Sé mak Halo Jeová nia Hakarak Ohin Loron?

1. Bainhira mak ita sei komesa estuda iha kongregasaun broxura Sé mak Halo Jeová nia Hakarak Ohin Loron? No oinsá mak ida-neʼe ajuda ita?

¹ Iha semana komesa 28 Outubru, ita sei uza broxura Sé mak Halo Jeová nia Hakarak Ohin Loron? iha Estudu Bíblia iha Kongregasaun. Broxura foun neʼe fó sai iha reuniaun boot ba loron tolu ho tema “Proteje bá ó-nia Laran”, no broxura neʼe ajuda estudante Bíblia hatene liután kona-ba ita-nia organizasaun. Hodi estuda broxura neʼe iha kongregasaun, neʼe sei ajuda ita hafolin liután ita-nia oportunidade espesiál atu sai parte ba Jeová nia organizasaun, no sei ajuda ita atu uza broxura kapás neʼe iha serbisu haklaken.—Sal 48:13.

2. Oinsá mak ita sei estuda broxura neʼe iha kongregasaun?

² Estuda oinsá: Irmaun neʼebé dirije estudu sei presiza fahe tempu ba lisaun ida-idak. Nia sei hahú estudu hodi lee pergunta sira neʼebé sai nuʼudar títulu. Tuirmai, nia sei husu lee-naʼin atu lee parágrafu primeiru, no depois nia sei husu pergunta neʼebé nia prepara nanis kona-ba parágrafu neʼe. Tuir fali mai, parte sira neʼebé komesa ho letra metan sei lee no koʼalia ketaketak. Lee tiha parte ida, irmaun neʼe sei konvida rona-naʼin atu fó komentáriu oinsá parte neʼe fó resposta ba lisaun neʼe nia títulu. Broxura neʼe mós iha foto barak neʼebé bele uza atu fó komentáriu. Se iha tempu, lee eskritura sira neʼebé importante. No antes muda ba lisaun tuirmai, irmaun neʼe sei husu pergunta sira iha lisaun nia rohan. Se lisaun neʼe iha kaixa “Buka-hatene liután”, irmaun neʼe sei husu ema atu lee, no depois konvida rona-naʼin atu fó komentáriu oinsá estudante Bíblia bele hetan buat diʼak hodi halo tuir matadalan iha kaixa neʼe. Se iha tempu uitoan tan depois koʼalia tiha lisaun sira ba semana neʼe, irmaun bele husu fali pergunta sira neʼebé sai nuʼudar títulu ba lisaun sira-neʼe. Maski ita uza dalan hanesan neʼe kuandu ita estuda broxura neʼe iha Estudu Bíblia iha Kongregasaun, maibé neʼe la dehan katak ita tenke halo hanesan neʼe kuandu ita uza broxura neʼe atu estuda ho ema.

3. Oinsá mak ita bele hetan buat diʼak hodi estuda broxura neʼe?

³ Atu ita hetan buat diʼak husi broxura neʼe, ita presiza prepara didiʼak antes tuir reuniaun, no hakaʼas an atu hola parte hodi fó komentáriu. Nuʼudar ita estuda broxura neʼe, hanoin toʼok kona-ba oinsá mak lisaun ida-idak bele ajuda estudante Bíblia. Ami hein katak hodi estuda broxura neʼe, ida-neʼe sei ajuda ita atu konvida ema barak tan atu hamutuk ho ita hodi halo Maromak nia hakarak hodi sira mós bele hetan oportunidade atu hetan moris ba nafatin.—1 Joao 2:17.