Hetan mapa rasik bele ajuda ita ka lae?
1. Hetan mapa rasik katak sá?
1 Hetan mapa rasik katak sá? Neʼe katak ita rasik bele hetan mapa husi kongregasaun kona-ba haklaken-fatin neʼebé besik ita-nia hela-fatin. Livru Diorganisasi iha pájina 103 hatete: “Hodi hetan mapa rasik bele ajuda ita atu uza didiʼak tempu neʼebé ita iha atu halo serbisu haklaken. No mós, karik ita bele konvida maluk ida atu haklaken hamutuk ho ita iha ita-nia mapa rasik.”
2. Hetan mapa rasik bele ajuda atu apoia grupu haklaken iha dalan saida deʼit?
2 Neʼe apoia grupu haklaken: Se ita hetan mapa rasik besik ita-nia serbisu-fatin, karik ita bele uza tempu han-meiudia, ka depois ita ramata serbisu atu haklaken. No ita bele konvida maluk ida neʼebé serbisu besik ita atu haklaken hamutuk. Se ita hetan mapa rasik besik ita-nia uma, karik ita-nia família bele uza mapa neʼe atu haklaken kuandu rai-nakaras. Maski ita la tuir grupu antes bá haklaken, diʼak atu halo orasaun ba Jeová hodi husu ninia ajuda. (Flp 4:6) No mós, diʼak atu tetu didiʼak tempu neʼebé ita uza atu haklaken iha ita-nia mapa rasik. Maibé keta haluha atu apoia nafatin grupu haklaken kongregasaun nian. Liuliu iha findesemana tanba haklaken-naʼin barak halibur an atu bá haklaken. Tan neʼe diʼak atu apoia ita-nia grupu haklaken.
3. Hetan mapa rasik lori rezultadu diʼak saida deʼit?
3 Lori rezultadu diʼak: Se ita hetan mapa rasik, ita bele haklaken iha tempu naran deʼit tuir ita-nia programa. Ita bele iha tempu barak atu haklaken tanba ita la presiza bá dook. Hodi hetan mapa rasik, ida-neʼe fó tan oportunidade ba irmaun-irmán balu atu serbí nuʼudar pioneiru estra ka regulár. Tanba uma-naʼin sira neʼebé hatudu interese hela besik nuʼudar ita-nia viziñu, fasil atu halo vizita fali no komesa estudu Bíblia ho sira. Haklaken-naʼin barak haree katak hodi iha mapa rasik, ida neʼe ajuda sira atu koñese sira-nia viziñu, no ajuda viziñu mós atu la sente taʼuk kuandu hasoru malu. Bainhira halo kompletu mapa neʼe, diʼak atu fó fali ba kongregasaun hodi haklaken-naʼin seluk bele uza. Entaun, hetan mapa rasik bele ajuda ita no ita-nia família atu kaer didiʼak ita-nia knaar kona-ba serbisu haklaken ka lae?—2 Tim 4:5.