Hafolin Jeová nia laran-metin no prontu atu fó perdua
“Ita, oh, Jeová, mak diʼak no prontu atu fó perdua; no ita hatudu domin ho laran-metin ba sira hotu neʼebé bolu Ita.”—SAL 86:5.
1, 2. (a) Tanbasá mak ita gosta kolega sira neʼebé laran-metin no prontu atu fó perdua? (b) Iha lisaun neʼe, ita sei koʼalia kona-ba pergunta saida deʼit?
TUIR Ita-nia hanoin, belun neʼebé loos mak ema hanesan saida? Irmán ida naran Ashley hatete: “Ba haʼu, belun neʼebé loos mak ema neʼebé laran-metin ba Ita no prontu atu fó perdua ba Ita.” Ita hotu gosta kolega sira neʼebé hatudu hahalok hanesan neʼe, tanba sira halo ita sente katak sira sei hadomi ita no nunka husik ita.—Prov 17:17.
2 Maromak Jeová mak ita-nia Belun neʼebé laran-metin no prontu atu fó perdua ba ita. Ema neʼebé hakerek salmu hatete: “Ita, oh, Jeová, mak diʼak no prontu atu fó perdua; no ita hatudu domin ho laran-metin ba sira hotu neʼebé bolu Ita.” (Sal 86:5) Maibé hahalok laran-metin no prontu atu fó perdua, neʼe katak sá? Iha dalan saida deʼit mak Jeová hatudu hahalok furak sira-neʼe? No oinsá mak ita bele banati-tuir ninia ezemplu? Hodi buka resposta ba pergunta sira-neʼe bele ajuda ita atu haburas ita-nia domin ba Jeová no hametin ita-nia relasaun ho ita-nia maluk sira.—1 Joao 4:7, 8.
JEOVÁ MAK LARAN-METIN
3. Hahalok laran-metin katak sá?
3 Ema neʼebé iha hahalok laran-metin, neʼe katak nia hatudu domin no apoia ho laran tomak ba Maromak, ka ema seluk, ka buat ruma, no hatudu hahalok neʼe iha tempu diʼak no tempu susar. Bíblia hatete katak Jeová mak Maromak neʼebé laran-metin. Sin, la iha ema ida neʼebé hatudu laran-metin liu fali Jeová.—Apok 16:5, MF.
4, 5. (a) Iha dalan saida deʼit mak Jeová hatudu laran-metin ba ninia atan sira? (b) Hodi hanoin kona-ba Jeová nia laran-metin, oinsá mak ida-neʼe fó forsa mai ita?
4 Iha dalan saida deʼit mak Jeová hatudu laran-metin? Nia nunka husik ninia atan sira neʼebé hatudu laran-metin ba nia. Sira ida mak Liurai David, nia fó sai katak Jeová mak Maromak neʼebé laran-metin. (Lee 2 Samuel 22:26.a) Iha tempu neʼebé David hasoru susar oioin, Jeová fó matadalan, proteje no salva nia. (2 Sam 22:1) David hatene katak Jeová nia laran-metin neʼe laʼós ho liafuan deʼit. Tanbasá mak Jeová laran-metin ba David? Tanba David rasik hatudu laran-metin ba nia. Sin, Jeová hafolin ninia atan sira-nia laran-metin, no nia mós hatudu laran-metin ba sira.—Prov 2:6-8.
5 Hodi hanoin kona-ba Jeová nia laran-metin ba ninia atan sira, ida-neʼe bele fó forsa mai ita. Irmaun ida naran Reed hatete katak istória kona-ba David ajuda nia, hodi dehan: “Maski David nafatin halai subar iha fatuk-kuak sira, Jeová sempre ajuda nia. Ida-neʼe fó laran-manas tebes mai haʼu! Ida-neʼe fó-hanoin haʼu katak maski haʼu hasoru situasaun susar naran deʼit, Jeová sempre laran-metin ba haʼu se haʼu laran-metin ba nia.”—Rom 8:38, 39.
6. Iha dalan saida tan mak Jeová hatudu laran-metin? Oinsá mak ida-neʼe lori buat diʼak ba ninia atan sira?
6 Iha dalan saida tan mak Jeová hatudu laran-metin? Dalan ida mak nia laran-metin ba ninia matadalan sira. Nia rasik hatete: “Maski ó sai idade, maibé haʼu sei nafatin hanesan neʼe.” (Isa 46:4) Nia sempre halo desizaun hodi tuir ninia matadalan kona-ba buat neʼebé loos no buat neʼebé sala. (Mal 3:6) Liután neʼe, Jeová mós hatudu laran-metin ba ninia liafuan neʼebé nia promete ona. (Isa 55:11) Jeová nia laran-metin lori buat diʼak ba ninia atan sira hotu. Oinsá? Tanba se ita hakaʼas an atu halo tuir Jeová nia hakarak, ita bele fiar katak Jeová mós sei kumpre ninia promesa atu fó bensaun mai ita.—Isa 48:17, 18.
BANATI-TUIR JEOVÁ NIA LARAN-METIN
7. Oinsá mak ita bele banati-tuir Jeová nia laran-metin?
7 Oinsá mak ita bele banati-tuir Jeová nia laran-metin? Dalan ida mak hodi halo buat ruma atu ajuda ita-nia maluk neʼebé iha susar laran. (Prov 3:27) Porezemplu, ita hatene maluk kristaun ruma neʼebé laran-tun tanba moras, hetan susar husi família, ka iha fraku ruma? Karik diʼak atu fó laran-manas no kmaan ba ema hanesan neʼe, loos ka lae? (Zac 1:13)b Hodi halo nuneʼe, ita bele hatudu katak ita laran-metin ba nia nuʼudar ninia belun neʼebé “besik liu fali maun-alin”.—Prov 18:24.
8. Se ita kaben ona, oinsá mak ita bele hatudu laran-metin?
8 Ita mós bele hatudu laran-metin ba sira neʼebé ita hadomi. Porezemplu, se ita mak kaben-naʼin, ita hatene katak ita tenke laran-metin ba ita-nia kaben. (Prov 5:15-18) Tan neʼe, ita hasees an husi sala-foʼer, maibé liután neʼe, ita mós hadook an husi hahalok neʼebé bele book ita atu halo sala neʼe. (Mt 5:28) No ita mós hatudu laran-metin ba ita-nia maluk kristaun sira hodi la konta sira-nia vida, no la rona mós ba ema neʼebé koʼalia aat kona-ba sira.—Prov 12:18.
9, 10. (a) Buat neʼebé importante liu mak atu hatudu laran-metin ba sé? (b) Tanbasá mak dala ruma susar ba ita atu halo tuir Jeová?
9 Maibé, buat neʼebé importante liu mak atu hatudu laran-metin ba Jeová. Oinsá mak ita bele halo ida-neʼe? Hodi hakaʼas an atu hadomi buat neʼebé Jeová hadomi no odi buat neʼebé nia odi, no depois halo tuir. (Lee Salmo 97:10.c) Nuʼudar ita-nia hanoin no sentimentu sai hanesan Jeová nian, ida-neʼe sei book ita atu halo tuir ninia ukun-fuan sira.—Sal 119:104.
10 Klaru katak dala ruma susar ba ita atu halo tuir Jeová, tan neʼe ita presiza hakaʼas an duni atu hatudu laran-metin nafatin. Porezemplu, hanoin toʼok kona-ba irmán klosan ida neʼebé hakarak kaben, maibé seidauk hetan maluk kristaun ida neʼebé diʼak ba nia. (1 Kor 7:39) Ninia kolega iha serbisu-fatin neʼebé fiar la hanesan sempre koko atu buka pár ba nia. No nia rasik mós sente mesamesak. Maski nuneʼe, nia hakaʼas an atu laran-metin nafatin ba Jeová. Ita hafolin irmán neʼe nia hahalok laran-metin, loos ka lae? Ita hotu fiar katak Jeová sei fó bensaun ba ninia atan sira hotu neʼebé hatudu laran-metin ba nia maski hasoru susar oioin.—Ebr 11:6.
“Iha belun ida neʼebé besik liu fali maun-alin.”—Prov 18:24 (Haree parágrafu 7)
“Fó perdua ba malu ho laran.”—Ef 4:32 (Haree parágrafu 16)
JEOVÁ MAK PRONTU ATU FÓ PERDUA
11. Hahalok prontu atu fó perdua, neʼe katak sá?
11 Hahalok prontu atu fó perdua, neʼe katak sá? Neʼe katak ita prontu atu hatudu laran-sadiʼa ba ema seluk neʼebé halo sala hasoru ita. Ida-neʼe la dehan katak ita simu deʼit ema seluk nia hahalok sala, ka taka matan deʼit ba buat neʼebé akontese ona. Maibé, ita la rai hirus ba ema neʼebé halo sala. Bíblia hatete katak Jeová mak “prontu atu fó perdua” ba ema neʼebé arrepende an ho laran.—Sal 86:5.
12. (a) Jeová prontu atu fó perdua toʼo iha neʼebé? (b) Pedro nia liafuan kona-ba ita-nia sala “hetan perdua”, neʼe katak sá?
12 Jeová prontu atu fó perdua toʼo iha neʼebé? Bíblia hatete katak Jeová “fó perdua neʼebé boot tebes”. Neʼe katak nia fó perdua ba ita-nia sala hotu no mós ba nafatin. (Isa 55:7) Oinsá mak ita bele hatene katak Jeová fó perdua ba ita-nia sala hotu? Mai ita haree liafuan iha Apostolu 3:19. (Lee.) Oinsá mak ema neʼebé halo sala bele hetan perdua? Apóstolu Pedro hatete katak ulukliu ema neʼe tenke “hakribi sala”. Ema neʼebé hakribi duni ninia sala ho laran lakohi halo fali sala neʼe. (2 Kor 7:10, 11) Tuirmai, nia sei “fila hikas” ba Jeová, katak husik moris uluk nian no hakaʼas an atu moris iha dalan neʼebé halo Maromak kontente. Kuandu nia arrepende an hanesan neʼe, rezultadu saida mak nia sei hetan? Pedro hatete katak ninia sala bele “hetan perdua”. Liafuan gregu neʼebé tradús nuʼudar “hetan perdua”, iha arti katak “halakon”, ka “hamoos”. Entaun, kuandu Jeová fó perdua ba ita-nia sala, nia hamoos sala hotu neʼebé ita halo ona.—Ebr 10:22; 1 Joao 1:7.
13. Jeová nia liafuan ‘Haʼu sei la hanoin-hetan tan ita-nia sala’ fó fiar saida mai ita?
13 Oinsá mak ita bele hatene katak Jeová mós fó perdua ba nafatin? Mai ita hanoin Jeremias nia profesia kona-ba aliansa foun ho ema kristaun kose-mina sira, neʼebé loke dalan ba ema neʼebé tau fiar ba Jesus nia sakrifísiu atu hetan perdua ba sira-nia sala. (Lee Jeremias 31:34.d) Jeová hatete: “Haʼu sei perdua sira-nia sala, no haʼu sei la hanoin-hetan tan sira-nia sala.” Sin, kuandu Jeová fó perdua ba ita-nia sala, nia sei la hanoin fali kona-ba ita-nia sala atu bele duun beibeik ka fó kastigu ba ita. Maibé, Jeová sei tau fali sala neʼe ba kotuk ba nafatin.—Rom 4:7, 8.
14. Oinsá mak hanoin kleʼan kona-ba Jeová nia perdua bele fó kmaan mai ita? Fó toʼok ezemplu ida.
14 Kuandu ita hanoin kleʼan kona-ba Jeová nia perdua, ida-neʼe bele fó kmaan duni mai ita. Hanoin toʼok kona-ba irmán ida naran Elaine.e Tinan barak liubá, kongregasaun hasai nia, no depois simu fali. Elaine hatete: “Maski haʼu hatete katak Jeová fó perdua ona mai haʼu, maibé iha laran, haʼu sente katak Jeová la besik ho haʼu, no ema seluk mak besik liu ba Jeová duké haʼu.” Maibé nia hetan kmaan ho liafuan tuirmai neʼe: “Kuandu Jeová fó perdua ona ba ita-nia sala, ita lalika hanoin tan kona-ba sala neʼe.”f Elaine hatutan tan: “Tuir loloos, uluk haʼu la fiar katak Jeová bele fó perdua duni ba haʼu-nia sala, no haʼu hanoin katak iha haʼu-nia moris haʼu sei lori todan neʼe ba nafatin. Maski haʼu presiza tempu atu troka haʼu-nia hanoin, maibé agora haʼu komesa sente katak haʼu bele hakbesik duni ba Jeová, no haʼu la sente todan hanesan uluk.” Ita serbí Maromak neʼebé domin no prontu atu fó perdua!—Sal 103:9.
BANATI-TUIR JEOVÁ NIA PERDUA
15. Oinsá mak ita bele banati-tuir Jeová nia perdua?
15 Oinsá mak ita bele banati-tuir Jeová nia perdua? (Lee Lucas 17:3, 4.) Hanoin-hetan katak kuandu ita arrepende an ho laran, Jeová fó perdua ba ita no haluha duni ita-nia sala, katak nia nunka duun fali ita-nia sala neʼebé fó perdua ona. Nuneʼe mós ho ita. Kuandu ita deside atu fó perdua ba ema seluk nia sala, ita mós tau sala neʼe ba kotuk hodi la temi fali kona-ba buat neʼebé liu tiha ona.
16. (a) Fó perdua ba ema nia sala dehan katak sá? Esplika toʼok. (b) Atu bele hetan perdua husi Maromak, ita tenke halo saida?
16 Fó perdua ba ema seluk nia sala la dehan katak ita simu deʼit sira-nia hahalok sala ka husik sira atu aproveita ita-nia laran-diʼak, maibé neʼe dehan katak ita deside atu la rai hirus ba sira. Atu bele hetan perdua husi Maromak, ita tenke fó perdua ba ema seluk. (Mt 6:14, 15) Jeová hanoin-hetan katak ita mak ema sala-naʼin no “rai-rahun” deʼit. (Sal 103:14) Se nuneʼe, kuandu ema ruma halo sala, ita presiza hanoin-hetan katak sira mós sala-naʼin, no sai prontu atu fó perdua ba sira ho laran, loos ka lae?—Ef 4:32; Kol 3:13.
Halo orasaun ba ema neʼebé hakanek ita-nia laran (Haree parágrafu 17)
17. Se ita-nia maluk ruma halo ita-nia laran-kanek, saida mak ajuda ita?
17 Klaru katak dala ruma la fasil atu fó perdua ba ema seluk. Ema kristaun kose-mina balu iha apóstolu sira-nia tempu mós iha problema entre sira. (Flp 4:2) Entaun, se ita-nia maluk ruma halo ita-nia laran-kanek, saida mak ajuda ita atu fó perdua ba ema neʼe? Hanoin toʼok kona-ba Job. Kuandu ninia “kolega” naʼin-tolu, Elifaz, Bildad no Zofar duun matak Job, ida-neʼe halo nia laran-kanek tebes. (Jó 10:1; 19:2) Ikusmai, Jeová korrije sira naʼin-tolu neʼe no haruka sira atu lori sakrifísiu ba Job hodi bele hetan perdua. (Jó 42:7-9) Maibé, Jeová mós haruka Job atu halo buat ruma. Saida mak neʼe? Job tenke halo orasaun ba sira naʼin-tolu neʼebé halo sala hasoru nia. Job halo tuir, no Jeová fó bensaun ba nia tanba nia fó perdua ba nia maluk sira-nia sala. (Lee Jó 42:10, 12, 16, 17.g) Husi istória neʼe, ita bele aprende saida? Hodi halo orasaun kona-ba ema neʼebé hakanek ita-nia laran bele ajuda ita atu la rai hirus ba sira.
NAFATIN APRENDE NO BANATI-TUIR JEOVÁ NIA HAHALOK SIRA
18, 19. Ita hakarak halo saida ba nafatin?
18 Bainhira ita hanoin didiʼak kona-ba Jeová nia hahalok sira, ida-neʼe halo ita sente kmaan duni. Ita koʼalia ona kona-ba Jeová nia hahalok oioin, hanesan fasil atu hakbesik, la fihir ema, laran-luak, la ulun-toos, laran-metin, no prontu atu fó perdua. Klaru katak ita seidauk hatene buat hotu kona-ba Jeová. Tuir loloos, ita sei haksolok ba nafatin hodi aprende liután kona-ba nia. (Ecle 3:11) Ita mós hanoin hanesan ho apóstolu Paulo neʼebé dehan: “Ah, rikusoi no hatene no matenek waʼin Maromak nian kleʼan tebetebes!”—Rom 11:33.
19 Tan neʼe, mai ita hotu kontinua aprende liután, hanoin kleʼan, no banati-tuir Jeová nia hahalok furak sira iha ita-nia moris. (Ef 5:1) Nuʼudar ita halo nuneʼe, ita-nia domin ba Jeová sei sai buras liután, no ita bele hakbesik liután ba nia. Sin, ita sei iha hanoin hanesan ho ema neʼebé hakerek salmu, neʼebé kanta: “Ba haʼu, hakbesik ba Maromak mak diʼak mai haʼu.”—Sal 73:28.
a 2 Samuel 22:26: “Ba ema neʼebé laran-metin, Ita sei hatudu laran-metin. . . .”
b Atu hetan informasaun liután kona-ba neʼe, haree Menara Pengawal, 15 Janeiru 1995, ho títulu “Sudahkah Saudara Menganjurkan Seseorang Akhir-Akhir Ini?”, no 1 Abríl 1995, ho títulu “Menggerakkan kepada Kasih dan Pekerjaan Baik—Bagaimana Caranya?”.
c Salmo 97:10: “Hei, imi neʼebé hadomi Jeová, odi buat neʼebé aat. Nia tau matan ba ema laran-metin nia moris, no nia salva sira husi ema aat nia liman.”
d Jeremias 31:34: “‘Sira sei la hanorin tan sira-nia maluk no maun-alin, hodi dehan: “Imi hatene Jeová bá!” tanba sira hotu sei hatene haʼu, husi ida kiʼik liu toʼo boot’, Jeová hatete. ‘Tanba haʼu sei perdua sira-nia sala, no haʼu sei la hanoin-hetan tan sira-nia sala’.”
e Naran neʼe laʼós naran neʼebé loos.
f Haree livru Mendekatlah kepada Yehuwa, kapítulu 20, parágrafu 10.
g Jó 42:10, 12, 16, 17: “10 Depois Job halo tiha orasaun ba ninia maluk sira, Jeová halakon Job nia terus no fó rikusoin ba Job, Jeová fó ba nia dala rua ba buat neʼebé nia uluk iha.” “12 Tan neʼe, Jeová fó bensaun barak liu ba Job nia moris ikus duké uluk, no nia iha bibi-malae 14.000, kuda-kamelu 6.000, karau pár 1.000, no kuda-burru inan 1.000.” “16 Liutiha neʼe, Job moris ba tinan 140, no nia haree ninia oan no bei-oan sira toʼo jerasaun haat. 17 Ikusmai, Job moris kleur ho kontente, no depois nia mate.”