Kompara Ita-nia fiar ho Bíblia nia hanorin

ITA mós fiar Naʼi Jesus ka lae? Se nuneʼe, Ita mak ema ida husi ema naʼin-2.000.000.000 liu iha mundu tomak neʼebé dehan katak sira mak Kristu nia dixípulu. Ohin loron, iha grupu rihun ba rihun neʼebé hanorin kona-ba Kristu, maibé sira ida-idak nia hanorin la hanesan, ka dala ruma kontra malu. Tan neʼe, karik Ita-nia fiar mós la hanesan ho ema seluk neʼebé fiar Jesus. Entaun, importante ka lae, atu hanoin kona-ba Ita rasik nia fiar? Sin, se Ita hakarak moris tuir Jesus nia hanorin neʼebé hakerek ona iha Bíblia, importante tebes atu kompara Ita-nia fiar ho Bíblia nia hanorin.

Lakleur depois Jesus Kristu mate, ninia dixípulu sira hahú hanaran an nuʼudar ema “kristaun”. (Apóstolu 11:26) Sira bolu sira-nia an nuʼudar “kristaun” deʼit, sira la presiza naran seluk, tanba sira iha fiar ida deʼit. Sira hotu halo tuir hanorin husi Jesus Kristu, neʼebé harii relijiaun “kristaun”. Entaun, Ita-nia igreja nia hanorin mak hanesan ho Kristu nia hanorin ka lae? Ita-nia fiar hanesan ho ema kristaun sira-nia fiar iha tempu uluk ka lae? Atu buka-hatene kona-ba neʼe, Ita presiza duni loke Bíblia no kompara ho Ita-nia fiar.

Hanoin toʼok: Jesus Kristu hatudu respeitu neʼebé kleʼan ba Eskritura sira nuʼudar Maromak nia Liafuan. Nia la kontente ho ema neʼebé la halo tuir Bíblia hodi hafolin liu ema nia lisan. (Marcos 7:9-13) Tan neʼe, ita bele fiar katak Jesus nia dixípulu neʼebé loos mak ema neʼebé sira-nia hanorin hotu bazeia ba Bíblia. Entaun, husu toʼok ba Ita-nia an: ‘Bíblia apoia haʼu-nia igreja nia hanorin sira ka lae?’ Atu hatán ba pergunta neʼe, Ita presiza duni kompara Ita-nia igreja nia hanorin ho buat neʼebé Bíblia hanorin.

Jesus hatete katak ita tenke adora Maromak ho lia-loos, no lia-loos neʼe mai husi Bíblia. (João 4:24; 17:17) Apóstolu Paulo mós hatete katak ema neʼebé “hatene didiʼak kona-ba lia-loos” mak sei hetan salvasaun. (1 Timóteo 2:4) Loos, importante ba ita atu iha fiar neʼebé bazeia ba lia-loos husi Bíblia, tanba se lae, ita sei la hetan salvasaun!

OINSÁ ATU KOMPARA ITA-NIA FIAR HO BÍBLIA NIA HANORIN

Favór ida, lee pergunta neen iha kraik no mós resposta husi Bíblia ba pergunta ida-idak. Loke Ita rasik nia Bíblia no hanoin didiʼak kona-ba resposta sira-neʼe. Tuirmai, husu toʼok ba Ita-nia an: ‘Haʼu-nia igreja mós hanorin hanesan neʼe ka lae?’

Halo hanesan neʼe bele ajuda Ita atu hanoin didiʼak kona-ba Ita rasik nia fiar, no neʼe sei lori bensaun boot ba Ita-nia moris. Ita mós hakarak kompara Ita-nia igreja nia hanorin ho Bíblia nia hanorin kona-ba tópiku seluk ka lae? Ami Testemuña ba Jeová kontente atu ajuda Ita buka-hatene lia-loos husi Bíblia. Ita bele husu Testemuña ba Jeová ida atu estuda Bíblia hamutuk hodi la selu. Ka Ita mós bele loke ami-nia sítiu, www.jw.org/tdt.

1 PERGUNTA: Sé mak Maromak neʼebé loos?

RESPOSTA: Jesus nia Aman mak Maromak neʼebé la iha hun no rohan, no mós Kriadór ba buat hotu-hotu. Ninia naran mak Jeová.

SAIDA MAK BÍBLIA HANORIN:

“Kuandu ami halo orasaun ba imi, ami sempre fó-agradese ba Maromak, ita Naʼi Jesus Kristu nia Aman.”—Koloso 1:3.

“Jeová, ami-nia Maromak, Ita-Boot merese simu glória, hahiʼi no kbiit, tanba Ita kria ona buat hotu.”—Apokalipse 4:11.

Lee mós Roma 10:13; 1 Timóteo 1:17.

2 PERGUNTA: Sé mak Jesus Kristu?

RESPOSTA: Jesus mak Maromak nia Oan primeiru. Maromak mak kria Jesus, neʼe katak Jesus iha hun. Jesus hakruʼuk an ba Maromak no halo tuir Ninia hakarak.

SAIDA MAK BÍBLIA HANORIN:

“Aman mak boot liu haʼu.”—João 14:28.

“[Jesus] mak ilas husi Maromak neʼebé matan la bele haree, oan primeiru husi kriasaun sira hotu.”—Koloso 1:15.

Lee mós Mateus 26:39; 1 Korinto 15:28.

3 PERGUNTA: Saida mak espíritu santu?

RESPOSTA: Espíritu santu mak Maromak nia forsa neʼebé Nia uza atu kumpre Ninia hakarak. Neʼe la hanesan ho anju ida. Maromak bele haraik espíritu santu hodi fó kbiit ba ema.

SAIDA MAK BÍBLIA HANORIN:

“Kuandu Isabel rona Maria nia kumprimenta, labarik neʼebé iha Isabel nia knotak book an makaʼas, no Isabel sai nakonu ho espíritu santu.”—Lucas 1:41.

“Kuandu espíritu santu tun ba imi, imi sei simu kbiit.”—Apóstolu 1:8.

Lee mós Gênesis (Kejadian) 1:2; Apóstolu 2:1-4; 10:38.

4 PERGUNTA: Saida mak Maromak nia Reinu?

RESPOSTA: Neʼe mak governu ida iha lalehan. Jesus mak Liurai ba Maromak nia governu neʼe. Lakleur tan, governu neʼe sei kumpre Maromak nia hakarak iha mundu.

SAIDA MAK BÍBLIA HANORIN:

Ba dala hitu, anju ida tan huu ninia trombeta. No iha lian sira neʼebé makaʼas iha lalehan dehan: ‘Agora ita-nia Maromak no ninia Kristu mak ukun mundu tomak, no nia sei ukun nuʼudar liurai ba nafatin.’”—Apokalipse 11:15.

Lee mós Daniel 2:44; Mateus 6:9, 10.

5 PERGUNTA: Ema diʼak hotu sei saʼe ba lalehan ka lae?

RESPOSTA: Lae. Só deʼit ema neʼebé Maromak hili ona mak bá lalehan. Sira sei ukun mundu tomak hamutuk ho Jesus nuʼudar liurai. Jesus bolu sira nuʼudar ninia “bibi-lubun kiʼik”.

SAIDA MAK BÍBLIA HANORIN:

“Keta taʼuk, bibi-lubun kiʼik, tanba imi-nia Aman deside ona atu fó ba imi Ukun neʼe.”—Lucas 12:32.

“Sira sei sai nuʼudar amlulik ba Maromak no Kristu, no sei ukun nuʼudar liurai.”—Apokalipse 20:6.

Lee mós Apokalipse 14:1, 3.

6 PERGUNTA: Saida mak Maromak nia hakarak ba rai no ema?

RESPOSTA: Iha Maromak nia Ukun, mundu neʼe sei sai hanesan jardín neʼebé furak, no ema neʼebé laran-metin sei moris ba nafatin ho saúde perfeitu, dame no haksolok.

SAIDA MAK BÍBLIA HANORIN:

“Ema laran-maus sei simu rai nuʼudar sira-nian, no sira sei . . . iha dame barak.”—Salmo (Mazmur) 37:10, 11.

“Nia sei hamaran sira-nia matan-been hotu husi sira-nia matan, no mate sei la iha tan, no ema sei la tanis tan ka laran-susar ka laran-triste.”—Apokalipse 21:3, 4.

Lee mós Salmo (Mazmur) 37:29; 2 Pedro 3:13.