Ita kontente katak Jeová sempre haree ita ka lae?
“Jeová nia matan iha fatin hotu, no nia hateke ba ema aat no ema diʼak.”—PROVÉRBIOS (AMSAL) 15:3.
1, 2. Oinsá mak dalan neʼebé Jeová hateke ba ita la hanesan ho kámera neʼebé tau iha dalan?
IHA rai barak, polísia sira tau kámera iha dalan hodi grava motór no karreta neʼebé laʼo bá-mai. Sira mós grava karreta neʼebé xoke ema no koko atu halai deʼit duké ajuda ema neʼebé sira foin xoke. Tanba kámera sira ajuda polísia atu buka-hetan no kaer ema aat sira, ida-neʼe halo susar ba ema atu halai-sees husi kastigu.
2 Bíblia dehan katak Jeová nia matan “iha fatin hotu”. (Provérbios [Amsal] 15:3) Ida-neʼe katak nia sempre hateke ba ita atu haree se ita kontra ninia lei ka lae? Ka nia hein deʼit atu fó-kastigu ba ita ka lae? Lae duni! (Jeremias [Yeremia] 16:17; Ebreu 4:13) Jeová haree hela ita tanba nia hadomi ita no hakarak ita atu sente seguru no kontente.—1 Pedro 3:12.
3. Dalan lima saida mak Jeová tau matan ba ita?
3 Oinsá mak ita bele komprende diʼak liután kona-ba Maromak nia domin ba ita? Ita sei koʼalia kona-ba dalan lima neʼebé Jeová tau matan ba ita. (1) Nia fó avizu ba ita antes ita halo sala. (2) Nia korrije ita kuandu ita laʼo sala dalan. (3) Nia dirije ita ho Bíblia nia matadalan sira. (4) Nia ajuda ita kuandu ita hasoru susar. (5) Nia haraik bensaun ba ita kuandu ita halo buat neʼebé loos.
JEOVÁ FÓ AVIZU BA ITA
4. Tanbasá mak Maromak fó avizu ba Caim antes nia halo sala?
4 Ulukliu, ita sei koʼalia kona-ba oinsá mak Jeová fó avizu ba ita antes ita halo sala. (1 Crônicas [Tawarikh] 28:9) Porezemplu, Caim “sai hirus tebes” kuandu Jeová la kontente ho nia. (Lee Gênesis [Kejadian] 4:3-7.a) Jeová fó avizu ba Caim katak se nia la “fila fali hodi halo buat diʼak”, nia sei halo sala. Ida-neʼe hanesan “sala hein hela iha odamatan” atu kaer nia. Jeová husu ba nia: “Ó sei bele kontrola nia ka lae?” Jeová hakarak atu “simu” Caim. Se Caim rona ba avizu neʼe, nia sei kontinua iha relasaun diʼak ho Maromak.
5. Jeová fó avizu ba ita iha dalan saida deʼit?
5 Nuneʼe mós ho ita ohin loron. Jeová haree ita mak ema oinsá iha ita-nia laran. Nia hatene ita-nia hanoin no hakarak, no ita la bele subar buat ida husi nia. Nia hadomi ita no hakarak ita atu halo buat neʼebé loos, maibé nia la obriga ita. Tan neʼe, kuandu nia haree buat aat ruma iha ita-nia laran, nia fó avizu ba ita liuhusi ninia Liafuan. Oinsá? Kuandu ita lee Bíblia loroloron, lee ita-nia livru sira no tuir reuniaun sira, ita bele rona ba Maromak nia avizu sira. Husi buat hirak-neʼe, ita hetan ona ajuda atu hasoru problema ruma neʼebé só Jeová deʼit mak hatene ka lae? Jeová fó avizu sira-neʼe mai ita iha tempu neʼebé ita presiza duni.
6, 7. (a) Saida mak hatudu katak Jeová hanoin ita ida-idak? (b) Oinsá mak Ita rasik bele hetan buat diʼak tanba Jeová hanoin Ita?
6 Avizu sira hotu husi Bíblia hatudu katak Jeová hadomi ita ida-idak. Klaru katak ema rihun ba rihun hetan ajuda husi Bíblia nia matadalan, ita-nia livru sira no reuniaun sira. Maibé Jeová hakarak Ita rasik see tilun ba ninia konsellu iha Bíblia hodi Ita bele hadiʼa Ita-nia fraku no halo buat neʼebé loos. Ida-neʼe hatudu katak nia hanoin Ita.
Hodi see tilun ba Bíblia nia konsellu sei treinu ita atu hasees an husi susar sira (Haree parágrafu 6, 7)
7 Oinsá mak ita bele hetan buat diʼak husi Maromak nia avizu? Ulukliu, ita tenke fiar katak nia hanoin duni ita no tuirmai ita presiza halo tuir ninia Liafuan iha ita-nia moris. Entaun, se ita iha hanoin neʼebé Jeová la gosta, ita tenke halakon ida-neʼe kedas. (Lee Isaías [Yesaya] 55:6, 7.b) Se ita prontu atu halo tuir nia, ita bele hasees an husi susar oioin. Maibé oinsá se ita monu ba sala ruma? Jeová sei kontinua atu tau matan ba ita ka lae?
ITA-NIA AMAN NEʼEBÉ DOMIN KORRIJE ITA
8, 9. Kuandu ema ruma fó konsellu husi Bíblia ba ita, oinsá mak ida-neʼe hatudu katak Jeová hanoin ita? Konta toʼok ezemplu ida.
8 Kuandu Jeová korrije ita, neʼe katak nia hanoin ita. (Lee Ebreu 12:5, 6.) Tuir loloos, ita la haksolok kuandu hetan konsellu ka dixiplina. (Ebreu 12:11) Maibé, se ema ida fó konsellu husi Bíblia ba ita, importante tebes atu ita komprende tansá mak nia halo ida-neʼe. Nia fó konsellu laʼós atu halo ita laran-kanek maibé tanba nia haree buat ruma neʼebé bele estraga ita-nia relasaun ho Jeová. Nia hakaʼas an no uza ninia tempu hodi hatudu ba ita husi Bíblia oinsá mak ita bele fila fali ba Jeová. Ita simu konsellu neʼe tanba ida-neʼe mai husi Jeová.
9 Porezemplu, hanoin toʼok kona-ba irmaun ida neʼebé uluk toman haree pornografia maibé husik tiha toman aat neʼe kuandu nia tama lia-loos. Liu tiha tempu balu, nia hola telefone foun no uza ida-neʼe atu haree pornografia iha sítiu internét. (Tiago 1:14, 15) Ida-neʼe hatudu katak hakarak atu haree pornografia sei lakan iha ninia laran, hanesan ahi-klaak. Loron ida, nia presiza fó-empresta ninia telefone ba katuas kristaun ida, no sítiu aat neʼe mosu fali iha ninia telefone. Ida-neʼe sai bensaun ba irmaun neʼe tanba katuas bele fó konsellu kedas ba nia. Irmaun neʼe simu, no neineik-neineik husik ninia toman aat. Ita kontente tebes katak Jeová neʼebé hadomi ita, nia bele haree no korrije sala neʼebé ita subar antes ida-neʼe estraga ita-nia relasaun ho nia.
OINSÁ MAK BÍBLIA NIA MATADALAN DIRIJE ITA
10, 11. (a) Oinsá mak ita “see tilun” ba Maromak nia konsellu? (b) Konta toʼok esperiénsia kona-ba família neʼebé halo tuir Jeová nia matadalan.
10 Ema neʼebé hakerek salmu kanta ba Jeová: “Ho Ita-nia konsellu ita sei hatudu dalan mai haʼu.” (Salmo [Mazmur] 73:24) Ita presiza “see tilun” ba Jeová nia konsellu hodi buka Jeová nia hanoin iha ninia Liafuan. Kuandu ita halo tuir ninia matadalan, ita bele iha relasaun diʼak ho Jeová, no ida-neʼe mós bele ajuda ita atu tau matan ba ita-nia an no ita-nia família nia presiza.—Provérbios (Amsal) 3:6.
11 Porezemplu, iha rai-Filipinas, toʼos-atan ida ho ninia feen no nia família neʼebé boot hela iha rai neʼebé sira aluga. Nia no ninia feen serbí nuʼudar pioneiru regulár. Loron ida, sira hakfodak atu simu karta husi rai-naʼin neʼebé haruka sira atu sai husi fatin neʼe. Tanbasá? Tanba ema ida koʼalia lia-bobar ba rai-naʼin neʼe hodi duun matak sira. Irmaun neʼe hanoin barak kona-ba sira sei hela iha neʼebé. Maibé nia tau fiar metin ba Jeová no dehan: “Jeová sei ajuda ita. Nia sempre tau matan ba ita-nia presiza maski buat naran deʼit mosu.” Família neʼe halo tuir Bíblia nia matadalan, no sira nafatin hatudu respeitu no dame. Loron balu liu tiha, rai-naʼin neʼe fó-hatene sira katak sira bele kontinua hela iha ninia rai. Kuandu nia haree sira-nia hahalok diʼak, ida-neʼe book nia atu troka ninia hanoin no fó rai luan liután ba sira atu tau matan. (Lee 1 Pedro 2:12.) Ida-neʼe hatudu ho klaru katak se ita halo tuir Bíblia nia matadalan, Jeová sei dirije ita hodi bele liu tempu susar.
BELUN NEʼEBÉ AJUDA ITA ATU TAHAN SUSAR
12, 13. Situasaun saida mak bele halo susar ba ita atu fiar katak Maromak hanoin ita?
12 Dala ruma, ita hasoru susar barak. Porezemplu, ita sai moras, ema seluk fó-terus, ka ita-nia família rasik kontra ita, no ita tenke tahan ida-neʼe ba tempu kleur. Buat ida tan neʼebé susar liu mak bainhira ita iha problema ho ema ida iha kongregasaun tanba ita-nia hahalok la hanesan.
13 Porezemplu, irmaun ida nia liafuan hakanek duni ita-nia laran. Karik ita hanoin: ‘Oinsá mak ida-neʼe bele mosu iha Maromak nia organizasaun?’ Maibé irmaun neʼebé hakanek ita hetan knaar barak tan iha kongregasaun, no ema seluk hanoin katak irmaun neʼe mak ema diʼak tebes. Karik ita hanoin: ‘Neʼe la diʼak. Jeová haree duni ida-neʼe ka lae? Tansá Jeová la hadiʼa situasaun neʼe?’—Salmo (Mazmur) 13:1, 2; Habacuque (Habakuk) 1:2, 3.
14. Tansá dala ruma Jeová husik ita-nia irmaun sira atu fó konsellu makaʼas ba ita?
14 Jeová bele haree buat barak liu fali ita, no karik nia husik situasaun ruma tanba razaun neʼebé diʼak. Porezemplu, se ema ida fó ita konsellu neʼebé ita sente ladiʼak, ida-neʼe bele halo ita laran-kanek. Maibé, Maromak nia haree ba situasaun neʼe la hanesan ho ita, no karik tuir Maromak nia hanoin, ita presiza duni konsellu neʼe. Irmaun Karl Klein konta ninia istória, katak loron ida irmaun Rutherford fó konsellu makaʼas ba nia. Tempu balu liutiha, kuandu irmaun Rutherford kumprimenta nia ho oin-midar, irmaun Klein la hatán buat ida. Irmaun Rutherford haree katak irmaun Klein sei laran-kanek tanba konsellu neʼe. Irmaun Rutherford fó avizu ba nia, hodi dehan: “Kuidadu bá. Diabu hakarak manán ó.” Avizu neʼe ajuda duni irmaun Klein. Ikusmai kuandu nia sai membru ida husi Grupu Administradór, nia dehan: “Agora haʼu hatene katak kuandu ita odi irmaun ida, liuliu irmaun neʼebé fó konsellu ba ita, ida-neʼe bele fó fatin ba Diabu.”c—Haree nota iha kraik.
15. Saida mak ita presiza hanoin nafatin kuandu ita hasoru susar?
15 Ita hotu hakarak atu ita-nia susar sira liu lalais, maibé importante atu haburas pasiénsia. Oinsá? Hanoin toʼok se ita lori karreta iha dalan neʼebé macet. Ita bele hatudu pasiénsia hodi hein toʼo karreta sira bá oin. Maibé tanba ita lakon pasiénsia, ita buka dalan seluk. Ikusmai, ita lakon dalan no toʼo tarde iha fatin neʼebé ita hakarak bá. Se ita pasiénsia no hein iha dalan uluk nian, karik ita bele toʼo tuir tempu. Hanesan neʼe mós ho ita-nia susar, se ita pasiénsia no halo tuir dalan neʼebé Jeová hatudu iha Bíblia, Jeová sei ajuda ita atu tahan ita-nia susar toʼo rohan.
16. Tanbasá mak Jeová dala ruma husik ita atu hetan susar sira?
16 Dala ruma Jeová husik susar tanba nia hakarak ita atu hetan treinu liuhusi susar neʼe. (Lee 1 Pedro 5:6-10.) Maibé Maromak nunka hamosu susar. (Tiago 1:13) Tuir loloos, ‘ita-nia inimigu, Diabu’ mak halo susar barak neʼebé ita hasoru. La haluha katak Jeová haree ita-nia terus no nia hadomi ita. Nia sei loke dalan ba ita hodi ita-nia susar neʼe la kontinua ba nafatin, maibé ba “tempu uitoan” deʼit. Fiar metin katak Jeová hanoin ita no sei fó forsa ba ita atu tahan toʼo rohan.—2 Korinto 4:7-9.
BENSAUN HUSI JEOVÁ
17. Tanbasá mak Jeová buka-hatene ema nia laran?
17 Jeová buka-hatene ema nia laran hodi haree sé mak hadomi nia. Profeta Hanani dehan ba Liurai Asa: “Jeová nia matan hateke bá-mai iha rai hotu atu hatudu ninia forsa hodi ajuda sira neʼebé fó sira-nia laran tomak ba nia.” (2 Crônicas [Tawarikh] 16:9) Jeová sei “hatudu ninia forsa” ba ita, katak nia sei proteje no fó bensaun ba ita.
18. Tanbasá mak ita bele fiar katak Jeová sei haraik bensaun ba ita se ita halo buat neʼebé diʼak? (Haree dezeñu iha pájina 27.)
18 Jeová hakarak ita atu “buka buat neʼebé diʼak”, “hadomi buat neʼebé diʼak”, no “halo buat neʼebé diʼak” hodi nia bele fó bensaun ba ita. (Amós 5:14, 15; 1 Pedro 3:11, 12) Jeová haree ema laran-loos nia hahalok no haraik bensaun ba sira. (Salmo [Mazmur] 34:15) Ita bele haree ida-neʼe husi ezemplu feto Izraél naʼin-rua, naran Sifra no Pua, neʼebé serbisu nuʼudar parteira. Liurai Ejitu nian haruka sira atu oho labarik-mane Izraél nian hotu neʼebé foin moris. Maibé feto sira-neʼe hili atu halo tuir Maromak duké Liurai Ejitu nian, hodi salva bebé sira. Jeová haree Sifra no Pua nia hahalok diʼak no haraik bensaun ba sira hodi sira rasik mós iha oan. (Êxodo [Keluaran] 1:15-17, 20, 21) Dala ruma ita sente katak ema ida la haree buat diʼak neʼebé ita halo, maibé Jeová haree ita-nia hahalok diʼak hotu no haraik bensaun ba ita.—Mateus 6:4, 6; 1 Timóteo 5:25; Ebreu 6:10.
19. Irmán ida iha esperiénsia saida?
19 Jeová mós haree ita-nia hakaʼas-an atu haklaken. Irmán ida husi rai-Ungria neʼebé hela iha rai-Áustria, simu diresaun atu vizita feto ida neʼebé koʼalia lia-úngaru. Irmán neʼe bá kedas hodi hasoru feto neʼe, maibé ema ida la iha uma. Irmán neʼe vizita fali beibeik ba tinan ida ho balu no rai hela livru sira, karta no númeru telefone. Dala ruma nia sente katak ema ida iha uma, maibé lakohi atu loke odamatan. Loron ida kuandu halo vizita fali, mana ida loke odamatan no hatete ho oin-midar: “Favór ida tama lai. Haʼu lee hotu livru neʼebé Ita fó mai haʼu no hein hela Ita.” Mana neʼe sulan nia an ba tempu kleur iha uma tanba nia moras kankru no simu hela tratamentu, maibé nia hakarak atu estuda Bíblia. Sin, Jeová haree duni irmán neʼe nia hakaʼas-an no haraik bensaun ba nia.
20. Ita rasik sente oinsá tanba Jeová hanoin Ita?
20 Hanesan ita foin estuda iha lisaun neʼe, Jeová haree buat hotu neʼebé ita halo no nia buka-hatene ema ida-idak nia laran. Labele hanoin katak nia hateke hela ita hodi buka ita-nia sala. Duké hanoin hanesan neʼe, mai ita agradese ba Jeová no hakbesik ba nia tanba nia hanoin ita no haraik bensaun ba ita-nia hahalok diʼak!
a Gênesis 4:3-7: “3 Tempu balu liu tiha, Caim lori fuan primeiru husi buat neʼebé nia kuda iha toʼos atu hasaʼe nuʼudar sakrifísiu ba Jeová.4 Maibé kona-ba Abel, nia lori ninia bibi-malae balu neʼebé moris primeiru, inklui mós sira-nia bokur. Jeová kontente ho Abel no ba ninia sakrifísiu, 5 maibé nia la kontente ho Caim no ba ninia sakrifísiu. Entaun Caim nia laran sai hirus tebes, no nia oin-buis. 6 Tuirmai Jeová hatete ba Caim: ‘Tanbasá ó sai hirus tebes no oin-buis? 7 Se ó fila fali hodi halo buat diʼak, haʼu mós sei simu ó, loos ka lae? Maibé se ó la fila fali hodi halo buat diʼak, sala hein hela iha odamatan, no hakarak tebes ó; maibé ó sei bele kontrola nia ka lae?’”
b Isaías 55:6, 7: “6 Buka ba Jeová bainhira imi bele hetan nia. Bolu ba nia bainhira nia sei besik hela. 7 Ema aat ida husik nia dalan aat bá, no ema neʼebé laran-aat husik ninia hanoin sira bá; fila fali ba Jeová, neʼebé sei hatudu laran-sadiʼa ba nia, bá ita-nia Maromak, tanba nia sei fó perdua neʼebé boot tebes.”
c Bele hetan irmaun Klein nia istória iha The Watchtower, 1 Outubru 1984.