Novembru

Ema Kristaun labele uza liafuan aat. Maibé ita mós presiza kuidadu atu labele koʼalia aat ema. Porezemplu, ita presiza kuidadu atu la koʼalia aat kona-ba ema seluk nia kultura, suku ka nasionalidade. Ita mós lakohi hakanek ema seluk nia laran hodi hatún sira. Koʼalia hodi hametin ema seluk. Lalais atu gaba ema seluk duké kritika ka muramura. Ema Izraél bele fó agradese kona-ba buat barak, maski nuneʼe sira muramura beibeik. Bainhira ita muramura, neʼe mós bele book ema seluk atu muramura. Hanoin-hetan kona-ba espiaun naʼin-10 neʼebé fó sai lia-menon aat no halo “ema Izraél hotu . . . muramura hasoru Moisés”. (Núm 13:31–14:4) Maibé bainhira ita gaba ema seluk, neʼe bele ajuda ema hotu atu sente kontente liu. Tan neʼe, buka oportunidade atu gaba ema seluk ho laran. w22.04 p. 8 par. 16-17

Husi tempu uluk kedas, Jeová ajuda ona joven barak atu sai ninia belun. Nia mós bele ajuda Ita-nia oan atu sai ninia belun, se Ita-nia oan mós hakarak ida-neʼe. (1 Kor 3:​6, 7) Maski Ita-nia oan la serbí Jeová, maibé Jeová sei kontinua hadomi sira. (Sal 11:4) Bainhira sira hatudu katak sira “prontu atu simu lia-loos”, Jeová sei prontu atu ajuda sira sai ninia belun. (Após 13:48; 2 Krón 16:9) Jeová bele ajuda Ita atu koʼalia buat neʼebé loos iha tempu neʼebé loos, bainhira Ita-nia oan presiza tebes atu rona ida-neʼe. (Prov 15:23) Ka karik Jeová sei book irmaun ka irmán ida atu hatudu interese ba sira. Bainhira Ita-nia oan sira sai boot, karik Jeová sei ajuda sira atu hanoin-hetan fali buat neʼebé uluk Ita hanorin ona ba sira. (João 14:26) Bainhira Ita kontinua treinu Ita-nia oan liuhusi Ita-nia liafuan no hahalok, Jeová sei haraik bensaun mai Ita. w22.04 p. 21 par. 18

Tanba Satanás labele ona tama ba lalehan, nia sai hirus tebes ba Kristu nia alin sira neʼebé sei iha rai. Sira reprezenta Maromak nia Ukun no sira “halo serbisu atu fó sasin kona-ba Jesus”. (2 Kor 5:20; Éf 6:​19, 20) Iha tinan 1918, irmaun naʼin-ualu neʼebé dirije organizasaun tama komarka tanba ema duun matak sira. Sira hanoin katak irmaun sira-neʼe nia serbisu para ona. (Apok 11:​3, 7-11) Maibé iha fulan-Marsu tinan 1919, sira sai husi komarka no ikusmai sira-nia kazu mós kansela tiha. Sira komesa kedas atu dirije fali serbisu haklaken. Maibé neʼe la hapara Satanás atu ataka Maromak nia povu. Hahú husi tempu neʼebá, Satanás book ema atu kontra Maromak nia povu no neʼe hanesan “mota” ida. (Apok 12:15) Tan neʼe, ita ida-idak “presiza tahan susar no iha fiar”.—Apok 13:10. w22.05 p. 5-6 par. 14-16

Liuhusi vizaun ida, apóstolu João haree grupu rua neʼebé apoia Jeová nia ukun no sira simu bensaun atu moris ba nafatin. Grupu primeiru iha ema hamutuk naʼin-144.000. Maromak hili sira husi rai atu forma governu ida ka Ukun ida hamutuk Jesus iha lalehan. Sira sei ukun rai tomak hamutuk ho Jesus. (Apok 5:​9, 10; 14:​3, 4) Iha vizaun neʼe, João haree sira hamriik hamutuk ho Jesus iha Foho Siaun iha lalehan. (Apok 14:1) Husi apóstolu sira-nia tempu toʼo agora, Maromak hili ona ema rihun ba rihun atu sai parte ba ema naʼin-144.000. (Lc 12:32; Rom 8:17) Maibé iha João nia vizaun, nia rona katak ema uitoan husi grupu neʼe sei moris hela iha rai durante loron ikus sira. (Apok 12:17) Tuirmai durante terus boot, ema sira-neʼe sei saʼe ba lalehan atu hamutuk ho sira seluk neʼebé sai parte ba ema naʼin-144.000 no mate ona ho laran-metin. Sira sei ukun hamutuk ho Jesus iha Maromak nia Ukun.—Mt 24:31; Apok 5:​9, 10. w22.05 p. 16 par. 4-5

Jesus hanorin ninia dixípulu sira atu iha hanoin neʼebé loos kona-ba sira-nia an. Nia fó-hatene sira: “Kona-ba imi, fuuk-lahan iha imi-nia ulun mós [Maromak] sura hotu.” (Mt 10:30) Liafuan sira-neʼe fó kmaan mai ita, liuliu se ita iha toman atu hanoin negativu kona-ba ita-nia an. Liafuan sira-neʼe hatudu katak ita-nia Aman iha lalehan hanoin tebes ita no nia hafolin ita. Jeová fó ita oportunidade atu adora nia no nia hanoin katak ita merese moris ba nafatin iha mundu foun, tan neʼe ita labele hanoin katak Maromak hanoin sala. Maizumenus tinan 15 liubá, Livru Haklaken ida esplika katak ita presiza haburas hanoin neʼebé loos kona-ba ita-nia an. Neʼe dehan: “Ita labele hanoin katak ita mak diʼak liu toʼo ita sai foti an. Maibé ita mós labele hanoin katak ita mak folin-laek toʼo ita sente depresaun. Duké halo nuneʼe, ita presiza haburas hanoin neʼebé loos kona-ba ita-nia an, rekoñese ita-nia kbiit no fraku sira.” w22.05 p. 24-25 par. 14-16

Oinsá ita ida-idak bele ajuda kongregasaun atu kontinua iha unidade? Ita presiza buka dame. (Mt 5:9; Rom 12:18) Tempu ida-idak neʼebé ita iha inisiativu atu buka dame ho ema seluk iha kongregasaun, ita halo paraízu espirituál sai furak liután. Diʼak atu hanoin-hetan katak Jeová dada ema ida-idak atu tama paraízu espirituál hodi adora nia. (João 6:44) Jeová nia atan ida-idak mak folin-boot ba nia. Tan neʼe imajina toʼok kontente neʼebé Jeová sente bainhira nia haree ita hotu hakaʼas an atu hametin dame no unidade iha ita-nia leet. (Isa 26:3; Ageu 2:7) Jeová fó buat diʼak oioin ba ninia atan sira. Entaun oinsá ita bele hetan benefísiu husi buat sira-neʼe? Ita bele hanoin kleʼan kona-ba buat neʼebé ita aprende husi Bíblia. Bainhira ita estuda no medita kona-ba Bíblia, neʼe sei ajuda ita haburas hahalok Kristaun neʼebé book ita atu “hadomi malu tebetebes hanesan maun-alin”.—Rom 12:10. w22.11 p. 12-13 par. 16-18

Bainhira ita rekoñese katak Jeová perdua ona ita, ita sente kmaan, sente dame iha laran no iha konxiénsia neʼebé moos. Ita bele sente hanesan neʼe só deʼit kuandu Jeová rasik mak perdua ita. (Após 3:19) Bainhira Jeová perdua ita, ita bele habelun fali ho nia no nia haluha sala neʼebé ita halo. Bainhira Jeová perdua ona ita, nia nunka duun ita ka kastigu tan ita tanba sala neʼebé ita halo ona. (Isa 43:25) Jeová tau dook ita-nia sala “hanesan lorosaʼe dook husi loromonu”. (Sal 103:12) Bainhira ita hanoin kona-ba Jeová nia dalan atu fó perdua, ita sei sente agradese no hamtaʼuk liután nia. (Sal 130:4) Jeová nia desizaun atu fó perdua ba ema ida la depende ba ema nia sala neʼe mak kiʼik ka boot. Jeová uza ninia koñesimentu nuʼudar Ida neʼebé Fó Ukun-Fuan, Kriadór no Juís bainhira deside atu fó perdua ba ema ruma. w22.06 p. 5 par. 12-14

Jeová fó esperansa neʼebé furak ba ema hotu neʼebé hadomi nia. Lakleur tan nia sei halakon moras, triste no mate. (Apok 21:​3, 4) Nia sei ajuda “ema laran-maus” sira neʼebé tau esperansa ba nia atu halo mundu neʼe sai paraízu. (Sal 37:​9-11) Nia sei ajuda ita ida-idak atu iha relasaun neʼebé diʼak liu ho nia. Neʼe mak esperansa neʼebé furak tebes. Tanbasá ita bele fiar katak Maromak nia promesa sira-neʼe sei sai loos? Jeová sempre kumpre ninia promesa sira. Tan neʼe ita iha razaun neʼebé loos atu “tau esperansa ba Jeová”. (Sal 27:14) Ita halo ida-neʼe liuhusi hein ho pasiénsia no ksolok ba tempu neʼebé Maromak kumpre ninia promesa sira. (Isa 55:​10, 11) Mai ita nafatin laran-metin ba Jeová no fiar metin katak nia sei “fó kolen ba sira neʼebé buka nia ho laran”. w22.06 p. 20 par. 1; p. 25 par. 18

Ita bele fiar katak Jeová nuʼudar família nia Ulun sei halo tuir prinsípiu iha 1 Timóteo 5:8 neʼebé nia dirije ema atu hakerek. Bainhira ita fiar katak Jeová hadomi ita no ita-nia família, neʼe sei ajuda ita fiar katak ita sei hetan buat neʼebé ita presiza. (Mt 6:​31-33) Jeová hakarak atu sustenta ita no nia halo ida-neʼe ho domin no laran-luak. Bainhira nia kria mundu, nia mós kria buat sira neʼebé halo ita kontente, laʼós deʼit buat neʼebé ita presiza. (Gén 2:9) Ita presiza hanoin-hetan katak maski dala ruma ita iha deʼit buat neʼebé ita presiza atu kontinua moris, maibé ita iha ida-neʼe tanba Jeová mak tau matan ba ita. (Mt 6:11) Ita presiza hanoin-hetan katak buat neʼebé Jeová sei fó ba ita mak folin-boot liu fali sakrifísiu hotu neʼebé ita halo agora, no iha futuru ita sei hetan moris rohan-laek.—Isa 65:​21, 22. w22.06 p. 15 par. 7-8

Ita hotu presiza ai-han espirituál neʼebé toos, laʼós ema foun deʼit. Apóstolu Paulo hakerek katak bainhira ita halo tuir buat neʼebé ita aprende husi Bíblia, neʼe sei ajuda ita “atu hatene saida mak loos no saida mak sala”. Ohin loron, susar atu halo tuir Jeová nia matadalan sira tanba ema nia morál sai aat ba beibeik. Maibé Jesus arranja atu ita bele hetan ai-han espirituál neʼebé ita presiza atu bele iha fiar neʼebé metin. Ai-han espirituál neʼe mai husi Maromak nia Liafuan Bíblia. Hanesan Jesus, ita fó glória ba Maromak nia naran. (João 17:​6, 26) Porezemplu iha tinan 1931, ita hahú uza naran Testemuña ba Jeová. Hodi halo nuneʼe, ita hatudu katak Maromak nia naran importante ba ita no ita hakarak ema koñese ita ho naran neʼe. (Isa 43:​10-12) Bíblia Sagrada Tradusaun Mundu Foun mós tau fali Maromak nia naran iha fatin neʼebé loos. w22.07 p. 11 par. 11-12

Lia-loos husi Bíblia mós inklui liafuan diʼak kona-ba Maromak nia Ukun. Jesus kompara lia-loos kona-ba Maromak nia Ukun ho rikusoin neʼebé subar hela. Iha Mateus 13:​44, Jesus hatete: “Ukun lalehan nian mak hanesan rikusoin neʼebé subar iha toʼos, neʼebé mane ida hetan no subar fali. Tanba nia kontente tebes, nia bá faʼan buat hotu neʼebé nia iha hodi sosa rai neʼe.” Tuir eskritura neʼe, mane neʼe la buka rikusoin. Maibé kuandu nia hetan ida-neʼe, nia halo sakrifísiu boot oioin atu sosa rai neʼebé iha rikusoin neʼe. Tuir loloos nia faʼan buat hotu neʼebé nia iha atu bele hetan ida-neʼe. Tanbasá? Tanba nia hatene katak rikusoin neʼe folin-boot. Ita hatene katak iha mundu neʼe la iha buat ida mak folin-boot liu fali ksolok neʼebé ita hetan tanba serbí Jeová agora, no ita iha esperansa atu moris ba nafatin iha futuru iha ninia Ukun okos. Priviléjiu atu iha relasaun diʼak ho Jeová mak folin-boot tebes, tan neʼe ita prontu atu halo sakrifísiu naran deʼit. Ita sente haksolok bainhira halo Jeová sente “kontente iha buat hotu”.—Kol 1:10. w22.08 p. 15 par. 8; p. 17 par. 9, 12

Oinsá mak José hatene katak Maromak konsidera sala seksuál nuʼudar “hahalok aat tebes”? Tuir loloos iha tempu neʼebá seidauk iha Moisés nia Ukun-Fuan neʼebé fó sai matadalan klaru kona-ba “labele halo sala seksuál”. Ukun-Fuan neʼe hakerek tinan atus rua depois José nia tempu. (Éx 20:14) Maski nuneʼe, José hatene didiʼak Jeová, tan neʼe nia komprende Jeová nia hanoin kona-ba sala seksuál. Porezemplu, José hatene katak Jeová halo arranju kaben nian ba deʼit mane ida no feto ida. No klaru katak nia mós rona ona istória kona-ba oinsá Jeová proteje ninia bizavó Sara iha situasaun rua bainhira ema besik atu estraga Sara. (Gén 2:24; 12:​14-20; 20:​2-7) Bainhira José medita kona-ba buat sira-neʼe, nia bele komprende saida mak loos no sala tuir Jeová nia haree. Tanba José hadomi Jeová, nia deside metin atu halo buat neʼebé loos tuir Jeová nia haree. w22.08 p. 26 par. 1-2

Uluk ita dehan katak profesia iha Daniel 12:2 refere ba moris hiʼas iha dalan simbóliku ka iha dalan espirituál durante loron ikus sira. Maibé agora ita komprende katak profesia neʼe refere ba moris hiʼas neʼebé sei akontese iha mundu foun. Tanbasá? Liafuan “rai-rahun” neʼebé temi iha eskritura neʼe mós temi iha Job 17:16 neʼebé refere ba “rate”. Faktu neʼe hatudu katak Daniel 12:2 refere ba moris hiʼas neʼebé sei akontese depois loron ikus sira no depois funu Armagedon. Liafuan ema balu moris hiʼas atu “hetan moris rohan-laek” iha Daniel 12:2 signifika saida? Neʼe katak, ema neʼebé hetan moris-hiʼas no koñese ka kontinua koñese Jeová no mós halo tuir Jeová no Jesus durante tinan 1.000, ikusmai sei hetan moris rohan-laek.—João 17:3. w22.09 p. 21 par. 6-7

Neʼe la dehan katak Jeová hakarak ita naran fiar ema. Nia hakarak ita tau fiar ba sira tanba sira hatudu ona katak sira merese duni atu ita tau fiar. Presiza tempu atu bele tau fiar ba irmaun-irmán sira. Oinsá atu halo nuneʼe? Koñese didiʼak sira. Koʼalia ba sira kuandu tuir reuniaun. Haklaken hamutuk ho sira. Hatudu pasiénsia ba sira, no fó oportunidade ba sira atu hatudu katak ita bele tau fiar ba sira. Karik foufoun, ita lakohi fó sai buat privadu ba ema neʼebé ita foin koñese. Bainhira ita-nia relasaun metin ona, karik ita kontente atu fó sai ita-nia sentimentu. (Lc 16:10) Maibé saida mak ita bele halo se irmaun ka irmán ruma hakanek ita-nia laran? Keta ansi atu hakotu ita-nia relasaun diʼak ho sira. No keta husik ema balu nia hahalok halo ita la tau fiar ba irmaun-irmán seluk. w22.09 p. 4 par. 7-8

Katuas kongregasaun ida naran Miqueas sente katak uluk irmaun ida neʼebé iha responsabilidade iha organizasaun trata aat nia. Maski nuneʼe, nia kontinua iha hanoin neʼebé loos no hakaʼas an atu kontrola ninia sentimentu. Nia halo orasaun dala barak hodi husu Jeová atu fó espíritu santu no kbiit ba nia atu tahan. Nia mós buka informasaun neʼebé bele ajuda nia husi ita-nia publikasaun. Ita aprende saida? Se Ita sente katak irmaun ka irmán ruma trata aat Ita, diʼak atu kalma nafatin no hakaʼas an atu kontrola hanoin neʼebé negativu. Karik Ita la hatene situasaun neʼebé book irmaun ka irmán neʼe koʼalia ka halo buat ruma neʼebé hakanek Ita-nia laran. Entaun halo orasaun ba Jeová no husu nia ajuda Ita atu haree problema neʼe tuir ema neʼe nia haree. Ida-neʼe bele ajuda Ita atu komprende katak Ita-nia irmaun ka irmán la iha intensaun atu hakanek Ita-nia laran no neʼe ajuda Ita perdua sira. (Prov 19:11) Hanoin-hetan, Jeová hatene Ita-nia situasaun no sei fó Ita kbiit atu tahan.—Ecle 5:8. w22.11 p. 21 par. 5

Habelun ho ema neʼebé hadomi Jeová. Ita-nia belun sira bele ajuda Ita atu sai maduru. (Prov 13:20) Julien neʼebé agora serbí nuʼudar katuas kongregasaun hatete: “Bainhira haʼu joven, haʼu habelun ho irmaun-irmán sira neʼebé haklaken ho haʼu. Sira laran-manas no ajuda haʼu atu rekoñese katak serbisu haklaken bele lori ksolok. . . . Haʼu mós rekoñese katak haʼu la iha belun diʼak barak tanba haʼu toman atu habelun deʼit ho ema neʼebé idade hanesan ho haʼu.” Oinsá se Ita nota katak ema ruma iha kongregasaun la fó influénsia diʼak ba Ita? Apóstolu Paulo hatene katak iha ema balu neʼebé la hafolin buat espirituál iha kongregasaun, tan neʼe nia fó avizu ba Timóteo atu labele ransu ho sira. (2 Tim 2:​20-22) Ita-nia relasaun diʼak ho Jeová mak folin-boot tebes. Ita hakaʼas an atu iha relasaun diʼak ho Jeová no ita sei la husik ema ida atu estraga ida-neʼe. w22.08 p. 5-6 par. 13-15

Ita la hanesan ho sira neʼebé odi Maromak nia konsellu. Ita aprende atu hadomi Maromak nia hanoin, inklui ninia matadalan sira kona-ba morál. Ita bele aumenta liután ita-nia domin liuhusi kompara rezultadu husi ema neʼebé halo tuir no ema neʼebé la halo tuir Maromak nia matadalan. Haree didiʼak problema saida deʼit mak ema hasoru bainhira lakohi rona ba Maromak nia konsellu neʼebé matenek. Tuirmai hanoin kona-ba oinsá ita iha moris neʼebé diʼak liu tanba halo tuir Maromak. (Sal 32:​8, 10) Jeová oferese ninia matenek ba ema hotu, maibé nia la obriga ema atu simu ida-neʼe. Maski nuneʼe, nia fó sai konsekuénsia neʼebé ema bele hetan se sira lakohi rona ba ninia matenek. (Prov 1:​29-32) Sira sei “lori todan kona-ba sira-nia hahalok”. Sira sei hetan susar no terus tanba dalan neʼebé sira halaʼo moris no ikusmai Jeová sei halakon sira. Maibé Maromak promete ba ema sira neʼebé rona ba ninia konsellu neʼebé matenek no aplika ida-neʼe hodi dehan: “Ema neʼebé rona haʼu sei moris hakmatek no la sente taʼuk kona-ba susar sira.”—Prov 1:33. w22.10 p. 20-21 par. 11-13

Hamtaʼuk Jeová katak ita la halo buat ruma neʼebé bele hakanek ninia laran tanba ita respeitu tebes nia. (Prov 16:6) Tan neʼe, ita kontinua hakaʼas an atu halo tuir Jeová nia matadalan kona-ba buat neʼebé loos no sala, hanesan fó sai iha Bíblia. (2 Kor 7:1) Ita sei sente kontente se ita halo buat neʼebé Jeová gosta no hasees an husi buat neʼebé nia odi. (Sal 37:27; 97:10; Rom 12:9) Ita hatene katak Jeová iha direitu atu deside saida mak loos no sala, maibé ita mós presiza halo tuir Maromak nia matadalan. (Rom 12:2) Bainhira ita halo tuir Jeová nia matadalan, ita hatudu liuhusi ita-nia hahalok katak ita fiar Jeová nia matadalan mak diʼak liu ba ita-nia moris. (Prov 12:28) David sente hanesan neʼe, tan neʼe mak nia koʼalia kona-ba Jeová hodi dehan: “Ita halo haʼu hatene dalan moris nian. Haʼu sente haksolok tebes iha Ita-nia oin; hamriik iha Ita-nia liman-loos mak lori ksolok ba nafatin.”—Sal 16:11. w22.10 p. 8 par. 9-10

Jesus nafatin iha hanoin neʼebé loos kona-ba ninia an rasik. Antes Jesus moris iha mundu, nia halo buat kmanek oioin atu serbí Jeová. Liuhusi Jesus mak “Maromak kria buat hotu iha lalehan no iha rai”. (Kol 1:16) Bainhira Jesus hetan batizmu, karik nia hanoin-hetan buat oioin neʼebé nia kumpre ona hamutuk ho ninia Aman. (Mt 3:16; João 17:5) Maibé koñesimentu neʼe la halo Jesus sai foti an. Nia nunka hanoin no hatudu katak nia mak diʼak liu fali ema seluk. Nia hatete ba ninia dixípulu sira katak “nia mai, laʼós atu ema serbí nia, maibé atu serbí no atu fó ninia moris hodi sosa fali ema barak”. (Mt 20:28) Nia mós ho haraik an rekoñese katak nia labele halo buat ida ho ninia hakarak rasik. Jesus hatudu duni hahalok haraik an. Nia hatudu ezemplu diʼak tebes ba ita atu banati-tuir. w22.05 p. 24 par. 13

Bainhira Jeová deside atu fó perdua ba ema ruma, buat ida neʼebé Jeová hanoin mak bainhira ema neʼe halo daudaun sala, nia hatene duni katak ninia hahalok mak sala ka lae. Jesus esplika kona-ba neʼe iha Lucas 12:​47, 48. Bainhira ema ida ho neon halo planu atu halo buat neʼebé Maromak la gosta, no tuirmai halo ida-neʼe, nia halo ona sala sériu. Karik Jeová sei deside atu la fó perdua ba ema neʼe. (Mc 3:29; João 9:41) Jeová bele fó perdua ba ema neʼe ka lae? Sin, se ema neʼe arrepende an ho laran ka lae. Ema neʼebé arrepende an “troka ninia hanoin, hahalok ka planu”. Nia sente triste tebes kona-ba buat aat neʼebé nia halo ona ka kona-ba buat diʼak neʼebé nia la konsege halo. Nia mós sente triste tanba husik ninia relasaun diʼak ho Jeová sai fraku no ikusmai nia halo sala. w22.06 p. 5-6 par. 15-17

Inimigu sira habelar lia-bosok ka informasaun la loos kona-ba irmaun sira neʼebé dirije Jeová nia organizasaun. (Sal 31:13) Polísia kaer irmaun balu no duun sira nuʼudar kriminozu. Ema Kristaun iha apóstolu sira-nia tempu mós hasoru situasaun neʼebé hanesan bainhira ema duun matak apóstolu Paulo no kaer nia. Ema balu para atu apoia apóstolu Paulo bainhira nia tama komarka iha Roma. (2 Tim 1:​8, 15; 2:​8, 9) Hanoin toʼok saida mak Paulo sente. Nia tahan ona susar barak no mós tau ninia moris iha perigu laran atu ajuda sira. (Após 20:​18-21; 2 Kor 1:8) Ita hotu lakohi sai hanesan ema sira neʼebé husik hela Paulo. Entaun ita la presiza hakfodak kuandu Satanás ataka irmaun sira neʼebé tau matan organizasaun. Nia hakarak atu halakon sira-nia integridade no mós halo ita sai taʼuk. (1 Ped 5:8) Kontinua apoia irmaun sira no laran-metin ba sira.—2 Tim 1:​16-18. w22.11 p. 16-17 par. 8-11

Karik kriminozu neʼebé arrepende an neʼebé tara iha Jesus nia sorin antes nia mate mak ema Judeu. Ema Judeu adora Maromak ida deʼit, maibé ema husi nasaun seluk adora maromak barak. (Éx 20:​2, 3; 1 Kor 8:​5, 6) Se kriminozu neʼe mak husi nasaun seluk, karik nia bele hatete: “Ó la hamtaʼuk maromak sira ka?” Maromak mós la haruka Jesus atu ajuda ema husi nasaun seluk, maibé atu ajuda “bibi-malae neʼebé lakon husi umakain Izraél”. (Mt 15:24) Maromak fó-hatene ona ba ema Izraél katak nia sei fó moris-hiʼas ba ema mate. Kriminozu neʼe karik hatene ona ida-neʼe no ninia liafuan hatudu katak nia hanoin katak Jeová sei fó moris-hiʼas ba Jesus atu sai Liurai iha Maromak nia Ukun. Mane neʼe mós espera katak Maromak sei fó moris-hiʼas ba nia. Nuʼudar ema Judeu, kriminozu neʼebé arrepende an neʼe hatene ona kona-ba Adão no Eva. Entaun, kriminozu neʼe karik fiar katak Paraízu neʼebé Jesus temi iha Lucas 23:43 mak jardín furak iha rai.—Gén 2:15. w22.12 p. 8-9 par. 2-3

Ita bele kumpre serbisu haklaken tanba deʼit Maromak nia espíritu santu mak ajuda ita. Tanbasá? Tanba Satanás halo funu hasoru ita hodi koko hapara ita atu haklaken. (Apok 12:17) Tuir ema barak nia hanoin, ita labele manán Satanás tanba nia forsa boot. Maibé liuhusi ita-nia serbisu haklaken, ita manán duni nia! (Apok 12:​9-11) Oinsá? Bainhira ita haklaken, ita hatudu katak ita la taʼuk ba Satanás nia ameasa. Tempu ida-idak neʼebé ita haklaken, ita manán Satanás. Ita bele haree ho klaru katak Jeová fó kbiit mai ita liuhusi ninia espíritu santu no nia mós kontente ho ita. (Mt 5:​10-12; 1 Ped 4:14) Maromak nia espíritu santu bele fó kbiit neʼebé ita presiza atu manán problema naran deʼit neʼebé ita hasoru iha serbisu haklaken. (2 Kor 4:​7-9) Entaun saida mak ita presiza halo atu ita bele kontinua simu Maromak nia espíritu santu? Ita presiza husu beibeik espíritu santu liuhusi orasaun, no fiar metin katak Jeová sei rona ita-nia orasaun. w22.11 p. 5 par. 10-11

Ita hatudu domin ba irmaun-irmán sira liuhusi hakaʼas an atu buka dame ho sira. Ita hakarak banati-tuir dalan neʼebé Jeová fó perdua ba ema seluk. Jeová prontu atu husik ninia Oan-Mane mate ba ita-nia sala. Entaun ita mós presiza prontu atu fó perdua ba irmaun-irmán sira neʼebé halo sala hasoru ita. Ita lakohi sai hanesan atan laran-aat neʼebé Jesus temi iha ninia ai-knanoik. Maski atan neʼe nia naʼi halo nia livre husi debe boot, maibé nia la halo livre atan seluk neʼebé debe osan uitoan deʼit husi nia. (Mt 18:​23-35) Se mosu problema entre Ita no ema ruma iha kongregasaun, Ita iha inisiativu atu buka dame antes tuir Memoriál ka lae? (Mt 5:​23, 24) Se Ita halo nuneʼe, Ita hatudu katak Ita hadomi Jeová no Jesus. w23.01 p. 29 par. 8-9

Dalan ida atu buka-hatene irmaun-irmán sira-nia presiza mak hodi husu kona-ba sira-nia situasaun maibé la hamoe sira. (Prov 20:5) Sira iha hahán natoon, ai-moruk no buat seluk ka lae? Sira bele lakon serbisu ka labele tan selu aluga ka lae? Sira presiza ajuda atu prenxe formuláriu hodi husu ajuda husi governu ka lae? Jeová husu ita hotu atu anima no ajuda malu. (Gal 6:10) Maski ita halo buat kiʼik deʼit atu ajuda ema neʼebé moras, neʼe bele duni anima sira. Labarik ida bele hakerek karta ka pinta dezeñu hodi anima irmaun-irmán sira. Joven ida bele bá kompras ka halo buat seluk atu ajuda irmán ida. Ema seluk iha kongregasaun mós bele teʼin hahán ba maluk sira neʼebé moras. Testemuña balu haruka karta atu fó obrigadu ba katuas sira neʼebé okupadu tebes durante mosu moras-peste. Diʼak tebes se ita ida-idak hakaʼas an atu “kontinua fó aten-brani ba malu no hametin malu”.—1 Tes 5:11. w22.12 p. 22 par. 2; p. 23 par. 5-6

Ema Saduseu hatene didiʼak livru lima primeiru husi Eskritura Lian Ebraiku, maibé sira la simu lia-loos importante sira husi livru sira-neʼe. Porezemplu, hanoin toʼok kona-ba Jesus nia liafuan ba ema Saduseu neʼebé husu Jesus kona-ba moris-hiʼas. Jesus husu sira: “Imi seidauk lee istória neʼebé Moisés hakerek kona-ba ai-hun tarak neʼebé lakan ka? Maromak . . . dehan ba Moisés: ‘Haʼu mak Abraão nia Maromak, Isaac nia Maromak no Jacob nia Maromak.’” (Mc 12:​18, 26) Maski ema Saduseu lee istória neʼe dala barak ona, maibé Jesus nia pergunta ba sira hatudu katak sira la simu lia-loos importante kona-ba moris-hiʼas. (Lc 20:38) Saida mak ita bele aprende? Bainhira ita lee, ita hakarak buka-hetan lisaun hotu neʼebé ita bele aprende husi versíkulu ida ka istória ida iha Bíblia. Ita lakohi buka deʼit hanorin báziku, maibé mós buka lia-loos no prinsípiu sira neʼebé kleʼan neʼebé subar hela hanesan rikusoin. w23.02 p. 11 par. 9-10

Testemuña sira neʼebé temi iha eskritura ba ohin hasoru susar boot. Maibé sira nafatin laran-metin ba Jeová. (Ebr 11:​36-40) Sira-nia hakaʼas an atu tahan susar mak saugati deʼit ka lae? Klaru katak lae. Maski sira la haree Maromak kumpre ninia promesa hotu durante sira-nia moris, maibé sira kontinua tau esperansa ba Jeová. Sira iha konfiansa katak sira sei haree Jeová nia promesa sira sai loos tanba sira fiar metin katak Jeová kontente ho sira. (Ebr 11:​4, 5) Sira-nia ezemplu hametin ita atu kontinua tau esperansa ba Jeová. Ohin loron, mundu nia situasaun sai aat liután. (2 Tim 3:13) Satanás nafatin koko Maromak nia povu. Maski hasoru susar naran deʼit, mai ita deside metin atu serbí Jeová no fiar metin katak “ita tau ona ita-nia esperansa ba Maromak neʼebé moris”.—1 Tim 4:10. w22.06 p. 25 par. 17-18

Ita presiza tau matan ba ita-nia saúde atu nuneʼe ita bele serbí Jeová ho ita-nia kbiit tomak. (Mc 12:30) Tan neʼe ita hasees an husi buat neʼebé bele estraga ita-nia saúde. (Rom 12:1) Klaru katak maski ita hakaʼas an ona, neʼe la garantia katak ita sei la moras. Ita hakaʼas an atu tau matan ita-nia saúde tanba hakarak hatudu ba ita-nia Aman iha lalehan katak ita hafolin moris nuʼudar prezente. Kuandu ita moras no sai ferik-katuas, neʼe bele hanetik ita atu halo buat barak hanesan uluk. Rezultadu mak karik ita sente estrese no triste. Maibé ita presiza nafatin hakaʼas an tau matan ba ita-nia saúde. Tanbasá? Tanba maski ita sai ferik-katuas ka moras, ita bele nafatin hahiʼi Jeová hanesan Liurai David. Ita sente kmaan atu hatene katak Maromak hafolin tebes ita maski ita la perfeitu. (Mt 10:​29-31) Maski ita mate, nia hakarak atu fó moris-hiʼas ba ita. (Job 14:​14, 15) Maibé agora, ita hakarak hakaʼas an proteje ita-nia saúde no mós ita-nia moris. w23.02 p. 20-21 par. 3-5

Ema-lubun boot husi bibi-malae seluk sira-nia naran nafatin iha livru moris nian depois sira liu Armagedon ka lae? Sin. (Apok 7:14) Jesus hatete katak ema-lubun boot sei “hetan moris rohan-laek”. (Mt 25:46) Maibé sira neʼebé liu Armagedon sei la hetan kedas moris rohan-laek. Durante Kristu nia Ukun ba Tinan Rihun Ida, Jesus “sei tau matan ba sira hanesan bibi-atan no sei dirije sira ba bee-matan moris nian”. Sira neʼebé halo tuir Kristu nia matadalan no Maromak deklara katak sira laran-metin iha tesi-lia ikus, sira-nia naran sei hakerek permanente iha livru moris nian. (Apok 7:​16, 17) Maibé, bibi-timur sei lakon iha Armagedon. Jesus hatete katak sira “sei lakon ba nafatin”. (Mt 25:46) Maromak dirije apóstolu Paulo atu hakerek katak “Naʼi sei tesi-lia hodi kastigu ema sira-neʼe. Sira sei lakon ba nafatin”.—2 Tes 1:9; 2 Ped 2:9. w22.09 p. 16 par. 7-8

Bainhira família sira haree Jeová nia kriasaun hamutuk, sira bele sente kalma no sente kontente, neʼe ajuda sira atu hadomi malu liután. Jeová kria fatin furak sira iha mundu atu ita bele halo atividade neʼebé ita gosta. Família barak gosta bá foho ka laʼo halimar iha tasi-ibun. Iha mundu foun, inan-aman no oan sira sei kontente ho Jeová nia kriasaun sira. Iha tempu neʼebá, ita la presiza taʼuk ba animál sira no sira mós sei la taʼuk ita. (Isa 11:​6-9) Ita sei iha tempu barak atu haksolok ho Jeová nia kriasaun. (Sal 22:26) Maibé inan-aman sira, keta hein toʼo tempu neʼebá mak foin ajuda Ita-nia oan hafolin kriasaun. Bainhira Ita hanorin Ita-nia oan kona-ba Jeová liuhusi ninia kriasaun, sira sei sente hanesan Liurai David neʼebé dehan: “Oh Jeová, . . . la iha ida mak halo buat neʼebé Ita halo.”—Sal 86:8. w23.03 p. 25 par. 16-17