Agostu

Eskritura iha leten fó sai pontu importante rua: (1) Ema laran-loos hasoru susar. (2) Jeová salva ita husi ita-nia susar sira. Oinsá mak Jeová salva ita? Dalan ida mak liuhusi ajuda ita iha hanoin neʼebé loos kona-ba moris iha mundu aat neʼe. Maski Jeová promete katak ita sei hetan ksolok hodi serbí nia, maibé nia la promete katak ita-nia moris sei la iha problema. (Isa 66:14) Nia anima ita atu tau fokus ba futuru bainhira ita moris ba nafatin hodi tuir ninia hakarak. (2 Kor 4:​16-18) Antes tempu neʼe toʼo mai, nia ajuda ita atu kontinua serbí nia loroloron. (Lam 3:​22-24) Ita bele aprende saida husi Jeová nia atan sira iha tempu uluk no mós ohin loron? Problema oioin bele mosu derrepente. Maibé kuandu ita sadere ba Jeová, nia sempre apoia ita.—Sal 55:22. w23.04 p. 14-15 par. 3-4

Ita bele aprende husi José no Maria nia ezemplu. Sira prontu atu halo tuir autoridade sira maski neʼe susar. (Lc 2:​1-6) Bainhira Maria isin-rua maizumenus fulan sia, nia no José hasoru situasaun neʼebé susar. César Augusto neʼebé ukun Roma husu povu atu halo sensus. José no Maria presiza halo viajen ba Belein, viajen neʼe dook maizumenus kilómetru 150 no sira presiza laʼo liu área neʼebé iha foho barak. Neʼe mak viajen neʼebé susar, liuliu ba Maria. Karik sira hanoin barak kona-ba Maria no bebé neʼebé sei moris-mai. Oinsá se nia tuur-ahi durante sira-nia viajen? Maria presiza tau matan ba Mesias neʼebé promete nanis ona. Neʼe bele sai razaun ida atu sira la halo tuir governu nia lei ka lae? Maski José no Maria iha razaun atu hanoin barak, maibé sira nafatin halo tuir governu nia lei. Jeová haraik bensaun tanba sira halo tuir. Maria toʼo iha Belein ho seguru, tuur-ahi bebé neʼebé iha saúde diʼak, no mós hola parte atu kumpre Bíblia nia profesia!—Miq 5:2. w23.10 p. 8 par. 9; p. 9 par. 11-12

Oinsá se Ita sente taʼuk atu fó komentáriu iha reuniaun sira? Karik Ita bele prepara ho didiʼak. (Prov 21:5) Bainhira Ita hatene didiʼak informasaun, fasil liu ba Ita atu fó komentáriu. Diʼak mós atu fó komentáriu neʼebé badak. (Prov 15:23; 17:27) Ita sei la sente taʼuk demais se Ita fó komentáriu neʼebé badak. Bainhira Ita fó komentáriu neʼebé badak ho Ita-nia liafuan rasik, Ita hatudu katak Ita prepara ho didiʼak no komprende didiʼak informasaun. Oinsá se Ita koko ona sujestaun sira-neʼe balu, maibé nafatin sente taʼuk atu fó komentáriu liu dala rua? Ita bele fiar metin katak Jeová hafolin Ita-nia hakaʼas an atu fó komentáriu tuir Ita-nia kbiit. (Lc 21:​1-4) Jeová la husu Ita atu halo buat neʼebé liu fali Ita-nia kbiit. (Flp 4:5) Entaun deside saida mak Ita bele halo, halo planu atu kumpre ida-neʼe, no halo orasaun atu sente kalma. Karik foufoun Ita-nia planu mak atu fó komentáriu ida neʼebé badak. w23.04 p. 21 par. 6-8

Apóstolu Paulo kompara ita ho soldadu neʼebé matan-moris no hatais ona roupa funu nian. Soldadu ida tenke prontu iha tempu hotu atu halo funu. Ita mós presiza kontinua sai prontu ba Jeová nia loron liuhusi tau fiar no domin nuʼudar besi neʼebé proteje ita-nia hirus-matan no esperansa nuʼudar ita-nia kapasete. Besi proteje soldadu nia hirus-matan. Fiar no domin proteje mós ita-nia laran. Hahalok sira-neʼe ajuda ita atu kontinua serbí Maromak no halo tuir Jesus. Fiar ajuda ita atu iha konfiansa katak Jeová sei fó kolen ba ita neʼebé buka nia ho laran tomak. (Ebr 11:6) Neʼe sei book ita atu nafatin laran-metin ba ita-nia Ulun-Naʼin Jesus maski ita hasoru susar. Ita bele hametin ita-nia fiar atu bele tahan susar sira hodi aprende husi irmaun-irmán sira neʼebé nafatin laran-metin maski hasoru susar ekonomia ka ema kontra. Ita mós bele hasees an husi lasu kona-ba materializmu hodi banati-tuir irmaun-irmán sira neʼebé halaʼo moris simples atu bele tau uluk Maromak nia Ukun. w23.06 p. 10 par. 8-9

Kontrola an mak kbiit atu kontrola ita-nia sentimentu no hahalok. Ita presiza hahalok neʼe atu kumpre ita-nia planu sira, liuliu se planu neʼe mak susar atu kumpre ka ita la iha motivasaun atu halo ida-neʼe. Hanoin-hetan, kontrola an mak parte ba hahalok neʼebé mai husi espíritu santu, tan neʼe husu Jeová atu fó ninia espíritu santu mai Ita atu ajuda Ita haburas hahalok importante neʼe. (Lc 11:13; Gal 5:​22, 23) Keta hein toʼo situasaun neʼebé perfeitu. Iha mundu neʼe, ita sei nunka hetan situasaun neʼebé perfeitu. Se ita hein ba ida-neʼe, ita sei nunka kumpre ita-nia planu. Karik Ita la iha motivasaun tanba Ita sente susar atu kumpre Ita-nia planu. Se nuneʼe, Ita bele ka lae fahe Ita-nia planu ba parte kiʼik-kiʼik? Se Ita-nia planu mak atu haburas hahalok diʼak ida, Ita bele hahú hodi hatudu hahalok neʼe iha dalan neʼebé kiʼik. Se Ita-nia planu mak atu lee Bíblia tomak, Ita bele hahú hodi lee ba tempu badak deʼit. w23.05 p. 29 par. 11-13

Iha loron ikus sira-neʼe, Jeová uza ninia organizasaun atu kontinua fó matadalan husi Maromak nia Liafuan hodi ajuda ita hotu nafatin laʼo iha “Dalan Santu”. (Isa 35:8; 48:17; 60:17) Bainhira ema ida komesa estuda Bíblia, nia komesa laʼo iha “Dalan Santu”. Ema balu laʼo iha dalan neʼe ba tempu uitoan no tuirmai sai husi dalan neʼe. Ema seluk tan deside metin atu kontinua laʼo iha dalan neʼe toʼo sira kumpre sira-nia objetivu. Saida mak sira-nia objetivu? Ba ema sira neʼebé iha esperansa atu bá lalehan, “Dalan Santu” lori sira ba “Maromak nia paraízu” iha lalehan. (Apok 2:7) Ba sira neʼebé iha esperansa atu moris iha rai, dalan boot neʼe lori sira atu sai ema perfeitu iha tinan 1.000 nia rohan. Se agora daudaun, Ita laʼo iha dalan boot neʼe, keta hateke fali ba kotuk. Keta sai husi dalan neʼe toʼo Ita tama ba mundu foun! w23.05 p. 17 par. 15; p. 19 par.16-18

Bainhira Ita hanoin kona-ba buat hotu neʼebé Jeová halo ona mai Ita, neʼe book Ita atu hatudu agradese hodi dedika an ba nia. (Sal 116:​12-14) Bíblia hatete katak Jeová mak ida neʼebé fó “prezente diʼak ida-idak no prezente hotu neʼebé perfeitu”. (Tgo 1:17) Prezente neʼebé folin-boot liu hotu mak ninia Oan-Mane Jesus nia sakrifísiu. Hanoin toʼok, Jesus nia sakrifísiu loke dalan ba Ita atu iha relasaun neʼebé besik ho Jeová. No Jeová mós fó ona mai Ita oportunidade atu moris ba nafatin. (1 João 4:​9, 10) Dedika Ita-nia an ba Jeová mak dalan neʼebé diʼak liu atu hatudu agradese ba domin boot no bensaun seluk neʼebé Ita simu.—Deut 16:17; 2 Kor 5:15. w24.03 p. 5 par. 8

Lot “sente laran-susar tebes tanba ema aat sira neʼebé halo hahalok aat toʼo la sente moe”. (2 Ped 2:​7, 8) Nia hatene katak Aman Jeová odi hahalok aat. Ita mós sente hanesan Lot bainhira ita haree ema nia morál neʼebé sai aat liután ohin loron. Tanba Lot hadomi no hamtaʼuk Jeová, nia odi hahalok la morál husi ema sira neʼebé haleʼu nia. Ohin loron, ema barak mós la hafolin Jeová nia matadalan kona-ba morál. Maski nuneʼe, ita bele moos nafatin iha dalan morál se ita kontinua hadomi Jeová no aprende atu hamtaʼuk nia. Jeová ajuda ita atu halo ida-neʼe liuhusi konsellu diʼak iha livru Provérbios. Ema Kristaun hotu, mane no feto, joven no idade, bele hetan benefísiu husi konsellu matenek iha Provérbios. Bainhira ita hamtaʼuk Jeová, ita sei la habelun ho ema sira neʼebé halo hahalok aat. w23.06 p. 20 par. 1-2; p. 21 par. 5

Karik Ita hasoru susar tanba família kontra ka Ita halo sakrifísiu balu atu tau uluk Maromak nia hakarak iha Ita-nia moris. (Mt 6:33) Se nuneʼe, Ita bele fiar katak Jeová haree buat neʼebé Ita halo ba nia. (Ebr 6:10) Karik Ita sente ona katak Jesus nia liafuan tuirmai mak loos: “Ema neʼebé husik ona uma, maun-alin ka feton, inan ka aman, oan, ka toʼos tanba haʼu no tanba liafuan diʼak sei simu uma, maun-alin, feton, inan, oan no toʼos dala atus ida liu fali uluk nian, hamutuk ho terus oioin iha tempu agora, no sei simu moris rohan-laek iha tempu neʼebé atu mai.” (Mc 10:​29, 30) Bensaun neʼebé Ita simu mak boot liu fali sakrifísiu naran deʼit neʼebé Ita halo.—Sal 37:4. w24.03 p. 9 par. 5

Kuandu rai-hamlaha boot mosu iha Judeia no afeta ema Kristaun, irmaun-irmán sira iha Antiokia “deside katak sira ida-idak sei fó ajuda tuir sira-nia kbiit, no haruka ajuda neʼe ba maun-alin sira neʼebé hela iha Judeia”. (Após 11:​27-30) Maski irmaun-irmán sira neʼebé hasoru susar neʼe hela dook, maibé ema Kristaun iha Antiokia deside atu fó ajuda. (1 João 3:​17, 18) Ohin loron, ita mós bele hatudu laran-sadiʼa bainhira irmaun-irmán sira hasoru dezastre. Ita prontu atu fó ajuda liuhusi fó kontribuisaun ba serbisu iha mundu tomak, liuhusi halo orasaun kona-ba sira neʼebé hasoru dezastre ka husu katuas sira se ita bele apoia atu halo projetu ruma. Karik irmaun-irmán sira mós sei presiza ajuda atu hetan sira-nia presiza loroloron nian. Bainhira ita-nia Liurai Kristu Jesus mai atu tesi-lia, ita hakarak nia haree katak ita hatudu laran-sadiʼa no nia sei konvida ita atu “simu Ukun” nuʼudar liman-rohan.—Mt 25:​34-40. w23.07 p. 4 par. 9-10; p. 6 par. 12

Jesus banati-tuir Jeová nia hahalok la ulun-toos. Maromak haruka Jesus mai iha rai atu haklaken ba ema Izraél neʼebé hanesan “bibi-malae neʼebé lakon”. Maibé Jesus hatudu katak nia la ulun-toos bainhira halaʼo ninia knaar. Loron ida, feto ida neʼebé laʼós ema Izraél husu Jesus atu kura ninia oan-feto neʼebé “anju aat domina”. Jesus hatudu laran-sadiʼa no kura feto neʼe nia oan. (Mt 15:​21-28) Hanoin toʼok ezemplu seluk tan. Antes neʼe, kuandu Jesus haklaken, nia dehan: “Ema neʼebé nega haʼu . . . , haʼu mós sei nega nia.” (Mt 10:33) Maibé bainhira Pedro nega Jesus ba dala tolu, Jesus mós nega nia ka lae? Lae. Jesus hatene katak Pedro arrepende an no hatudu fiar. Depois Jesus moris-hiʼas nia mosu ba Pedro no karik fó-hanoin Pedro katak nia hadomi no perdua ona Pedro. (Lc 24:​33, 34) Jeová no Jesus la ulun-toos. Oinsá ho ita? Jeová hakarak ita atu la ulun-toos. w23.07 p. 21 par. 6-7

Ita fiar katak mundu sei sai Paraízu. Entaun, saida mak ita bele hatete ba ema seluk neʼebé duvida kona-ba promesa neʼe? Primeiru, Jeová rasik mak promete. Livru Apokalipse hatete: “Ida neʼebé tuur iha kadunan dehan: ‘Haree bá! Haʼu halo buat hotu sai foun.’” Nia iha matenek, kbiit, no hakarak atu halo ninia promesa sai loos. Segundu, Jeová hatene katak buat neʼebé nia promete sei akontese duni. Tan neʼe nia hatete: “Liafuan sira-neʼe mak loos no ema bele tau fiar. . . . Liafuan sira-neʼe sai loos ona!” Terseiru, bainhira Jeová hahú halo buat ruma, nia sei halo ida-neʼe toʼo hotu no susesu. Tan neʼe nia hatete: “Haʼu mak Alfa no Ómega.” (Apok 21:6) Jeová sei prova katak Satanás mak bosok-teen no labele hapara Jeová nia hakarak. Tan neʼe, kuandu ema ruma dehan: “Neʼe sei nunka sai loos”, Ita bele lee no esplika Apokalipse 21:​5, 6, no hatudu oinsá Jeová rasik garantia ninia promesa neʼe.—Isa 65:16. w23.11 p. 7 par. 18-19

Jeová halo promesa neʼe ba Abraão bainhira nia tinan 75 no seidauk iha oan. Abraão haree profesia neʼe sai loos ka lae? Sin, maibé laʼós iha dalan kompletu. Depois hakur tiha Mota Eufrates no hein ba tinan 25 mak foin Abraão haree ninia oan Isaac moris, no depois hein tan ba tinan 60 mak nia haree ninia bei-oan Esaú no Jacob moris. (Ebr 6:15) Maibé Abraão la haree ninia bei-oan sira sai nuʼudar nasaun forte ida no tama ba Rai neʼebé Maromak Promete. Maski nuneʼe, Abraão kontente tanba nia iha relasaun neʼebé besik ho ninia Kriadór. (Tgo 2:23) No bainhira Abraão moris hiʼas, nia sei kontente atu haree katak ninia fiar no pasiénsia lori bensaun ba mundu tomak! (Gén 22:18) Saida mak ita aprende? Karik ita sei la haree Jeová nia promesa hotu sai loos agora daudaun. Maibé, se ita hatudu pasiénsia hanesan Abraão, ita bele fiar metin katak Jeová sei haraik bensaun ba ita agora no mós iha futuru.—Mc 10:​29, 30. w23.08 p. 24 par. 14

Bainhira Liurai Uzias sei joven nia haraik an. Nia aprende “atu hamtaʼuk Maromak loos”. Liurai Uzias moris toʼo tinan 68 no maizumenus durante ninia moris tomak Jeová haraik bensaun ba nia. (2 Krón 26:​1-4) Uzias manán funu hasoru inimigu barak no nia halo buat oioin atu proteje sidade Jeruzalein. (2 Krón 26:​6-15) Uzias kontente ho buat hotu neʼebé Jeová halo atu ajuda nia. (Ecle 3:​12, 13) Liurai Uzias toman manda ema seluk atu halo tuir ninia hakarak. Tan neʼe karik nia hanoin katak nia bele halo buat naran deʼit neʼebé nia hakarak. Loron ida, Uzias deside atu tama ba Jeová nia templu no hatudu foti an hodi koko sunu insensu iha altár leten. Loloos, liurai sira la iha direitu atu halo ida-neʼe. (2 Krón 26:​16-18) Amlulik Boot Azarias koko atu korrije nia, maibé Uzias sai hirus tebes. Triste mak Uzias la hatudu tan laran-metin, no Jeová fó-kastigu ba nia ho moras-lepra. (2 Krón 26:​19-21) Se nia haraik an nafatin, ninia situasaun sei la sai hanesan neʼe! w23.09 p. 10 par. 9-10

Maski apóstolu Pedro simu ona esperansa atu moris iha lalehan, nia nafatin luta hasoru ninia fraku sira. Iha tinan 36 EC, Maromak haruka Pedro atu bá hasoru Cornélio neʼebé laʼós ema Judeu. Iha neʼebá mak Jeová hili Cornélio ho espíritu santu, no neʼe hatudu ho klaru katak “Maromak la todan ba sorin” no ema husi nasaun seluk bele sai parte ba kongregasaun Kristaun. (Após 10:​34, 44, 45) Tuirmai Pedro sai toman atu han hamutuk ho ema husi nasaun seluk, maski uluk nia nunka hanoin atu halo ida-neʼe. Maibé ema Judeu balu neʼebé sai ona ema Kristaun hanoin katak sira labele han hamutuk ho ema husi nasaun seluk. Bainhira ema sira-neʼe mai iha Antiokia, Pedro para atu han ho maluk sira husi nasaun seluk. Karik nia taʼuk ba ema Kristaun Judeu sira-neʼe. Apóstolu Paulo haree Pedro nia laran-makerek neʼe no korrije nia iha ema hotu nia oin. (Gal 2:​13, 14) Maski Pedro halo sala, maibé nia nafatin la rende an. w23.09 p. 22 par. 8

Bainhira Ita analiza Ita-nia an karik Ita sei nota hahalok ruma neʼebé Ita presiza hadiʼa, maibé keta sai laran-kraik. ‘Naʼi laran-diʼak’, no nia sei ajuda Ita atu halo mudansa. (1 Ped 2:3) Apóstolu Pedro hatete: “Maromak . . . sei halo kompletu imi-nia treinu. Nia sei hametin imi.” Foufoun Pedro sente katak nia la merese atu hamutuk ho Maromak nia Oan-Mane. (Lc 5:8) Maibé ho Jeová no Jesus nia ajuda, Pedro laʼo tuir Jesus ho laran-metin. Tan neʼe Pedro merese “tama ba ita-nia Naʼi no Salvadór Jesus Kristu nia Ukun neʼebé iha ba nafatin”. (2 Ped 1:11) Neʼe mak bensaun neʼebé furak tebes! Se Ita hakaʼas an hanesan Pedro no simu treinu husi Jeová, Ita mós sei hetan moris ba nafatin. Tanba Ita hatudu fiar, Ita sei “hetan salvasaun”.—1 Ped 1:9. w23.09 p. 31 par. 16-17

Tenda santu iha pátiu ida deʼit, neʼe mak área luan neʼebé lutu haleʼu no iha neʼebá mak amlulik sira halaʼo sira-nia knaar. Iha pátiu nia laran, iha mós altár boot neʼebé halo husi riti neʼebé uza atu hasaʼe sakrifísiu sunu nian no mós basia boot husi riti neʼebé enxe ho bee. Amlulik sira uza bee neʼe atu fase sira-nia an antes halaʼo knaar sagradu. (Éx 30:​17-20; 40:​6-8) Ohin loron, sira neʼebé Jeová hili atu saʼe ba lalehan serbí ho laran-metin iha pátiu kiʼik iha templu espirituál. Basia boot neʼebé nakonu ho bee fó-hanoin sira no mós ema Kristaun hotu atu nafatin moos iha dalan morál no espirituál. Entaun, “ema-lubun boot” bele serbí Jeová iha neʼebé? Apóstolu João haree sira “hamriik iha kadunan nia oin” no “sira halo serbisu sagradu ba nia loron no kalan iha ninia templu”. Ema-lubun boot halo ida-neʼe iha mundu iha templu espirituál nia pátiu boot. (Apok 7:​9, 13-15) Ita agradese tanba Jeová fó ita oportunidade atu adora nia iha ninia templu espirituál! w23.10 p. 28 par. 15-16

Jeová mós fó kbiit mai ita liuhusi katuas kongregasaun. (Isa 32:​1, 2) Tan neʼe, bainhira Ita sente laran-taridu, fó sai ida-neʼe ba katuas sira. Kuandu sira fó ajuda ba Ita, keta dada an atu simu ida-neʼe. Liuhusi sira, Jeová bele halo Ita hetan kbiit. Esperansa husi Bíblia atu moris ba nafatin iha mundu Paraízu ka iha lalehan bele mós fó ita kbiit. (Rom 4:​3, 18, 19) Esperansa neʼe hametin ita atu tahan hasoru susar sira, haklaken liafuan diʼak, no halaʼo knaar oioin iha kongregasaun. (1 Tes 1:3) Esperansa neʼe mós hametin apóstolu Paulo. Nia hetan “terus makaʼas oioin husi sorin-sorin”, “la hatene atu halo saida”, “ema fó-terus”, no ‘ema soe nia ba rai’. Dala ruma ninia moris mós iha perigu laran. (2 Kor 4:​8-10) Paulo simu kbiit atu tahan susar sira hodi fokus ba ninia esperansa. (2 Kor 4:​16-18) Paulo fokus ba ninia esperansa iha futuru atu moris ba nafatin iha lalehan. Paulo hanoin kleʼan kona-ba ninia esperansa, no rezultadu mak nia simu kbiit foun “loron ba loron”. w23.10 p. 15-16 par. 14-17

Bainhira Ita halo orasaun, hanoin toʼok se neʼe mak tempu neʼebé loos ba Jeová atu hatán ita-nia orasaun ka lae. Karik ita bele sente katak ita presiza hetan kedas resposta ba ita-nia orasaun. Maibé Jeová hatene tempu neʼebé diʼak liu atu ajuda ita. (Ebr 4:16) Bainhira ita la simu kedas resposta, karik ita hanoin katak Jeová nia resposta mak ‘Lae’. Maibé tuir loloos ninia resposta mak ‘Seidauk’. Porezemplu, irmaun joven neʼebé halo orasaun atu sai diʼak fali. Maibé ninia saúde la sai diʼak. Se Jeová halo milagre hodi kura kedas nia, Satanás bele duun katak irmaun neʼe kontinua serbí Jeová tanba hetan kura. (Job 1:​9-11; 2:4) Liután neʼe, Jeová deside ona tempu neʼebé loos atu kura moras hotu. (Isa 33:24; Apok 21:​3, 4) Antes tempu neʼe toʼo, ita labele espera katak Jeová sei halo milagre atu kura ita. Tan neʼe, karik irmaun neʼe bele husu Jeová atu fó nia kbiit no dame iha laran atu tahan ninia moras no kontinua serbí Jeová ho laran-metin. w23.11 p. 24 par. 13

Sansão halo sala neʼebé sériu, maibé nia la rende an atu serbí Jeová. Nia buka oportunidade atu kumpre ninia knaar husi Jeová hodi bele kontra ema Filístia. (Juís 16:​28-30) Sansão husu ba Jeová: “Husik haʼu selu fali ema Filístia.” Jeová hatán Sansão nia orasaun no fó fali forsa neʼebé espesiál ba nia. Rezultadu mak Sansão oho ema Filístia barak liu fali akontesimentu sira antes neʼe. Maski Sansão hetan konsekuénsia neʼebé aat husi ninia sala, maibé nia kontinua hakaʼas an atu halo tuir Jeová nia hakarak. Se ita halo sala no hetan konsellu ka lakon knaar, keta rende an. Hanoin-hetan, Jeová prontu atu fó perdua ba ita. (Sal 103:​8, 9) Maski ita halo sala, Jeová bele fó ita kbiit atu halo ninia hakarak, hanesan buat neʼebé nia halo ona ba Sansão. w23.09 p. 6 par. 15-16

Jeová la kontente bainhira Ita hasoru susar maibé nia kontente tanba Ita tahan ho laran-metin. Ita hetan anima hodi hatene katak bainhira ita tahan, ita halo Jeová kontente! (Sal 5:12) Hanoin-hetan, Abraão tahan susar ho laran-metin no Jeová haraik bensaun ba nia. Jeová haree nia nuʼudar belun no bolu nia nuʼudar ema laran-loos. (Gén 15:6; Rom 4:​13, 22) Neʼe mós bele akontese mai ita. Jeová simu ita laʼós tanba serbisu neʼebé ita halo ba nia ka priviléjiu neʼebé ita iha. Nia simu ita tanba ita tahan ho laran-metin. Ita hotu bele tahan, neʼe la depende ba idade, situasaun moris, ka abilidade. Ita tahan daudaun susar ho laran-metin ka lae? Se nuneʼe, Ita bele sente kmaan tanba hatene katak Maromak simu Ita. Bainhira ita hatene katak Maromak simu ita, ita-nia esperansa ba ninia promesa sei sai metin liután. w23.12 p. 11 par. 13-14

Mane Kristaun presiza hatene oinsá atu komunika ho didiʼak. Neʼe katak nia presiza rona no komprende ema seluk nia hanoin no sentimentu. (Prov 20:5) Nia mós bele komprende ema seluk nia hanoin no sentimentu liuhusi ema neʼe nia lian, espresaun oin, no mós jestu. Se Ita la gasta tempu hamutuk ho ema seluk, Ita sei la kumpre ida-neʼe. Se Ita sempre komunika ho ema seluk liuhusi sasán eletróniku, porezemplu haruka mensajen ka e-mail, neʼe bele halo susar ba Ita atu komunika ho ema seluk oin ba oin. Tan neʼe, buka oportunidade atu koʼalia oin ba oin. (2 João 12) Mane Kristaun neʼebé maduru mós tenke aprende oinsá atu tau matan ba ninia an no família. (1 Tim 5:8) Ita presiza duni aprende skill ruma neʼebé bele ajuda Ita hetan serbisu. (Após 18:​2, 3; 20:34; Éf 4:28) Hakaʼas an atu sai ema neʼebé serbisu makaʼas no halo hotu serbisu neʼebé Ita hahú ona. Hodi halo nuneʼe, Ita sei hetan reputasaun neʼebé diʼak. w23.12 p. 27 par. 12-13

Kuandu Bíblia koʼalia kona-ba “Jeová nia loron”, neʼe refere ba tempu neʼebé Jeová tesi-lia ba ninia inimigu sira no salva ninia povu. Iha tempu uluk, Jeová fó-kastigu ba nasaun balu. (Isa 13:​1, 6; Eze 13:5; Sof 1:8) Iha ita-nia tempu, “Jeová nia loron” komesa bainhira ulun-naʼin polítiku sira ataka Babilónia Boot no remata iha funu Armagedon. Atu hetan salvasaun iha “loron” neʼe, ita presiza prepara an agora. Jesus la dehan deʼit katak ita presiza prontu ba “terus boot”, maibé ita mós tenke “prontu nafatin” ba loron neʼe. (Mt 24:21; Lc 12:40) Iha Paulo nia karta primeiru ba ema Kristaun iha Tesalónika, nia uza ai-knanoik oioin atu ajuda sira sai prontu nafatin ba Jeová nia loron tesi-lia nian. Paulo hatene katak Maromak nia loron seidauk mai iha tempu neʼebá. (2 Tes 2:​1-3) Maski nuneʼe, nia anima irmaun-irmán sira atu prepara an ba loron neʼe hanesan loron neʼe sei mai aban, no ita mós bele halo tuir ninia konsellu neʼe. w23.06 p. 8 par. 1-2

Iha tinan 1978, ema harii uma ida neʼebé iha andár 60 iha Tokyo, rai-Japaun. Iha tempu neʼebá, ema hanoin barak kona-ba oinsá uma neʼe bele hamriik metin nafatin maski akontese beibeik rai-nakdoko. Enjeñeiru sira halo saida atu uma neʼe bele hamriik metin nafatin? Sira halo uma neʼe metin tebes maibé iha tempu hanesan uma neʼe bele book an bá-mai kuandu mosu rai-nakdoko. Ema Kristaun mak atu hanesan ho uma-andár neʼe. Oinsá? Ema Kristaun tenke iha balansu kona-ba hamriik metin no mós la ulun-toos. Sira presiza hamriik metin hodi kontinua halo tuir Jeová nia ukun-fuan no matadalan. Sira “prontu atu halo tuir” no laran-metin nafatin. Maibé sira mós presiza fleksivel no “la ulun-toos” bainhira situasaun permite. (Tgo 3:17) Ema Kristaun neʼebé hatudu balansu sei la ulun-toos kona-ba halo tuir Jeová nia ukun-fuan maibé sira mós sei la tolera hahalok sala oioin. w23.07 p. 14 par. 1-2

Jesus presiza hamriik metin hodi tahan hasoru tentasaun husi Diabu Satanás. Satanás mós koʼalia kedas ba nia atu kontra Jeová. (Mt 4:​1-11) Satanás hakarak tebes atu halo Jesus monu ba sala, hodi nuneʼe Jesus labele sosa fali buat neʼebé Adão halo lakon. Durante Jesus haklaken iha rai, nia tahan susar seluk tan. Ninia inimigu fó-terus no koko atu oho nia. (Lc 4:​28, 29; 13:31) Nia presiza tahan hasoru ninia dixípulu sira-nia fraku. (Mc 9:​33, 34) Bainhira hetan tesi-lia, ema baku no goza nia. Tuirmai nia hetan kastigu-mate neʼebé aat tebes no hamoe nia. (Ebr 12:​1-3) Bainhira iha ai-riin terus nian, nia presiza tahan susar neʼe ho ninia kbiit rasik, no Jeová la koko atu proteje Jesus husi mate. (Mt 27:46) Jesus tenke hasoru susar barak atu bele fó ninia moris nuʼudar sakrifísiu. Bainhira ita hanoin kona-ba buat hotu neʼebé Jesus halo, neʼe halo ita-nia domin ba nia sai boot liután. w24.01 p. 10-11 par. 7-9

Pasiénsia ajuda ita atu iha relasaun diʼak ho ema seluk, no ajuda ita atu rona didiʼak bainhira ema koʼalia. (Tgo 1:19) Pasiénsia mós ajuda ita atu iha dame ho ema seluk. Bainhira ita sente estrese, hahalok pasiénsia sei ajuda ita atu la halo ka koʼalia kedas buat ruma neʼebé bele hakanek ema seluk nia laran. Se ita hatudu pasiénsia, ita mós sei la sai hirus lalais kuandu ema hakanek ita-nia laran. Maibé, ita sei “kontinua hatudu pasiénsia ba malu no prontu atu fó perdua ba malu ho laran tomak”. (Kol 3:​12, 13) Pasiénsia mós bele ajuda ita atu halo desizaun ho matenek. Duké ansi, ita sei uza tempu atu halo peskiza no hanoin kona-ba ita-nia opsaun sira antes halo desizaun ruma. Porezemplu, se ita buka serbisu, karik ita hakarak hili serbisu primeiru neʼebé ita hetan. Maibé, se ita mak pasiénsia, ita sei uza tempu atu hanoin didiʼak oinsá serbisu neʼe kona ita-nia família no adorasaun ba Jeová. Pasiénsia sei ajuda ita atu foti desizaun ho matenek. w23.08 p. 22 par. 8-9

Se Ita sente laran-kraik tanba presiza kontinua luta hasoru Ita-nia hakarak neʼebé sala, hodi hanoin kona-ba promesa neʼebé Ita halo ba Jeová kuandu Ita dedika an ba nia, neʼe sei hametin Ita atu luta hasoru tentasaun. Oinsá? Bainhira Ita dedika an ba Jeová, Ita nega Ita-nia an rasik. Neʼe katak Ita hili atu la halo tuir Ita-nia hakarak no planu neʼebé halo Jeová la kontente. (Mt 16:24) Entaun bainhira Ita hasoru tentasaun, Ita la presiza gasta tempu barak atu hanoin kona-ba saida mak Ita sei halo. Ita deside nanis ona saida mak Ita sei halo, neʼe mak atu laran-metin nafatin ba Jeová. Ita sei nafatin hakaʼas an atu halo Jeová kontente. Ita sei banati-tuir Job. Maski nia hasoru situasaun neʼebé susar tebes, nia hatete: “Haʼu sei nunka husik haʼu-nia laran-metin!”—Job 27:5. w24.03 p. 9 par. 6-7

Jeová “Maromak domin” nian hamutuk ho ita! (2 Kor 13:11) Nia hanoin ita ida-idak. Ita bele fiar metin katak “ninia domin neʼebé laran-metin haleʼu” ita. (Sal 32:10) Bainhira ita medita kona-ba oinsá nia hatudu domin mai ita, ita bele sente besik liután ba nia. Ita bele hakbesik ba nia hodi halo orasaun no fó sai katak ita presiza tebes ninia domin. Ita bele fó sai buat hotu neʼebé halo ita hanoin barak, no fiar metin katak nia komprende no hakarak atu ajuda ita. (Sal 145:19) Hanesan ita gosta hakbesik no haneruk ahi iha tempu malirin, ita mós gosta hakbesik ba Jeová no sente ninia domin. Jeová nia domin mak iha kbiit boot, no nia mós tau matan ba ita. Tan neʼe ita bele sente kontente tanba Jeová hadomi ita. Mai ita hotu fó sai ita-nia sentimentu kona-ba ninia domin hodi hatete: “Haʼu hadomi Jeová”!—Sal 116:1. w24.01 p. 31 par. 19-20

Jesus laʼós deʼit fó sai katak Maromak nia naran mak Jeová, tanba tuir loloos ema Judeu neʼebé Jesus hanorin hatene ona Maromak nia naran. Maibé Jesus hatudu ezemplu diʼak hodi “esplika kona-ba Aman”. (João 1:​17, 18) Porezemplu, Eskritura Lian Ebraiku hatete katak Jeová mak laran-sadiʼa no laran-diʼak. (Éx 34:​5-7) Jesus halo klaru pontu neʼe bainhira konta ai-knanoik kona-ba oan-mane neʼebé sai husi uma, husik ninia aman, no moris arbiru. Bainhira ita lee ai-knanoik neʼe, ita bele haree oinsá aman neʼe halai hodi hasoru ninia oan-mane neʼebé “sei dook hela”. Aman neʼe hakoʼak ninia oan neʼebé arrepende an, no perdua nia ho laran tomak. Neʼe ajuda ita komprende kona-ba Jeová nia laran-sadiʼa no laran-diʼak. (Lc 15:​11-32) Jesus ajuda ema seluk atu komprende didiʼak kona-ba Jeová nia hahalok sira. w24.02 p. 10 par. 8-9

Jeová fó kmaan ba ema neʼebé hasoru susar. Oinsá mak ita bele banati-tuir Jeová hodi hanoin ema seluk no fó kmaan ba sira? Dalan ida mak hodi haburas hahalok neʼebé bele ajuda ita atu hanoin ema no fó kmaan ba sira. Neʼe inklui hahalok saida deʼit? Saida mak bele ajuda ita atu mantein ita-nia domin no “kontinua fó kmaan ba malu” loroloron? (1 Tes 5:​11, nota) Ita presiza haburas hahalok hanesan hanoin malu, hadomi malu hanesan maun-alin, no laran-diʼak. (Kol 3:12; 1 Ped 3:8) Oinsá mak hahalok sira-neʼe ajuda ita? Bainhira ita hanoin irmaun-irmán sira no hadomi sira, ita hakarak tebes atu fó kmaan ba sira iha situasaun susar. Jesus hatete: “Buat neʼebé sai husi ema nia ibun mai husi laran. Ema neʼebé diʼak koʼalia sai buat diʼak tanba ninia laran nakonu ho buat diʼak.” (Mt 12:​34, 35) Dalan importante ida atu hatudu domin ba irmaun-irmán sira mak hodi fó kmaan ba sira. w23.11 p. 10 par. 10-11

Ita presiza husu ajuda se ita hakarak komprende Bíblia nia profesia. Hanoin toʼok ilustrasaun neʼe. Imajina toʼok Ita viajen hela ba fatin foun ida, no Ita laʼo hamutuk ho belun neʼebé hatene didiʼak fatin neʼe. Nia hatene imi iha neʼebé no atu bá neʼebé. Klaru katak, Ita sei sente kontente tebes tanba bele laʼo hamutuk belun neʼe! Jeová mak hanesan ho belun neʼe, nia hatene didiʼak kona-ba ita-nia futuru. Entaun, atu bele komprende kona-ba Bíblia nia profesia, ita tenke haraik an hodi husu Jeová nia ajuda. (Dan 2:28; 2 Ped 1:​19, 20) Hanesan aman neʼebé diʼak, Jeová hakarak ninia oan sira atu iha futuru neʼebé kapás. (Jer 29:11) Maibé la hanesan ho ema, Jeová bele fó-hatene ita kona-ba futuru ho loloos. Jeová hili ema atu hakerek profesia sira iha Bíblia laran atu ita bele hatene nanis kona-ba akontesimentu importante sira.—Isa 46:10. w23.08 p. 8 par. 3-4