Maiu

Rai-hamlaha boot neʼebé mosu “iha mundu tomak” mós afeta ema Kristaun iha apóstolu sira-nia tempu. Ulun ba família hanoin barak kona-ba oinsá atu hetan hahán ba sira-nia família. Oinsá ho joven sira neʼebé iha planu atu aumenta sira-nia serbisu haklaken? Karik sira hanoin katak sira tenke hein toʼo susar neʼe liu mak bele kumpre sira-nia planu. Maski ema Kristaun ida-idak nia moris la hanesan, maibé sira halo mudansa tuir situasaun. Sira kontinua haklaken tuir sira-nia kbiit no sira kontente atu fahe buat neʼebé sira iha ho sira-nia irmaun-irmán sira iha Judeia. (Após 11:​29, 30) Sira neʼebé simu ajuda husi irmaun-irmán sira seluk, sente rasik Jeová nia ajuda. (Mt 6:​31-33) Sira sente besik liu ba irmaun-irmán sira neʼebé ajuda sira. No irmaun-irmán sira neʼebé fó osan ka fó ajuda iha dalan seluk sente kontente tanba fó ba ema seluk.—Após 20:35. w23.04 p. 16 par. 12-13

Dala ruma, Jeová hatán ita-nia orasaun liuhusi book ema neʼebé la adora nia atu ajuda ita. Porezemplu, nia book Liurai Artaxerxes atu fó lisensa ba Neemias neʼebé husu atu fila fali ba Jeruzalein hodi nuneʼe nia bele ajuda harii fali sidade neʼe. (Neem 2:​3-6) Ohin loron mós Jeová bele book ema sira neʼebé la adora nia atu ajuda ita bainhira ita presiza. Baibain Jeová la hatán ita-nia orasaun iha dalan neʼebé kmanek. Maibé ninia resposta mak buat neʼebé ita presiza atu bele nafatin laran-metin ba ita-nia Aman iha lalehan. Tan neʼe matan-moris nafatin atu bele haree oinsá Jeová hatán Ita-nia orasaun. Husi tempu ba tempu, para no hanoin kleʼan kona-ba oinsá Jeová hatán ita-nia orasaun. (Sal 66:​19, 20) Ita hatudu fiar ba Jeová laʼós deʼit liuhusi halo orasaun ba nia, maibé mós simu dalan neʼebé nia hatán ita-nia orasaun.—Ebr 11:6. w23.05 p. 11 par. 13; p. 12 par. 15-16

Bainhira ita dedika an ba Jeová, ita promete atu adora nia no halo tuir ninia hakarak. Ita tenke kumpre ita-nia promesa neʼe. Ita-nia dedikasaun mak la susar liu ba ita atu kumpre tanba Jeová kria ita atu halo tuir ninia hakarak. (Apok 4:11) Nia kria ita tuir ninia ilas no tau iha ita-nia laran hakarak atu hatene no adora nia. Tan neʼe, ita bele hakbesik ba nia no hetan ksolok hodi halo tuir ninia hakarak. Bainhira ita halo tuir Maromak nia hakarak no halo tuir ninia Oan-Mane, ita sei “sente kmaan”. (Mt 11:​28-30) Tan neʼe, hametin Ita-nia domin ba Jeová hodi medita kona-ba buat diʼak hotu neʼebé nia halo ona ba Ita no bensaun neʼebé nia promete iha futuru. Bainhira Ita-nia domin ba Maromak sai boot liután, neʼe sei fasil ba Ita atu halo tuir nia. (1 João 5:3) Jesus konsege halo tuir Maromak nia hakarak ho susesu tanba halo orasaun ba Jeová atu husu ajuda no tau fokus nafatin ba ninia kolen. (Ebr 5:7; 12:2) Hanesan Jesus, Ita bele halo orasaun ba Jeová hodi husu kbiit no kontinua hanoin kona-ba Ita-nia esperansa moris rohan-laek. w23.08 p. 27-28 par. 4-5

Ita hotu hafolin tebes ema neʼebé hatudu pasiénsia. Ita orgullu ho sira neʼebé bele hein hela ba buat ruma maibé la estrese. Ita agradese tanba ema hatudu pasiénsia mai ita bainhira ita halo sala. No ita mós agradese ba ita-nia mestre Bíblia neʼebé hatudu pasiénsia nuʼudar ita hakaʼas an atu aprende, simu, ka aplika Bíblia nia matadalan. Importante liu mak ita agradese tebes tanba Jeová hatudu pasiénsia mai ita! Maski ita hafolin bainhira ema seluk hatudu pasiénsia, maibé dala ruma susar ba ita atu hatudu pasiénsia. Porezemplu, karik ita sente susar atu kalma nafatin bainhira ita hein kleur tanba kondisaun tráfiku, liuliu se ita tarde. Karik ita sente hirus bainhira ema halo ita estrese. No dala ruma susar ba ita atu kontinua hein ba Jeová nia promesa kona-ba mundu foun. Iha situasaun sira-neʼe, Ita presiza hatudu liután pasiénsia. w23.08 p. 20 par. 1-2

Jeová husu Gideão atu haruka kuaze tropa hotu atu fila fali ba sira-nia uma. Karik nia bele hanoin: ‘Presiza duni halo mudansa neʼe ka lae? Neʼe sei susesu ka lae?’ Maski nuneʼe Gideão halo tuir. Ohin loron, katuas sira banati-tuir Gideão hodi aplika mudansa foun husi organizasaun. (Ebr 13:17) Gideão halo tuir Jeová maski nia taʼuk no mós knaar neʼe mak perigozu. (Juís 9:17) Depois hetan anima husi Jeová, Gideão iha konfiansa katak Jeová sei ajuda nia atu proteje Jeová nia povu. Katuas sira neʼebé hela iha área neʼebé governu bandu ita-nia atividade, bele banati-tuir Gideão. Sira ho aten-brani dirije reuniaun no mós serbisu haklaken maski karik polísia bele kaer sira, halo interrogasaun, lakon serbisu ka ema halo violénsia hasoru sira. Durante terus boot, katuas sira presiza aten-brani atu halo tuir matadalan neʼebé sira simu maski karik perigu atu halo tuir. w23.06 p. 5-6 par. 12-13

Jeová tau Amlulik Boot Jeoada nia istória iha Bíblia laran, no ohin loron ita bele aprende husi ninia ezemplu. (Rom 15:4) No bainhira Jeoada mate, ema “hakoi nia iha David nia Sidade hamutuk ho liurai sira, tanba buat diʼak hotu neʼebé nia halo ona ba povu Izraél, ba Maromak neʼebé loos no ba Ninia uma”. (2 Krón 24:​15, 16) Istória kona-ba Jeoada ajuda ita hotu atu hamtaʼuk ba Maromak Jeová. Katuas kongregasaun sira bele banati-tuir Jeoada hodi kontinua matan-moris no proteje Maromak nia bibi. (Após 20:28) Ferik-katuas sira bele aprende katak Jeová sei ajuda sira atu kumpre ninia hakarak se sira hamtaʼuk no laran-metin ba Jeová. Joven sira bele banati-tuir dalan neʼebé Jeová hafolin no respeitu Jeoada hodi hafolin no respeitu ferik-katuas sira, liuliu sira neʼebé serbí Jeová ho laran-metin ba tempu kleur. (Prov 16:31) Mai ita hotu apoia ‘sira neʼebé dirije ita’ liuhusi halo tuir sira.—Ebr 13:17. w23.06 p. 17 par. 14-15

Kuandu asiste reuniaun, tetu didiʼak bainhira deside kona-ba dala hira mak Ita sei hiʼit liman atu fó komentáriu. Se ita hiʼit liman beibeik, irmaun neʼebé dirije estudu bele sente katak nia tenke hili ita beibeik maski ema seluk seidauk hetan oportunidade atu fó komentáriu. Karik neʼe sei halo ema seluk dada an atu hiʼit liman. (Ecle 3:7) Bainhira irmaun-irmán barak hiʼit liman, karik ita sei la hetan oportunidade atu fó komentáriu barak. Dala ruma irmaun neʼebé dirije estudu labele hili ita. Karik neʼe halo ita sente estrese, maibé keta sente an bainhira irmaun neʼe la hili ita. (Ecle 7:9) Se Ita labele fó komentáriu barak tuir Ita-nia hakarak, karik Ita bele rona didiʼak ba ema seluk nia komentáriu no depois reuniaun Ita bele gaba sira. Bainhira Ita gaba irmaun-irmán sira, neʼe mós bele anima sira hanesan bainhira Ita fó komentáriu. w23.04 p. 23-24 par. 14-16

Estuda no medita Maromak nia Liafuan. Hanesan ai-hun neʼebé bele hamriik metin se ninia abut tama kleʼan ba rai, ita mós bele hamriik metin nafatin se ita-nia fiar mak bazeia ba Bíblia. Bainhira ai-hun moris, ninia abut kontinua tama kleʼan ba rai. Nuneʼe mós kuandu ita estuda no medita kona-ba Bíblia, ita hametin ita-nia fiar no iha konfiansa katak Maromak nia dalan sira mak diʼak mai ita. (Kol 2:​6, 7) Hanoin kona-ba oinsá Jeová nia atan sira iha tempu uluk hetan benefísiu husi Jeová nia matadalan no mós ninia protesaun. Porezemplu, Ezequiel tau atensaun didiʼak bainhira anju ida sukat templu neʼebé nia haree iha vizaun. Ida-neʼe hametin Ezequiel nia fiar. Vizaun neʼe mós hanorin ita oinsá atu apoia Jeová nia arranju kona-ba halaʼo adorasaun loos. (Eze 40:​1-4; 43:​10-12) Ita mós bele hetan benefísiu bainhira ita uza tempu atu estuda no medita kona-ba buat neʼebé kleʼan husi Bíblia. Ita lakohi sai laran “nakdoko” maibé ita hakarak kontinua tau fiar ba Jeová.—Sal 112:7. w23.07 p. 18 par. 15-16

Bíblia temi ezemplu diʼak oioin kona-ba mane sira neʼebé Ita bele banati-tuir. Mane sira iha tempu antigu hadomi Maromak no kaer responsabilidade oioin atu tau matan Maromak nia povu. Ita mós bele hetan ezemplu diʼak kona-ba mane Kristaun neʼebé maduru iha Ita-nia família no mós kongregasaun. (Ebr 13:7) No Ita mós iha Jesus Kristu neʼebé hatudu ezemplu perfeitu. (1 Ped 2:21) Nuʼudar Ita estuda didiʼak ezemplu sira-neʼe, hanoin kona-ba sira-nia hahalok diʼak neʼebé Ita gosta. (Ebr 12:​1, 2) Tuirmai deside oinsá Ita bele banati-tuir sira. Mane neʼebé iha kbiit atu hanoin, sei hanoin uluk antes halo buat ruma. Tan neʼe, hakaʼas an atu haburas no mantein hahalok neʼe hodi aprende Bíblia nia prinsípiu no hanoin kona-ba tanbasá neʼe lori benefísiu ba Ita. Tuirmai uza prinsípiu sira-neʼe atu ajuda Ita halo desizaun neʼebé lori kontente ba Jeová. (Sal 119:9) Se Ita haburas abilidade importante neʼe, neʼe sei ajuda Ita atu sai maduru.—Prov 2:​11, 12; Ebr 5:14. w23.12 p. 24-25 par. 4-5

Inan-aman bele hanorin sira-nia oan oinsá atu hatán ho laran-maus ba ema neʼebé husu kona-ba sira-nia fiar. (Tgo 3:13) Inan-aman balu treinu sira-nia oan atu halo nuneʼe durante adorasaun família. Sira koʼalia kona-ba tópiku neʼebé karik ema sei husu iha eskola, no hanorin sira-nia oan oinsá atu hatán ho laran-maus no matenek. Bainhira treinu hamutuk, neʼe bele ajuda oan sira atu hametin sira-nia fiar no esplika ba ema seluk kona-ba sira-nia fiar. Iha série “Pergunta husi joven sira” iha jw.org ita bele hetan atividade ba joven sira. Neʼe bele ajuda joven sira atu hametin sira-nia fiar no hatene oinsá atu hatán ho sira-nia liafuan rasik. Bainhira estuda atividade sira-neʼe nuʼudar família, neʼe bele ajuda família tomak hatene oinsá atu defende sira-nia fiar ho laran-maus no matenek. w23.09 p. 17 par. 10; p. 18 par. 15-16

Ita halo ona planu espirituál ida maibé susar atu kumpre ka lae? Se nuneʼe, Ita la mesak. Porezemplu, Philip hakarak halo orasaun diʼak liután no barak liután, maibé susar ba nia atu fahe tempu. Erika halo planu atu toʼo sedu hodi tuir reuniaun atu organiza serbisu haklaken, maibé nia sempre toʼo tarde. Lalika sai laran-kraik se agora daudaun Ita seidauk kumpre Ita-nia planu ida. Atu kumpre planu neʼebé simples mós Ita presiza tempu no hakaʼas an. Tanba Ita nafatin hakarak atu kumpre Ita-nia planu, neʼe hatudu katak Ita hafolin Ita-nia relasaun diʼak ho Jeová no hakarak fó buat neʼebé diʼak liu hotu ba nia. Jeová hafolin Ita-nia hakaʼas an. Klaru katak Jeová la husu Ita atu halo buat neʼebé liu fali Ita-nia kbiit. (Sal 103:14; Miq 6:8) Entaun bainhira halo planu, diʼak atu hili ida neʼebé Ita bele kumpre tuir Ita-nia situasaun. w23.05 p. 26 par. 1-2

Ema neʼebé aten-brani mós bele sente taʼuk, maibé sira la husik ida-neʼe atu hanetik sira hodi halo buat neʼebé loos. Daniel mak joven neʼebé aten-brani tebes. Nia estuda kona-ba liafuan husi profeta sira, inklui Jeremias nia profesia. Husi buat neʼebé nia estuda, ikusmai nia bele komprende katak ema Judeu besik ona atu sai livre husi Babilónia. (Dan 9:2) Hodi haree Bíblia nia profesia sai loos, neʼe halo Daniel nia fiar ba Jeová sai metin liután, no ema neʼebé iha fiar metin ba Maromak bele sai aten-brani. (Kompara ho Roma 8:​32, 37-39.) Buat neʼebé importante liu mak Daniel sempre halo orasaun ba ninia Aman iha lalehan. (Dan 6:10) Daniel fó sai ninia sala no fakar sai ninia sentimentu ba Jeová, no nia mós husu ajuda. (Dan 9:​4, 5, 19) Nia mós ema hanesan ita, entaun nia la moris-mai ho aten-brani kedas. Maibé, nia haburas hahalok neʼe liuhusi estuda, halo orasaun, no tau fiar ba Jeová. w23.08 p. 3 par. 4; p. 4 par. 7

Bainhira ita halo tuir autoridade sira, neʼe lori benefísiu ba ita rasik no mós ema seluk. Oinsá? Ita sei la simu kastigu neʼebé baibain ema hetan tanba kontra lei. (Rom 13:​1, 4) Bainhira ita halo tuir, neʼe bele afeta autoridade sira-nia haree kona-ba Testemuña ba Jeová. Porezemplu tinan barak liubá iha rai-Nijéria, soldadu sira tama ba Reuniaun-Fatin durante reuniaun halaʼo hela, sira buka ema neʼebé lakohi selu taxa. Maibé xefe ba soldadu husu soldadu sira atu sai husi fatin neʼe, hodi dehan: “Testemuña ba Jeová mak ema neʼebé selu taxa.” Bainhira Ita halo tuir lei, Ita ajuda Jeová nia povu atu nafatin iha reputasaun neʼebé diʼak. No karik loron ida, neʼe sei proteje irmaun-irmán sira. w23.10 p. 9 par. 13

Jeová nia atan balu hein ona sistema aat neʼe nia rohan ba tempu kleur. Karik ema balu hanoin katak Jeová demora atu kumpre ninia promesa. Maibé Jeová hatene ninia atan sira-nia sentimentu. Nia hatete ba profeta Habakuk: “Vizaun neʼe sei kumpre tuir tempu neʼebé hili tiha ona, neʼe halai lalais toʼo ninia rohan, neʼe laʼós lia-bosok. Maski vizaun neʼe demora karik, hein nafatin bá! Tanba vizaun neʼe sei kumpre duni. Neʼe sei la tarde!” (Hab 2:3) Maromak fó sai liafuan sira-neʼe atu ajuda deʼit Habakuk ka lae? Ka ninia liafuan sira-neʼe mós bele ajuda ita ohin loron? Jeová haruka apóstolu Paulo atu aplika liafuan sira-neʼe ba ema Kristaun neʼebé hein namanas mundu foun. (Ebr 10:37) Tan neʼe, maski ita sente katak Jeová demora atu kumpre ninia promesa atu salva ita, ita bele iha konfiansa katak promesa “neʼe sei kumpre duni. Neʼe sei la tarde!” w23.04 p. 30 par. 16

Ema Izraél barak la simu prova neʼebé hatudu katak Jeová uza Moisés nuʼudar Ninia reprezentante. (Núm 14:​10, 11) Dala barak sira lakohi rekoñese katak Jeová uza Moisés atu dirije sira. Rezultadu mak Jeová la husik jerasaun neʼe atu tama ba rai neʼebé nia promete. (Núm 14:30) Maibé povu Izraél balu halo tuir ema neʼebé Jeová uza atu dirije sira. Porezemplu, Jeová hatete: “Caleb . . . kontinua laʼo tuir haʼu ho laran tomak.” (Núm 14:24) Maromak fó bensaun ba Caleb, no husik nia atu hili fatin neʼebé nia hakarak hela iha Rai neʼebé Maromak Promete. (Jos 14:​12-14) Jerasaun tuirmai husi nasaun Izraél mós hatudu ezemplu diʼak hodi halo tuir ema neʼebé Jeová uza atu dirije sira. Bainhira Josué troka Moisés atu dirije povu, sira “hatudu respeitu neʼebé kleʼan ba nia durante ninia moris tomak”. (Jos 4:14) Rezultadu mak Jeová haraik bensaun ba sira hodi lori sira tama ba rai neʼebé nia promete.—Jos 21:​43, 44. w24.02 p. 21 par. 6-7

Hanesan doutór bele hatene ita-nia fuan nia kondisaun hodi cek dalan neʼebé ita-nia fuan tuku-tuku, ita mós bele hatene ita-nia domin ba Maromak mak boot oinsá se ita ezamina ita-nia domin ba irmaun-irmán sira. Se ita nota katak ita-nia domin ba irmaun-irmán sira sai fraku, karik neʼe hatudu katak ita-nia domin ba Maromak mós sai fraku. Maibé kuandu ita hatudu beibeik domin ba irmaun-irmán sira, neʼe hatudu katak ita-nia domin ba Maromak metin nafatin. Se ita-nia domin ba irmaun-irmán sira komesa sai fraku, neʼe mak problema neʼebé sériu. Tanbasá? Tanba neʼe katak ita-nia relasaun ho Jeová sai fraku ona. Apóstolu João esplika ho klaru hodi hatete: “Se [ema ida] la hadomi ninia maluk neʼebé nia haree, sá tan hadomi Maromak neʼebé nia labele haree.” (1 João 4:20) Lisaun mak saida? Se ita hakarak halo Jeová kontente, ita presiza “hadomi malu”.—1 João 4:​7-9, 11. w23.11 p. 8 par. 3; p. 9 par. 5-6

Bainhira sei kiʼik, Liurai Jeoas nia aman mate, maibé nia halo desizaun neʼebé diʼak tanba halo tuir matadalan husi Amlulik Boot Jeoada neʼebé hanorin nia hanesan oan rasik. Tanba Jeoada nia ezemplu, Jeoas deside atu serbí Jeová no anima povu atu halo mós nuneʼe. Jeoas mós halo arranju atu hadiʼa fali Jeová nia templu. (2 Krón 24:​1, 2, 4, 13, 14) Se Ita-nia inan-aman ka ema seluk hanorin Ita atu hadomi Jeová no moris tuir ninia matadalan, neʼe mak prezente neʼebé folin-boot tebes. (Prov 2:​1, 10-12) Ita-nia inan-aman bele treinu ita iha dalan oioin. Bainhira Ita aplika matadalan neʼebé Ita simu, Ita sei halo Ita-nia inan-aman kontente. Importante liu mak Ita halo Maromak kontente no hametin Ita-nia relasaun ho nia. (Prov 22:6; 23:​15, 24) Tan neʼe Ita hakarak banati-tuir Jeoas nia ezemplu kuandu nia sei kiʼik. w23.09 p. 8-9 par. 3-5

Jeová promete atu rona ba ita-nia orasaun. Ita-nia Maromak hadomi ninia atan sira neʼebé laran-metin, tan neʼe nia sempre rona ba sira-nia orasaun. (Sal 10:17; 37:28) Maibé neʼe la dehan katak nia sei fó buat hotu neʼebé ita husu. Karik ita presiza hein toʼo mundu foun antes ita simu buat balu neʼebé ita husu. Jeová hanoin kona-ba ninia hakarak bainhira rona ba ita-nia orasaun. (Isa 55:​8, 9) Buat ida neʼebé Jeová hakarak mak atu mundu nakonu ho ema neʼebé halo tuir nia nuʼudar Ukun-Naʼin. Maibé Satanás dehan katak ema bele kontente liu se sira ukun an rasik. (Gén 3:​1-5) Atu prova katak Diabu mak bosok-teen, Jeová husik ema atu ukun an rasik. Maibé ema nia ukun lori problema oioin. (Ecle 8:9) Ita hatene katak Jeová sei la halakon kedas problema hotu ohin loron. w23.11 p. 21 par. 4-5

Jeová promete katak liuhusi Abraão nasaun barak sei simu bensaun. Maski Abraão tinan 100 ona no Sara tinan 90, promesa kona-ba oan-mane seidauk sai loos. Tuir ema nia haree, imposivel atu Abraão no Sara iha oan. Neʼe koko duni Abraão nia fiar. Maibé, “tanba esperansa neʼe, nia fiar katak nia bele sai aman ba nasaun barak”. (Rom 4:​18, 19) No ikusmai Abraão nia esperansa sai loos. Nia sai aman ba Isaac, oan neʼebé nia hein ba tempu kleur ona. (Rom 4:​20-22) Hanesan Abraão, Maromak bele simu ita no haree ita nuʼudar ninia belun. Paulo temi kona-ba neʼe hodi hatete: “Liafuan iha eskritura neʼebé dehan: ‘Maromak haree nia nuʼudar ema loos’, laʼós ba Abraão deʼit, maibé mós ba ita neʼebé Maromak sei haree nuʼudar ema laran-loos, tanba ita fiar ba Nia neʼebé fó moris-hiʼas ba ita-nia Naʼi Jesus husi mate.” (Rom 4:​23, 24) Hanesan Abraão, ita presiza iha fiar, hatudu hahalok diʼak, no mós esperansa. w23.12 p. 7 par. 16-17

Bainhira Ita hasoru susar neʼebé halo Ita taʼuk, hanoin-hetan katak Jeová hatene kona-ba buat neʼebé Ita hasoru no oinsá susar neʼe afeta Ita-nia sentimentu. Porezemplu, Jeová laʼós deʼit haree oinsá ema Ejitu trata aat ema Izraél, maibé mós nia hatene didiʼak kona-ba “terus neʼebé sira hasoru”. (Éx 3:7) Se Ita hasoru daudaun susar neʼebé halo Ita taʼuk, karik susar atu haree oinsá Jeová apoia Ita. Saida mak Ita bele halo? Husu nia atu ajuda Ita haree oinsá nia apoia ona Ita. (2 Reis 6:​15-17) Tuirmai husu Ita-nia an: Iha ka lae diskursu ruma ka komentáriu iha reuniaun neʼebé hametin ona haʼu? Iha ka lae publikasaun, vídeo, ka knananuk husi Broadcasting neʼebé anima ona haʼu? Iha ka lae ema ruma neʼebé fahe eskritura neʼebé fó kmaan ba haʼu? Dala ruma fasil atu haluha oinsá mak irmaun-irmán sira hadomi ita no oinsá mak Maromak hametin ita liuhusi ninia Liafuan. Maibé buat sira-neʼe mak prezente husi Jeová. (Isa 65:13; Mc 10:​29, 30) Neʼe fó prova katak Jeová hanoin Ita. (Isa 49:​14-16) No mós hatudu katak Ita bele tau fiar ba nia. w24.01 p. 4-5 par. 9-10

Antes saʼe ba lalehan, Jesus fó-hanoin ba ninia dixípulu sira katak sira presiza haklaken kona-ba nia “iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu”. (Após 1:8; Lc 24:​46-48) Maibé lakleur, ulun-naʼin Judeu sira kaer apóstolu Pedro no João no lori sira ba Sinédriu. Sira haruka mane fiar-naʼin sira-neʼe atu para haklaken no mós ameasa sira. (Após 4:​18, 21) Pedro no João hatete: “Se imi hanoin katak rona ba imi duké rona ba Maromak mak buat loos iha Maromak nia oin, imi rasik deside bá. Maibé ba ami, ami labele para atu koʼalia kona-ba buat neʼebé ami haree no rona ona.” (Após 4:​19, 20) Kuandu Pedro no João livre husi komarka, sira halo orasaun ba Jeová kona-ba kumpre ninia hakarak. Jeová hatán ba sira-nia orasaun neʼebé sira hatoʼo ho laran.—Após 4:31. w23.05 p. 5 par. 11-12

Jeová no Jesus iha relasaun neʼebé besik no nakonu ho domin husi tempu uluk kedas. Sira hamutuk iha lalehan ba tinan barak tebes. Jeová fó sai ho klaru ninia domin ba Jesus, hanesan temi iha eskritura ba ohin. Jeová bele dehan deʼit: ‘Neʼe mak ida neʼebé halo haʼu-nia laran-kontente.’ Maski nuneʼe, nia hakarak ita hatene katak nia hadomi tebes Jesus, tan neʼe nia bolu Jesus “haʼu-nia Oan-Mane neʼebé haʼu hadomi”. Jeová orgullu ho Jesus, liuliu tanba Jesus fó ninia moris. (Éf 1:7) Jesus la duvida kona-ba ninia Aman nia domin no bele sente duni domin neʼe. Jesus hatete beibeik ho fiar metin katak ninia Aman hadomi nia.—João 3:35; 10:17; 17:24. w24.01 p. 28 par. 8

Imajina toʼok: Ema ida neʼebé Ita hadomi koʼalia aat kona-ba Ita. Ita hatene katak buat neʼebé nia koʼalia mak la loos, maibé ema balu fiar ba ida-neʼe. Aat liután mak sira balu fahe tutan lia-bosok neʼe, no ema seluk mós fiar. Ita sente oinsá? Baibain neʼe sei halo Ita laran-triste duni, loos ka lae? Ezemplu neʼe ajuda ita komprende Jeová nia sentimentu bainhira anju ida hafoʼer ninia naran hodi koʼalia lia-bosok ba feto primeiru Eva. Feto neʼe fiar lia-bosok neʼe. Lia-bosok neʼe halo Adão no Eva kontra Jeová. No rezultadu mak sala no mate kona ema hotu. (Gén 3:​1-6; Rom 5:12) Problema hotu neʼebé iha mundu neʼe, inklui mate, funu, no triste akontese tanba lia-bosok neʼebé Satanás habelar. Lia-bosok no rezultadu aat neʼebé mosu halo Jeová laran-kanek duni. Maibé Jeová la rai odi, tuir loloos nia mak “Maromak neʼebé kontente”.—1 Tim 1:11. w24.02 p. 8 par. 1-2

Oinsá mak Ita bele banati-tuir José no la monu ba tentasaun? Ita bele deside agora saida mak Ita sei halo bainhira hasoru tentasaun. Aprende atu dehan kedas “lae” bainhira hetan tentasaun atu halo buat neʼebé Jeová odi, no la hanoin beibeik kona-ba tentasaun neʼe. (Sal 97:10; 119:165) Hodi halo nuneʼe, Ita sei la monu ba sala kuandu hetan tentasaun. Karik Ita hatene katak Ita hetan ona lia-loos no hakarak serbí Jeová ho laran tomak, maibé iha buat ruma neʼebé nafatin hanetik Ita atu dedika an no hetan batizmu. Ita bele banati-tuir Liurai David nia ezemplu. Ita bele harohan ba Jeová: “Oh Maromak, buka-hatene didiʼak haʼu bá no hatene haʼu-nia laran. Haree didiʼak haʼu bá, no hatene haʼu-nia neon-susar. Haree toʼok se iha hanoin aat ruma iha haʼu-nia laran, no dirije haʼu iha dalan rohan-laek nian.” (Sal 139:​23, 24) Jeová haraik bensaun ba sira neʼebé “buka nia ho laran”. Ita bele hatudu katak Ita halo nuneʼe hodi hakaʼas an atu dedika Ita-nia an no hetan batizmu.—Ebr 11:6. w24.03 p. 6-7 par. 13-15

Amlulik boot reprezenta povu iha Maromak nia oin. Izraél nia amlulik boot primeiru mak Arão. Jeová hili nia kuandu dedika tiha tenda santu. Apóstolu Paulo esplika katak, “ema barak sai amlulik tuituir malu tanba mate hanetik sira atu kontinua serbí nuʼudar amlulik”. (Ebr 7:​23-26) Amlulik boot sira la perfeitu, tan neʼe sira presiza hasaʼe sakrifísiu ba sira-nia sala. Neʼe mak buat neʼebé la hanesan duni entre Izraél nia amlulik boot no Jesus Kristu nuʼudar Amlulik Boot neʼebé aas liu. Nuʼudar Amlulik Boot, Jesus Kristu “serbí nuʼudar atan . . . iha tenda neʼebé loos, neʼebé Jeová rasik mak harii, laʼós ema”. (Ebr 8:​1, 2) Paulo esplika katak, “tanba [Jesus] kontinua moris nafatin, la iha ema ida mak sei troka fali ninia knaar nuʼudar amlulik”. Paulo mós hatete katak Jesus “la iha foʼer ida, la hanesan ho sala-naʼin sira” no la hanesan ho amlulik boot iha Izraél, “nia la presiza hasaʼe sakrifísiu loroloron” ba ninia sala. w23.10 p. 26 par. 8-9

“Lalehan uluk nian” refere ba governu sira neʼebé hetan influénsia husi Satanás no anju aat sira. (Mt 4:​8, 9; 1 João 5:19) Dala ruma, Bíblia uza liafuan “rai” atu refere ba ema neʼebé hela iha mundu. (Gén 11:1; Sal 96:1) Tan neʼe, “rai uluk nian” refere ba ema aat neʼebé moris ohin loron. Jeová sei la hadiʼa “lalehan” no “rai” neʼebé agora iha, maibé nia sei halakon sira iha dalan neʼebé kompletu. Nia sei troka lalehan uluk nian no rai uluk nian ho “lalehan foun no rai foun”, neʼe mak governu foun no ema ho hahalok loos. Jeová sei hadiʼa mundu no ema atu sai perfeitu. Isaias fó sai nanis katak mundu tomak sei sai fatin furak hanesan jardín Eden. Jeová mós sei hafoun ita hodi kura ita ida-idak iha dalan neʼebé kompletu. Ema neʼebé ain-kudeik, matan-delek, no tilun-diuk sei hetan kura, no ema mate mós sei moris fali.—Isa 25:8; 35:​1-7. w23.11 p. 4 par. 9-10

“Terus boot” sei mosu derrepente deʼit. (Mt 24:21) Maibé ita sei la hakfodak bainhira neʼe akontese tanba ita hatene nanis katak neʼe sei mosu. Maizumenus tinan 2.000 liubá, Jesus fó avizu ba ninia dixípulu sira atu prontu nafatin ba loron neʼe. Se ita prepara an, neʼe sei halo fasil ba ita atu liu terus boot no ita mós bele ajuda ema seluk atu halo nuneʼe. (Lc 21:36) Hahalok tahan sei ajuda ita atu halo tuir Jeová no fiar katak nia sei proteje ita. Ita sei halo saida se irmaun-irmán sira lakon sira-nia sasán tanba dezastre? (Hab 3:​17, 18) Hahalok laran-sadiʼa sei book ita atu ajuda sira. Ita sei halo saida se ita tenke hela hamutuk ho irmaun-irmán sira tanba Gog husi rai-Magog ka grupu nasaun sira ataka ita? (Eze 38:​10-12) Domin boot ba sira sei ajuda ita tahan susar neʼe hamutuk. w23.07 p. 2 par. 2-3

Feen-laʼen sira bele aprende husi Áquila no Priscila neʼebé ema Kristaun barak iha apóstolu sira-nia tempu respeitu. (Rom 16:​3, 4) Bíblia fó sai katak sira serbisu, haklaken no ajuda ema seluk hamutuk. (Após 18:​2, 3, 24-26) Tuir loloos, kuandu Bíblia temi Áquila no Priscila, sira-nia naran sempre mosu hamutuk. Oinsá mak feen-laʼen bele banati-tuir sira? Hanoin kona-ba buat oioin neʼebé Ita no Ita-nia pár presiza halo. Ita bele ka lae halo atividade balu hamutuk nuʼudar feen-laʼen duké halo mesamesak? Porezemplu, Áquila no Priscila haklaken hamutuk. Ita halo planu beibeik atu haklaken hamutuk ka lae? Áquila no Priscila mós serbisu hamutuk. Karik Ita no Ita-nia pár halo serbisu neʼebé la hanesan atu manán osan, maibé imi bele halo serbisu uma-laran nian hamutuk ka lae? (Ecle 4:9) Bainhira imi ajuda malu, imi sei sente hanesan ekipa ida, no imi iha oportunidade atu koʼalia ba malu. w23.05 p. 22-23 par. 10-12

Ema hotu dala ruma sente taʼuk. Porezemplu, bainhira Liurai Saul duni no hakarak oho David, David deside atu halai ba ema Filístia nia sidade Gat. Lakleur deʼit Liurai Aquis husi Gat hatene katak David mak asuwaʼin boot neʼebé oho ona ema Filístia “naʼin-rihun sanulu”. David “sai taʼuk tebetebes”. (1 Sam 21:​10-12) Nia taʼuk kona-ba buat neʼebé Aquis sei halo ba nia. Saida mak David halo atu manán ninia sentimentu taʼuk? Iha Salmo 56, David fó sai ninia sentimentu bainhira nia iha Gat. Iha eskritura neʼe, David koʼalia kona-ba tanbasá nia taʼuk no oinsá nia manán hasoru sentimentu neʼe. Bainhira David sente taʼuk, nia tau fiar ba Jeová. (Sal 56:​1-3, 11) David iha razaun neʼebé diʼak atu tau fiar ba Jeová. Ho Jeová nia ajuda, David deside atu halo buat ruma neʼebé oin-seluk tebes: Nia finje sai bulak! Aquis la haree tan David nuʼudar ema neʼebé lori perigu, tan neʼe nia husik David atu bá.—1 Sam 21:13–22:1. w24.01 p. 2 par. 1-3

Sé mak ema sira neʼebé temi iha eskritura ba ohin? Sira mak Kristu nia alin sira neʼebé saʼe ona ba lalehan! Entaun bainhira Kristu nia alin restu iha rai saʼe ba lalehan iha terus boot nia parte ikus, sira-nia knaar primeiru mak atu halo funu. Bainhira sira saʼe ona ba lalehan, sira sei serbí hamutuk ho Kristu no ninia anju sira atu halo funu ikus hasoru Maromak nia inimigu. Hanoin toʼok kona-ba neʼe. Bainhira iha rai, Jesus nia alin balu mak idade no mós fraku. Maibé kuandu sira saʼe ona ba lalehan, sira sei sai kriatura espíritu neʼebé iha forsa boot no labele mate, no hetan knaar atu halo funu hamutuk ho Liurai Jesus Kristu. Bainhira funu Armagedon remata, sira sei ajuda ema atu sai perfeitu. Ita bele fiar duni katak sira sei halo buat barak liután husi lalehan atu ajuda sira-nia irmaun-irmán doben sira iha rai. w24.02 p. 6-7 par. 15-16

Ema balu dada an atu dedika an no hetan batizmu maski sira prontu ona. Karik sira hanoin: ‘Oinsá se ikusmai haʼu halo sala neʼebé sériu no kongregasaun hasai haʼu?’ Se Ita sente hanesan neʼe, fiar bá katak Jeová sei fó buat hotu neʼebé Ita presiza atu “moris ho loloos iha Jeová nia oin hodi halo nia kontente iha buat hotu”. (Kol 1:10) Nia sei ajuda Ita atu halo buat neʼebé loos. Nia ajuda ona ema barak atu halo nuneʼe. (1 Kor 10:13) Neʼe mak razaun ida tanbasá ema uitoan deʼit mak hasai husi kongregasaun. Jeová ajuda ninia povu atu laran-metin nafatin. Ema hotu la perfeitu no hetan koko atu halo buat neʼebé sala. (Tgo 1:14) Maski nuneʼe, Ita presiza deside saida mak Ita sei halo bainhira hasoru tentasaun. Tuir loloos, Ita rasik bele kontrola saida mak Ita sei halo iha Ita-nia moris. Ema balu hanoin katak ita labele kontrola ita-nia sentimentu no hahalok, maibé neʼe la loos. w24.03 p. 5-6 par. 11-12