Jullu

Jesus nia hahalok no liafuan hotu, inklui ninia milagre sira haleno ninia Aman nia hanoin no sentimentu. (João 14:9) Saida mak ita bele aprende husi Jesus nia milagre sira? Jesus no ninia Aman hadomi tebes ita. Bainhira Jesus iha rai, nia hatudu domin boot ba ema liuhusi uza ninia kbiit atu halo milagre hodi ajuda ema neʼebé hetan susar. Loron ida, nia kura mane matan-delek naʼin-rua neʼebé husu ninia ajuda. (Mt 20:​30-34) Eskritura dehan katak Jesus “hanoin tebes sira”, no tuirmai nia kura sira. Verbu Gregu neʼebé tradús nuʼudar “hanoin tebes” refere ba laran-sadiʼa neʼebé boot neʼebé ema sente iha laran. Jesus sente hanesan neʼe, no neʼe book nia atu fó han ba ema neʼebé hamlaha no kura ema moras-lepra ida. (Mt 15:32; Mc 1:41) Ita bele fiar katak Jeová neʼebé “laran-sadiʼa” no ninia Oan-Mane hadomi tebes ita no sente laran-triste bainhira ita hasoru susar. (Lc 1:78; 1 Ped 5:7) Sira hakarak atu halakon ema nia susar hotu. w23.04 p. 3 par. 4-5

Ita bele halo buat balu atu ideia oioin iha sistema aat neʼe no hanoin neʼebé sala la fó influénsia ba ita. Ita bele enxe ita-nia neon ho hanoin neʼebé pozitivu liuhusi lee no estuda Bíblia. Tuir reuniaun no haklaken mós sei ajuda proteje ita-nia neon. No Jeová promete katak nia sei la husik ita hetan tentasaun neʼebé liu fali ita-nia kbiit. (1 Kor 10:​12, 13) Agora mak tempu ba ita ida-idak atu halo orasaun beibeik hodi bele laran-metin nafatin ba Jeová durante loron ikus sira-neʼe. Jeová hakarak ita atu ‘fakar sai ita-nia laran’ ba nia liuhusi orasaun. (Sal 62:8) Fó hahiʼi ba Jeová no fó agradese ba nia ba buat hotu neʼebé nia halo. Husu nia atu fó Ita aten-brani atu haklaken. Husu ninia ajuda atu bele tahan hasoru problema no tentasaun oioin. Keta husik buat ida ka ema ruma atu hapara Ita halo orasaun beibeik ba Jeová. w23.05 p. 7 par. 17-18

Tanbasá ita presiza asiste reuniaun sira? Razaun primeiru mak atu fó hahiʼi ba Jeová. (Sal 26:12; 111:1) Ita mós asiste reuniaun sira atu nuneʼe ita bele anima malu durante loron ikus sira-neʼe neʼebé nakonu ho susar. (1 Tes 5:11) Bainhira ita hiʼit liman no fó komentáriu, ita kumpre buat rua neʼe. Maibé iha buat oioin neʼebé bele halo susar ba ita atu fó komentáriu. Ita sente taʼuk atu fó komentáriu ka ita hakarak tebes fó komentáriu, maibé irmaun sira la hili ita kuandu ita hiʼit liman. Saida mak bele ajuda ita? Apóstolu Paulo hatete katak ita presiza tau fokus atu “fó aten-brani ba malu”. Bainhira ita hatene katak ema seluk bele hetan aten-brani husi ita-nia komentáriu maski neʼe mak simples deʼit, neʼe bele motiva ita atu fó komentáriu. No se irmaun sira ladún hili ita atu fó komentáriu, ita nafatin bele sente kontente tanba irmaun-irmán seluk hetan oportunidade atu fó komentáriu.—1 Ped 3:8. w23.04 p. 20 par. 1-3

Liurai fó sai ona avizu ida. Nia hatete katak ema Judeu neʼebé sai dadur iha Babilónia maizumenus ba tinan 70 ona, livre atu fila fali ba rai-Izraél. (Ezras 1:​2-4) Jeová deʼit mak bele halo ida-neʼe akontese. Tanba baibain ema Babilónia la husik livre dadur sira. (Isa 14:​4, 17) Maibé Babilónia foin naksobu, no ukun-naʼin foun ida mak fó-hatene ema Judeu katak sira bele fila. Ema Judeu ida-idak, liuliu família nia ulun, presiza halo desizaun atu sai husi Babilónia ka hela nafatin iha neʼebá. Tuir loloos, susar atu halo desizaun neʼe. Karik ema Judeu barak idade ona no labele halo viajen dook. No tanba sira barak moris iha Babilónia, sira nunka hela iha fatin seluk. Sira sente katak Izraél mak sira-nia beiʼala nia rai, laʼós sira-nian. Ema Judeu balu sai riku iha Babilónia, tan neʼe karik sira sente susar atu husik sira-nia uma neʼebé diʼak ka sira-nia negósiu no hela fali iha rai neʼebé sira ladún hatene. w23.05 p. 14 par. 1-2

Bíblia anima ita atu kontinua haburas hahalok tahan, laran-sadiʼa no domin. Lucas 21:19 hatete: “Hodi tahan nafatin mak imi sei hetan imi-nia moris.” Koloso 3:12 hatete: “Tau hahalok . . . laran-sadiʼa . . . nuʼudar imi-nia roupa.” No Primeiru Tesalónika 4:​9, 10 hatete: “Maromak rasik hanorin ona imi atu hadomi malu. . . . Maibé, ami husu imi, maun-alin sira, atu kontinua halo ida-neʼe liután.” Maromak fó avizu sira-neʼe ba dixípulu sira neʼebé hatudu ona hahalok tahan, laran-sadiʼa no domin. Sira presiza kontinua haburas hahalok sira-neʼe. Ita mós tenke halo nuneʼe. Diʼak atu aprende oinsá ema Kristaun iha apóstolu sira-nia tempu hatudu hahalok sira-neʼe. Tuirmai Ita sei haree oinsá Ita rasik bele banati-tuir sira no hatudu katak Ita prontu ba terus boot. No bainhira terus boot hahú, ita hatene ona oinsá atu tahan no ita sei deside metin atu kontinua tahan ho laran-metin. w23.07 p. 2 par. 4; p. 3 par. 8

Maski ita iha esperansa atu bá lalehan ka ita mak “bibi-malae seluk”, ita presiza kontinua laʼo iha “Dalan Santu”. Neʼe sei ajuda ita atu adora Jeová agora no mós iha futuru bainhira ita hetan bensaun iha Maromak nia Ukun okos. (João 10:16) Hahú husi tinan 1919 EC, mane, feto, no labarik millaun ba millaun husik ona Babilónia Boot, katak relijiaun falsu iha mundu tomak, no komesa laʼo iha dalan simbóliku neʼe. Iha tempu uluk, Jeová hasai tiha buat neʼebé hanetik ema Judeu sira-nia dalan kuandu sira sai husi Babilónia. (Isa 57:14) Oinsá ho “Dalan Santu” iha tempu modernu? Durante tinan atus ba atus antes tinan 1919, Jeová uza mane sira neʼebé hamtaʼuk Maromak atu prepara ka hamoos dalan hodi sai husi Babilónia Boot. (Kompara ho Isaias 40:3.) Sira hakaʼas an halo buat oioin hodi halo fasil ba ema laran-moos sira atu husik relijiaun falsu no tama ba paraízu espirituál, hodi adora Jeová hamutuk ho ninia povu. w23.05 p. 15-16 par. 8-9

Jeová hakarak ita atu serbí nia ho kontente no ho hakarak rasik. (2 Kor 9:7) Entaun ita presiza ka lae hakaʼas an nafatin atu kumpre ita-nia planu espirituál maski ita la iha motivasaun atu halo ida-neʼe? Hanoin toʼok kona-ba apóstolu Paulo nia ezemplu. Nia hatete: “Haʼu kontrola haʼu-nia isin no ukun haʼu-nia an hanesan atan.” (1 Kor 9:​25-27) Paulo dixiplina an atu halo buat neʼebé loos iha tempu neʼebé nia la iha motivasaun atu halo nuneʼe. Jeová kontente ho buat neʼebé Paulo halo ka lae? Kontente duni! No Jeová haraik bensaun ba Paulo nia hakaʼas an. (2 Tim 4:​7, 8) Nuneʼe mós Jeová kontente atu haree ita hakaʼas an kumpre ita-nia planu maski ita la iha motivasaun. Nia kontente tanba nia hatene katak maski ita ladún gosta buat neʼebé ita halo, maibé ita halo ida-neʼe tanba domin ba nia. Jeová mós sei haraik bensaun ba ita-nia hakaʼas an hanesan nia haraik bensaun ba Paulo. (Sal 126:5) Bainhira ita sente katak Jeová haraik bensaun ba ita, neʼe sei motiva liután ita atu kumpre ita-nia planu. w23.05 p. 29 par. 9-10

Apóstolu Paulo kompara ema neʼebé sei la hetan salvasaun iha Jeová nia loron ho ema neʼebé toba-dukur. Sira la hatene saida mak akontese iha sira-nia sorin-sorin ka la hatene tempu. Tan neʼe, sira la nota bainhira buat neʼebé importante akontese no sira la halo buat ida. Ohin loron, ema barak toba iha dalan espirituál. (Rom 11:8) Sira la fiar evidénsia neʼebé hatudu katak ita hela iha “loron ikus sira” no terus boot sei akontese lakleur tan. (2 Ped 3:​3, 4) Maibé, ita rekoñese katak importante atu kontinua hadeer nafatin loron ba loron. (1 Tes 5:6) Tan neʼe, Ita presiza kalma nafatin no la pániku. Tanbasá? Tanba neʼe ajuda ita atu la envolve an ho problema polítiku no sosiál iha mundu neʼe. Ita sei hetan presaun makaʼas liután atu la neutrál nafatin nuʼudar Jeová nia loron sai besik liután. Maski nuneʼe, ita la presiza laran-taridu kona-ba buat neʼebé ita sei halo. Maromak nia espíritu santu bele ajuda ita kalma nafatin no la pániku atu bele halo desizaun neʼebé matenek.—Lc 12:​11, 12. w23.06 p. 10 par. 6-7

Bainhira Ita rona naran Sansão, saida mak mosu iha Ita-nia hanoin? Karik Ita hanoin kona-ba mane neʼebé iha forsa boot. Neʼe loos. Maibé Sansão mós halo desizaun neʼebé sala no lori rezultadu la diʼak ba nia. Maski nuneʼe, Jeová fokus ba buat diʼak hotu neʼebé Sansão halo hodi serbí nia, no temi Sansão nia istória iha Bíblia nuʼudar ezemplu mai ita. Jeová uza Sansão atu kumpre buat barak hodi bele ajuda Ninia povu Izraél. Tinan atus ba atus depois Sansão mate, Jeová dirije apóstolu Paulo atu temi Sansão nia naran iha lista kona-ba mane fiar-naʼin sira. (Ebr 11:​32-34) Sansão nia ezemplu bele anima ita. Nia tau fiar ba Jeová, maski hasoru susar oioin. Ita bele aprende husi Sansão no oinsá ninia ezemplu bele anima ita. w23.09 p. 2 par. 1-2

Ita bele haburas kbiit atu tahan hodi halo orasaun beibeik ba Jeová no fó sai ita-nia laran-taridu. (1 Tes 5:17) Maski agora daudaun ita la hasoru problema neʼebé boot, maibé ita presiza halo orasaun no husu Jeová nia ajuda bainhira ita triste, hanoin barak no la hatene atu halo saida. Se agora ita toman atu husu Jeová nia ajuda kona-ba problema sira neʼebé kiʼik, ita sei toman atu husu ninia ajuda bainhira hasoru problema neʼebé boot iha futuru. Hodi halo nuneʼe, ita sei fiar metin katak Jeová hatene tempu neʼebé loos no mós hatene oinsá atu ajuda ita. (Sal 27:​1, 3) Se agora ita kontinua laran-metin bainhira hasoru susar, ita mós sei laran-metin durante terus boot. (Rom 5:3) Tanbasá? Irmaun-irmán barak hatete katak bainhira sira tahan ona susar ruma, neʼe ajuda sira atu tahan susar neʼebé mosu tuirmai. Tanba sira tahan, neʼe hametin sira-nia fiar katak Jeová hakarak ajuda sira. No fiar neʼe ajuda sira atu tahan susar tuirmai.—Tgo 1:​2-4. w23.07 p. 3 par. 7-8

Jeová hatudu haraik an no laran-sadiʼa, no neʼe book nia atu la ulun-toos. Porezemplu, Jeová hatudu haraik an bainhira nia deside atu halakon ema aat iha Sodoma. Liuhusi ninia anju sira, nia fó matadalan ba Lot neʼebé laran-metin atu halai ba área foho nian. Maibé Lot taʼuk atu halo nuneʼe. Tan neʼe Lot husu atu nia no ninia família halai ba Zoar, neʼe mak sidade kiʼik neʼebé Maromak deside ona atu halakon. Loloos, Jeová bele obriga Lot atu halo tuir ninia matadalan. Duké halo nuneʼe, nia fó lisensa ba Lot atu bá Zoar no nia la halakon sidade neʼe. (Gén 19:​18-22) Tinan barak liutiha, Jeová hatudu laran-sadiʼa ba ema Nínive. Nia haruka profeta Jonas atu fó avizu katak Jeová sei harahun sidade neʼe. Maibé bainhira ema Nínive arrepende an, Jeová hanoin sira no la harahun sidade neʼe.—Jonas 3:​1, 10; 4:​10, 11. w23.07 p. 21 par. 5

Saida mak ita bele aprende husi Jeoas? Nia hanesan ai-hun ho abut neʼebé la tama kleʼan ba rai no presiza ai seluk atu satan netik. Jeoada mak hanesan ai neʼebé satan netik Jeoas. Bainhira Jeoada mate, Jeoas komesa hetan influénsia husi ema neʼebé la adora Jeová. No ikusmai nia monu, katak la laran-metin ba Jeová. Ninia ezemplu hatudu katak ita labele halo tuir Maromak tan deʼit ita-nia família ka ema seluk hatudu ezemplu diʼak mai ita. Atu bele hakbesik nafatin ba Jeová, ita rasik tenke hametin ita-nia domin no hamtaʼuk ba Jeová liuhusi estuda, medita no halo orasaun beibeik. (Jer 17:​7, 8; Kol 2:​6, 7) Jeová la husu buat barak husi ita. Buat neʼebé Jeová haruka ita atu halo mak fó sai iha Eclesiastes 12:13 neʼebé dehan: “Hamtaʼuk Maromak loos no halo tuir ninia mandamentu bá, tanba neʼe mak ema nia obrigasaun.” Bainhira ita hamtaʼuk Maromak, ita sei hamriik metin. La iha buat ida mak bele estraga ita-nia relasaun diʼak ho Jeová. w23.06 p. 19 par. 17-19

Maromak nia garantia hahú ho liafuan: “Ida neʼebé tuur iha kadunan dehan.” (Apok 21:5a) Liafuan sira-neʼe espesiál duni tanba Jeová rasik mak koʼalia, no Jeová koʼalia dala tolu deʼit iha livru Apokalipse. Entaun laʼós anju ida ka Jesus mak fó garantia, maibé Jeová rasik! Neʼe fó prova katak ita bele duni tau fiar ba ninia liafuan tuirmai. Tanbasá? Tanba Jeová “nunka bosok”. (Tito 1:2) Tan neʼe, ita bele fiar katak liafuan iha Apokalipse 21:​5, 6 sei sai loos duni. Kona-ba liafuan: “Haree bá!” Liafuan Gregu neʼebé tradús nuʼudar “haree bá!” temi beibeik iha livru Apokalipse. Tuirmai Maromak koʼalia saida? Nia hatete: “Haʼu halo buat hotu sai foun.” Sin, Jeová koʼalia kona-ba buat neʼebé nia sei halo iha futuru no nia hatene katak nia sei kumpre duni ida-neʼe. Iha lian Gregu orijinál, liafuan “haʼu halo buat hotu sai foun”, neʼe hanesan nia kumpre daudaun promesa sira-neʼe.—Isa 46:10. w23.11 p. 3-4 par. 7-8

Apóstolu Pedro nafatin luta hasoru ninia fraku sira. Hanoin toʼok kona-ba ezemplu balu. Bainhira Jesus esplika kona-ba oinsá Jesus sei hasoru terus no mate hodi kumpre Bíblia nia profesia, Pedro korrije nia. (Mc 8:​31-33) Dala barak Pedro no apóstolu sira diskute malu kona-ba sé mak boot liu entre sira. (Mc 9:​33, 34) Iha kalan antes Jesus mate, Pedro sabir tiha mane ida nia tilun. (João 18:10) Iha kalan neʼebé hanesan, Pedro taʼuk ba ema no nega Jesus ba dala tolu. (Mc 14:​66-72) Tuirmai Pedro tanis makaʼas tanba laran-susar tebes. Jesus la husik hela Pedro neʼebé laran-kraik tebes. Depois Jesus hetan tiha moris-hiʼas, nia fó oportunidade ba Pedro atu hatudu katak Pedro sei hadomi Jesus. Jesus konvida Pedro atu tau matan ba ninia bibi sira ho haraik an. (João 21:​15-17) Pedro prontu atu halo tuir Jesus. Iha loron Pentekostes, Pedro iha Jeruzalein no simu espíritu santu hamutuk ho dixípulu sira seluk. w23.09 p. 22 par. 6-7

Apóstolu Pedro anima katuas sira atu “tau matan ba Maromak nia bibi-lubun”. (1 Ped 5:​1-4) Se Ita mak katuas ida, ami hatene katak Ita hadomi irmaun-irmán sira no hakarak tau matan ba sira. Maibé, dala ruma Ita sente okupadu ka kole atu halaʼo knaar neʼe. Saida mak Ita bele halo? Fakar sai Ita-nia sentimentu ba Jeová. Pedro hakerek: “Se ema ruma serbí ema seluk, nia tenke serbí tuir kbiit neʼebé Maromak fó ona ba nia.” (1 Ped 4:11) Karik irmaun-irmán sira hasoru problema neʼebé labele rezolve iha sistema aat neʼe. Maibé hanoin-hetan katak ita-nia “bibi-atan boot”, Jesus Kristu, bele ajuda irmaun-irmán sira iha dalan neʼebé liu fali buat neʼebé Ita bele halo. Nia bele halo ida-neʼe agora no mós iha mundu foun. Maromak husu katuas sira atu hadomi irmaun-irmán sira, tau matan ba sira, no “sai ezemplu ba bibi-lubun”. w23.09 p. 29-30 par. 13-14

Ita tenke hakaʼas an atu la simu ema nia matenek. Se ita hanoin hanesan ema neʼebé la halo tuir Jeová nia ukun-fuan, karik ita mós sei la preokupa ho Jeová no ninia matadalan. (1 Kor 3:19) Dala barak “matenek mundu neʼe nian” book ema atu la halo tuir Maromak. Ema Kristaun balu iha Pérgamo no Tiatira hetan influénsia husi ema seluk neʼebé halo hahalok la morál no adora estátua. Jesus fó konsellu makaʼas ba kongregasaun rua neʼe tanba sira simu deʼit hahalok sala seksuál. (Apok 2:​14, 20) Ohin loron, ita mós hetan presaun atu simu hanoin neʼebé sala. Ita-nia família no belun sira koko halo ita hanoin katak Bíblia nia matadalan la halo ita livre no ita la presiza halo tuir ida-neʼe. Porezemplu, karik sira dehan katak halo tuir hakarak isin nian mak la sala no katak Bíblia nia matadalan kona-ba morál mak la vale ona. Dala ruma, karik ita hanoin katak matadalan husi Jeová ladún klaru. Karik ita hanoin atu “halo liu fali buat neʼebé hakerek tiha ona”.—1 Kor 4:6. w23.07 p. 16 par. 10-11

Maria, Jesus nia inan, presiza hetan kbiit. Nia seidauk kaben, maski nuneʼe nia sei sai isin-rua. Nia seidauk iha esperiénsia atu haboot oan rasik, maibé nia presiza tau matan ba bebé neʼebé sei sai Mesias. Maria seidauk halo relasaun seksuál ho mane ida, maibé nia presiza fó-hatene José katak nia isin-rua. Ita bele fiar katak susar ba Maria atu esplika ida-neʼe ba José. (Lc 1:​26-33) Oinsá mak Maria simu kbiit? Nia buka ajuda. Porezemplu, nia husu ba anju Gabriel atu esplika liután kona-ba knaar neʼe. (Lc 1:34) Lakleur depois neʼe, nia halo viajen ba “área foho nian iha Judá” atu vizita ninia família Isabel. Isabel gaba Maria, no Jeová dirije Isabel atu fó sai profesia neʼebé anima Maria kona-ba bebé neʼebé sei moris-mai. (Lc 1:​39-45) Maria dehan katak Jeová “halo ona buat boot sira ho ninia liman rasik”. (Lc 1:​46-51) Jeová hametin Maria liuhusi Isabel no anju Gabriel. w23.10 p. 14-15 par. 10-12

Dixípulu balu deʼit mak Jeová hili ho ninia espíritu santu no iha relasaun neʼebé espesiál ho Jeová. Sira mak ema naʼin-144.000 neʼebé serbí nuʼudar amlulik iha lalehan hamutuk ho Jesus. (Apok 14:1) Fatin Santu katak kondisaun husi ema neʼebé Maromak hili ona nuʼudar ninia oan no santu neʼebé sei moris hela iha rai. (Rom 8:​15-17) Fatin Santu Liu Hotu reprezenta lalehan, Jeová nia hela-fatin. “Kortina” neʼebé haketak Fatin Santu no Fatin Santu Liu Hotu reprezenta Jesus nia isin neʼebé hanetik nia atu tama ba lalehan nuʼudar Amlulik Boot iha templu espirituál. Hodi fó ninia moris nuʼudar sakrifísiu ba ema hotu, neʼe loke dalan ba ema Kristaun neʼebé Jeová hili ona atu saʼe ba lalehan. Sira mós tenke mate atu bele simu sira-nia kolen no tama ba lalehan.—Ebr 10:​19, 20; 1 Kor 15:50. w23.10 p. 28 par. 13

Gideão hatán ho laran-maus bainhira ema Efraim kritika nia. (Juís 8:​1-3) Nia la hatán ho hirus, maibé nia hatudu haraik an hodi rona didiʼak no koʼalia ho laran-maus. Neʼe ajuda ema Efraim atu sai kalma. Katuas sira neʼebé matenek banati-tuir Gideão hodi rona didiʼak no hatán ho laran-maus bainhira ema kritika. (Tgo 3:13) Hodi halo nuneʼe, katuas sira bele haburas dame iha kongregasaun. Bainhira ema gaba Gideão tanba manán ema Midian, nia fó glória hotu ba Jeová. (Juís 8:​22, 23) Oinsá katuas sira bele banati-tuir Gideão? Sira bele fó glória ba Jeová kona-ba buat neʼebé sira kumpre. (1 Kor 4:​6, 7) Porezemplu, se katuas ida hetan gaba tanba matenek atu hanorin, nia bele esplika katak hanorin neʼe mai husi Bíblia no ita hotu aprende husi Jeová nia organizasaun. Dala ruma katuas sira presiza hanoin kona-ba dalan neʼebé sira hanorin dada atensaun ba Jeová ka ba sira-nia an. w23.06 p. 4 par. 7-8

Se ita la simu buat neʼebé ita husu iha orasaun, diʼak atu husu ba ita-nia an: ‘Haʼu halo orasaun kona-ba buat neʼebé loos ka lae?’ Dala barak ita hanoin katak ita hatene buat neʼebé diʼak ba ita. Maibé karik buat neʼebé ita husu sei la lori benefísiu ba ita. Dala ruma ita husu Jeová atu rezolve problema tuir ita-nia hakarak, maibé loloos iha dalan seluk neʼebé diʼak liu atu rezolve problema neʼe. No karik buat balu neʼebé ita husu la tuir Jeová nia hakarak. (1 João 5:14) Hanoin toʼok kona-ba inan-aman neʼebé husu Jeová atu sira-nia oan nafatin iha lia-loos. Karik ita hanoin katak la sala atu husu ida-neʼe, maibé loloos Jeová nunka obriga ema atu serbí nia. Nia hakarak ita hotu, inklui ita-nia oan, atu hili adora nia. (Deut 10:​12, 13; 30:​19, 20) Entaun, inan-aman bele husu Jeová nia ajuda atu sira bele book oan sira-nia laran atu hadomi Jeová no sai ninia belun.—Prov 22:6; Éf 6:4. w23.11 p. 21 par. 5; p. 23 par. 12

Tanbasá fó kmaan ba malu mak dalan importante atu hatudu domin? Matenek-naʼin ida kona-ba Bíblia hatete katak liafuan “fó kmaan” neʼebé Paulo temi signifika “hamriik iha ema ida nia sorin no anima nia bainhira nia hasoru susar”. Entaun, bainhira ita fó kmaan ba maluk neʼebé hasoru susar, ita ajuda nia atu kontinua serbí Jeová ho laran-metin. No tempu ida-idak neʼebé ita fó kmaan ba ita-nia maluk, ita hatudu katak ita hadomi nia. (2 Kor 7:​6, 7, 13) Sentimentu hanoin ema seluk no fó kmaan mak liga malu. Iha dalan oinsá? Baibain ema neʼebé hanoin ema seluk hakarak atu fó kmaan ba ema neʼebé hasoru susar no koko halo buat ruma atu ajuda. Bainhira ita hanoin ema seluk, neʼe ajuda ita atu fó kmaan ba sira. Paulo esplika katak tanba Jeová hanoin ema, neʼe book Nia atu fó kmaan ba sira. Paulo hatete katak Jeová mak nuʼudar “Aman neʼebé laran-sadiʼa no Maromak neʼebé fó kmaan ba ema iha situasaun hotu”.—2 Kor 1:3. w23.11 p. 9-10 par. 8-10

Ema Kristaun hotu sei hasoru susar. Haree toʼok apóstolu Paulo nia ezemplu. Nia hatete ba ema Kristaun iha Tesalónika: “Kuandu ami hamutuk ho imi, ami sempre fó sai nanis ba imi katak ita sei hasoru susar, no neʼe mak buat neʼebé akontese duni.” (1 Tes 3:4) No ba ema Kristaun iha Korinto, nia hakerek: “Maun-alin sira, ami hakarak atu imi hatene kona-ba terus neʼebé ami hasoru . . . Ami mós la hatene se ami sei moris ka lae.” (2 Kor 1:8; 11:​23-27) Ema Kristaun ohin loron mós sei hasoru susar. (2 Tim 3:12) Bainhira Ita tau fiar ba Jesus no laʼo tuir nia karik Ita-nia família ka belun sira trata aat Ita. Ita mós bele hasoru susar iha serbisu-fatin tanba onestu. (Ebr 13:18) Ita hasoru ona susar husi governu tanba haklaken ka lae? Maski ita hasoru susar naran deʼit, Paulo hatete katak ita presiza haksolok. w23.12 p. 10-11 par. 9-10

Jacob hasoru problema barak. Jacob nia oan-mane naʼin-rua naran Simeão no Levi hafoʼer sira-nia família nia naran no mós Jeová nia naran. Ninia feen neʼebé nia hadomi naran Raquel mós mate bainhira tuur-ahi sira-nia oan segundu. No tanba rai-hamlaha boot, Jacob tenke muda ba rai-Ejitu kuandu idade loos ona. (Gén 35:​16-19; 37:28; 45:​9-11, 28) Maski Jacob hasoru problema barak, maibé nia nunka lakon fiar ba Jeová no Jeová nia promesa sira. No Jeová hatudu katak nia simu Jacob. Porezemplu, Jeová haraik bensaun ba Jacob hodi fó rikusoin barak ba nia. No Jacob agradese tebes ba Jeová bainhira hasoru fali José neʼebé nia hanoin katak mate ona. Jacob iha relasaun besik ho Jeová no neʼe ajuda nia tahan hasoru problema sira ho susesu. (Gén 30:43; 32:​9, 10; 46:​28-30) Bainhira ita kontinua iha relasaun diʼak ho Jeová, ita mós bele tahan hasoru problema sira neʼebé mosu derrepente. w23.04 p. 15 par. 6-7

Iha Salmo 23, David fó sai kona-ba ninia konfiansa ba Jeová nia domin. Nia esplika kona-ba ninia relasaun besik ho Jeová neʼebé nia bolu nuʼudar ninia Bibi-Atan. David sente seguru tanba Jeová dirije nia, no nia sadere tomak ba Jeová. David hatene katak Jeová sei hatudu domin ba nia iha ninia moris tomak. Saida mak halo nia fiar hanesan neʼe? David sente katak Jeová hadomi nia tanba sempre fó buat neʼebé nia presiza. David mós hatene katak Jeová mak ninia belun no Jeová simu nia. Tan neʼe nia fiar metin katak maski hasoru situasaun naran deʼit, Jeová sei kontinua tau matan ba ninia presiza. David fiar katak Jeová sei tau matan no apoia nia, no neʼe ajuda nia atu la hanoin barak no sente kontente ho buat neʼebé nia iha.—Sal 16:11. w24.01 p. 28-29 par. 12-13

Hahú husi Funu Mundiál Segundu, Jeová nia povu haklaken ho livre iha fatin oioin. Loloos, ema barak liután mak hatene kona-ba Jeová. Ohin loron Grupu Administradór kontinua buka matadalan husi Kristu. Sira hakarak atu matadalan neʼebé sira fó ba irmaun-irmán sira mak haleno Jeová no Kristu nia hanoin. Tuirmai, katuas área no katuas kongregasaun fó matadalan ba kongregasaun. Katuas kongregasaun mak iha Kristu nia “liman-loos”. (Apok 2:1) Klaru katak katuas sira-neʼe la perfeitu no halo sala. Dala ruma Moisés no Josué mós halo sala, hanesan buat neʼebé apóstolu sira halo. (Núm 20:12; Jos 9:​14, 15; Rom 3:23) Maski nuneʼe, Kristu nafatin dirije atan laran-metin no matenek no katuas sira, no nia sei kontinua halo nuneʼe. Tan neʼe, ita iha razaun barak atu tau fiar ba matadalan neʼebé mai husi sira neʼebé dirije ita. w24.02 p. 23-24 par. 13-14

Ohin loron, ita bele halo Jeová kontente hodi koʼalia kona-ba nia ho domin no agradese. Bainhira ita haklaken, ita-nia objetivu prinsipál mak atu ajuda ema seluk hakbesik no hadomi ita-nia Aman Jeová hanesan ita hadomi nia. (Tgo 4:8) Ita kontente atu uza Bíblia hodi hanorin ema seluk kona-ba Jeová nia domin, justisa, matenek, kbiit, no ninia hahalok furak seluk tan. Ita mós hahiʼi Jeová no halo nia kontente hodi hakaʼas an banati-tuir nia. Kuandu ita halo nuneʼe, karik ema sei nota katak ita la hanesan duni ho ema seluk no halo sira hakarak atu buka-hatene tanbasá. (Mt 5:​14-16) Bainhira iha oportunidade, karik ita bele esplika tanbasá ita-nia hahalok la hanesan ho ema seluk. Rezultadu mak ema neʼebé laran-loos sei hakarak hakbesik ba Maromak. Bainhira ita hahiʼi Jeová iha dalan hanesan neʼe, ita halo nia kontente.—1 Tim 2:​3, 4. w24.02 p. 10 par. 7

Atu sai irmaun neʼebé maduru, Ita presiza haburas abilidade sira neʼebé bele ajuda Ita. Neʼe sei ajuda Ita atu simu knaar iha kongregasaun, hetan serbisu atu tau matan Ita-nia an ka família, no iha relasaun diʼak ho ema seluk. Porezemplu, aprende lee no hakerek ho didiʼak. Bíblia hatete katak mane neʼebé kontente no susesu uza tempu loroloron atu lee no medita kona-ba Maromak nia Liafuan. (Sal 1:​1-3) Hodi lee Bíblia loroloron, nia sei hatene didiʼak Jeová nia hanoin, no neʼe sei ajuda nia atu hanoin didiʼak no aplika Eskritura sira. (Prov 1:​3, 4) Kongregasaun presiza mane neʼebé bele hanorin no fó matadalan husi Bíblia. Se Ita bele lee no hakerek ho didiʼak, neʼe sei ajuda Ita prepara diskursu no komentáriu neʼebé bele lori benefísiu ba ema seluk no hametin sira-nia fiar. Neʼe mós sei ajuda Ita atu hakerek nota neʼebé sei ajuda Ita atu hametin Ita-nia fiar no hametin ema seluk. w23.12 p. 26-27 par. 9-11

Bainhira Ita sente taʼuk, medita kona-ba saida mak Jeová sei halo iha futuru kuandu Satanás la iha ona. Drama iha reuniaun boot tinan 2014 hatudu aman ida koʼalia ho ninia família kona-ba oinsá eskritura iha 2 Timóteo 3:​1-5 se koʼalia kona-ba moris iha Paraízu: “Iha mundu foun ema sei kontente tebes. Hadomi ema seluk, hadomi lia-loos, haraik an, fó hahiʼi ba Maromak, halo tuir inan-aman, hatene fó agradese, hatudu laran-metin, hadomi malu, rona malu, sempre koʼalia diʼak kona-ba ema seluk, kontrola an, laran-maus, hadomi buat neʼebé diʼak, ema bele tau fiar, la ulun-toos, la foti an, hadomi Maromak duké hadomi ksolok, hamtaʼuk Maromak ho laran-moos. Hakbesik ba ema sira hanesan neʼe.” Ita toman atu koʼalia hamutuk ho Ita-nia família ka irmaun-irmán sira kona-ba moris iha mundu foun ka lae? w24.01 p. 6 par. 13-14

Ita hetan kmaan hodi hatene katak Jeová kontente ho ninia povu nuʼudar grupu ida! Bíblia hatete katak: “Jeová kontente ho ninia povu.” (Sal 149:4) Maibé, dala ruma ita balu sai laran-kraik no hanoin: ‘Jeová kontente ho haʼu ka lae?’ Jeová nia atan barak neʼebé temi iha Bíblia dala ruma mós sente hanesan neʼe. (1 Sam 1:​6-10; Job 29:​2, 4; Sal 51:11) Bíblia hatete ho klaru katak ema la perfeitu mós bele halo Jeová kontente. Oinsá? Neʼe mak hodi hatudu fiar ba Jesus Kristu no hetan batizmu. (João 3:16) Hodi halo nuneʼe, ita hatudu ba ema seluk katak ita arrepende ita-nia sala no promete ona ba Maromak atu halo tuir ninia hakarak. (Após 2:38; 3:19) Jeová kontente tebes bainhira ita halo buat sira-neʼe atu bele sai ninia belun. Jeová kontente ho ita no haree ita nuʼudar ninia belun, naran katak ita kaer metin ba ita-nia dedikasaun.—Sal 25:14. w24.03 p. 26 par. 1-2

Ita bele banati-tuir dixípulu sira hodi kontinua haklaken maski governu haruka ita atu para. Ita bele fiar katak Jeová sei ajuda ita atu kumpre ita-nia serbisu haklaken. Tan neʼe, halo orasaun atu husu aten-brani no matenek no mós husu Jeová nia ajuda atu bele tahan hasoru problema. Ita barak hasoru terus tanba moras, problema ho emosaun, ema neʼebé ita hadomi mate, problema família nian, ema fó-terus ita, ka problema seluk tan. Pandemia no funu mós halo susar liután ba ita atu tahan buat sira-neʼe. Fakar sai Ita-nia laran ba Jeová. Fó sai Ita-nia situasaun susar ba nia hanesan Ita hatete ba belun diʼak ida. Fiar bá katak Jeová ‘sei ajuda ita’. (Sal 37:​3, 5) Se ita kontinua halo orasaun, neʼe sei ajuda ita atu “tahan terus”. (Rom 12:12) Jeová hatene saida mak ninia atan sira hasoru daudaun no “nia rona sira-nia halerik atu husu ajuda”.—Sal 145:​18, 19. w23.05 p. 5-6 par. 12-15

Bainhira atu halo desizaun importante ruma, ita presiza ‘buka-hatene saida mak Jeová hakarak ita atu halo’ no tuirmai halo tuir ida-neʼe. (Éf 5:​10, 17) Ita bele buka-hatene Maromak nia hanoin kona-ba situasaun ruma hodi buka Bíblia nia prinsípiu neʼebé kona ita-nia situasaun. Tuirmai kuandu ita aplika prinsípiu sira-neʼe, ita sei halo desizaun neʼebé matenek. “Aat-naʼin”, katak ita-nia inimigu Satanás hakarak halo ita okupadu toʼo ita la iha tempu atu serbí Maromak. (1 João 5:19) Se la kuidadu, ita bele deʼit tau fokus ba osan, edukasaun, ka serbisu, duké serbí Jeová. Se neʼe akontese, neʼe hatudu katak mundu komesa fó influénsia ba ita. Klaru katak buat sira-neʼe la sala, maibé ita labele tau uluk buat sira-neʼe iha ita-nia moris. w24.03 p. 24 par. 16-17