan nian. Keta hanoin beibeik kona-ba hakarak neʼebé sala.—Flp 4:8; Kol 3:2. w23.01 p. 10 par. 7, 9-10

Dalan ida atu hatudu domin mak liuhusi haklaken ho laran-manas. Ita hakarak haklaken ba ema hotu neʼebé ita hasoru. Ita lakohi diskrimina ema tanba sira riku ka kiak, iha edukasaun aas ka la eskola, ka mai husi rasa no suku neʼebé la hanesan ho ita. Bainhira ita halo nuneʼe, ita halo tuir Jeová nia hakarak atu “ema hotu hetan salvasaun no hetan koñesimentu neʼebé loos kona-ba lia-loos”. (1 Tim 2:4) Ita mós prova katak ita hadomi Maromak no Kristu liuhusi hatudu domin ba irmaun-irmán sira. Hatudu interese no ajuda sira kuandu sira hasoru susar. Fó kmaan ba sira bainhira ema neʼebé sira hadomi mate, vizita sira bainhira sira moras, no hakaʼas an atu anima sira bainhira sira laran-kraik. (2 Kor 1:​3-7; 1 Tes 5:​11, 14) Kontinua halo orasaun ba sira tanba ita hatene katak “ema laran-loos nia harohan iha forsa boot tebes”.—Tgo 5:16. w23.01 p. 28-29 par. 7-8

Badaen ida bele sai matenek liután atu halo ninia serbisu, nuneʼe mós ita bele sai matenek liután atu hametin malu. Ita bele ajuda irmaun-irmán sira atu hetan forsa hodi tahan susar liuhusi konta esperiénsia kona-ba fiar-naʼin sira neʼebé konsege tahan susar. (Ebr 11:​32-35; 12:1) Ita bele haburas dame liuhusi koʼalia kona-ba irmaun-irmán sira-nia hahalok diʼak, mantein dame bainhira mosu problema, no buka dame bainhira iha ideia la hanesan. (Éf 4:3) No ita bele kontinua hametin irmaun-irmán sira-nia fiar liuhusi fahe lia-loos importante husi Bíblia, fó ajuda neʼebé sira presiza, no apoia sira neʼebé fraku iha dalan espirituál. Ita bele sente kontente bainhira ita ajuda hametin irmaun-irmán sira-nia fiar. Uma neʼebé ema harii bele sai aat, maibé ita-nia hakaʼas an atu hametin irmaun-irmán sira bele lori rezultadu diʼak neʼebé ba nafatin. w22.08 p. 22 par. 6; p. 25 par. 17-18

Jesus fó sai buat ida neʼebé ita presiza halo atu bele komprende buat neʼebé ita lee iha Bíblia, neʼe mak hanoin didiʼak ka haburas kbiit atu tetu didiʼak. (Mt 24:15) “Hanoin didiʼak” iha eskritura neʼe katak sá? Neʼe refere ba kbiit atu komprende oinsá ideia sira liga malu, oinsá ideia ida la hanesan ho ideia seluk no mós komprende buat neʼebé la fó sai ho klaru. Jesus mós esplika katak ita presiza kbiit neʼe atu bele komprende oinsá akontesimentu sira kumpre Bíblia nia profesia. Ita mós presiza hanoin didiʼak atu bele hetan benefísiu husi buat hotu neʼebé ita lee iha Bíblia. Jeová fó kbiit atu tetu didiʼak ba ninia atan sira. Tan neʼe, halo orasaun ba nia no husu ninia ajuda atu haburas kbiit neʼe. Oinsá mak Ita bele halo tuir Ita-nia orasaun? Analiza didiʼak buat neʼebé Ita lee, no hanoin oinsá ida-neʼe liga ho buat seluk neʼebé Ita hatene ona. Buka hatene buat neʼebé Ita lee iha Bíblia no oinsá Ita bele halo tuir. (Ebr 5:14) Bainhira Ita lee no hanoin didiʼak, neʼe sei ajuda Ita komprende Eskritura sira ho diʼak liután. w23.02 p. 10 par. 7-8

Imajina toʼok ita-nia kolega fó ita dezeñu antigu neʼebé folin-boot. Dezeñu neʼe iha noda, kór balu lakon ona no mós naklees uitoan. Maski nuneʼe, dezeñu nia folin mak dolar millaun ba millaun. Klaru katak Ita sei hafolin no proteje dezeñu neʼe. Jeová fó ba ita prezente neʼebé folin-boot, neʼe mak moris. Tuir loloos, Jeová hatudu katak nia hafolin tebes ita-nia moris hodi fó ninia Oan-Mane nia moris nuʼudar sakrifísiu ba ita. (João 3:16) Jeová mak Hun ba moris. (Sal 36:9) Apóstolu Paulo rekoñese ida-neʼe hodi hatete: “Tanba liuhusi nia mak ita hetan moris, book an no iha.” (Após 17:​25, 28) Entaun ita bele dehan katak ita-nia moris mak prezente husi Maromak. Ho domin, nia fó buat hotu neʼebé ita presiza atu bele kontinua moris. (Após 14:​15-17) Maibé ohin loron, Jeová la halo milagre atu ita labele mate. Jeová hakarak ita atu hakaʼas an tau matan ba ita-nia saúde fíziku no espirituál.—2 Kor 7:1. w23.02 p. 20 par. 1-2

Ita agradese tebes tanba Jeová fó Bíblia ba ita! Bíblia fó matadalan matenek neʼebé bele ajuda ita tahan problema sira ho susesu. Maromak mós fó ba ita esperansa kapás kona-ba futuru. Maibé importante liu mak Jeová fó sai ninia hahalok oioin liuhusi Bíblia. Bainhira ita medita kona-ba ninia hahalok sira, neʼe book tebes ita-nia laran no motiva ita atu sai Maromak nia belun. (Sal 25:14) Jeová hakarak ema atu koñese nia. Iha tempu uluk, nia fó sai kona-ba ninia an liuhusi mehi, vizaun no mós anju sira. (Núm 12:6; Após 10:​3, 4) Maibé se ema la hakerek kona-ba mensajen husi anju, kona-ba mehi, ka vizaun sira, ita labele estuda kona-ba neʼe. Tan neʼe, Jeová haruka ema hakerek buat neʼebé nia hakarak ita atu hatene “iha livru ida”. “Maromak loos nia dalan mak perfeitu”, tan neʼe ita bele iha konfiansa katak ninia dalan atu komunika ho ita mak diʼak no lori benefísiu mai ita.—Sal 18:30. w23.02 p. 2 par. 1-2

Halo planu neʼebé diʼak. Ita presiza halo planu neʼebé bele ajuda hametin Ita-nia fiar no sai maduru liután. (Éf 3:16) Porezemplu, karik Ita deside atu sai toman lee no estuda Bíblia beibeik. (Sal 1:​2, 3) Ka karik Ita deside atu halo orasaun husi laran no dala barak liu fali uluk. Karik Ita presiza kontrola an liután kona-ba atividade halimar neʼebé Ita hili no oinsá Ita uza Ita-nia tempu. (Éf 5:​15, 16) Ita bele sai ema Kristaun neʼebé maduru bainhira Ita ajuda ema seluk. Porezemplu, karik Ita bele halo planu atu ajuda irmaun-irmán sira neʼebé idade ka moras. Karik Ita bele kompras ba sira ka ajuda sira aprende oinsá atu uza sira-nia sasán eletróniku. Ita mós bele hatudu domin ba ema seluk hodi haklaken liafuan diʼak kona-ba Maromak nia Ukun. (Mt 9:​36, 37) Se bele, halo planu atu serbí Jeová tempu-tomak. w22.08 p. 6-7 par. 16-17