Kriasaun hotu hatudu sai Maromak nia glória
Maski ema barak gosta haree kriasaun, maibé ema uitoan deʼit mak rekoñese katak kriasaun hatudu sai kona-ba Kriadór Boot nia hanoin no hahalok sira. (Rom 1:20) Iha tempu uluk, David aprende kona-ba Maromak Jeová liuhusi eskritura sira neʼebé Maromak leno. Maibé David mós aprende kona-ba Maromak liuhusi Ninia kriasaun, no ida-neʼe book nia atu hakbesik ba Maromak. (Sal 8:3, 4) Vídeo ho títulu Keajaiban Ciptaan Menyingkapkan Kemuliaan Allah bele ajuda ita, ita-nia oan sira, no ita-nia estudante Bíblia sira atu estuda didiʼak Maromak Jeová nia kriasaun balu. Hodi nuneʼe ita bele hatene ita-nia Kriadór Boot nia hanoin no hahalok furak sira, no ajuda ita hakbesik liután ba nia. Haree vídeo neʼe, no koko toʼok atu hatán pergunta sira tuirmai neʼe.
(1) Ita-nia universu boot tebetebes no laʼo ho didiʼak no la runguranga, oinsá mak ida-neʼe book ita atu hafolin Maromak Jeová liután? (Isa 40:26) (2) Kuandu ita estuda didiʼak no hanoin kleʼan kona-ba bee, saida mak ita bele aprende kona-ba Maromak? (Apok 14:7) (3) Maromak halo mundu la kiʼik no la boot liu, no la dook liu ka la besik liu husi loro-matan. Oinsá mak ida-neʼe hatudu Jeová nia matenek? (4) Fulan ajuda mundu iha dalan saida deʼit? (Sal 89:37) (5) Oinsá mak Maromak kria ema iha dalan neʼebé sira bele goza moris? (6) Saida mak DNA halo? (Sal 139:16) (7) Oinsá mak ema la hanesan ho Maromak Jeová nia kriasaun sira seluk? (Gên 1:26) (8) Saida deʼit mak Ita hakarak halo iha mundu foun?
Informasaun liután (Fitur Tambahan): (9) Tansá iha kór oioin? (10) Oinsá mak ai-hun neʼebé aas bele xupa bee saʼe toʼo tutun? (11) Bee ajuda ita-nia isin iha dalan saida deʼit? (12) Fó toʼok ezemplu balu oinsá kriasaun sira apoia malu atu bele kontinua moris? (13) Oinsá mak kriasaun sira-neʼe hatene katak sira presiza malu? (14) Saida mak “sudut emas” (golden angle), no oinsá mak ita bele haree ida-neʼe iha kriasaun?
Estuda didiʼak Maromak Jeová nia kriasaun: Jesus fó laran-manas ba ita atu “haree manu sira iha lalehan” no atu aprende husi “ai-funan líriu sira neʼebé moris iha rai”. (Mt 6:26, 28) Hodi halo nuneʼe ita bele hametin ita-nia fiar ba ita-nia Kriadór, no ajuda ita atu hafolin liután Maromak Jeová nia matenek, domin, no ninia kbiit atu salva ita. Nuneʼe, duké husik buat neʼebé ema iha mundu neʼe halo atu dada ita-nia atensaun, mai ita hakaʼas an atu estuda didiʼak Maromak Jeová nia kriasaun, no hanoin kleʼan saida mak kriasaun sira-neʼe hanorin ita kona-ba ita-nia Maromak.—Sal 19:1.