Resposta ba pergunta sira kona-ba Bíblia
Loron ida sei iha governu ida neʼebé ukun mundu tomak ka lae?
Oinsá mak Maromak nia governu sei halo ema husi nasaun hotu sai povu ida deʼit? Isaías (Yesaya) 32:1, 17; 54:13
Hanoin toʼok, se iha governu ida deʼit mak ukun mundu tomak, mundu neʼe sei sai oinsá? Ohin loron ema barak moris susar tanba kiak, no ema uitoan deʼit mak moris diʼak no riku tebes. Maibé se karik governu ida mak ukun hodi hanoin ema hotu nia diʼak, governu neʼe sei tau matan ba povu hotu nia presiza. Tuir Ita-Boot nia hanoin, ita ema bele harii governu ida hanesan neʼe ka lae?—Lee Jeremias (Yeremia) 10:23.
Husi tempu uluk toʼo ohin loron, maski governu barak koko atu hadiʼa ema nia problema oioin, maibé sira la konsege lori buat diʼak ba povu, liuliu ba ema kiak sira. Iha mós governu balu neʼebé hanehan povu. (Eclesiastes [Pengkhotbah] 4:1; 8:9) Maibé Maromak Kbiit Boot Liu Hotu promete ona katak ninia governu sei troka ema nia governu hotu iha rai, no Ukun-Naʼin ba governu neʼe sei tau matan didiʼak ninia povu hodi hanoin ba povu nia diʼak.—Lee Isaías (Yesaya) 11:4; Daniel 2:44.
Maromak nia governu sei halo saida?
Maromak Jeová hili ona Ukun-Naʼin ida neʼebé diʼak tebes, neʼe mak ninia Oan-Mane Jesus. (Lucas 1:31-33) Bainhira Jesus sei iha rai, nia hanoin tebes ema no ajuda sira. Nuʼudar Liurai iha lalehan, Jesus sei halo ema husi nasaun hotu sai povu ida deʼit ba ninia ukun no halakon ema nia terus hotu.—Lee Salmo (Mazmur) 72:8, 12-14.
Maibé ema hotu sei simu Jesus nuʼudar Ukun-Naʼin ka lae? Lae. Maski nuneʼe, Maromak Jeová iha pasiénsia boot. (2 Pedro 3:9) Agora daudaun, Maromak sei fó tempu ba ema atu aprende kona-ba Ninia ukun no simu Jesus nuʼudar Liurai. Maibé lakleur tan, Jesus sei halakon ema aat hotu iha mundu neʼe no lori dame ba mundu tomak.—Lee Miquéias (Mikha) 4:3, 4.