Abríl

Jeová nia atan sira iha tempu uluk hasoru problema neʼebé sira nunka espera. Hanoin toʼok kona-ba Jacob. Ninia aman haruka nia kaben ho Labão nia oan-feto ida neʼebé mós adora Jeová, no dehan katak Jeová sei haraik bensaun barak ba nia. (Gén 28:​1-4) Entaun Jacob halo tuir ninia aman. Nia sai husi rai-Kanaan no halo viajen ba Labão nia uma. Labão iha oan-feto naʼin-rua naran Lea no Raquel. Jacob laran-monu ba Labão nia oan-feto segundu Raquel no nia prontu atu serbisu tinan hitu ba Labão antes kaben ho Raquel. (Gén 29:18) Maibé neʼe la akontese. Labão lohi Jacob atu nuneʼe Jacob kaben ho Lea. Labão fó lisensa ba Jacob atu kaben ho Raquel iha semana tuirmai, maibé Jacob tenke serbisu tan ba tinan hitu. (Gén 29:​26, 27) Labão mós la hatudu justisa ba Jacob bainhira sira serbisu hamutuk. Durante tinan 20, Labão trata Jacob la ho justisa.—Gén 31:​41, 42. w23.04 p. 15 par. 5

Ita bele husu ajuda ba sé atu hetan kmaan no matadalan bainhira hasoru susar? Ita hatene resposta ba pergunta neʼe. Ita bele hakbesik ba Maromak Jeová liuhusi orasaun. Nia konvida ita atu halo nuneʼe. Nia hakarak ita atu “halo orasaun beibeik”. (1 Tes 5:17) Ita livre atu hakbesik ba nia liuhusi orasaun no buka ninia matadalan ba situasaun hotu iha ita-nia moris. (Prov 3:​5, 6) Tanba Jeová mak laran-luak, nia la tau limite ba dala hira mak ita bele halo orasaun ba nia. Jesus komprende katak Jeová hafolin ema nia orasaun. Tinan barak antes Jesus mai mundu, nia haree oinsá ninia Aman hatán ema laran-metin sira-nia orasaun. Porezemplu, Jesus iha ninia Aman nia sorin bainhira Jeová hatán orasaun husi Ana, David, Elias no mós ema seluk tan. (1 Sam 1:​10, 11, 20; 1 Reis 19:​4-6; Sal 32:5) Tan neʼe mak Jesus hanorin ninia dixípulu atu halo orasaun beibeik no ho fiar metin.—Mt 7:​7-11. w23.05 p. 2 par. 1, 3

Amlulik Boot Jeoada hamtaʼuk Jeová. Nia halo ida-neʼe iha tempu neʼebé Jezabel nia oan-feto Atalia hadau pozisaun nuʼudar liurai iha Judá. Atalia laran-aat no kaan podér, tan neʼe nia koko atu oho liurai nia jerasaun hotu, katak ninia bei-oan rasik. (2 Krón 22:​10, 11) Maibé ninia bei-oan ida naran Jeoas la mate tanba Jeoada nia feen Jeosabeat salva Jeoas. Jeosabeat no ninia laʼen subar Jeoas neʼebé kiʼik no tau matan ba nia. Hodi halo nuneʼe, sira ajuda proteje David nia liña jerasaun neʼebé sei ukun nuʼudar liurai. Jeoada laran-metin ba Jeová no la taʼuk Atalia. Bainhira Jeoas tinan hitu, Jeoada hatudu laran-metin ba Jeová dala ida tan. Nia halo planu ida. Se planu neʼe susesu, Jeoas sei sai liurai, tanba nia mak iha direitu atu tuur iha David nia kadunan. Maibé se planu neʼe la susesu, karik Jeoada bele mate. Ho Jeová nia bensaun, Jeoada nia planu hetan susesu. w23.06 p. 17 par. 12-13

Liurai Nabukodonozór bele oho Daniel tanba hanoin katak Daniel nia liafuan neʼe hanesan planu neʼebé aat. Maski nuneʼe, Daniel hatudu aten-brani no esplika kona-ba mehi neʼe. Saida mak ajuda Daniel atu hatudu aten-brani? Nuʼudar joven, karik Daniel aprende husi ninia inan-aman nia ezemplu. (Deut 6:​6-9) Daniel laʼós deʼit hatene kona-ba Ukun-Fuan neʼebé báziku, hanesan Ukun-Fuan Sanulu, maibé nia mós hatene didiʼak kona-ba saida mak ema Izraél bele ka labele han. (Lev 11:​4-8; Dan 1:​8, 11-13) Daniel mós aprende istória kona-ba Maromak nia povu no hatene saida mak akontese ba sira bainhira sira la moris tuir Jeová nia matadalan. (Dan 9:​10, 11) Ninia esperiénsia halo nia fiar metin katak Jeová no anju sira neʼebé forsa boot sei apoia nia.—Dan 2:​19-24; 10:​12, 18, 19. w23.08 p. 3 par. 5-6

Rebeca mak matenek, halo desizaun ho brani, no hatudu inisiativu iha dalan neʼebé loos durante ninia moris tomak. (Gén 24:58; 27:​5-17) Nia mós hatudu respeitu no prontu atu halo tuir matadalan. (Gén 24:​17, 18, 65) Hanesan Rebeca, se Ita haraik an hodi apoia Jeová nia arranju, Ita sei hatudu ezemplu neʼebé diʼak iha Ita-nia família no mós kongregasaun. Ema Kristaun neʼebé maduru presiza rekoñese sira-nia limitasaun. Maski Ester sai liurai-feto, maibé nia rekoñese ninia limitasaun no la sai foti an. Nia hatudu ida-neʼe hodi rona no halo tuir ninia primu Mordecai nia matadalan. (Ester 2:​10, 20, 22) Hanesan Ester, Ita mós bele hatudu katak Ita rekoñese Ita-nia limitasaun hodi husu matadalan husi ema seluk no halo tuir. (Tito 2:​3-5) Ester hatudu hahalok neʼe hodi hanoin kona-ba ema seluk nia sentimentu. Nia mak “bonita no isin kapás”. Maski nuneʼe, nia la dada atensaun ba ninia an.—Ester 2:​7, 15. w23.12 p. 19-20 par. 6-8

Fó-sala demais ba ita-nia an mak todan. Se ita fó sai ona ita-nia sala, arrepende an, no hakaʼas an atu la halo tan sala neʼebé hanesan, ita bele fiar katak Jeová perdua ona ita. (Após 3:19) Kuandu ita halo ona hakat sira-neʼe, Jeová lakohi ita atu kontinua fó-sala ba ita-nia an. Nia hatene katak neʼe sei lori susar ba ita. (Sal 31:10) Se ita sente triste demais, karik ita sei rende an iha halai-taru ba moris. (2 Kor 2:7) Se Ita kontinua fó-sala ba Ita-nia an, diʼak atu fokus ba oinsá Maromak “perdua duni” ema nia sala. (Sal 130:4) Bainhira Jeová fó perdua ba ema neʼebé arrepende an, nia promete katak nia sei “la hanoin-hetan tan sira-nia sala”. (Jer 31:34) Neʼe katak Jeová sei nunka hanoin fali kona-ba sala neʼebé uluk Ita halo se nia perdua ona Ita. Keta hirus Ita-nia an tanba Ita lakon knaar balu iha kongregasaun. Jeová haluha ona Ita-nia sala, tan neʼe diʼak atu Ita mós halo nuneʼe. w23.08 p. 30-31 par. 14-15

Durante pandemia COVID-19, iha notísias falsu oioin. Testemuña neʼebé halo tuir matadalan husi organizasaun, la sai laran-taridu demais hanesan ema sira neʼebé rona ba informasaun falsu. (Mt 24:45) Ita tenke kontinua tau fokus ba “buat sira neʼebé importante liu”. (Flp 1:​9, 10) Bainhira buat ruma dada ita-nia atensaun, ita uza ita-nia tempu no enerjia saugati deʼit. Buat oioin iha ita-nia moris hanesan han, hemu, halimar no serbisu bele dada ita-nia atensaun se ita tau uluk ida-neʼe iha ita-nia moris. (Lc 21:​34, 35) Liután neʼe, loroloron ita rona notísias kona-ba problema sosiál no polítika. Ita lakohi husik buat sira-neʼe dada ita-nia atensaun. Se lae, ita komesa apoia ida-neʼe iha ita-nia laran no hanoin. Tuir loloos, Satanás uza dalan oioin atu halo susar ba ita hodi halo buat neʼebé loos. w23.07 p. 16-17 par. 12-13

Bá Jeová nia povu, Memoriál ba Kristu nia mate mak loron neʼebé importante tebetebes. Neʼe mak selebrasaun ida deʼit neʼebé Jesus husu ninia dixípulu sira atu halaʼo. (Lc 22:​19, 20) Neʼe fó-hanoin ita dalan oioin atu hatudu agradese ba Jesus nia sakrifísiu. (2 Kor 5:​14, 15) Neʼe mós fó ita oportunidade atu “anima no hametin” irmaun-irmán sira. (Rom 1:12) Ema balu tan deside atu komesa estuda Bíblia tanba buat neʼebé sira haree no rona iha Memoriál. Ita mós hein namanas ba Memoriál tanba iha loron neʼebá irmaun-irmán iha mundu tomak komemora loron neʼe ho unidade. Tan razaun sira-neʼe mak ita hafolin tebes loron Memoriál! w24.01 p. 8 par. 1-3

Hodi medita kona-ba folin neʼebé Jeová no Jesus fó, neʼe ajuda ita komprende liután oinsá sira hadomi tebes ita ida-idak. (Gal 2:20) Jeová halo ida-neʼe nuʼudar prezente tanba nia hadomi ita. Jeová hatudu ona ninia domin mai ita liuhusi sakrifika buat neʼebé folin-boot tebes ba nia, neʼe mak Jesus. Jeová husik ninia Oan-Mane atu hetan susar no mate ba ita-nia diʼak. Jeová laʼós deʼit sente domin ba ita, maibé nia mós fó sai ninia domin ba ita. (Jer 31:3) Jeová dada ita ba nia tanba nia hadomi ita. (Kompara ho Deuteronómio 7:​7, 8.) La iha buat ida mak bele haketak ita husi Jeová nia domin. (Rom 8:​38, 39) Ita sente oinsá kona-ba Jeová nia domin? w24.01 p. 28 par. 10-11

Ema Kristaun neʼebé Maromak hili liuhusi espíritu santu hafolin tebes sira-nia esperansa. Iha tinan 1991, irmaun Frederick Franz fó sai ninia sentimentu kona-ba ninia esperansa neʼe: “Ami-nia esperansa sei sai loos duni, ami ida-idak neʼebé sai parte ba ema naʼin-144.000 sei simu buat neʼebé Maromak promete. Ami-nia kolen sei furak liu fali buat neʼebé ami imajina.” Irmaun Frederick hatutan tan: “[Ami] nafatin hafolin tebes ami-nia esperansa. . . . Nuʼudar ami hein ba esperansa neʼe, ami mós kontinua hafolin liután ida-neʼe. Ami prontu atu hein. Agora haʼu hafolin esperansa neʼe liu fali uluk.” Maski ita-nia esperansa mak atu moris ba nafatin iha lalehan ka rai, maibé ita hotu iha esperansa furak neʼebé fó ita razaun atu haksolok nafatin. Ita-nia esperansa bele sai metin liután. w23.12 p. 9 par. 6; p. 10 par. 8

Iha odamatan ba tenda santu, iha altár riti hodi hasaʼe sakrifísiu ba Jeová. (Éx 27:​1, 2; 40:29) Maibé sakrifísiu sira-neʼe labele hamoos povu nia sala iha dalan neʼebé kompletu. (Ebr 10:​1-3) Sakrifísiu neʼebé hasaʼe beibeik iha tenda santu mak reprezenta sakrifísiu neʼebé bele hamoos ema nia sala iha dalan neʼebé kompletu. Jesus hatene katak Jeová haruka nia mai mundu atu fó ninia moris nuʼudar sakrifísiu. (Mt 20:28) Tan neʼe bainhira Jesus hetan batizmu, neʼe hatudu katak nia hakarak fó ninia moris hodi tuir Jeová nia hakarak. (João 6:38; Gal 1:4) Jesus fó ninia moris nuʼudar sakrifísiu “dala ida deʼit ba nafatin”, atu nuneʼe ema neʼebé hatudu fiar ba Kristu bele hetan perdua iha dalan neʼebé kompletu.—Ebr 10:​5-7, 10. w23.10 p. 26-27 par. 10-11

Ita rasik nunka bele sosa fali ita-nia an husi sala no mate. (Sal 49:​7, 8) Tan neʼe, Jeová arranja atu fó Jesus nia moris hodi bele sosa fali ita. Neʼe mak sakrifísiu boot tebes neʼebé Jeová no Jesus halo ba ita. Bainhira ita medita beibeik kona-ba oinsá Jeová no Jesus halo sakrifísiu ba ita, neʼe sei halo ita hafolin liután Jesus nia sakrifísiu. Kuandu Adão halo sala, nia lakon esperansa atu moris ba nafatin no neʼe mós kona ninia oan hotu. Atu bele sosa fali buat neʼebé Adão halakon, Jesus fó ninia moris neʼebé perfeitu nuʼudar sakrifísiu. Durante Jesus nia moris iha rai, “nia la halo sala ida, no lia-bosok ida la sai husi ninia ibun”. (1 Ped 2:22) Bainhira Jesus mate, ninia moris mak perfeitu no iha folin neʼebé hanesan ho buat neʼebé Adão halo lakon.—1 Kor 15:45; 1 Tim 2:6. w24.01 p. 10 par. 5-6

Depois Jesus hetan tiha moris-hiʼas, nia tama ba Fatin Santu Liu Hotu iha templu espirituál. Ita bele haree ho klaru katak Jeová nia arranju kona-ba adorasaun neʼebé loos neʼebé bazeia ba Jesus nia sakrifísiu no nuʼudar amlulik boot mak diʼak liu. Amlulik boot iha Izraél tama ba Fatin Santu Liu Hotu ho animál nia raan, maibé Jesus “tama ba lalehan”, fatin santu liu hotu no hamriik iha Maromak Jeová nia oin. Iha neʼebá mak nia entrega folin husi ninia sakrifísiu nuʼudar ema neʼebé perfeitu ba ita hotu “atu halakon sala liuhusi ninia sakrifísiu rasik”. (Ebr 9:​24-26) Ita bele adora Jeová iha ninia templu espirituál maski ita-nia esperansa mak atu moris iha lalehan ka iha rai. w23.10 p. 28 par. 13-14

Hanoin toʼok kona-ba Jesus nia knaar iha lalehan nuʼudar ita-nia Liurai neʼebé ukun daudaun no Amlulik Boot neʼebé hanoin ita. Liuhusi nia ita bele halo orasaun ba Maromak neʼebé “hatudu laran-diʼak neʼebé boot”, no husu laran-sadiʼa no ajuda “iha tempu neʼebé loloos”. (Ebr 4:​14, 15) Ita presiza uza ita-nia tempu loroloron atu hanoin kona-ba saida mak Jeová no Jesus halo ona no halo daudaun mai ita. Sira-nia domin mai ita book duni ita-nia laran no anima ita atu serbí Jeová ho laran-manas. (2 Kor 5:​14, 15) Dalan diʼak ida atu hatudu agradese mak hodi ajuda ema seluk sai Testemuña ba Jeová no Jesus nia dixípulu. (Mt 28:​19, 20) Neʼe mak buat neʼebé apóstolu Paulo halo. Nia hatene katak Jeová hakarak “ema hotu hetan salvasaun no hetan koñesimentu neʼebé loos kona-ba lia-loos”.—1 Tim 2:​3, 4. w23.10 p. 22-23 par. 13-14

Ita barak uza eskritura neʼe bainhira haklaken ba ema kona-ba moris iha Paraízu. Oinsá mak ita bele hametin ema seluk no mós ita rasik nia fiar katak promesa iha Apokalipse 21:​3, 4 sei sai loos? Jeová laʼós deʼit fó sai kona-ba promesa furak, maibé nia mós fó razaun oioin kona-ba tanbasá ita bele tau fiar ba ida-neʼe. Ita bele hetan razaun oioin atu tau fiar ba Jeová nia promesa kona-ba Paraízu iha Apokalipse 21:​5, 6a. Neʼe dehan: “Ida neʼebé tuur iha kadunan dehan: ‘Haree bá! Haʼu halo buat hotu sai foun.’ Nia mós dehan: ‘Hakerek liafuan sira-neʼe bá, tanba liafuan sira-neʼe mak loos no ema bele tau fiar.’ No nia dehan ba haʼu: ‘Liafuan sira-neʼe sai loos ona! Haʼu mak Alfa no Ómega, ida neʼebé primeiru no ida neʼebé ikus.’” w23.11 p. 3 par. 3-5

Irmaun joven ida hatudu katak nia haburas ona kbiit atu hanoin hodi halo desizaun diʼak kona-ba hatais no hadiʼa an. Ema barak neʼebé halo no promove roupa ohin loron la hatudu respeitu ba Jeová ka halaʼo moris neʼebé la morál. Tan neʼe, roupa neʼebé sira halo mak aperta demais ka halo mane sira haree hanesan feto. Bainhira hili roupa atu hatais, irmaun joven neʼebé maduru sei hanoin kona-ba Bíblia nia prinsípiu no halo tuir ezemplu diʼak iha kongregasaun. Nia bele husu ba ninia an: ‘Haʼu-nia desizaun hatudu katak haʼu iha hanoin neʼebé loos no hatudu respeitu ba ema seluk ka lae? Dalan neʼebé haʼu hatais no hadiʼa an hatudu katak haʼu mak Maromak nia atan ida ka lae?’ (1 Kor 10:​31-33) Bainhira irmaun joven ida iha kbiit atu hanoin, irmaun-irmán sira no Jeová sei hafolin nia. w23.12 p. 25 par. 7

Iha tempu uluk, “liurai súl” fó-terus Jeová nia povu. (Dan 11:40) Porezemplu durante Funu Mundiál Primeiru no Segundu, irmaun barak tama komarka tanba mantein neutrál no Testemuña nia oan balu mós hasai husi eskola tanba razaun neʼebé hanesan. Iha tinan sira-neʼe nia laran, Jeová nia povu neʼebé hela iha liurai neʼe nia ukun okos mós hetan koko iha dalan seluk tan. Porezemplu, durante kampaña ba eleisaun, karik ema Kristaun ida bele iha hanoin atu apoia partidu ida ka ulun-naʼin ida. Maski nia la tuir votasaun, maibé iha ninia laran nia apoia partidu ida. Tan neʼe importante atu mantein neutrál liuhusi ita-nia hahalok, hanoin, no sentimentu!—João 15:​18, 19. w23.08 p. 12 par. 17

Nuʼudar ita halai-taru atu hetan moris, ita tenke halai ho ita-nia kbiit tomak ‘atu bele manán prémiu’. (1 Kor 9:24) Jesus dehan katak ema nia laran bele sai “todan tanba han demais no hemu barak, no hanoin resin kona-ba moris neʼe”. (Lc 21:34) Eskritura sira-neʼe no eskritura seluk tan bele ajuda Ita buka-hatene kona-ba mudansa neʼebé Ita presiza halo atu bele kontinua halai toʼo rohan. Ita bele iha konfiansa katak ita sei halai toʼo rohan tanba Jeová sei fó ita kbiit neʼebé ita presiza. (Isa 40:​29-31) Tan neʼe, keta rende an! Banati-tuir apóstolu Paulo neʼebé hakaʼas an atu simu ninia kolen. (Flp 3:​13, 14) Ita rasik tenke hola parte iha halai-taru neʼe, no Jeová sei ajuda Ita manán. Jeová bele ajuda lori Ita-nia todan no soe tiha todan neʼebé Ita la presiza lori. Ho ninia ajuda Ita bele kontinua tahan hodi halai toʼo rohan! w23.08 p. 31 par. 16-17

Kuandu Jesus tinan 12, ninia inan-aman haluha tiha nia iha Jeruzalein. (Lc 2:​46-52) Tuir loloos, José no Maria presiza haree didiʼak katak sira-nia oan hotu hamutuk ho sira bainhira sira atu fila ba uma. Kuandu José no Maria hetan fali Jesus, Maria fó-sala ba Jesus kona-ba situasaun neʼe! Jesus bele deʼit koʼalia ba Maria katak neʼe la justu. Duké halo nuneʼe, nia hatán ho respeitu. Maibé José no Maria “la komprende liafuan neʼebé nia dehan ba sira”. Maski nuneʼe, Jesus “kontinua halo tuir sira”. Oan sira, dala ruma Ita sente susar atu halo tuir inan-aman bainhira sira halo sala ka la komprende Ita? Saida mak bele ajuda? Hanoin kona-ba buat neʼebé Jeová sente. Bíblia hatete katak bainhira Ita halo tuir Ita-nia inan-aman, “ida-neʼe halo Naʼi kontente tebes”. (Kol 3:20) Jeová hatene bainhira Ita-nia inan-aman ladún komprende Ita ka halo regra neʼebé la justu. Maibé bainhira Ita hili atu halo tuir sira, Ita halo nia kontente. w23.10 p. 7 par. 5-6

Karik kolega eskola ida dehan katak Testemuña ba Jeová presiza troka sira-nia hanoin kona-ba hahalok omoseksuál. Ita bele esplika ba nia katak ita respeitu ema ida-idak nia direitu atu halo desizaun. (1 Ped 2:17) Tuirmai ita bele esplika benefísiu neʼebé ita hetan tanba halo tuir Bíblia nia matadalan kona-ba morál. Bainhira ema ruma la konkorda duni ho ita, ita labele hanoin kedas katak ita hatene buat neʼebé nia fiar. Porezemplu, oinsá se Ita-nia kolega dehan katak ema neʼebé fiar ba Maromak la matenek? Ita sei hanoin kedas katak nia fiar ba evolusaun no nia hatene didiʼak kona-ba neʼe ka lae? Karik nia repete deʼit buat neʼebé ema seluk koʼalia. Karik Ita bele anima nia atu loke informasaun kona-ba kriasaun iha jw.org. Karik loron seluk nia sei hakarak koʼalia ho Ita kona-ba informasaun ka vídeo ida neʼebé nia hetan iha ita-nia website. Bainhira Ita hatudu respeitu, karik neʼe bele book nia atu troka ninia hanoin. w23.09 p. 17 par. 12-13

Ita bele fiar metin katak Jeová sei uza ita no haraik bensaun ba ita maski uluk ita halo sala, naran katak ita troka ita-nia hahalok no kontinua sadere ba nia. (Prov 28:13) Sansão la perfeitu, no maski uluk nia halo sala tanba fiar liu ba Dalila, maibé nia la rende an atu serbí Jeová. No Jeová kontinua uza Sansão iha dalan neʼebé kmanek. Jeová nafatin haree nia nuʼudar mane fiar-naʼin no ninia naran temi hamutuk ho fiar-naʼin sira seluk iha Ebreu kapítulu 11. Ita sente kmaan tanba hatene katak ita serbí Aman domin nian neʼebé hakarak atu hametin ita, liuliu bainhira ita sente fraku! Entaun hanesan Sansão, mai ita harohan ba Jeová: “Favór ida hanoin-hetan haʼu, no favór ida fó forsa mai haʼu.”—Juís 16:28. w23.09 p. 7 par. 18-19

Tanba ita hatene katak Jeová nia loron besik ona, neʼe book ita atu hakaʼas an hodi fahe liafuan diʼak ba ema seluk. Maibé dala ruma iha situasaun balu ita dada an atu koʼalia kona-ba lia-loos. Tanbasá? Karik ba tempu balu ita taʼuk ba ema. Neʼe akontese ba Pedro. Iha kalan Jesus hetan tesi-lia, Pedro taʼuk no dehan katak nia laʼós Jesus nia dixípulu no nia nega Jesus dala tolu. (Mt 26:​69-75) Maibé ikusmai nia manán ninia sentimentu taʼuk no ho fiar metin nia hatete: “Keta taʼuk buat neʼebé ema seluk taʼuk, no keta laran-susar.” (1 Ped 3:14) Pedro nia liafuan neʼe hametin ita katak ita bele manán hasoru sentimentu taʼuk ba ema. Saida mak bele ajuda ita atu manán sentimentu taʼuk ba ema? Pedro hatete: “Rekoñese Kristu nuʼudar Naʼi neʼebé merese respeitu iha imi-nia laran.” (1 Ped 3:15) Ita bele medita kona-ba Jesus Kristu nia pozisaun no podér nuʼudar ita-nia Naʼi no Liurai. w23.09 p. 27-28 par. 6-8

Ita presiza kontinua hakaʼas an atu la halo “hahalok folin-laek neʼebé mai husi nakukun”. (Éf 5:11) Dala barak se ema ida hateke, rona, no koʼalia kona-ba buat neʼebé foʼer no la morál, neʼe halo fasil ba nia atu monu ba sala. (Gén 3:6; Tgo 1:​14, 15) Satanás nia mundu koko lohi ita hodi halo ita fiar katak Jeová nia matadalan kona-ba hahalok la morál mak la loos. (2 Ped 2:19) Diabu uza lasu neʼe ba tempu kleur ona atu halo ema la hatene saida mak loos no saida mak sala. (Isa 5:20; 2 Kor 4:4) Tan neʼe filme, programa televizaun, no website barak fó sai ideia neʼebé kontra Jeová nia matadalan neʼebé loos! Satanás hakarak ita atu hanoin katak hahalok sira neʼebé la moos no la morál neʼebé mundu simu mak la lori susar.—Éf 5:6. w24.03 p. 22 par. 8-10

Tenda santu mak fatin neʼebé ema Izraél halaʼo adorasaun no hasaʼe sakrifísiu ba Maromak. (Éx 29:​43-46) Ema Izraél lori tenda neʼe hamutuk ho sira kuandu muda husi fatin ida ba fatin seluk iha rai-fuik maran. Sira uza tenda neʼe maizumenus durante tinan 500 toʼo tempu neʼebé harii templu iha Jeruzalein. (Éx 25:​8, 9; Núm 9:22) Maibé, tenda santu mós reprezenta buat neʼebé atu mai neʼebé diʼak liu. Neʼe mak “lalatak husi buat neʼebé lalehan nian” no reprezenta Jeová nia templu espirituál. Apóstolu Paulo esplika katak tenda santu neʼe mak nuʼudar símbolu ba tempu agora. (Ebr 9:9) Entaun, iha tempu neʼebé Paulo hakerek ba ema Ebreu, templu espirituál sai ona realidade ba ema Kristaun. Templu espirituál hahú iha tinan 29 EC. Iha tempu neʼebá Jesus hetan batizmu, no hahú serbí nuʼudar “amlulik boot neʼebé aas liu” iha templu espirituál.—Ebr 4:14; Após 10:​37, 38. w23.10 p. 25-26 par. 6-7

Ita tenke fleksivel bainhira mosu situasaun susar atu nuneʼe ita bele kontinua serbí Jeová ho haksolok. Oinsá? Ita labele ulun-toos no presiza sai toman ho ita-nia situasaun foun no presiza respeitu ema seluk nia hanoin no desizaun. Nuʼudar Jeová nia atan sira, ita lakohi ulun-toos. Ita mós presiza hatudu haraik an no laran-sadiʼa. Bíblia bolu Jeová nuʼudar “Fatuk Boot” tanba ninia hahalok no desizaun sira mak metin. (Deut 32:4) Maski nuneʼe, nia mós la ulun-toos. Nuʼudar situasaun iha mundu troka, Jeová kontinua fleksivel atu bele kumpre ninia hakarak. Jeová kria ema tuir ninia ilas no iha abilidade atu adapta ho situasaun neʼebé troka. Iha Bíblia ita bele hetan prinsípiu neʼebé klaru atu ajuda ita halo desizaun neʼebé matenek bainhira ita hasoru susar. Jeová nia hahalok no prinsípiu iha Bíblia hatudu katak maski nia mak hanesan “Fatuk Boot”, maibé nia mós la ulun-toos. w23.07 p. 20 par. 1-3

Iha Bíblia, Jeová kompara ninian an hanesan ho inan ida neʼebé hadomi ninia oan. (Isa 66:​12, 13) Imajina toʼok inan ida neʼebé tau matan ba ninia oan no oan nia presiza hotu. Bainhira ita hasoru susar, ita bele fiar katak Jeová hadomi ita. Nia la para atu hadomi ita bainhira ita halo sala. (Sal 103:8) Nasaun Izraél halo Jeová laran-triste beibeik, maibé nia fó sai ninia domin ba sira neʼebé arrepende an, hodi hatete: “Haʼu haree ó hanesan buat folin-boot, ó hetan ona glória, no haʼu hadomi ona ó.” (Isa 43:​4, 5) Jeová nia domin nunka troka. Maski ita halo sala neʼebé sériu, bainhira ita arrepende an no fila fali ba Jeová, ita bele haree katak Jeová nafatin hadomi ita. Nia promete katak nia “sei fó perdua ho laran-luak”. (Isa 55:7) Bíblia hatete katak ita sei sente kmaan bainhira Jeová fó perdua ba ita.—Após 3:19. w24.01 p. 26-27 par. 4-5

Jeová bele ajuda ita bainhira hasoru situasaun susar. Porezemplu, bainhira ita husu lisensa ba patraun atu bele tuir reuniaun boot ka husu atu troka oráriu hodi nuneʼe ita bele tuir reuniaun sira, ita loke oportunidade atu haree oinsá Jeová ajuda ita. Karik ita sei hakfodak hodi haree oinsá nia ajuda ita. No rezultadu mak ita-nia fiar ba nia sei sai metin liután. Ho haraik an Ezras halo orasaun hodi husu Jeová nia ajuda. Bainhira nia hanoin barak kona-ba buat neʼebé nia presiza halo, nia ho haraik an halo orasaun ba Jeová. (Ezras 8:​21-23; 9:​3-5) Ezras nia hahalok neʼe book ema seluk atu apoia nia no banati-tuir ninia fiar. (Ezras 10:​1-4) Bainhira ita hanoin barak kona-ba ita-nia presiza fíziku ka tau matan ba família atu seguru nafatin, ita presiza halo orasaun ho fiar metin ba Jeová. w23.11 p. 18 par. 15-17

Jeová la dehan katak atu sai ema laran-loos ita tenke halo tuir buat hotu neʼebé Abraão halo. Tuir loloos, iha dalan oioin atu hatudu fiar liuhusi hahalok. Ita presiza fó benvindu ba ema foun iha kongregasaun, ajuda irmaun-irmán sira, no halo buat neʼebé diʼak iha família laran. Se ita halo nuneʼe, Maromak sei kontente no haraik bensaun mai ita. (Rom 15:7; 1 Tim 5:​4, 8; 1 João 3:18) Dalan importante liu atu hatudu fiar mak liuhusi haklaken ho laran-manas kona-ba liafuan diʼak. (1 Tim 4:16) Liuhusi ita-nia hahalok, ita bele hatudu katak ita tau fiar ba Jeová nia promesa sira no ninia dalan sira mak diʼak liu. Se ita halo nuneʼe, ita bele iha konfiansa katak Maromak sei haree ita nuʼudar ema laran-loos no bolu ita nuʼudar ninia belun. w23.12 p. 2 par. 3; p. 6 par. 15

Antes nia mate, Liurai David hatete ba Salomão liafuan sira neʼebé temi iha leten. (1 Reis 2:​1, 3) Mane Kristaun ohin loron presiza aplika matadalan neʼe. Atu bele halo nuneʼe, sira presiza aprende atu halo tuir Maromak nia ukun-fuan no aplika Bíblia nia prinsípiu iha sira-nia moris tomak. (Lc 2:52) Tanbasá importante ba irmaun joven sira atu sai ema Kristaun neʼebé maduru? Mane Kristaun iha knaar neʼebé importante iha família no kongregasaun. Se Ita mak irmaun joven ida, karik Ita hanoin ona kona-ba knaar sira neʼebé Ita bele hetan iha futuru. Karik Ita planu atu serbí Jeová tempu-tomak, serbí nuʼudar atan ba kongregasaun, no tuirmai katuas kongregasaun. Karik Ita mós hakarak kaben no iha oan. (Éf 6:4; 1 Tim 3:1) Atu bele kumpre planu sira-neʼe, Ita presiza sai ema Kristaun neʼebé maduru. w23.12 p. 24 par. 1-2

Katuas kongregasaun sira iha responsabilidade atu tau matan ba Jeová nia bibi neʼebé folin-boot. Sira agradese tanba Jeová fó fiar ba sira atu tau matan irmaun-irmán sira, no sira mós serbisu makaʼas nuʼudar “bibi-atan sira neʼebé . . . tau matan duni bibi sira ho didiʼak”. (Jer 23:4; 1 Ped 5:2) Ita hafolin tebes sira-nia serbisu! Katuas sira bele aprende husi Juís Gideão nia ezemplu. (Ebr 6:12) Nia sai hanesan bibi-atan neʼebé proteje Maromak nia bibi. (Juís 2:16; 1 Krón 17:6) Hanesan Gideão, Jeová fó knaar ba katuas sira atu tau matan ba ninia povu durante tempu susar. (Após 20:28; 2 Tim 3:1) Ita bele banati-tuir Gideão nia hahalok haraik an no halo tuir. Nia sente susar atu tahan bainhira halaʼo ninia knaar. Maski ita serbí nuʼudar katuas ka lae, ita bele aprende atu hafolin liután ita-nia katuas sira. Ita hakarak ajuda katuas sira neʼebé serbisu makaʼas.—Ebr 13:17. w23.06 p. 2 par. 1, 3