Saida mak ema bele aprende kuandu sira haree ita?
1. Saida deʼit mak Jesus nia dixípulu sira aprende kuandu sira haree nia?
1 Jesus hatete: “Simu haʼu-nia ukun bá hodi banati-tuir haʼu.” (Mt 11:29) Jesus hanorin ema seluk laʼós deʼit ho ninia liafuan, maibé ho ninia ezemplu. Hanoin toʼok, saida mak dixípulu sira aprende kuandu sira haree Jesus nia ezemplu? Jesus hatudu laran-diʼak no domin. (Mt 8:1-3; Mc 6:30-34) Nia haraik an. (Joao 13:2-5) Nuʼudar dixípulu sira laʼo hamutuk ho Jesus atu haklaken, sira haree katak nia serbisu ho badinas no matenek atu hanorin lia-loos ba ema. (Lc 8:1; 21:37, 38) Oinsá mak ita-nia hahalok iha serbisu haklaken book ema seluk neʼebé haree ita?
2. Oinsá mak ita-nia ezemplu diʼak iha haklaken-fatin bele book ema nia laran?
2 Ema iha haklaken-fatin: Kuandu ita hatais moos, hatudu hahalok diʼak no hatudu interese ba ema iha haklaken-fatin, ida-neʼe bele book sira-nia laran. (2 Kor 6:3; Flp 1:27) Sira haree katak ita uza beibeik Bíblia. Ema balu kontente tanba ita rona didiʼak kuandu sira koʼalia. Tan neʼe, keta haluha katak importante tebes atu hatudu ezemplu diʼak iha buat hotu tanba ida-neʼe bele book ema atu simu mensajen Reinu nian.
3. Oinsá mak ita-nia hahalok diʼak bele ajuda ita-nia irmaun-irmán sira?
3 Ita-nia irmaun-irmán sira: Liután neʼe, hanoin mós oinsá mak ita-nia hahalok diʼak bele ajuda ita-nia irmaun-irmán sira. Ita-nia badinas atu haklaken bele fó laran-manas ba sira. Hanesan besi bele halo besi seluk sai kroʼat, nuneʼe mós ita-nia liafuan neʼebé prepara ho didiʼak ba serbisu haklaken sei book ita-nia irmaun-irmán seluk atu hakarak aumenta sira-nia matenek atu haklaken. (Prov 27:17) Kuandu ita badinas hakerek informasaun hotu kona-ba ema neʼebé hatudu interese ba Bíblia no fila fali atu vizita sira, ida-neʼe bele ajuda ita-nia maluk seluk atu halo buat neʼebé hanesan. Se ita halaʼo didiʼak ita-nia knaar atu haklaken, ida-neʼe sei book ita-nia irmaun-irmán seluk atu halo tuir ita-nia ezemplu.—2 Tim 4:5.
4. Tanbasá mak ita presiza hanoin beibeik kona-ba ita-nia ezemplu?
4 Tan neʼe, diʼak atu ita hanoin beibeik kona-ba ita-nia hahalok no ita-nia liafuan no oinsá mak ita-nia ezemplu book ema seluk. Ita-nia ezemplu neʼebé diʼak sei halo Maromak Jeová kontente no ida-neʼe mós halo ita sente hanesan apóstolu Paulo neʼebé hatete: “Imi buka halo tuir haʼu-nia hahalok, nuʼudar haʼu halo tuir Kristu.”—1 Kor 11:1.