Madre sira neʼebé ikusmai sai fali ita-nia irmán

Felisa: Haʼu moris iha España. Ami-nia família mak família neʼebé relijiozu tebes, ami fiar ba Katólika. Husi ami-nia família, ema naʼin-13 mak sai ona padre ka serbisu ba igreja. Amá nia primu ida hanorin iha eskola Katólika, nia mós padre ida no bainhira nia mate tiha, amu-papa João Paulo II mak foti nia sai beatu. Apá badain-besi ida, no amá serbisu iha toos. Haʼu iha alin naʼin-hitu no haʼu mak oan-boot.

Iha tempu funu sivíl akontese iha España, haʼu foin tinan 12. Funu remata tiha, governu hatama apá ba komarka tanba sira la gosta ninia ideia polítiku nian. Ida-neʼe halo susar ba amá atu fó han ami. Tan neʼe ninia kolega ida fó sujestaun ba nia hodi haruka haʼu-nia alin-feto naʼin-tolu, Araceli, Lauri, no Ramoni, atu bá hela ho madre sira iha konventu ida iha sidade Bilbao, atu nuneʼe sira la bele hamlaha.

Araceli: Iha tempu neʼebá haʼu tinan 14, Lauri tinan 12, no Romani tinan 10. Ami hanoin tebes ami-nia família. Iha konventu ami-nia serbisu mak hamoos. Tinan rua liutiha, madre sira haruka fali ami bá konventu boot ida iha sidade Zaragoza atu tau matan ba ema ferik-katuas sira. Iha neʼebá ami serbisu hamoos dapur, no serbisu neʼe halo ami kole tebes.

Felisa: Bainhira haʼu-nia alin-feto sira bá tiha Zaragoza, amá ho haʼu-nia tiun padre ida, foti desizaun katak diʼak mós atu haruka haʼu ba serbisu iha konventu neʼe. Sira halo nuneʼe tanba sira hatene iha mane ida gosta haʼu no atu hasees haʼu husi mane neʼe. Tanba haʼu ema neʼebé relijiozu, haʼu mós gosta ideia neʼe atu hela iha konventu. Haʼu tuir misa loroloron, no haʼu mós gosta atu sai misionária ida hanesan haʼu-nia amá nia família ida iha rai-Áfrika.

Haʼu sente moris iha konventu hanesan moris iha komarka, iha buat barak mak haʼu la bele halo. Madre sira sempre halakon haʼu-nia laran-manas atu bá rai seluk hodi serbí Maromak. Tan neʼe, tinan ida liutiha, haʼu foti desizaun atu fila fali ba uma hodi tau matan ba haʼu-nia tiun padre neʼe. Haʼu halo ninia serbisu uma-laran, no iha kalan ami reza tersu hamutuk. Haʼu mós gosta enfeita ai-funan sira iha igreja laran no orna Maria no “santu-santa” sira-nia estátua.

Araceli: Bainhira iha Zaragoza mak haʼu halo haʼu-nia juramentu primeiru atu sai madre ida. Halo tiha juramentu, madre sira deside hodi fahe ami biin-alin naʼin-tolu. Sira haruka haʼu ba konventu ida iha Madrid, Lauri bá Valencia, no Romani hela iha Zaragoza. Iha Madrid haʼu halo tan juramentu ida atu sai madre. Iha konventu Madrid, sira simu ema barak hodi hela iha neʼebá. Iha estudante sira, katuas-ferik, no bainaka sira. Tan neʼe iha serbisu barak tebes atu halo. Haʼu serbisu iha konventu nia ospitál.

Haʼu hanoin katak madre nia moris mak kapás tebes. Haʼu hanoin katak sai madre bele iha oportunidade barak atu lee no estuda kona-ba Bíblia. Maibé laiha ema ida mak koʼalia kona-ba Maromak ka Jesus, no ami mós nunka uza Bíblia. Buat neʼebé haʼu aprende mak língua latín uitoan no estuda kona-ba “santu-santa” sira-nia moris, no adora Maria. Buat seluk tan laiha, maibé serbisu deʼit.

Neʼe halo haʼu komesa estrese no hanoin barak. Haʼu koʼalia ba madre boot katak haʼu hakarak sai husi neʼe. Haʼu hatete ba nia katak haʼu mai serbisu makaʼas iha neʼe, maibé ema seluk mak tau osan iha sira-nia bolsu. Se hanesan neʼe, diʼak liu haʼu bá buka osan atu tau matan ba haʼu-nia família. Maibé nia sulan haʼu iha kadeia kiʼik ida, tanba nia hanoin halo hanesan neʼe bele troka haʼu-nia hanoin hodi hela nafatin iha konventu neʼe.

Tuirmai madre sira husik haʼu sai husi kadeia neʼe, maibé haʼu hakarak nafatin atu sai, entaun sira hatama fali haʼu no sira halo nuneʼe ba dala tolu. Ikusmai tanba haʼu kaer metin nafatin ba haʼu-nia desizaun, sira dehan ba haʼu se haʼu hakarak sai, haʼu tenke hakerek deklarasaun ida neʼebé hatete, “Haʼu sai tanba haʼu hakarak atu serbí Satanás laʼós Maromak.” Haʼu hakfodak tebes ho ninia liafuan. Haʼu hakarak nafatin atu sai, maibé haʼu sei la simu atu hakerek liafuan sira-neʼe. Ikus, haʼu husu atu ba koʼalia ho padre ida, no haʼu konta ba nia buat saida mak akontese. Depois nia hetan lisensa husi bispu dioseze hodi muda fali haʼu ba konventu iha Zaragoza. Fulan hirak liutiha, haʼu hetan duni lisensa hodi sai husi konventu. Lakleur, Lauri, Romani mós sai husi konventu.

LIVRU NEʼEBÉ HAKETAK AMI

Felisa: Tempu balu liutiha, haʼu kaben no muda ba Cantabria. Haʼu tuir nafatin misa beibeik, no iha domingu ida, padre ida kaer hela livru The Truth That Leads to Eternal Life iha ninia liman no hatudu ba livru neʼe ho hirus dehan, “Haree livru ida-neʼe, se ema fó livru neʼe ba imi, lori mai haʼu ka soe tiha!”

Haʼu nunka simu livru neʼe, maibé haʼu hakarak tebes atu iha ida. Loron hirak liutiha, iha Testemuña naʼin-rua dere haʼu-nia odamatan no sira oferese duni livru neʼe ba haʼu. Iha kalan neʼe haʼu lee hotu kedas livru neʼe. Bainhira Testemuña rua neʼe mai fali hodi husu haʼu atu estuda Bíblia, haʼu hatán kedas atu estuda ho sira.

Haʼu sempre gosta kona-ba lia-loos. Bainhira haʼu aprende lia-loos kona-ba Jeová, haʼu hadomi tebes nia, no haʼu hakarak tebes atu fó-hatene ba ema hotu kona-ba nia. Haʼu hetan batizmu iha tinan 1973. Haʼu sempre hakaʼas an atu buka oportunidade hodi haklaken ba haʼu-nia família sira. Maibé ba sira, liuliu ba Araceli, nia fiar katak haʼu fiar ona buat neʼebé sala.

Araceli: Iha konventu, sira trata haʼu aat tebes, neʼe halo haʼu sente laran-kanek no la gosta haʼu-nia relijiaun. Maibé semana-semana haʼu tuir misa nafatin no reza tersu loroloron. Haʼu sei hakarak nafatin atu komprende kona-ba Bíblia, no haʼu husu beibeik ba Maromak atu ajuda haʼu. Felisa, haʼu-nia alin-feto, koʼalia beibeik ba haʼu kona-ba ninia relijiaun, no bainhira nia koʼalia kona-ba ninia fiar, nia sempre koʼalia ho laran-manas, neʼe halo haʼu hanoin katak nia bulak ona. Haʼu sempre kontra buat neʼebé nia koʼalia ba haʼu.

Tinan hirak liutiha, haʼu fila fali ba serbisu iha Madrid no haʼu mós kaben. Haʼu sai duvida tebes ba relijiaun, tanba haʼu haree katak ema sira neʼebé tuir misa beibeik nunka halo tuir buat neʼebé Jesus hanorin. Tan neʼe, haʼu la bá tan igreja ona. Tuir haʼu-nia hanoin, padre sira la bele fó perdua ba sala. Haʼu mós la fiar tan ba “santu-santa”, no infernu. Haʼu soe hotu haʼu-nia estátua sira. Maibé haʼu duvida nafatin tanba haʼu la hatene buat sira neʼebé haʼu halo mak loos ka sala. Haʼu halo orasaun nafatin ba Maromak hodi dehan: “Haʼu hakarak atu hatene Ita-Boot. Ajuda haʼu bá!” Haʼu sei hanoin-hetan Testemuña ba Jeová sira mai dere beibeik odamatan, maibé haʼu nunka loke ba sira. Neʼe tanba haʼu la fiar tan ba relijiaun sira.

Iha tempu neʼebá Lauri bá hela tiha iha rai-Fransa, no Ramoni hela nafatin iha España. Maizumenus iha tinan 1980, sira komesa estuda Bíblia hamutuk ho Testemuña ba Jeová. Maibé ba haʼu, haʼu fiar katak ema mós lohi ona sira hanesan ema lohi Felisa. Ikusmai haʼu sai belun ho haʼu-nia viziñu ida naran Angelines. Nia mós Testemuña ba Jeová. Nia ho ninia laʼen husu beibeik haʼu atu estuda Bíblia. Sira bele haree katak maski haʼu la gosta ona kona-ba relijiaun, maibé haʼu hamrook nafatin kona-ba Bíblia nia koñesimentu. Toʼo ikus haʼu hatete ba sira: “Diʼak. Maibé se haʼu uza haʼu-nia Bíblia rasik, haʼu sei estuda ho imi.” Bíblia neʼebé haʼu uza mak tradusaun Nácar-Colunga nian.

BÍBLIA HALO AMI HAMUTUK FALI

Felisa: Bainhira haʼu hetan batizmu iha tinan 1973, iha deʼit Testemuña maizumenus naʼin-70 iha kapitál Santander, provínsia Cantabria, España. Ami-nia haklaken fatin boot tebes. Iha rai neʼe, iha knua atus ba atus, no ami presiza haklaken ba ema iha knua sira-neʼe. Foufoun ami bá ho bís, maibé ikusmai ami bá ho ami-nia karreta deʼit.

Iha tinan sira-neʼe haʼu estuda ona Bíblia ho ema barak, no estudante Bíblia naʼin-11 mak hetan ona batizmu. Sira barak neʼebé haʼu estuda mak ema katólika. Tanba uluk haʼu mós katólika, haʼu komprende katak haʼu tenke pasiénsia tanba presiza duni tempu atu bele halakon hotu fiar neʼebé sira iha ona hori uluk kedas. Haʼu hatene katak só Jeová nia espíritu santu deʼit mak bele troka ema nia hanoin no ajuda sira atu komprende kona-ba Bíblia. (Ebreu 4:12) Haʼu-nia laʼen Bienvenido uluk polísia, nia hetan batizmu iha tinan 1979. No antes haʼu-nia amá mate, amá mós komesa ona estuda Bíblia.

Araceli: Bainhira haʼu estuda ho Testemuña sira, haʼu duvida nafatin kona-ba buat neʼebé haʼu aprende. Maibé nuʼudar tempu liu daudaun, haʼu sente katak haʼu la hirus hanesan uluk ona. Haʼu bele haree duni katak Testemuña sira halo tuir buat neʼebé Bíblia hanorin. Haʼu-nia fiar ba Jeová no ba Bíblia mós komesa aumenta, no neʼe halo haʼu kontente fali. Viziñu balu mós bele haree katak haʼu la hanesan uluk ona, sira dehan mai haʼu, “Araceli, labele husik dalan neʼebé Ita hili daudauk!”

Haʼu sei hanoin-hetan iha orasaun haʼu dehan: “Obrigadu Jeová tanba Ita sempre pasiénsia hodi fó oportunidade barak tebes mai haʼu atu buka-hetan buat neʼebé haʼu buka kleur ona, neʼe mak Bíblia nia koñesimentu neʼebé loos.” Haʼu husu ona deskulpa ba Felisa atu perdua haʼu ba liafuan ladiʼak neʼebé uluk haʼu koʼalia ba nia. Agora ami la diskute malu ona, maibé ami gosta koʼalia ba malu kona-ba Bíblia. Haʼu hetan batizmu iha tinan 1989, iha tempu neʼebá haʼu tinan 61.

Felisa: Agora haʼu tinan 91 no haʼu-nia forsa la hanesan uluk ona. Haʼu-nia laʼen mós mate ona. Maibé haʼu lee nafatin Bíblia loroloron, no hakaʼas an atu tuir reuniaun no bá haklaken.

Araceli: Haʼu gosta koʼalia ba padre no madre sira kona-ba Jeová, karik neʼe tanba uluk haʼu mós madre ida. Sira balu gosta atu koʼalia kona-ba Bíblia no balu gosta lee ita-nia livru sira. Haʼu sei hanoin-hetan iha padre ida, haʼu halo vizita fali ba nia dala hira ona, no nia dehan ba haʼu: “Araceli, haʼu konkorda ho buat neʼebé Ita koʼalia, maibé ho haʼu-nia idade neʼe, haʼu atu bá iha neʼebé? Ema sira iha parókia no haʼu-nia família sira sei koʼalia saida ba haʼu?” Haʼu hatán ba nia: “No Maromak sei hatete saida ba Ita?” Nia konkorda maibé ho triste, nia haree hanesan la brani atu troka ninia fiar.

Haʼu nunka haluha tempu neʼebé haʼu-nia laʼen hatete ba haʼu katak nia mós hakarak bá tuir reuniaun sira. Maski iha tempu neʼebá nia tinan 80, maibé komesa husi tempu neʼe nia nunka falta reuniaun sira. Nia mós komesa estuda Bíblia toʼo sai haklaken-naʼin ida. Haʼu sei hanoin kona-ba tempu solok neʼebé ami bá haklaken hamutuk. Fulan rua antes nia atu hetan batizmu mak nia foin mate.

Felisa: Iha tempu neʼebé haʼu foin serbí Jeová, haʼu-nia alin-feto naʼin-tolu kontra haʼu. Maibé ikusmai sira mós simu lia-loos. Neʼe mak buat neʼebé furak tebes ba haʼu-nia moris. Liutiha neʼe, ami bele koʼalia ba malu kona-ba ami-nia Maromak Jeová no kona-ba ninia Liafuan! Toʼo ikus ami sai duni irmán hodi adora Jeová hamutuk.a (Haree nota iha kraik.)