Maromak nia Ukun​—Governu ida neʼebé la iha korrupsaun

Ita mós konkorda katak se karik komunidade nia morál mak aat, ema neʼebé serbisu ba governu mós sei iha hahalok aat, loos ka lae? Se nuneʼe, tenkesér iha governu ida neʼebé laʼós ita ema sala-naʼin mak harii. Tuir loloos, Bíblia fó sai kona-ba governu neʼe. Neʼe mak Maromak nia Reinu, ka Ukun, neʼebé Jesus hanorin ninia dixípulu sira husu atu toʼo mai.—Mateus 6:9, 10.

Maromak nia Reinu mak governu ida iha lalehan neʼebé sei troka ema nia governu hotu iha rai no sei ukun mundu tomak. (Salmo [Mazmur] 2:8, 9; Apokalipse 16:14; 19:19-21) Governu neʼe mós sei haraik bensaun barak ba ema, bensaun ida mak governu neʼe sei halakon korrupsaun hotu. Mai ita haree razaun neen tansá ita bele fiar hanesan neʼe.

1. KBIIT

EMA NIA GOVERNU: Atu halaʼo governu ida, presiza osan husi povu, baibain liuhusi impostu no pagamentu sira. Osan sira-neʼe mak bele sai tentasaun ba funsionáriu sira atu naʼok. Dala ruma ema mós fó osan bolsu nian ba funsionáriu sira hodi husu atu hamenus impostu neʼebé loloos sira tenke selu. Rezultadu mak estadu la bele hetan osan neʼebé natoon, tan neʼe estadu tenke hasaʼe tan folin impostu nian, no ida-neʼe book ema atu halo korrupsaun liután. Iha situasaun hanesan neʼe, ema neʼebé selu impostu ho laran-moos mak sai vítima ba korrupsaun.

MAROMAK NIA GOVERNU: Governu neʼe sei halaʼo ninia ukun ho kbiit husi Maromak Jeová,a neʼebé iha forsa boot liu hotu. (Apokalipse 11:15) Maromak nia governu neʼe la presiza ema selu impostu. Maibé tanba Maromak nia “kbiit boot” no laran-luak, ninia governu neʼe sei fó buat hotu neʼebé ninia povu sira presiza.—Isaías (Yesaya) 40:26; Salmo (Mazmur) 145:16.

2. UKUN-NAʼIN

EMA NIA GOVERNU: Susan Rose-Ackerman neʼebé foin temi, dehan, atu hapara korrupsaun, tenke “hahú husi ukun-naʼin boot sira”. Maibé susar tebes atu halo nuneʼe tanba maski governu sira hakaʼas an hapara funsionáriu públiku sira-nia korrupsaun hanesan polísia ka alfándega, maibé sira taka matan deʼit ba ukun-naʼin boot sira neʼebé halo korrupsaun. Liután neʼe, maski ukun-naʼin balu neʼebé koko makaʼas atu la halo korrupsaun mós ema sala-naʼin. Bíblia dehan: “La iha ema ida mak loos iha rai tomak neʼebé nafatin halo buat diʼak no la halo sala.”—Eclesiastes (Pengkhotbah) 7:20.

MAROMAK NIA GOVERNU: Lahanesan ho ema sala-naʼin, Jesus Kristu neʼebé Maromak hili atu sai Ukun-Naʼin ba Ninia governu, sei nunka monu ba sala. Ita bele fiar nuneʼe, tanba iha tempu uluk mós Jesus la monu ba Diabu nia tentasaun. Iha tempu neʼebá, Diabu intenta Jesus atu fó “mundu nia ukun hotu no sira-nia glória” se Jesus hakneʼak ba nia dala ida deʼit. (Mateus 4:8-10; João 14:30) Tuirmai, bainhira nia hetan terus no besik ona atu mate mós nia sei laran-metin nafatin, toʼo nia la simu tua-uvas neʼebé kahur ho ai-moruk neʼebé sei halo nia la sente moras, maibé bele halo nia neon sai bilán. (Mateus 27:34) Ikusmai, Maromak halo Jesus moris hiʼas no saʼe ba lalehan. Tan neʼe, ita bele tau fiar duni ba Jesus nuʼudar Ukun-Naʼin diʼak ba Maromak nia governu.—Filipe 2:8-11.

3. LA TROKA BÁ-MAI

EMA NIA GOVERNU: Iha rai barak, ema halo eleisaun beibeik, tanba ida-neʼe bele fó oportunidade ba povu atu troka ukun-naʼin sira neʼebé halo korrupsaun. Maibé realidade mak, maski iha rai riku ka kiak, ema nafatin halo korrupsaun iha tempu kampaña ka eleisaun. Porezemplu, ema riku sira fó osan atu apoia polítiku-naʼin ka partidu ruma hodi sira bele manán eleisaun neʼe.

Juis ida iha Tribunál Aas Liu iha rai-Estadus Unidus, naran John Paul Stevens, hatete katak ema riku sira-nia hahalok hanesan neʼe “laʼós deʼit fó impaktu ladiʼak ba governu nia lalaʼok no kualidade, maibé mós halo povu la bele tau fiar ba governu”. Tan neʼe, ema barak iha mundu tomak hanoin katak partidu polítiku sira mak sai nuʼudar knuuk ba korrupsaun.

MAROMAK NIA GOVERNU: Iha Maromak nia Ukun, korrupsaun iha tempu eleisaun nian sei la iha tanba ninia governu sei la troka bá-mai. (Daniel 7:13, 14) Governu neʼe sei la sadere ba ema nia vota tanba Maromak rasik mak hili ona ukun-naʼin ba governu neʼe. Maromak nia Ukun mós sei metin ba nafatin tanba sei la iha ema ida mak bele sobu governu neʼe. Rezultadu mak Maromak nia governu neʼe sei lori diʼak ba povu laʼós ba tempu uitoan deʼit maibé ba nafatin.

4. LEI

EMA NIA GOVERNU: Ema barak hanoin se governu ida halo lei foun, ida-neʼe sei ajuda atu hadiʼa nasaun nia situasaun. Maibé matenek-naʼin sira hatete katak tuir loloos, bainhira lei sira aumenta, ida-neʼe bele loke dalan liután ba ema atu halo korrupsaun. Liután neʼe, atu halaʼo lei foun sira hodi bele hapara korrupsaun, baibain governu tenke gasta osan barak maibé hetan rezultadu diʼak uitoan deʼit.

MAROMAK NIA GOVERNU: Maromak nia governu nia lei sira mak aas liu fali ema nia governu nia lei sira. Porezemplu, Jesus la fó lei barabarak kona-ba buat neʼebé ema tenke halo ka labele halo, maibé nia fó lei ida neʼebé ema barak bolu nuʼudar Ukun-Fuan Osan-Mean. Lei neʼe mak: “Buat hotu neʼebé imi hakarak ema halo ba imi, imi mós tenke halo ba sira.” (Mateus 7:12) Liután neʼe, Maromak nia lei sira la hanesan duni ho ema nian, tanba lei sira-neʼe bele troka ema nia hahalok no mós bele troka ema nia laran. Porezemplu Jesus hatete: “Ó tenke hadomi ó-nia maluk hanesan ó-nia an rasik.” (Mateus 22:39) Klaru katak Maromak deʼit mak bele halo lei hanesan neʼe tanba nia hatene ema nia laran no hatene sé mak halo tuir no sé mak la halo tuir.—1 Samuel 16:7.

5. LA HANOIN AN DEʼIT

EMA NIA GOVERNU: Ema halo korrupsaun tanba sira kaan-teen no hanoin an deʼit. Dala barak funsionáriu públiku no povu hotu hatudu hahalok aat hirak-neʼe. Hanoin filafali kona-ba kazu loja andár monu iha rai-Koreia Súl. Tansá mak kompañia fó osan bolsu nian ba funsionáriu públiku sira? Neʼe tanba sira hatene katak osan neʼebé fó ba funsionáriu sira mak folin kiʼik liu se kompara ho osan neʼebé sira tenke gasta atu sosa materiál ho kualidade diʼak no harii uma neʼebé tuir kritériu projetu nian.

Tan neʼe, atu hapara korrupsaun, governu tenke eduka povu atu halakon hahalok kaan-teen ka hanoin an deʼit. Maibé governu la iha kbiit no vontade atu troka povu ida-idak nia hanoin.

MAROMAK NIA GOVERNU: Governu neʼe sei fokit sai korrupsaun husi ninia abut kedas, neʼe mak hodi hanorin povu atu halakon hakarak aat oioin husi sira-nia laran.b Ida-neʼe ajuda ema ‘hafoun sira-nia dalan atu hanoin’. (Éfeso 4:23) Povu bele aprende oinsá atu halakon hahalok kaan-teen no hanoin an deʼit hodi kuda fali hahalok diʼak hanesan hanoin ema seluk nia diʼak no kontente ho buat neʼebé iha ona.—Filipe 2:4; 1 Timóteo 6:6.

6. POVU

EMA NIA GOVERNU: Maski karik governu sei halaʼo edukasaun diʼak liu atu hanorin morál neʼebé aas ba povu, maibé sei iha nafatin ema balu neʼebé halo korrupsaun ka lohi ema seluk. Tan neʼe matenek-naʼin sira dehan katak la iha governu ida mak bele halakon korrupsaun hotu. Nuneʼe, governu sira hakaʼas an atu hamenus deʼit problema neʼe tanba hatene katak sira la bele halakon korrupsaun.

MAROMAK NIA GOVERNU: Tuir Nasoins Unidas hatete, atu kombate korrupsaun, governu sira tenkesér anima ema haburas “laran-metin, laran-moos no responsabilidade”. Maski neʼe mak governu nia objetivu ida neʼebé furak, maibé Maromak nia governu sei halo buat neʼebé furak liután. Maromak nia governu neʼe laʼós deʼit anima ema, maibé mós haruka sira tenke iha hahalok diʼak sira-neʼe. Bíblia hatete ema “kaan-teen” no “bosok-teen” sei la bele sai povu ba Maromak nia governu.—1 Korinto 6:9-11; Apokalipse 21:8.

Loloos, ema bele aprende duni atu moris tuir morál neʼebé aas. Porezemplu iha tempu Bíblia nian, dixípulu ida naran Simão fó osan ba apóstolu sira hodi sosa kbiit atu halo milagre oioin, maibé apóstolu sira la simu. Sira dehan ba nia: “Hakribi sala bá no husik ó-nia dalan sira neʼebé aat.” Simão mós simu kedas konsellu neʼe, no nia husu ba apóstolu sira atu halo orasaun ba Maromak hodi nia bele hasai hanoin aat neʼe husi ninia laran.—Apóstolu 8:18-24.

OINSÁ ATU SAI POVU BA MAROMAK NIA GOVERNU?

Ita hotu iha oportunidade atu sai povu ida ba Maromak nia governu maski ita husi nasaun oioin. (Apóstolu 10:34, 35) Maibé oinsá? Ita bele hatene ida-neʼe liuhusi edukasaun neʼebé governu neʼe rasik halaʼo daudaun. Ho laran-haksolok, ami Testemuña ba Jeová bele hatudu ba Ita-Boot oinsá atu estuda Bíblia, neʼebé la selu. Maski bele estuda hamutuk ba minutu sanulu deʼit semana-semana, ita bele aprende liafuan diʼak barak kona-ba Maromak nia Ukun, inklui mós oinsá Maromak nia governu sei halakon korrupsaun iha futuru. (Lucas 4:43) Ami konvida Ita-Boot atu kontaktu Testemuña ba Jeová ida neʼebé hela besik iha ita-nia hela-fatin, ka loke sítiu www.jw.org/tdt.