Rona ba avizu bele salva ita-nia moris!

IHA loron 26 Dezembru 2004, ema iha illa ida naran Simeulue iha Sumatra norte sente rai-nakdoko makaʼas. Sira hateke ba tasi, no haree katak tasi neʼe maran la hanesan baibain. Ema hotu komesa halai kedas ba foho, hodi hakilar dehan “Smong! Smong!”, katak “tsunami”. Latoʼo minutu 30, laloran boot mai no sobu knua hotu.

Illa Simeulue mak fatin primeiru neʼebé tsunami toʼo antes tsunami neʼe toʼo ba Aceh. Maibé, husi ema naʼin-78.000 neʼebé hela iha illa neʼe, ema naʼin-hitu deʼit mak mate. Tanbasá mak ema barak liu bele salva sira-nia moris?a Neʼe tanba sira iha lia-dadolin ida dehan: ‘Se rai nakdoko makaʼas no tasi-been maran ona, halai ba foho bá, tanba tasi sei saʼe.’ Liuhusi esperiénsia iha tempu uluk, ema Simeulue hatene ona katak, tasi-maran mak sinál atu tsunami sei mai. Tanba sira halo tuir avizu neʼe, sira konsege salva sira-nia moris.

Bíblia hatete katak lakleur tan sei akontese dezastre boot ida, neʼebé hanaran “terus boot”. Kona-ba neʼe, Bíblia dehan: “Husi mundu hahú toʼo agora seidauk mosu terus hanesan neʼe, no depois neʼe sei la mosu fali.” (Mateus 24:21) Maibé neʼe laʼós katak planeta mundu sei naksobu tanba funu ka dezastre naturál ruma. Maromak nia hakarak mak atu mundu neʼe hela ba nafatin. (Eclesiastes [Pengkhotbah] 1:4) Tuir loloos, terus boot neʼe mak tempu neʼebé Maromak sei tesi lia ba “ema neʼebé estraga rai”, no halakon buat aat no ema nia susar hotu. (Apokalipse 11:18; Provérbios [Amsal] 2:22) Neʼe mak esperansa neʼebé kapás!

Terus boot neʼe la hanesan duni ho tsunami ka rai-nakdoko, neʼebé halo ema diʼak no ema aat mate hotu. Tuir Bíblia, “Maromak mak domin”, no Maromak neʼebé iha naran Jeová, promete katak “ema laran-loos sei simu rai, no sira sei moris ba nafatin iha neʼebá”. (1 João 4:8; Salmo [Mazmur] 37:29) Maibé, oinsá mak Ita bele moris liu terus boot no hetan Maromak nia bensaun? Ita tenke rona ba avizu, no halo tuir!

MATAN-MORIS BA SITUASAUN MUNDU NIAN

Ita la bele hatene sá loron mak Maromak sei halakon buat aat no ema nia terus. Jesus dehan: “Kona-ba loron no oras, ema ida la hatene, anju sira iha lalehan la hatene no Oan-Mane mós la hatene, só deʼit Aman.” Nuneʼe, Jesus haruka ita atu “matan-moris nafatin”. (Mateus 24:36; 25:13) Matan-moris kona-ba saida? Bíblia fó-hatene nanis kona-ba situasaun mundu neʼe nian neʼebé sei mosu antes Maromak halakon mundu aat neʼe. Hanesan tasi-maran mak sinál ba ema Simeulue katak tsunami besik ona atu mai, nuneʼe mós situasaun mundu nian bele sai nuʼudar sinál ba ita katak mundu neʼe besik ona atu ramata. Haree toʼok kaixa iha leten.

Klaru katak akontesimentu balu mosu ona iha tempu uluk liu kedas. Maibé Jesus dehan katak bainhira ita haree “buat hotu neʼe”, ita bele hatene katak mundu nia rohan besik ona. (Mateus 24:33) Tan neʼe husu ba ita-nia an: ‘Bainhira loos mak buat sira-neʼe hotu (1) mosu iha mundu tomak? (2) mosu dala ida deʼit iha tempu neʼebé hanesan? no (3) aumenta ba beibeik?’ Ita bele fiar katak ita moris daudauk iha tempu neʼe.

MAROMAK HATUDU DOMIN

Eis-prezidente ida iha rai-Amérika dehan: “Avizu neʼebé hatoʼo nanis ba ema sei salva sira-nia moris.” Tan neʼe, depois tsunami boot iha tinan 2004, governu sira organiza atu fó avizu kona-ba tsunami hodi dezastre hanesan neʼe la bele akontese tan. Hanesan neʼe mós, Maromak fó avizu nanis antes nia sei halakon mundu neʼe. Bíblia dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.”—Mateus 24:14.

Iha tinan kotuk, Testemuña ba Jeová uza oras 1.900.000.000 liu atu haklaken liafuan diʼak iha rai 240 ho língua hamutuk 700 liu. Neʼe mak evidénsia boot neʼebé hatudu ho klaru katak mundu neʼe nia rohan besik ona. Tanba domin ba ema seluk, sira hakaʼas an fó avizu ba ema kona-ba Maromak nia loron tesi-lia nian neʼebé besik ona atu mai. (Mateus 22:39) No Maromak Jeová nia domin neʼe toʼo duni ba Ita. Hanoin-hetan, Maromak “lakohi ema ida lakon maibé nia hakarak ema hotu atu hakribi sala”. (2 Pedro 3:9) Ita hakarak simu Maromak nia domin no rona ba ninia avizu ka lae?

HALAI-SEES HUSI DEZASTRE BOOT!

Hanoin-hetan, ema iha illa Simeulue halai ba fatin aas bainhira sira haree tasi-maran. Sira la hein toʼo laloran tasi mai fali. Sira la demora atu halai ba foho, tan neʼe mak sira bele salva sira-nia an. Hanesan neʼe mós, atu ita bele salva ita-nia moris husi tempu terus boot, ita labele demora atu halai. Maibé halai bá neʼebé? No oinsá? Maromak uza profeta Isaías atu hakerek konvite ba ita hotu neʼebé moris daudaun iha “loron ikus sira”, hodi dehan: “Mai, mai ita saʼe ba Jeová nia foho . . . Nia sei hanorin ita kona-ba ninia dalan sira, no ita sei laʼo iha ninia dalan sira.”—Isaías (Yesaya) 2:2, 3.

Bainhira ita saʼe ba foho, ita bele haree buat hotu iha kraik, no ita mós bele hasees an husi perigu oioin neʼebé akontese iha kraik. Nuneʼe mós ho aprende Bíblia atu buka-hatene Maromak nia hakarak, ida-neʼe ajuda ona ema rihun ba rihun atu troka sira-nia moris. (2 Timóteo 3:16, 17) Hodi halo nuneʼe, sira bele ‘laʼo iha Maromak nia dalan sira’ no haksolok hodi hetan protesaun husi Maromak.

Oinsá ho Ita? Ami hakarak anima Ita atu hanoin didiʼak kona-ba sinál sira neʼebé Bíblia fó-hatene nanis ona, kona-ba buat neʼebé sei akontese iha “loron ikus sira”. Testemuña ba Jeová iha Ita-nia área sei prontu atu ajuda Ita atu komprende eskritura sira no mós oinsá atu aplika iha Ita rasik nia moris. Ita mós bele buka-hetan resposta ba Ita-nia pergunta sira hodi loke ami-nia sítiu, www.jw.org/id. Loke AJARAN ALKITAB > PERTANYAAN ALKITAB DIJAWAB.