Oinsá atu uza broxura Sé mak Halo Jeová nia Hakarak Ohin Loron?
Broxura foun atu ajuda estudante Bíblia hatene kona-ba ita-nia organizasaun
1. Tanbasá mak ita-nia organizasaun halo broxura Jeová nia Hakarak?
1 Ita komesa ona atu uza broxura foun Sé mak Halo Jeová nia Hakarak Ohin Loron? Broxura neʼe halo atu (1) ajuda estudante Bíblia hatene kona-ba Testemuña ba Jeová, (2) ajuda sira hatene kona-ba ita-nia atividade, no (3) atu hatudu ba sira oinsá mak ita-nia organizasaun halaʼo iha mundu tomak. Lisaun ida-idak iha broxura Jeová nia Hakarak mak pájina ida deʼit, entaun, fasil atu koʼalia hamutuk ho ita-nia estudante iha minutu lima toʼo sanulu nia laran kuandu ita ramata estudu semana-semana.
2. Broxura neʼe halo oinsá no saida deʼit mak ita bele hetan iha broxura neʼe?
2 Halo oinsá: Broxura neʼe fahe ba parte tolu, no hanesan temi iha leten, parte ida-idak koʼalia kona-ba informasaun oioin kona-ba Jeová nia organizasaun. Broxura neʼe iha lisaun hamutuk 28, no lisaun ida-idak mak pergunta. Subtítulu sira neʼebé hakerek ho letra metan mak resposta ba pergunta neʼe. Iha broxura neʼe ita bele haree foto sira husi rai hamutuk 50 liu, no buat hirak-neʼe hatudu katak ita-nia serbisu halaʼo duni iha mundu tomak. Lisaun balu iha mós kaixa ho títulu “Buka-hatene liután”. Ita bele fó laran-manas ba ita-nia estudante atu halo tuir buat neʼebé hatete iha kaixa hirak-neʼe.
3. Oinsá mak ita bele uza broxura Jeová nia Hakarak?
3 Oinsá mak ita bele uza: Komesa hodi hatudu ba estudante pergunta neʼebé uza nuʼudar títulu ba lisaun. Nuʼudar ita lee lisaun neʼe hamutuk ho estudante, hatudu katak subtítulu neʼebé hakerek ho letra metan mak importante. Ikusmai, bele koʼalia hamutuk kona-ba pergunta sira iha pájina nia kraik. Ita bele lee kedas lisaun tomak ka bele fahe ba parte balu. Ita mak hili rasik eskritura ida-neʼebé mak diʼak atu lee. Labele haluha atu koʼalia kona-ba foto no kaixa “Buka-hatene liután”. Maski diʼak liu atu estuda lisaun sira tuituir malu, maibé se ita haree katak iha lisaun ruma neʼebé sei ajuda ita-nia estudante, ita bele hakat kedas ba lisaun neʼe. Porezemplu, se besik atu halaʼo reuniaun boot, ita bele hakat kedas ba lisaun 11.
4. Tanbasá mak ita kontente atu iha broxura foun neʼe?
4 Kuandu ita estuda Bíblia ho ema ida, ita ajuda nia atu hatene didiʼak kona-ba ita-nia Aman iha lalehan. Maibé, ita mós presiza hanorin nia kona-ba Jeová nia organizasaun. (Prov 6:20) Sin, ita kontente tebes atu iha broxura foun neʼebé ajuda ita atu bele halo ida-neʼe!