Dezembru

Ema-boot ida husi Etiópia prontu ona atu hetan batizmu ka lae? Hanoin toʼok: Ema Etiópia neʼe “bá Jeruzalein atu adora Maromak”. (Após 8:27) Tan neʼe karik nia simu ona relijiaun Judeu nian. Ita bele fiar katak nia aprende ona kona-ba Jeová husi Eskritura Lian Ebraiku. Maski nuneʼe, nia hakarak aprende liután. Tuir loloos, bainhira Filipe hasoru ema-boot neʼe iha dalan, ema-boot neʼe lee profeta Isaias nia liafuan. (Após 8:28) Nia hakarak kontinua aprende kona-ba Jeová. Tan neʼe, nia halo viajen husi Etiópia toʼo Jeruzalein atu bele adora Jeová iha templu. Filipe hanorin lia-loos importante oioin ba ema Etiópia neʼe, lia-loos neʼe inklui mós hanorin katak Jesus mak Mesias. (Após 8:​34, 35) Ninia domin ba Jeová no ninia Oan-Mane sai boot liután. Ida-neʼe book nia atu halo desizaun importante hodi hetan batizmu nuʼudar Jesus Kristu nia dixípulu. Filipe haree katak mane neʼe prontu ona, tan neʼe nia fó batizmu ba mane neʼe. w23.03 p. 8-9 par. 3-6

Jeová la kontente bainhira ita bosok. (Prov 6:​16, 17) Maski ema barak hanoin katak bosok mak buat neʼebé baibain deʼit, maibé ita lakohi bosok tanba Jeová hatete katak ida-neʼe sala. (Sal 15:​1, 2) Klaru katak ita lakohi atu bosok, maibé ita mós lakohi koʼalia iha dalan neʼebé bele book ema atu halo konkluzaun neʼebé sala. Ita mós lakohi habelar gosip. (Prov 25:23; 2 Tes 3:11) Bainhira Ita konversa ho ema seluk no Ita sente katak ida-neʼe komesa sai fali gosip, diʼak atu koʼalia fali kona-ba buat seluk neʼebé hametin malu. Ohin loron, ema barak koʼalia liafuan aat. Tan neʼe, ita presiza hakaʼas an atu koʼalia iha dalan neʼebé halo Jeová kontente. Nia sei haraik bensaun mai ita bainhira ita hakaʼas an atu koʼalia iha dalan neʼebé fó hahiʼi ba nia bainhira ita haklaken, tuir reuniaun no mós iha ita-nia moris loroloron. Bainhira Jeová halakon mundu aat neʼe, sei fasil liu ba ita atu hahiʼi Jeová ho ita-nia liafuan.—Jud 15. w22.04 p. 9 par. 18-20

Bainhira ita hanoin kona-ba oinsá Jeová no Jesus hadomi ita, neʼe book ita atu hadomi fali sira. (1 João 4:10) Ita hadomi liután sira bainhira ita hatene katak Jesus mate ba ita rasik. Apóstolu Paulo rekoñese ida-neʼe no nia fó sai agradese iha ninia karta ba ema Kristaun iha Galásia hodi dehan: “Maromak nia Oan-Mane . . . hadomi haʼu no fó nia moris ba haʼu-nia diʼak.” (Gal 2:20) Tanba Jesus mate ba Ita, Jeová bele dada Ita ba nia atu nuneʼe Ita bele sai ninia belun. (João 6:44) Tanba Ita hatene katak Jeová haree buat diʼak husi Ita no nia selu folin neʼebé boot tebes atu Ita bele sai ninia belun, neʼe book tebes Ita-nia laran. No neʼe mós book Ita atu hadomi liután Jeová no Jesus. Ita presiza husu ba Ita-nia an: ‘Domin book haʼu atu halo saida?’ Ita-nia domin ba Maromak no Kristu book ita atu hatudu domin ba ema seluk.—2 Kor 5:​14, 15; 6:​1, 2. w23.01 p. 28 par. 6-7

Bíblia mak ekipamentu importante neʼebé Jeová uza atu ajuda ninia povu “hodi adora nia ho unidade”. Eskritura barak hakerek iha dalan neʼebé ema haraik an deʼit mak bele komprende. (Lc 10:21) Ema iha fatin oioin bele lee Bíblia. Maibé ema haraik an deʼit mak bele komprende didiʼak no halo tuir Bíblia. (2 Kor 3:​15, 16) Bíblia hatudu sai Jeová nia matenek. Jeová uza Eskritura sira atu hanorin ninia povu nuʼudar grupu no mós atu hanorin no fó kmaan ba ita ida-idak. Bainhira ita lee Bíblia, ita bele sente katak Jeová hanoin ita ida-idak. (Isa 30:21) Dala barak Ita lee eskritura ida neʼebé Ita sente katak hakerek ba Ita rasik. Maibé, Bíblia mós hakerek iha dalan neʼebé ema millaun ba millaun bele komprende. Tanbasá Bíblia iha informasaun neʼebé kona Ita-nia situasaun? Tanba Maromak neʼebé dirije ema atu hakerek Bíblia mak matenek liu hotu iha lalehan no rai.—2 Tim 3:​16, 17. w23.02 p. 4-5 par. 8-10

Ita hotu hadomi tebes Jeová. Ita hakarak serbí nia ho laran tomak tuir ita-nia kbiit. Maibé atu bele halo nuneʼe, ita presiza halo planu espirituál, hanesan haburas hahalok Kristaun nian, aprende skill oioin no buka dalan atu ajuda irmaun-irmán sira. Tanbasá ita hakarak laʼo ba oin iha dalan espirituál? Razaun ida mak ita hakarak halo ita-nia Aman Jeová kontente. Jeová kontente bainhira ita uza ita-nia talentu no abilidade atu serbí nia. Ita mós hakarak laʼo ba oin atu nuneʼe ita bele ajuda liután irmaun-irmán sira. (1 Tes 4:​9, 10) Maski ita iha lia-loos tempu kleur ona, maibé ita hotu bele kontinua laʼo ba oin. w22.04 p. 22 par. 1-2

Lakleur tan mundu nia sistema polítiku sei ataka Babilónia Boot, katak relijiaun falsu hotu iha mundu. Terus boot sei hahú kuandu ida-neʼe akontese. Ema barak sei komesa serbí Jeová iha tempu neʼe ka lae? Lae. Apokalipse kapítulu 6 hatudu katak iha tempu neʼebá, ema neʼebé la serbí Jeová sei buka protesaun husi mundu nia sistema polítiku no komersiál neʼebé Bíblia kompara ho foho sira. Ema sira-neʼe la apoia Maromak nia Ukun, tan neʼe Jeová haree sira nuʼudar inimigu. (Lc 11:23; Apok 6:​15-17) Durante tempu susar neʼe, ema sei haree katak Jeová nia atan sira neʼebé laran-metin mak la hanesan ho ema seluk. Iha mundu tomak, sira mesak deʼit mak serbí Jeová no lakohi apoia “animál fuik”.—Apok 13:​14-17. w22.05 p. 16 par. 8-9

Maromak nia povu presiza fó sai “liafuan diʼak kona-ba Maromak nia Ukun” no mós mensajen seluk tan. (Mt 24:14) Ita presiza apoia anju sira-nia serbisu neʼebé fó sai iha Apokalipse kapítulu 8 toʼo 10. Anju sira-neʼe fó sai susar oioin neʼebé kona ema sira neʼebé lakohi simu Maromak nia Ukun. Entaun, Testemuña ba Jeová haklaken daudaun mensajen tesi-lia nian neʼebé hanesan “jelu-fatuk no ahi”. Ita fó sai kona-ba Maromak nia tesi-lia ba parte oioin husi Satanás nia mundu. (Apok 8:​7, 13) Ema presiza hatene katak mundu nia rohan besik ona, atu nuneʼe sira bele halo mudansa iha sira-nia moris no hetan salvasaun iha Jeová nia loron hirus. (Sof 2:​2, 3) Maibé ema barak la gosta mensajen neʼe no ita presiza aten-brani atu fó sai ida-neʼe. Durante terus boot, ita sei fó sai mensajen tesi-lia ikus neʼebé makaʼas liu.—Apok 16:21. w22.05 p. 6-7 par. 18-19

Hanoin toʼok kona-ba feen-laʼen ida neʼebé atu iha oan. Durante tinan barak, sira rona ona diskursu oioin kona-ba haboot oan. Maibé agora prinsípiu sira-neʼe importante liután ba sira. Agora sira presiza haboot sira-nia oan. Neʼe mak responsabilidade neʼebé boot tebes. Entaun, bainhira ita-nia situasaun troka, prinsípiu balu sai importante liután ba ita. Tan neʼe mak Jeová nia atan sira lee no medita kona-ba Eskritura sira “durante loron hotu” iha sira-nia moris hanesan liurai sira iha Izraél antigu. (Deut 17:19) Inan-aman sira, Ita iha priviléjiu espesiál atu hanorin Ita-nia oan sira kona-ba Jeová. Maibé la toʼo atu hanorin deʼit faktu kona-ba Maromak. Ita hakarak ajuda Ita-nia oan atu hadomi tebes Jeová. w22.05 p. 26 par. 2-3

Neʼe la toʼo atu sente triste deʼit kona-ba sala neʼebé ita halo. Ita mós tenke prontu atu halo mudansa. Bainhira deside atu fó perdua ba ema ruma, buat ida neʼebé Jeová hanoin mak ema neʼebé halo sala para ona atu halo hahalok neʼebé aat no komesa moris tuir fali Jeová nia hakarak. (Isa 55:7) Nia tenke troka ninia hanoin hodi tuir fali Jeová nia hanoin. (Rom 12:2; Éf 4:23) Nia tenke deside metin atu husik tiha ninia hanoin no hahalok uluk nian neʼebé aat. (Kol 3:​7-9) Klaru katak Jeová fó perdua no hamoos ita-nia sala tanba ita tau fiar ba Kristu nia sakrifísiu. Jeová sei perdua ita bazeia ba Jesus nia sakrifísiu bainhira nia haree katak ita hakaʼas an atu troka ita-nia hahalok. Jeová sei perdua ita bazeia ba Jesus nia sakrifísiu bainhira nia haree katak ita hakaʼas an atu troka ita-nia hahalok.—1 João 1:7. w22.06 p. 6 par. 16-17

Husi tempu neʼebé Adão no Eva kontra Jeová, ema sempre lori susar deʼit ba ema seluk. (Ecle 8:9) Porezemplu, ema uza sala sira-nia podér, kriminozu sira halo violénsia, labarik iha eskola trata aat malu no ameasa malu no ema balu mós halo violénsia doméstika. Tan neʼe mak ita la hakfodak kuandu ema ida taʼuk ema seluk. Oinsá mak Satanás aproveita ema nia sentimentu taʼuk ba ema seluk? Satanás koko halo ita taʼuk ba ema atu ita para haklaken no la halo tuir tan Jeová nia matadalan sira. Satanás fó influénsia ba governu sira, tan neʼe sira bandu ita-nia atividade no mós kontra ita. (Lc 21:12) Iha Satanás nia mundu, ema barak habelar informasaun falsu no lia-bosok oioin kona-ba Testemuña ba Jeová. Ema sira neʼebé fiar ba lia-bosok sira-neʼe karik goza ka ataka ita. (Mt 10:36) Ita la hakfodak ho buat sira-neʼe. Satanás halo nuneʼe iha apóstolu sira-nia tempu.—Após 5:​27, 28, 40. w22.06 p. 16 par. 10-11

Sé mak sai parte ba “ema barak” neʼebé sai ema laran-loos? Neʼe mak ema neʼebé hetan moris-hiʼas, ema neʼebé liu Armagedon no mós labarik hotu neʼebé karik sei moris iha mundu foun. Bainhira tinan 1.000 remata, ema hotu iha rai sei perfeitu. Ita tenke hanoin-hetan katak sai ema perfeitu la dehan katak ita sei hetan kedas moris rohan-laek. Hanoin kona-ba Adão no Eva. Maski sira perfeitu, maibé sira tenke hatudu katak sira halo tuir Jeová hodi nuneʼe sira bele hetan moris rohan-laek. No triste mak sira falla. (Rom 5:12) Bainhira tinan 1.000 ida remata, ema hotu perfeitu ona. Ema sira-neʼe hotu sei apoia Jeová nia ukun ba nafatin ka lae? Ka sira balu sei hatudu hahalok hanesan Adão ho Eva neʼebé la laran-metin ba Jeová maski perfeitu? Ita bele hetan resposta ba pergunta importante sira-neʼe. w22.09 p. 22-23 par. 12-14

Bainhira Ita haree mundu nia situasaun, karik susar ba Ita atu iha hanoin pozitivu kona-ba futuru. Ita haree família sira la hadomi malu, ema barak halo hahalok violénsia, hanoin an deʼit no lakon fiar ba autoridade sira. Maibé tuir loloos situasaun sira-neʼe bele halo Ita fiar metin liután. Tanbasá? Tanba ema nia hahalok kumpre profesia kona-ba “loron ikus sira”. (2 Tim 3:​1-5) Ema neʼebé laran-loos bele haree katak profesia neʼe sai loos daudaun. Neʼe hatudu katak Kristu Jesus komesa ona ukun nuʼudar Liurai ba Maromak nia Ukun. Profesia sira-neʼe liga malu no oinsá ida-neʼe bele ajuda ita hatene ita moris iha tempu saida. w22.07 p. 2 par. 1-2

Durante pandemia COVID-19, ita simu matadalan neʼebé klaru kona-ba oinsá halaʼo ita-nia reuniaun sira no mós serbisu haklaken. Ita komesa kedas uza vídeo konferénsia atu halaʼo reuniaun sira, asembleia no reuniaun boot sira. Ita mós komesa haklaken liuhusi karta no telefone. Jeová haraik bensaun ba ita-nia hakaʼas an. Sukursál barak fó sai katak haklaken-naʼin aumenta barak tan. Haklaken-naʼin barak hetan esperiénsia kapás durante tempu neʼebá. Ema balu sente katak ita-nia organizasaun kuidadu demais durante pandemia, maibé dala barak ita haree ho klaru katak matadalan neʼebé ita simu mak diʼak tebes. Bainhira ita hanoin kleʼan kona-ba dalan neʼebé Jesus dirije ninia povu ho domin, neʼe hametin ita-nia fiar katak Jeová no Jesus sei hamutuk ho ita maski ita hasoru susar naran deʼit.—Ebr 13:​5, 6. w22.07 p. 13 par. 15-16

Ita mós presiza fó agradese ba Jeová tanba buat furak oioin neʼebé nia fó mai ita. Porezemplu, ita bele fó obrigadu ba nia kona-ba ai-funan ho kór furak oioin, hahán oioin neʼebé gostu no mós ita-nia belun sira. Ita-nia Aman Jeová fó buat sira-neʼe no mós buat seluk tan tanba hakarak halo ita kontente. (Sal 104:​12-15, 24) Buat neʼebé importante liu mak ita fó obrigadu ba Jeová tanba nia fó ai-han espirituál barak ba ita no mós fó ita esperansa furak kona-ba futuru. Dala ruma ita haluha atu fó obrigadu ba Jeová kona-ba buat hotu neʼebé nia fó mai ita. Saida mak bele ajuda Ita atu hanoin-hetan? Ita bele halo lista kona-ba buat espesífiku neʼebé Ita husu liuhusi orasaun no cek beibeik lista neʼe atu haree oinsá Jeová hatán ba Ita-nia orasaun. Tuirmai halo orasaun atu fó obrigadu tanba nia ajuda Ita.—Kol 3:15. w22.07 p. 22 par. 8-9

Atu bele hetan benefísiu, la toʼo atu estuda deʼit lia-loos, ita tenke moris tuir lia-loos, neʼe katak aplika ida-neʼe iha ita-nia moris. Hodi halo nuneʼe, ita-nia moris sei kontente liu. (Tgo 1:25) Oinsá mak ita bele moris tuir lia-loos? Irmaun ida dehan katak diʼak atu buka-hatene saida mak ita aplika ona no saida mak ita hakarak hadiʼa liután. Apóstolu Paulo dehan: “Hanesan ita laʼo ba oin ona, mai ita kontinua laʼo ba oin iha dalan neʼebé hanesan.” (Flp 3:16) Hanoin kona-ba benefísiu oioin neʼebé ita hetan tanba hakaʼas an atu “kontinua laʼo iha lia-loos”. Lia-loos ajuda ita atu halaʼo moris iha dalan neʼebé diʼak liu no lori ksolok ba Jeová no mós ba ita-nia maluk fiar-naʼin. (Prov 27:11; 3 João 4) Neʼe mak razaun furak liu atu hafolin lia-loos no moris tuir lia-loos. w22.08 p. 19 par. 16-18

Oinsá katuas sira hatudu katak sira hadomi Jeová no Jesus? Dalan importante ida mak hodi tau matan ba bibi sira-nia presiza. (1 Ped 5:​1, 2) Jesus fó sai ida-neʼe ho klaru ba apóstolu Pedro. Depois nega tiha Jesus ba dala tolu, Pedro hakarak tebes atu prova katak nia hadomi Jesus. Depois Jesus moris-hiʼas, Jesus husu ba Pedro: “Simão, João nia oan, ó hadomi haʼu ka lae?” Ita bele fiar katak Pedro prontu atu halo buat naran deʼit hodi prova katak nia hadomi ninia Naʼi. Jesus hatete ba Pedro: “Tau matan ba haʼu-nia bibi-oan sira.” (João 21:​15-17) Husi tempu neʼebá, Pedro tau matan ba Naʼi nia bibi ho laran-diʼak, no neʼe hatudu katak nia hadomi Jesus. Se Ita mak katuas ida, oinsá Ita bele hatudu katak Jesus nia liafuan ba Pedro mak importante ba Ita? Ita bele hatudu katak Ita hadomi Jeová no Jesus liuhusi uza tempu beibeik atu anima irmaun-irmán sira no mós hakaʼas an atu ajuda ema neʼebé la ativu atu fila fali ba Jeová.—Eze 34:​11, 12. w23.01 p. 29 par. 10-11

Keta hanoin katak ema seluk la komprende fraku neʼebé Ita luta hasoru daudaun. Hanoin hanesan neʼe bele halo Ita sente katak Ita labele hetan ajuda no Ita la iha kbiit atu luta hasoru Ita-nia hakarak neʼebé sala. Bíblia dehan katak Ita bele manán Ita-nia hakarak neʼebé sala. Bíblia hatete: “Kuandu imi hasoru tentasaun ruma, nia mós sei hatudu dalan ba imi atu sai, atu nuneʼe imi bele tahan.” Tan neʼe, maski ita-nia hakarak neʼebé sala mak makaʼas tebes, maibé ita bele tahan ida-neʼe ho susesu. Ho Jeová nia ajuda, ita bele iha kbiit atu la halo tuir deʼit ita-nia hakarak. Kontinua hanoin-hetan katak tanba Ita la perfeitu, dala ruma hakarak neʼebé sala bele mosu. Maibé bainhira neʼe mosu, Ita bele halakon kedas ida-neʼe hanesan José halo bainhira nia halai sees lalais husi Potifar nia feen. (Gén 39:12) Ita la presiza halo tuir Ita-nia hakarak neʼebé sala. w23.01 p. 12-13 par. 16-17

Jeová nia hahalok ida mak justisa. (Deut 32:4) Hahalok justisa mós liga ho hahalok la todan ba sorin no Jeová la todan ba sorin. (Após 10:​34, 35) Jeová uza língua oioin atu hakerek Bíblia, neʼe hatudu nia la todan ba sorin. Jeová promete katak iha tempu nia rohan, ‘koñesimentu loos’ husi Bíblia “sei sai barak”. Ema barak sei komprende Bíblia. (Dan 12:4) Bíblia no publikasaun kona-ba Bíblia tradús ona ba língua barak, no mós fó sai no fahe ba ema barak, tan neʼe mak koñesimentu neʼebé loos kona-ba Bíblia sai barak. Jeová nia povu tradús ona Bíblia kompletu ka parte balu iha língua 240 liu, no ema bele hetan ho gratuitu. Rezultadu mak ema husi nasaun hotu bele aprende “liafuan diʼak kona-ba Maromak nia Ukun” antes mundu nia rohan toʼo mai. (Mt 24:14) Ita-nia Maromak justisa nian hakarak fó oportunidade ba ema barak liu atu bele koñese nia liuhusi lee ninia Liafuan. Neʼe tanba nia hadomi tebes ita hotu. w23.02 p. 5 par. 11-12

Klaru katak ita hafolin hahalok loos. Maski nuneʼe, ita hotu la perfeitu, no se ita la kuidadu, mundu bele fó influénsia ba ita-nia hanoin kona-ba saida mak loos. (Isa 5:20) Ema barak hanoin katak ema neʼebé hatudu hahalok loos liu mak ema neʼebé fiar an demais, tesi-lia ba ema seluk, ka hanoin katak nia diʼak liu fali ema seluk. Maibé Maromak la gosta ema neʼebé hatudu hahalok hanesan neʼe. Bainhira Jesus iha rai, nia kritika ulun-naʼin relijiaun sira neʼebé halo lei rasik kona-ba saida mak loos no sala. (Ecle 7:16; Lc 16:15) Ema neʼebé halo buat loos tuir Jeová nia haree sei nunka sente katak nia diʼak liu fali ema seluk. Hahalok loos mak furak tebes. Hahalok loos signifika halo buat neʼebé loos tuir Jeová nia haree. Iha Bíblia, liafuan neʼebé tradús nuʼudar “hahalok loos” fó ideia kona-ba moris tuir Jeová nia matadalan neʼebé diʼak liu. w22.08 p. 26-27 par. 3-5

Jesus tau fiar ba ninia dixípulu sira maski sira halo sala. (João 15:16) Bainhira Tiago no João husu Jesus atu fó sira knaar importante iha Maromak nia Ukun, Jesus la duvida ho sira-nia motivu atu serbí Jeová ka hasai sira-nia knaar nuʼudar apóstolu. (Mc 10:​35-40) Jesus nia dixípulu hotu mós husik hela nia iha kalan neʼebé ema kaer nia. (Mt 26:56) Maibé Jesus la lakon fiar ba sira. Nia hatene didiʼak sira-nia fraku, maski nuneʼe nia “hadomi sira toʼo rohan”. (João 13:1) Bainhira Jesus hetan tiha moris-hiʼas, nia mós fó knaar importante ba ninia apóstolu naʼin-11 neʼebé laran-metin atu tau matan ba serbisu haklaken no ninia bibi sira. (Mt 28:​19, 20; João 21:​15-17) Jesus iha razaun neʼebé diʼak atu tau fiar ba mane sira-neʼe neʼebé la perfeitu. Sira hotu serbí Jeová ho laran-metin toʼo sira mate. Klaru katak, Jesus mak ezemplu diʼak kona-ba tau fiar ba ema neʼebé la perfeitu. w22.09 p. 6 par. 12

Bainhira ita iha konfiansa katak Jeová hamutuk ho ita no hadomi ita, ita sei la taʼuk ba Satanás. Porezemplu, ema neʼebé hakerek Salmo 118 hasoru situasaun susar balu. Nia iha inimigu barak, inklui ulun-naʼin sira (versíkulu 9, 10). Dala ruma nia sente presaun makaʼas (versíkulu 13). Jeová fó dixiplina makaʼas ba nia (versíkulu 18). Maski nuneʼe, nia hatete: “Haʼu sei nunka taʼuk.” Nia hatene katak maski Jeová fó dixiplina ba nia, maibé Jeová hadomi nia. Nia mós fiar katak maski nia hasoru situasaun neʼebé susar, Maromak neʼebé hadomi nia sempre prontu atu ajuda nia. (Sal 118:29) Ita presiza fiar metin katak Jeová hadomi ita ida-idak. Neʼe sei ajuda ita atu la sente taʼuk iha situasaun tolu: (1) taʼuk katak labele sustenta ita-nia família, (2) taʼuk ba ema, no (3) taʼuk mate. w22.06 p. 15 par. 3-4

Ita tenke hakaʼas an atu tau uluk adorasaun ba Jeová iha Ita-nia moris. Jeová mak ita-nia Kriadór, tan neʼe ita tenke adora nia. (Apok 4:11; 14:​6, 7) Buat importante liu iha ita-nia moris mak adora Jeová iha dalan neʼebé nia simu katak adora nia “tuir espíritu no lia-loos”. (João 4:​23, 24) Ita hakarak Maromak nia espíritu santu dirije ita atu nuneʼe ita-nia adorasaun bele tuir lia-loos husi Bíblia. Ita tenke tau uluk ita-nia adorasaun ba Jeová, maski ita hela iha rai neʼebé governu bandu ita-nia atividade sira. Agora daudaun, irmaun-irmán naʼin-100 liu mak iha komarka laran tanba sira mak Testemuña ba Jeová. Maski nuneʼe, sira hakaʼas an atu halo orasaun, estuda, no haklaken kona-ba Maromak no ninia Ukun. Bainhira ema koʼalia aat ita ka kontra ita, ita bele sente kontente tanba hatene katak Jeová hamutuk ho ita no nia sei haraik bensaun ba ita.—1 Ped 4:14. w22.10 p. 9 par. 13

Iha livru Provérbios, Jeová fó konsellu barak neʼebé sempre bele ajuda ita. Haree ezemplu rua kona-ba konsellu neʼebé matenek. Primeiru, kontente ho buat neʼebé Ita iha. Provérbios 23:4, 5 fó konsellu: “Keta halo kole ó-nia an atu hetan rikusoin. . . . Tanba rikusoin neʼe sei iha liras hanesan manu-makikit no semo ba lalehan.” Maski nuneʼe, ema riku no mós ema kiak hanoin barak demais kona-ba buka osan. Ida-neʼe mak baibain book sira atu halo buat neʼebé bele estraga sira-nia naran diʼak, sobu sira-nia relasaun, no estraga saúde. (Prov 28:20; 1 Tim 6:​9, 10) Segundu, hanoin uluk antes koʼalia. Se ita la kuidadu, ita-nia liafuan bele halo ema laran-kanek. Provérbios 12:18 hatete: “Liafuan neʼebé koʼalia sai hodi la hanoin uluk mak hanesan sona ho surik, maibé ema matenek nia nanál mak bele kura.” Ita haburas dame bainhira ita la gosip kona-ba ema seluk nia fraku.—Prov 20:19. w22.10 p. 21 par. 14; p. 22 par. 16-17

Ezequiel presiza komprende didiʼak mensajen neʼebé nia atu fó sai. Nia tenke tau fiar ba mensajen neʼe atu neʼe bele book nia atu haklaken. Tuirmai buat neʼebé oin-seluk akontese. Bainhira Ezequiel komesa han, nia sente katak surat-tahan lulun neʼe “midar hanesan bani-been”. (Eze 3:3) Tanbasá? Tanba Ezequiel sente katak priviléjiu atu reprezenta Jeová mak buat neʼebé diʼak ka midar. (Sal 19:​8-11) Nia agradese tebes tanba Jeová simu no hili nia atu sai nuʼudar profeta. Depois neʼe, Jeová hatete ba Ezequiel: “Rona didiʼak ba haʼu-nia liafuan hotu neʼebé haʼu koʼalia ba ó no rai ida-neʼe iha ó-nia laran.” (Eze 3:10) Liafuan sira-neʼe hatudu katak Jeová hakarak Ezequiel atu hanoin-hetan buat neʼebé hakerek iha surat-tahan lulun no medita kona-ba neʼe. Bainhira Ezequiel halo ida-neʼe, nia sai fiar metin liután. Ida-neʼe mós iha mensajen makaʼas neʼebé Ezequiel presiza fó sai. (Eze 3:11) Bainhira Ezequiel komprende didiʼak no fiar Maromak nia mensajen, nia prontu atu komesa haklaken no kontinua halo ida-neʼe toʼo nia kumpre ninia knaar. w22.11 p. 6 par. 12-14

Se mudansa iha organizasaun koko Ita-nia fiar, Ita bele halo saida? Apoia mudansa husi organizasaun. Durante viajen iha rai-fuik, ema Kohat sira iha knaar atu halo serbisu espesiál ida. Tempu ida-idak neʼebé ema Izraél muda sira-nia hela-fatin, ema Kohat balu sei lori arka aliansa hodi laʼo iha povu nia oin. (Núm 3:​29, 31; 10:33; Jos 3:​2-4) Neʼe mak priviléjiu boot! Maibé situasaun troka bainhira ema Izraél hela metin ona iha Rai neʼebé Maromak Promete. Arka la presiza tan muda bá-mai beibeik. Entaun ema Kohat balu simu knaar atu halo serbisu oioin. (1 Krón 6:​31-33; 26:​1, 24) Bíblia nunka fó sai katak sira muramura ka hakarak hetan knaar neʼebé espesiál tanba uluk sira iha knaar espesiál. Ita aprende saida? Diʼak atu apoia mudansa sira neʼebé mai husi Jeová nia organizasaun ho laran tomak, inklui mudansa sira neʼebé afeta Ita-nia knaar. Kontente ho knaar naran deʼit neʼebé Ita halo. Hanoin-hetan katak laʼós Ita-nia knaar mak halo Jeová hafolin Ita. Jeová hafolin liu Ita-nia laran-metin duké Ita-nia knaar. w22.11 p. 23 par. 10-11

Onesíforo buka apóstolu Paulo, no bainhira nia hetan Paulo, nia buka dalan atu apoia Paulo. Atu halo nuneʼe, Onesíforo tau ninia moris iha perigu laran. Ita aprende saida? Ita labele husik taʼuk ba ema hanetik ita atu apoia irmaun sira neʼebé ema fó-terus. Mai ita defende sira no ajuda sira. (Prov 17:17) Sira presiza ita-nia domin no apoia. Hanoin kona-ba oinsá irmaun-irmán sira iha rai-Rúsia ajuda sira-nia maluk fiar-naʼin neʼebé tama komarka. Bainhira irmaun-irmán balu hetan julgamentu iha tribunál, irmaun-irmán barak mai atu apoia sira. Ita aprende saida? Bainhira ema koʼalia aat, kaer ka kontra irmaun sira neʼebé tau matan organizasaun, ita labele sai taʼuk. Halo orasaun kona-ba sira, ajuda sira-nia família, no buka dalan oioin atu apoia sira.—Após 12:5; 2 Kor 1:​10, 11. w22.11 p. 17 par. 11-12

Katuas sira presiza ajuda irmaun-irmán sira iha dalan espirituál no mós fó kmaan ba sira. (1 Ped 5:2) Bainhira akontese dezastre, katuas sira presiza konfirma katak irmaun-irmán sira seguru, iha hahán, roupa no hela-fatin. Maski fulan barak liutiha, irmaun-irmán sira-neʼe nafatin presiza ajuda iha dalan espirituál no mós presiza hetan kmaan. (João 21:15) Irmaun Harold neʼebé serbí nuʼudar membru ba Komisaun ba Sukursál no hasoru ona irmaun-irmán barak neʼebé sai vítima ba dezastre hatete: “Presiza tempu atu bele sai diʼak fali. Karik sira-nia moris komesa sai normál fali, maibé sira kontinua hanoin kona-ba família no belun neʼebé mate, sasán folin-boot neʼebé lakon, ka situasaun perigu neʼebé sira hasoru. Memória sira-neʼe bele hamosu sentimentu triste. Neʼe mak normál, no la dehan katak sira-nia fiar fraku.” Katuas sira presiza aplika konsellu neʼebé dehan: “Tanis ho sira neʼebé tanis.”—Rom 12:15. w22.12 p. 22 par. 1; p. 24-25 par. 10-11

Jeová ho laran-luak fó ninia espíritu santu atu ajuda ita kontinua halo buat neʼebé loos. Bainhira ita estuda Bíblia, ita fó oportunidade ba Maromak nia espíritu santu atu fó influénsia mai ita. Ita mós simu espíritu santu bainhira ita tuir reuniaun. Iha reuniaun sira, ita bele ransu ho irmaun-irmán sira neʼebé hakaʼas an atu halo buat loos hanesan ita no neʼe anima duni ita. (Ebr 10:​24, 25; 13:7) Bainhira ita harohan ba Jeová no husu nia atu ajuda ita manán ita-nia fraku balu, nia sei fó espíritu santu atu ajuda ita kontinua luta. Karik buat sira-neʼe la halakon ita-nia hakarak neʼebé sala, maibé neʼe bele ajuda ita atu la halo tuir deʼit ita-nia hakarak. Bainhira ita iha toman atu halo atividade espirituál, importante atu mantein ida-neʼe no kontinua haburas hakarak atu halo buat neʼebé loos. w23.01 p. 11 par. 13-14

Bíblia laʼós livru médiku ka la fó sai buat espesífiku kona-ba saida mak ita presiza han. Maski nuneʼe, Bíblia esplika Jeová nia hanoin kona-ba buat sira-neʼe. Porezemplu, Jeová anima ita atu hasees an husi “buat aat” neʼebé bele estraga ita-nia isin. (Ecle 11:10) Bíblia hatete katak ita labele han barak demais no hemu tua demais. Buat sira-neʼe bele estraga ita-nia saúde no oho ita. (Prov 23:20) Jeová hakarak ita atu kontrola an bainhira deside kona-ba atu han no hemu saida no mós barak oinsá. (1 Kor 9:25) Bainhira halo desizaun, ita hakarak uza didiʼak ita-nia kbiit atu hanoin. Hodi halo nuneʼe, ita hatudu katak ita hafolin tebes moris neʼebé Maromak fó mai ita. (Sal 119:​99, 100; Prov 2:11) Porezemplu, ita sei hakaʼas an atu halo desizaun neʼebé matenek kona-ba buat neʼebé ita han. Se ita gosta hahán ida, maibé ita hatene katak hahán neʼe bele halo ita moras, ita sei la han ida-neʼe. Ita mós hatudu sai katak ita uza didiʼak ita-nia kbiit atu hanoin hodi toba tuir oras, halo ezersísiu beibeik, no tau matan ita-nia isin no hela-fatin atu moos nafatin. w23.02 p. 21 par. 6-7

Oinsá Ita bele hetan rikusoin husi Bíblia kuandu Ita lee? Hanoin toʼok buat neʼebé 2 Timóteo 3:​16, 17 hatete. Versíkulu neʼe dehan katak “Eskritura hotu . . . diʼak” atu (1) hanorin, (2) fó konsellu, (3) halo loos buat hotu, no (4) fó dixiplina. Ita bele hetan benefísiu haat neʼe husi livru hotu iha Bíblia, inklui mós livru sira neʼebé Ita ladún uza beibeik. Analiza istória neʼebé Ita lee hodi buka-hatene ida-neʼe hanorin saida kona-ba Jeová, ninia hakarak ka kona-ba Bíblia nia prinsípiu sira. Hanoin kona-ba oinsá ida-neʼe diʼak atu fó konsellu. Ita bele halo nuneʼe liuhusi haree oinsá versíkulu neʼe ajuda Ita rekoñese no hasees an husi hanoin no toman neʼebé sala no kontinua laran-metin ba Jeová. Buka-hatene oinsá Ita bele uza versíkulu neʼe atu halo loos buat hotu ka korrije hanoin neʼebé sala, karik neʼe mak hanoin ruma neʼebé ema fó sai ba Ita bainhira Ita haklaken. No buka-hatene dixiplina husi versíkulu sira neʼebé bele treinu Ita atu iha hanoin hanesan Jeová nian. Bainhira Ita kontinua hanoin kona-ba buat haat neʼe, Ita sei hetan rikusoin neʼebé folin-boot. w23.02 p. 11 par. 11

Profesia ida iha livru Daniel fó sai nanis katak Jesus sei sai Liurai iha tempu hitu nia rohan. Ita bele hatene bainhira mak Jesus sai Liurai ka lae? (Dan 4:​10-17) “Tempu hitu” neʼebé temi iha eskritura neʼe reprezenta tinan 2.520. Tempu neʼe komesa iha tinan 607 AEC bainhira Babilónia halakon liurai ikus neʼebé ukun Jeruzalein hodi reprezenta Jeová. Tempu neʼe remata iha tinan 1914 EC bainhira Jeová foti Jesus nuʼudar Liurai ba Maromak nia Ukun. Jesus mak “ida neʼebé iha direitu tuir lei” atu sai nuʼudar Liurai. (Eze 21:​25-27) Oinsá profesia neʼe afeta ita? Maromak deside nanis katak liutiha “tempu hitu” nia sei harii ninia Ukun no nia kumpre ida-neʼe. Bainhira ita komprende kona-ba neʼe, ida-neʼe hametin ita-nia fiar katak Jeová sei kumpre ninia promesa sira seluk no tuir tempu neʼebé nia deside ona. Sin, Jeová nia loron “sei la tarde”.—Hab 2:3. w22.07 p. 3 par. 3-5