Ajuda ita-nia maluk neʼebé soe malu ona​—Oinsá?

Ohin loron, ema barak soe malu. Karik ita mós hatene kolega ruma neʼebé soe malu ona. Tuir relatóriu iha rai-Polónia, barak husi sira neʼebé soe malu mak ho idade 30 neʼebé kaben ona ba tinan tolu toʼo neen, maibé ema neʼebé soe malu laʼós ema sira-neʼe deʼit.

Organizasaun ida iha rai-España neʼebé ajuda família hatete: “Tuir sensus iha rai-Europa, porsentu 50 husi ema neʼebé kaben, ikusmai soe malu.” Situasaun iha rai kiak sira mós hanesan.

HANOIN LA HAKMATEK

Sentimentu saida deʼit mak kona ema neʼebé soe malu? Jornál ida iha rai-Europa hatete: “Baibain, ema soe malu tanba buat triste oioin neʼebé akontese tiha ona, hanesan moris kaben nian naksobu no fahe malu. . . . Sira bele sai hirus, moe, laran-kraik, sente sala, no lakon esperansa.” Dala ruma, sentimentu hanesan neʼe book sira atu hakarak oho an deʼit. Jornál neʼe hatete tan katak kuandu ema halo desizaun metin atu soe malu ba nafatin, balu mós karik sei sente mesamesak no laran-kanek. Sira hanoin: ‘Agora, haʼu-nia moris sei sai oinsá?’

Irmán Eva neʼebé soe malu ho nia laʼen tinan balu liubá, hatete: “Haʼu sente moe tebes bainhira viziñu no kolega sira temi haʼu nuʼudar ‘feto neʼebé laʼen soe tiha’. Haʼu hirus tebetebes tanba nia husik tiha haʼu mesak ho oan naʼin-rua, haʼu presiza halaʼo responsabilidade nuʼudar inan no mós aman ba sira.”a Irmaun Adão neʼebé uluk serbí nuʼudar katuas kristaun ba tinan 12, hatete: “Kuandu haʼu soe malu, ida-neʼe halo haʼu sente moe no la iha folin toʼo dala ruma haʼu sai hirus tebes hodi hakarak dada an husi ema hotu.”

HAKAʼAS AN ATU IHA HANOIN NEʼEBÉ LOOS

Kuandu kaben-naʼin ida nia moris kaben nian naksobu, nia dala ruma hanoin barak kona-ba ninia futuru, nia sente susar atu iha hanoin neʼebé loos, no sentimentu hanesan neʼe sei la lakon lalais. Balu karik hanoin katak ema seluk la interese ona ba sira. Matenek-naʼin ida kona-ba família hatete: “Sira tenke halo mudansa oioin iha sira-nia moris no sai toman atu hasoru problema sira mesak.”

Irmaun Stanis hatete: “Kuandu haʼu ho haʼu-nia feen soe malu, nia bandu haʼu labele bá hasoru ami-nia oan-feto naʼin-rua neʼebé sei kiʼik. Ida-neʼe halo haʼu sente katak ema ida la hanoin haʼu no Jeová mós husik ona haʼu. Haʼu lakohi atu moris. Maibé neineik-neineik haʼu komprende katak hanoin hanesan neʼe laloos.” Irmán Nanda mós hanoin barak kona-ba futuru. Nia dehan: “Bainhira haʼu-nia laʼen soe haʼu, haʼu hanoin katak ema hotu, inklui mós haʼu-nia maluk kristaun, la hanoin tan haʼu ho haʼu-nia oan. Maibé agora, haʼu haree duni katak irmaun sira sempre prontu ajuda haʼu nuʼudar haʼu haboot haʼu-nia oan sira iha lia-loos.”

Sin, ema neʼebé soe malu dala ruma sai laran-kanek tebes. Karik sira hatún sira-nia an hodi sente la iha folin. Sira mós dala ruma sente katak ema seluk iha kongregasaun la hanoin sira. Maibé Stanis no Nanda nia esperiénsia hatudu mai ita katak ikusmai sira sei hafolin ajuda neʼebé ita fó bá sira nuʼudar belun.

KUANDU SIRA SENTE MESAMESAK

Maski ita hakaʼas an tebes atu ajuda ita-nia maluk neʼebé soe malu, dala ruma sira sei sente mesamesak. Irmán ida hatete katak maski nia soe malu ba tinan ualu ona, dala ruma nia sente katak nia la serve ba buat ida. Iha tempu hanesan neʼe, nia hakarak deʼit atu hadook an husi ema no tanis mesamesak.

Bíblia fó avizu ba ita hotu atu labele hadook an husi ema seluk, tanba ida-neʼe bele halo ita kontra hasoru “matenek neʼebé loos”. (Provérbios [Amsal] 18:1) Maibé, se Ita mak irmán, Ita tenke kuidadu atu la hakbesik beibeik ba irmaun ida hodi buka konsellu ka kmaan ruma, se lae Ita-nia laran bele monu ba irmaun neʼe. Nuneʼe mós ho irmaun sira.

Ita-nia maluk kristaun neʼebé soe malu ona, sira-nia emosaun tun-saʼe, hanesan sente mesamesak no laran-susar ba futuru, ka sente katak ema ida la hadomi sira. Ita hakarak banati-tuir Jeová nia ezemplu hodi hanoin no ajuda sira. (Salmo [Mazmur] 55:22; 1 Pedro 5:6, 7) Mai ita hotu hakaʼas an atu halo nuneʼe, tanba loron ida sira sei hafolin ajuda hotu neʼebé ita fó ba sira nuʼudar belun neʼebé loos!—Provérbios (Amsal) 17:17; 18:24.