Marsu

Maski mundu foun seidauk mai, maibé hanoin kona-ba buat balu neʼebé ita bele haree agora, hanesan fitun sira, ai-hun sira, animál sira no mós ema. La iha ema ida mak duvida katak buat sira-neʼe eziste duni, maski loloos uluk buat sira-neʼe la iha. Buat sira-neʼe iha tanba Jeová mak kria. (Gén 1:​1, 26, 27) Maromak mós promete atu kria mundu foun. Nia sei kumpre promesa neʼe. Iha mundu foun, ema sei moris ba nafatin ho saúde neʼebé perfeitu. Ita bele fiar metin katak mundu foun sei mai tuir tempu neʼebé Maromak deside ona. (Isa 65:17; Apok 21:​3, 4) Nuʼudar Ita hein ba mundu foun, aproveita oportunidade hotu atu hametin Ita-nia fiar. Hametin Ita-nia fiar ba Jesus nia sakrifísiu. Hanoin kona-ba Jeová nia kbiit. Uza tempu atu halo atividade espirituál. Hodi halo nuneʼe, Ita bele sai parte ba ema “sira neʼebé simu buat neʼebé promete ona liuhusi sira-nia fiar no pasiénsia”.—Ebr 6:​11, 12. w23.04 p. 31 par. 18-19

Jesus foti matan ba lalehan no halo orasaun iha ema nia oin. Nia hakarak fó glória hotu ba Jeová kona-ba buat neʼebé akontese tuirmai. Jesus bolu ho lian makaʼas: “Lázaro, sai mai liʼur!” (João 11:43) Lázaro laʼo sai husi rate! Jesus halo buat neʼebé ema balu hanoin katak imposivel. Istória neʼe hametin ita-nia fiar kona-ba esperansa moris-hiʼas. Oinsá? Hanoin-hetan Jesus nia promesa ba Marta: “Ó-nia alin sei moris fali.” (João 11:23) Hanesan ninia Aman, Jesus iha hakarak no kbiit atu kumpre promesa neʼe. Ninia matan-been hatudu katak nia hakarak tebes atu halakon mate no halakon triste neʼebé ema sente tanba família mate. Bainhira Lázaro sai husi rate, neʼe hatudu katak Jesus iha duni kbiit atu fó moris-hiʼas ba ema. No mós hanoin kona-ba Jesus nia liafuan ba Marta neʼebé temi iha eskritura ba ohin. Ita iha razaun diʼak oioin atu fiar katak Maromak nia promesa kona-ba moris-hiʼas sei sai loos. w23.04 p. 11-12 par. 15-16

Dala ruma ita presiza troka buat neʼebé ita temi iha ita-nia orasaun nuʼudar ita komprende diʼak liután Jeová nia hakarak. Ita tenke hanoin-hetan kona-ba Jeová nia hakarak no nia sei kumpre ida-neʼe tuir tempu neʼebé nia deside ona. Neʼe inklui halakon buat hotu neʼebé hamosu terus ohin loron, hanesan dezastre naturais, moras no mate. Jeová sei halo ida-neʼe liuhusi ninia Ukun. (Dan 2:44; Apok 21:​3, 4) Maibé antes toʼo tempu neʼe, Jeová sei husik Satanás ukun mundu neʼe. (João 12:31; Apok 12:9) Se Jeová rezolve kedas ema nia problema agora, neʼe sei haree hanesan Satanás ukun mundu neʼe ho susesu. Tan neʼe, maski ita tenke hein ba Jeová atu kumpre ninia promesa sira, neʼe la dehan katak nia husik ita no la ajuda ita. Jeová sei ajuda ita. w23.05 p. 8 par. 4; p. 9-10 par. 7-8

Oinsá ita bele ajuda ema seluk atu hetan benefísiu husi Memoriál? Hakat primeiru mak hodi konvida sira. Ita bele konvida ema neʼebé ita hasoru iha haklaken-fatin no mós halo lista kona-ba ema seluk tan neʼebé ita hakarak konvida. Neʼe inklui ita-nia família, kolega eskola, kolega serbisu, no ema seluk. Maski ita la iha konvite surat-tahan neʼebé natoon, ita bele fahe link liuhusi sasán eletróniku. Karik ita sei hakfodak hodi haree ema barak mak asiste! (Ecle 11:6) Hanoin-hetan katak ema neʼebé ita konvida karik sei husu pergunta, liuliu se sira nunka tuir ita-nia reuniaun. Ita bele hanoin nanis kona-ba pergunta saida mak karik sira sei husu, no prepara oinsá atu hatán. Maski asiste tiha Memoriál, ema foun sei iha pergunta seluk tan atu husu. Antes, durante, no depois Memoriál, ita hakarak hakaʼas an ajuda sira neʼebé “prontu atu simu lia-loos” atu hetan benefísiu husi Memoriál.—Após 13:48. w24.01 p. 12 par. 13, 15; p. 13 par. 16

Bíblia fó sai istória ualu kona-ba moris-hiʼas iha rai. Diʼak se Ita estuda istória ida-idak. Bainhira Ita halo nuneʼe, hanoin kona-ba lisaun neʼebé Ita bele aprende. Hanoin mós kona-ba oinsá ezemplu ida-idak hatudu katak Maromak hakarak no iha kbiit atu fó moris-hiʼas ba ema. No importante liu mak hanoin kona-ba Jesus nia moris-hiʼas tanba neʼe mak moris-hiʼas neʼebé importante liu hotu. Hanoin-hetan katak ema atus ba atus mak sai sasin ba moris-hiʼas neʼe no neʼe mak evidénsia forte neʼebé hametin ita-nia fiar. (1 Kor 15:​3-6, 20-22) Ita agradese tebes tanba Jeová promete atu fó moris-hiʼas ba ema! Ita bele fiar metin katak promesa neʼe sei sai loos tanba Jeová hakarak no iha kbiit atu kumpre ida-neʼe. Mai ita deside metin atu kontinua hametin ita-nia fiar ba esperansa furak neʼe. Hodi halo nuneʼe, ita sei hakbesik liután ba Maromak neʼebé promete ba ita ida-idak, ‘Ema neʼebé imi hadomi sei moris fali!’—João 11:23. w23.04 p. 8 par. 2; p. 12 par. 17; p. 13 par. 20

Ita hatudu katak ita haraik an bainhira ita iha hanoin neʼebé loos kona-ba ita-nia an no rekoñese ita-nia limitasaun, no mós hatudu respeitu ba ema seluk no haree sira importante liu fali ita. (Flp 2:3) Gideão mak mane neʼebé haraik an. Bainhira Jeová nia anju fó-hatene Gideão katak Jeová hili nia atu salva povu Izraél husi ema Midian neʼebé forsa boot, mane haraik an neʼe dehan: “Haʼu-nia umakain mak kiʼik liu iha Manasés, no haʼu mak ema neʼebé la importante liu iha haʼu-nia aman nia umakain.” (Juís 6:15) Nia sente katak nia labele kumpre knaar neʼe, maibé Jeová hatene katak nia bele halo ida-neʼe. Ho Jeová nia ajuda, Gideão kumpre ninia knaar ho susesu. Katuas sira hakaʼas an atu hatudu haraik an iha buat hotu. (Após 20:​18, 19) Sira la gaba an kona-ba sira-nia abilidade ka buat neʼebé sira kumpre. Sira mós la hanoin katak sira folin-laek tanba sala balu neʼebé sira halo. w23.06 p. 3 par. 4-5

Tempu atu harahun Satanás nia ulun sei akontese kuandu Kristu nia Ukun ba Tinan Rihun Ida liutiha. (Apok 20:​7-10) Maibé antes neʼe, Bíblia fó sai nanis kona-ba akontesimentu balu. Primeiru, nasaun sira sei deklara “dame no hakmatek!” (1 Tes 5:​2, 3) “Derrepente deʼit” terus boot sei hahú kuandu nasaun sira ataka relijiaun falsu. (Apok 17:16) Tuirmai, Jesus sei tesi-lia ba ema, no haketak bibi-malae husi bibi-timur. (Mt 25:​31-33, 46) Durante tempu neʼe, Satanás sei kontinua kontra Jeová. Tanba nia odi tebes Maromak nia povu, nia sei book grupu nasaun sira neʼebé Bíblia bolu nuʼudar Gog husi rai-Magog atu ataka Jeová nia povu. (Eze 38:​2, 10, 11) Iha tempu sira-neʼe, Kristu nia alin sira neʼebé sei moris iha rai sei saʼe ba lalehan atu hamutuk ho Kristu hodi halo funu Armagedon. Armagedon mak parte ikus husi terus boot. (Mt 24:31; Apok 16:​14, 16) Tuirmai, Kristu nia Ukun ba Tinan Rihun Ida sei hahú ukun mundu.—Apok 20:6. w23.10 p. 20-21 par. 9-10

Ohin loron, Jeová nia atan barak adora Jeová iha rai sira neʼebé bandu serbisu haklaken. Sira hatudu respeitu ba ukun-naʼin sira, maibé hanesan Obadias, sira laran-metin deʼit ba Jeová. (Mt 22:21) Sira hatudu katak sira hamtaʼuk Maromak hodi halo tuir deʼit nia duké ema. (Após 5:29) Sira kontinua haklaken no halaʼo reuniaun subasubar. (Mt 10:​16, 28) Sira hakarak irmaun-irmán sira hetan hahán espirituál neʼebé sira presiza. Hanoin toʼok ezemplu husi irmaun Henri. Nia hela iha rai ida iha Áfrika neʼebé bandu serbisu haklaken. Durante tempu neʼe, nia ajuda fahe ita-nia publikasaun sira ba irmaun-irmán sira. Nia hatete: “Haʼu mak moedór, maibé . . . Jeová halo haʼu aten-brani.” Ita bele hatudu aten-brani hanesan irmaun Henri ka lae? Bele duni se ita hamtaʼuk ba Jeová. w23.06 p. 16 par. 9, 11

Bainhira Adão no Eva kontra, haree hanesan Satanás hanetik Maromak nia hakarak kona-ba halo mundu nakonu ho ema neʼebé perfeitu no laran-metin. Karik Satanás hanoin katak Jeová la iha opsaun barak atu kumpre ninia hakarak. Opsaun ida mak atu halakon tiha Adão no Eva, no kria kaben-naʼin foun atu bele kumpre ninia hakarak ba ema. Maibé se Maromak halo ida-neʼe, Diabu bele duun katak Maromak bosok-teen. Tanbasá? Tanba iha Génesis 1:​28, Jeová fó-hatene ba Adão no Eva katak sira-nia bei-oan mak sei halo nakonu mundu. Ka karik Satanás hanoin katak Jeová sei husik Adão no Eva atu iha oan no sai barak maibé sira nunka bele sai perfeitu. (Ecle 7:20; Rom 3:23) Se Adão no Eva nia oan no bei-oan sira labele sai perfeitu, Diabu bele duun katak Jeová labele kumpre ninia hakarak, no mundu Paraízu labele nakonu ho ema neʼebé perfeitu no laran-metin. w23.11 p. 6 par. 15-16

Jeová fó ita matadalan neʼebé klaru liuhusi ninia Liafuan no organizasaun. Ita la presiza aumenta tan ukun-fuan ruma. (Prov 3:​5-7) Tan neʼe, ita lakohi halo liu fali buat neʼebé hakerek tiha ona iha Bíblia ka halo lei ba maluk fiar-naʼin kona-ba buat neʼebé sira ida-idak bele deside rasik. Satanás uza hanorin bosok no mós “mundu nia hanoin” atu lohi no haketak ema. (Kol 2:8) Iha apóstolu sira-nia tempu, buat sira-neʼe inklui ema Judeu nia hanorin neʼebé la tuir eskritura, filozofia neʼebé bazeia ba ema nia matenek, no mós hanorin neʼebé dehan katak ema Kristaun tenke halo tuir Moisés nia Ukun-Fuan. Hanorin sira-neʼe lohi ema tanba neʼe la ajuda ema atu tau fokus ba Jeová, Hun ba matenek hotu. Ohin loron, Satanás uza televizaun, rádiu, jornál no média sosiál atu habelar informasaun no mós notísias falsu neʼebé ulun-naʼin polítiku sira fó sai. w23.07 p. 16 par. 11-12

Satanás nunka imajina buat neʼebé Jeová sei halo. Jeová iha solusaun neʼebé diʼak liu atu kumpre ninia hakarak maski Satanás, Adão no Eva kontra. Jeová husik Adão no Eva atu iha oan, no liuhusi dalan neʼe mak Jeová nia liafuan sai loos, no hatudu katak nia laʼós bosok-teen. Jeová hatudu katak se nia hakarak halo buat ruma, la iha ida mak bele hapara. Nia kontinua kumpre ninia hakarak hodi fó “bei-oan” ida neʼebé sei salva Adão no Eva nia bei-oan sira neʼebé laran-metin. (Gén 3:15; 22:18) Bei-oan neʼe sei fó ninia moris nuʼudar sakrifísiu atu salva ema. Karik Satanás nunka imajina kona-ba solusaun neʼe. Tanbasá? Tanba arranju neʼe bazeia ba domin neʼebé la hanoin an deʼit. (Mt 20:28; João 3:16) Satanás la iha hahalok neʼe, nia hanoin an deʼit. Arranju neʼe sei kumpre saida? Iha Kristu nia Ukun ba Tinan Rihun Ida nia rohan, Adão no Eva nia bei-oan sira neʼebé perfeitu no laran-metin sei moris iha mundu paraízu, hanesan buat neʼebé Jeová hakarak. w23.11 p. 6 par. 17

Ita halo tuir Jeová nia ukun-fuan kona-ba haree raan no moris nuʼudar buat neʼebé sagradu. Tanbasá? Tanba Jeová hatete katak raan reprezenta moris no moris mak prezente folin-boot husi Jeová. (Lev 17:14) Bainhira Jeová fó lisensa ba ema atu han naʼan, nia fó mandamentu atu sira labele han raan. (Gén 9:4) Nia temi fali mandamentu neʼe bainhira nia fó Ukun-Fuan ba ema Izraél. (Lev 17:10) No nia mós dirije grupu administradór iha apóstolu sira-nia tempu atu fó matadalan ba ema Kristaun hotu atu “kontinua hasees an . . . husi raan”. (Após 15:​28, 29) Tan neʼe, ita hakarak halo tuir mandamentu neʼe ho laran-metin bainhira ita halo desizaun kona-ba tratamentu médiku ruma. Ita mós halo tuir didiʼak Bíblia nia matadalan kona-ba morál. Apóstolu Paulo fó konsellu atu “hamate hakarak isin nian”, neʼe katak ita presiza hakaʼas an atu halakon tiha hakarak neʼebé sala. Ita lakohi halo ka haree buat neʼebé bele book ita atu halo sala seksuál.—Kol 3:5; Job 31:1. w23.07 p. 15 par. 5-6

Karik Sansão hadomi tebes Dalila, tan neʼe nia la rekoñese Dalila nia planu neʼebé aat. Dalila husu beibeik Sansão atu fó sai saida mak halo nia forsa, no ikusmai Sansão fó-hatene ba nia. Triste mak Sansão nia sala halo nia lakon ninia forsa no estraga ninia relasaun ho Jeová ba tempu balu. (Juís 16:​16-20) Sansão simu konsekuénsia neʼebé aat tebes tanba nia fiar liu Dalila duké Jeová. Ema Filístia kaer Sansão no losu sai ninia matan rua. Sira hatama nia ba komarka iha Gaza, no agora nia halo serbisu atu dulas trigu iha komarka laran. Tuirmai ema Filístia hamoe nia iha sira-nia selebrasaun ida. Sira hasaʼe sakrifísiu ba maromak falsu Dagon tanba sira fiar katak maromak neʼe ajuda sira atu kaer Sansão. Sira lori Sansão husi komarka ba iha selebrasaun neʼe “atu bele goza nia”.—Juís 16:​21-25. w23.09 p. 5 par. 13-14

Karik kolega serbisu ka kolega eskola husu tanbasá ita moris tuir Bíblia nia matadalan. Ita presiza hakaʼas an atu defende ita-nia fiar ho respeitu. (1 Ped 3:15) Duké hanoin katak nia husu pergunta neʼe tanba hakarak atu kritika ita, diʼak liu atu haree ninia pergunta nuʼudar oportunidade atu bele hatene kona-ba buat neʼebé importante ba nia. Maski iha razaun oioin tanbasá ema husu pergunta, ita presiza hatán ho laran-maus no laran-diʼak. Dalan neʼebé ita hatán bele book nia atu troka ninia hanoin. Porezemplu, karik ita-nia kolega serbisu husu ita tanbasá ita la selebra tinan. Karik nia hanoin katak Testemuña ba Jeová labele tuir festa sira. Ita bele gaba nia tanba nia hanoin ema seluk. Dala ruma neʼe bele loke oportunidade mai ita atu koʼalia hamutuk husi Bíblia kona-ba selebra tinan. w23.09 p. 17 par. 10-11

Ita iha priviléjiu furak atu kontinua haklaken ba ema iha mundu tomak nuʼudar ita hela iha tempu neʼe nia rohan. Apóstolu Pedro anima ita atu “hanoin-hetan nafatin kona-ba Jeová nia loron”. (2 Ped 3:​11, 12) Oinsá? Loroloron ita bele medita kona-ba bensaun neʼebé ita sei hetan iha mundu foun. Imajina toʼok kona-ba anin neʼebé fresku, ita han ai-han neʼebé saudavel, fó benvindu ba ema neʼebé moris hiʼas, no hanorin ema neʼebé moris iha tempu uluk kona-ba oinsá mak Bíblia nia profesia sai loos. Medita kona-ba buat sira-neʼe sei ajuda ita hanoin-hetan nafatin kona-ba Jeová nia loron no fiar metin katak ita moris iha loron ikus sira. Hodi “hatene nanis ona” kona-ba ita-nia futuru, mestre falsu sira “sei la lori lakon” ita. w23.09 p. 27 par. 5-6

Ohin loron oan barak “la halo tuir inan-aman”. (2 Tim 3:​1, 2) Tanbasá? Oan balu sente katak sira-nia inan-aman laran-makerek. Inan-aman balu haruka sira-nia oan atu halo buat neʼebé sira rasik la halo. Oan balu haree matadalan neʼebé inan-aman fó mak buat neʼebé tuan liu, la ajuda, ka halo sira la sente livre. Se Ita mak oan, dala ruma Ita mós sente hanesan neʼe? Oan barak sente susar atu halo tuir Jeová nia matadalan neʼebé hakerek iha eskritura ba ohin. Saida mak bele ajuda Ita atu halo nuneʼe? Ita bele aprende atu halo tuir liuhusi Jesus nia ezemplu. (1 Ped 2:​21-24) Nia mak ema perfeitu, maibé ninia inan-aman la perfeitu. Jesus respeitu ninia inan-aman maski dala ruma sira halo sala ka la komprende nia.—Éx 20:12. w23.10 p. 7 par. 4-5

Apóstolu Paulo esplika katak sakrifísiu neʼebé ema hasaʼe tuir Moisés nia Ukun-Fuan labele hamoos sira-nia sala iha dalan neʼebé kompletu. Tan neʼe mak Moisés nia Ukun-Fuan “hasai tiha”. Tuirmai, Paulo hanorin sira kona-ba lia-loos neʼebé kleʼan. Nia hanorin sira kona-ba “esperansa diʼak liu” neʼebé bazeia ba Jesus nia sakrifísiu no bele ajuda sira atu “hakbesik ba Maromak”. (Ebr 7:19) Paulo esplika ba ema Kristaun sira-neʼe katak sira-nia adorasaun ba Jeová mak diʼak liu fali adorasaun neʼebé uluk sira halo kuandu sai parte ba relijiaun Judeu nian. Dalan neʼebé ema Judeu halaʼo adorasaun mak nuʼudar “lalatak husi buat sira neʼebé atu mai, maibé buat neʼebé realidade mak Kristu”. (Kol 2:17) Baibain ema nia lalatak la hatudu klaru kona-ba ema neʼe. Nuneʼe mós dalan neʼebé ema Judeu adora Jeová iha tempu uluk mak hanesan lalatak deʼit, tanba tuirmai sei iha dalan neʼebé diʼak liu atu halaʼo adorasaun ba Jeová. Ita presiza komprende didiʼak oinsá Jeová halo arranju atu ita bele hetan perdua ba ita-nia sala, hodi nuneʼe ita bele adora nia iha dalan neʼebé nia simu. w23.10 p. 25 par. 4-5

Daniel kapítulu 11 koʼalia kona-ba liurai rua, ka governu rua neʼebé kompete malu. Hodi kompara profesia neʼe ho profesia seluk husi Bíblia, ita bele hatene katak “liurai norte” mak Rúsia no nasaun neʼebé apoia nia no “liurai súl” mak Bretaña ho Amérika. Maromak nia povu neʼebé moris iha “liurai norte” nia ukun okos hasoru susar husi liurai neʼe. Testemuña balu hetan baku no tama komarka tanba sira-nia fiar. Susar neʼebé sira hetan husi “liurai norte” hametin liután sira-nia fiar. Tanbasá? Tanba sira hatene katak susar sira-neʼe kumpre profesia iha livru Daniel. (Dan 11:41) Hodi hatene kona-ba neʼe bele ajuda ita atu nafatin kaer metin ba ita-nia esperansa no laran-metin nafatin ba Jeová. w23.08 p. 11 par. 15-16

Tanba Jeová hadomi ita, nia hanoin kona-ba ita-nia sentimentu no hakarak tebes atu proteje ita. Nia sente triste bainhira ita triste. Tan neʼe ita bele fiar katak nia sei hatán ba ita bainhira ita hatete: “Proteje haʼu hanesan proteje Ita-nia matan-fuan.” (Sal 17:8) Ema nia matan mak sensitivu no parte neʼebé folin-boot husi ema nia isin. Tan neʼe bainhira Jeová kompara ita ho ninia matan, neʼe hanesan nia hatete: ‘Ema naran deʼit neʼebé halo aat ba imi, haʼu-nia povu, halo aat ba buat neʼebé folin-boot ba haʼu.’ Jeová hakarak ita atu fiar metin katak nia hadomi ita ida-idak. Maibé nia hatene katak situasaun neʼebé uluk ita hasoru bele halo ita duvida kona-ba ninia domin. Ka karik ita hasoru daudaun susar neʼebé koko ita-nia fiar ba Jeová nia domin. Saida mak bele hametin ita-nia fiar? Neʼe mak hodi aprende oinsá Jeová hatudu domin ba Jesus, ba ema neʼebé iha esperansa atu bá lalehan, no ba ita hotu. w24.01 p. 27 par. 6-7

Ezras haree ona oinsá Jeová apoia ninia povu iha tempu susar. Tinan barak antes neʼe, iha tinan 484 AEC, karik Ezras hela iha Babilónia bainhira Liurai Assuero halo lei atu oho ema Judeu neʼebé hela iha Pérsia nia ukun. (Ester 3:​7, 13-15) Ezras nia moris iha perigu laran! Rona tiha kona-ba lei neʼe, ema Judeu “iha provínsia hotu” triste tebes, tan neʼe sira halo jejún no tanis no mós halo orasaun ba Jeová atu husu ajuda. (Ester 4:3) Imajina toʼok buat neʼebé Ezras no ema Judeu sente bainhira inimigu neʼebé hakarak oho sira mate tiha! (Ester 9:​1, 2) Buat neʼebé akontese durante tempu neʼebá prepara Ezras ba tempu susar neʼebé sei akontese tuirmai, no hametin ninia fiar katak Jeová bele proteje Ninia povu. w23.11 p. 17 par. 12-13

Apóstolu Paulo temi kona-ba halo tuir Moisés nia Ukun-Fuan neʼebé Maromak fó ba ema Izraél iha Foho Sinai. (Rom 3:​21, 28) Maibé, ema Kristaun Judeu balu iha Paulo nia tempu fiar katak sira presiza nafatin halo tuir Moisés nia Ukun-Fuan. Tan neʼe, Paulo uza Abraão nia ezemplu atu prova katak ema la presiza halo tuir Ukun-Fuan atu bele sai laran-loos. Maibé Paulo esplika katak ita presiza iha fiar. Neʼe hametin duni ita tanba neʼe hanorin ita katak se ita hatudu fiar ba Maromak no Kristu, Maromak sei simu ita. Maibé, “hahalok” neʼebé temi iha Tiago kapítulu 2 la hanesan ho hahalok neʼebé Paulo temi. Tiago refere ba hahalok ka atividade neʼebé ema Kristaun halo iha moris loroloron nian. (Tgo 2:24) Hahalok sira-neʼe hatudu sai se ema Kristaun iha fiar neʼebé metin ba Maromak ka lae. w23.12 p. 3 par. 8; p. 4-5 par. 10-11

Irmán sira neʼebé hanoin atu kaben, presiza hili Ita-nia pár ho didiʼak. Hanoin-hetan, Ita presiza hakruʼuk ba mane neʼebé Ita hili atu kaben. (Rom 7:2; Éf 5:33) Tan neʼe husu ba Ita-nia an: ‘Nia mak ema Kristaun neʼebé maduru ka lae? Nia tau uluk buat espirituál ka lae? Nia halo desizaun ho matenek ka lae? Nia prontu atu rekoñese ninia sala ka lae? Nia hatudu respeitu ba feto ka lae? Nia bele tau matan ba haʼu iha dalan espirituál, fíziku, no emosaun ka lae? Klaru katak, se Ita hakarak hetan laʼen neʼebé diʼak, Ita presiza prepara atu sai feen neʼebé diʼak. Feen neʼebé diʼak mak “ajuda-naʼin” ba ninia laʼen no “halo nia sai kompletu”. (Gén 2:​18, nota) No tanba feen hadomi Jeová, feen sei hakaʼas an ajuda ema seluk atu haree laʼen nia hahalok diʼak. (Prov 31:​11, 12; 1 Tim 3:11) Ita bele prepara agora atu sai feen neʼebé diʼak hodi hametin Ita-nia domin ba Jeová no ajuda ema seluk iha família no kongregasaun. w23.12 p. 22-23 par. 18-19

Jeová promete atu fó matenek neʼebé ita presiza atu halo desizaun diʼak. Ita presiza Jeová nia matenek liuliu bainhira halo desizaun boot neʼebé bele afeta ita-nia moris tomak. Nia mós fó ita kbiit atu tahan. Hanesan buat neʼebé Jeová halo ba apóstolu Paulo, Jeová sei fó ita kbiit neʼebé ita presiza atu tahan hasoru ita-nia susar. (Flp 4:13) Dalan ida neʼebé nia fó ajuda mak liuhusi ita-nia família espirituál. Kalan antes Jesus fó ninia moris nuʼudar sakrifísiu, nia halo orasaun makaʼas ba Jeová. Nia harohan ba Jeová atu la husik ema seluk hanoin katak nia hatete aat Maromak. Maibé duké halo nuneʼe, Jeová haruka anju ida atu hametin Jesus. (Lc 22:​42, 43) Karik Jeová mós ajuda ita liuhusi irmaun-irmán sira neʼebé telefone ita ka vizita ita. Ita hotu bele buka oportunidade atu oferese “liafuan neʼebé diʼak” ba maluk fiar-naʼin sira.—Prov 12:25. w23.05 p. 10-11 par. 9-11

Sira neʼebé la ativu ona neʼebé mai tuir Memoriál karik sente taʼuk irmaun-irmán sei la simu sira. Tan neʼe keta husu pergunta neʼebé bele hamoe sira ka koʼalia buat neʼebé hakanek sira-nia laran. Irmaun-irmán sira-neʼe mak ita-nia maluk fiar-naʼin. Ita kontente atu adora Jeová hamutuk fali ho sira! (Sal 119:176; Após 20:35) Ita agradese tebes katak Jesus husu ita atu komemora ninia mate kada tinan, no ita komprende tanbasá ida-neʼe importante tebes. Bainhira ita halo nuneʼe, neʼe sei lori benefísiu oioin ba ita-nia an no ema seluk. (Isa 48:​17, 18) Ita-nia domin ba Jeová no Jesus sai buras liután. Ita hatudu katak ita hafolin tebes buat neʼebé sira halo ona mai ita. Ita hametin ita-nia relasaun ho irmaun-irmán sira. No ita sei ajuda ema seluk atu aprende oinsá sira mós bele hetan bensaun liuhusi Jesus nia sakrifísiu. Mai ita hotu hakaʼas an atu prepara ba Memoriál tinan neʼe, loron neʼebé importante tebes! w24.01 p. 14 par. 18-19

Oinsá mak Jeová dirije ita? Primeiru, liuhusi ninia Liafuan Bíblia. Nia mós uza ema atu dirije ita. Porezemplu, nia uza “atan laran-metin no matenek” atu prepara ai-han espirituál hodi ajuda ita halo desizaun neʼebé matenek. (Mt 24:45) Jeová mós uza mane seluk neʼebé iha abilidade atu dirije ita. Porezemplu, katuas área no katuas kongregasaun sira fó matadalan no mós anima atu bele ajuda ita tahan hasoru susar. Ita agradese tebes tanba Jeová dirije ita iha dalan neʼebé diʼak durante loron ikus sira-neʼe! Neʼe ajuda ita atu nafatin iha relasaun diʼak ho Jeová no kontinua laʼo iha dalan ba moris. Maski nuneʼe, dala ruma susar ba ita atu halo tuir Jeová nia matadalan, liuliu se ita simu ida-neʼe liuhusi ema neʼebé la perfeitu. Iha situasaun hanesan neʼe, ita presiza tau fiar katak Jeová mak dirije ninia povu no se ita halo tuir ninia matadalan, ita sei hetan benefísiu. w24.02 p. 20 par. 2-3

Ita bele haburas domin ba Jeová liuhusi estuda Bíblia beibeik. Bainhira Ita lee Bíblia, koko atu buka-hatene buat neʼebé eskritura sira hanorin mai Ita kona-ba Jeová. Husu ba Ita-nia an: ‘Oinsá mak istória neʼe hatudu katak Jeová hadomi haʼu? Oinsá mak ida-neʼe ajuda haʼu atu hadomi Jeová?’ Dalan seluk atu haburas domin ba Jeová mak liuhusi halo orasaun ba nia loroloron no fakar sai ita-nia sentimentu ba nia. (Sal 25:​4, 5) Jeová sei hatán ita-nia orasaun. (1 João 3:​21, 22) Ita mós presiza haburas domin ba ema seluk. Depois apóstolu Paulo sai ema Kristaun, nia hasoru joven ida naran Timóteo. Timóteo hadomi Jeová no hadomi ema seluk. Paulo hatete ba ema Kristaun iha Filipe: “Haʼu la hetan ema seluk neʼebé iha hahalok hanesan [Timóteo], no nia sei tau matan ba imi ho laran.” (Flp 2:20) Paulo koʼalia kona-ba Timóteo nia domin ba irmaun-irmán sira. Klaru katak irmaun-irmán sira hein namanas atu Timóteo vizita sira-nia kongregasaun.—1 Kor 4:17. w23.07 p. 9 par. 7-10

Moisés mate antes ema Izraél tama ba Rai neʼebé Maromak Promete. Kuandu Moisés mate tiha, Jeová para atu ajuda ninia povu ka lae? Lae. Durante sira hatudu laran-metin ba Jeová, nia nafatin ajuda sira. Antes Moisés mate, Jeová haruka Moisés atu hili Josué dirije povu Izraél. Moisés treinu ona Josué ba tinan barak. (Éx 33:11; Deut 34:9) No mós iha ona mane barak neʼebé iha abilidade atu dirije povu, xefe ba ema naʼin-1.000, xefe ba ema naʼin-100, xefe ba ema naʼin-50, no naʼin-10. (Deut 1:15) Maromak tau matan ba ninia povu ho didiʼak. Nuneʼe mós iha Elias nia tempu. Durante tinan barak, nia ajuda povu Izraél atu halaʼo adorasaun neʼebé loos. Maibé tuirmai Jeová fó knaar ba nia atu serbí iha Judá. (2 Reis 2:1; 2 Krón 21:12) Neʼe katak Jeová la tau matan tan ba Izraél nia suku sanulu ka lae? Lae. Elias treinu ona Eliseu ba tinan barak. Jeová kontinua kumpre ninia hakarak no nia tau matan ba ninia atan sira neʼebé laran-metin. w24.02 p. 5 par. 12

Ema Kristaun iha Éfeso moris tuir Jeová nia matadalan neʼebé hanesan naroman neʼebé dirije sira. (Sal 119:105) Ema Éfeso sira-neʼe husik ona relijiaun falsu no la halo tan hahalok la morál. Sira “halo tuir Maromak” no halo buat neʼebé sira bele atu adora Maromak no halo nia kontente. (Éf 5:1) Nuneʼe mós ho ita, antes aprende lia-loos, ita mós iha nakukun laran tanba relijiaun falsu no hahalok la morál. Ita balu selebra relijiaun falsu nia loron-boot sira, no balu tan uluk halo hahalok la morál. Maibé kuandu ita aprende tiha kona-ba Jeová nia matadalan sira kona-ba saida mak loos no sala, ita halo mudansa. Ita komesa moris tuir Maromak nia hakarak. No rezultadu mak ita hetan benefísiu oioin. (Isa 48:17) Maibé dala ruma la fasil atu hasees an nafatin husi nakukun neʼebé ita husik ona no “kontinua laʼo nuʼudar naroman nia oan sira”. w24.03 p. 21-22 par. 6-7

Karik Ita sente katak Ita seidauk prontu atu dedika an no hetan batizmu. Karik Ita presiza halo mudansa balu iha Ita-nia moris atu bele moris tuir Jeová nia matadalan, ka karik Ita presiza tan tempu atu hametin Ita-nia fiar. (Kol 2:​6, 7) Estudante Bíblia ida-idak laʼo ba oin iha dalan neʼebé la hanesan, no laʼós joven hotu mak prontu atu dedika an no hetan batizmu ho idade neʼebé hanesan. Tan neʼe labele kompara Ita-nia an ho ema seluk, maibé koko buka-hatene mudansa saida mak Ita presiza halo no tuirmai halo buat neʼebé Ita bele tuir Ita-nia kbiit. (Gal 6:​4, 5) Se Ita rekoñese katak Ita seidauk prontu atu dedika an ba Jeová, diʼak atu kontinua halo planu hodi bele kumpre ida-neʼe. Halo orasaun hodi husu Jeová atu ajuda Ita halo mudansa neʼebé Ita presiza halo. (Flp 2:13) Ita bele fiar katak nia sei rona no hatán ba Ita-nia orasaun.—1 João 5:14. w24.03 p. 5 par. 9-10

Loron ida, Sara estrese tebes, no nia fakar sai ninia sentimentu ba Abraão, no mós duun nia. Abraão hatene katak Sara sempre hakruʼuk no apoia nia. Abraão rona ba Sara no koko atu rezolve situasaun neʼe. (Gén 16:​5, 6) Ita bele aprende saida? Maski laʼen sira iha podér atu halo desizaun ba família, maibé sira hatudu domin hodi rona didiʼak sira-nia feen nia opiniaun antes halo desizaun, liuliu se desizaun neʼe afeta sira-nia feen. (1 Kor 11:3; 13:​4, 5) Tempu seluk, Abraão deside atu hatudu laran-luak ba bainaka neʼebé mai derrepente. Abraão husu Sara atu para halo buat neʼebé nia halo daudaun no bá prepara paun barak. (Gén 18:6) Sara halo tuir kedas no apoia Abraão nia desizaun. Feen sira bele banati-tuir Sara hodi apoia sira-nia laʼen nia desizaun. Feen sira, bainhira imi halo nuneʼe, imi sei hametin imi-nia relasaun kaben nian.—1 Ped 3:​5, 6. w23.05 p. 24-25 par. 16-17

Bainhira Gideão sai juís, nia presiza halo tuir no hatudu aten-brani iha situasaun oioin. Porezemplu, Maromak fó nia knaar neʼebé perigozu, neʼe mak atu harahun Baal nia altár neʼebé ninia aman harii. (Juís 6:​25, 26) Tuirmai, bainhira nia halibur tiha tropa sira, dala rua Jeová haruka nia atu hamenus ninia tropa. (Juís 7:​2-7) Ikusmai, Maromak haruka nia atu asalta tropa inimigu iha kalan-boot. (Juís 7:​9-11) Katuas sira tenke “prontu atu halo tuir”. Sira prontu atu halo tuir buat neʼebé Eskritura hatete no mós matadalan husi Maromak nia organizasaun. Hodi halo nuneʼe, sira hatudu ezemplu kapás ba ema seluk. Maski nuneʼe, dala ruma susar ba katuas ida atu halo tuir matadalan. Porezemplu, karik nia hetan beibeik matadalan foun no nia sente susar atu aplika ida-neʼe. Iha situasaun balu, karik nia duvida se matadalan neʼe mak diʼak no matenek. Ka karik organizasaun husu nia atu halo knaar ida neʼebé bele halo autoridade sira kaer nia. Oinsá katuas sira bele banati-tuir Gideão hodi prontu halo tuir matadalan iha situasaun sira-neʼe? Rona didiʼak ba matadalan no aplika ida-neʼe. w23.06 p. 4-5 par. 9-11