Janeiru

Jesus “haree feto-faluk” neʼebé triste hela no tuirmai “nia hanoin tebes feto neʼe”. (Lc 7:13) Maibé Jesus laʼós deʼit hanoin feto neʼe, maibé nia mós hatudu laran-sadiʼa ba feto neʼe. Jesus koʼalia ba feto neʼe ho lian neʼebé mamar hodi dehan: “Keta tanis.” Tuirmai Jesus halo buat ruma. Jesus fó moris-hiʼas ba feto neʼe nia oan-mane no entrega fali nia “ba ninia inan”. (Lc 7:​14, 15) Ita aprende saida husi Jesus nia milagre neʼe? Ita aprende atu hatudu laran-sadiʼa ba ema neʼebé triste tanba família mate. Hanesan Jesus, ita bele haree didiʼak ema nia situasaun atu nuneʼe ita bele hatudu laran-sadiʼa ba sira neʼebé triste tanba família mate. Ita bele iha inisiativu atu hatudu laran-sadiʼa liuhusi ita-nia liafuan no mós hakaʼas an atu ajuda no fó kmaan ba sira. (Prov 17:17; 2 Kor 1:​3, 4; 1 Ped 3:8) Maski ita halo buat neʼebé kiʼik deʼit ka hatoʼo liafuan neʼebé simples, neʼe bele halo ema sente kmaan. w23.04 p. 5-6 par. 13-15

Maski Jesus hatene ninia belun Lázaro foin mate, nia hela tan loron rua iha fatin neʼe no tuirmai mak nia bá Betánia. Bainhira Jesus toʼo, Lázaro mate ona ba loron haat. Jesus iha planu atu halo buat ruma neʼebé lori benefísiu ba ninia belun sira no mós fó glória ba Maromak. (João 11:​6, 11, 17) Ita aprende lisaun kona-ba habelun malu iha istória neʼe. Porezemplu, bainhira Maria no Marta haruka lia-menon ba Jesus, sira la husu Jesus atu mai Betánia. Sira dehan deʼit katak Jesus nia belun moras. (João 11:3) Bainhira Lázaro mate, Jesus bele deʼit fó moris-hiʼas ba Lázaro husi dook. Duké halo nuneʼe, Jesus halo viajen ba Betánia atu hamaluk ninia belun Maria no Marta. Ita iha belun neʼebé prontu atu ajuda, maski Ita la husu ka lae? Se nuneʼe, Ita hatene katak Ita bele tau fiar ba nia atu ajuda Ita iha “tempu susar”. (Prov 17:17) Hanesan Jesus, ita mós hakarak sai belun hanesan neʼe ba ema seluk! w23.04 p. 10 par. 10-11

Bainhira ita hasoru situasaun susar, karik ita sente katak Jeová nia mundu foun sei nunka mai. Neʼe katak ita-nia fiar fraku ka lae? Lae. Hanoin toʼok kona-ba ai-knanoik ida. Karik durante tempu bailoro neʼebé naruk, ita hanoin katak udan sei nunka mai. Maibé ikusmai udan tun no tempu bailoro remata. Nuneʼe mós, bainhira ita sente laran-kraik tebes, karik ita sente katak mundu foun sei nunka mai. Maibé se ita-nia fiar metin, ita hatene katak Maromak nia promesa sira sei sai loos. (Sal 94:​3, 14, 15; Ebr 6:​17-19) Ho konfiansa, ita bele kontinua tau uluk ita-nia adorasaun ba Jeová. Ita mós presiza fiar neʼebé metin atu bele haklaken. Ema barak hanoin katak “liafuan diʼak” kona-ba mundu foun mak mehi deʼit. (Mt 24:14; Eze 33:32) Nunka duvida kona-ba Jeová nia hanorin hanesan ema sira-neʼe. Atu neʼe labele akontese, ita presiza kontinua hametin ita-nia fiar. w23.04 p. 27 par. 6-7; p. 28 par. 14

Dala ruma, Ita mós sente hanesan Jeová la hatán Ita-nia orasaun ka lae? Se nuneʼe Ita la mesak. Irmaun-irmán barak mós hatete katak sira hanoin kona-ba neʼe, liuliu bainhira sira hasoru problema. Se ita mak hetan terus, karik neʼe halo susar ba ita atu haree oinsá Jeová hatán ita-nia orasaun. Tanbasá ita bele iha konfiansa katak Jeová hatán ninia atan sira-nia orasaun? Bíblia fó kmaan ba ita hodi fó sai katak Jeová hadomi tebes ita no hafolin ita. (Ageu 2:7; 1 João 4:10) Tan razaun neʼe mak nia konvida ita atu husu ninia ajuda liuhusi orasaun. (1 Ped 5:​6, 7) Nia hakarak ajuda ita atu tahan hasoru susar sira ho susesu no nafatin hakbesik ba nia. Iha Bíblia, dala barak ita lee katak Jeová hatán ninia atan sira-nia orasaun. Ita hanoin-hetan ezemplu ida ka lae? w23.05 p. 8 par. 1-4

Maria iha relasaun diʼak ho Jeová no ninia fiar la depende ba buat neʼebé José halo. Maria hatene didiʼak Eskritura sira. Nia mós uza tempu atu medita. (Lc 2:​19, 51) Klaru katak Maria nia relasaun diʼak ho Jeová ajuda nia sai feen neʼebé diʼak. Ohin loron, feen barak hakaʼas an atu banati-tuir Maria. Porezemplu, irmán ida naran Emiko hatete: “Bainhira haʼu klosan, haʼu iha toman rasik atu halo atividade espirituál. Maibé depois haʼu kaben, haʼu rekoñese katak tanba haʼu-nia laʼen mak halo orasaun ba ami no dirije ami-nia adorasaun, haʼu komesa depende deʼit ba nia atu halo buat sira-neʼe. Ikusmai haʼu rekoñese katak haʼu rasik presiza hametin haʼu-nia relasaun diʼak ho Jeová. Tan neʼe agora haʼu uza tempu atu mesamesak ho Jeová hodi halo orasaun, lee Bíblia, no medita kona-ba Jeová nia hanoin.” (Gal 6:5) Feen sira, bainhira Ita kontinua hametin Ita-nia relasaun diʼak ho Jeová, Ita-nia laʼen sei gaba no hadomi liután Ita.—Prov 31:30. w23.05 p. 21 par. 6

Ita tenke aprende atu hamtaʼuk ba Maromak tanba neʼe la mosu mesak deʼit. Dalan ida mak hodi haree didiʼak ba kriasaun sira. Bainhira ita haree oinsá Jeová nia kriasaun sira haleno ninia matenek, kbiit no domin neʼebé boot mai ita, ita sei respeitu no hadomi nia liután. (Rom 1:20) Ita mós bele aprende atu hamtaʼuk Jeová liuhusi halo orasaun beibeik. Dala ida-idak ita halo orasaun ba Jeová, ita koñese nia diʼak liután. Porezemplu, bainhira ita husu Jeová atu fó forsa ba ita atu tahan, ka fó obrigadu ba ninia Oan nia sakrifísiu, ka husu ajuda kona-ba problema ruma, neʼe fó-hanoin ita katak nia iha forsa neʼebé boot, hadomi tebes ita, no mós matenek tebes. Orasaun sira hanesan neʼe halo ita respeitu liután Jeová no ita sei hakaʼas an atu la halo buat ida neʼebé bele estraga ita-nia relasaun ho nia. w23.06 p. 15 par. 6-7

Jeová sempre fó sai ukun-fuan ba ninia povu ho klaru. Porezemplu, grupu administradór iha apóstolu sira-nia tempu fó sai dalan tolu neʼebé ema Kristaun presiza hamriik metin: (1) labele adora estátua maibé adora Jeová mesak deʼit, (2) haree raan nuʼudar buat neʼebé sagradu, no (3) halo tuir Bíblia nia matadalan kona-ba morál. (Após 15:​28, 29) Oinsá mak ema Kristaun ohin loron bele hamriik metin iha dalan sira-neʼe? Hodi adora no halo tuir Jeová. Jeová haruka ema Izraél atu adora nia mesak deʼit. (Deut 5:​6-10) Bainhira Diabu tenta Jesus, Jesus fó sai ho klaru katak ema tenke adora Jeová mesak deʼit. (Mt 4:​8-10) Tan neʼe, ita la adora estátua. Ita mós la adora ema. Porezemplu ita la haree ulun-naʼin relijiaun, polítiku-naʼin, atleta, ka artista sira nuʼudar maromak ida. Ita adora deʼit Jeová tanba liuhusi nia mak “buat hotu iha no kria tiha”.—Apok 4:11. w23.07 p. 14-15 par. 3-4

Satanás nia mundu tau fokus demais ba sala seksuál no pornografia. (Éf 4:19) Tan neʼe Ita tenke hamtaʼuk Jeová no hasees an husi buat neʼebé aat. Iha Provérbios kapítulu 9, neʼe konta kona-ba feto simbóliku naʼin-rua neʼebé reprezenta matenek no hahalok beik. Bíblia dehan katak sira ida-idak fó konvite ba ema neʼebé la iha esperiénsia ka “ema neʼebé beik”. Neʼe hanesan sira ida-idak hatete: ‘Mai han hamutuk iha haʼu-nia uma.’ (Prov 9:​1, 4-6) Maibé ema neʼebé simu konvite hetan rezultadu neʼebé la hanesan. Lee toʼok konvite husi “feto neʼebé beik”. (Prov 9:​13-18) Nia bolu ema neʼebé la iha esperiénsia hodi dehan: “Mai iha neʼe” no halo festa. Tuirmai saida mak akontese ba sira? “Feto neʼe nia uma mak uma ba ema mate.” Ita hetan avizu atu kuidadu ho “feto neʼebé halo hahalok aat”, no “feto neʼebé la iha morál”. Provérbios dehan: “Laʼo ba ninia uma mak hanesan laʼo ba mate.” (Prov 2:​11-19) Provérbios 5:​3-10 fó avizu kona-ba feto seluk tan “neʼebé halo hahalok aat” no “ninia ain laʼo tun ba mate”. w23.06 p. 22 par. 6-7

Katuas sira tenke hatudu ezemplu diʼak kona-ba la ulun-toos. (1 Tim 3:​2, 3) Porezemplu, katuas ida labele hanoin katak katuas hotu tenke simu ninia ideia tanba nia mak idade liu. Nia rekoñese katak Jeová nia espíritu bele book katuas naran deʼit atu fó ideia neʼebé bele ajuda katuas sira atu halo desizaun neʼebé matenek. No se desizaun neʼe la kontra Bíblia nia prinsípiu, katuas neʼebé la ulun-toos sei apoia desizaun neʼebé grupu katuas foti, maski nia rasik hakarak foti desizaun seluk. Ema Kristaun hetan bensaun barak tanba la ulun-toos. Porezemplu, ita sei iha relasaun diʼak ho irmaun-irmán sira no mós kongregasaun sei iha dame. Ita kontente tanba bele adora Jeová hamutuk ho ema neʼebé iha hahalok no kultura neʼebé la hanesan. Importante liu, ita kontente tanba ita banati-tuir Jeová neʼebé la ulun-toos. w23.07 p. 25 par. 16-17

Daniel estuda kona-ba profesia ho motivu neʼebé loos, neʼe mak atu hatene lia-loos. Nia mós hatudu haraik an hodi rekoñese katak Jeová sei ajuda nia komprende profesia sira se nia kontinua hakbesik no halo tuir Jeová. (Dan 2:​27, 28) Daniel hatudu katak nia haraik an liuhusi sadere ba Jeová nia ajuda. (Dan 2:18) Nia mós estuda didiʼak. Nia halo peskiza kona-ba Eskritura sira neʼebé hakerek ona iha tempu neʼebá. (Jer 25:​11, 12; Dan 9:2) Oinsá Ita bele banati-tuir Daniel? Hanoin kona-ba Ita-nia motivu. Ita estuda Bíblia nia profesia tanba hakarak atu hatene kona-ba lia-loos ka lae? Se nuneʼe, Jeová sei ajuda Ita. (João 4:​23, 24; 14:​16, 17) Ema balu estuda Bíblia tanba sira hakarak buka evidénsia katak Bíblia la mai husi Maromak. Sira hanoin katak se Bíblia la mai husi Maromak neʼe katak sira bele deside rasik saida mak loos no sala. Maibé, Ita presiza iha motivu neʼebé loos. w23.08 p. 9 par. 7-8

Ita sei hatodan ita-nia an se ita kompara ita-nia an ho ema seluk. (Gal 6:4) Se ita halo neʼe, neʼe bele halo ita laran-moras no kompete malu. (Gal 5:26) Tanba ita hakarak kumpre buat neʼebé ema seluk kumpre, karik ikusmai ita obriga demais ita-nia an atu halo liu fali ita-nia abilidade no situasaun. Hanoin toʼok kona-ba neʼe: Bíblia hatete katak ita bele sai laran-kanek se ita hein kleur ba buat ruma. (Prov 13:12) Entaun ita sei sai laran-kanek liután se ita hakarak halo buat neʼebé ita nunka bele kumpre. Se ita halo nuneʼe, neʼe bele halo ita kole no hanetik ita atu halai toʼo rohan. Keta obriga Ita-nia an atu halo liu fali buat neʼebé Jeová husu. Jeová nunka husu Ita atu fó buat neʼebé Ita la iha. (2 Kor 8:12) Ita bele fiar metin katak Jeová la kompara buat neʼebé Ita halo ho ema seluk. (Mt 25:​20-23) Nia hafolin Ita-nia laran-metin, Ita-nia kbiit atu tahan, no dalan neʼebé Ita serbí nia ho laran tomak. w23.08 p. 29 par. 10-11

Jeová hatán Sansão nia orasaun hodi halo milagre atu halo bee-matan ida. Bainhira Sansão hemu bee neʼe, “ninia forsa fila fali ba nia no nia sente forte fali”. (Juís 15:19) Tinan barak liutiha, bee-matan neʼe nafatin iha bainhira Samuel hakerek livru Juís. Kuandu ema Izraél haree bee-matan neʼe, neʼe bele fó-hanoin sira katak se sira sadere ba Jeová, nia sei ajuda sira. Ita mós presiza sadere ba Jeová maski ita iha abilidade ka ita kumpre ona buat barak hodi serbí nia. Ita presiza ho haraik an rekoñese katak ita bele hetan susesu tan deʼit ita sadere ba Jeová. Hanesan Sansão hetan fali forsa bainhira hemu bee neʼebé Jeová fó ba nia, ita-nia fiar mós sei sai metin liután bainhira ita aproveita buat hotu neʼebé Jeová fó mai ita.—Mt 11:28. w23.09 p. 4 par. 8-10

Saida mak ita bele halo kuandu ema provoka ita, hanesan bainhira ema hafoʼer Maromak nia naran ka hatún Bíblia nia hanorin? Ita presiza husu Jeová nia espíritu santu no ninia matenek atu bele hatán ho laran-maus. Oinsá se ikusmai ita rekoñese katak ita hatán iha dalan neʼebé la diʼak? Ita bele halo orasaun kona-ba neʼe no hanoin kona-ba buat neʼebé ita bele halo se ita hasoru tan situasaun neʼebé hanesan. Jeová sei fó ita espíritu santu hodi nuneʼe ita bele kontrola ita-nia hirus no hatudu laran-maus. Bainhira ita sente susar atu koʼalia ho kalma, iha eskritura balu neʼebé bele ajuda ita kontrola ita-nia liafuan. Maromak nia espíritu santu bele ajuda ita atu hanoin-hetan eskritura sira-neʼe. (João 14:26) Porezemplu, prinsípiu iha livru Provérbios bele ajuda ita atu hatudu laran-maus. (Prov 15:18) Livru Provérbios mós fó sai benefísiu seluk neʼebé ita bele hetan bainhira ita hatudu laran-maus iha situasaun susar.—Prov 10:19; 17:27; 21:23; 25:15. w23.09 p. 15 par. 6-7

Apóstolu Pedro serbí Jeová ho laran-metin ba tinan barak. Nia laʼo tuir Jesus durante Jesus halaʼo serbisu haklaken, nia komesa haklaken ba ema neʼebé laʼós ema Judeu, no serbí nuʼudar membru ba Grupu Administradór. Bainhira Pedro hatene katak lakleur nia sei mate, Jeová fó tan serbisu ba nia. Maizumenus iha tinan 62-64 EC, Jeová dirije nia atu hakerek karta rua, neʼe mak livru Primeiru Pedro no Segundu Pedro. (2 Ped 1:​13-15) Apóstolu Pedro hakerek ninia karta sira bainhira maluk fiar-naʼin seluk “sente laran-susar . . . tanba hasoru terus oioin”. (1 Ped 1:6) Ema aat koko atu habelar hanorin falsu no hahalok la moos iha kongregasaun. (2 Ped 2:​1, 2, 14) Lakleur tan ema Kristaun iha Jeruzalein sei hasoru “buat hotu nia rohan”, katak tropa Roma sei harahun sidade Jeruzalein no mós templu. (1 Ped 4:7) Ita bele fiar katak Pedro nia karta sira ajuda ema Kristaun iha tempu neʼebá atu hatene oinsá sira bele tahan hasoru susar neʼebé mosu daudaun, no mós oinsá sira bele prepara atu hasoru susar neʼebé atu mai. w23.09 p. 26 par. 1-2

Hanesan Jesus, ita bele aprende atu halo tuir liuhusi susar neʼebé ita hasoru. Porezemplu, kuandu pandemia COVID-19 hahú, ita simu matadalan atu la halaʼo tan reuniaun iha Reuniaun-Fatin no para atu haklaken husi uma ba uma. Ita sente susar atu halo tuir ka lae? Tuir loloos hodi halo tuir, neʼe proteje Ita, lori unidade entre maluk fiar-naʼin sira, no halo Jeová kontente. Agora ita prontu atu halo tuir matadalan hotu neʼebé ita sei simu durante terus boot. Ita-nia moris depende ba ida-neʼe! (Job 36:11) Ita hili liu atu halo tuir Maromak Jeová tanba ita hadomi nia no hakarak halo nia kontente. (1 João 5:3) Ita nunka bele selu fali buat hotu neʼebé Jeová halo ona mai ita. (Sal 116:12) Maibé ita bele halo tuir nia no sira neʼebé simu podér uitoan husi nia. Se ita halo tuir, ita hatudu katak ita matenek. No ema neʼebé matenek sei halo Jeová nia laran haksolok.—Prov 27:11. w23.10 p. 11 par. 18-19

Se anju ida koʼalia ba Ita, Ita sei rona ba nia ka lae? Ohin loron, anju ida koʼalia “ba nasaun, suku, língua no povu hotu”. Anju neʼe hatete saida? “Hamtaʼuk Maromak bá no fó glória ba nia . . . adora bá Ida neʼebé halo lalehan no rai.” (Apok 14:​6, 7) Jeová mak Maromak loos mesak deʼit neʼebé ema hotu tenke adora. Ita agradese tanba bele hetan oportunidade atu adora nia iha ninia templu espirituál! Saida mak templu espirituál? No iha neʼebé mak ita bele hetan informasaun kona-ba neʼe? Templu espirituál laʼós fatin ida iha mundu. Neʼe mak Jeová nia arranju kona-ba adorasaun loos neʼebé bazeia ba Jesus nia sakrifísiu. Apóstolu Paulo esplika liután kona-ba neʼe iha ninia karta ba ema Kristaun Ebreu neʼebé hela iha Judeia. w23.10 p. 24 par. 1-2

Iha tinan 522 AEC, ema Judeu sira-nia inimigu sira husu governu Pérsia atu hapara serbisu atu harii fali templu. Maibé Zacarias hametin ema Judeu katak Jeová sei uza Ninia espíritu santu atu ajuda sira kontinua serbisu maski hasoru susar naran deʼit. Iha tinan 520 AEC, Liurai Dário husik ema Judeu atu kontinua harii fali templu no fó ba sira osan atu halo serbisu neʼe. Nia mós haruka governadór sira husi nasaun viziñu atu ajuda sira. (Ezras 6:​1, 6-10) Jeová promete ba ninia povu katak nia sei kontinua apoia sira se sira tau uluk serbisu atu harii fali templu. (Ageu 1:​8, 13, 14; Zac 1:​3, 16) Tanba hetan anima husi profeta sira-neʼe, ema Judeu hahú fali atu harii templu iha tinan 520 AEC no halo hotu serbisu neʼe iha tinan lima nia laran. Tanba ema Judeu tau uluk serbisu ba Maromak maski hasoru susar, Jeová apoia sira. Rezultadu mak sira adora Jeová ho haksolok.—Ezras 6:​14-16, 22. w23.11 p. 15 par. 6-7

Maski ema barak rona ona kona-ba Abraão, maibé sira barak ladún hatene didiʼak kona-ba nia. Maibé Ita hatene didiʼak kona-ba Abraão. Porezemplu, Ita hatene katak Bíblia temi Abraão nuʼudar “aman ba ema hotu neʼebé iha fiar”. (Rom 4:11) Karik Ita husu: ‘Haʼu bele halo tuir Abraão nia ezemplu kona-ba fiar ka lae?’ Sin, Ita bele. Dalan ida atu haburas fiar hanesan Abraão mak hodi estuda kona-ba ninia ezemplu. Abraão halo tuir Maromak nia mandamentu hodi muda ba fatin neʼebé dook, hela iha tenda ba tempu naruk, no prontu atu fó ninia oan-mane Isaac nuʼudar sakrifísiu. Hahalok sira-neʼe hatudu katak Abraão iha fiar neʼebé metin. Tanba Abraão nia fiar no hahalok, neʼe halo Jeová kontente no sai Jeová nia belun. (Tgo 2:​22, 23) Jeová hakarak ita hotu atu simu bensaun neʼebé hanesan. Tan neʼe nia dirije Paulo no Tiago atu hakerek Abraão nia ezemplu iha Bíblia. w23.12 p. 2 par. 1-2

Irmán sira, aprende atu komunika ho didiʼak. Ema Kristaun presiza hatene oinsá atu komunika ho didiʼak. Dixípulu Tiago fó matadalan diʼak hodi hatete liafuan sira iha leten. Bainhira Ita rona didiʼak ba ema seluk, Ita hatudu katak Ita hanoin sira-nia sentimentu. (1 Ped 3:8) Se Ita ladún komprende buat neʼebé ema koʼalia ka sente, husu pergunta. Tuirmai hanoin uluk antes koʼalia. (Prov 15:28) Husu Ita-nia an: ‘Buat neʼebé haʼu atu hatete mak loos no hametin ema ka lae? Neʼe hatudu respeitu no laran-diʼak ka lae?’ Ita bele aprende husi irmán maduru sira neʼebé komunika ho didiʼak. (Prov 31:26) Tau atensaun ba dalan neʼebé sira koʼalia. Bainhira Ita haburas abilidade neʼe ho didiʼak, sei fasil ba Ita atu iha relasaun diʼak ho ema seluk. w23.12 p. 21 par. 12

Ohin loron, karik Jeová mós uza ita-nia família, belun, ka katuas kongregasaun atu ajuda ita. Maibé, bainhira ita sente laran-susar, karik ita hakarak deʼit atu hadook an husi ema seluk no hakarak atu mesamesak deʼit. Neʼe mak reasaun neʼebé normál. Saida mak ita bele halo atu simu Jeová nia apoiu? Hakaʼas an atu la mesamesak. Bainhira ita izola an, baibain ita komesa hanoin deʼit kona-ba ita-nia an no problema neʼebé ita hasoru daudaun. Hanoin hanesan neʼe bele kona ita-nia desizaun. Klaru katak ita hotu presiza tempu balu atu mesamesak, liuliu bainhira ita foin hasoru susar ruma. Maibé, se ita izola an ba tempu naruk, neʼe bele hanetik ita atu simu ajuda husi ema neʼebé Jeová uza atu apoia ita. Tan neʼe diʼak atu simu ajuda husi família, belun, no katuas sira durante tempu susar. Haree sira nuʼudar ema neʼebé Jeová uza atu apoia ita.—Prov 17:17; Isa 32:​1, 2. w24.01 p. 24 par. 12-13

Ema Nazireu jura atu la tesi sira-nia fuuk. Neʼe mak dalan ida atu hatudu katak sira fó sira-nia moris tomak ba Jeová. Triste mak dala ruma ema Izraél balu la hafolin ka apoia ema Nazireu. Dala ruma ema Nazireu presiza hatudu aten-brani atu kaer metin ba sira-nia juramentu no halaʼo moris neʼebé la hanesan ho ema seluk. (Amós 2:12) Tanba ita hili atu halo tuir Jeová, ema seluk nota katak ita la hanesan ho sira. Ita presiza aten-brani atu fó sai iha serbisu-fatin ka iha eskola katak ita mak Testemuña ba Jeová. Ema barak nia hahalok sai aat ba beibeik, tan neʼe karik susar ba ita atu moris tuir Bíblia nia prinsípiu sira no haklaken liafuan diʼak ba ema seluk. (2 Tim 1:8; 3:13) Hanoin-hetan nafatin katak ita “halo [Jeová] nia laran haksolok” bainhira ita aten-brani atu halaʼo moris neʼebé la hanesan ho ema neʼebé la serbí nia.—Prov 27:11; Mal 3:18. w24.02 p. 16 par. 7; p. 17 par. 9

Ita hatene katak kongregasaun iha Roma iha ema oioin. Sira balu mak ema Judeu neʼebé uluk halo tuir Moisés nia Ukun-Fuan, no balu mak husi nasaun seluk neʼebé iha kultura la hanesan. Ema Kristaun balu mak atan, balu tan mak laʼós atan, no mós karik sira balu iha atan. Oinsá sira bele hatudu domin ba malu maski sira-nia situasaun moris la hanesan? Apóstolu Paulo anima sira atu “simu malu”. Neʼe signifika saida? Liafuan neʼebé tradús nuʼudar “simu malu” signifika simu ema ho laran-diʼak no laran-luak atu mai ita-nia uma ka sai ita-nia belun. Porezemplu, Paulo fó-hatene Filemon atu simu fali atan Onésimo neʼebé uluk halai husi Filemon. Paulo dehan: “Simu nia bá ho laran-diʼak.” (Flm 17) Priscila no Áquila simu Apolo neʼebé ladún hatene buat barak kona-ba Kristu nia hanorin hodi “lori nia” ba sira-nia uma. (Após 18:26) Ema Kristaun sira-neʼe simu malu no la husik sira-nia situasaun moris neʼebé la hanesan atu hamosu problema entre sira. w23.07 p. 6 par. 13

Razaun importante liu atu dedika an ba Jeová mak tanba Ita hadomi nia. Ita-nia domin laʼós deʼit bazeia ba sentimentu, maibé bazeia ba “koñesimentu neʼebé loos” no “kbiit atu komprende buat espirituál”, neʼe katak buat neʼebé Ita aprende ona kona-ba Jeová neʼebé halo Ita-nia domin ba nia sai boot liután. (Kol 1:9) Bainhira Ita estuda Bíblia, neʼe hametin Ita-nia fiar katak (1) Jeová iha duni, (2) Bíblia mak ninia Liafuan, no (3) nia uza ninia organizasaun atu kumpre ninia hakarak. Ema neʼebé atu dedika an ba Jeová presiza hatene hanorin báziku sira iha Bíblia no moris tuir buat neʼebé sira aprende. Sira hakaʼas an atu koʼalia ba ema seluk kona-ba buat neʼebé sira aprende ona. (Mt 28:​19, 20) Sira-nia domin ba Jeová sai buras liután, no sira hakarak tebes atu adora nia mesak deʼit. Ita rasik halo ida-neʼe ka lae? w24.03 p. 4-5 par. 6-8

Abigail kaben ho Nabal neʼebé Bíblia temi nuʼudar mane neʼebé siʼak-teen no iha hahalok aat. (1 Sam 25:3) Klaru katak susar tebes ba Abigail atu moris hamutuk ho mane hanesan neʼe. Abigail buka dalan atu hakotu ninia moris kaben nian ka lae? Loloos Abigail iha oportunidade bainhira David, ida neʼebé sei sai liurai, mai atu oho ninia laʼen neʼebé uluk insulta David no ninia ema sira. (1 Sam 25:​9-13) Abigail bele deʼit halai no husik David atu oho Nabal. Maibé Abigail la halo nuneʼe, nia husu David atu la oho Nabal. (1 Sam 25:​23-27) Saida mak motiva Abigail? Abigail hadomi Jeová no respeitu Jeová nia matadalan kona-ba moris kaben nian. Nia hatene katak Jeová haree moris kaben nian mak sagradu. Nia hakarak halo Jeová kontente, no neʼe motiva nia atu halo buat naran deʼit atu salva ninia umakain, inklui ninia laʼen. Nia halo lalais buat ruma atu hanetik David hodi labele oho Nabal. w24.03 p. 16-17 par. 9-10

Iha ka lae ema ruma iha kongregasaun neʼebé koko atu halaʼo moris simples hodi bele serbí Jeová liután? Ita hatene ka lae joven balu neʼebé aten-brani iha eskola hodi halaʼo moris neʼebé la hanesan ho ninia kolega sira maski susar? Oinsá ho sira neʼebé karik sente susar atu hamriik metin tanba família kontra? Mai ita buka oportunidade hotu atu hametin sira hodi fó sai katak ita hafolin sira-nia sakrifísiu no aten-brani. (Flm 4, 5, 7) Jeová hatene katak ita hakarak halo nia kontente no prontu halo sakrifísiu hodi bele moris tuir ita-nia dedikasaun. Nia respeitu ita hodi fó ita oportunidade atu hili hodi hatudu domin ba nia. (Prov 23:​15, 16) Mai ita deside metin atu kontinua serbí Jeová no prontu atu fó buat neʼebé diʼak liu ba nia. w24.02 p. 18 par. 14; p. 19 par. 16

Imajina toʼok situasaun maizumenus iha fulan-Outubru tinan 29 EC bainhira Jesus hahú ninia serbisu haklaken. Jesus no ninia inan Maria, hetan konvite atu tuir festa kazamentu iha Kaná. Maria ajuda tau matan bainaka sira. Maibé durante festa, mosu problema ida. Problema mak tua-uvas hotu. Maria hakbesik kedas ba ninia oan-mane no hatete: “Sira-nia tua-uvas hotu ona.” (João 2:​1-3) Saida mak Jesus halo? Nia halo milagre ida hodi troka bee sai fali “tua-uvas diʼak”. (João 2:​9, 10) Jesus halo milagre barak durante ninia serbisu haklaken iha rai. Nia uza ninia kbiit atu halo milagre hodi ajuda ema rihun ba rihun. Porezemplu, Jesus halo milagre dala rua atu fó han mane naʼin-5.000 no tuirmai mane naʼin-4.000, no se sura ho feto no labarik sira karik Jesus fó han ema naʼin-27.000 liu. (Mt 14:​15-21; 15:​32-38) Iha situasaun rua neʼe, Jesus mós kura ema barak neʼebé moras.—Mt 14:14; 15:​30, 31. w23.04 p. 2 par. 1-2

Depois susar liutiha, karik iha tempu ida neʼebé ita sente fraku iha dalan fíziku no emosaun. Hanesan Elias, ita mós bele sente susar atu hadeer no hakarak atu toba deʼit. (1 Reis 19:​5-7) Ita mós karik presiza ajuda atu kontinua halo Jeová nia serbisu. Iha situasaun hanesan neʼe, Jeová promete atu ajuda ita hanesan temi iha eskritura ba ohin. Liurai David sente ona Jeová nia apoiu. Bainhira nia hasoru susar no inimigu kontra nia, nia dehan ba Jeová: “Ita-nia liman-loos apoia haʼu.” (Sal 18:35) Baibain Jeová apoia ita liuhusi motiva ema seluk atu ajuda ita. Porezemplu, bainhira David sente fraku, ninia belun Jonatan vizita nia atu apoia iha dalan emosaun no uza liafuan neʼebé hametin. (1 Sam 23:​16, 17) Jeová mós hili Eliseu atu ajuda Elias.—1 Reis 19:​16, 21; 2 Reis 2:2. w24.01 p. 23-24 par. 10-12

Jeová mak laran-luak no nia fó ita buat diʼak barak. Ita bele haree ida-neʼe husi ezemplu kona-ba feto neʼebé reprezenta “matenek neʼebé loos” iha Provérbios kapítulu 9. Versíkulu sira-neʼe konta katak feto neʼe konvida bainaka sira atu tama ba ninia uma no han naʼan no tua-uvas neʼebé nia prepara ona. (Prov 9:​1, 2, nota.) Versíkulu 4 no 5 hatete: “Nia [katak matenek neʼebé loos] koʼalia ba ema neʼebé beik, hodi dehan: ‘Mai, han haʼu-nia paun.’” Tanbasá ita presiza simu konvite husi feto neʼebé matenek? Jeová hakarak ninia oan sira atu hetan matenek no sente seguru. Nia lakohi ita atu halo sala neʼebé lori susar ba ita. Tan neʼe mak “nia rai hela matenek ba ema neʼebé laran-loos”. (Prov 2:7) Bainhira ita hamtaʼuk Jeová, ita hakarak atu halo nia kontente, rona ba ninia konsellu no aplika ida-neʼe.—Tgo 1:25. w23.06 p. 23-24 par. 14-15

Maski ita labele halo buat barak iha Jeová nia serbisu, ita bele fiar katak Jeová hafolin ita-nia hakaʼas an atu halo nia kontente. Oinsá ita hatene? Iha Zacarias nia tempu, Jeová husu ninia profeta atu halo koroa husi osan-mean no osan-mutin neʼebé ema Judeu iha Babilónia fó. (Zac 6:11) “Koroa kmanek neʼe” fó-hanoin kona-ba oinsá ema Judeu fó kontribuisaun ho laran-luak. (Zac 6:​14, nota) Ita bele fiar katak Jeová sei nunka haluha ita-nia hakaʼas an atu serbí nia durante tempu susar. Durante loron ikus sira, ita sei hasoru susar oioin no karik situasaun sei sai aat liután iha futuru. (2 Tim 3:​1, 13) Maibé ita la presiza hanoin barak. Hanoin-hetan Jeová nia liafuan ba ninia povu iha Ageu nia tempu: “Haʼu hamutuk ho imi. . . . Keta taʼuk.” (Ageu 2:​4, 5) Ita mós bele fiar katak Jeová sei kontinua hamutuk ho ita se ita hakaʼas an atu halo ninia hakarak. w23.11 p. 19 par. 20-21

Jeová la presiza temi apóstolu Pedro nia sala sira iha Bíblia. Maibé buat sira-neʼe hakerek iha Bíblia nuʼudar lisaun mai ita. (2 Tim 3:​16, 17) Bainhira ita aprende kona-ba Pedro neʼebé iha fraku no sentimentu hanesan ita, neʼe bele ajuda ita komprende katak Jeová la husu ita atu sai perfeitu. Jeová hakarak ita atu kontinua serbí nia ho laran-metin, maski ita iha fraku oioin. Tanbasá ita presiza hakaʼas an atu kontinua serbí Jeová no la rende an? Maski ita sente katak ita manán ona ita-nia fraku ida, maibé dala ruma ita mós bele halo fali sala. Maibé kontinua hakaʼas an atu halo mudansa. Ita hotu dala ruma koʼalia ka halo buat ruma neʼebé ikusmai ita arrepende, maibé Jeová sei ajuda ita atu halo mudansa se ita la rende an. (1 Ped 5:10) Jesus nia laran-sadiʼa ba Pedro bele motiva ita atu kontinua serbí Jeová. w23.09 p. 20 par. 2-3

Jesus bele kura Lázaro, hanesan Marta hatete iha eskritura ba ohin. Maibé Jesus hakarak halo buat neʼebé kmanek liu. Nia promete: “Ó-nia alin sei moris fali.” Nia mós dehan: “Haʼu mak moris-hiʼas no moris.” (João 11:​23, 25) Maromak fó kbiit ba nia atu fó moris-hiʼas ba ema mate. Antes neʼe, nia fó moris-hiʼas ona ba labarik-feto ida lakleur depois nia mate no mós mane joven ida, karik iha loron neʼebé mane neʼe mate. (Lc 7:​11-15; 8:​49-55) Maibé nia bele fó moris-hiʼas ba ema neʼebé mate ona ba loron haat no isin komesa dodok ona ka lae? Lázaro nia biin Maria bá hasoru Jesus. Nia repete fali liafuan neʼebé Marta fó sai ona hodi dehan: “Naʼi, se Ita-Boot iha neʼe karik, haʼu-nia alin sei la mate.” (João 11:32) Bainhira Jesus haree no rona Maria no ema seluk tanis, nia mós triste tebes. Jesus hadomi tebes ninia belun sira, tan neʼe ninia matan-been mós tun. Nia komprende ema nia triste bainhira ema neʼebé sira hadomi mate. Klaru katak, nia hakarak tebes atu halakon buat neʼebé halo ema tanis. w23.04 p. 10-11 par. 12-13