Hakaʼas an banati-tuir ezemplu diʼak sira

HAʼU moris iha Wichita, Kansas, Estadus Unidus iha 10 Dezembru 1936. Haʼu mak oan boot husi oan naʼin-haat. Haʼu-nia inan-aman, William no Jean serbí Jeová ho laran-metin. Apá serbí nuʼudar katuas neʼebé tau matan ba kongregasaun. Haʼu-nia amá aprende lia-loos husi ninia inan, Emma Wagner. Haʼu-nia avó-feto neʼe hanorin lia-loos ba ema barak, inklui mós Gertrude Steele, neʼebé serbí nuʼudar misionáriu iha Porturriku ba tinan barak.a (Haree nota iha kraik.) Iha duni ezemplu barak ba haʼu atu banati-tuir.

APRENDE HUSI EZEMPLU DIʼAK SIRA

Loron ida, bainhira haʼu tinan lima, haʼu ho apá haklaken iha dalan hodi fahe Livru Haklaken no Matan-moris bá! Tempu neʼe mak Funu Mundiál Segundu maibé haʼu-nia apá neutrál deʼit. Doutór ida neʼebé lanu hela hakbesik ami no duun katak haʼu-nia apá mak taʼuk-teen no fó razaun deʼit atu la tama militár. Doutór neʼe see ninia oin rabat ba apá nia oin no hatete, “Tansá la baku toʼok haʼu, taʼuk-teen!” Haʼu taʼuk tebes, maibé haʼu gaba tebes apá tanba nia fahe nafatin livru sira ba ema neʼebé hobur ami. Depois, soldadu ida mai, no doutór neʼe hakilar ho lian makaʼas dehan, “Haree toʼok taʼuk-teen neʼe!” Maibé soldadu neʼe haree katak doutór neʼe lanu, nia dehan ba doutór, “Bá uma no fase ó-nia oin!” Depois neʼe, sira rua bá tiha. Haʼu agradese ba Jeová tanba nia fó aten-brani ba apá. Komik mak, apá iha salon rua iha Wichita, no doutór neʼe mak apá nia kliente ida!

Bainhira haʼu tinan ualu, haʼu-nia inan-aman faʼan tiha uma no salon no uza deʼit uma-karreta ida hodi muda ba Colorado, besik Grand Junction tanba fatin neʼe presiza tan haklaken-naʼin. Haʼu-nia inan-aman pioneiru iha neʼebá no serbisu part-time iha toʼos no tau matan ba animál sira. Sira haklaken ho badinas no tanba Jeová nia bensaun, lakleur iha ona kongregasaun ida. Iha 20 Juñu 1948, apá fó batizmu haʼu iha mota ida, hamutuk ho ema seluk neʼebé simu ona lia-loos, hanesan Billie Nichols ho ninia feen. Ikusmai, irmaun Nichols sira serbí nuʼudar katuas área, no sira-nia oan-mane ho ninia feen mós ikusmai halo hanesan.

Ami sai belun diʼak ho irmaun-irmán barak neʼebé badinas iha Jeová nia serbisu, liuliu família Steele—Don ho Earlene, Dave ho Julia, no Si ho Martha. Ami gosta tebes koʼalia kona-ba Bíblia ho sira, no sira hotu hatudu ezemplu diʼak tebes ba haʼu no haʼu aprende katak, se ita tau uluk Jeová nia Ukun, ita sei hetan ksolok iha ita-nia moris.

MUDA TAN

Bainhira haʼu 19, irmaun ida neʼebé sai ami-nia belun diʼak naran Bud Hasty, husu haʼu atu muda ba Estadus Unidus nia parte súl hodi pioneiru hamutuk ho nia. Katuas área nian husu ami muda ba Ruston, Louisiana, neʼebé iha Testemuña barak maibé la tuir ona reuniaun. Nia dehan, maski ema seluk la tuir reuniaun, maibé nia hakarak ami atu halaʼo reuniaun sira kada semana. Lakleur ami hetan fatin ida neʼebé ami hadiʼa atu uza halaʼo reuniaun. Semana-semana ami la falta atu halaʼo reuniaun sira, maibé ba tempu uitoan, ami naʼin-rua deʼit mak tuir. Ami troka malu hodi sai rona-naʼin, se ida mak hatoʼo parte, ida seluk hatán pergunta hotu. Se karik iha drama kiʼik atu halo, ami naʼin-rua saʼe hotu plataforma. Ikusmai, irmán ferik ida komesa tuir reuniaun, no lakleur estudante Bíblia balu no irmaun-irmán balu mós komesa tuir reuniaun. Liutiha tempu uitoan, ami sai kongregasaun boot ida.

Loron ida, haʼu no Bud hasoru ulun-naʼin relijiaun ida no nia koʼalia kona-ba eskritura balu neʼebé haʼu seidauk hatene. Ida-neʼe fanu haʼu no halo haʼu hanoin kona-ba saida mak haʼu fiar. Ba semana ida, haʼu estuda toʼo kalan boot hodi halo riset atu buka resposta ba ninia pergunta sira. Neʼe ajuda tebes haʼu atu hametin haʼu-nia relasaun ho Jeová no haʼu hakarak tebes atu hasoru fali ema sira-neʼe.

Lakleur depois neʼe, katuas área husu haʼu atu muda ba El Dorado, Arkansas atu ajuda kongregasaun iha neʼebá. Durante tempu neʼebé haʼu hela iha neʼebá, haʼu bá-mai Colorado beibeik atu hasoru ho komisaun neʼebé foti desizaun kona-ba sé mak presiza tama militár. Loron ida, bainhira haʼu ho karreta hamutuk ho pioneiru balu iha Texas, haʼu-nia karreta xoke aat toʼo la bele laʼo tan. Ami telefone ba irmaun ida no nia mai lori ami ulukliu ba ninia uma, no depois, bá tuir reuniaun. Iha reuniaun, sira hatoʼo avizu kona-ba ami-nia asidente, no irmaun-irmán sira, ho laran-diʼak fó osan uitoan atu ajuda ami. Irmaun neʼe mós ajuda atu faʼan haʼu-nia karreta ho folin $25.

Ema ajuda tula ami ba Wichita no iha neʼebá, ami iha belun pioneiru ida, naran Doc. Nia iha oan-kaduak naʼin-rua, Frank no Francis, no toʼo agora sira nafatin haʼu-nia belun diʼak. Sira iha karreta tuan ida neʼebé sira faʼan ba haʼu ho folin $25, folin hanesan ho karreta neʼebé haʼu faʼan tiha ona. Neʼe dala primeiru iha haʼu-nia moris haʼu haree oinsá Jeová fó buat neʼebé haʼu presiza tanba haʼu tau nia uluk. Doc ho ninia feen fó koñese haʼu ba irmán diʼak ida naran Bethel Crane. Ninia inan, Ruth hela iha Wellington, Kansas, no nia pioneiru ida neʼebé laran-manas tebes. Toʼo nia tinan 90 mós nia la para. La toʼo tinan ida, iha 1958, haʼu kaben ho Bethel no ami komesa pioneiru hamutuk iha El Dorado.

KONVITE FURAK SIRA

Tanba ami hakarak banati-tuir ezemplu diʼak sira neʼebé uluk ema hatudu ba ami, ami deside katak ami sei simu knaar naran deʼit neʼebé Jeová fó ba ami. Ulukliu, ami hetan knaar atu pioneiru tempu-tomak iha Walnut Ridge, Arkansas. Depois, iha tinan 1962, ami kontente tebes simu konvite atu tuir eskola Gilead, klase númeru 37. Ami mós kontente rona katak Don Steele sei tuir klase neʼe hamutuk ho ami. Bainhira ami-nia eskola hotu, ami simu knaar ba Nairobi, rai-Kénia. Ami triste atu husik ami-nia belun sira iha Novaiorke, maibé kontente bainhira ami toʼo iha aeroportu iha Nairobi no haree ami-nia irmaun-irmán sira mai atu hasoru ami.

Lakleur deʼit ami gosta tebes rai-Kénia no ami-nia knaar atu haklaken iha neʼebá. Ami-nia estudante sira neʼebé primeiru hetan batizmu mak Chris no Mary Kanaiya. Toʼo agora sira nafatin serbí tempu-tomak iha rai-Kénia. Liutiha tinan ida, ami simu knaar atu bá Kampala, rai-Uganda. Ami mak misionáriu primeiru atu toʼo iha rai neʼe. Tempu sira-neʼe kapás tebes tanba ema barak loos hakarak aprende kona-ba lia-loos no sira barak ikusmai sai ami-nia irmaun-irmán sira. Maibé liutiha tinan tolu ho balu iha Áfrika, ami fila ba Estadus Unidus tanba haʼu-nia feen isin-rua. Loron neʼebé ami sai husi Áfrika mak triste liu fali tempu neʼebé ami sai husi Novaiorke. Ami hadomi tebes ema Áfrika sira no hein katak loron ida ami bele fila fali.

AMI-NIA KNAAR FOUN

Ami muda ba Colorado nia parte oeste, iha fatin neʼebé haʼu-nia inan-aman hela. Lakleur, ami-nia oan-feto primeiru moris, naran Kimberly, no liutiha fulan 17, Stephany mós moris. Ami-nia knaar foun nuʼudar inan-aman mak importante tebes ba ami. Ami hakaʼas an atu hanorin lia-loos ba ami-nia oan-feto doben sira. Ami hakarak banati-tuir ezemplu diʼak sira neʼebé ema seluk hatudu mai ami. Ami hatene katak, maski oan sira bele aprende husi ema nia ezemplu diʼak, maibé neʼe la dehan katak sira sei foti desizaun rasik atu serbí Jeová bainhira sira boot ona. Haʼu hatene ida-neʼe tanba haʼu-nia alin naʼin-rua ikusmai husik lia-loos. Haʼu hein katak loron ida sira mós sei banati-tuir ezemplu diʼak neʼebé ema hatudu ba sira.

Ami kontente tebes haboot ami-nia oan sira, no ami sempre koko halo atividade sira hamutuk. Iha tempu neʼe ami hela iha sidade Aspen, Colorado. Ami hotu aprende atu eskí hodi ami bele uza tempu atu halo desportu neʼe hamutuk nuʼudar família. Neʼe mós fó oportunidade atu koʼalia ba ami-nia oan sira. Ami kemping hamutuk no uza tempu neʼebé ami tuur haleʼu ahi atu koʼalia hamutuk. Maski ami-nia oan sira sei kiʼik, sira koʼalia kona-ba saida mak sira sei halo bainhira sira sai boot, no ema hanesan saida mak sira hakarak kaben. Ami hakaʼas an hanorin ami-nia oan-feto sira atu hadomi Jeová. Ami sempre fó laran-manas ba sira atu halo planu serbí Jeová tempu-tomak no kaben ho ema neʼebé iha planu hanesan ho sira-nian. Ami mós ajuda sira komprende katak diʼak liu lalika kaben sedu. Ami sempre dehan ba sira “Stay free until you are at least 23.” (Pelumenus hein toʼo imi tinan 23.)

Nuʼudar inan-aman, ami banati-tuir ezemplu diʼak neʼebé ami-nia inan-aman hatudu ba ami hodi tuir reuniaun beibeik no bá haklaken kada semana nuʼudar família. Dala ruma ami konvida irmaun-irmán balu neʼebé serbí tempu-tomak atu hela iha ami-nia uma. Ami mós koʼalia beibeik kona-ba oinsá ami gosta tebes serbisu misionáriu no hein loron ida ami naʼin-haat bele bá vizita Áfrika hamutuk. Ami-nia oan-feto sira hein namanas ba ida-neʼe.

Kada semana ami la falta atu halaʼo estudu família nian. Ami finje halo tuir situasaun neʼebé bele akontese iha eskola, no ami-nia oan sira mak treinu hatán ema nia pergunta sira. Sira gosta dalan hanesan neʼe no halo sira fiar an. Maibé bainhira sira sai boot uitoan, dala ruma sira muramura kona-ba estudu família nian. Loron ida, tanba haʼu hirus sira, haʼu dehan ita sei la estuda iha kalan neʼe, no haruka fila ba sira-nia kuartu. Sira hakfodak tebes, komesa tanis no dehan katak tuir loloos sira hakarak estuda. Iha tempu neʼe ami foin hatene katak ami ajuda duni sira atu hafolin buat espirituál nian. Ikusmai sira gosta tebes estudu família nian, no sira sente livre atu fó-hatene ba ami sira-nia sentimentu. Dala ruma ami sente laran-kanek uitoan atu rona katak sira la konkorda ho Bíblia nia hanorin ruma. Maibé diʼak tanba ami bele hatene buat neʼebé iha sira-nia laran, no bainhira koʼalia tiha ho sira, ikusmai sira mós simu Jeová nia hanoin.

MUDANSA TAN

Ami sente ami-nia oan-feto sira boot lalais deʼit. Maibé liuhusi matadalan sira husi Jeová nia organizasaun, ami konsege haboot sira hodi hadomi Jeová. Ami kontente tebes bainhira sira ramata eskola no deside atu foti pioneiru. Sira mós aprende oinsá atu tau matan sira rasik nia presiza. Ikusmai sira hamutuk ho irmán naʼin-rua muda atu serbí iha Cleveland, Tennessee, tanba fatin neʼe presiza tan haklaken-naʼin. Ami hanoin tebes sira maibé kontente tanba sira uza sira-nia moris atu halaʼo serbisu tempu-tomak ba Jeová. Lakleur, haʼu no Bethel foti fali pioneiru, no ikusmai simu priviléjiu atu hetan treinu hodi sai katuas área no halo serbisu arranja reuniaun boot sira.

Antes ami-nia oan-feto sira muda ba Tennessee, sira bá vizita Londres, Inglaterra no bá haree sukursál. Tempu neʼebá, Stephany foin tinan 19 no nia hasoru irmaun joven ida neʼebé serbí iha Betel, naran Paul Norton. Tempu balu liutiha, bainhira sira bá fali, Kimberly hasoru Paul nia kolega serbisu ida naran Brian Llewellyn. Paul no Stephany ikusmai kaben, maibé nia hein toʼo bainhira nia tinan 23. Tinan tuirmai, Brian no Kimberly mós kaben bainhira Kimberly tinan 25. Nuneʼe, sira hein duni toʼo sira liu ona tinan 23. Ami kontente tebes ho irmaun sira neʼebé sira hili atu kaben.

Ami-nia oan-feto sira dehan katak ezemplu neʼebé ami no sira-nia avó sira hatudu mak ajuda sira atu ‘buka uluk Maromak nia Ukun’ iha tempu hotu, inklui mós tempu neʼebé sira hetan problema ho osan. (Mateus 6:33) Iha fulan-Abríl 1998, Paul ho Stephany hetan konvite atu tuir eskola Gilead klase 105, no depois, hetan knaar atu serbí iha Malavi, Áfrika. Iha tempu hanesan, Brian no Kimberly hetan konvite atu serbí iha Betel iha Londres no depois neʼe, simu fali knaar atu serbí iha Betel iha Malavi. Neʼe halo ami kontente tebes tanba neʼe mak dalan neʼebé diʼak liu ba joven sira atu uza sira-nia moris.

KONVITE FURAK IDA TAN

Iha Janeiru 2001 haʼu simu telefone husi irmaun Marais neʼebé haʼu koʼalia uluk. Irmaun neʼe mak koordenadór ba Departamentu Serbisu Tradusaun no nia esplika katak sukursál halo hela planu atu fó treinu ba tradutór sira iha mundu tomak kona-ba komprende liután lia-inglés. Irmaun Marais dehan katak, maski haʼu tinan 64 ona, sira hanoin hela atu husu haʼu nuʼudar mestre ida atu fó treinu neʼe. Haʼu no Bethel halo orasaun kona-ba neʼe, no ami mós husu ami-nia inan sira-nia hanoin. Se ami bá, neʼe katak ami la bele tau matan ona ba sira. Maski nuneʼe sira rua hakarak ami atu tuir. Haʼu bolu fali irmaun neʼe no fó-hatene nia katak ami kontente simu konvite neʼe.

Depois neʼe, haʼu-nia inan hetan kankru. Haʼu dehan ba nia katak ami sei hela no ajuda haʼu-nia alin Linda hodi tau matan ba nia. Maibé amá lakohi no dehan: “Se imi la bá, haʼu sei sente aat liután.” Linda mós sente hanesan. Ami agradese tebes ba sakrifísiu boot neʼebé sira halo ba ami, no irmaun-irmán sira-nia ajuda. Iha tempu neʼebé ami arranka ba Watchtower Educational Center iha Patterson, Novaiorke, loron tuirmai, Linda telefone ami no dehan katak amá mate. Ami koko atu sai okupadu nafatin ho ami-nia knaar foun tanba se haʼu-nia amá sei moris, neʼe mak buat neʼebé nia hakarak ami atu halo.

Ami-nia knaar primeiru mak atu bá sukursál iha Malavi, fatin neʼebé ami-nia oan-feto sira no sira-nia laʼen serbí daudaun. Ami kontente tebes atu hasoru fali ho sira. Tuirmai ami bá fali Zimbábue no depois ba Zámbia atu fó treinu iha neʼebá. Ami hanorin kursu neʼe ba tinan tolu ho balu, ami simu knaar atu bá fali Malavi hodi hakerek esperiénsia husi irmaun-irmán sira neʼebé hetan terus tanba neutrál.b—Haree nota iha kraik.

Iha 2005 ami triste dala ida tan tanba presiza husik Áfrika no bá fali Basalt, Colorado. Haʼu no Bethel kontinua pioneiru iha neʼe. Iha tinan 2006 Brian no Kimberly muda mai Basalt no hela iha ami-nia uma sorin ho sira-nia oan-feto naʼin-rua naran Mackenzie no Elizabeth. Toʼo agora, Paul no Stephany sei iha Malavi, no Paul serbí iha Grupu Koordenadór ba Sukursál. Agora haʼu besik tinan 80 no haʼu gosta haree irmaun joven sira neʼebé uluk serbisu hamutuk ho haʼu, agora sira mak kaer fali knaar sira neʼebé uluk haʼu halo. Iha ami-nia moris ami hakaʼas an atu aprende husi ezemplu diʼak sira neʼebé ema hatudu ba ami, hodi ami mós bele sai nuʼudar ezemplu diʼak ba ami-nia oan no bei-oan. Ida-neʼe lori ksolok boot ba ami.