“Halo kabeer ó-nia laʼo fatin” hodi bá oin

IHA tinan 537 molok Kristu bainhira ema Izraél fila husi rai-Babilónia ba Jeruzalein, Jeová hanoin sira neʼebé atu halo viajen naruk, hodi hatete: “Hadiʼa dalan ba povu. Ateru bá, halo estrada luan bá. Hasai fatuk hotu.” (Isaías [Yesaya] 62:10) Hodi tuir mandamentu neʼe, sira halo saida? Karik mane Izraél balu bá uluk no hadiʼa dalan hodi taka rai-kuak no halo estrada kabeer. Ita bele fiar katak sira-nia serbisu boot halo fasil liu ba maluk Izraél sira atu fila fali ba sira-nia rai.

Nuneʼe mós ho ita. Nuʼudar ita halo knaar oioin hodi serbí Jeová, neʼe hanesan ita laʼo tuir dalan ida. No Jeová lakohi buat ruma atu hanetik ita nuʼudar ita laʼo daudauk. Tan neʼe, ita presiza halo tuir Maromak nia liafuan tuirmai neʼe: “Halo kabeer ó-nia laʼo fatin, no ó-nia dalan hotu sei metin.”—Provérbios (Amsal) 4:26.

HALO DESIZAUN DIʼAK

Bíblia hatete: “Buat kmanek kona-ba joven sira mak sira-nia forsa.” (Provérbios [Amsal] 20:29) Baibain, ema joven sira iha saúde diʼak, forsa no matenek, no sira mós laran-manas atu hetan susesu iha sira-nia moris. Bainhira joven sira uza sira-nia matenek no kapasidade hodi serbí Jeová no laʼo ba oin, sira hetan ksolok neʼebé loos.

Maibé ema iha mundu mós haree ita-nia joven sira-nia matenek. Porezemplu, tanba joven Testemuña barak matenek iha eskola, mestre no kolega tenta sira atu bá eskola boot. Ka ema mós fó laran-manas ba joven balu neʼebé matenek kona-ba desportu atu aban-bainrua sai profisionál. Karik ita mós hatene maluk balu neʼebé hetan tentasaun kona-ba neʼe. Entaun, saida mak bele ajuda ema kristaun atu halo desizaun diʼak?

Bíblia nia matadalan bele ajuda ita nuʼudar ita laʼo tuir dalan atu halo serbisu ba Jeová. Porezemplu, haree toʼok liafuan husi Eclesiastes (Pengkhotbah) 12:1, neʼebé dehan: “Hanoin bá ó-nia Kriadór Boot iha ó-nia tempu joven.” Oinsá mak Ita ka Ita-nia joven sira bele hanoin Jeová?

Mai ita hanoin kona-ba joven ida naran Eric iha rai-Áfrika Oeste.a Nia gosta tebes joga bola. Kuandu nia tinan 15, nia tama ona ekipa nasionál. Ida-neʼe katak nia bele iha oportunidade atu hetan tan treinu neʼebé diʼak tebes iha rai-Europa no sai jogadór profisionál. Maibé durante tempu neʼe, Eric mós komesa estuda Bíblia ho Testemuña ba Jeová. Oinsá mak nia ‘hanoin ninia Kriadór’? Ita bele aprende saida husi ninia esperiénsia?

Hodi estuda Bíblia, Eric aprende katak Maromak sei rezolve ema nia problema hotu. Ho ida-neʼe, Eric hatene katak halo tuir Maromak nia hakarak mak importante liu fali joga bola. Tan neʼe, nia deside hodi hetan batizmu no uza ninia tempu no forsa atu serbí Jeová duké sai jogadór. Ikusmai, nia serbí nuʼudar atan ba kongregasaun, no hetan konvite atu tuir Eskola Bíblia ba Irmaun sira neʼebé Laiha Kaben.

Se Eric sai jogadór profisionál karik, nia bele manán osan barak no naran-boot. Maibé nia hatene katak Bíblia nia liafuan tuirmai neʼe mak loos: “Ema riku nia rikusoin mak ninia sidade neʼebé seguru, ida-neʼe hanesan moru neʼebé fó protesaun iha ninia mehi.” (Provérbios [Amsal] 18:11) Osan bele lohi ita atu hanoin katak ida-neʼe bele halo ita moris seguru. Maibé tuir loloos, ema neʼebé buka rikusoin sei hetan “kanek oioin” ba sira-nia an.—1 Timóteo 6:9, 10.

Joven Testemuña barak sente kontente no la kuran buat ida hodi serbí Jeová tempu-tomak. Eric hatete: “Duké tama ekipa joga bola nian, haʼu tama ‘ekipa’ boot husi Jeová nia atan sira neʼebé serbí nia tempu-tomak. Ida-neʼe mak ekipa neʼebé diʼak liu hotu. Ita iha dalan ida deʼit neʼebé lori ita ba moris haksolok ho susesu neʼebé loos, no haʼu agradese ba Jeová tanba nia hatudu dalan ida-neʼe mai haʼu.”

Oinsá ho Ita? Duké buka susesu iha mundu neʼe, ita bele laʼo iha dalan neʼebé aumenta ita-nia serbisu ba Jeová hodi sai pioneiru ka lae?—Haree pájina 6, “Haʼu hetan bensaun neʼebé universidade la bele fó”.

HASAI BUAT NEʼEBÉ HANETIK ITA-NIA DALAN

Feen-laʼen kristaun ida neʼebé vizita Betel iha Estadus Unidus haree katak irmaun-irmán sira serbisu ho kontente iha neʼebá. Liutiha tempu balu, feen neʼe hakerek karta ba Betel, hodi dehan: ‘Kuandu ami haree irmaun-irmán sira iha Betel, ami sente katak ami presiza hakaʼas an liután atu serbí Jeová.’ Tan neʼe, sira deside atu uza sira-nia tempu no forsa atu aumenta serbisu ba Jeová.

Foufoun, sira sente susar atu halo mudansa oioin iha sira-nia moris. Maibé loron ida, sira hanoin didiʼak kona-ba Jesus nia liafuan iha João 8:31, neʼebé dehan: “Se imi sempre halo tuir haʼu-nia liafuan, imi mak haʼu-nia dixípulu duni.” Tan neʼe, sira deside atu halaʼo moris simples liután hodi halo tuir Jesus. Sira faʼan sira-nia uma, hamenus sasán, no muda ba kongregasaun neʼebé presiza ajuda. Ohin loron, feen-laʼen neʼe serbí nuʼudar pioneiru, ajuda harii Reuniaun-Fatin sira no halo serbisu voluntáriu iha reuniaun boot. Kona-ba mudansa oioin neʼebé sira halo, sira sente oinsá? Sira hatete: “Hodi halo tuir matadalan husi Jeová nia organizasaun no moris simples, ida-neʼe mak halo ami haksolok tebes.”

LAʼO NAFATIN TUIR DALAN

Salomão hatete: “Ó-nia matan tenke hateke loos ba oin, sin, hateke loloos ba oin.” (Provérbios [Amsal] 4:25) Liafuan neʼe katak sá? Neʼe katak ita tenke tau ita-nia atensaun ba dalan neʼebé lori ita ba oportunidade barak liután hodi serbí Jeová. Ita labele husik buat ida hanetik ita hodi kumpre ita-nia planu iha lia-loos.

Ita bele halo planu saida deʼit? Karik ita bele serbí nuʼudar pioneiru, ka muda ba kongregasaun neʼebé presiza haklaken-naʼin. Se ita mak irmaun, ita bele serbí iha kongregasaun neʼebé presiza katuas ka atan ba kongregasaun. Ita bele koʼalia ho katuas área nian hodi husu kona-ba kongregasaun besik ita-nia área neʼebé presiza ajuda. Se ita hakarak serbí iha kongregasaun neʼebé dook, ita mós bele buka informasaun kona-ba neʼe.b

Mai ita hanoin filafali kona-ba liafuan iha Isaías (Yesaya) 62:10. Atu ema judeu bele toʼo sidade Jeruzalein, sira presiza serbisu makaʼas atu hadiʼa dalan. Ohin loron, ita mós presiza hakaʼas an atu laʼo ba oin iha ita-nia serbisu ba Jeová. Keta rende an. Ho Jeová nia ajuda, ita bele kumpre ita-nia planu. Kontinua husu matenek husi Jeová hodi bele hasai buat neʼebé hanetik ita-nia dalan. Kuandu ita halo buat hirak-neʼe, ita sei haree duni oinsá Jeová ajuda ita atu ‘halo kabeer ita-nia laʼo fatin’.—Provérbios (Amsal) 4:26.