Haklaken ho matenek
1. Oinsá mak matadalan iha 1 Korinto 9:26 kona ita-nia serbisu haklaken?
1 Apostolu Paulo hatete: “Haʼu la halai hodi la hatene atu bá neʼebé; haʼu la halo funu hanesan tuku deʼit lalatak.” (1 Kor 9:26) Iha eskritura neʼe, Paulo koʼalia kona-ba ninia hakarak atu serbí deʼit Jeová. Maibé matadalan neʼe mós kona ita-nia serbisu haklaken. Hodi la “tuku deʼit lalatak”, ita mós hakarak haklaken ho matenek hodi bele hetan rezultadu diʼak. Oinsá mak ita bele halo ida-neʼe?
2. Oinsá mak ita bele banati-tuir Paulo no ema kristaun iha tempu uluk kona-ba bainhira no iha neʼebé mak diʼak atu haklaken?
2 Haklaken iha fatin neʼebé ema barak iha: Paulo no ema kristaun sira iha tempu uluk haklaken iha fatin neʼebé ema barak iha. (Apos 5:42; 16:13; 17:17) Entaun, se iha ita-nia haklaken-fatin ema barak iha uma kuandu rai-nakaras, karik ida-neʼe mak tempu diʼak atu haklaken uma ba uma. Baibain iha dadeer-saan no iha lokraik ema barak hein karreta iha dalan, loos ka lae? Bainhira mak ema barak bá loja ka merkadu? Karik ita bele haklaken iha tempu sira-neʼe.
3. Oinsá mak ita bele uza matenek iha ita-nia haklaken-fatin?
3 Uza matenek iha haklaken-fatin: Ita presiza uza matenek kuandu haklaken iha ita-nia haklaken-fatin. Porezemplu, kuandu ema barak liu bá haklaken iha fatin ida deʼit, neʼe halo irmaun neʼebé dirije grupu haklaken uza tempu barak atu organiza irmaun-irmán sira. Entaun, duké halo ida-neʼe, diʼak liu atu fahe haklaken-naʼin sira ba grupu kiʼik balu. Nuneʼe mós, kuandu haklaken iha fatin neʼebé dook husi sidade, diʼak atu lori deʼit haklaken-naʼin balu iha karreta hodi nuneʼe sira hotu iha oportunidade atu haklaken ba ema iha fatin neʼe. Karik ita mós bele husu atu hetan mapa besik ita-nia uma hodi nuneʼe ita la gasta tempu barak atu laʼo dook bá haklaken-fatin.
4. Oinsá mak ita bele hetan susesu nuʼudar “peskadór ema nian”?
4 Jesus bolu ninia dixípulu sira nuʼudar “peskadór ema nian”. (Mc 1:17) Peskadór ida laʼós bá tasi deʼit, maibé nia hakarak atu kail ikan duni. Tan neʼe, peskadór sira neʼebé sempre kail ikan, bá tasi iha tempu no fatin neʼebé ikan barak iha, no komesa kedas atu kail. Sin, sira uza matenek kuandu bá kail ikan. Entaun, ita mós presiza hakaʼas an nafatin kuandu ita haklaken.—Ebr 6:11.