Juñu

Jeová haraik bensaun ba ema Kristaun iha apóstolu sira-nia tempu tanba sira halo mudansa tuir sira-nia situasaun. Dala barak ema fó-terus ba sira, no dala ruma neʼe akontese iha tempu neʼebé sira nunka espera. Hanoin toʼok buat neʼebé akontese ba Barnabé no apóstolu Paulo bainhira sira haklaken iha Listra. Foufoun ema simu no rona ba sira. Maibé depois neʼe, kontradór sira “soran ema-lubun” no ema balu neʼebé uluk rona, tuda Paulo no husik nia atu mate deʼit. (Após 14:19) Maibé Barnabé no Paulo kontinua haklaken iha fatin seluk. Neʼe lori rezultadu saida? Sira ‘ajuda ema barak atu sai dixípulu’ no sira-nia liafuan no hahalok hametin maluk fiar-naʼin sira. (Após 14:​21, 22) Ema barak hetan benefísiu tanba Barnabé no Paulo la para atu haklaken maski ema fó-terus ba sira. Se ita la rende an atu halo Jeová nia serbisu, nia sei haraik bensaun ba ita. w23.04 p. 16 par. 13-14

David hasoru susar barak husi ninia inimigu sira, no nia buka beibeik Jeová nia ajuda liuhusi orasaun. Liurai David fiar katak Jeová rona no hatán ninia orasaun. Ita mós bele fiar hanesan neʼe. Bíblia ajuda ita fiar katak Jeová fó ita matenek no kbiit atu tahan. Karik Jeová uza irmaun-irmán sira ka ema neʼebé la adora nia atu ajuda ita. Maski dala ruma Jeová hatán ita-nia orasaun iha dalan neʼebé ita la espera, maibé ita hatene katak nia sei hatán duni ita-nia orasaun. Nia sei fó buat neʼebé ita presiza iha tempu neʼebé loos. Tan neʼe mai ita kontinua halo orasaun, no fiar metin katak Jeová sei tau matan ita agora no sei “halo kontente kriatura hotu neʼebé moris hodi fó buat neʼebé sira hakarak” iha mundu foun neʼebé sei mai.—Sal 145:16. w23.05 p. 8 par. 4; p. 13 par. 17-18

Diʼak atu tau fokus ba bensaun neʼebé Ita hetan tanba kumpre Ita-nia planu. Entaun Ita bele tau fokus ba bensaun saida? Se Ita-nia planu mak atu lee Bíblia ka halo orasaun, hanoin kona-ba oinsá ida-neʼe bele hametin Ita-nia relasaun diʼak ho Jeová. (Sal 145:​18, 19) Se Ita-nia planu mak atu haburas hahalok Kristaun, tau fokus ba oinsá ida-neʼe bele ajuda hametin Ita-nia relasaun diʼak ho ema seluk. (Kol 3:14) Diʼak atu halo lista kona-ba benefísiu hotu neʼebé Ita sei hetan se Ita kumpre Ita-nia planu. Haree beibeik Ita-nia lista. No mós, ransu ho sira neʼebé motiva Ita atu kumpre Ita-nia planu. (Prov 13:20) Maibé klaru katak dala ruma ita la iha motivasaun atu halo buat ruma. Neʼe katak ita labele kumpre ita-nia planu ka lae? Lae. Ita mós bele kontinua hakaʼas an atu kumpre ita-nia planu maski ita la iha motivasaun. Klaru katak ita presiza dixiplina an, maibé benefísiu neʼebé ita hetan mak barak liu fali sakrifísiu neʼebé ita halo. w23.05 p. 27-28 par. 5-8

Hodi hatene katak ita tenke simu rezultadu husi ita-nia desizaun sira, neʼe bele book ita atu fó sai ita-nia sala, troka ita-nia hahalok, no hakaʼas an atu la halo sala neʼebé hanesan. Hodi halo nuneʼe bele ajuda ita kontinua halai toʼo rohan. Se Ita halo ona desizaun neʼebé sala, saida mak Ita bele halo? Keta gasta Ita-nia tempu no enerjia atu koko defende an ka koko atu duun ema seluk. Duké halo nuneʼe, rekoñese Ita-nia sala no hakaʼas an atu halo buat neʼebé Ita bele halo agora daudaun. Se Ita fó-sala ba Ita-nia an kona-ba buat neʼebé Ita halo, hakbesik ba Jeová liuhusi orasaun, fó sai kona-ba Ita-nia sala, no husu perdua. (Sal 25:11; 51:​3, 4) Husu deskulpa ba ema neʼebé Ita hakanek, no buka ajuda husi katuas sira, se presiza. (Tgo 5:​14, 15) Aprende husi Ita-nia sala, no koko atu la halo tan sala neʼebé hanesan. Bainhira Ita halo nuneʼe, Ita bele fiar metin katak Jeová sei hatudu laran-sadiʼa no apoia Ita.—Sal 103:​8-13. w23.08 p. 28-29 par. 8-9

Jeoada ajuda Liurai Jeoas atu sai ema neʼebé diʼak. Entaun bainhira Jeoas sei joven, nia hakarak halo Jeová kontente. Maibé bainhira Jeoada mate, Jeoas rona ba ulun-naʼin sira neʼebé la halo tuir Jeová. (2 Krón 24:​4, 17, 18) Jeová sente laran-triste no nia “kontinua haruka profeta sira atu ajuda sira fila fali ba nia . . . , maibé sira lakohi rona”. Sira mós lakohi rona ba Jeoada nia oan-mane naran Zacarias neʼebé serbí nuʼudar Jeová nia profeta no amlulik. Tuir loloos, Liurai Jeoas haruka ema atu oho ninia primu Zacarias. (2 Krón 22:11; 24:​19-22) Jeoas la kontinua hamtaʼuk ba Jeová. Jeová hatete ona: “Sira neʼebé hakribi haʼu, haʼu mós sei hakribi sira.” (1 Sam 2:30) Tropa Síria neʼebé uitoan deʼit manán Jeoas nia tropa “neʼebé barak tebes” no Jeoas “hetan kanek todan”. (2 Krón 24:​24, 25) Jeoas nia atan rasik oho nia tanba uluk nia oho Zacarias. w23.06 p. 18-19 par. 16-17

Apóstolu Paulo hela ba tempu balu iha Éfeso atu haklaken no hanorin kona-ba liafuan diʼak. (Após 19:​1, 8-10; 20:​20, 21) Nia hadomi tebes maluk fiar-naʼin sira no hakarak ajuda sira atu laran-metin ba Jeová. Ema Kristaun iha Éfeso, uluk fiar ba hanorin falsu no masonik. Ema barak iha Éfeso halo hahalok neʼebé la morál no hahalok aat toʼo la sente moe. Porezemplu, iha teatru no mós iha relijiaun nia serimónia sira, baibain sira koʼalia kona-ba buat neʼebé la morál. (Éf 5:3) Ema Éfeso barak “la hatene morál neʼebé loos”, no fraze neʼe iha lian orijinál signifika “la sente tan moras” iha laran bainhira sira halo sala ruma. (Éf 4:​17-19) Antes aprende Jeová nia matadalan kona-ba buat neʼebé loos no sala, sira-nia konxiénsia la fó-sala ba sira. Tan neʼe Paulo hatete katak “sira-nia neon iha nakukun laran, [no] sira dook husi moris neʼebé mai husi Maromak”. Ema Éfeso balu sai husi nakukun laran. w24.03 p. 20 par. 2; p. 21 par. 4-6

Gideão tenke uza ninia forsa tomak atu halaʼo knaar nuʼudar juís. Porezemplu, iha kalan bainhira tropa Midian halai, Gideão duni tuir sira husi Foho-Leet Jezreel toʼo Mota Jordaun. (Juís 7:22) Gideão para iha Mota Jordaun ka lae? Lae! Maski kole, nia no ninia tropa naʼin-300 hakur mota no kontinua duni tuir tropa Midian. Ikusmai sira kaer toman tropa Midian no manán tropa sira-neʼe. (Juís 8:​4-12) Gideão fiar katak Jeová sei fó kbiit ba nia, no Jeová halo duni nuneʼe. (Juís 6:​14, 34) Gideão no ninia tropa sira halai hodi duni tuir liurai Midian naʼin-rua neʼebé karik saʼe kuda-kamelu. (Juís 8:​12, 21) Maibé, Maromak ajuda ema Izraél atu kaer liurai sira-neʼe no manán funu. Katuas sira mós bele sadere ba Jeová tanba nia “nunka sai kole ka fraku”. Nia sei fó sira kbiit bainhira sira presiza.—Isa 40:​28, 29. w23.06 p. 6 par. 14; p. 7 par. 16

Ita bele hametin ita-nia laran maski hasoru susar oioin.Tan neʼe tau fiar ba Jeová. Hanoin kona-ba oinsá Barac hetan susesu tanba tau fiar ba Jeová nia matadalan. Iha tempu neʼebá, ema Izraél la prontu atu halo funu no sira la iha armas. Maski nuneʼe, Jeová haruka Barac atu halo funu hasoru xefe ba tropa Kanaan naran Sísera neʼebé iha armas barak. (Juís 5:8) Profeta Débora hatete ba Barac atu tun ba rai-tetuk hodi halo funu hasoru Sísera neʼebé iha kuda-karreta 900. Tuir loloos, susar ba ema Izraél atu manán tropa Kanaan iha rai-tetuk, maibé Barac halo tuir matadalan. Bainhira soldadu sira tun husi Foho Tabor, Jeová halo udan-boot tun. Sísera nia kuda-karreta sira mout iha tahu laran, no Jeová ajuda Barac manán funu. (Juís 4:​1-7, 10, 13-16) Jeová mós sei ajuda ita manán se ita tau fiar ba nia no halo tuir matadalan husi irmaun sira neʼebé dirije ita. w23.07 p. 19 par. 17-18

Ita presiza pasiénsia atu bele hetan moris ba nafatin. Hanesan fiar-naʼin sira iha tempu uluk, ita presiza hein ho pasiénsia ba Maromak atu kumpre ninia promesa sira. (Ebr 6:​11, 12) Bíblia kompara ita-nia situasaun ho toʼos-naʼin ida nia serbisu. (Tgo 5:​7, 8) Toʼos-naʼin serbisu makaʼas atu kuda fini no tau matan ninia toʼos, maibé nia la hatene ho loloos bainhira mak fini sei moris. Maski nuneʼe, toʼos-naʼin hein ho pasiénsia, no fiar katak toʼos neʼe sei fó rezultadu. Nuneʼe mós, ita hakaʼas an atu laʼo tuir Jesus maski ita “la hatene loron neʼebé [ita-nia] Naʼi sei mai”. (Mt 24:42) Ita hein ho pasiénsia no fiar metin katak Jeová sei kumpre buat neʼebé nia promete ona iha tempu neʼebé loos. Se ita komesa atu lakon pasiénsia, karik ita sei kole atu hein no neineik-neineik ita sai dook husi Jeová. Karik ita mós sei komesa fokus ba buat oioin neʼebé bele halo ita kontente agora daudaun. Maibé se ita pasiénsia, ita bele tahan toʼo rohan no hetan salvasaun.—Miq 7:7. w23.08 p. 22 par. 7

Hodi kompara profesia iha Daniel 2:​41-43 ho profesia seluk husi livru Daniel no Apokalipse, ita bele hatene katak ain parte kraik neʼe reprezenta Bretaña ho Amérika nia ukun neʼebé kbiit boot liu ohin loron. Kona-ba ukun neʼe, Daniel hatete: “Ukun neʼe sei forte iha parte balu no fraku iha parte seluk.” Tanbasá fraku iha parte seluk? Tanba ema baibain neʼebé reprezenta rai-mean neʼebé mamar mak hanetik ukun neʼe atu foti desizaun neʼebé metin. Ita aprende lia-loos importante oioin husi buat neʼebé Daniel fó sai kona-ba estátua neʼebé liurai haree. Primeiru, Bretaña ho Amérika nia ukun hatudu duni katak neʼe mak ukun neʼebé iha kbiit boot. Porezemplu, ukun neʼe hola parte importante atu manán Funu Mundiál Primeiru no Segundu. Maibé, sira mós fraku no kontinua sai fraku tanba sira-nia sidadaun kontra malu no kontra hasoru governu. Segundu, Bretaña ho Amérika mak sai nuʼudar ukun boot ikus antes Maromak nia Ukun halakon ema nia governu hotu. w23.08 p. 10-11 par. 12-13

Dala ruma David sente laran-susar tanba problema no susar neʼebé nia hasoru. (Sal 18:​4, 5) Maski nuneʼe, tanba Jeová hadomi no tau matan ba nia, neʼe halo nia sente kmaan. Jeová lori ninia belun neʼebé kole ba “duʼut matak” no “fatin neʼebé iha bee barak atu deskansa”. Rezultadu mak David hetan fali kbiit no bele kontinua serbí Jeová ho kontente. (Sal 18:​28-32; 23:2) Hanesan neʼe mós ohin loron, “tanba Jeová nia domin neʼebé laran-metin mak ita la lakon mohu” bainhira hasoru susar no problema. (Lam 3:22; Kol 1:11) Dala barak David nia moris iha perigu laran, no ninia inimigu barak iha forsa boot. Maski nuneʼe tanba Jeová hadomi nia, nia sente seguru. David bele sente katak Jeová hamutuk ho nia iha situasaun hotu, no neʼe fó kmaan ba nia. Tan neʼe nia kanta: “[Jeová] salva ona haʼu husi buat hotu neʼebé halo haʼu taʼuk.” (Sal 34:4) Maski David sente taʼuk, maibé Jeová nia domin boot liu fali ninia sentimentu taʼuk. w24.01 p. 30 par. 15-17

Aprende husi Jeoas nia desizaun neʼebé sala. Bainhira Amlulik Boot Jeoada mate, Jeoas hili ransu neʼebé la diʼak. (2 Krón 24:​17, 18) Nia deside atu rona ba ulun-naʼin sira husi Judá neʼebé la hadomi Jeová. Diʼak liu se Jeoas la ransu ho ema sira neʼebé hatudu hahalok la diʼak. Maibé nia kontinua ransu ho sira. Bainhira Jeoas nia primu Zacarias koko atu korrije nia, Jeoas oho ninia primu neʼe. (2 Krón 24:​20, 21; Mt 23:35) Neʼe mak hahalok neʼebé aat tebes! Foufoun, Jeoas mak liurai neʼebé laran-metin, maibé tuirmai nia kontra Jeová no sai ohodór. Ikusmai, ninia atan rasik mak oho nia. (2 Krón 24:​22-25) Se nia kontinua rona ba Jeová no sira neʼebé hadomi Jeová, ninia situasaun sei la sai hanesan neʼe! w23.09 p. 9 par. 6

Jesus hatene katak apóstolu Pedro bele kontinua laran-metin. Tan neʼe Jesus ho laran-diʼak hatete ba Pedro: “Keta taʼuk.” Tanba Jesus tau fiar ba Pedro, neʼe troka Pedro nia moris. Pedro no ninia alin André husik hela sira-nia serbisu nuʼudar peskadór no kontinua laʼo tuir Mesias. Desizaun neʼe lori bensaun furak ba sira. (Mc 1:​16-18) Pedro hetan esperiénsia furak barak bainhira nia laʼo tuir Kristu. Nia haree Jesus kura ema moras, duni sai anju aat, no fó moris-hiʼas ba ema mate. (Mt 8:​14-17; Mc 5:​37, 41, 42) Pedro mós haree vizaun kona-ba Jesus iha futuru nuʼudar Liurai ba Maromak nia Ukun, no nia nunka haluha akontesimentu neʼe. (Mc 9:​1-8; 2 Ped 1:​16-18) Pedro sei la haree akontesimentu sira-neʼe se nia la laʼo tuir Jesus. Ita bele fiar katak Pedro sente kontente tanba la husik ninia hanoin neʼebé negativu hanetik nia atu simu bensaun furak sira-neʼe! w23.09 p. 21 par. 4-5

Iha ninia karta primeiru, apóstolu Pedro uza liafuan “hadomi malu tebetebes”. Domin hanesan neʼe ajuda ita laʼós deʼit atu perdua sala balu, maibé “sala barak”. (1 Ped 4:8) Karik Pedro hanoin-hetan lisaun neʼebé Jesus hanorin ba nia tinan barak liubá kona-ba fó perdua. Karik iha tempu neʼebá, Pedro hanoin katak nia hatudu laran-diʼak bainhira nia fó sujestaun atu perdua ninia maun-alin “toʼo dala hitu”. Maibé Jesus hanorin nia no mós ita katak ita presiza fó perdua “toʼo dala 77”, neʼe signifika la iha limite. (Mt 18:21) Keta sai laran-kraik se Ita sente susar atu aplika konsellu neʼe! Jeová nia povu hotu dala ruma mós sente susar atu fó perdua. Buat neʼebé importante agora mak Ita presiza hakaʼas an atu fó perdua ba irmaun-irmán sira no halo dame ho sira. w23.09 p. 29 par. 12

Iha ikan nia kabun, Jonas arrepende an no fiar metin katak Jeová sei rona ba ninia orasaun no nia bele fiar metin katak Jeová sei ajuda nia. Ikusmai, ikan muta sai Jonas ba rai maran, no ikusmai nia prontu atu simu knaar no kumpre knaar neʼe. (Jonas 2:10–3:4) Durante tempu susar, Ita sente laran-kraik toʼo susar atu halo orasaun ka lae? Dala ruma Ita sente la iha kbiit atu estuda ka lae? Hanoin-hetan, Jeová komprende didiʼak Ita-nia situasaun. Tan neʼe, maski Ita halo orasaun neʼebé simples, Ita bele fiar katak nia sei fó Ita buat neʼebé Ita presiza. (Éf 3:20) Se Ita sente susar atu lee no estuda Bíblia tanba moras, kole, ka sente laran-susar, Ita bele rona ba gravasaun áudio husi Bíblia ka ita-nia publikasaun sira. Ita mós bele rona ba knananuk sira ka nonton vídeo iha jw.org. Hodi halo orasaun ba Jeová no buka resposta ba Ita-nia orasaun iha Bíblia no publikasaun sira, Jeová sei ajuda Ita atu iha fali kbiit. w23.10 p. 13 par. 6; p. 14 par. 9

Tenda santu no templu nia laran mak haree atu hanesan deʼit. Iha laran, iha “Fatin Santu” no “Fatin Santu Liu Hotu” neʼebé kortina mak haketak fatin rua neʼe. (Ebr 9:​2-5; Éx 26:​31-33) Iha Fatin Santu nia laran, iha ahi-oan fatin neʼebé halo husi osan-mean, altár neʼebé uza atu sunu insensu, no meza ba paun santu. Só amlulik neʼebé Jeová hili mak bele tama ba Fatin Santu atu halaʼo sira-nia knaar neʼebé sagradu. (Núm 3:​3, 7, 10) Iha Fatin Santu Liu Hotu, iha arka neʼebé halo husi osan-mean neʼebé reprezenta Jeová nia prezensa. (Éx 25:​21, 22) Só amlulik boot deʼit mak bele tama ba laran tinan ida dala ida iha Loron Hamoos Sala nian. (Lev 16:​2, 17) Nia lori animál nia raan tama ba Fatin Santu Liu Hotu atu hamoos ninia sala no nasaun tomak nia sala. Ikusmai, Jeová halo klaru signifikadu husi buat sira neʼebé iha tenda santu nia laran.—Ebr 9:​6, 7. w23.10 p. 27 par. 12

Maromak nia Liafuan temi beibeik mandamentu atu “hadomi malu”. (João 15:12; Rom 13:8; 1 Tes 4:9; 1 Ped 1:22; 1 João 4:11) Maski nuneʼe, domin mak sentimentu iha ita-nia laran neʼebé ema seluk labele haree. Entaun, oinsá mak ita bele hatudu katak ita hadomi irmaun-irmán sira? Liuhusi ita-nia liafuan no hahalok. Iha dalan oioin atu hatudu katak ita hadomi irmaun-irmán sira. Tuirmai mak ezemplu balu: “Koʼalia loloos ba malu.” (Zac 8:16) “Kontinua iha dame iha imi-nia leet.” (Mc 9:50) “Buka uluk atu hatudu respeitu ba malu.” (Rom 12:10) “Simu malu bá.” (Rom 15:7) “Kontinua . . . fó perdua ba malu.” (Kol 3:13) “Kontinua ajuda malu iha susar laran.” (Gal 6:2) “Kontinua fó kmaan ba malu no hametin malu.” (1 Tes 5:​11, nota) “Halo orasaun ba malu.”—Tgo 5:16. w23.11 p. 9 par. 7-8

Loroloron ita halo desizaun oioin no ita presiza fiar metin atu halo desizaun neʼe. Porezemplu, ita presiza halo desizaun kona-ba ita-nia ransu, atividade halimar nian, edukasaun, kaben, oan, no mós serbisu. Diʼak atu husu ba ita-nia an: ‘Haʼu-nia desizaun sira hatudu katak haʼu fiar metin sistema aat neʼe mak temporáriu no lakleur sei troka ho Maromak nia mundu foun ka lae? Ka haʼu-nia desizaun sira hetan influénsia husi ema neʼebé fiar katak moris mak dala ida deʼit?’ (Mt 6:​19, 20; Lc 12:​16-21) Se ita hametin ita-nia fiar katak mundu foun besik ona, ita sei halo desizaun neʼebé diʼak. Ita mós hasoru susar sira no atu bele tahan ida-neʼe, ita presiza fiar neʼebé metin. Karik ema fó-terus ba ita, ita iha problema saúde neʼebé sériu ka problema seluk tan neʼebé halo ita sente laran-kraik. Karik foufoun, ita sente katak ita bele tahan susar sira-neʼe. Maibé se susar sira-neʼe kontinua ba tempu kleur, ita presiza iha fiar neʼebé metin atu bele tahan no kontinua serbí Jeová ho ksolok.—1 Ped 1:​6, 7. w23.04 p. 27 par. 4-5

Jeová hakarak ita atu halo tuir ita-nia orasaun. Porezemplu, irmaun ida husu Jeová ajuda nia atu husu lisensa hodi tuir reuniaun boot. Oinsá Jeová hatán ninia orasaun? Karik Jeová hatán hodi fó irmaun neʼe aten-brani atu bele hakbesik ba patraun. Maibé nia presiza hasoru patraun no husu lisensa. Karik nia presiza husu beibeik. No karik nia presiza prontu atu troka oráriu ho serbisu-naʼin seluk ka prontu atu patraun koʼa ninia saláriu hodi bele tuir reuniaun boot. Jeová hakarak ita atu halo orasaun beibeik kona-ba buat neʼebé importante ba ita. Husi Jesus nia liafuan ita bele hatene katak dala ruma Jeová la hatán kedas ita-nia orasaun. (Lc 11:9) Tan neʼe keta rende an! Halo orasaun ho laran no beibeik. (Lc 18:​1-7) Bainhira ita halo nuneʼe, ita hatudu ba Jeová katak buat neʼebé ita husu mak importante ba ita. Ita mós hatudu katak ita fiar nia iha kbiit atu ajuda ita. w23.11 p. 22 par. 10-11

Jeová promete ba ninia belun Abraão katak nasaun hotu iha mundu sei hetan bensaun liuhusi ninia bei-oan. (Gén 15:5; 22:18) Tanba Abraão fiar metin ba Maromak, neʼe halo nia fiar katak Maromak nia promesa neʼe sei sai loos. Maski nuneʼe, bainhira Abraão tinan 100 ona no ninia feen tinan 90, sira nafatin seidauk iha oan. (Gén 21:​1-7) Bíblia hatete: “Tanba esperansa neʼe, [Abraão] fiar katak nia bele sai aman ba nasaun barak. . . . Nia fiar buat neʼebé dehan sai ona.” (Rom 4:18) Ita hatene katak ikusmai Abraão nia esperansa sai loos. Nia sai aman ba Isaac, oan neʼebé nia hein ba tempu kleur ona. Tanbasá Abraão fiar metin katak Jeová sei kumpre ninia promesa? Tanba Abraão iha relasaun besik ho Jeová, nia “fiar metin duni katak Maromak bele kumpre buat neʼebé nia promete ona”. (Rom 4:21) Jeová kontente ho Abraão no dehan katak nia mak ema laran-loos tanba ninia fiar.—Tgo 2:23. w23.12 p. 8 par. 1-2

Bainhira irmaun joven ida halaʼo ninia knaar ho didiʼak ema bele tau fiar ba nia. Hanoin kona-ba Jesus nia ezemplu neʼebé perfeitu. Nia hafolin ninia knaar sira no sempre halo ida-neʼe ho laran tomak. Nia halo buat hotu neʼebé Jeová husu maski dala ruma susar. Nia hadomi ema, liuliu ninia dixípulu sira no nia prontu atu fó ninia moris ba sira. (João 13:1) Banati-tuir Jesus hodi hakaʼas an atu kumpre knaar naran deʼit neʼebé Ita simu. Se Ita la hatene oinsá atu halaʼo knaar neʼe, hatudu haraik an no husu ajuda husi irmaun sira neʼebé maduru. Keta hanoin atu halo deʼit buat neʼebé kiʼik liu. (Rom 12:11) Duké halo nuneʼe, halaʼo Ita-nia knaar hanesan Ita “halo ba Jeová, laʼós ba ema”. (Kol 3:23) Klaru katak Ita la perfeitu, tan neʼe hatudu haraik an hodi rekoñese Ita-nia sala.—Prov 11:2. w23.12 p. 26 par. 8

Ita sente kontente bainhira hetan batizmu no sai parte ba Jeová nia família. Neʼe mak priviléjiu atu bele iha relasaun besik ho Jeová. Ita konkorda ho David neʼebé hakerek: “Ksolok ba ema neʼebé Ita [Jeová] hili no lori besik Ita hodi hela iha Ita-nia pátiu sira.” (Sal 65:4) Laʼós ema hotu bele iha relasaun neʼebé besik ho Jeová. Jeová hili sira neʼebé hakarak hakbesik ba nia no sai ninia belun. (Tgo 4:8) Bainhira Ita dedika an ba Jeová no hetan batizmu, Ita bele fiar duni katak, nia sei fakar ba Ita ‘bensaun toʼo Ita la falta tan buat ida’. (Mal 3:10; Jer 17:8) Batizmu mak hakat primeiru atu serbí Jeová. Ita hakarak hakaʼas an atu moris tuir Ita-nia dedikasaun, maski hasoru tentasaun ka situasaun neʼebé koko Ita-nia fiar. (Ecle 5:​4, 5) Nuʼudar Jesus nia dixípulu, Ita presiza halo tuir Jesus nia ezemplu no ninia mandamentu ho didiʼak.—Mt 28:​19, 20; 1 Ped 2:21. w24.03 p. 8 par. 1-3

Oinsá se Ita no Ita-nia pár ladún gosta atu uza tempu hamutuk? Hanoin ezemplu kona-ba ahi. Ahi neʼe la lakan makaʼas kedas. Neineik-neineik ita tenke kontinua tau tan ai neʼebé boot liu hodi ahi bele lakan makaʼas. Nuneʼe mós diʼak atu hahú uza tempu uitoan-uitoan hamutuk loroloron. Halo buat neʼebé imi naʼin-rua gosta. (Tgo 3:18) Hodi hahú ho buat neʼebé kiʼik, imi bele halo lakan fali imi-nia domin ba malu. Respeitu mak importante iha moris kaben nian. Neʼe hanesan oksijéniu neʼebé ajuda ahi lakan makaʼas liután. Se la iha oksijéniu, ahi sei mate lalais. Nuneʼe mós se la iha respeitu, feen-laʼen sira-nia domin sei sai malirin lalais. Maibé, feen-laʼen neʼebé buka atu hatudu respeitu ba malu sei hakaʼas an atu halo sira-nia domin lakan nafatin. Maski nuneʼe, hanoin-hetan katak laʼós Ita mak sente katak Ita hatudu ona respeitu, maibé buat importante mak Ita-nia pár sente katak Ita respeitu nia. w23.05 p. 22 par. 9; p. 24 par. 14-15

Iha Bíblia, Maromak nia atan sira neʼebé laran-metin koʼalia kona-ba susar neʼebé sira hasoru tanba inimigu ka ema seluk kontra sira. (Sal 18:4; 55:​1, 5) Hanesan neʼe mós, karik ema kontra ita iha eskola, serbisu-fatin, família, ka governu mak kontra ita. Ita mós bele taʼuk kona-ba mate tanba problema saúde. Durante tempu hanesan neʼe, karik ita bele sente hanesan labarik kiʼik neʼebé presiza ajuda. Oinsá mak Jeová ajuda ita iha situasaun sira hanesan neʼe? Nia fó kmaan no halo ita kontente. Tan neʼe uza tempu barak ho Jeová liuhusi halo orasaun no lee ninia Liafuan. (Sal 77:​1, 12-14) Se Ita toman ona atu halo ida-neʼe, bainhira hasoru susar Ita sei buka kedas Jeová nia ajuda. Fó-hatene ba Jeová kona-ba buat neʼebé halo Ita taʼuk no hanoin barak. Husik nia koʼalia no fó kmaan ba Ita liuhusi Bíblia.—Sal 119:28. w24.01 p. 24-25 par. 14-16

Importante atu iha motivasaun atu bele kumpre ita-nia planu espirituál. Ema neʼebé iha motivasaun hakarak duni atu kumpre planu neʼe. No, se ita iha motivasaun neʼebé forte, ita bele kumpre ita-nia planu. Entaun Ita bele halo saida atu motiva Ita-nia an liután? Halo orasaun atu iha motivasaun neʼebé forte. Jeová bele motiva Ita atu kumpre Ita-nia planu liuhusi ninia espíritu santu. Dala ruma ita halo planu ida tanba hatene katak neʼe mak buat neʼebé loos. Maibé karik ita ladún hakarak atu kumpre planu neʼe. Medita kona-ba buat neʼebé Jeová halo ona ba Ita. (Sal 143:5) Apóstolu Paulo medita kona-ba oinsá Jeová hatudu laran-diʼak neʼebé boot ba nia, no neʼe motiva nia atu serbisu makaʼas ba Jeová. (1 Kor 15:​9, 10; 1 Tim 1:​12-14) Nuneʼe mós se Ita medita liután kona-ba buat neʼebé Jeová halo ona ba Ita, neʼe sei motiva liután Ita atu kumpre Ita-nia planu.—Sal 116:12. w23.05 p. 26-27 par. 3-5

Ita halo ita-nia Aman iha lalehan kontente bainhira ita hahiʼi ninia naran. (Sal 119:108) Maibé neʼe la dehan katak Maromak kbiit boot liu hotu mak hanesan ema la perfeitu neʼebé hakarak ema seluk hahiʼi sira tanba la fiar an. Bainhira ita hahiʼi ita-nia Aman iha lalehan, ita prova katak lia-bosok seluk tan neʼebé Satanás koʼalia kona-ba ita ida-idak mak la loos. Satanás duun katak sei la iha ema ida mak laran-metin hodi defende Maromak nia naran. No katak ita hotu sei la hatudu integridade. Nia hatete katak ita hotu sei para atu serbí Maromak se ita hanoin neʼe sei lori diʼak ba ita. (Job 1:​9-11; 2:4) Maibé Job neʼebé laran-metin fó prova katak Satanás bosok-teen. Oinsá ho Ita? Ita ida-idak iha priviléjiu atu defende Maromak nia naran no halo nia kontente hodi serbí nia ho laran-metin. (Prov 27:11) Neʼe mak priviléjiu neʼebé boot tebes. w24.02 p. 8-9 par. 3-5

Depois Moisés no Josué nia tempu, Jeová hili juís sira atu dirije ninia povu. Tuirmai, durante liurai sira-nia tempu, Jeová hili profeta sira atu dirije ninia povu. Liurai sira neʼebé laran-metin halo tuir profeta sira-nia matadalan. Porezemplu, ho haraik an Liurai David simu korrije husi profeta Natan. (2 Sam 12:​7, 13; 1 Krón 17:​3, 4) Liurai Jeosafát halo tuir matadalan husi profeta Jaaziel no anima povu Judá atu “tau fiar ba [Maromak nia] profeta sira”. (2 Krón 20:​14, 15) Iha tempu susar, Liurai Ezequias buka matadalan husi profeta Isaias. (Isa 37:​1-6) Bainhira liurai sira halo tuir ema neʼebé Jeová uza atu dirije sira, sira hetan bensaun no nasaun seguru. (2 Krón 20:​29, 30; 32:22) Klaru katak Jeová uza profeta sira atu dirije ninia povu. w24.02 p. 21 par. 8

Satanás hakarak ita atu ransu ho ema neʼebé la apoia ita atu halo tuir Jeová nia matadalan. Ita presiza kuidadu tanba ohin loron ita bele gasta tempu barak laʼós deʼit ho ema neʼebé ita hasoru oin ba oin, maibé mós liuhusi média sosiál. Ita presiza luta hasoru mundu nia hanoin katak la sala atu halo hahalok la morál. Ita hatene katak neʼe la loos. (Éf 4:​19, 20) Diʼak atu husu ba ita-nia an: ‘Haʼu kuidadu atu la ransu ho kolega serbisu, kolega eskola, ka ema seluk neʼebé la respeitu Jeová nia matadalan ka lae? Haʼu kaer metin ba Jeová nia matadalan sira, maski karik ema ruma dehan katak haʼu la hatudu toleránsia ba ema seluk ka lae?’ Hanesan temi iha 2 Timóteo 2:​20-22, karik ita mós presiza kuidadu kuandu hili belun iha kongregasaun. Ita presiza hanoin-hetan katak laʼós ema hotu bele ajuda ita atu nafatin laran-metin ba Jeová. w24.03 p. 22-23 par. 11-12

Ita koko ona atu imajina Jeová hanesan saida ka lae? Ita labele haree Jeová, maibé Bíblia esplika kona-ba nia iha dalan oioin. Bíblia temi Jeová nuʼudar ‘loro-matan no eskudu’ no “ahi neʼebé han mohu buat hotu”. (Sal 84:11; Ebr 12:29) Ezequiel esplika Jeová mak hanesan fatuk-safira, besi neʼebé nabilan, no arkiris. (Eze 1:​26-28) Karik ita bele sente susar atu tau fiar katak Jeová hadomi ita tanba ita labele haree nia. Ema balu hanoin katak Jeová la hadomi sira tanba susar neʼebé sira hasoru iha tempu uluk. Jeová komprende sentimentu hanesan neʼe no oinsá neʼe afeta ita. Atu ajuda ita, nia fó sai kona-ba ninia hahalok furak iha Bíblia. Liafuan domin mak dalan diʼak ida atu esplika kona-ba Jeová. (1 João 4:8) Bíblia hatete katak Maromak mak domin. Buat hotu neʼebé nia halo mak tanba domin. Jeová nia domin iha kbiit boot no nia hatudu ida-neʼe ho laran-luak. Tan neʼe nia hadomi ema maski sira la hadomi nia.—Mt 5:​44, 45. w24.01 p. 26 par. 1-3

Jeová hili Moisés atu lori povu Izraél sai husi rai-Ejitu no nuʼudar prova Nia fó kalohan no iha kalan nia fó ahi. (Éx 13:21) Moisés no povu Izraél laʼo tuir kalohan no ahi neʼebé dirije sira ba Tasi Mean. Maibé tuirmai tropa Ejitu toman ema Izraél. Tan neʼe ema Izraél sai taʼuk tebes tanba hanoin katak tropa Ejitu sei oho sira. Maibé loloos Moisés la halo sala. Jeová ho neon uza Moisés atu dirije sira bá iha neʼebá. (Éx 14:2) Tuirmai Jeová salva sira iha dalan neʼebé kmanek tebes. (Éx 14:​26-28) Durante tinan 40, Moisés kontinua tau fiar katak Jeová uza kalohan no ahi atu dirije ninia povu hodi laʼo liuhusi rai-fuik. (Éx 33:​7, 9, 10) Husi kalohan neʼe, Jeová koʼalia ba Moisés, no tuirmai Moisés fó sai Jeová nia matadalan ba povu. Ema Izraél bele haree ho klaru katak Jeová uza Moisés atu dirije sira. w24.02 p. 21 par. 4-5