Satanás nia dalan atu ukun sei la sai diʼak
“Ba ema aat, la iha buat ida neʼebé sei sai diʼak.”—ECLE 8:13.
1. Tanbasá mak tesi-lia ba ema aat halo ema sente kmaan?
LAKLEUR tan Maromak sei tesi lia ba ema aat hotu. Sira tenke hatán ba buat aat neʼebé sira halo ona. (Prov 5:22; Ecle 8:12, 13) Ida-neʼe halo ema sente kmaan, liuliu ba sira neʼebé hadomi justisa no sira neʼebé terus tanba buat neʼebé la loos ka tanba hetan terus iha ema aat nia liman. Ida neʼebé ulukliu atu hetan tesi-lia mak buat aat hotu nia aman, neʼe mak Diabu Satanás.—Joao 8:44.
2. Tanbasá mak presiza tempu atu rezolve problema neʼebé mosu iha jardín Eden?
2 Tanba Satanás hanoin demais kona-ba nia an, nia book ema iha jardín Eden atu la simu Maromak Jeová nia ukun. Hodi halo nuneʼe, ita-nia inan-aman primeiru hili atu apoia Satanás atu kontra Maromak Jeová nia direitu atu ukun, nuneʼe sira sai ema sala-naʼin iha Maromak nia oin. (Rom 5:12-14) Tuir loloos, Maromak hatene buat neʼebé sei mosu ba sira se sira la hatudu respeitu no la halo tuir nia. Maibé, Maromak nia kriatura hotu neʼebé matenek mós tenke hatene kona-ba buat neʼebé atu mosu tanba hahalok aat neʼe. Tan neʼe, presiza tempu atu rezolve problema neʼe no atu hatudu ho klaru katak sira neʼebé kontra Maromak mak sala duni.
3. Tanbasá mak ita tenke simu ema nia governu?
3 Tanba ema lakohi simu Maromak Jeová nia ukun, sira presiza harii sira-nia ukun rasik. Kuandu apóstolu Paulo hakerek ba ninia maluk fiar-naʼin iha Roma, nia koʼalia kona-ba “ukun-naʼin sira”, katak ema nia governu. Iha Paulo nia tempu, ukun-naʼin sira-neʼe mak governu Roma neʼebé imperadór Nero mak ukun, ninia ukun hahú iha tinan 54 toʼo tinan 68. Paulo hatete katak “Maromak mak foti ukun-naʼin sira”. (Lee Roma 13:1, 2.) Paulo hatudu katak ema nia ukun mak aas liu fali Maromak nian ka lae? Lae duni! Maibé tuir loloos, nia hatete katak se Maromak Jeová husik ema atu ukun, ema kristaun tenke hatudu respeitu no simu ukun-naʼin sira-neʼe nuʼudar “buat neʼebé Maromak foti tiha”.
Dalan neʼebé lori ba susar
4. Esplika toʼok tanbasá mak ema nia ukun sei la sai diʼak.
4 Maski nuneʼe, Satanás mak iha ema nia ukun nia kotuk, tan neʼe sira-nia ukun sei la sai diʼak. Tanbasá? Razaun ida mak sira-nia ukun la tuir Maromak nia matenek. Maromak Jeová deʼit mak iha matenek neʼebé loos. Nuneʼe, nia deʼit mak hatene dalan diʼak liu hotu atu ukun. (Jer 8:9; Rom 16:27) Maromak Jeová la hanesan ho ema neʼebé sempre aprende husi buat neʼebé sira halo no husi sira-nia sala, Maromak sempre hatene dalan neʼebé diʼak liu atu halo buat ruma. Ukun naran deʼit neʼebé la halo tuir ninia matadalan sei la sai diʼak. Tanba razaun neʼe, no mós tanba Satanás hanoin deʼit nia an mak horiuluk kedas ninia dalan atu ukun neʼebé liuhusi ema la sai diʼak duni.
5, 6. Tanbasá mak Satanás fila kotuk ba Maromak Jeová?
5 Ema neʼebé matenek la koko atu halo buat ruma neʼebé nia hatene katak sei la sai diʼak. Ema nia istória, dala barak ona hatudu katak buat hotu sei la sai diʼak duni kuandu ema la halo tuir sira-nia Kriadór neʼebé forsa boot. (Lee Provérbios 21:30.) Maibé, tanba Satanás foti-an no hanoin demais kona-ba nia an, nia fila kotuk ba Maromak Jeová. Hodi nuneʼe mak Diabu ho hakarak rasik hili dalan neʼebé ikusmai lori ba susar.
6 Ukun-naʼin ida husi rai-Babilónia, neʼebé haleno Satanás nia hahalok, gaba an hodi dehan: “Haʼu sei saʼe toʼo lalehan. Haʼu sei hasaʼe haʼu-nia kadunan aas liu fali Maromak nia fitun sira, no haʼu sei tuur iha foho reuniaun nian, iha parte dook liu iha norte. Haʼu sei saʼe aas liu fali kalohan nia fatin neʼebé aas; haʼu sei halo haʼu-nia an hanesan Ida neʼebé Aas Liu Hotu.” (Isa 14:13-15) Buat neʼebé ukun-naʼin neʼe hakarak atu halo la sai loos, no ikusmai Babilónia nia ukun monu hanesan buat neʼebé lavale buat ida. Nuneʼe mós, Satanás no nia mundu neʼe lakleur tan sei lakon.
Tansá husik?
7, 8. Tanba Maromak Jeová husik buat aat akontese ba tempu uitoan, ida-neʼe lori buat diʼak saida deʼit?
7 Ema balu karik hanoin tansá mak Maromak Jeová la hapara ema atu apoia Satanás no la hapara ema atu harii governu neʼebé ikusmai sei la sai diʼak. Nuʼudar Maromak Forsa Boot Liu Hotu, nia bele halo nuneʼe duni. (Êx 6:3) Maski nuneʼe, nia la halo. Ninia matenek book nia atu husik sira neʼebé kontra nia atu ukun ba tempu uitoan, tanba nia hatene katak ida-neʼe sei lori buat diʼak. Ikusmai, sei sai klaru liu katak Maromak Jeová deʼit mak bele ukun ho domin no justisa, no ema sira neʼebé laran-metin sei hetan buat diʼak husi Maromak nia desizaun neʼe.
8 Se karik ema la simu buat neʼebé Satanás oferese no lakohi atu haketak an husi Maromak nia ukun, sira sei la hetan terus ida! Maski nuneʼe, Maromak Jeová nia desizaun atu husik ema ukun an rasik ba tempu uitoan lori ona buat diʼak balu. Ida-neʼe halo ema neʼebé laran-loos fiar duni katak matenek atu rona Maromak no tau fiar ba nia. Ba tinan barak ona, ema koko atu harii governu oioin, maibé la iha ida neʼebé bele halo buat hotu sai diʼak. Ida-neʼe ajuda ema neʼebé adora Maromak atu hametin sira-nia fiar katak ninia dalan atu ukun mak diʼak liu hotu. Loos katak hodi husik Satanás atu ukun, neʼe lori susar ba ema, inklui sira neʼebé ho laran-metin adora Maromak Jeová. Maibé, husik buat aat akontese ba tempu uitoan mós lori buat diʼak ba sira neʼebé adora Maromak ho laran-metin.
Satanás kontra Maromak, oinsá neʼe lori glória ba Maromak Jeová?
9, 10. Esplika toʼok oinsá mak Satanás nia ukun lori glória ba Maromak Jeová.
9 Hodi husik Satanás atu book ema no husik ema atu ukun an rasik, ida-neʼe la hatudu katak Maromak Jeová nia ukun mak la diʼak. Tuir loloos, istória hatudu katak Jeremias nia liafuan neʼebé hatete katak ema la iha kbiit atu ukun an rasik mak loos duni. (Lee Jeremias 10:23.) No mós, maski Satanás kontra Maromak, maibé ida-neʼe fó oportunidade ba Maromak Jeová atu hatudu Ninia hahalok furak iha dalan neʼebé klaru liu. Oinsá?
10 Ita bele haree ho klaru liután Maromak Jeová nia hahalok sira neʼebé perfeitu husi rezultadu aat neʼebé mosu tanba Satanás nia ukun. No ida-neʼe book ema neʼebé hadomi Maromak atu hahiʼi nia liután. Sin, maski ida-neʼe halo ita hakfodak, maibé Satanás nia dalan atu ukun lori glória ba Maromak. Satanás nia ukun fó oportunidade ba Maromak Jeová atu hatudu dalan diʼak liu hotu atu rezolve lia neʼebé Satanás hasaʼe kona-ba ninia direitu atu ukun. Atu komprende kona-ba neʼe, mai ita hanoin kona-ba Maromak Jeová nia hahalok balu no haree oinsá mak Satanás nia ukun book Maromak Jeová atu hatudu ninia hahalok sira-neʼe iha dalan klaru liután.
11. Oinsá mak Maromak Jeová hatudu nia domin?
11 Domin. Bíblia hatete katak “Maromak mak domin.” (1 Joao 4:8) Maromak hatudu nia domin hodi kria ema. Liután neʼe, dalan neʼebé Maromak kria ita hatudu mós kona-ba nia domin. Maromak Jeová mós hatudu nia domin hodi fó ba ema fatin kapás neʼebé iha buat hotu neʼebé ema presiza atubele moris haksolok. (Gên 1:29-31; 2:8, 9; Sal 139:14-16) Maibé, kuandu hahalok aat komesa tama iha mundu, Maromak Jeová hatudu nia domin iha dalan seluk tan. Oinsá? Apóstolu João temi Jesus nia liafuan hodi dehan: “Maromak hadomi tebes mundu toʼo fó nia Oan-Mane mesak, atu ema hotu neʼebé iha fiar nia labele lakon, maibé hetan moris rohan-laek.” (Joao 3:16) Hodi haruka nia Oan-Mane mesak mai rai atu salva ema sala-naʼin, Maromak hatudu nia domin iha dalan neʼebé diʼak liu hotu, loos ka lae? (Joao 15:13) Hodi hatudu nia domin boot hanesan neʼe, Maromak fó ezemplu ba ema atu haleno nia domin iha sira-nia moris loroloron nian hanesan Jesus.—Joao 17:25, 26.
12. Oinsá mak Maromak Jeová hatudu ninia kbiit?
12 Kbiit. “Maromak Kbiit-Naʼin” deʼit mak iha forsa atu kria moris. (Apok 11:17; Sal 36:9) Kuandu ema foin moris mai, sira komesa sira-nia moris hanesan surat-tahan mamuk ida. Maibé kuandu ema mate, sira halo nakonu surat-tahan neʼe ho sira-nia desizaun, hahalok, no esperiénsia neʼebé sira hetan iha moris. Maromak Jeová bele rai-hela informasaun hotu neʼe iha ninia hanoin. Iha tempu neʼebé loos, Maromak Jeová bele halo ema moris fali ho sira ida-idak nia hahalok no esperiénsia uluk nian. (Joao 5:28, 29) Nuneʼe, maski laʼós Maromak nia hakarak atu ema mate, maibé mate fó oportunidade ba Maromak Jeová atu hatudu katak nia iha forsa atu halo ema mate moris fali. Loos duni, Maromak Jeová mak “Maromak Kbiit-Naʼin”.
13. Oinsá mak Maromak Jeová hatudu ninia justisa?
13 Justisa. Maromak Jeová nunka bosok, no nia mós nunka hatudu hahalok neʼebé la loos. (Deut 32:4; Tito 1:2) Nia sempre kaer metin ba lia-loos no ba justisa, maski halo ida-neʼe halo nia lakon buat ruma. (Rom 8:32) Triste tebes ba Maromak Jeová atu haree nia Oan doben mate iha ai-riin hanesan ema aat ida! Maibé, tanba Maromak Jeová hadomi ema sala-naʼin no halo tuir ninia justisa, nia prontu atu husik Jesus mate. (Lee Roma 5:18-21.) Maski la iha justisa iha mundu neʼe, maibé ida-neʼe fó oportunidade ba Maromak Jeová atu hatudu katak nia mak justisa nia hun.
14, 15. Iha dalan balu saida mak Maromak Jeová hatudu ninia matenek no pasiénsia?
14 Matenek. Iha tempu neʼebé Adão no Eva halo sala, Maromak Jeová fó sai kedas dalan oinsá nia sei hadiʼa buat aat neʼebé mosu tanba sira kontra hasoru nia. (Gên 3:15) Hodi halo nuneʼe, no mós hodi fó sai neineik-neineik ninia hakarak neʼe ba ninia atan sira, Maromak Jeová hatudu ho klaru ninia matenek. (Rom 11:33) La iha buat ida neʼebé bele satan netik Maromak atu rezolve problema sira ho susesu. Maski mundu neʼe nakonu ho imoralidade, funu, ema ulun-toos, la halo tuir, la hanoin ema, la simu ema seluk, no laran-makerek, maibé ida-neʼe fó oportunidade ba Maromak Jeová atu hatudu ba ninia kriatura sira saida mak matenek neʼebé loos. Dixípulu Tiago hatete: “Matenek husi lalehan, uluknanain, mak moos, hadame malu, laran-kmaus, hanoin tuir buat neʼebé loos, laran-luak no fó fuan diʼak barak, koʼalia loloos no la halo ema bilán.”—Tgo 3:17.
15 Pasiénsia no laran-luak. Tanba ema la perfeitu no halo sala beibeik, ida-neʼe fó oportunidade ba Maromak Jeová atu hatudu ninia hahalok pasiénsia no laran-luak iha dalan neʼebé klaru liu. Ita tenke hatudu agradese ba Maromak Jeová tanba nia hatudu hahalok furak sira-neʼe durante tinan rihun ba rihun ona. Apóstolu Pedro hatete katak ita tenke “haree ita Naʼi nia laran-luak nuʼudar maksoin”.—2 Ped 3:9, 15.
16. Tanbasá mak ita haksolok hodi hatene katak Maromak Jeová prontu atu perdua ita?
16 Prontu atu perdua. Ita hotu sala-naʼin no dala barak halo sala. (Tgo 3:2; 1 Joao 1:8, 9) Ita agradese tebes tanba Maromak Jeová prontu atu perdua ita “iha dalan neʼebé boot liu”! (Isa 55:7) Hanoin toʼok kona-ba ida-neʼe: Tanba ita moris mai nuʼudar ema sala-naʼin, ita bele sente haksolok tebes hodi hatene katak Maromak perdua ita-nia sala. (Sal 51:5, 9, 17) No mós, kuandu ita rasik sente katak Maromak Jeová perdua ita-nia sala, ida-neʼe hametin ita-nia domin ba nia no fó laran-manas mai ita atu halo tuir ninia ezemplu hodi perdua mós ema seluk.—Lee Koloso 3:13.
Mundu moras duni!
17, 18. Iha dalan saida deʼit mak Satanás nia dalan atu ukun la sai diʼak?
17 Durante tinan rihun ba rihun ona, Satanás nia dalan atu ukun neʼebé liuhusi ema, la lori buat diʼak ruma. Iha tinan 1991, jornál The European hatete: “Mundu moras ka lae? Sin, moras duni, maibé . . . laʼós Maromak mak halo. Mundu neʼe moras tanba ninia povu sira mak halo moras.” Tebes duni! Mundu neʼe moras tanba Satanás halo ita-nia inan-aman primeiru hili atu ukun an rasik duké simu Maromak Jeová nia ukun. Nuneʼe, sira komesa dalan ida atu ukun neʼebé la sai diʼak. Susar no terus neʼebé ema hetan iha mundu tomak hatudu katak ema nia ukun iha moras neʼebé aat tebetebes.
18 Satanás nia dalan atu ukun diʼak deʼit ba sira neʼebé hanoin deʼit sira-nia an. Maibé, hahalok hanoin deʼit an la bele manán domin, tanba domin mak hun ba dalan neʼebé Maromak Jeová ukun. Satanás nia dalan atu ukun la lori hakmatek, kontente, no la halo ema sente seguru. Klaru katak Maromak Jeová nia dalan atu ukun mak diʼak liu hotu! Ohin loron iha buat barak neʼebé hatudu ida-neʼe ka lae? Sin, iha duni. Ita sei haree kona-ba neʼe iha lisaun tuirmai.
Saida mak ita aprende kona-ba ukun kuandu lee . . .
• Roma 13:1, 2?
• Koloso 3:13?
[Dezeñu iha pájina 25]
Satanás nia ukun nunka lori buat diʼak ba ema
[Credit Lines]
U.S. Army photo
WHO photo by P. Almasy
[Dezeñu iha pájina 26]
Maromak Jeová iha forsa atu halo ema mate moris fali
[Dezeñu iha pájina 27]
Maromak Jeová hatudu nia domin no justisa liuhusi ninia Oan nia sakrifísiu