Aumenta ita-nia matenek iha serbisu haklaken—Oinsá se uma-naʼin hirus?

Tanbasá importante: Ema barak iha respeitu bainhira ita hasoru sira iha haklaken fatin. Maibé, Jesus fó-hatene nanis ona katak iha ema balu mós odi ita. (João 17:14) Tan neʼe, ita la hakfodak bainhira ita hasoru uma-naʼin neʼebé hirus. Maibé tanba ita reprezenta Jeová, ita hakarak trata sira iha dalan neʼebé Jeová gosta, hodi problema neʼe la bele sai boot. (Roma 12:17-21; 1 Pedro 3:15) Neʼe mós bele fó sasin diʼak ida ba uma-naʼin neʼe, no mós ema seluk neʼebé haree hela ita. Karik loron ida Testemuña seluk mai vizita sira, sira hakarak rona.—2 Korinto 6:3.

Oinsá atu halo ida-neʼe:

• Kalma no hatudu oin-midar nafatin. Hanesan neʼe bele hamenus problema. Keta sai hirus ho uma-naʼin nia hahalok neʼe. (Eclesiastes [Pengkhotbah] 7:9) Karik nia hirus tanba problema pesoál ruma ka tanba ita mak vizita iha tempu neʼebé sala. Se karik nia hirus kona-ba buat neʼebé ita haklaken ba nia, baibain tanba nia rona lia husi ema seluk.—2 Korinto 4:4.

• Hatán ho liafuan mamar no respeitu. (Provérbios [Amsal] 15:1) Karik ita fanu nia husi toba ka atrapalla nia husi buat ruma. Maski ita laʼós atu husu deskulpa ba ita-nia haklaken, maibé ita bele ho haraik-an husu deskulpa ba nia tanba ita mai vizita nia iha tempu neʼebé sala. Dala ruma nia hirus tanba nia rona buat neʼebé laloos kona-ba ita husi ema seluk. Se nuneʼe, karik ita bele dehan: “Haʼu bele komprende tansá mak ida-neʼe halo Ita-Boot hirus. Maibé, buat neʼebé ema hatete kona-ba ami laloos. Bele husik haʼu esplika uitoan ka?” Ka tanba nia la gosta kona-ba ita-nia fiar ruma, karik kona-ba arranju oinsá kongregasaun hasai ema ka kona-ba raan? Se nuneʼe, karik ita bele dehan: “Haʼu komprende Ita-Boot, tanba ema seluk mós koʼalia hanesan neʼe. Bele ka lae, haʼu hatudu ba Ita-Boot husi Bíblia kona-ba tópiku neʼe?”

• Se ema neʼe mak hirus makaʼas, karik diʼak atu la koʼalia buat ida no laʼo tiha deʼit. Se nia hatete ba ita katak nia lakohi haree tan Testemuña ba Jeová vizita nia, ita bele hatete ba nia katak ita sei halo tuir buat neʼebé nia hakarak.

Koko ida-neʼe durante fulan neʼe:

• Pratika hamutuk iha tempu adorasaun família nian.

• Laʼo sees tiha husi uma-naʼin siʼak-teen nia uma, koʼalia ho ita-nia pár karik ohin diʼak liu atu halo saida.