Aumenta ita-nia matenek iha serbisu haklaken—Hakerek informasaun kuandu hasoru ema neʼebé hatudu interese

Apóstolu Paulo fó konsellu ba Timóteo hodi dehan: “Haree didiʼak ó-nia an no ó-nia hanorin.” (1 Timóteo 4:16) Ninia liafuan sira-neʼe hatudu katak, maski ita mak ema foun ka iha esperiénsia barak ona, ita tenke hakaʼas an atu laʼo ba oin nuʼudar haklaken-naʼin. Atu ajuda ita kontinua laʼo ba oin, Ita-nia Serbisu Kristaun sei fó sai informasaun foun neʼebé tuituir malu ho tema “Aumenta ita-nia matenek iha serbisu haklaken”. Informasaun sira-neʼe sei koʼalia kona-ba saida mak ita presiza halo atu sai haklaken-naʼin neʼebé diʼak, no mós fó sai sujestaun balu kona-ba neʼe. Durante fulan neʼe, ami hakarak atu ema ida-idak tau atensaun liu ba sujestaun neʼe. Depois fulan neʼe ramata, sei iha parte ida iha Reuniaun Serbisu nian neʼebé fó ita oportunidade atu fó komentáriu kona-ba oinsá mak arranju neʼe lori buat diʼak mai. Fulan neʼe, ami hakarak atu ema hotu hakaʼas an hakerek informasaun kona-ba ema neʼebé hatudu interese.

Tanbasá importante: Ita-nia knaar neʼebé Jesus fó ba ita mak laʼós deʼit atu haklaken husi uma ba uma. Tuir loloos, knaar neʼe inklui vizita fali ema sira neʼebé hatudu interese no hanorin sira, hodi rega fini lia-loos nian neʼebé ita kuda tiha ona. (Mateus 28:19, 20; 1 Korinto 3:6-9) Neʼe katak ita presiza hetan fali sira, koʼalia kona-ba buat neʼebé sira hanoin, no aumenta liután informasaun neʼebé ita koʼalia uluk ba sira. Tan neʼe, kuandu ita hetan ema neʼebé hatudu interese, importante duni ba ita atu hakerek informasaun kona-ba sira.

Oinsá atu halo ida-neʼe:

• Kuandu ita haklaken, ita tenke lori surat-tahan no lapizeira hodi ita bele hakerek informasaun kona-ba ema neʼebé hatudu interese. Hakerek informasaun sira ho momoos no la runguranga. Kuandu ita ramata ona vizita ema neʼe, hakerek kedas informasaun sira iha ita-nia livru.

• Hakerek informasaun oioin kona-ba uma-naʼin neʼebé ita hasoru. Ninia naran mak saida? Nia hela iha neʼebé, no ninia númeru telefone ka email mak saida? Nia no ninia família mak ema oinsá?

• Hakerek ho klaru kona-ba informasaun neʼebé ita koʼalia ho uma-naʼin. Eskritura saida mak ita uza? Saida mak nia fó sai kona-ba buat neʼebé nia fiar? Ita fó livru saida ba nia? Hakerek kona-ba oras, loron, no data neʼebé ita hasoru nia.

• Hakerek kona-ba saida mak ita hakarak koʼalia kuandu ita vizita fali. Pergunta saida mak ita husik hela ba uma-naʼin? Loron saida mak ita promete ba uma-naʼin atu vizita fali?

• Dala ida-idak neʼebé ita vizita fali uma-naʼin, ita presiza kontinua aumenta liután informasaun neʼebé ita hakerek kona-ba ema neʼe. No la sala atu hakerek informasaun barak.

Koko ida-neʼe durante fulan neʼe:

• Kuandu ita hakerek informasaun kona-ba uma-naʼin, diʼak atu fó sai mós ba ema neʼebé ita haklaken hamutuk kona-ba saida mak ita hakerek.